Forex Rate:

1 usd = 76.25 inr 1 gbp = 94.16 inr 1 eur = 85.23 inr 1 aed = 20.76 inr 1 sar = 20.32 inr 1 kwd = 247.66 inr
Oct / 202024Saturday

പ്രളയ ദുരിതാശ്വാസത്തിൽ സർക്കാരിനെ പിന്തുണച്ച വഹാബ് എംപിയെ തള്ളി മുസ്ലിംലീഗിന്റെ ലോങ് മാർച്ച്; പ്രളയദുരിതാശ്വാസ പ്രവർത്തനത്തിൽ സർക്കാർ പരാജയമാണെന്ന ലീഗ് നിലപാട് തള്ളിയ വഹാബ് കെ.പി.എ മജീദിനെയും പൊതുവേദിയിൽ വെച്ചു കൊട്ടി; വഹാബിന് എൽ.ഡി.എഫ് ചായ്വെന്ന് ആരോപിച്ചു ലീഗ് പ്രവർത്തകർ

പ്രളയ ദുരിതാശ്വാസത്തിൽ സർക്കാരിനെ പിന്തുണച്ച വഹാബ് എംപിയെ തള്ളി മുസ്ലിംലീഗിന്റെ ലോങ് മാർച്ച്; പ്രളയദുരിതാശ്വാസ പ്രവർത്തനത്തിൽ സർക്കാർ പരാജയമാണെന്ന ലീഗ് നിലപാട് തള്ളിയ വഹാബ് കെ.പി.എ മജീദിനെയും പൊതുവേദിയിൽ വെച്ചു കൊട്ടി; വഹാബിന് എൽ.ഡി.എഫ് ചായ്വെന്ന് ആരോപിച്ചു ലീഗ് പ്രവർത്തകർ

ജംഷാദ് മലപ്പുറം

മലപ്പുറം: പ്രളയ ദുരിതാശ്വാസ പ്രവർത്തനങ്ങളിൽ സർക്കാരിനെ പിന്തുണച്ച പി.വി അബ്ദുൽവഹാബിനെ തള്ളി മുസ്ലിം ലീഗിന്റെ ലോങ് മാർച്ച്. പ്രളയത്തിൽ 59 പേരുടെ ജീവൻ കവർന്ന കവളപ്പാറയിൽ നിന്നും ആരംഭിക്കുന്ന ലോങ് മാർച്ച് 28ന് മലപ്പുറം കളക്ടറേറ്റിലാണ് സമാപിക്കുന്നത്. മുസ്ലിം ലീഗ് ജില്ലാ കമ്മിറ്റിയുടെ നേതൃത്വത്തിലുള്ള പ്രക്ഷോഭം പി.വി അബ്ദുൽവഹാബിനുള്ള ലീഗിന്റെ രാഷ്ട്രീയ മറുപടിയായാണ് വിലയിരുത്തപ്പെടുന്നത്. പ്രളയദുരിതാശ്വാസ പ്രവർത്തനത്തിൽ സർക്കാർ പരാജയമാണെന്ന മുസ്ലിം ലീഗ് നിലപാട് തള്ളി ഇടതുസർക്കാരിനെ പ്രശംസിക്കുകയും മുസ്ലിം ലീഗ് സംസ്ഥാന ജനറൽ സെക്രട്ടറി കെ.പി.എ മജീദിനെ പൊതുവേദിയിൽ അപമാനിക്കുകയും ചെയ്തെന്ന ആരോപണത്തിൽ ലീഗ് നേതൃത്വം നേരത്തെ വഹാബിനോട് വിശദീകരണം തേടിയിരുന്നു.

