Forex Rate:

1 usd = 76.25 inr 1 gbp = 94.16 inr 1 eur = 85.23 inr 1 aed = 20.76 inr 1 sar = 20.32 inr 1 kwd = 247.66 inr
Oct / 202025Sunday

ഭൂപരിഷ്‌കരണ നിയമത്തിന്റെ ക്രഡിറ്റ് സിപിഐ കൊണ്ടുപോയാൽ വല്യേട്ടൻ എങ്ങനെ സഹിക്കും? മൂപ്പിളമ തർക്കം മുറുകിയപ്പോൾ സിപിഐക്ക് കടുത്ത ഭാഷയിൽ മറുപടിയുമായി പിണറായി; അച്യുതമേനോനെ പ്രസംഗത്തിൽ ഒഴിവാക്കിയത് വലിയ അപരാധമെന്ന മട്ടിൽ പ്രചരിപ്പിക്കുന്നു; ചിലരെ ആക്ഷേപിക്കാൻ നിന്നില്ല എന്നത് ശരിയാണ്; ഇത് ചരിത്രം അറിയാത്തതുകൊണ്ടോ പഠിക്കാത്തതുകൊണ്ടോ ആണെന്നും നിയമം ശരിക്കും നടപ്പാക്കിയത് ഇഎംഎസ് സർക്കാരെന്നും മുഖ്യമന്ത്രി

ഭൂപരിഷ്‌കരണ നിയമത്തിന്റെ ക്രഡിറ്റ് സിപിഐ കൊണ്ടുപോയാൽ വല്യേട്ടൻ എങ്ങനെ സഹിക്കും? മൂപ്പിളമ തർക്കം മുറുകിയപ്പോൾ സിപിഐക്ക് കടുത്ത ഭാഷയിൽ മറുപടിയുമായി പിണറായി; അച്യുതമേനോനെ പ്രസംഗത്തിൽ ഒഴിവാക്കിയത് വലിയ അപരാധമെന്ന മട്ടിൽ പ്രചരിപ്പിക്കുന്നു; ചിലരെ ആക്ഷേപിക്കാൻ നിന്നില്ല എന്നത് ശരിയാണ്; ഇത് ചരിത്രം അറിയാത്തതുകൊണ്ടോ പഠിക്കാത്തതുകൊണ്ടോ ആണെന്നും നിയമം ശരിക്കും നടപ്പാക്കിയത് ഇഎംഎസ് സർക്കാരെന്നും മുഖ്യമന്ത്രി

മറുനാടൻ മലയാളി ബ്യൂറോ

തിരുവനന്തപുരം: ഭൂപരിഷ്‌കരണ നിയമത്തെ ചൊല്ലിയുള്ള സിപിഎം-സിപിഐ മൂപ്പിളമ തർക്കം മുറുകുന്നു. ഏറ്റവും ഒടുവിൽ ഭൂപരിഷ്‌കരണത്തിന്റെ അമ്പതാം വാർഷികത്തിൽ നടത്തിയ പ്രസംഗത്തിൽ മുൻ മുഖ്യമന്ത്രി സി.അച്യുതമേനോനെ പരാമർശിക്കാത്തതിൽ വിമർശനമുന്നയിച്ച സിപിഐയ്ക്ക് മറുപടിയുമായി മുഖ്യമന്ത്രി എത്തി. കടുത്ത ഭാഷയിലാണ് പിണറായിയുടെ മറുപടി. തന്നെ ചിലർ വിമർശിക്കുന്നത് ചരിത്രമറിഞ്ഞിട്ടോ അറിയാഞ്ഞിട്ടോ എന്നറിയില്ലെന്ന് പിണറായി പറഞ്ഞു. തന്റെ പ്രസംഗത്തിൽ ചിലരെ വിട്ടുകളഞ്ഞു എന്നത് ശരിയാണ്. താൻ എന്തോ അപരാധം ചെയ്‌തെന്ന മട്ടിലാണ് പ്രചാരണമെന്ന് കണ്ണൂരിൽ അഖിലേന്ത്യ കർഷകതൊഴിലാളി യൂണിയൻ സമാപന സമ്മേളനം ഉദ്ഘാടനം ചെയ്തു മുഖ്യമന്ത്രി പറഞ്ഞു. മുഖ്യമന്ത്രി ചരിത്രവസ്തുതയെ തമസ്‌കരിച്ചതാണെന്ന് സിപിഐ മുഖപത്രം ജനയുഗം മുഖപ്രസംഗത്തിൽ കുറ്റപ്പെടുത്തിയിരുന്നു.

