മരണസങ്കീർത്തനങ്ങൾ
മനുഷ്യരുടെ ഏറ്റവും വലിയ ദുർവിധി ഒറ്റയാകലാണ്. ജീവിതത്തിലെ മരണമാണത്. ആയുസിന്റെ അനർഥകാണ്ഡംപോലെ അതു നിങ്ങളെ നിരന്തരം വേട്ടയാടിക്കൊണ്ടേയിരിക്കും. ഒറ്റയാകാതിരിക്കാനുള്ള പരക്കംപാച്ചിലാണ് മിക്ക മനുഷ്യർക്കും ജീവിതം തന്നെയും.
പി.എഫ്. മാത്യൂസിന്റെ ഈ സമാഹാരത്തിലെ കഥകൾ ഏതാണ്ടൊന്നടങ്കം അടഞ്ഞ വീടുകൾപോലെ ഏകാന്തരായ മനുഷ്യരെക്കുറിച്ചുള്ളവയാണ്.
സമാനമായ മറ്റൊരവസ്ഥ മരണമാണ്. 'എത്ര മരണം വരിച്ചാലാണ് ഒരാൾ യഥാർഥത്തിൽ ജീവിക്കുക!' എന്ന് മാത്യൂസിന്റെ 'കോമ' എന്ന കഥയിൽ ഒരു കഥാപാത്രം ആശ്ചര്യപ്പെടുന്നുണ്ട്. ഈ പുസ്തകത്തിലെ മിക്ക കഥകളും ജീവിതത്തെ മുൻനിർത്തിയെഴുതപ്പെട്ട മരണത്തിന്റെ സങ്കീർത്തനങ്ങളാണ്. വേണമെങ്കിൽ തിരിച്ചും പറയാം - മരണത്തെ മുൻനിർത്തിയെഴുതപ്പെട്ട ജീവിതത്തിന്റെ സങ്കീർത്തനങ്ങളെന്ന്.
എന്തായാലും കഥ, നോവൽ, തിരക്കഥ, ടെലിവിഷൻ സ്ക്രിപ്റ്റ് എന്നീ നാലു രൂപങ്ങളിലും മാത്യൂസ് ആവിഷ്ക്കരിക്കുന്നത് ഏറിയും കുറഞ്ഞും ഏകാന്തതയും മരണവും ഒന്നോടൊന്നു മത്സരിച്ചെത്തുന്ന മർത്യായുസ്സിന്റെ കഷ്ടഗാഥകളാണ്. അതേസമയം, 'ജീവിതത്തെയും കലയെയും കൂട്ടിക്കെട്ടുന്ന ഏർപ്പാടിനോട് തനിക്കു വലിയ യോജിപ്പൊന്നുമില്ലെന്നും ഭാവന അതിന്റേതായ യാഥാർഥ്യം നിർമ്മിക്കുകയാണു ചെയ്യുന്ന'തെന്നും മാത്യൂസ് പറയുന്നുമുണ്ട്.
ഇതൊരു സത്യവാങ്മൂലമാണ്. എഴുത്തിനെക്കുറിച്ചു മാത്രമുള്ളതല്ല, ജീവിതത്തെക്കുറിച്ചുമുള്ള സത്യവാങ്മൂലം. എന്തിനെന്നോ? എഴുത്ത് ജീവിതത്തിനും ജീവിതം എഴുത്തിനും പകരം നിൽക്കുന്നവയല്ല, സ്വയം പൂർണമായി നിലനിൽക്കുന്നവയാണ് എന്നു തെളിയിക്കാൻ. മാത്യൂസിന്റെ എഴുത്തുജീവിതത്തെ പൂരിപ്പിക്കുന്ന, ഭാവലോകത്തെ സാക്ഷാത്കരിക്കുന്ന, ആറ് ആഖ്യാനപടലങ്ങൾ ശ്രദ്ധിച്ചാൽ ഇതു കൂടുതൽ വ്യക്തമാകും.
പ്രാപഞ്ചികമായ ശൂന്യതയിൽ പെട്ടുഴറുന്ന ഏകാന്തരുടെ ആത്മഭാഷണങ്ങൾ, മരണത്തെക്കുറിച്ചു മുൻകൂറെഴുതപ്പെടുന്ന പുരാവൃത്തങ്ങൾ, ഭീതഭാവനയുടെ ഫണരൂപം കൈക്കൊള്ളുന്ന അതിയാഥാർഥ്യങ്ങൾ, സറിയലിസ്റ്റ് ചിത്രകല മുതൽ എക്സ്പ്രഷനിസ്റ്റ് ചലച്ചിത്രകല വരെയുള്ളവയോട് ചേർന്നുനിൽക്കുന്ന വിസ്മയാവഹമായ ദൃശ്യവിതാനങ്ങൾ, കഥാത്വത്തെത്തന്നെ പ്രശ്നവൽക്കരിക്കുന്ന കഥനകല, ലത്തീൻ കത്തോലിക്കാ സംസ്കൃതിയുടെയും കൊളോണിയൽ അധിനിവേശത്തിന്റെയും ജൈവരാഷ്ട്രീയ ഭൂപടങ്ങൾ എന്നിവയാണ് ഈ ആറ് ആഖ്യാനതലങ്ങൾ.
ജീവിതാസക്തികളുടെ തിരകൾ മരണത്തിന്റെ കരയിൽ തലതല്ലിച്ചാകുന്ന ആത്യന്തികമായ പ്രകൃതിനിയമത്തിന്റെ വെളിപാടുകഥകളാണ് മാത്യുസിന്റെ ഓരോ രചനയും. 'കഥകൾ പഴഞ്ചനായിരിക്കുമ്പോൾ ജീവിതം പുത്തനാക്കാനുള്ള സാധ്യതകളൊന്നും ഞാൻ കാണുന്നില്ല' എന്നദ്ദേഹം ചൂണ്ടിക്കാണിക്കുന്നുണ്ട്. തന്റെ കഥകളെയും ജീവിതത്തെയും ഒന്നിച്ചു പുതുക്കിപ്പണിയുന്ന വാക്കുകളുടെ തച്ചുശാസ്ത്രം തേടുകയാണ് ഓരോ രചനയിലും മാത്യൂസ് ചെയ്യുന്നത് എന്നും പറയാം.
ഈ പുസ്തകത്തിൽ ചേർത്തിട്ടുള്ള സോക്രട്ടീസ് വാലത്തുമായുള്ള ഒരഭിമുഖത്തിൽ, ജീവിതത്തെയും മരണത്തെയും മുഖാമുഖം നിർത്തുന്ന തന്റെ ഭാവമണ്ഡലത്തിന്റെ അടിപ്പടവുകളെക്കുറിച്ച് മാത്യൂസ് നടത്തുന്ന ശ്രദ്ധേയമായ ഒരു നിരീക്ഷണമുണ്ട്. 'മനുഷ്യന്റെ മരണത്തിൽ നോക്കി അവന്റെ ജീവിതം കണ്ടെത്താനും ആവിഷ്ക്കരിക്കാനും ശ്രമിക്കുന്ന കണ്ണോക്കുപാട്ടുകാരനാണ് ഞാൻ' (പുറം 115). മേല്പറഞ്ഞ ആഖ്യാനങ്ങളോരോന്നും ആത്യന്തികമായി ചെന്നുമുട്ടുന്നത് കഥയ്ക്കും ജീവിതത്തിനുമിടയിലെ ഈയൊരു പ്രാണസന്ധിയിലാണ്. അതുവഴി, അവതരണസന്ദർഭവും നിമിത്തവും അപരഹിംസയാകട്ടെ, ആത്മഹത്യയാകട്ടെ, കഥയെന്നത്, കാലലോകങ്ങളെ ഒരുമാത്ര സ്തംഭിപ്പിച്ചുനിർത്തി വാക്കുകൾ കൊണ്ടു നടത്തുന്ന മൃത്യുപൂജയാണ് എന്നു തെളിയിക്കുന്നു, മാത്യൂസ്. 'പതിമൂന്നു കടൽകാക്കകളുടെ ഉപമ' എന്ന പുസ്തകത്തിലെ മുഴുവൻ കഥകളും ഏറിയും കുറഞ്ഞും ചേർന്നുനിൽക്കുന്നത് ഈയൊരു കലാതത്വവിചാരത്തോടാണ്. നാലുപതിറ്റാണ്ടുകാലം മാത്യൂസ് എഴുതിയ എഴുപതോളം കഥകളിൽനിന്ന് തെരഞ്ഞെടുത്ത പതിനേഴു കഥകളാണ് ഇവ.
