മോസ്‌കോ: കമ്മ്യൂണിസ്റ്റിന്റെ മരണമണി മുഴക്കിയ സോവിയറ്റ് യൂണിയന്റെ അവസാനത്തെ പ്രസിഡന്റ് മിഖായേൽ ഗോർബച്ചേവ് വിടപറഞ്ഞു. മിഖായേലിന്റെ മരണ വിവരം റഷ്യൻ വാർത്ത ഏജൻസിയാണ് പുറത്തുവിട്ടത്. കമ്മ്യൂണിസ്റ്റുകാർ വെറുക്കുകയും മുതലാളിത്ത ലോകം സ്‌നേഹിക്കുകയും ചെയ്യ ഭരണാധികാരിയാണ് 91-ാം വയസ്സിൽ വിടപറഞ്ഞത്. വാർദ്ധക്യ സഹജമായ അസുഖത്തെ തുടർന്നാണ് മരണം എന്നാണ് റിപ്പോർട്ട്. അന്ത്യത്തെക്കുറിച്ച് കൂടുതൽ വിവരങ്ങൾ ലഭ്യമല്ലെങ്കിലും മോസ്‌കോയിലെ ആശുപത്രിയിൽ ചികിത്സയിലിരിക്കെ ആയിരുന്നു മരണം എന്ന് ഓഫിസ് അറിയിച്ചിരുന്നു.

ഗോർബച്ചേവിന്റെ നിര്യാണത്തിൽ വിവിധ ലോകനേതാക്കൾ അനുശോചനമറിയിച്ച് രംഗത്തെത്തി. ആറു വർഷം സോവിയറ്റ് യൂണിയന്റെ പ്രസിഡന്റ് ആയിരുന്നു അദ്ദേഹം. എന്നാൽ അദ്ദേഹത്തിന്റെ ഭരണപരിഷ്‌ക്കാര നടപടികളൊന്നും ലക്ഷ്യം കാണാതെ പോയി. ഇതാണ് ലോകത്തിലെ പ്രഥമ കമ്യൂണിസ്റ്റ് സാമ്രാജ്യത്തിന്റെ തകർച്ചയ്ക്ക് ആക്കം കൂട്ടിയത്. രാഷ്ട്രീയപരമായി സോവിയറ്റ് യൂണിയന് വേണ്ടി നിർണായ പങ്കുവഹിച്ച വ്യക്തിത്വമാണ് അദ്ദേഹത്തിന്റേത്. 1985ൽ അധികാരമേറ്റ ഗൊർബച്ചോവ് രാജ്യത്തെ കൂടുതൽ വികസനത്തിലേക്കും പുരോഗതിയിലേക്കും നയിക്കാൻ ലക്ഷ്യമിട്ടു രണ്ടു നയപരിപാടികൾ കൊണ്ടുവന്നു. രാഷ്ട്രീയ സുതാര്യത വാഗ്ദാനം ചെയ്യുന്ന ഗ്ലാസ്‌നോസ്തും സാമ്പത്തിക ഉദാരവൽക്കരണമായ പെരിസ്‌ട്രോയിക്കയും. എന്നാൽ ഗൊർബച്ചേവിന്റെ ഈ നടപടികൾ വിജയം കണ്ടില്ല.

അമേരിക്കയുമായുള്ള ശീതയുദ്ധം രക്തച്ചൊരിച്ചിൽ ഇല്ലാതെ അവസാനിപ്പിക്കുന്നതിൽ ഗൊർബച്ചേവ് നിർണായക പങ്കുവഹിച്ചു. എന്നാൽ, 1991ൽ സോവിയറ്റ് യൂണിയന്റെ ശിഥിലീകരണം തടയുന്നതിൽ അദ്ദേഹം പരാജയപ്പെട്ടു. രണ്ടാം ലോകയുദ്ധത്തിനു ശേഷം യൂറോപ്പിനെ പ്രതിസന്ധിയിലാക്കിയ 'ഇരുമ്പുമറ' ഇല്ലാതാക്കുന്നതിലും ജർമനിയുടെ ഏകീകരണം സാധ്യമാക്കുന്നതിലും ഗൊർബച്ചേവിന്റെ നടപടികൾ വഴിതെളിച്ചു.

സോവിയറ്റ് യൂണിയനെ ചിന്നിച്ചിതറിച്ചു കൊണ്ട് റിപ്പബ്ലിക്കുകൾ ഓരോന്നായി വിട്ടുപോകവേ, ഡിസംബർ 25ന് അദ്ദേഹം പ്രസിഡന്റ് സ്ഥാനം രാജിവയ്ക്കുന്നതായി പ്രഖ്യാപിച്ചു. രക്തരൂക്ഷിതമായ ബോൾഷെവിക് വിപ്ലവത്തിൽ ഉദയംചെയ്ത സോവിയറ്റ് യൂണിയന്റെ അന്ത്യം സമാധാനപരമായിരുന്നു.

മറുനാടന്‍ മലയാളി

    മറുനാടന്‍ മലയാളി ബ്യൂറോ