Forex Rate:

1 usd = 76.25 inr 1 gbp = 94.16 inr 1 eur = 85.23 inr 1 aed = 20.76 inr 1 sar = 20.32 inr 1 kwd = 247.66 inr
Apr / 202122Thursday

ആദ്യ ഓവറിൽ രണ്ട് പേർ ബൗൾഡ്; മുപ്പത് റൺസിന് നാല് നിർണ്ണായക വിക്കറ്റുകൾ; ഐപിഎല്ലിലെ ചതിക്ക് ശ്രീശാന്ത് മറുപടി നൽകിയത് പന്തു കൊണ്ട്; ബീഹാറിന്റെ 148 റൺസിനെ വെറും ഒൻപതാം ഓവറിൽ മറികടന്ന് ഉത്തപ്പാ മാജിക്ക്; വിജയ് ഹസാരയിൽ കേരളത്തിന് മിന്നും ജയം

ആദ്യ ഓവറിൽ രണ്ട് പേർ ബൗൾഡ്; മുപ്പത് റൺസിന് നാല് നിർണ്ണായക വിക്കറ്റുകൾ; ഐപിഎല്ലിലെ ചതിക്ക് ശ്രീശാന്ത് മറുപടി നൽകിയത് പന്തു കൊണ്ട്; ബീഹാറിന്റെ 148 റൺസിനെ വെറും ഒൻപതാം ഓവറിൽ മറികടന്ന് ഉത്തപ്പാ മാജിക്ക്; വിജയ് ഹസാരയിൽ കേരളത്തിന് മിന്നും ജയം

മറുനാടൻ മലയാളി ബ്യൂറോ

ബംഗളൂരു: ഐപിഎല്ലിൽ ആർക്കും വേണ്ടാത്ത ശ്രീശാന്ത്... 75 ലക്ഷത്തിന് ലേലത്തിന് തയ്യാറാണെന്ന് ബിസിസിഐയെ ശ്രീശാന്ത് അറിയിച്ചെങ്കിലും നിരാശയായിരുന്നു ഫലം. ആരും ശ്രീശാന്തിനോട് താൽപ്പര്യം കാട്ടിയില്ല. ഇതോടെ ഐപിഎൽ ലേലത്തിനുള്ള പട്ടികയിൽ പോലും ശ്രീ ഉൾപ്പെട്ടില്ല. വാതുവയ്‌പ്പിൽ അകത്തായെങ്കിലും കുറ്റ വിമുക്തനായത് ക്രിക്കറ്റിൽ സജീവമാകാനായിരുന്നു. പക്ഷേ വിലക്ക് ആറു കൊല്ലം നീണ്ടു. എല്ലാ വെല്ലുവിളിയേയും അതിജീവിച്ച് പന്തെറിഞ്ഞിട്ടും ഐപിഎല്ലിലെ ചതിയന്മാർ ശ്രീയെ വീണ്ടും വേദനിപ്പിച്ചു. പക്ഷേ തോൽക്കുക മലയാളിയുടെ നിഘണ്ടുവിൽ ഇല്ലാത്ത വാക്കായിരുന്നു. ഇതോടെ കേരളം നോക്കൗട്ട് റൗണ്ടിലെത്തി.

വിജയ് ഹസാരെ ട്രോഫിയിൽ കേരളത്തിനായി ശ്രീ പന്തെടുത്തു. തന്നെ ഒതുക്കിയവർക്ക് മറുപടി നൽകാൻ. 13 വിക്കറ്റാണ് അഞ്ചു കളിയിൽ നിന്ന് മുൻ ടെസ്റ്റ് താരം നേടിയത്. കർണ്ണാടകയ്‌ക്കെതിരെ വിക്കറ്റ് കിട്ടിയില്ലെങ്കിലും മികച്ച ബൗളിങ് കാട്ടി. ദേവ് ദത്ത് പടിക്കൽ പോലും ശ്രീയ്ക്ക് ബഹുമാനം നൽകി ബാറ്റ് ചെയ്തു. അവസാന മത്സരത്തിൽ ക്യാപ്ടൻ ആഗ്രഹിച്ചതാണ് ശ്രീ ചെയ്തു കൊടുത്തത്. അങ്ങനെ കേരളാ ക്രിക്കറ്റിലെ മികച്ച വിജയം മലയാളികൾ ആഘോഷമാക്കുന്നു. ബീഹാറിനെതിരെ നാല് വിക്കറ്റുമായി ശ്രീ തകർത്തപ്പോൾ ബാറ്റ് കൊണ്ട് കൂട്ടുകാരൻ റോബൻ ഉത്തപ്പയും അത്ഭുതം കാട്ടി. 32 പന്തിൽ 87 റൺസ് നേടി ഉത്തപ്പ കേരളത്തെ ഒൻപതാം ഓവറിൽ വിജയ തീരത്ത് എത്തിച്ചു. ശ്രീശാന്തും ഉത്തപ്പയും ചേർന്ന് വിജയ ഹസാരയുടെ അടുത്ത റൗണ്ടിൽ കേരളത്തെ ഉറപ്പാക്കി.

