Forex Rate:

1 usd = 76.25 inr 1 gbp = 94.16 inr 1 eur = 85.23 inr 1 aed = 20.76 inr 1 sar = 20.32 inr 1 kwd = 247.66 inr
Mar / 202429Friday

19 വയസുള്ള പെൺകുട്ടിയെ നുണ പറഞ്ഞ് 15 വയസു കൂടുതലുള്ള മദ്യപാനി വിവാഹം കഴിച്ചു; സഹോദരങ്ങളോട് മിണ്ടിയാൽ പോലും അവിഹിത ബന്ധം ആരോപിച്ചിട്ടും കുഞ്ഞുങ്ങളെ ഓർത്ത് ക്ഷമിച്ചു; ഇക്കാമ ഇല്ലാതെ പുറത്തിറങ്ങാൻ ആവാത്തതിനാൽ ആറു മാസമായി ശമ്പളമില്ലാതെ ആശുപത്രിയുടെ തടവിൽ: മദ്യപാനവും സംശയരോഗവും മൂർച്ഛിച്ച് സൗദിയിൽ ആത്മഹത്യ ചെയ്ത യുവാവ് നഴ്‌സായ ഭാര്യയെ കുറിച്ച് പറഞ്ഞ അശ്ലീലങ്ങൾ ഷെയർ ചെയ്യുന്നവർ അറിയാൻ

19 വയസുള്ള പെൺകുട്ടിയെ നുണ പറഞ്ഞ് 15 വയസു കൂടുതലുള്ള മദ്യപാനി വിവാഹം കഴിച്ചു; സഹോദരങ്ങളോട് മിണ്ടിയാൽ പോലും അവിഹിത ബന്ധം ആരോപിച്ചിട്ടും കുഞ്ഞുങ്ങളെ ഓർത്ത് ക്ഷമിച്ചു; ഇക്കാമ ഇല്ലാതെ പുറത്തിറങ്ങാൻ ആവാത്തതിനാൽ ആറു മാസമായി ശമ്പളമില്ലാതെ ആശുപത്രിയുടെ തടവിൽ: മദ്യപാനവും സംശയരോഗവും മൂർച്ഛിച്ച് സൗദിയിൽ ആത്മഹത്യ ചെയ്ത യുവാവ് നഴ്‌സായ ഭാര്യയെ കുറിച്ച് പറഞ്ഞ അശ്ലീലങ്ങൾ ഷെയർ ചെയ്യുന്നവർ അറിയാൻ

മറുനാടൻ മലയാളി ബ്യൂറോ

തിരുവനന്തപുരം: ഭാര്യയുടെ അവിഹിത ബന്ധം മൂലം ജീവിതം മടുത്തു എന്ന് പറഞ്ഞ് ഫേസ്‌ബുക്കിൽ വീഡിയോ ഇട്ടശേഷം ആത്മഹത്യ ചെയ്ത ആളുടെ വീഡിയോ ഷെയർ ചെയ്യും മുമ്പ് രണ്ട് വട്ടം ആലോചിക്കുക. ആരും ആരെയുംകുറിച്ചും എന്തും പറയുന്ന കാലത്ത് നിരപരാധിയായ ഒരു പെൺകുട്ടിയെ വേദനിപ്പിക്കാൻ നിങ്ങൾ കൂട്ടു നിൽക്കരുത്. 19ാം വയസിൽ ചതിയിലൂടെ വിവാഹം കഴിച്ചും അന്ന് മുതൽ ഇന്നുവരെ മക്കളെ ഓർത്ത് പീഡനം മാത്രം ഏറ്റുവാങ്ങുകയും ചെയ്ത ഒരു പാവപ്പെട്ട പെൺകുട്ടിയുടെ കണ്ണുനീർ കൂടുതൽ രൂക്ഷമാകാൻ നിങ്ങൾ എങ്കിലും കൂട്ടു നിൽക്കരുത്. കഴിഞ്ഞ ആറ് മാസമായി ജോലി നഷ്ടപ്പെട്ട് ആശുപത്രി മുറിയിൽ നിന്നും പുറത്തിറങ്ങാൻ പോലും സാധിക്കാത്ത ഒരു പാവപ്പെട്ട മലയാളി നഴ്‌സിനെയും കുഞ്ഞിന്റെയും ചിത്രങ്ങൾ വച്ചാണ് സംശയ രോഗിയായ ഒരാൾ പറഞ്ഞ വാക്കുകൾ പ്രചരിപ്പിക്കുന്നത് എന്നു മറക്കരുത്.

