Forex Rate:

1 usd = 76.25 inr 1 gbp = 94.16 inr 1 eur = 85.23 inr 1 aed = 20.76 inr 1 sar = 20.32 inr 1 kwd = 247.66 inr
Mar / 202429Friday

ഇന്ത്യൻ വ്യോമസേനയ്ക്ക് കരുത്താകാൻ റഷ്യയിൽ നിന്നും 33 പോർവിമാനങ്ങൾ കൂടിയെത്തുന്നു; 12 സുഖോയ് 30 വിമാനങ്ങളും 21 മിഗ് 29 എസ് വിമാനങ്ങളും വാങ്ങാൻ കേന്ദ്ര പ്രതിരോധ മന്ത്രാലയം അനുമതി നൽകി; റഷ്യയുമായി നടക്കുന്നത് 38,900 കോടിരൂപയുടെ ഇടപാട്; വ്യോമസേനയ്ക്കും നാവിക സേനയ്ക്കുമായി 248 അസ്ട്ര ബിയോണ്ട് വിഷ്വൽ റേഞ്ച് എയർ ടൈം എയർ മിസൈലുകൾ വാങ്ങാനും മന്ത്രാലയത്തിന്റെ അനുമതി; അതിർത്തിയിൽ ചൈന, പാക്കിസ്ഥാൻ ഭീഷണി ഉയരുമ്പോൾ സേനാക്കരുത്തു കൂട്ടി ഇന്ത്യ

ഇന്ത്യൻ വ്യോമസേനയ്ക്ക് കരുത്താകാൻ റഷ്യയിൽ നിന്നും 33 പോർവിമാനങ്ങൾ കൂടിയെത്തുന്നു; 12 സുഖോയ് 30 വിമാനങ്ങളും 21 മിഗ് 29 എസ് വിമാനങ്ങളും വാങ്ങാൻ കേന്ദ്ര പ്രതിരോധ മന്ത്രാലയം അനുമതി നൽകി; റഷ്യയുമായി നടക്കുന്നത് 38,900 കോടിരൂപയുടെ ഇടപാട്; വ്യോമസേനയ്ക്കും നാവിക സേനയ്ക്കുമായി 248 അസ്ട്ര ബിയോണ്ട് വിഷ്വൽ റേഞ്ച് എയർ ടൈം എയർ മിസൈലുകൾ വാങ്ങാനും മന്ത്രാലയത്തിന്റെ അനുമതി; അതിർത്തിയിൽ ചൈന, പാക്കിസ്ഥാൻ ഭീഷണി ഉയരുമ്പോൾ സേനാക്കരുത്തു കൂട്ടി ഇന്ത്യ

മറുനാടൻ ഡെസ്‌ക്‌

ന്യൂഡൽഹി: അതിർത്തി സംഘർഷം മുറുകവേ ഇന്ത്യൻ വ്യോമസേന കരുത്തു വർദ്ധിപ്പിക്കാൻ ഒരുങ്ങുന്നു. റഷ്യയിൽ നിന്ന് 33 ആധുനിക യുദ്ധവിമാനങ്ങൾ വാങ്ങാനുള്ള വ്യോമസേനയുടെ നിർദേശത്തിന് കേന്ദ്രസർക്കാർ അനുമതി. 38,900 കോടിരൂപയുടെ പ്രതിരോധ ഇടപാടിനാണ് അനുമതി നൽകിയിരിക്കുന്നത്. അതിർത്തിയിൽ സംഘർഷം തുടരുന്ന സാഹചര്യത്തിലാണ് പ്രതിരോധന്ത്രാലയത്തിന്റെ അനുമതി. 12 സുഖോയ് 30 വിമാനങ്ങളും 21 മിഗ് 29 എസ് വിമാനങ്ങളും വാങ്ങും. മിഗ് വിമാന ഇടപാടിന് 7,418കോടി രൂപയും, സുഖോയ് ഇടപാട് 10,730 കോടിയുമാണ് ചെലവ് വരിക. വ്യോമസേനയാണ് യുദ്ധവിമാനങ്ങൾ വാങ്ങാനുള്ള നിർദ്ദേശം സമർപ്പിച്ചത്. ഇതിന് മാത്രമായി 18,148 കോടി രൂപ ചെലവ് വരും.