'ഭൂപരിഷ്‌കരണം നടപ്പാക്കിയതിന്റെ 50ാം വാർഷികം ആഘോഷിച്ച പരിപാടിയിൽ ഞാൻ സംസാരിച്ചപ്പോൾ എന്തോ മഹാപരാധം സംഭവിച്ചു എന്ന മട്ടിലാണ് ചിലരുടെ പ്രതികരണം. ഇത് ചരിത്രം അറിയാത്തതുകൊണ്ടാണ്. അല്ലെങ്കിൽ പഠിക്കാത്തതുകൊണ്ട്. ചരിത്രം സാവകാശം ഇരുന്ന് പഠിച്ച് മനസ്സിലാക്കിയതാൽ ഇത്തരമൊരു ആരോപണമോ ആക്ഷേപമോ ഉന്നയിക്കാനാകില്ല'', മുഖ്യമന്ത്രി പറയുന്നു.

1967-ന് മുമ്പുള്ള സർക്കാരുകളുണ്ടായിരുന്നു. കർഷകബന്ധ ബില്ലിനെ തകർക്കാൻ അന്ന് പലരും കൂട്ടുനിന്നിട്ടുണ്ട്. അവരുടെയാരുടെയും പേര് എടുത്ത് പറയാൻ താൻ നിന്നിട്ടില്ല. ചിലരെ ആക്ഷേപിക്കുകയും ചെയ്തില്ല. ഇടത് സർക്കാർ ചെയ്തത് മാത്രമാണ് പറഞ്ഞത്.
1969-ലാണ് ഭൂപരിഷ്‌കരണനിയമം കേരള നിയമസഭ പാസ്സാക്കുന്നത്. അന്ന് കെ ആർ ഗൗരിയമ്മയാണ് ഇതിന് നേതൃത്വം നൽകിയത്. അന്ന് കെ ആർ ഗൗരിയമ്മയായിരുന്നു റവന്യൂമന്ത്രി. ഇഎംഎസ്സായിരുന്നു അന്ന് മുഖ്യമന്ത്രി. 1970-ൽ നിയമം പ്രാവർത്തികമാവുകയും ചെയ്തു. ഇവിടെയൊക്കെ ഞാൻ ആരെയൊക്കെ ഓർക്കണം?

ഒരു കുടുംബത്തിന് പരമാവധി കൈവശം വയ്ക്കാവുന്ന ഭൂമിയുടെ പരിധി 15 ഏക്കറായി ചുരുക്കിയ ചരിത്രപരമായ കർഷകബന്ധബില്ല് പാസ്സായപ്പോൾ അന്ന് സർക്കാർ താഴെ വീഴുന്ന സ്ഥിതിയുണ്ടായി. ഇനി ഭൂപരിഷ്‌കരണം നടപ്പാക്കിയത് സംബന്ധിച്ച് മറക്കരുതാത്ത മറ്റൊരു പേരുണ്ട്. അത് എകെജിയുടേതാണ്. എകെജിയുടെ സമരപ്രഖ്യാപനം കൊണ്ടുകൂടിയാണ് ഭൂപരിഷ്‌കരണം ഐക്യകേരളത്തിൽ നടപ്പായത്. അതും പരാമർശിച്ചു. അതില്ലെങ്കിൽ നീതികേടായേനെ. അതിൽ എന്താണ് തെറ്റ്? - എന്ന് മുഖ്യമന്ത്രി.

അതേസമയം, മുഖ്യമന്ത്രിയുടെ പ്രസംഗത്തിൽ അച്യുതമേനോന് ക്രഡിറ്റ് നൽകാത്തത് സിപിഐക്ക് ക്ഷമിക്കാൻ കഴിഞ്ഞിരുന്നില്ല. പാർട്ടി മുഖപത്രമായ ജനയുഗത്തിലൂടെ അത് പുറത്തുവരികയും ചെയ്തു.