കവളപ്പാറയിൽ ഉരുൾപൊട്ടലിൽ മരണപ്പെട്ടവരുടെ ആശ്രിതർക്ക് സർക്കാർ ധനസഹായം വിതരണം ചെയ്യുന്ന കഴിഞ്ഞ സെപ്റ്റംബർ 10ന് കവളപ്പാറയിൽ നടന്ന ചടങ്ങിലാണ് ലീഗ് നേതൃത്വത്തെ തള്ളിക്കൊണ്ട് പി.വി അബ്ദുൽവഹാബ് ഇടത് അനുകൂല നിലപാടെടുത്തത്. പ്രതിപക്ഷമെന്ന നിലയക്ക് എന്തെങ്കിലും പറയേണ്ടേ എന്നു കരുതിയാണ് സഹായധനം 10 ലക്ഷമായി വർധിപ്പിക്കാൻ കെ.പി.എ മജീദ് ആവശ്യപ്പെട്ടതെന്ന് പരിഹസിക്കുകയും ചെയ്തു. വേദിയിലുള്ള മലപ്പുറം കളക്ടർ ജാഫർ മാലിക്കിനെ നോക്കിയാണ് ജാഫറിനോട് പറയുകയാണ് മജീദ് സാഹിബ് പറയുകയാണ് നാല് ലക്ഷം പോര 10 ലക്ഷം വേണം എന്നു പറഞ്ഞ് പരിഹസിച്ചത്. വേദിയിലുണ്ടായിരു മന്ത്രി കെ.ടി ജലീൽ, പി.വി അൻവർ എംഎ‍ൽഎ അടക്കമുള്ളവരെ സാക്ഷി നിർത്തിയായിരുന്നു ഈ ആക്ഷേപം. ലോട്ടറിടിക്കറ്റ് അടിച്ചാൽ പണം എപ്പോഴെങ്കിലുമാണ് കിട്ടുക. എന്നാൽ ഇപ്പോൾ പ്രളയദുരിതാശ്വാസത്തിനുള്ള പണം സർക്കാർ അക്കൗണ്ടിലിട്ടുകഴിഞ്ഞെന്നും അതിന്റെ പ്രൊസീഡിങ്സ് നടക്കുകയുമാണൊണ് വഹാബ് പ്രസംഗിച്ചത്. പ്രസംഗം വളച്ചൊടിച്ചതെന്നു പറഞ്ഞ് ആദ്യം ഇതു നിഷേധിച്ച വഹാബ് പ്രസംഗം സോഷ്യൽ മീഡിയയിൽ വൈറലായതോടെ നിലപാട് തിരുത്തി ഖേദപ്രകടനവുമായി രംഗത്തെത്തി. എന്നാൽ പ്രശ്നം അടഞ്ഞ അധ്യായമായി അവസാനിപ്പിക്കാതെ വഹാബിന്റെ നിലപാടിനെതിരെ സർക്കാരിനെതിരെ ശക്തമായ സമരത്തിനാണ് മലപ്പുറം ജില്ലാ മുസ്ലിം ലീഗ് കമ്മിറ്റി രംഗത്തെത്തിയത്.

സാധാരണയായി സമര രംഗത്ത് സജീവമാകാത്ത മുസ്ലിം ലീഗ് ലോങ് മാർച്ചുമായി രംഗത്തുവന്നത് വഹാബിനുള്ള ശക്തമായ മറുപടിയായാണ് വിലയിരുത്തപ്പെടുന്നത്. ദുരിതാശ്വാസമായ സർക്കാർ തുക സർക്കാർ അക്കൗണ്ടിലിട്ടെന്ന് വഹാബ് പ്രസംഗിച്ച് രണ്ടു മാസം കഴിഞ്ഞിട്ടും പണം കിട്ടിയില്ലെന്നാണ് ലീഗ് നേതൃത്വം പറയുന്നത്. പ്രളയം കഴിഞ്ഞ് 110 ദിവസമായിട്ടും 44561 കുടുംബങ്ങൾക്ക് 10,000 രൂപുടെ സാമ്പത്തിക സഹായംപോലും ലഭിച്ചില്ല. വീട് തകർന്നവർക്ക് പ്രഖ്യാപിച്ച നാലു ലക്ഷം സ്ഥലം നഷ്ടമായവർക്കുള്ള ആറു ലക്ഷം ഭൂമിയും വീടും പോയവർക്കുള്ള 10 ലക്ഷം എന്നിവ ഒരാൾക്കുപോലും ലഭിച്ചില്ല എന്ന ഗുരുതരമായ ആക്ഷേപമാണ് ലീഗ് ഉയർത്തുന്നത്.

പ്രളയ ദുരിതാശ്വാസ പ്രവർത്തനത്തിന് പി.വി അൻവർ എംഎ‍ൽഎ ചെയർമാനായി രൂപീകരിച്ച റീബിൽഡ് നിലമ്പൂർ കമ്മിറ്റിയുടെ രക്ഷാധികാരിയാണ് വഹാബ്. റീബിൽഡ് നിലമ്പൂർ കമ്മിറ്റി വ്യാപകമായി പണപ്പിരിവ് നടത്തിയെങ്കിലും സഹായവിതരണം ചെയ്തിരുന്നില്ല. റീബിൽഡ് നിലമ്പൂർ പി.വി അൻവർ എംഎ‍ൽഎയുടെ റിയൽ എസ്റ്റേറ്റ് കട്ടവടമാണെന്ന ഗുരുതരമായ ആരോപണം കോൺഗ്രസും ഉയർത്തിയിട്ടുണ്ട്. കോട്ടമല എസ്റ്റേറ്റിൽ പുനരധിവാസം നടപ്പാക്കുന്നതിലൂടെ എസ്റ്റേറ്റ് ഭൂമി മുറിച്ച് വിൽപ്പന നടത്തി പണം തട്ടുകയാണ് എംഎ‍ൽഎയുടെ ലക്ഷ്യമെന്ന് കെ.എസ്.യു മുൻ സംസ്ഥാന പ്രസിഡന്റ് വി എസ് ജോയിയും ആര്യാടൻ ഷൗക്കത്തും ആരോപിച്ചു.