ഗൾഫിൽ നേഴ്‌സായ ഭാര്യയുടെ അവിഹിത ബന്ധത്തിൽ മനം നൊന്ത് യുവാവ് ജീവനൊടുക്കു മുൻപുള്ള ആരോപണങ്ങൾ എന്ന വിധത്തിലാണ് സോഷ്യൽ മീഡിയിൽ വീഡിയോ വ്യാപകമായി പ്രചരിക്കുന്നത്. വരുമാനത്തിലും സൗന്ദര്യത്തിലും മുന്നിട്ട് നിന്ന ശോഭ അടുത്തു തന്നെ താമസിക്കുന്ന ജോൺ എന്ന മലയാളി യുവാവുമായി സൗഹൃദത്തിലായെന്നും തുടർന്ന് ശോഭയും കാമുകൻ ജോണുമായി ഒരുമിച്ച് താമസവും യാത്രകളുമൊക്കെയായെന്നും ആരോപിച്ചു കൊണ്ടാണ് പത്തനംതിട്ട സ്വദേശിയായ ഷാജി ഫേസ്‌ബുക്കിൽ വീഡിയോ ഇട്ടത്. ഇതിന് ശേഷം ആത്മഹത്യ ചെയ്യുകയുമായിരുന്നു. കടുത്ത മദ്യപാനി കൂടിയായ ഷാജി ഫേസ്‌ബുക്കിൽ പറഞ്ഞ കാര്യങ്ങൾക്ക് യാതൊരു അടിസ്ഥാനവുമില്ലെന്നാണ് മറുനാടൻ നടത്തിയ അന്വേഷണത്തിൽ വ്യക്തമായത്. സംശയരോഗമാണ് ഇയാളെ ആത്മഹത്യയിലേക്ക് നയിച്ചതെന്നും വ്യക്തമായി.

15 വയസിന്റെ പ്രായക്കൂടുതൽ മറച്ചു വച്ച് വിവാഹം

പത്തനംതിട്ട സ്വദേശിയായ ശോഭയ്ക്ക് 19 വയസ് പ്രായമുള്ളപ്പോഴാണ് ഇവരേക്കാൾ 15 വയസ് കൂടുതലുള്ള ഷാജി ചതിയിൽപെടുത്തി വിവാഹം കഴിക്കുന്നത്. 2000ത്തിലായിരുന്നു ഇവരുടെ വിവാഹം. വീട്ടുകാരോട് 25 വയസാണ് തനിക്കെന്നാണ് അന്ന് ഷാജി പറഞ്ഞത്. ശോഭയുടെ വീട്ടുകാരെ തെറ്റിദ്ധരിപ്പിച്ചായിരുന്നു വിവാഹം. എന്നാൽ, വിവാഹ ശേഷമാണ് ശോഭ സത്യാവസ്ഥ അറിയുന്നത്. എന്നാൽ, അപ്പോഴേക്കും തന്റെ ഭർത്താവിനെ അവർ ഇഷ്ടപ്പെട്ടു തുടങ്ങിയിരുന്നു. രണ്ട് മക്കളും കൂടി ഉണ്ടായതോടെ എല്ലാം ക്ഷമിക്കുകയായിരുന്നു ശോഭ. മദ്യപാനവും കൂടിയായപ്പോൾ ശോഭയുടെ ജീവിതം തീർത്തും നരകപൂർണമായി. മദ്യം അകത്തു ചെന്നാൽ ഭാര്യയോട് ആര് മിണ്ടിയാൽ പോലും സംശയത്തിന്റെ കണ്ണിലൂടെയായിരുന്നു ഷാജി നോക്കിക്കണ്ടത്.

ഇരുണ്ട നിറക്കാരാണെന്നതിൽ കടുത്ത അപകർഷതാ ബോധത്തിന് അടിമയായിരുന്നു ഷാജി. ഭാര്യയ്ക്ക് തന്നേക്കാൾ പ്രായം കുറവും സൗന്ദര്യം കൂടിയതും ഇതിന് കാരണമായി. എന്നാൽ, ശോഭയാകട്ടെ മക്കളെ ഓർത്ത് പീഡനങ്ങൾ എല്ലാം ക്ഷമിക്കാൻ തയ്യാറായി. ഇതോടെ ഇടയ്ക്കിടെ കുടുംബത്തിൽ പ്രശ്‌നങ്ങളുണ്ടായി. പലപ്പോഴും ശോഭയുടെ വീട്ടുകാർ ബന്ധം വേർപെടുത്തമെന്ന് പോലും പറഞ്ഞപ്പോൾ തന്റെ മക്കൾ അച്ഛനില്ലാതെ വളരരുതെന്ന നിർബന്ധം പിടിച്ചത് യുവതിയായിരിരുന്നു. അതുകൊണ്ടാണ് ബന്ധം മുന്നോട്ടു കൊണ്ടുപോയതും.