1993-ലെ ഒരു വേനൽക്കാല രാത്രിയിൽ ചെന്നൈയിൽനിന്നു മടങ്ങുമ്പോൾ തീവണ്ടിയിൽ വച്ച് താൻ സാക്ഷിയായ ഒരു മരണത്തിന്റെ കഥ ചിത്രീകരിച്ച സിനിമയെക്കുറിച്ച് തിരക്കഥാകൃത്തെഴുതുന്ന ആത്മനിന്ദയും പരനിന്ദയും കലർന്ന കുറ്റവിചാരണയാണ് ആദ്യകഥ. തന്റെ കഥ ജീവിതം തന്നെയായിരുന്നുവെന്നും അത് സിനിമയിൽ കണ്ടെത്താൻ കഴിയുന്നില്ലെന്നും പറയുന്ന അയാളോട് സംവിധായകനായ ചെറുപ്പക്കാരൻ യോജിക്കുന്നില്ല. അതേ തീവണ്ടിയിൽ, അർധരാത്രിയിൽ വാതിൽപ്പടിയിൽ പുറംലോകം കണ്ടിരുന്ന തന്നെ വാതിൽവലിച്ചടച്ചു താഴെ വീഴ്ത്തി കൊന്നത് ഇതേ തിരക്കഥാകൃത്താണെന്നയാൾ പറയുന്നു. ജീവിതവും കലയും തമ്മിലുള്ള ബന്ധത്തെ ഇത്രമേൽ പ്രശ്നവൽക്കരിക്കുന്ന മറ്റൊരു കഥ മലയാളത്തിലില്ല. ഒരു മനുഷ്യന്റെ ജീവിതമെന്നതുപോലെ മരണവും മറ്റൊരു മനുഷ്യനെയും ബാധിക്കുന്ന വിഷയമല്ലെന്നും ലോകം ഒറ്റകളുടേതാണ്; പറ്റങ്ങളുടേതുപോയിട്ട് ഇരട്ടകളുടേതുപോലുമല്ല എന്നും തെളിയിക്കുകയാണ് ഈ കഥ ചെയ്യുന്നത്. അനുഭവവും ഓർമ്മയും ജീവിതമാണെന്നുവരുത്തി സാഹിത്യത്തിലും സിനിമയിലുമൊക്കെ ആവിഷ്ക്കരിക്കാനാഗ്രഹിക്കുന്നവർക്കുള്ള മറുപടിയായി മാത്യൂസെഴുതുന്ന കലാതത്വം കൂടിയാണ് ഈ രചന. മായക്കാഴ്ചകൾ കാണുന്ന സ്വപ്നരോഗിയുടേതുപോലെ പല പടലങ്ങളുള്ള ജീവിതവും കഥയും ഓർമ്മയും അനുഭവവും കലയും ആഖ്യാനവും ഈ രചനയിൽ ഒന്നിക്കുന്നു. കാലം കുഴമറിയുന്നു; കല വെന്നിക്കൊടി പാറിക്കുന്നു.
തുടർന്നങ്ങോട്ടുള്ള ഓരോ കഥയും ഒന്നിനൊന്നു ഭിന്നവും വിചിത്രവുമായ സാമൂഹികസന്ദർഭങ്ങളിലും സ്ഥലപശ്ചാത്തലങ്ങളിലും ജീവിതവും മരണവും മുഖാമുഖം നിൽക്കുന്ന മർത്യാവസ്ഥയെക്കുറിച്ചുള്ള എഴുത്തുകളായി മാറുന്നു. 'വെളിച്ചമില്ലാത്ത ഒരിടം' എന്ന കഥയിൽ അന്ധയായ ഒരു സ്ത്രീ ആദ്യം ഭർത്താവിന്റെയും പിന്നെ മകന്റെയും മരണം ഗന്ധവും സ്പർശവും ശബ്ദവുമായി അനുഭവിക്കുന്നതിന്റെ അപാരമായ ആത്മസംഘർഷങ്ങളാണുള്ളത്. മാതൃദുഃഖത്തെ മുൻനിർത്തി മലയാളത്തിലെഴുതപ്പെട്ട മികച്ച രചനകളിലൊന്ന്. വാക്കുകളുടെ പിയാത്ത. വായിക്കുക:
'അവൻ വാതിൽപ്പടിയോളം നടന്നിട്ടു തിരിച്ചുവന്നു. പിന്നെ പഴയതുപോലെ നടപ്പുതുടർന്നു. ദീർഘനിശ്വാസം. ബീഡിക്കു തീ കൊളുത്തുന്ന സ്വരം കേട്ടപ്പോൾ തള്ളയ്ക്ക് കൊതിയായി. പക്ഷേ, ചോദിച്ചില്ല. മൂന്നോ നാലോ കൊള്ളികൾ ഉരച്ചുകഴിഞ്ഞപ്പോഴാണ് ബീഡിയിൽനിന്നു പുക വന്നത്. എന്നും ബീഡി കത്തിക്കുവാൻ അവന് ഒരു കൊള്ളി മതി. അവൻ ചമച്ചുതുടങ്ങിയിരിക്കുന്നു. ഇപ്പോൾ അവർക്കു തീർച്ചയായി. അവനെന്തോ സംഭവിച്ചിരിക്കുന്നു.
തള്ളയുടെ നേരെ മുന്നിൽവന്ന് ഒരുനിമിഷം അവൻ നിന്നു. പിന്നെ വീണ്ടും നടക്കാൻ തുടങ്ങി. അവനെന്തോ ചോദിക്കാനുണ്ടെന്ന് അവർക്കു തോന്നി. ചുമച്ചു തൊണ്ട ശുചിയാക്കി. വീണ്ടും നെടുവീർപ്പ്. പെട്ടെന്ന് അവൻ ചോദിച്ചു:
'ഇവിടാരെങ്കിലും വന്നിര്ന്നോ?'
ചോദ്യത്തിലെ ഉത്കണ്ഠ മനസ്സിലായെങ്കിലും ശ്രദ്ധിക്കാത്ത മട്ടിൽ അലസമായി തള്ള പറഞ്ഞു: 'പതിവൊള്ളരക്കെ വന്നിരുന്നു'.
അവൻ ഞെട്ടി. ഇത്രയും നേരമായിട്ടും അവൻ ഒരു ചായപോലും വാങ്ങിത്തന്നില്ലല്ലോ എന്ന് ആലോചിക്കുന്ന നേരത്താണ് അവന്റെ സ്വരം ഉയർന്നത്.
'പൊലീസുവന്നോ?'
ഓ.... അപ്പോൾ അതാണ് പ്രശ്നം. അവൻ പൊലീസുകാരെ പേടിച്ചുതുടങ്ങിയിരിക്കുന്നു. കഴിഞ്ഞ ദിവസങ്ങളിൽ മോഷണത്തിനു പകരം ഭയങ്കരമായ മറ്റെന്തോ അവൻ ചെയ്തിരിക്കുന്നു.
അച്ഛന്റെ ശവം വഴിയരികിലെ കാട്ടുചീരപ്പടർപ്പിൽ കിടക്കുമ്പോൾ വാവിട്ടുകരഞ്ഞ ചെറുക്കൻ. അന്ന് ആ ശവം ഒറ്റയ്ക്കു പൊക്കിയെടുത്ത് പുരയിൽ കിടത്താനുള്ള ത്രാണി അവനുണ്ടായിരുന്നില്ല. കൂടിയാൽ കാലിൽ പിടിച്ചു വലിച്ചിഴച്ചുകൊണ്ടുവരാനേ കഴിയുമായിരുന്നുള്ളൂ. അത്രയ്ക്കു മെലിഞ്ഞ് അവശനായിരുന്നു. സന്ധ്യയായപ്പോൾ പൊലീസുകാരാണ് ശവം ഉമ്മറപ്പടിയിലേക്കു തള്ളിവെച്ചത്.
'ചോയിച്ച കേട്ടില്ലേ. പൊലീസുവന്നാന്ന്....' അവൻ കലി തുള്ളുകയാണെന്നു തള്ളയ്ക്ക് മനസ്സിലായി.
'ഉം വന്ന്'.
'എന്തു ചോദിച്ച്?'
'നീ എന്ത്യയ്ന്ന്'.
'എന്നട്ട് എന്തുപറഞ്ഞു?' അവൻ കിതയ്ക്കുന്നുണ്ടെന്നു തോന്നി.