പ്രളയം കഴിഞ്ഞ് 110 ദിവസം കഴിഞ്ഞിട്ടും അടിയന്തിര സഹായധനം നൽകാത്തതിലും പുനരധിവാസ പ്രവർത്തനം വൈകുന്നതിലും പ്രതിഷേധിച്ച് ദുരിതബാധിതരുമായി കോൺഗ്രസ് പോത്തുകൽ പഞ്ചായത്ത് ഓഫീസ് മാർച്ചും നടത്തി. സുമനസുകൾ നൽകുന്ന സഹായം വിതരണം ചെയ്യലല്ല എംഎ‍ൽഎയുടെ കടമയെന്നും സർക്കാരിൽ നിന്നും എന്തു സഹായമാണ് എംഎ‍ൽഎ ഇടപെട്ട് ചെയ്തുകൊടുത്തതെന്നും വ്യക്തമാക്കണമെന്നാണ് മാർച്ച് ഉദ്ഘാടനം ചെയ്ത രമ്യഹരിദാസ് എംപി ആവശ്യപ്പെട്ടത്.
പ്രളയദുരിതാശ്വാസത്തിലെ വീഴ്ചയിൽ സർക്കാരിനും എംഎ‍ൽഎക്കുമെതിരെ കോൺഗ്രസും ലീഗും പ്രക്ഷോഭം തുടങ്ങിയിട്ടും പി.വി അൻവർ എംഎ‍ൽഎ റീബിൽഡ് നിലമ്പൂരിന്റെ രക്ഷാധികാരിയായി തുടരുന്നതിൽ യു.ഡി.എഫ് നേതൃത്വത്തിന് കടുത്ത അതൃപ്തിയുണ്ട്.

റീബിൽഡ് നിലമ്പൂരിന്റെ പേരിൽ പിരിക്കുന്ന പണത്തിന്റെ കണക്ക് വെബ്സൈറ്റുണ്ടാക്കി പുറത്തുവിടുമെന്ന് പ്രഖ്യാപനമുണ്ടായിരുന്നെങ്കിലും ഇതുവരെ ആ നീക്കമുണ്ടായിട്ടില്ല. എത്ര രൂപ പിരിഞ്ഞുകിട്ടിയെന്നും എന്തു സഹായങ്ങൾ നൽകിയെന്നുമുള്ള ഒരു വിവരവും പുറത്തുവിട്ടിട്ടില്ല. വീടു നഷ്ടപ്പെട്ട കുടുംബങ്ങൾക്ക് വാടാക വീട്ടിലേക്ക് മാറാനായി വാടക നൽകിയത് പോലും നിലമ്പൂർ അർബൻ ബാങ്കും സുമനസുകളും സന്നദ്ധ സംഘടനകളുമാണ്.

മുസ്ലിം ലീഗിന്റെ ലോങ് മാർച്ച് നേരത്തെ പ്രഖ്യാപിച്ചത് നവംബർ 17നായിരുന്നെങ്കിലും പി.വി അബ്ദുൽവഹാബിന്റെ നേതൃത്വത്തിലുള്ള നിലമ്പൂർ യതീംഖാനയുടെ കോളേജിലും കവളപ്പാറയിലും വ്യവസായി എം.എ യൂസഫലിയുടെ സന്ദർശനത്തെ തുടർന്നാണ് മാർച്ച് 24ലേക്ക് നീട്ടിയത്. യൂസഫലിയുടെ ചടങ്ങിൽ വഹാബ് അൻവറിനെയും ആര്യാടനെയും പങ്കെടുപ്പിച്ചെങ്കിലും മുസ്ലിം ലീഗ് പ്രസിഡന്റ് ഹൈദരലി തങ്ങളെയോ ലീഗ് നേതാക്കളെയോ പങ്കെടുപ്പിച്ചില്ലെന്ന പരാതിയും ലീഗ് നേതൃത്വത്തിനുണ്ട്. യൂസഫലിയുടെ സന്ദർശനത്തിനുണ്ടായ പ്രചരണത്തിന്റെ നാലിലൊന്നുപോലും ലീഗ് ലോങ് മാർച്ചിന് നടത്തുന്നില്ലെന്ന ആക്ഷേപവും ഉയരുന്നുണ്ട്. ലീഗ് ദേശീയ ട്രഷറർകൂടിയായ വാബിന്റെ രാജ്യസഭയിലെ പ്രകടനത്തിലും പാർട്ടിയിൽ ശക്തമായ വിമർശനം ഉയർന്നിരുന്നു. മുത്തലാഖ് ബിൽ ചർച്ചാവേളയിൽ വഹാബ് രാജ്യസഭയിലെത്താത്തതായിരുന്നു ലീഗ് നേതൃത്വത്തെ ചൊടിപ്പിച്ചത്.