ബന്ധുവിന്റെ സഹായത്തിൽ സൗദിയിൽ നഴ്‌സിങ് ജോലി നേടി

വിവാഹശേഷം 14 വർഷങ്ങൾക്ക് ശേഷമാണ് ഇരുവരും സൗദിയിൽ ജോലിതേടി പോയത്. ഷാജിയുടെ അകന്ന ബന്ധുവിന്റെ സഹായത്തോടെയാണ് ശോഭ സൗദി അറേബ്യയിലേക്ക് ജോലി ലഭിച്ചത്. ഇതിന് മുമ്പ് ഷാജിക്ക് സൗദിയിൽ ജോലിയുണ്ടായരുന്നു സാധു എന്ന ആശുപത്രിയിലായിരുന്നു ശോഭയുടെ ജോലി. ഭാര്യയ്ക്ക് ജോലി വിസ ലഭിച്ചതോടെ ഷാജിയും സൗദിയിലേക്ക് തിരിച്ചു. ചെറിയ ജോലികൾ ചെയ്തു വരികയുമായിരുന്നു ഷാജി. എന്നാൽ, സൗദിയിൽ ശോഭ ജോലി ചെയ്തിരുന്ന ആശുപത്രിയിൽ തന്നെയായിരുന്നു താമസം. ഇതോടെ രണ്ട് പേരും രണ്ട് സ്ഥലങ്ങളിലായി. ഇതോടെ ഷാജിയിലെ സംശയരോഗി കൂടുതൽ ശക്തനാകുകയായിരുന്നു. ഇതോടെ ഭാര്യ തന്നെ ഇട്ടുപോകുമോ എന്നതായിരുന്നു ഇയാളുടെ ആശങ്ക. മറ്റ് യുവാക്കളോട് മിണ്ടിയാൽ പോലും ഭാര്യയെ കുറ്റപ്പെടുത്തുന്ന മനോഗതിയിലേക്ക് ഭർത്താവ് എത്തി. ഇതിന്റെ പേരിൽ യുവതി ഏറെ കണ്ണീരുകുടിക്കേണ്ടി വന്നു.

ജോലി ലഭിച്ച ശേഷം രണ്ടര വർഷത്തിന് ശേഷം ഇവർ ഒരു ഫ്‌ലാറ്റിൽ ഒരുമിച്ചാണ് കഴിഞ്ഞിരുന്നത്. ഈ സമയത്ത് കാര്യമായി ജോലിയില്ലാതിരുന്ന ഷാജി പലരിൽ നിന്നുമായി പണം കടംവാങ്ങി. ഇതിനിടെയാണ് ശോഭ ജോലി ചെയ്തിരുന്ന ആശുപത്രി പൂട്ടാൻ തീരുമാനം വന്നത്. ഇതോടെ ജീവനക്കാരെ പിരിച്ചുവിടാൻ തീരുമാനിച്ചു. എന്നാൽ, നാട്ടിലെത്തിയാൽ വരുമാനമാർഗ്ഗം ഇല്ലാതാകുമെന്ന് കണ്ട് എങ്ങനെയും സൗദിയിൽ പിടിച്ചു നിൽക്കാനാണ് ശോഭ ശ്രമിച്ചത്. ഇക്കാമ കഴിഞ്ഞതിനാൽ ആശുപത്രിയിൽ നിന്നും പുറത്തിറങ്ങാൻ പോലും കഴിയാത്ത അവസ്ഥയിലായിരുന്നു ശോഭ. മാസങ്ങളായി ശമ്പളവുമുണ്ടായിരുന്നില്ല.