'നീ ഇല്ലാന്നു പറഞ്ഞ്'.
'തൊലച്ച്!' അവൻ തറയിൽ ആഞ്ഞുതൊഴിച്ചു.
'നീയില്ലാത്ത നേരത്ത് ഒണ്ടെന്ന് പറേണോ?'
അവൻ നിശ്ശബ്ദനായി. ഏറെ നടന്നശേഷം അവൻ നനഞ്ഞ കുപ്പായം എടുത്ത് അണിഞ്ഞു. അവനെ തടുക്കണമെന്നുണ്ടായിരുന്നു. പിന്നെ വേണ്ടെന്നുവച്ചു.
പെട്ടെന്ന് തള്ളയ്ക്ക് സങ്കടം വന്നു. എന്നാൽ അതു കരച്ചിലായി മാറാതിരിക്കാനുള്ള പ്രാപ്തി അവർക്കുണ്ട്. കാഴ്ചയില്ലാത്ത കണ്ണുകൾ അവരുടെ വികാരങ്ങളെ പുറമേക്കു പ്രതിഫലിപ്പിച്ചതുമില്ല.
'മോനേ'.
വീണ്ടും നെടുവീർപ്പ്. പുറത്തേക്കുള്ള വാതിൽ തുറന്നുവെച്ച് നില്ക്കുകയാണ് അവൻ.
'മോനേ'.
അവൻ തിരിഞ്ഞുനോക്കിയെന്ന് അവർക്കു തോന്നി. അവർ ചോദിച്ചു:
'നീ ആരേണ് കൊന്നത്?'
പെട്ടെന്നു വാതിലടഞ്ഞു. ഇരുട്ട് നിറഞ്ഞുകവിഞ്ഞു. അവൻ നടന്നുമറയുകയാണെന്ന് അവർക്കു മനസ്സിലായി. ചെങ്കല്ലിന്റെ അവശിഷ്ടങ്ങളും തീവണ്ടിപ്പാതയും മുറിച്ചുകടന്ന് ഉണങ്ങിവരണ്ട പാടത്തിലൂടെ അവനും പോയിട്ടുണ്ടാകും ചിലപ്പോൾ. ഇനിയൊരിക്കലും മടങ്ങിവന്നേക്കില്ല.
അവൻ പൊട്ടിക്കരയുവാൻ തുടങ്ങി '.
പിതൃബിംബത്തോടുള്ള ഈഡിപ്പൽ പക നിറഞ്ഞുനിൽക്കുന്ന 'സമീപദൃശ്യങ്ങ'ളിൽ ഒരാത്മഹത്യക്കുള്ള തയ്യാറെടുപ്പുകളാണുള്ളതെങ്കിൽ പുത്രഹിംസയുടെ ഗൂഢരതിയനുഭവിക്കുന്ന പിതൃരൂപത്തിന്റെ നിശാസഞ്ചാരങ്ങളാണ് 'ആൺദൈവ'ത്തിലുള്ളത്. ദാമ്പത്യത്തിന്റെ നിരർഥകതകളും കിടപ്പറയുടെ വിരസതകളും മനുഷ്യബന്ധങ്ങളുടെ കാപട്യങ്ങളും ഒന്നൊന്നായി തെളിഞ്ഞുവരുന്ന കാൻവാസിലാണ് ഈ കഥ.
ഒരു വൃദ്ധനെ പിന്തുടർന്ന് അയാളുടെ മുറിയിലെത്തുന്ന സാറയെന്ന ലൈംഗികത്തൊഴിലാളിയോട് അയാൾ താൻ നേരിട്ടറിഞ്ഞ മരണങ്ങളുടെ പുരാവൃത്തം പറയുന്നു. ഒരു സറിയൽ സിനിമപോലെ ദൃശ്യസമൃദ്ധവും സ്വപ്നസന്നിഭവുമായി നീളുന്ന കഥനം. മൃതിയുടെ ജപമാല.
സറിയൽ ഭാവനയുടെ ഇതേ മായികയാഥാർഥ്യങ്ങൾ ഒരു ദേവാലയത്തിനുള്ളിൽ നടക്കുന്ന കുമ്പസാരത്തിന്റെയും കുരിശുമരണത്തിന്റെയും ചിത്രീകരണത്തിലൂടെ സാധ്യമാക്കുന്ന കഥയാണ് അടുത്തത്. പാപപുണ്യങ്ങളുടെ, കടങ്കഥപോലെ നീളുന്ന മർത്യാസ്തിത്വങ്ങളുടെ, ഫാന്റസി. ഒരിക്കലും പുറത്തേക്കു തുറക്കാത്ത വാതിലുകൾക്കുള്ളിൽ ലോകം കാണാതെ ജീവിക്കുന്ന നഗരകുടുംബങ്ങളിലൊന്നിന്റെ കഥയാണ് 'അടഞ്ഞ മുറി'. പൂർണ ഗർഭിണിയാണ് ഭാര്യ. നിസ്വനായ ജോലിക്കാരനാണ് ഭർത്താവ്. ഒരുദിവസം അയാൾ രാവിലെ അടുക്കളവാതിൽ തുറന്നപ്പോൾ കണ്ടത് അടുത്ത വീടിനുള്ളിൽ തൂങ്ങിമരിച്ചുനിൽക്കുന്ന യുവാവിനെയാണ്. പിന്നെ ശവത്തിനും ഗർഭവേദനയ്ക്കുമിടയിലെ അയാളുടെ ഊയലാട്ടങ്ങൾ. മരണം വാതിൽക്കലെത്തി അമ്മയ്ക്കും കുഞ്ഞിനും കാവൽ നിൽക്കുകയാണ്. നോക്കുക:
'പകലത്തെ അലച്ചിലിന്റെ ക്ഷീണംമൂലം നളിനി പെട്ടെന്ന് ഉറങ്ങി. പാതിരാവായപ്പോൾ അവൾ കരഞ്ഞുണർന്നു.
'എന്റെ കൊച്ചു പോയി'.
കിടന്നപടി അവളുടെ വയറു ചുരുങ്ങിച്ചുരുങ്ങി തണ്ടലോടൊട്ടിപ്പോയതായി സ്വപ്നം കണ്ടുവത്രെ. പിന്നെ ആ രാത്രി രവിക്ക് ഉറങ്ങുവാൻ കഴിഞ്ഞില്ല. അയലത്തെ വീട്ടുകാർ എത്ര ശാന്തരായാണ് ഉറങ്ങുന്നത്. അയാൾക്ക് അതിശയം തോന്നി. പുറത്ത് മിന്നാമിനുങ്ങുകൾ കുഞ്ഞുവെളിച്ചവുമായി സഞ്ചരിക്കുന്നു. നളിനി രണ്ടുവട്ടം കൂടി അതേ സ്വപ്നം കണ്ടുകൊണ്ടു കരഞ്ഞു.
നേരം വെളുത്തപ്പോൾ ആദ്യത്തെ കാഴ്ച അവളുടെ കണ്ണീരാണ്. മുഖം വെള്ളക്കടലാസുപോലെ. വീണ്ടും വയറിനുള്ളിലെ ചലനം നിലച്ചിരിക്കുകയാണ്.
കമ്പനിയിൽ പോയി പണവും വണ്ടിയുമായി വരാം എന്നുപറഞ്ഞ് രവി പുറത്തേക്കിറങ്ങിയതും അയൽവീടിനു മുന്നിലേക്ക് വെളുത്ത ആംബുലൻസ് വന്നുനിന്നതും ഒരുമിച്ചായിരുന്നു. അതു ശ്രദ്ധിക്കാതെ അയാൾ തിടുക്കപ്പെട്ടു. വണ്ടിയുമായി മടങ്ങിവരുമ്പോഴാണ് വരാന്തയിൽനിന്ന് ദിനപത്രം മാറ്റിയിടാൻ മറന്നുപോയ കാര്യം ഓർത്തത്. അയാൾക്ക് സംഭ്രമമായി. പിന്നെ സ്വയം ആശ്വസിച്ചു. ഈയിടെയായി നളിനി മുറിയിൽനിന്ന് പുറത്തിറങ്ങാറേയില്ല.
അയലത്തെ ചെറുക്കന്റെ ശവം സംസ്കരിച്ചുകാണുമെന്ന് രവി കണക്കുകൂട്ടി. കീറിമുറിച്ച് ശരീരം ഏറെനേരം ഇട്ടുവയ്ക്കാനാവില്ല.