ഉത്തരവാദിത്വം നിർവഹിക്കാൻ കഴിയില്ലെങ്കിൽ രാജിവെച്ച് പോകണമെന്ന് പി.വി അബ്ദുൽവഹാബിനോട് മുസ്ലിം യൂത്ത് ലീഗ് ദേശീയ വൈസ് പ്രസിഡന്റ് പാണക്കാട് മൊയീൻ അലി ശിഹാബ് തങ്ങൾ ആവശ്യപ്പെട്ടിരുന്നു. മുസ്ലിം ലീഗ് സംസ്ഥാന അധ്യക്ഷൻ ഹൈദരലി ശിഹാബ് തങ്ങളുടെ മകനായ മൊയീൻ അലി ശിഹാബ് തങ്ങളുടെ വിമർശനം യൂത്ത് ലീഗും ഏറ്റെടുത്തിരുന്നു. ഇതോടെ ലീഗ് അധ്യക്ഷൻ ഹൈദരലി ശിഹാബ് തങ്ങൾ വഹാബിനോട് വിശദീകരണം തേടുകയും ചെയ്തു. ആരോഗ്യപ്രശ്നങ്ങളുള്ളതിനാലാണ് മുത്തലാഖ് ചർച്ചാസമയത്ത് ഹാജരാകാൻ കഴിയാതിരുന്നതെന്ന വഹാബിന്റെ വിശദീകരണത്തോടെ ലീഗ് വിവാദം അവസാനിപ്പിച്ചെങ്കിലും സമസ്ത അടക്കമുള്ള സമുദായ സംഘടനകൾക്ക് ഈ വിശദീകരണം തൃപ്തികരമായിരുന്നില്ല.

ആരോഗ്യ പ്രശ്നങ്ങൾ പറഞ്ഞ വഹാബ് ചർച്ചയുടെ സമയം കഴിഞ്ഞ് നിയമമന്ത്രി പ്രസംഗം അവസാനിപ്പിച്ച് വോട്ടിനിടുന്ന ഘട്ടത്തിൽ രാജ്യസഭയിലെത്തിയിരുന്നു. 2015ൽ വഹാബിന് രണ്ടാമതും രാജ്യസഭയിലേക്കയക്കാനുള്ള തീരുമാനത്തിനെതിരെ ലീഗിൽ കലാപക്കൊടി ഉയർന്നിരുന്നു. വഹാബിനെതിരെ കെ.പി.എ മജീദിനെയാണ് അന്ന് കുഞ്ഞാലിക്കുട്ടി അടക്കമുള്ളവർ ഉയർത്തികാട്ടിയത്. സേവനപാരമ്പര്യവും അച്ചടക്കവുമുള്ള പാർട്ടി പ്രവർത്തകർക്കു നൽകേണ്ട പദവി മുതലാളിക്ക് നൽകരുതെന്ന് പാണക്കാട് മുനവറലി ശിഹാബ് തങ്ങളുടെ ഫേസ്‌ബുക്ക് പോസ്റ്റും വിവാദമായിരുന്നു.