ചരിത്ര വസ്തുതകളെ പിണറായി വിജയൻ ഒഴിവാക്കിയെന്നാണ് ജനയുഗം വിമർശിച്ചത്. ഇടതുപക്ഷത്തിന്റെ ചരിത്രത്തോടുള്ള സമീപനത്തെയാണ് ഇതിലൂടെ ചോദ്യം ചെയ്യുന്നത്. ഉദ്ഘാടന പ്രസംഗത്തിൽ അച്യുതമേനോന്റെ പേര് പരാമർശിക്കാൻ മുഖ്യമന്ത്രി പിണറായി വിജയൻ വിസ്മരിച്ചുവെന്ന് ആരും കരുതില്ലെന്നും മറിച്ച്, അത് ചരിത്ര വസ്തുതകളുടെ മനഃപൂർവമായ തമസ്‌കരണമാണെന്നും മുഖപ്രസംഗത്തിൽ പറഞ്ഞിരുന്നു.

രിത്രത്തോടു സത്യസന്ധത പുലർത്താതെ അതിനെ വളച്ചൊടിക്കുകയും ദുർവ്യാഖ്യാനം ചെയ്തും ദേശീയ രാഷ്ട്രീയത്തെ കലുഷിതമാക്കി മാറ്റുന്ന ഘട്ടത്തിൽ സമീപകാല കേരളത്തിന്റെ ചരിത്ര യാഥാർത്ഥ്യങ്ങൾ അംഗീകരിക്കാൻ വിസമ്മതിക്കുന്ന നിലപാട് ഇടതുപക്ഷ രാഷ്ട്രീയത്തിന് ഭൂഷണമല്ല. വസ്തുനിഷ്ടമായ തെളിവുകളുടെ അടിസ്ഥാനത്തിലാണ് ചരിത്രം രേഖപ്പെടുത്തപ്പെടുത്തുന്നത്. അല്ലാതെ കെട്ടുകഥകളല്ലെന്നും ലേഖനത്തിൽ വിമർശിക്കുന്നുണ്ട്.

മുഖപ്രസംഗത്തിന്റെ പൂർണ്ണ രൂപം

ചരിത്രത്തോടുള്ള ഇടതുപക്ഷ സമീപനം ചോദ്യം ചെയ്യപ്പെടുന്നു

കേരളത്തിൽ സമഗ്ര ഭൂപരിഷ്‌കരണ നിയമം നടപ്പിലാക്കിയതിന്റെ അമ്പതാം വാർഷികമായിരുന്നു ജനുവരി ഒന്നിന്. ഐക്യ കേരളത്തിന്റെ ചരിത്രത്തിൽ സമാന തോതിൽ അനുസ്മരിക്കപ്പെടേണ്ട മറ്റൊരു നിയമനിർമ്മാണം ഉണ്ടോ എന്നത് സംശയമാണ്. മനുഷ്യ വികാസ സൂചികയുടെ അടിസ്ഥാനത്തിൽ കേരളത്തെ ലോകത്തിലെ വികസിത സമൂഹങ്ങൾക്ക് ഒപ്പം എത്തിക്കുന്നതിൽ നിർണായക പങ്കാണ് 1970 ലെ ഭൂപരിഷ്‌കരണ ഭേദഗതി നിയമത്തിനുള്ളത്. ഐക്യകേരളം രൂപം കൊള്ളുമ്പോൾ ഏതാനും ആയിരങ്ങൾ മാത്രം ഭൂഉടമകളായി ഉണ്ടായിരുന്ന സ്ഥാനത്ത് 75 ലക്ഷത്തിലധികം കുടുംബങ്ങളെ ഭൂമിയുടെ അവകാശികളാക്കി മാറ്റിയെന്നതാണ് ആ നിയമത്തെ സമാനതകളില്ലാത്ത നിയമനിർമ്മാണമാക്കി മാറ്റിയത്. ഭക്ഷണം, വസ്ത്രം, പാർപ്പിടം എന്നിങ്ങനെയുള്ള മൂന്ന് അടിസ്ഥാന മനുഷ്യാവകാശങ്ങളിൽ ഒന്നിന് ജനസംഖ്യയിലെ മഹാഭൂരിപക്ഷത്തിനെയും പ്രാപ്തമാക്കിയ നിയമനിർമ്മാണമായിരുന്നു അത്. അത്ത­രം ഒരു നിയമനിർമ്മാണം സാധ്യമായത് 1969 ൽ അന്നത്തെ സവിശേഷ രാഷ്ട്രീയ സാഹചര്യത്തിൽ കേരളത്തിൽ അധികാരത്തിലേറിയ സി അച്യുതമേനോന്റെ നേതൃത്വത്തിലുള്ള ഐക്യ ജനാധിപത്യ മുന്നണി ഭരണത്തിലാണ്. ഭൂപരിഷ്‌കരണ നിയമം പൊടുന്നനെ സ്വയംഭൂവായ ഒരു നിയമനിർമ്മാണമല്ല.