ഇതിനിടെയും സ്ഥലത്തെ മലയാളികൾ ശോഭയ്ക്ക് മറ്റ് ജോലി അന്വേഷിച്ചിരുന്നു. എന്നാൽ, ശോഭക്ക് വേണ്ടി ജോലി അന്വേഷിക്കുന്നവരെ പോലും സംശയത്തോടെയാ ഭർത്താവ് വീക്ഷിച്ചത്. ചിലരോട് പരുഷമായി പെരുമാറുകയും ചെയ്തു. ഇതിനിടെ പലരിൽ നിന്നും കടം വാങ്ങിയ പണം കൊണ്ട് ഷാജി നാട്ടിൽ പോയി. ഒരുമാസത്തിന് ശേഷം മടങ്ങിയെത്തുകയും ചെയ്തു. ഇവർ താമസിച്ചിരുന്ന ഫ്‌ലാറ്റിലുള്ള ഒരാളിൽ നിന്നും ഷാജി പണം കടംവാങ്ങുകയും ചെയ്തു. ഭാര്യയ്ക്ക് ജോലി ലഭിക്കുമ്പോൾ വീട്ടിക്കൊള്ളാം എന്നുപറഞ്ഞായിരുന്നു ഇങ്ങനെ കടം വാങ്ങിക്കൂട്ടിയത്. ഇങ്ങനെ കടം വാങ്ങിയ പണം കൊണ്ടു മദ്യപിക്കുകയായിരുന്നു ഇയാൾ ചെയ്തത്.

ശോഭയുടെ ഫേസ്‌ബുക്ക് ലോഗിൻ ചെയ്തു സുഹൃത്തുക്കളുമായി അശ്ലീലം പറഞ്ഞു തെറ്റിദ്ധരിപ്പിച്ചു

ഇതിനിടെ ശോഭയുടെ ഫേസ്‌ബുക്ക് അക്കൗണ്ടിന്റെ പാസ്‌വേഡും ഷാജി കരസ്ഥമാക്കി. ഭാര്യ സോഷ്യൽ മീഡിയയിലൂടെ ആരോടൊക്കെ ബന്ധപ്പെടുന്നു എന്നറിയാനായിരുന്നു ശ്രമം. യുവതിക്ക് ഒപ്പം പഠിച്ച ഒരു സുഹൃത്തിനോട് ഫേസ്‌ബുക്കിലൂടെ ചാറ്റ് ചെയ്തു അശ്ലീലം പറഞ്ഞു. ശോഭ ഒരിക്കലും അങ്ങനെ ചെയ്യില്ലെന്ന ബോധ്യമായ സുഹൃത്ത് കൂടുതൽ സംസാരത്തിന് നിന്നില്ല. ഈ സംഭവത്തെ കുറിച്ച് ശോഭ ഭർത്താവിനോട് ചോദിച്ചപ്പോൾ പറഞ്ഞത് നിന്റെ സുഹൃത്തുക്കളെ പരീക്ഷിക്കാൻ വേണ്ടി ചെയ്തതാണ് എന്നാണ് ഷാജി പറഞ്ഞത്. ആ നിലയിലേക്ക് വളർന്ന സംശയരോഗമാണ് ഒടുവിൽ വീഡിയോയുടെ രൂപത്തിൽ എത്തിയത്.

ഇങ്ങനെ കൈവശപ്പെടുത്തിയ ഫേസ്‌ബുക്കിലൂടെ വീഡിയോ ഇട്ടാണ് ഷാജി ഒടുവിൽ ആത്മഹത്യ ചെയ്തത്. ആത്മഹത്യ ചെയ്യും മുമ്പ് മുറിയിലെ മദ്യക്കുപ്പികൾ മാറ്റണമെന്നാണ് സുഹൃത്തുക്കളോട് ഷാജി പറഞ്ഞിരുന്നു. ഈ സമയം പണമില്ലാത്തതിനാൽ കടുത്ത ദാരിദ്ര്യത്തിലാണ് ശോഭ ആശുപത്രിയിൽ കഴിഞ്ഞിരുന്നത്. സംശയരോഗത്തിന്റെ പേരിൽ അവിഹിത ബന്ധം ആരോപിച്ച് ഭർത്താവ് ആത്മഹത്യ ചെയ്തതോട എന്തു ചെയ്യണമെന്് അറിയാതെ ആത്മഹത്യയുടെ വക്കിലാണ് രണ്ട് കുട്ടികളുടെ അമ്മയായ യുവതി. ഭർത്താവിന്റെ ആത്മഹത്യാ വീഡിയോ സോഷ്യൽ മീഡിയയിൽ വ്യാപകമായി ഷെയർ ചെയ്യപ്പെട്ടതോടെ സർവതും നശിച്ച അവസ്ഥയിലാണ് ഇവർ. സോഷ്യൽ മീഡിയയിലൂടെ തന്നെ കൊടുംകുറ്റവാളിയും അവിഹിതക്കാരിയുമായി ചിത്രീകരിക്കുന്നവരോട് തൊഴുകയ്യോടെ യുവതിക്ക് പറയാനുള്ളത് സത്യാവസ്ഥ അന്വേഷിക്കണം എന്നുമാത്രമാണ്.