വ്യോമസേനയ്ക്കും നാവിക സേനയ്ക്കുമായി 248 അസ്ട്ര ബിയോണ്ട് വിഷ്വൽ റേഞ്ച് എയർ ടൈം എയർ മിസൈലുകൾ വാങ്ങാനും മന്ത്രാലയം അനുമതി നൽകി. നാവിക സേനയ്ക്ക് ദീർഘദൂര ക്രൂയിസ് മിസൈലുകൾ വികസിപ്പിക്കാനുള്ള നടപടിക്കും പ്രതിരോധമന്ത്രാലയം അനുമതി നൽകി. തദ്ദേശീയമായിട്ടായിരിക്കും വികസിപ്പിക്കുക. ഇന്ത്യ-റഷ്യ-ചൈന ത്രിരാഷ്ട്ര ഉച്ചക്കോടിക്ക് പിന്നാലെയാണ് ഇപ്പോൾ ഇന്ത്യ വിമാനങ്ങൾ വാങ്ങുന്നത് എന്നതും ശ്രദ്ധേയമാണ്.

മിഗ് 29 നവീകരണ പരിപാടിയിൽ മോസ്‌കോ ഇന്ത്യൻ വ്യോമസേനയെ സഹായിച്ചുകൊണ്ടിരിക്കുമ്പോഴും നേരത്തെയുള്ള ഡെലിവറിയുടെ പ്രശ്നം വിലയിരുത്താൻ റഷ്യക്കാർ തയ്യാറായായെന്ന വിലയിരുത്തലാണ് ഇതോടെ പുറത്തുവരുന്നത്. നാലാം തലമുറ യുദ്ധവിമാനവുമായി താരതമ്യപ്പെടുത്താവുന്ന ഒരു തലത്തിലേക്ക് മിഗ് -29 യുദ്ധവിമാനങ്ങളുടെ പ്രവർത്തന ഫീച്ചറുകൾ വർധിപ്പിക്കാനും പോരാട്ട ശേഷി ഉയർത്താനും ആധുനികവൽക്കരണം വഴി സഹായിക്കുമെന്നാണ് വിലയിരുത്തൽ.

മിഗ് 29 പരിഷ്‌കരിക്കുമ്പോൾ റഷ്യയുടെയും പുറത്തുനിന്നുള്ളതുമായ ആയുധങ്ങൾ സംയോജിപ്പിക്കാൻ സാധിക്കും. ആധുനിക സംരക്ഷണ സാമഗ്രികളും സാങ്കേതികവിദ്യകളും മിഗ് -29 പോർവിമാനങ്ങളുടെ സേവന കാലാവധി 40 വർഷം വരെ വർധിപ്പിക്കും. സു -30 എംകെഐയെക്കുറിച്ച് പറയുമ്പോൾ, ഇന്ത്യൻ വ്യോമസേന ഈ വർഷം ജനുവരിയിൽ ബ്രഹ്മോസ്-എ ക്രൂസ് മിസൈൽ പ്രയോഗിക്കാൻ ശേഷിയുള്ള സു -30 എംകെഐ യുദ്ധവിമാനത്തിന്റെ ആദ്യ സ്‌ക്വാഡ്രൺ വിന്യസിച്ചു കഴിഞ്ഞു. ബ്രഹ്മോസ് സൂപ്പർസോണിക് മിസൈലുകൾ ഉപയോഗിക്കാൻ ശേഷിയുള്ള ഒരേയൊരു ഇന്ത്യൻ വിമാനമാണിതെന്ന് സുഖോയ് ജെറ്റുകളുടെ പ്രാധാന്യം മനസിലാക്കാം.

ഡെഫെക്സ്പോ ഇന്ത്യ 2020 ൽ ബ്രഹ്മോസ് എയ്‌റോസ്‌പെയ്‌സിന്റെ പ്രതിനിധി റഷ്യൻ ആർഐഎ നോവോസ്റ്റി വാർത്താ ഏജൻസിയോട് പറഞ്ഞത്, രണ്ട് വർഷത്തിനുള്ളിൽ വ്യോമസേനയുടെ സു -30 എംകെഐകൾക്ക് വായുവിലൂടെ, മുന്നറിയിപ്പ് വിമാനങ്ങൾക്കെതിരെ പ്രയോഗിക്കാൻ ശേഷിയുള്ള പുതിയ മിസൈൽ ലഭിക്കുമെന്നാണ്. അങ്ങനെ സുഖോയ്ക്ക് എയർ-ടു-എയർ മിസൈൽ ഡൊമെയ്‌നിൽ പ്രവേശിക്കാൻ കഴിയും. വ്യോമസേനയ്ക്ക് സു -30 എംകെഐ ജെറ്റുകൾ എത്തിക്കുന്നതിനുള്ള ആദ്യ കരാർ 1996 നവംബർ 30 ന് റഷ്യയിലെ ഇർകുറ്റ്‌സ്‌കിൽ റോസ്വുരുഴെനി സ്റ്റേറ്റ് ഇന്റർമീഡിയറി കമ്പനിയും ഇന്ത്യൻ പ്രതിരോധ മന്ത്രാലയവും തമ്മിലാണ് ഒപ്പുവച്ചത്. 32 സു -30 എംകെഐ വിതരണം ചെയ്യാൻ ഇത് വിഭാവനം ചെയ്തു. എല്ലാം 2002-2004 ൽ നിർമ്മിക്കപ്പെട്ടതാണ്.