കാറിന്റെ ജാലകത്തിലൂടെ ആളിക്കത്തുന്ന കൊന്നമരം കണ്ടപ്പോൾ ബാല്യത്തിൽ അപ്രത്യക്ഷനായ കൂട്ടുകാരനെയാണ് ഓർമ വന്നത്. പ്രായത്തിൽ കവിഞ്ഞ വളർച്ചയുണ്ടായിരുന്നു. കൊത്തുകോഴികൾ അലയുന്ന വീട്ടുവളപ്പിലെ കൊന്നപ്പൂക്കൾ വീണുകിടക്കുന്ന മരത്തിന്റെ വേരിലിരുന്ന് കഴിച്ചുകൂട്ടിയ ഉച്ചസമയങ്ങൾ. അതുപോലെ പൊള്ളുന്ന ഒരു ഉച്ചനേരത്താണ് അവൻ പശുവിനെ പുല്ലുതീറ്റുവാനിറങ്ങിയത്. ഇത്തിരിനേരം കഴിഞ്ഞപ്പോൾ അവൻ വീട്ടിലേക്കു മടങ്ങി. പശുവിനെ ബന്ധിച്ചിരുന്ന കയറ് കഴുത്തിൽ കെട്ടിമുറുക്കി. അവൻ എന്തിനുവേണ്ടി അതു ചെയ്തുവെന്ന് ആർക്കും അറിയില്ല. ഇന്നും.
അയലത്തെ വീട്ടിൽ ആളൊഞ്ഞിട്ടില്ല. കണ്ടഭാവം നടിക്കാതെ രവി വീട്ടിലേക്കു കയറി. കിടപ്പുമുറിയിലേക്കു കടന്നപ്പോൾ വല്ലാത്ത ഗന്ധമനുഭവപ്പെട്ടു. കിടക്കയിൽ നളിനി ഉണ്ടായിരുന്നില്ല. തിളങ്ങുന്ന കറുത്ത തിണ്ണയിൽ ചോരത്തുള്ളികൾ പതിഞ്ഞുകിടക്കുന്നു. നടുക്കത്തോടെ ചോരത്തുള്ളികൾക്കു പിന്നാലെ നടന്ന് അയാൾ അടുക്കളയിലെത്തി.
അടുക്കളയിൽ നിന്ന് പുറത്തേക്കുള്ള വാതിൽ തുറന്നിട്ടിരിക്കുന്നു. പടിയിൽ കഴിഞ്ഞ പ്രഭാതത്തിന്റെ ആവർത്തനം പോലെ നളിനി വീണുകിടക്കുന്നു.
അവളെ കോരിയെടുക്കുന്നതിനുമുമ്പ് അയാൾ അയലത്തെ വീട്ടിലെ ജാലകത്തിലൂടെ നോക്കി ഒരു നിമിഷം നിന്നു'.
ആറുമക്കളുടെയും ഭാര്യയുടെയും ആറ്റു നോറ്റു കിട്ടിയ മകളുടെ ഭർത്താവിന്റെയും മരണത്തിനു സാക്ഷിയാകുന്ന കിഴവന്റെ കഥയാണ് 'അന്ന'; അന്നയുടെയും. ബാബ്റിമസ്ജിദ് പൊളിച്ചതിന്റെ പിറ്റേദിവസം പള്ളുരുത്തിയിലും മട്ടാഞ്ചേരിയിലും ബന്തായിരുന്നു. അപ്പോഴാണ് തങ്കച്ചന്റെ അമ്മ മരിച്ചത്. പള്ളികളിലും അമ്പലങ്ങളിലുംനിന്ന് ദുഃസ്വപ്നങ്ങൾ മരമണി മുഴക്കിയ നാളിന്റെ ഓർമ്മക്കുറിപ്പാണ് ഒരു കഥ. ഭർത്താവിന്റെ ശവത്തിന് ദിവസങ്ങളോളം കാവലിരിക്കുന്ന സൂസിയുടെ കഥ പറയുന്നു, സറിയലിസ്റ്റ് രചനയായ 'പച്ചില കൊത്തി പറന്നുവരുന്ന പ്രാവുകൾ'. ജീവിതം നൽകാത്ത ശാന്തി മരണം നൽകുമോ? ഭർത്താവിന്റെ ശവം തിന്നുതീർത്ത്, പൂർണഗർഭിണിയായ അവൾ പുറത്തേക്കിറങ്ങി ലോകത്തെ നോക്കുകയാണ്.
കൊച്ചിയുടെ തീരപ്രദേശങ്ങളിലെ ലത്തീൻ കത്തോലിക്കരുടെ ജീവിതവും മരണവുമാണല്ലോ പി.എഫ്. മാത്യൂസിന്റെ ഏറ്റവും വലിയ സാംസ്കാരിക മൂലധനം. 'കണ്ണോക്ക്' എന്ന കഥ നോക്കുക. 'ഇ.മ.യൗ.' എന്ന സിനിമക്കാധാരമായ രചനയാണിത്. ആഖ്യാനം മറ്റൊരു കാഴ്ചക്കോണിലൂടെയാണെന്നു മാത്രം. സിനിമയിൽ പിതാപുത്രബന്ധമാണ് വിഷയമെങ്കിൽ കഥയിൽ അപ്പൂപ്പന്റെ മരണം കൊച്ചുമകനിലുണ്ടാക്കുന്ന നടുക്കങ്ങളാണ് വിഷയം.
കാലത്തിൽ മുന്നോട്ടും പിന്നോട്ടും സഞ്ചരിക്കുന്ന നാരായണന്റെ മോഹങ്ങളാണ് '2015-ൽ നാരായണൻ' എന്ന രചനയ്ക്കാധാരം. 1957-ന്റെ നിഴൽവീണു കിടക്കുന്ന കഥ. ഫാന്റസിയുടെയും സറിയലിസത്തിന്റെയും മാജിക്കൽ റിയലിസത്തിന്റെയും സങ്കേതങ്ങൾ തുടർച്ചയായി കടന്നുവരുന്ന നിരവധി കഥകളിലൊന്ന്.
പ്രത്യക്ഷത്തിൽ, സമകാലികരായ പല എഴുത്തുകാരും ചെയ്തതുപോലെ ചരിത്രം, അധികാരം, ഭരണകൂടം, പ്രത്യയശാസ്ത്രം തുടങ്ങിയ ബൃഹദാഖ്യാനങ്ങളെ പ്രശ്നവൽക്കരിക്കാൻ മാത്യൂസ് പൊതുവെ ശ്രമിച്ചിട്ടില്ല. മരണദർശനത്തിൽ കേന്ദ്രീകരിച്ച യൂറോപ്യൻ ആധുനികതാവാദത്തിന്റെ സാഹിത്യ-ചലച്ചിത്ര കല ഇത്രമേൽ സ്വാംശീകരിച്ച ഭാവനാസന്ദർഭങ്ങൾ മാത്യൂസിന്റെ കഥകളിലെന്നപോലെ മറ്റധികം പേരിൽ കാണാനുമാകില്ല.
എങ്കിലും ചരിത്രത്തിന്റെ തീപ്പൊള്ളലുകൾ വീണുകിടക്കുന്ന കുറെ കഥകളുണ്ട് ഈ പുസ്തകത്തിൽ. 'ആണ്ടറുതിയിലെ പേടിസ്വപ്നങ്ങൾ', '2051', 'കോമ' തുടങ്ങിയവ ഉദാഹരണം. ഒരു പത്രമാഫീസിൽ 1984 സൃഷ്ടിച്ച അതിയാഥാർഥ്യങ്ങളുടെയും അവസ്ഥാന്തരങ്ങളുടെയും കഥയാണ് 'കോമ'.
ഒരു മനുഷ്യന്റെ മരണം ആത്മഹത്യയാണോ കൊലപാതകമാണോ എന്നു തീർപ്പുകല്പിക്കാൻ കഴിയാതെ ജീവിതത്തിനും മരണത്തിനുമിടയിൽ ഒരു കോമ മാത്രമിട്ട് പിന്തിരിയേണ്ടിവരുന്ന എഴുത്തിന്റെയും മർത്യവിധിയുടെയും രൂപകമാണ് ഈ കഥ.
ഈ സമാഹാരത്തിലെ ഏറ്റവും മികച്ച കഥകളിലൊന്നാണ് 'പതിമൂന്നു കടൽകാക്കകളുടെ ഉപമ'. റബേക്കയെന്ന പെണ്ണിന്റെ ജൈത്രയാത്രകളുടെയും തകർച്ചയുടെയും കഥ.
