Forex Rate:

1 usd = 76.25 inr 1 gbp = 94.16 inr 1 eur = 85.23 inr 1 aed = 20.76 inr 1 sar = 20.32 inr 1 kwd = 247.66 inr
Oct / 202024Saturday

എങ്കിലുമെന്നെ കള്ളനെന്ന് വിളിച്ചില്ലേ! താൻ മുറിവേറ്റവനെന്ന് ഉദ്ധവ് താക്കറെ; മഹാരാഷ്ട്ര മുഖ്യമന്ത്രിപദം പങ്കിടാമെന്ന വാക്ക് അമിത് ഷാ നൽകിയിട്ട് തന്നെ കള്ളനെന്ന് വിളിച്ചത് എന്തിനെന്നും ശിവസേന നേതാവ്; സംസ്ഥാനത്ത് ഒരു ശിവസേന മുഖ്യമന്ത്രി വരുമെന്ന് പിതാവ് ബാൽതാക്കറെയ്ക്ക് നൽകിയ വാക്ക് പാലിക്കാൻ ഫട്‌നാവിസിന്റെയോ ഷായുടെയും സഹായം വേണ്ട; വാക്‌പോര് രൂക്ഷമാകുമ്പോൾ സർക്കാർ രൂപീകരണം വഴിമുട്ടുന്നു

എങ്കിലുമെന്നെ കള്ളനെന്ന് വിളിച്ചില്ലേ! താൻ മുറിവേറ്റവനെന്ന് ഉദ്ധവ് താക്കറെ; മഹാരാഷ്ട്ര മുഖ്യമന്ത്രിപദം പങ്കിടാമെന്ന വാക്ക് അമിത് ഷാ നൽകിയിട്ട് തന്നെ കള്ളനെന്ന് വിളിച്ചത് എന്തിനെന്നും ശിവസേന നേതാവ്; സംസ്ഥാനത്ത് ഒരു ശിവസേന മുഖ്യമന്ത്രി വരുമെന്ന് പിതാവ് ബാൽതാക്കറെയ്ക്ക് നൽകിയ വാക്ക് പാലിക്കാൻ ഫട്‌നാവിസിന്റെയോ ഷായുടെയും സഹായം വേണ്ട; വാക്‌പോര് രൂക്ഷമാകുമ്പോൾ സർക്കാർ രൂപീകരണം വഴിമുട്ടുന്നു

മറുനാടൻ ഡെസ്‌ക്‌

മുംബൈ: മഹാരാഷ്ട്രയിൽ രാഷ്ട്രീയ അനിശ്ചിതത്വം തുടരുന്നതിനിടെ, ബിജെപി-ശിവസേന വാക്‌പോര് രൂക്ഷമായി. മുഖ്യമന്ത്രി സ്ഥാനം രാജി വച്ചതിന് ശേഷം ദേവേന്ദ്ര ഫട്‌നാവിസ് നടത്തിയ പരാമർശങ്ങൾ ശിവസേന തലവൻ ഉദ്ധവ് താക്കറെയെ ചൊടിപ്പിച്ചു. തിരഞ്ഞെടുപ്പിന് മുമ്പ് അമിത്ഷായുമായി നടത്തിയ കൂടിക്കാഴ്ചയിൽ മുഖ്യമന്ത്രി സ്ഥാനം പങ്കിടുന്നതിനെ കുറിച്ച് ധാരണയുണ്ടാക്കിയിരുന്നുവെന്നാണ് ഉദ്ധവിന്റെ അവകാശവാദം. ഇത് ഫട്‌നാവിസ് തള്ളിക്കളഞ്ഞിരുന്നു. ശിവസേന തലവനെ പ്രകോപിപ്പിച്ചതും ഇതുതന്നെ. പരസ്പരം പ്രകോപിപ്പിക്കുന്ന തരത്തിലുള്ള പ്രസ്താവനകൾ തുടരുന്ന പശ്ചാത്തലത്തിൽ സഖ്യസർക്കാർ അധികാരത്തിൽ വരുന്ന കാര്യം സംശയത്തിലായി. ശനിയാഴ്ചയ്ക്ക് മുമ്പ് സർക്കാർ രൂപീകരിച്ചില്ലെങ്കിൽ, സംസ്ഥാനത്ത് രാഷ്ട്രപതി ഭരണം ഏർപ്പെടുത്തേണ്ടി വരും.