ആദ്യം ബാറ്റ് ചെയ്ത ബീഹാർ 40.2 ഓവറിൽ 148 റൺസിന് പുറത്തായി. ആദ്യ ഓവറിൽ തന്നെ രണ്ട് പേരെ ക്ലീൻ ബൗളഡാക്കി ശ്രീയായിരുന്നു വിക്കറ്റ് വേട്ട തുടങ്ങിയത്. പിന്നീട് രണ്ട് വിക്ക് കൂടി. 9 ഓവറിൽ 30 റൺസിന് നാല് വിക്കറ്റ്. ഫോമിൽ മടങ്ങിയെത്തിയതിന്റെ സൂചന ശ്രീ നൽകിയപ്പോൾ ജലജ് സക്‌സേന മൂന്നും നിധീഷ് രണ്ടും വിക്കറ്റ് നേടി. അക്ഷയ് ചന്ദ്രനും കിട്ടി ഒന്ന്. ശ്രീയുടെ ബൗളിങ്ങായിരുന്നു ബീഹാറിനെ ഒതുക്കിയതെന്ന് വ്യക്തം. രണ്ട് മെയ്ഡിനും ഉണ്ട്. അതിന് ശേഷം ഉത്തപ്പയുടെ ഊഴം. 9 ഓവറിൽ കേരളത്തിന് വിജയം നൽകി. ട്വന്റി ട്വന്റി ശൈലിയിൽ ഏകദിനത്തിൽ ബാറ്റ് വീശി നേടിയ വിജയം. ഈ ഉയർന്ന റൺനിരക്ക് കേരളത്തെ വിജയ് ഹസാരയുടെ അടുത്ത റൗണ്ടിൽ എത്തിച്ചു..

ആദ്യം ശ്രീശാന്തിന്റെ തീപാറുന്ന പന്തുകൾക്ക് മുന്നിൽ പതറിയ ബീഹാറിനെ ഉത്തപ്പ തല്ലിയൊതുക്കിയതോടെ വിജയഹാസാരെ ട്രോഫിയിൽ കേരളത്തിന് ത്രസിപ്പിക്കുന്ന ജയ നേടാനായി. മിന്നുന്ന ജയത്തോടെ അടുത്ത റൗണ്ടിലേക്കുള്ള സാധ്യത കേരളം ഒന്നുകൂടി ഉറപ്പിച്ചു. വിജയലക്ഷ്യമായ 148 റൺസ് 8.5 ഓവറിൽ ഒരു വിക്കറ്റ് നഷ്ടത്തിൽ കേരളം മറികടന്നു.37 പന്തിൽ 10 സിക്സും 4 ഫോറും സഹിതം 87 റൺസ് നേടിയ ഒപ്പണർ റോബിൽ ഉത്തപ്പയുടെ തകർപ്പൻ ബാറ്റിങ്ങാണ് കേരളത്തിന് അനായാസ ജയം സമ്മാനിച്ചത്.സഞ്ജുസാംസൺ 9 പന്തിൽ 24 റൺസുമായി പുറത്താകാതെ നിന്നു.12 പന്തിൽ 37 റൺസെടുത്ത വിഷ്ണു വിനോദാണ് പുറത്തായത്. വിഷ്ണുവും ആഞ്ഞടിച്ചാണ് റൺ നേടിയത്. അങ്ങനെ ടീം കേരളയുടെ വിജയമാണ് ബംഗളൂരുവിൽ കണ്ടത്. .