കേരളത്തിന്റെ ഭൂപരിഷ്‌കരണ ശ്രമങ്ങൾക്ക് ടിപ്പുസുൽത്താന്റെ പടയോട്ടം മുതൽ ഇങ്ങോട്ട് രണ്ട് നൂറ്റാണ്ടിലേറെ ദൈർഘ്യമുണ്ട്. ഐക്യകേരള പിറവിയെ തുടർന്ന് അധികാരത്തിലേറിയ ആദ്യത്തെ കമ്മ്യൂണിസ്റ്റ് ഗവൺമെന്റ് അതിന് മൂർത്തമായ രൂപം നൽകി. ആ ഗവണ്മെന്റ് ഭരണഘടനാ വിരുദ്ധ നടപടികളിലൂടെ പുറത്താക്കപ്പെട്ടതോടെ നിയമനിർമ്മാണ ശ്രമങ്ങളിലും അതിന്റെ ഉദ്ദേശ്യലക്ഷ്യങ്ങൾ ഉറപ്പിക്കുന്നതിലും വലിയ തിരിച്ചടികൾ ഉണ്ടായി. 1967 ൽ സിപിഐയും സിപിഎംഉം ഉൾപ്പെട്ട സപ്തകക്ഷി മുന്നണിക്കും ആ നിയമനിർമ്മാണ നടപടികൾ പൂർത്തീകരിക്കാനായില്ല. സപ്തകക്ഷി മുന്നണി ഗവൺമെന്റ് നിലംപൊത്തിയതിനെ തുടർന്ന് അധികാരത്തിൽവന്ന അച്യുതമേനോൻ സർക്കാരാണ് തികഞ്ഞ നിശ്ചയദാർഢ്യത്തോടെയും പ്രതിബദ്ധതയോടെയും ഭൂപരിഷ്‌കരണ ഭേദഗതി നിയമം നടപ്പിൽ വരുത്തിയത്. കോടതി നടപടികളുടെ നൂലാമാലകളിൽ കുടുങ്ങി തടസപ്പെടാത്തവിധം നിയമത്തെ ഭരണഘടനയുടെ ഒമ്പതാം ഷെഡ്യൂളി­ൽ ഉൾപ്പെടുത്തിയതും അച്യുതമേനോൻ സർക്കാരിന്റെ മികവു തന്നെ. തുടർന്നിങ്ങോട്ട് ആ നിയമം കേരളത്തിന്റെ ഭൂഉടമാബന്ധങ്ങളിലും ഒരു ജനതയുടെ പുരോഗതിയിലും നൽകിയ മഹത്തായ സംഭാവനകൾ ചരിത്രമാണ്. കമ്മ്യൂണിസ്റ്റ് പാർട്ടിയുടെ നേതൃത്വത്തിൽ കേരളം കൈവരിച്ച ആ ചരിത്രനേട്ടത്തെ അവമതിക്കാനും അതിനെ ഫലത്തിൽ അട്ടിമറിക്കാനും പല ശ്രമങ്ങളും നടന്നിട്ടുണ്ട്. അവ സ്വാഭാവിക അന്ത്യത്തെ നേ­രിട്ടുവെങ്കിലും അത്തരം നടപടികൾ ഇപ്പോഴും ഭൂപരിഷ്‌കരണ നിയമത്തിന്റെ ആനു­­കൂല്യം ലഭിക്കുന്നതിന് ഒരു ചെറിയ വിഭാഗത്തിനെങ്കിലും വിഘാതമായി തുടരുന്ന യാഥാർത്ഥ്യവും അവഗണിച്ചുകൂട. ഭൂപരിഷ്‌കരണ നിയമം നടപ്പാക്കി അരനൂറ്റാണ്ട് പിന്നിട്ടു, രാജ്യത്തിന്റെ രാഷ്ട്രീയ വ്യവഹാരത്തിൽ വൻ മാറ്റങ്ങൾ സംഭവിച്ചിരിക്കുന്നു.