മഹാരാഷ്ട്രയിൽ ഒരു ശിവസേന മുഖ്യമന്ത്രി എന്ന് താൻ പിതാവ് ബാൽ താക്കറെയ്ക്ക് നൽകിയ വാഗ്ദാനം നിറവേറ്റുക തന്നെ ചെയ്യുമെന്ന് ഉദ്ധവ് താക്കറെ പരഞ്ഞു. അതിനായി ദേവേന്ദ്ര ഫട്‌നാവിസിന്റെയോ, അമിത്ഷായുടെയോ സഹായം ആവശ്യമില്ല. ബിജെപി തന്നെ ഒരുകള്ളനായി ചിത്രീകരിച്ചതിൽ തനിക്ക് മുറിവേറ്റുവെന്ന് ഉദ്ധവ് താക്കറെ പറഞ്ഞു. ഒക്ടോബർ 24 ന് തിരഞ്ഞെടുപ്പ് ഫലം വന്ന ശേഷം ബിജെപിയുമായി ചർച്ചയ്്ക്ക് തയ്യാറാവാതിരുന്നതും അവർ തന്നെ കള്ളനായി ചിത്രീകരിച്ചതുകൊണ്ടാണ്. ശിവസേനാ നേതാക്കൾ പ്രധാനമന്ത്രി നരേന്ദ്ര മോദിയെ ലാക്കാക്കിയാണ് ആക്രമണങ്ങൾ അഴിച്ചുവിട്ടതെന്ന ആരോപണങ്ങളും അദ്ദേഹം തള്ളി. മോദിയെ ആക്രമിക്കുകയല്ല, താൻ ചെയ്തത്. ഓരോ സമയത്തെയും നയങ്ങളുടെ അടിസ്ഥാനത്തിലാണ് മോദി സർക്കാരിനെ വിമർശിച്ചതെന്നും ഉദ്ധവ താക്കറെ പറഞ്ഞു.

288 അംഗ നിയമസഭയിൽ 145 ആണ് ഭൂരിപക്ഷത്തിന് വേണ്ട അംഗസംഖ്യ. ബിജെപി-ശിവസേന സഖ്യത്തിന് 161 സീറ്റ് ഉണ്ടെങ്കിലും സേന അകന്നതോടെ സർക്കാർ രൂപീകരണം വഴിമുട്ടുകയായിരുന്നു. ഗവർണർ ഭഗത് സിങ് കോഷ്യാരിയെ കണ്ടാണ് രാജിക്കത്ത് കൈമാറിയത്. ഇതോടെ, സർക്കാർ രൂപീകരണത്തിനായി ശിവസേന കരുനീക്കം ശക്തമാക്കി. എൻസിപിയുമായി ശിവസേന ചർച്ചകൾ സജീവമാക്കിയിരിക്കുകയാണ്. ശരദ് പവാറിനെ കാണാൻ ശിവസനേ നേതാവ് സഞ്ജയ് റാവത്ത് എത്തി. തങ്ങളുടെ എംഎൽഎമാർക്ക് സുരക്ഷ ആവശ്യപ്പെട്ട് ശിവസേന പൊലീസിന് കത്ത് നൽകുകയും ചെയ്തു.