കൊളോണിയലിസത്തിന്റെ രക്തരേഖകളവശേഷിപ്പിച്ച സങ്കരജനതയുടെ സങ്കടങ്ങളിൽ നിന്നാണ് ആൻഡ്രു ലെസ്ലി വാഡിങ്ടൺ എന്ന സായിപ്പിനു ജന്മം നൽകി റബേക്ക തന്റെ ജീവിതം തുടരുന്നത്. സൗന്ദര്യത്തിന്റെ ഉടവാളുപോലെ മിന്നിയ റബേക്ക, ഒന്നിനും കൊള്ളാത്ത മർസലീഞ്ഞിന്റെ ഭാര്യയും നെറികെട്ട രണ്ടു കുട്ടികളുടെ തള്ളയുമായിരുന്നു.
ദേവപുരുഷനായിരുന്ന സായിപ്പിന്റെ കാമാസക്തി അവളെ കൊത്തിവലിച്ചു. അവളാകട്ടെ ആ ചൂണ്ട കാത്തുകിടന്ന ഒരു മത്സ്യകന്യകയെപ്പോലെ തന്റെ ഉടലും ഉയിരും അയാൾക്കു സമർപ്പിക്കുകയും ചെയ്തു. ചരിത്രം ഒന്നു കറങ്ങിത്തിരിഞ്ഞപ്പോൾ ബംഗ്ലാവിലെ പട്ടുമെത്തയിൽനിന്ന് കടൽത്തീരത്തെ മീൻ നാറുന്ന ചെറ്റക്കുടിലിലേക്കുതന്നെ അവൾ തിരിച്ചെത്തി. അവളുടെ വയറ്റിൽ സായിപ്പിന്റെ മകൻ ആൻഡ്രുവും ഉണ്ടായിരുന്നു.
കടൽത്തീരജീവിതത്തിന്റെ പച്ചപ്പരമാർഥങ്ങൾ ഈ കഥയിലുണ്ട്. 'പരിഷ്ക്കാരത്തിന്റെയും ആധുനികതയുടെയും ഉന്നതിയിൽ സായുവിന്റെ തീന്മേശ മര്യാദകളടക്കമുള്ള ആയിരത്തെട്ടു ചിട്ടവട്ടങ്ങൾക്കിടയിൽ അല്ലലറിയാതെ കഴുകിയുണങ്ങി ഇസ്തരിയിട്ട് മിനുങ്ങിക്കഴിഞ്ഞിരുന്ന റെബേക്കയ്ക്ക് സ്വന്തം ശരീരത്തിൽ നിന്നിറങ്ങിവന്ന മക്കൾ നരഭോജികളായ കാപ്പിരികളാണെന്നുതന്നെ തോന്നി. മർസലീഞ്ഞിന്റെ കടൽച്ചൂരും മീനുളുമ്പും നാറ്റവും കാപ്പിരിമൂത്രം വീണ് ഈറനായ ചാണകത്തിണ്ണയും പിന്നെ കടപ്പുറത്തെ ഉണക്കപ്പരവയുടെ മണമുള്ള കാറ്റുമൊക്കെ ചേർന്നപ്പോൾ ഛർദ്ദിക്കാതിരിക്കാനവൾക്കു കഴിഞ്ഞില്ലയ ചെറുകുടലു വരെ ഛർദ്ദിച്ചുപോകുമെന്നു തോന്നി. ഇതെല്ലാം കണ്ടിട്ടും പറങ്കിക്കപ്പേളയിലെ രൂപക്കൂട്ടിലെ സന്തമ്മാറു മുത്തപ്പനേപ്പോലെ ഒരേ ഇരിപ്പാണു മർസലീഞ്ഞ്. രണ്ടു മെഴുകുതിരിയുടേം ഒരു നേർച്ചപ്പെട്ടീടേം കുറവുമാത്രം. കൂട്ടത്തിൽ തലമൂത്തവനായ നരഭോജിക്കാപ്പിരി മാണച്ചന് പെറ്റതള്ളയുടെ പുതുമോടിയും മദാമ്മച്ഛർദ്ദിയും തീരെയങ്ങു പിടിച്ചില്ല. അവൻ അപ്പന്റെ മീൻകൊട്ട പോലെ തന്റെ ഉള്ളു മുഴുവൻ പുറത്തേക്കു ചൊരിഞ്ഞിട്ടു:
-തള്ളക്കിവിട പറ്റൂല്ലങ്കീ സായൂന്റെ കാലിന്റെടേലാട്ട് പൊയ്ക്കോട്ടാ....
നിലമിറങ്ങി വെട്ടിയ ഇടിവാള് റെബേക്കയുടെ ഉച്ചി തൊട്ട് ഉള്ളം കാലുവരെ വിറപ്പിച്ചു'.
ഒപ്പം, മാജിക്കൽ റിയലിസത്തിന്റെ മാന്ത്രികപ്പരവതാനിയും.
'പറുദീസാക്കഥയോളം തന്നെ വിരസമായ ആൻഡ്രുവിന്റെ ആത്മകഥ കേട്ട് കുട്ടികൾ കോട്ടുവായിടാൻ തുടങ്ങി. അവരുടെ മുഖം കണ്ടപ്പോൾ യുക്തിഭദ്രമായ സംഭവങ്ങളിൽ നിന്നും ജീവിത യാഥാർത്ഥ്യങ്ങളിൽ നിന്നും വിട്ടുനില്ക്കാത്ത കഥ എത്ര വിരസവും പാഴുമാണെന്നു തിരിച്ചറിഞ്ഞ ആൻഡ്രു തലേനാൾ പഠിച്ച വിദ്യ കുട്ടികളിൽ പ്രയോഗിക്കാൻ തന്നെ തീരുമാനിച്ചു. മണലിൽ കിടന്നിരുന്ന മുക്കുവന്റെ പാളത്തൊപ്പിയെടുത്തു തലയിൽ വച്ച് കുട്ടികളുടെ തലയ്ക്കു മീതെ കൈകളുയർത്തി കണ്ണുകളടച്ച് ചുണ്ടിലൂടെ അടർന്ന മറുഭാഷയിലെ മന്ത്രം ഉരുവിട്ടു. ആ നിമിഷം തറയിൽ കുന്തിച്ചിരുന്ന പതിമൂന്നു കുട്ടികളും കടൽക്കാക്കകളായി മാറി. അയാളുടെ സിദ്ധിയുടെ ആദ്യ പരീക്ഷണമായിരുന്നു അത്. അതുകൊണ്ടുതന്നെ കാക്കകളായി മാറിയ കുട്ടികൾ പറക്കാതിരിക്കുന്നതിന്റെ കാരണം അയാൾക്കു പിടികിട്ടിയില്ല. കാലവും ഇന്നലെ വരെ പിന്തുടർന്ന ജീവിതവും അവരുടെ കാലിൽ കെട്ടിയിട്ട ചങ്ങലകളായി മാറിയതാണോ. അങ്ങനെയാലോചിച്ചു നിൽക്കെ കൂട്ടത്തിൽ കുറുമ്പനായ ചെറുക്കൻ പുതിയതായി കിട്ടിയ ചിറകുകൾ ഒന്നു കുടഞ്ഞുവിടർത്തി രണ്ടടിയടിച്ചു. പിന്നെ അവൻ പതുക്കെ അതു പ്രയോഗിച്ച് മൂന്നാലടി പൊന്തിനോക്കിയെങ്കിലും താഴേക്കു വീണുപോയി. ശരീരം തയ്യാറാണെങ്കിലും മനസ്സ് സന്നദ്ധമല്ലെന്ന വചനം പാണ്ടൻ സായു ഉരുവിട്ടുകൊണ്ടിരിക്കെ ആ കുറുമ്പൻ ഒരൊറ്റ ഊക്കിൽ ചിറകടിച്ച് ആകാശത്തേക്ക് ഉയർന്നുപൊങ്ങി. അവൻ കൂസലില്ലാതെ മനോഹരമായ നാലു വൃത്തം വരച്ച് പ്രകടനം നടത്തിയപ്പോൾ അതു കണ്ടിരുന്ന കൂട്ടുകാർക്ക് ആവേശം മൂത്തു. തുടക്കത്തിലെ തടസ്സങ്ങൾ പോലുമില്ലാതെ അവരൊന്നടങ്കം ആകാശത്തേക്ക് കുതിക്കാനും അസംഖ്യം വൃത്തങ്ങൾ ചമയ്ക്കാനും തുടങ്ങി. കുറച്ചുനേരം തികച്ചും അപരിചിതമായ കാക്കക്കാറലുകൊണ്ട് കടപ്പുറം മേഘാവൃതമായി. പിന്നെ അവ പുറങ്കടലിലേക്കു പറക്കാൻ തുടങ്ങിയപ്പോൾ സായു നേരിയ പുഞ്ചിരിയോടെ ചെമ്പന്മുടി മാടിയൊതുക്കി ജീവിതത്തിന് ഒരർത്ഥമുണ്ടായതുപോലെ പുഞ്ചിരിച്ചു.
