മുംബൈ: ഇന്ത്യൻ ക്രിക്കറ്റ് കൺട്രോൾ ബോർഡിന്റെ (ബിസിസിഐ) വാർഷിക കരാർ പട്ടികയിൽ ആദ്യമായി ഇടംപിടിച്ച് മലയാളി താരം സഞ്ജു സാംസൺ. ഒരു കോടി രൂപ പ്രതിഫലമുള്ള സി ഗ്രേഡിലാണ് സഞ്ജു ഉൾപ്പെട്ടത്.

2022 ഒക്ടോബർ മുതൽ ഈ വർഷം സെപ്റ്റംബർ വരെയുള്ള കാലയളവിലെ കരാർ ലിസ്റ്റാണ് ബിസിസിഐ പുറത്തുവിട്ടിരിക്കുന്നത്. ലിസ്റ്റ് പ്രകാരം ഗ്രേഡ് സിയിലാണ് സഞ്ജു സാംസൺ ഇടംപിടിച്ചിരിക്കുന്നത്. ഒരു കോടിയാണ് സി കാറ്റഗറിയിലുള്ളവർക്ക് ലഭിക്കുക. അജിൻക്യ രഹാനെ, ഭുവനേശ്വർ കുമാർ, ഇഷാന്ത് ശർമ, മയാങ്ക് അഗർവാൾ, ഹനുമാ വിഹാരി, വൃദ്ധിമാൻ സാഹ, ദീപക് ചാഹർ തുടങ്ങിയവരെ വാർഷിക കരാറിൽനിന്ന് ഒഴിവാക്കിയിട്ടുണ്ട്.

ടെസ്റ്റ് സ്പെഷ്യലിസ്റ്റ് ഉമേഷ് യാദവ്, ഏകദിന താരം ശിഖാർ ധവാൻ, ഷാർദുൽ താക്കൂർ, ഇഷാൻ കിഷൻ, ദീപക് ഹൂഡ, യൂസ്വേന്ദ്ര ചഹാൽ, കുൽദീപ് യാദവ്, വാഷിങ്ടൺ സുന്ദർ, അർഷ്ദീപ് സിങ്, കെ എസ് ഭരത് എന്നിവരാണ് ലിസ്റ്റിലുള്ള മറ്റു താരങ്ങൾ. എ പ്ലസ് ഗ്രേഡിലുള്ള താരങ്ങളുടെ പട്ടികയിൽ മാറ്റം വരുത്തിയിട്ടുണ്ട്. പുതുതായി രവീന്ദ്ര ജഡേജയെ പട്ടികയിൽ ഉൾപ്പെടുത്തി. ഇന്ത്യൻ ക്യാപ്റ്റൻ രോഹിത് ശർമ, വിരാട് കോലി, ജസ്പ്രിത് ബുമ്ര എന്നിവരാണ് നേരത്തെ പട്ടികയിലുണ്ടായിരുന്നത്.

അഞ്ച് കോടി പ്രതിഫലം ലഭിക്കുന്ന എ ഗ്രേഡിൽ നാല് താരങ്ങളുണ്ട്. ടെസ്റ്റ് സ്പെഷ്യലിസ്റ്റ് സ്പിന്നർ ആർ അശ്വിൻ, ട്വന്റി 20 ടീം ക്യാപ്റ്റൻ ഹാർദിക് പാണ്ഡ്യ, മുഹമ്മദ് ഷമി, അക്സർ പട്ടേൽ, റിഷഭ് പന്ത് എന്നിവരേയാണ് എ ഗ്രേഡിൽ ഉൾപ്പെടുത്തിയത്. മോശം ഫോമിലുള്ള കെ എൽ രാഹുലിനെ ബി ഗ്രേഡിലേക്ക് തരം താഴ്‌ത്തി. ടെസ്റ്റ് താരം ചേതേശ്വർ പുജാര, കെ എൽ രാഹുൽ, ശ്രേയസ് അയ്യർ, മൊഹമ്മദ് സിറാജ്, സൂര്യകുമാർ യാദവ്, ശുഭ്മാൻ ഗിൽ എന്നിവരാണ് നിലവിൽ ബി ഗ്രേഡിലുള്ള താരങ്ങൾ. മൂന്ന് കോടിയാണ് ഇവരുടെ പ്രതിഫലം.

കരാറിൽ ഉൾപ്പെട്ടതോടെ സഞ്ജു ഇന്ത്യൻ ക്രിക്കറ്റിന്റെ ഭാവി പദ്ധതികളുടെ ഭാഗമാണെന്ന് വ്യക്തമായിരിക്കുകയാണ്. വരുന്ന പരമ്പരകളിൽ അദ്ദേഹത്തിന് അവസരം ലഭിച്ചേക്കാം. പന്ത് കാറപകടത്തെ തുടർന്ന് പുറത്തുനിൽക്കുന്ന സാഹചര്യത്തിലും ഇഷാൻ കിഷന്റെ മോശം ഫോമും പരിഗണിച്ച് സഞ്ജുവിന് വീണ്ടും അവസരം നൽകാനാണ് സാധ്യത. 31ന് ആരംഭിക്കാനിരിക്കുന്ന ഐപിഎല്ലിലെ രാജസ്ഥാൻ റോയൽസ് ക്യാപ്റ്റൻ കൂടിയായ സഞ്ജുവിന് ലോകകപ്പിന് മുമ്പ് ഇന്ത്യൻ ടീമിൽ ഇടംപിടിക്കാനാകുമെന്നാണ് പ്രതീക്ഷ.
ബിസിസിഐ കരാർ പട്ടിക

എ പ്ലസ് രോഹിത് ശർമ, വിരാട് കോലി, ജസ്പ്രീത് ബുമ്ര, രവീന്ദ്ര ജഡേജ

എ ഹാർദിക് പാണ്ഡ്യ, ആർ. അശ്വിൻ, മുഹമ്മദ് ഷമി, ഋഷഭ് പന്ത്, അക്ഷർ പട്ടേൽ

ബി ചേതേശ്വർ പൂജാര, കെ.എൽ. രാഹുൽ, ശ്രേയസ് അയ്യർ, മുഹമ്മദ് സിറാജ്, സൂര്യകുമാർ യാദവ്, ശുഭ്മൻ ഗിൽ.

സി ഉമേഷ് യാദവ്, ശിഖർ ധവാൻ, ഷാർദൂൽ ഠാക്കൂർ, ഇഷാൻ കിഷൻ, ദീപക് ഹൂഡ, യുസ്‌വേന്ദ്ര ചെഹൽ, കുൽദീപ് യാദവ്, വാഷിങ്ടൻ സുന്ദർ, സഞ്ജു സാംസൺ, അർഷ്ദീപ് സിങ്, കെ.എസ്. ഭരത്.

സ്പോർട്സ് ഡെസ്ക്

    സ്പോർട്സ് ഡെസ്ക്