ടോസ് നേടി ബൗളിങ്ങ് തെരഞ്ഞെടുത്ത കേരള ക്യാപറ്റൻ സച്ചിൻബേബിയുടെ തീരുമാനം ശരിവെക്കുന്നതായിരുന്നു കേരള ബൗളർമാരുടെ പ്രകടനം. ആദ്യ ഓവറിൽ തന്നെ ഓപ്പണർമാരെ രണ്ടുപേരെയും മടക്കി ശ്രീ ബീഹാറിനെ ഞെട്ടിച്ചു.തുടർന്നങ്ങോട്ട് ശ്രീശാന്തിന്റെ വിളയാട്ടമായിരുന്നു. രണ്ടാം ഓവറിൽ റൺസ് വഴങ്ങിയതൊഴിച്ചാൽ കൃത്യമായ ഇടവേളകളിൽ വിക്കറ്റ് വീഴ്‌ത്തി ശ്രീ ബീഹാറിനെ പ്രതിരോധത്തിലാഴ്‌ത്തി. ജലജ് സക്‌സേനയും അവസരത്തിനൊത്തുയർന്നു. ഇതോടെ ബീഹാർ സ്‌കോർ 148ൽ ഒതുങ്ങി. ക്യാപ്ടൻ സച്ചിൻ ബേബിയും ആഗ്രഹിച്ചത് ഇതാണ്. വിജയ് ഹസാരയുടെ ഗ്രൂപ്പ് സ്റ്റേജിൽ ഓരോ ടീമിനും അഞ്ച് കളികളാണുള്ളത്. ഇതിൽ നാലിലും കേരളം ജയിച്ചു. കർണ്ണാടകത്തോട് തോറ്റു. പക്ഷേ കർണ്ണാടകത്തിനും കേരളത്തെ പോലെ ഒരു തോൽവി ഉണ്ടായി. അതുകൊണ്ട് തന്നെ അടുത്ത കളിയിൽ കർണ്ണാടകം ജയിച്ചാൽ കേരളവും കർണ്ണാടകവും പോയിന്റിൽ തുല്യമാകും.

കേരളത്തെ പോലെ ഉത്തർപ്രദേശിനും 15 പോയിന്റ് കിട്ടാൻ ഇടയുണ്ട്. അതുണ്ടായാലും ബീഹാറിനെതിരെ നേടിയ വമ്പൻ മാർജിനിലെ വിജയം ഗ്രൂപ്പ് സ്റ്റേജിൽ കേരളത്തെ പോയിന്റെ പട്ടികയിൽ ആദ്യ സ്ഥാനക്കാരാക്കും. നേരത്തെ മുഷ്താഖ് അലി 20-20യിലും കേരളം മികവ് കാട്ടിയിരുന്നു. മുംബൈയെ പോലും തോൽപ്പിച്ചു. എന്നാൽ അവസാന മത്സരത്തിൽ തോറ്റതിനാൽ ക്വാർട്ടറിൽ എത്താൻ കഴിഞ്ഞില്ല. വിജയ് ഹസാരയിൽ അതിനാണ് ശ്രീശാന്തിന്റെ ബൗളിങ് പരിഹാരമുണ്ടാക്കുന്നത്. തന്റെ പന്തുകളുടെ മൂർച്ച ദേശീയ സെലക്ടർമാർക്ക് മുമ്പിൽ വീണ്ടും അവതരിപ്പിക്കുകയാണ് ശ്രീശാന്ത്. കഴിഞ്ഞ മത്സരത്തിൽ നിലവിലെ ചാംപ്യന്മാരായ കർണാടകയോട് ഏറ്റ പരാജയത്തിന്റെ നിരാശ മറന്ന് ബിഹാറിനെയാണ് കേരളം തകർത്തുവിട്ടത്.

ടോസ് നഷ്ടപ്പെട്ട് ബാറ്റിങ്ങിന് ഇറങ്ങിയ ബിഹാർ 40.2 ഓവറിൽ 148 റൺസിന് എല്ലാവരും പുറത്തായി. 149 റൺസിന്റെ താരതമ്യേന ചെറിയ വിജയലക്ഷ്യം 41.2 ഓവറുകൾ ബാക്കിനിർത്തി ഒരേയൊരു വിക്കറ്റ് നഷ്ടത്തിൽ കേരളം മറികടന്നു. ഇതോടെ, എലീറ്റ് ഗ്രൂപ്പ് സിയിൽ കേരളം 16 പോയിന്റുമായി ഒന്നാം സ്ഥാനത്തേക്ക് കയറി. 32 പന്തിൽ നാലു ഫോറും 10 സിക്‌സും സഹിതം 87 റൺസുമായി പുറത്താകാതെ നിന്ന റോബിൻ ഉത്തപ്പയുടെ ട്വന്റി20യേയും വെല്ലുന്ന പ്രകടനമാണ് കേരളത്തിന് അനായാസ ജയം സമ്മാനിച്ചത്. വിഷ്ണു വിനോദ് 12 പന്തിൽ രണ്ടു ഫോറും നാലു സിക്‌സും സഹിതം 37 റൺസെടുത്തു. സഞ്ജു സാംസൺ ഒൻപത് പന്തിൽ രണ്ടുവീതം സിക്‌സും ഫോറും സഹിതം 24 റൺസുമായി പുറത്താകാതെ നിന്നു.