വിമാനത്തിന്റെ പ്രകടനത്തിൽ സംതൃപ്തനായ ഇന്ത്യൻ പ്രതിരോധ മന്ത്രാലയം പിന്നീട് കൂടുതൽ വിമാനങ്ങൾ ആവശ്യപ്പെടുകയായിരുന്നു. 2000 ഡിസംബറിൽ എച്ച്എഎല്ലിന്റെ സൗകര്യങ്ങളിൽ സു -30 എംകെഐയുടെ ലൈസൻസുള്ള ഉൽപാദനം സംഘടിപ്പിക്കുന്നതിനുള്ള കരാറിൽ ഇരുപക്ഷവും ഒപ്പുവച്ചു. 2012 ൽ സാങ്കേതിക കിറ്റുകൾ കൈമാറുന്ന മറ്റൊരു കരാരിലും ഒപ്പിട്ടു. സാധാരണഗതിയിൽ, സു -30 എംകെഐ വ്യോമസേനയുടെ വിശ്വസനീയവും ഫലപ്രദവുമായ മൾട്ടിറോൾ ഹെവി ഏരിയൽ പ്ലാറ്റ്‌ഫോമായി സ്വയം തെളിയിച്ചിട്ടുണ്ട്.

വിദേശ രാജ്യങ്ങളുമായുള്ള ഇന്ത്യയുടെ സൈനിക സഹകരണത്തിന്റെ ചരിത്രത്തിലെ ഏറ്റവും വലിയ പദ്ധതിയായി സു -30 എംകെഐ പദ്ധതി മാറിയിട്ടുണ്ട്, കൂടാതെ സു -30 എംകെ മോഡൽ വിമാനങ്ങൾ മറ്റ് രാജ്യങ്ങളിലേക്ക് വിൽക്കുന്നതിനും സംഭാവന നൽകിയിട്ടുണ്ട്. മാത്രമല്ല, സു -30 എസ്എം യുദ്ധവിമാനത്തിന്റെ വികസനത്തെ ഈ പ്രോഗ്രാം നേരിട്ട് സ്വാധീനിച്ചിട്ടുണ്ട്. ഇത് നിലവിൽ റഷ്യൻ വ്യോമസേനയ്ക്ക് കൈമാറുകയും ആയുധ വിപണിയിൽ സു -30 എസ്എംഇ ആയി വാഗ്ദാനം ചെയ്യുകയും ചെയ്യുന്നു.

നേരത്തെ കാർഗിൽ യുദ്ധവീരനായി അറിയപ്പെട്ട മിഗ് വിമാനം ഇന്ത്യൻ വ്യോമസേന ഉപേക്ഷിച്ചത്. 20 വർഷങ്ങൾക്ക് മുമ്പ് നടന്ന കാർഗിൽ യുദ്ധത്തിൽ ഇന്ത്യ വിജയക്കൊടി പാറിച്ചപ്പോൾ അതിൽ മിഗ് 27ന്റെ പങ്ക് ചെറുതായിരുന്നില്ല. അന്നത്തെ സാഹചര്യത്തിൽ മിഗ് 27 ഇല്ലാത്തൊരു യുദ്ധത്തെക്കുറിച്ച് ഇന്ത്യൻ സൈന്യത്തിന് ചിന്തിക്കാനാകുമായിരുന്നില്ല. ടൈഗർഹില്ലും, ബാതാലിക്കിലെ ജുബാർ കുന്നുകളും പിടിച്ചെടുത്ത് ഓപ്പറേഷൻ വിജയ് വിജയമാക്കിയശേഷം മിഗ് 27 തിരികെ ലാന്റ് ചെയ്തത് ഇന്ത്യയുടെ ഹൃദയത്തിലേക്കും ഇന്ത്യക്കാരന്റെ അഭിമാനത്തിലേക്കുമായിരുന്നു.