എന്നിട്ടും യാഥാർത്ഥ്യങ്ങളെ യാഥാർത്ഥ്യങ്ങളായി അംഗീകരിക്കാനും ചരിത്രവസ്തുതകളെ മാനിക്കാനും ഇനിയും ചിലരെങ്കിലും വിസ്മരിക്കുന്നു. ചരിത്രത്തോടു സത്യസന്ധത തെല്ലും പുലർത്താതെ, ചരിത്രത്തെ വളച്ചൊടിക്കുകയും ദുർവ്യാഖ്യാനം ചെയ്തും ദേശീയ രാഷ്ട്രീയത്തെ കലുഷിതമാക്കി മാറ്റുന്ന ഘട്ടത്തിൽ സമീപകാല കേരളത്തിന്റെ ചരിത്ര യാഥാർത്ഥ്യങ്ങൾ അംഗീകരിക്കാൻ വിസമ്മതിക്കുന്ന നിലപാട് ഇടതുപക്ഷ രാഷ്ട്രീയത്തിന് ഭൂഷണമല്ല. ചരിത്രം ഐതിഹ്യങ്ങളൊ കെട്ടുകഥകളൊ അല്ല. അവ വസ്തുനിഷ്ടമായ തെളിവുകളുടെ അടിസ്ഥാനത്തിലാണ് രേഖപ്പെടുത്തപ്പെടുക.

പരിശീലനം സിദ്ധിച്ച ചരിത്രകാരന്മാരെ ആട്ടിയകറ്റി തങ്ങളുടെ ഭാവനകൾക്കും നിക്ഷിപ്ത താൽപര്യങ്ങൾക്കും അനുസൃതമായി ചരിത്രത്തെ ദുർവ്യാഖ്യാനം ചെയ്യാനും വളച്ചൊടിക്കാനും ആസൂത്രിത ശ്രമമാണ് മോദി ഭരണത്തിൽ ദേശീയതലത്തിൽ നടക്കുന്നത്. ആ ചരിത്ര നിരാസത്തിനെതിരെയാണ് രാജ്യം സടകുടഞ്ഞെണീക്കുന്നത്. അതിന്റെ മുൻനിരയിലാണ് കമ്മ്യൂണിസ്റ്റ് ഇടതുപക്ഷ പ്രസ്ഥാനങ്ങൾ. അത്തരമൊരു ദേശവ്യാപക ചെറുത്തുനിൽപിന്റെ വിശ്വാസ്യതയെയാണ് കേരളത്തിലെ ഭൂപരിഷ്‌കരണം സംബന്ധിച്ച അർധസത്യങ്ങൾ കൊണ്ട് ഇടതുപക്ഷം സ്വയം ചോദ്യം ചെയ്യുന്നത്. ഭൂപരിഷ്‌കരണ ഭേദഗതി നിയമത്തിന്റെ സുവർണജൂബിലി ആഘോഷങ്ങളുടെ ഉദ്ഘാടന പ്രസംഗത്തിൽ സി അച്യുതമേനോന്റെ പേര് പരാമർശിക്കാൻ മുഖ്യമന്ത്രി പിണറായി വിജയൻ വിസ്മരിച്ചുവെന്ന് ആരും കരുതില്ല. മറിച്ച്, അത് ചരിത്രവസ്തുതകളുടെ മനഃപൂർവമായ തമസ്‌കരണമാണ്. അത് ഇടതുപക്ഷത്തിന്റെ ചരിത്രത്തോടുള്ള സമീപനത്തെയാണ് ചോദ്യം ചെയ്യുന്നത്.

Stories you may Like

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

More News in this category+

MNM Recommends +

Go to TOP