സന്ധ്യായിട്ടും കുട്ടികൾ വീടണയാതായപ്പോൾ പതിമൂന്നു കുട്ടികളുടെയും കാരണവന്മാർ കടപ്പുറത്തു വന്ന നേരത്ത് ഉണക്കമീൻ ചുട്ടുതിന്നുകൊണ്ടിരിക്കുകയാണ് സായു.
- കുട്ടികളെവിടെ പോയി സായു.
അവർ ചോദിച്ചു.
ആകാശത്തേക്കു നോക്കി അയാളിത്തിരി നേരം ഇരുന്നു. പിന്നെ പതുക്കെ പറഞ്ഞു:
- പഠിച്ചുവച്ച കഥകൾ തിരുത്തേണ്ട കാലം എന്നേ കഴിഞ്ഞു.
ഒന്നും പിടികിട്ടാത്ത ശൂന്യമുഖങ്ങളിലേക്കു നോക്കി അയാളവർക്കു പരിചയമുളെളാരു വാചകം പറഞ്ഞു:
- ആകാശത്തിലെ പാവകളെ നോക്കൂ.... അവ വിതയ്ക്കുന്നില്ല, കൊയ്യുന്നില്ല, കളപ്പുരകളിൽ ശേഖരിക്കുന്നുമില്ല. ഈ ജീവിതം ഒന്നു കടന്നുപോകണമെങ്കിൽ നമുക്ക് പുതിയ കഥകളാണു വേണ്ടത്. പുതിയ കഥകൾ...അതാണ് ഞാനുണ്ടാക്കാൻ നോക്കുന്നത്.
നിങ്ങൾക്കിനിയുമുണ്ടാകുന്ന മക്കളോടു പറയാനും അതു വേണ്ടിവരും... ഇനി ഞാൻ പതിമൂന്നു കടൽക്കാക്കകളുടെ ഉപമ പറയാം.
ഒന്നും മനസ്സിലായില്ലെങ്കിലും അവർ സായുവിനെ അനുകരിച്ച് കടലിനു മുകളിലുള്ള ആകാശത്തേക്കു നോക്കി. പതിമൂന്ന് കടൽക്കാക്കകൾ അവരുടെ തലയ്ക്കു മുകളിലൂടെ പറന്നുപോയി'.
അവസാന കഥയായ 'തീവണ്ടിയിൽ ഒരു മനുഷ്യൻ', ഭർത്താവിനെ കൊന്ന ഒരു സ്ത്രീയുടെ ഏറ്റുപറച്ചിലും പരക്കംപാച്ചിലുമാണ്. ഭാവി മുൻകൂട്ടിക്കാണുന്ന സ്വപ്നങ്ങളുടെയും മനോവിഭ്രമങ്ങളുടെയും ലോകം. അഭൗമാനുഭൂതി(ൗിരമിി്യ)യുടെ അതീത യാഥാർഥ്യങ്ങൾ.
ജീവിതത്തിന്റെ കൊടും കയങ്ങളിൽ മുങ്ങിത്താഴുന്ന മനുഷ്യാവസ്ഥകളിൽനിന്നു കണ്ടെടുക്കുന്ന ചില ഒറ്റവിരൽ ചൂണ്ടലുകൾപോലെ ഇനിയുമുണ്ട് കഥകൾ. ഇടത്തരം വി.പി.യും ദൈവവും, ലോസ്റ്റ് ആൻഡ് ഫൗണ്ട് എന്നിങ്ങനെ.
'പതിമൂന്നു കടൽകാക്കകളുടെ ഉപമ', മരണത്തെക്കുറിച്ചെഴുതുന്ന സങ്കീർത്തനങ്ങളായോ മരണാനന്തരം പാടുന്ന കണ്ണോക്കുകളായോ മാറുന്നതെന്തുകൊണ്ടാണെന്ന് ഇനി വിശദീകരിക്കേണ്ടതില്ലല്ലോ.
'കണ്ണോക്ക്' എന്ന കഥയിൽനിന്ന്:-
- നിർത്തടാ...
ആ സ്വരത്തിന്റെ തുടർച്ചയോ മാറ്റൊലിയോ പോലെ ഒരു പൊലീസ് ജീപ്പും അതിൽ മൂന്നു പൊലീസുകാരും അവിടേക്കു വന്നു. ആ കൂട്ടത്തിൽ തലമുതിർന്ന പൊലീസുകാരന്റെ കാതിൽ സക്കറിയാസച്ചൻ എന്തോ പിറുപിറുത്തതിനെ തുടർന്ന് രണ്ടു കാര്യങ്ങൾ നടന്നു. ആൻഡ്രുവപ്പൂപ്പന്റെ ശവം കീറിമുറിക്കാനായി സർക്കാർ ആശുപത്രിയിലേക്കും സാംസൺ വലിയപ്പച്ചനെ വിലങ്ങുവച്ച് പൊലീസ് സ്റ്റേഷനിലേക്കും കൊണ്ടുപോയി. പെണ്ണുങ്ങളെല്ലാവരും ചേർന്ന് മനസ്സറിഞ്ഞു കരഞ്ഞു കണ്ണോക്കിടാൻ തുടങ്ങിയ ആ നേരംതൊട്ടാണാ വീട് ലക്ഷണമൊത്തൊരു മരിച്ച വീടായി മാറിയത്. വികാരിയച്ചന്റെ ധൈര്യത്തിനു പിന്നിൽ വിറയലും പേടിയും മറച്ചുപിടിച്ചു നിന്നിരുന്ന കപ്യാരുടെ കാതിൽ അദ്ദേഹം തന്റെ പരുക്കൻ തൊണ്ടയിൽ ഇങ്ങനെ പറയുന്നത് വ്യക്തമായിത്തന്നെ കാസ്പ്പർ കേട്ടു:
- കൊലപാതകം... ഇതു തെളിയിച്ചില്ലെങ്കിൽ എന്റെ പേര് പട്ടിക്കിട്ടോ....'.