ഇന്ത്യൻ വ്യോമസേന പൈലറ്റുമാർ മിഗിനെ വിളിക്കാറ് ബഹദൂർ എന്നായിരുന്നു. അതായത് ധീരൻ, ശത്രുപാളയത്തിന്റെ ആകാശത്തേക്ക് ചീറിപ്പറന്ന് തുടരെ ബോംബു മഴപെയ്യിക്കുന്ന മിഗ് 27 നെ ബഹദൂർ എന്നല്ലാതെ മറ്റെന്ത് വിളിക്കാനാണ്. ഒന്നോർക്കണം കാർഗിൽ യുദ്ധ സമയത്ത് ഇന്ത്യയ്ക്ക് നഷ്ടമായത് ഒരേ ഒരു ബഹദൂറിനെയാണ്. ശക്തിയേറിയ ആർ 29 എൻജിനും മാക്ക് വൺ (Mach) വരെ വേഗതയ്യാർജിക്കാനുള്ള കഴിവുമാണ് മിഗിന്റെ പ്രധാനപ്പെട്ട പ്രത്യേകത. മണിക്കൂറിൽ 1350 കിലോമീറ്റർ വേഗതയിൽ പറന്നിരുന്ന മിഗ് ലേസർ ബോംബറുകൾ, ക്രൂയിസ് മിസൈൽ എന്നിവ വഹിച്ചിരുന്നു.

1975ൽ ആണ് മിഗ്-27 നെ സോവിയറ്റ് യൂണിയൻ പുറത്തിറക്കുന്നത്. 1984- ൽ സോവിയറ്റ് യൂണിയനിൽ നിന്ന് ഇന്ത്യ മിഖായോൻ-ഗുരേവിച്ച് എന്ന മിഗിനെ സ്വന്തമാക്കി. പിന്നീട് സാങ്കേതിക വിദ്യ സ്വായത്തമാക്കിയ ശേഷം ഹിന്ദുസ്ഥാൻ എയ്‌റോനോട്ടിക്കൽ ലിമിറ്റഡ് മിഗ് 27 തദ്ദേശീയമായി നിർമ്മിക്കാൻ ആരംഭിച്ചു. ഇത്തരത്തിൽ 165 വിമാനങ്ങൾ എച്ച്എഎൽ നിർമ്മിച്ചിട്ടുണ്ട്. 2006ൽ മിഗ് വിമാനങ്ങൾ നവീകരിച്ച് എഞ്ചിൻ ശക്തി വർദ്ധിപ്പിച്ചിരുന്നു. മിഗ് 27 ഇപ്പോഴും കൈവശ്യമുള്ള ഏകരാജ്യമാണ് ഇന്ത്യ. 80 -90 കളിൽ ശത്രുരാജ്യങ്ങളുടെ പേടിസ്വപ്നമായിരുന്നു ഇന്ത്യയുടെ മിഗ് 27. കാലപ്പഴക്കം മൂലം തുടർച്ചയായുണ്ടായ അപകടങ്ങളാണ് മിഗ് 27 നെ ഡി കമ്മീഷൻ ചെയ്യാൻ സേനയെ പ്രേരിപ്പിച്ചത്. ഈ വർഷം തന്നെ മിഗ് വീമാനങ്ങൾക്ക് രണ്ട് തവണ അപകടം സംഭവിച്ചിരുന്നു.

പാക്കിസ്ഥാനുമായുള്ള അതിർത്തി സംഘർഷത്തിൽ ഇന്ത്യ ഏറ്റവും അധികം ഉപയോഗിച്ചത് മിഗ് 21 വിമാനമായിരുന്നു. അത്യാധുനിക യുഎസ് നിർമ്മിത എഫ്-16 നെ കീഴടക്കാൻ മിഗ് 21ലൂൂടെ സാധിച്ചിരുന്നു. ഇന്ത്യൻ വ്യോമസേനയിൽ മിഗ് 21 നെ ഉൾപ്പെടുത്തിയത് 56 വർഷം മുമ്പാണ്, അതായത് 1963 ൽ. പുൽവാമ ആക്രമണത്തിന് പിന്നാലെ മിഗ് 21 മാത്രമല്ല. സു-30എംകെഐ, മിഗ് 29, എന്നിവയും സജ്ജമായിരുന്നു. സുഖോയ്- 30 എംകെഐ. മിഗ് 29 എന്നിവ ഫെബ്രുവരി 26 രാത്രി ആകാശത്തുണ്ടായിരുന്നു.

Stories you may Like

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

More News in this category+

MNM Recommends +

Go to TOP