എന്നാൽ കോഴിക്കോട്ട് വച്ച് പിണറായി വിജയനുമായി രഹസ്യചർച്ച നടത്തി വഹാബ് ലീഗിനെ പ്രതിരോധത്തിലാക്കുകയായിരുന്നു. രാജ്യസഭാ സീറ്റു നൽകിയില്ലെങ്കിൽ ഇടതുപക്ഷത്തിനൊപ്പം പോകുമെന്ന ഭീഷണി ഉയർന്നതോടെ രണ്ടാം വട്ടവും രാജ്യസഭാ സീറ്റ് വഹാബിന് സ്വന്തമാവുകയായിരുന്നു. മുഖ്യമന്ത്രി പിണറായി വിജയനുമായി ഏറെ അടുപ്പമുള്ള നേതാവായ വഹാബ് സിപിഎം പാർട്ടി ചാനലായ കൈരളിയുടെ ഡയറക്ടറായിരുന്നു ലീഗ് നേതൃത്വം ഇടപെട്ടതോടെയാണ് ഡയറക്ടർ സ്ഥാനം ഒഴിഞ്ഞത്. കൈരളിക്കായി ഗൾഫിൽ ഷെയറുകൾ സമാഹരിച്ചതും വഹാബും പിണറായിയും ചേർന്നായിരുന്നു. മന്ത്രി കെ.ടി ജലീലിനെതിരെ ബന്ധുനിയമനവിവാദത്തിൽ യൂത്ത് ലീഗ് പ്രക്ഷോഭം നടതതിയപ്പോഴും ജലീലിനെ ബഹിഷ്‌കരിക്കാൻ ലീഗ് തീരുമാനിച്ചപ്പോഴും വഹാബ് അതിൽ നിന്നും വിട്ടുനിന്നിരുന്നു. ബഹിഷ്‌ക്കരണം തള്ളി ജലീലിനൊപ്പം വഹാബ് വേദി പങ്കിടുകയും ചെയ്തു. ഇത് ലീഗ് നേതൃത്വത്തെ ചൊടിപ്പിച്ചിരുന്നു.

വഹാബിന്റെ തട്ടകമായി നിലമ്പൂരിൽ പി.വി അൻവർ എംഎ‍ൽഎയുമായും സമാനനിലപാടായിരുന്നു വഹാബിന്. അൻവറിനെ ബഹിഷ്‌ക്കരിക്കാനുള്ള തീരുമാനം അൻവറുമായി വേദിപങ്കിട്ട് വഹാബ് പൊളിച്ചിരുന്നു. പൊന്നാനിയിൽ ഇ.ടി മുഹമ്മദ് ബഷീറിനെതിരെ പി.വി അൻവർ മത്സരിച്ചപ്പോഴും പ്രചരണരംഗത്ത് വഹാബ് സജീവമായിരുന്നില്ല. മലപ്പുറത്ത് മുസ്ലിം ലീഗ് സ്വന്തം നിലക്ക് പ്രളയപുനരധിവാസ പ്രവർത്തനം നടത്തുമ്പോൾ നിലമ്പൂരിൽ പി.വി അൻവർ എംഎ‍ൽഎയുടെ റീബിൽഡ് നിലമ്പൂരിന്റെ രക്ഷാധികാരിയായി അൻവറുമായി ചേർന്നാണ് വഹാബിന്റെ പ്രവർത്തനം.

കവളപ്പാറ സന്ദർശിക്കാനെത്തിയ മുഖ്യമന്ത്രി വിളിച്ച യോഗത്തിൽ ലീഗ് എംഎ‍ൽഎമാരെ പ്രസംഗിക്കാൻ അനുവദിക്കാത്തത് വിവാദമായിരുന്നു. പ്രതിഷേധവുമായി ലീഗ് എംഎ‍ൽഎമാർ രംഗത്തെത്തിയെങ്കിലും വഹാബ് ഇവരെ പിന്തുണച്ചിരുന്നില്ല. 2021ൽ രാജ്യസഭാ കാലാവധി കഴിയുന്ന വഹാബിന്റെ അടുത്തനോട്ടം നിയമസഭയിലേക്കാണ്. ദേശീയ ട്രഷററായ വഹാബിന് മന്ത്രി സ്ഥാനവും ഉറപ്പാണ്. പി.കെ ബഷീർ എംഎ‍ൽഎയുടെ മണ്ഡലമായ ഏറനാട് മണ്ഡലമാണ് വഹാബിന് നോട്ടം. അതേസമയം പിണറായി വിജയൻ സർക്കാരിന് ഭരണതുടർച്ചക്കായി മുസ്ലിം ലീഗിനെ ഒപ്പംകൂട്ടാനുള്ള അടവുനയവും സിപിഎമ്മിൽ അണിയറയിൽ നടക്കുന്നുണ്ട്. ലീഗിനെ ഇടതുപക്ഷത്തെത്തിക്കാനുള്ള പാലമായാണ് ഇവർ വഹാബിനെ കാണുന്നത്.

 

Stories you may Like

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

More News in this category+

MNM Recommends +

Go to TOP