സൗദിയിൽ സ്ത്രീകൾക്ക് പുറത്തിറങ്ങാൻ പോലും ബുദ്ധിമുട്ടാണെന്നിരിക്കേ ദാരിദ്ര്യത്തിൽ കഴിയുന്ന യുവതി എങ്ങനെ കാമുകനൊപ്പം ചുറ്റിയടിക്കുമെന്ന് വീഡിയോ ഷെയർ ചെയ്യുന്ന ആരും ചിന്തിക്കുന്നില്ല. പോസ്റ്റ്‌മോർട്ടം റിപ്പോർട്ടിൽ മദ്യപിച്ചിട്ടുണ്ടെന്ന് വ്യക്തമായതോടെ യാതൊരു ആനുകൂല്യങ്ങളും മക്കൾക്ക് ലഭിക്കാത്ത അവസ്ഥയാണ് ഇപ്പോഴുള്ളത്. മറ്റൊരാൾക്കൊപ്പം പോകാനാണെങ്കിൽ ഡിവോഴ്‌സ് പണ്ടേ ആകാമായിരുന്നില്ലേ എന്നാണ് ശോഭയുടെ ബന്ധുക്കളും ചോദിക്കുന്നത്. പലതവണ മാതാപിതാക്കൾ ഇക്കാര്യം ചോദിച്ചപ്പോഴും ശോഭയായിരുന്നു മക്കളെ ഓർത്ത് എല്ലാം ക്ഷമിച്ചത്. യുവതിക്ക് പറയാനുള്ളത് എന്താണെന്ന് കേൾക്കാതെ ഏകപക്ഷീയമായ ആക്രമമാണ് ഇപ്പോൾ സൈബർ ലോകത്ത് നടക്കുന്നത്. കടുത്ത മദ്യപാനിയും സംശയരോഗിയുമായ ഒരാളുടെ വീഡിയോ കാര്യമറിയാതെ വ്യാപകമായി പ്രചരിക്കപ്പെടുമ്പോൾ ആത്മഹത്യയിലുടെ വക്കിലാണ് യുവതി ഇന്ന്. വാസ്തവം അറിയാതെ കല്ലെറിയുന്ന സോഷ്യൽ മീഡിയയുടെ ദൂഷ്യഫലത്തിന്റെ ഇരകൂടിയായി മാറുകയാണ് മലയാളി നഴ്‌സ്.

ഈ യുവതിയുടെ ചിത്രങ്ങൾ പ്രസിദ്ധീകരിക്കേണ്ടതില്ല എന്നായിരുന്നു ഞങ്ങളുടെ ആദ്യ തീരുമാനം. എന്നാൽ, അവിഹിത ബന്ധത്തിലൂടെ ഒരു പുരുഷന്റെ ജീവനെടുത്ത സ്ത്രീ എന്ന നിലയിൽ മാനസിക വൈകല്യം സംഭവിച്ച അനേകം പേർ ഇവരുടെ ഫോട്ടോകൾ പ്രചരിപ്പിക്കുന്നതു കൊണ്ട് ആണ്‌ ഞങ്ങൾ നിരപരാധി എന്ന പൂർണ ബോധ്യമുള്ള യുവതിയുടെ ചിത്രം പ്രസിദ്ധീകരിക്കുന്നത്. ആർക്കും ആർക്കെതിരെയും എന്തും പ്രചരിപ്പിക്കാവുന്ന കാലത്ത് സംശയരോഗം ജീവിത കാലം മുഴുവൻ കൊണ്ടു നടന്ന ഒരാളുടെ വീഡിയോ വൈറലാക്കുന്നവർ അറിയാൻ.. ഇത് നാളെ നമ്മൾ ആർക്ക് വേണമെങ്കിലും സംഭവിക്കാം..

Stories you may Like

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

More News in this category+

MNM Recommends +

Go to TOP