പതിമൂന്ന് കടൽകാക്കകളുടെ ഉപമ
പി.എഫ്. മാത്യൂസ്
ലോഗോസ്, 2018
വില: 120 രൂപ
MNM Recommends
-
ചെപ്പോക്കിൽ കളിയുടെ ഗതി മാറ്റി ദേശ്പാണ്ഡെയുടെ കിടിലൻ ബൗളിങ് പ്രകടനം; തുഷാർ നാല് വിക്കറ്റ് പിഴുതതോടെ വിജയലക്ഷ്യം കാണാനാവാതെ ഇടറി ഹൈദരാബാദ്; ചെന്നൈക്ക് 78 റൺസ് ജയവും മൂന്നാം സ്ഥാനവും -
പതിറ്റാണ്ടുകളുടെ പോരാട്ടത്തിന് പരിസമാപ്തി; ഹൈദരാബാദിലെ പഞ്ചനക്ഷത്ര ഹോട്ടൽ മാരിയറ്റിന്റെ ഭൂമിയിൽ അവകാശവാദം ഉന്നയിച്ച വഖഫ് ബോർഡിന് തിരിച്ചടി; സ്വന്തം ഭൂമിയല്ലെന്ന് അന്വേഷണത്തിൽ കണ്ടെത്തിയിട്ടും കേസ് തുടർന്ന ബോർഡിന്റെ ഹർജി തള്ളി -
'ശശികല ടീച്ചറേതാ, ശൈലജ ടീച്ചറേതായെന്ന് മനസ്സിലാകുന്നില്ലല്ലോ; വർഗ്ഗീയ ടീച്ചറമ്മ': വോട്ടെടുപ്പ് കഴിഞ്ഞിട്ടും വടകരയിലെ പോരിന് മൂർച്ച കൂട്ടി രാഹുൽ മാങ്കൂട്ടത്തിലിന്റെ കുറിപ്പ് -
'കച്ചവട താൽപര്യം തലയ്ക്കുപിടിച്ച് നിരന്തരം പാർട്ടിയെ പ്രതിസന്ധിയിൽ ആക്കുന്നവർക്ക് ഇടയിലും ഒന്നും നേടാത്ത ചിലരുണ്ടിവിടെ': ഇ പി യെ പരോക്ഷമായി കുത്തിയും 'കണ്ണൂരിൻ ചെന്താരകം' പിജെയെ ഓർമ്മിപ്പിച്ചും റെഡ് ആർമിയും പോരാളി ഷാജിയും; പൊന്നുകായ്ക്കുന്ന മരമാണെങ്കിലും പുരക്ക് മേലെ വന്നാൽ വെട്ടിക്കളയണം എന്നും മുന്നറിയിപ്പ്; സംസ്ഥാന സെക്രട്ടേറിയറ്റ് നാളെ ചേരാനിരിക്കെ പോസ്റ്റുകൾ -
വടകരയിൽ ലീഗ് കളിച്ചത് തീക്കളി; ആരംഭം തൊട്ടേ സ്ഥാനാർത്ഥിക്ക് മതനിറം കൊടുക്കാൻ അമിതാവേശം കാട്ടി; സംഘ്പരിവാർ കാവിവൽക്കരിച്ച പോലെ ലീഗ് പ്രവർത്തകർ സമ്പൂർണ്ണമായും പച്ചവൽക്കരിച്ചു; വിമർശനവുമായി കെ ടി ജലീൽ -
തിരഞ്ഞെടുപ്പ് കഴിഞ്ഞപ്പോ താൻ ഹരിശ്ചന്ദ്രനാണെന്നും പറഞ്ഞു ഇറങ്ങിയിരിക്കുകയാണ് വടകരയിലെ യുഡിഎഫ് സ്ഥാനാർത്ഥി; എത്രയൊക്കെ തറവേല നടത്തിയാലും ശൈലജ ടീച്ചറുടെ ജയം തടയാനാകില്ല; ഷാഫി പറമ്പിലിന് എതിരെ പി ജയരാജൻ -
'ജയിലിനുള്ള മറുപടി ഞങ്ങൾ വോട്ടിലൂടെ നൽകും': ആം ആദ്മി പാർട്ടി പ്രചാരണ ഗാനത്തിന് എതിരെ വടിയെടുത്ത് തിരഞ്ഞെടുപ്പ് കമ്മീഷൻ; ഗാനത്തിന്റെ ഉള്ളടക്കത്തിൽ മാറ്റം വരുത്താൻ നിർദ്ദേശം; ഗാനത്തിൽ ബിജെപിയെ പരാമർശിക്കുന്നില്ലെന്ന് വാദിച്ച് അതിഷി; -
ആദ്യ 22 പന്തിൽ 29 റൺസ്; 31 പന്തിൽ അർധസെഞ്ചുറി; മോഹിത് ശർമ പന്തെറിഞ്ഞതോടെ ടോപ് ഗിയറിൽ; 50 ൽ നിന്ന് 100ലെത്താൻ വേണ്ടിവന്നത് 10 പന്തുകൾ മാത്രം; ആറ് മിനിറ്റിനിടെ അർധസെഞ്ചുറിയും സെഞ്ചുറിയും ആഘോഷിച്ച് വിൽ ജാക്സ്; വെടിക്കെട്ടിന് കയ്യടിച്ച് കോലി -
പ്രസവത്തെ തുടർന്ന് അണുബാധ; ആലപ്പുഴ മെഡിക്കൽ കോളേജിൽ യുവതി മരിച്ചു; ചികിത്സാ പിഴവ് ആരോപിച്ച് ബന്ധുക്കൾ ബഹളം കൂട്ടിയതോടെ സംഘർഷം; അന്വേഷണത്തിന് ഉത്തരവിട്ട് ആരോഗ്യമന്ത്രി -
ബാറ്റിങ് വെടിക്കെട്ടിന് അഴകായി സിക്സറുകളുടെ കൂട്ടപ്പൊരിച്ചിൽ; വിജയറണ്ണിനൊപ്പം സെഞ്ചുറി കുറിച്ച് വിൽ ജാക്സ്; അർധ സെഞ്ചുറിയോടെ ചേസ് മാസ്റ്ററായി കിങ് കോലി; 201 റൺസ് വിജയലക്ഷ്യം 16 ഓവറിൽ മറികടന്ന് ആർസിബി; ഗുജറാത്തിനെ കീഴടക്കിയത് ഒൻപത് വിക്കറ്റിന് -
'ഞങ്ങളെ നോക്കി ഡ്രൈവർ കണ്ണിറുക്കി കാണിച്ചു; കൈയും നാവും ഉപയോഗിച്ചുള്ള ഒരു ലൈംഗിക ചേഷ്ട കാണിച്ചു; വലിയ അപമാനം നേരിട്ടു'; കെഎസ്ആർടിസി ബസ് തടഞ്ഞുനിർത്തി ഞങ്ങൾ ഇതിനെയാണ് ചോദ്യം ചെയ്തതെന്ന് മേയർ ആര്യ രാജേന്ദ്രൻ; പണി തരുമെന്ന് മേയർ ഭീഷണിപ്പെടുത്തിയെന്ന് ഡ്രൈവർ -
ഇൻഡിഗോയോട് പിണക്കം കാരണം പറക്കില്ല; വോൾവോയിലും പതിവില്ല; വന്ദേഭാരതിൽ ടിക്കറ്റ് ബുക്ക് ചെയ്തതായും വിവരമില്ല; ഞായറാഴ്ച ഇ പി കണ്ണൂരിൽ തന്നെ; ബിജെപി പ്രവേശന വിവാദം കത്തി നിൽക്കെ തിങ്കളാഴ്ചത്തെ സിപിഎം സെക്രട്ടേറിയറ്റ് യോഗത്തിൽ പങ്കെടുക്കില്ലെന്ന് സൂചന -
ഒരു വശത്ത് പാർട്ടിക്കുള്ളിൽ പി.ജയരാജന്റെ വിമർശനം; മറുവശത്ത് റെയ്ഡുകൊണ്ടു പൊറുതി മുട്ടിക്കുന്ന ആദായ നികുതി വകുപ്പ്; ഇ പി, ജാവദേക്കറുമായി കൂടിക്കാഴ്ച നടത്തിയത് കുടുംബത്തിന് ഉയർന്ന ഓഹരിയുള്ള 'വൈദേകമെന്ന കെണിയിൽ' നിന്നും രക്ഷപ്പെടാനോ? -
തൃശൂരിൽ സുരേഷ് ഗോപി ജയിക്കില്ല; സംസ്ഥാനത്ത് യുഡിഎഫിന് മുൻതൂക്കമുണ്ട്; ആലപ്പുഴയിൽ ബിജെപിക്ക് വോട്ട് കൂടും; അതിന്റെ ഗുണം എ എം ആരിഫിന്; പാർട്ടിയിൽ പറഞ്ഞിട്ടാണ് ജയരാജൻ ജാവ്ദേക്കറെ കണ്ടതെങ്കിൽ തെറ്റില്ലെന്നും വെള്ളാപ്പള്ളി നടേശൻ -
ക്രൈസ്തവ പെൺകുട്ടികളുടെ പേരുപറഞ്ഞ് ഒരു വർഗീയശക്തികളും ഇവിടെ വർഗീയവിഷം വിതയ്ക്കേണ്ട; പെൺകുട്ടികളെ സംരക്ഷിക്കാൻ സമുദായത്തിനറിയാം; രക്ഷകരായി ആരും വരേണ്ടെന്നും ആർച്ച് ബിഷപ്പ് മാർ ജോസഫ് പാംപ്ലാനി -
