മാവേലിക്കരയിൽ നിയന്ത്രണംവിട്ട് മറിഞ്ഞ ഓട്ടോയിലേക്ക് സ്‌കൂട്ടർ ഇടിച്ചുകയറി; ഓട്ടോ ഡ്രൈവറും സ്‌കൂട്ടർ യാത്രികയും മരിച്ചു; അപകടം, മാവേലിക്കര പ്രായിക്കര പാലത്തിന് സമീപം

ആലപ്പുഴ: മാവേലിക്കരയിൽ ഓട്ടോറിക്ഷയും സ്‌കൂട്ടറും കൂട്ടിയിടിച്ചുണ്ടായ അപകടത്തിൽ രണ്ടു മരണം. ഓട്ടോ ഡ്രൈവർ ചെന്നിത്തല സ്വദേശി ഹരീന്ദ്രൻ (46), സ്‌കൂട്ടർ ഓടിച്ചിരുന്ന കുറത്തിക്കാട് പാലാഴി വീട്ടിൽ ആതിര അജയൻ (23) എന്നിവരാണ് മരിച്ചത്.

മാവേലിക്കര പ്രായിക്കര പാലത്തിന് സമീപം ശനിയാഴ്ച വൈകീട്ടാണ് അപകടമുണ്ടായത്. നിയന്ത്രണം വിട്ട് മറിഞ്ഞ ഓട്ടോയിലേക്ക് സ്‌കൂട്ടർ ഇടിച്ചുകയറുകയായിരുന്നു. ഓട്ടോ ഡ്രൈവറായ ഹരീന്ദ്രൻ സംഭവസ്ഥലത്തുവെച്ചുതന്നെ മരിച്ചു. ഗുരുതരമായി പരിക്കേറ്റ അതിരയെ ആലപ്പുഴ മെഡിക്കൽ കോളേജിലെത്തിച്ചെങ്കിലും ജീവൻ രക്ഷിക്കാനായില്ല.

ഹരീന്ദ്രന്റെ മൃതദേഹം മാവേലിക്കര ജില്ലാ ആശുപത്രിയിലും ആതിരയുടെ മൃതദേഹം ആലപ്പുഴ മെഡിക്കൽ കോളേജിലുമാണുള്ളത്.