149 റൺസ് വിജയലക്ഷ്യവുമായി മറുപടി ബാറ്റിങ്ങിന് ഇറങ്ങിയ കേരളത്തിന് ഓപ്പണർമാരായ റോബിൻ ഉത്തപ്പ, വിഷ്ണു വിനോദ് എന്നിവർ അതിവേഗ തുടക്കമാണ് സമ്മാനിച്ചത്. ട്വന്റി20 മത്സരത്തെയും അതിശയിക്കുന്ന പ്രകടനവുമായി തകർത്തടിച്ച ഇരുവരും വെറും 29 പന്തിൽനിന്ന് അടിച്ചുകൂട്ടിയത് 76 റൺസ്. 10 ഓവറിനുള്ളിൽ കേരളം വിജയലക്ഷ്യം മറികടക്കും എന്ന നിലയിൽ മുന്നേറുമ്പോൾ, വിഷ്ണു വിനോദിനെ വീഴ്‌ത്തി ക്യാപ്റ്റൻ അശുതോഷ് അമനാണ് കൂട്ടുകെട്ട് പൊളിച്ചത്. 12 പന്തിൽ രണ്ടു ഫോറും നാലു സിക്‌സും സഹിതം 37 റൺസെടുത്താണ് വിഷ്ണു മടങ്ങിയത്.  സഞ്ജു സാംസണിന്റെ കൂട്ടിൽ തിരിച്ചെത്തിയ ഉത്തപ്പ, തുടർന്നും തകർത്തടിച്ചതോടെ കേരളം അനായാസം വിജയത്തിലെത്തി. ഇരുവരും ചേർന്ന് പിരിയാത്ത രണ്ടാം വിക്കറ്റിൽ വെറും 24 പന്തിൽനിന്ന് അടിച്ചെടുത്തത് 73 റൺസ്! സഞ്ജു എട്ട് പന്തിൽ രണ്ടു വീതം സിക്‌സും ഫോറും സഹിതം 23 റൺസുമായി പുറത്താകാതെ നിന്നു.

സീസണിലെ രണ്ടാമത്തെ അഞ്ച് വിക്കറ്റ് നേട്ടം ചെറിയ വ്യത്യാസത്തിൽ വഴുതിപ്പോയെങ്കിലും, നാലു വിക്കറ്റ് വീഴ്‌ത്തിയ ശ്രീശാന്തിന്റെ മികവിലാണ് കേരളം ബിഹാറിനെ 148 റൺസിൽ ഒതുക്കിയത്. 89 പന്തിൽ ആറു ഫോറും മൂന്നു സിക്‌സും സഹിതം 64 റൺസെടുത്ത ബാബുൽ കുമാറാണ് ബിഹാറിന്റെ ടോപ് സ്‌കോറർ. ഒരുവേള അഞ്ചിന് 74 റൺസ് എന്ന നിലയിൽ തകർന്ന ബിഹാറിനെ, ആറാം വിക്കറ്റിൽ ക്യാപ്റ്റൻ അശുതോഷ് അമനൊപ്പം (39 പന്തിൽ 18) ബാബുൽ കൂട്ടിച്ചേർത്ത 46 റൺസാണ് ഭേദപ്പെട്ട സ്‌കോറിലെത്തിച്ചത്. യശ്വസി ഋഷവ് (26 പന്തിൽ 19), വാലറ്റത്ത് സാബിർ ഖാൻ (14 പന്തിൽ പുറത്താകാതെ 17) എന്നിവരുടെ പ്രകടനങ്ങളും ബിഹാറിന് ആശ്വാസമായി.

നേരത്തെ, തന്റെ ആദ്യ ഓവറിൽത്തന്നെ ഒരു പന്തിന്റെ ഇടവേളയിൽ ഓപ്പണർമാരായ മംഗൽ മഹ്‌റൂർ (നാല് പന്തിൽ ഒന്ന്), എസ്. ഗാനി (0) എന്നിവരെ പുറത്താക്കിയ ശ്രീശാന്ത് കേരളത്തിന് തകർപ്പൻ തുടക്കത്തമാണ് സമ്മാനിച്ചത്. രണ്ടു പേരും ശ്രീശാന്തിന്റെ പന്തിൽ ക്ലിനി് ബൗൾഡായി. പിന്നീസ് ഷഷീം റാത്തോർ (10 പന്തിൽ മൂന്ന്), വികാസ് രഞ്ജൻ (20 പന്തിൽ 10) എന്നിവരെയും ശ്രീശാന്ത് തന്നെ പുറത്താക്കി.

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

More News in this category+

MNM Recommends +

Go to TOP