പാനൂരിൽ മുസ്ലിം ലീഗ് പ്രവർത്തകന്റെ വീടിന് നേരെ ബോംബേറ്; രണ്ടാം ദിവസവും ആക്രമണം പൊലീസ് അന്വേഷണം നടക്കുന്നതിനിടെ -
ഇന്ത്യക്ക് ഏകദിന ലോകകപ്പിന് വഴിയൊരുക്കിയ പരിശീലകൻ; വൈറ്റ് ബോൾ ക്രിക്കറ്റിൽ ഗാരി കിർസ്റ്റനെ പുതിയ പരിശീലകനാക്കി പാക് ക്രിക്കറ്റ് ടീം; ടെസ്റ്റ് ടീമിനെ പരിശീലിപ്പിക്കുക ജേസൺ ഗില്ലെസ്പി -
കോൺഗ്രസിന്റെ ചെലവിൽ എഎപിയെ വളർത്തുന്നു; ലോക്സഭാ തിരഞ്ഞെടുപ്പിൽ എഎപി സഖ്യം കാരണം കിട്ടിയത് മൂന്നുസീറ്റ് മാത്രം; ദീപക് ബാബറിയയുടെ ഇടപടൽ അസഹനീയം; കോൺഗ്രസ് ഡൽഹി അദ്ധ്യക്ഷൻ അരവിന്ദർ സിങ് ലൗലിയുടെ രാജി വലിയ പൊട്ടിത്തെറിയുടെ തുടക്കം മാത്രം -
ജെഡിഎസ് സ്ഥാനാർത്ഥി പ്രജ്വൽ രേവണ്ണക്കെതിരായ അശ്ലീല വീഡിയോ; ബംഗാളിൽ ബിജെപിക്കെതിരെ തൃണമൂൽ കോൺഗ്രസ്; ബേട്ടി ബച്ചാവോ മുദ്രാവാക്യം കാപട്യമെന്ന് പരിഹാസം -
ജഗതി ശ്രീകുമാറിന് ബംഗാൾ രാജ്ഭവന്റെ ഗവർണേഴ്സ് അവാർഡ് ഓഫ് എക്സലൻസ് ഗവർണർ ആനന്ദബോസ് സമ്മാനിച്ചു; 50,000 രൂപയും കീർത്തിപത്രവും ഫലകമുൾപ്പെട്ട ദേശീയപുരസ്കാരം
Most Read
- നിന്റെ അച്ഛന്റെ വകയാണോ റോഡ് എന്ന് കാർ യാത്രക്കാർ; അച്ഛന് വിളിച്ചപ്പോൾ താൻ തിരിച്ചുപറഞ്ഞു; യുവതി അടുത്തെത്തി 'നിനക്ക് എന്നെ അറിയാമോടാ' എന്ന് ചോദിച്ചു; എം എൽ എയാണോ മേയറാണോ എന്ന് അറിയില്ലായിരുന്നു എന്നും കെ എസ് ആർ ടി സി ഡ്രൈവർ; മേയർക്ക് വിമർശനം
- 'കച്ചവട താൽപര്യം തലയ്ക്കുപിടിച്ച് നിരന്തരം പാർട്ടിയെ പ്രതിസന്ധിയിൽ ആക്കുന്നവർക്ക് ഇടയിലും ഒന്നും നേടാത്ത ചിലരുണ്ടിവിടെ': ഇ പി യെ പരോക്ഷമായി കുത്തിയും 'കണ്ണൂരിൻ ചെന്താരകം' പിജെയെ ഓർമ്മിപ്പിച്ചും റെഡ് ആർമിയും പോരാളി ഷാജിയും; പൊന്നുകായ്ക്കുന്ന മരമാണെങ്കിലും പുരക്ക് മേലെ വന്നാൽ വെട്ടിക്കളയണം എന്നും മുന്നറിയിപ്പ്; സംസ്ഥാന സെക്രട്ടേറിയറ്റ് നാളെ ചേരാനിരിക്കെ പോസ്റ്റുകൾ
- പതിറ്റാണ്ടുകളുടെ പോരാട്ടത്തിന് പരിസമാപ്തി; ഹൈദരാബാദിലെ പഞ്ചനക്ഷത്ര ഹോട്ടൽ മാരിയറ്റിന്റെ ഭൂമിയിൽ അവകാശവാദം ഉന്നയിച്ച വഖഫ് ബോർഡിന് തിരിച്ചടി; സ്വന്തം ഭൂമിയല്ലെന്ന് അന്വേഷണത്തിൽ കണ്ടെത്തിയിട്ടും കേസ് തുടർന്ന ബോർഡിന്റെ ഹർജി തള്ളി
- സഞ്ജുവിന്റെ വിജയാഘോഷം സെലക്ടർമാർക്കെതിരായ വെല്ലുവിളിയോ? ട്വന്റി20 ലോകകപ്പിൽ നിന്നും സഞ്ജുവിനെ ഒഴിവാക്കും? വിക്കറ്റ് കീപ്പർ സ്ഥാനത്തേക്ക് ഋഷഭ് പന്തും കെ.എൽ. രാഹുലും; ഓൾറൗണ്ടറായി ശിവം ദുബെ; നിർണായക തീരുമാനത്തിലേക്ക് അഗാർക്കറും രോഹിതും
- തൃശൂരിൽ സുരേഷ് ഗോപി ജയിക്കില്ല; സംസ്ഥാനത്ത് യുഡിഎഫിന് മുൻതൂക്കമുണ്ട്; ആലപ്പുഴയിൽ ബിജെപിക്ക് വോട്ട് കൂടും; അതിന്റെ ഗുണം എ എം ആരിഫിന്; പാർട്ടിയിൽ പറഞ്ഞിട്ടാണ് ജയരാജൻ ജാവ്ദേക്കറെ കണ്ടതെങ്കിൽ തെറ്റില്ലെന്നും വെള്ളാപ്പള്ളി നടേശൻ
- 'ശശികല ടീച്ചറേതാ, ശൈലജ ടീച്ചറേതായെന്ന് മനസ്സിലാകുന്നില്ലല്ലോ; വർഗ്ഗീയ ടീച്ചറമ്മ': വോട്ടെടുപ്പ് കഴിഞ്ഞിട്ടും വടകരയിലെ പോരിന് മൂർച്ച കൂട്ടി രാഹുൽ മാങ്കൂട്ടത്തിലിന്റെ കുറിപ്പ്
- 'ഞങ്ങളെ നോക്കി ഡ്രൈവർ കണ്ണിറുക്കി കാണിച്ചു; കൈയും നാവും ഉപയോഗിച്ചുള്ള ഒരു ലൈംഗിക ചേഷ്ട കാണിച്ചു; വലിയ അപമാനം നേരിട്ടു'; കെഎസ്ആർടിസി ബസ് തടഞ്ഞുനിർത്തി ഞങ്ങൾ ഇതിനെയാണ് ചോദ്യം ചെയ്തതെന്ന് മേയർ ആര്യ രാജേന്ദ്രൻ; പണി തരുമെന്ന് മേയർ ഭീഷണിപ്പെടുത്തിയെന്ന് ഡ്രൈവർ
- ജാവ്ദേക്കർ വന്നത് കഴിഞ്ഞ വർഷം മാർച്ച് അഞ്ചിന്; കൊച്ചു മകന്റെ പിറന്നാൾ ദിനത്തിലാണ് വന്നത്; ആകെ സംസാരിച്ചത് ചുരുങ്ങിയ വാക്കുകൾ മാത്രം; വീട്ടിൽ വന്നവരോട് ഇറങ്ങി പോകാൻ പറയുന്നത് തന്റെ ശീലമല്ല; തനിക്കെതിരെ നടക്കുന്നത് ഗൂഢാലോചന; താൻ വഴി ലക്ഷ്യമിട്ടത് മുഖ്യമന്ത്രിയെ; ഗൂഢാലോചനാ സിദ്ധാന്തം നിരത്തി ഇ പി ജയരാജന്റെ പ്രതിരോധം
- ഒരു വശത്ത് പാർട്ടിക്കുള്ളിൽ പി.ജയരാജന്റെ വിമർശനം; മറുവശത്ത് റെയ്ഡുകൊണ്ടു പൊറുതി മുട്ടിക്കുന്ന ആദായ നികുതി വകുപ്പ്; ഇ പി, ജാവദേക്കറുമായി കൂടിക്കാഴ്ച നടത്തിയത് കുടുംബത്തിന് ഉയർന്ന ഓഹരിയുള്ള 'വൈദേകമെന്ന കെണിയിൽ' നിന്നും രക്ഷപ്പെടാനോ?
- ആദ്യ 22 പന്തിൽ 29 റൺസ്; 31 പന്തിൽ അർധസെഞ്ചുറി; മോഹിത് ശർമ പന്തെറിഞ്ഞതോടെ ടോപ് ഗിയറിൽ; 50 ൽ നിന്ന് 100ലെത്താൻ വേണ്ടിവന്നത് 10 പന്തുകൾ മാത്രം; ആറ് മിനിറ്റിനിടെ അർധസെഞ്ചുറിയും സെഞ്ചുറിയും ആഘോഷിച്ച് വിൽ ജാക്സ്; വെടിക്കെട്ടിന് കയ്യടിച്ച് കോലി