ഓടിക്കൊണ്ടിരുന്ന ആന്‍ഡമാന്‍ എക്സ്പ്രസ് സ്ലീപ്പര്‍ കോച്ചിലെ ചവറ്റുകൊട്ടയില്‍ അനക്കം; യാത്രക്കാര്‍ നോക്കിനില്‍ക്കെ തലപൊക്കി പുറത്തുവന്നത് പെരുമ്പാമ്പ്
വിജയവാഡ: ആന്‍ഡമാന്‍ എക്സ്പ്രസ് ട്രെയിനിലെ യാത്രക്കാരെ ഞെട്ടിച്ച് എസ്-2 സ്ലീപ്പര്‍ കോച്ചിനുള്ളില്‍ പെരുമ്പാമ്പ്. അനക്കം കേട്ട് കോച്ചിന്റെ വാതിലിനടുത്ത് വെച്ചിരുന്ന ചവറ്റുകുട്ടയില്‍ നോക്കിയപ്പോഴാണ് പെരുമ്പാമ്പ് തലപൊക്കി പുറത്തുവന്നത്. തിങ്കളാഴ്ച വിജയവാഡ ലക്ഷ്യമാക്കി പോവുകയായിരുന്ന ട്രെയിനിലാണ് സംഭവം. വീഡിയോ ഓണ്‍ലൈനില്‍ പ്രചരിക്കുകയാണ്.
പാമ്പ് സാവധാനം വാതിലിന് നേരെ നീങ്ങുകയും തുടര്‍ന്ന് വാതിലിന്റെ ഹാന്‍ഡിലില്‍ ചുറ്റുകയും ചെയ്തു. യാത്രക്കാരാണ് മാറിനിന്ന് മൊബൈലില്‍ ഈ അപ്രതീക്ഷിത ദൃശ്യം പകര്‍ത്തിയത്. ട്രെയിന്‍ ഡോര്‍ണക്കല്‍ റെയില്‍വേ സ്റ്റേഷന്‍ കടന്നയുടന്‍ തന്നെ ട്രാവലിംഗ് ടിക്കറ്റ് എക്‌സാമിനര്‍ വെങ്കിടേശ്വര്‍ലു പാമ്പിനെ കണ്ടു. അദ്ദേഹം ഉടന്‍ തന്നെ ആര്‍.പി.എഫ്. സര്‍ക്കിള്‍ ഇന്‍സ്‌പെക്ടര്‍ സുരേഷ് ഗൗഡിനെ വിവരമറിയിക്കുകയും അദ്ദേഹം പാമ്പുപിടുത്തക്കാരനെ ബന്ധപ്പെടുകയും ചെയ്തു.
ഉടന്‍ തന്നെ ട്രെയിന്‍ ഡോര്‍ണക്കല്‍ റെയില്‍വേ സ്റ്റേഷനില്‍ നിര്‍ത്തി. അവിടെയെത്തിയ പാമ്പുപിടിത്തക്കാരന്‍ പെരുമ്പാമ്പിനെ കോച്ചില്‍ നിന്ന് സുരക്ഷിതമായി നീക്കം ചെയ്തു. റെയില്‍വേ അധികൃതരുടെ ഏകോപിച്ചുള്ള പ്രവര്‍ത്തനം യാത്രക്കാര്‍ക്ക് യാതൊരു ബുദ്ധിമുട്ടും അപകടവും ഉണ്ടാക്കാതെ സാഹചര്യം കൈകാര്യം ചെയ്യാന്‍ സഹായിച്ചു. സമയബന്ധിതമായ ഇടപെടലിനും സമചിത്തതയോടെയുള്ള രക്ഷാപ്രവര്‍ത്തനത്തിനും ആര്‍.പി.എഫ്. ഉദ്യോഗസ്ഥര്‍ പാമ്പുപിടിത്തക്കാരനായ മസ്താന്‍ എന്നയാളെ അഭിനന്ദിച്ചു.