കഴിഞ്ഞ അഞ്ച് വർഷം മുന്നിലെത്തിയ എല്ലാ വെല്ലുവിളികളും നേരിടുന്നതിൽ വിജയിച്ചുവെന്ന് ഫടനാവിസ് മാധ്യമ പ്രവർത്തകരോട് പറഞ്ഞു.
ജനങ്ങൾ ബിജെപിക്ക് അനുകൂലമായാണ് വിധിയെഴുതിയത്. സർക്കാർ രൂപീകരണത്തിന് എല്ലാ വഴികളും ഇപ്പോൾ തുറന്നിരിക്കുകയാണ്. ശിവസേനയോടും, ഉദ്ധവ് താക്കറെയോടും നന്ദി പറയുന്നു, ഫട്‌നാവിസ് പറഞ്ഞു. തന്നെ പിന്തുണച്ചതിന് ജനങ്ങളോടും അദ്ദേഹം നന്ദി പ്രകടിപ്പിച്ചു. തങ്ങൾ സഖ്യമായി മത്സരിച്ചിട്ടും ശിവസേന പ്രതിപക്ഷവുമായാണ് ചർച്ചകൾ നടത്തിയത്. ബിജെപിയുമായി ചർച്ച നടത്തുന്നത് ഒഴിവാക്കി അവർ എൻസിപിയുമായും കോൺഗ്രസുമായുമാണ് ചർച്ച നടത്തിയത്. പലതവണ ശ്രമിച്ചിട്ടും ഉദ്ധവ് താക്കറെ ചർച്ചയ്ക്ക് തയ്യാറായില്ല. മുഖ്യമന്ത്രി സ്ഥാനം പങ്കുവയ്ക്കാമെന്ന് ഉറപ്പ് നൽകിയിരുന്നില്ലെന്നും ഫട്‌നാവിസ് പറഞ്ഞു. രണ്ടര വർഷം മുഖ്യമന്ത്രിസ്ഥാനം പങ്കിടുന്നതിനെ കുറിച്ച് ചർച്ചകൾ ഉണ്ടായിരുന്നെങ്കിലും അത് വിജയിച്ചിരുന്നില്ല. എന്നാൽ, ഇക്കാര്യത്തിൽ ധാരണകളൊന്നും ഉണ്ടായില്ലെന്നും ഫട്‌നാവിസ് പറഞ്ഞു. അമിത് ഷാജിയും നിധിൻ ഗഡ്കരിയും ഇക്കാര്യം വ്യക്തമാക്കിയിരുന്നെന്നും അദ്ദേഹം പറഞ്ഞു. സഖ്യത്തിന് അനുകൂലമായി ജനവിധിയുണ്ടായിട്ടും, വോട്ടെടുപ്പ് ഫലം വന്നപ്പോൾ, സർക്കാർ രൂപീകരണത്തിന് എല്ലാ വഴികളും നോക്കുമെന്ന ഉദ്ധവ് താക്കറെയുടെ പ്രഖ്യാപനം തങ്ങളെ ഞെട്ടിച്ചു. കാവൽ മുഖ്യമന്ത്രിയായി തുടരാനാണ് ഗവർണർ ആവശ്യപ്പെട്ടത്. സർക്കാരുണ്ടാക്കാൻ ശ്രമിക്കുമെന്നും ഫട്‌നാവിസ് പറഞ്ഞു.

അതേസമയം, ബിജെപി ശിവസേനയുമായി ചേർന്ന് വൈകാതെ സർക്കാർ രൂപീകരിക്കണമെന്ന് എൻസിപി തലവൻ ശരദ് പവാർ പറഞ്ഞു. കഴിഞ്ഞ ദിവസം ഗവർണറെ കണ്ടെങ്കിലും സർക്കാർ രൂപീകരണത്തിന് ബിജെപി അവകാശവാദം ഉന്നയിച്ചില്ല. സർക്കാർ രൂപീകരിക്കാൻ ബദൽ മാർഗ്ഗം ഉണ്ടെന്നാണ് ശിവസേനയുടെ നിലപാട്. അതിനിടെ, ശിവസേന എംഎൽഎമാരെ റിസോർട്ടിലേക്ക് മാറ്റി.ബിജെപിയുമായി യാതൊരു വിട്ടുവീഴ്ചക്കും തയ്യാറാവേണ്ട എന്ന് തീരുമാനിച്ചതോടെയാണ് ശിവസേന എംഎൽഎമാരെ ബാന്ദ്രയിലെ രംഗ് ശാർദ റിസോർട്ടിലേക്ക് മാറ്റിയത്.

ഇതിന് പിന്നാലെ എൻ.ഡി.എ സ്ഖ്യ ശിവസേന കഴിഞ്ഞ ദിവസം എൻഡിഎ സഖ്യകക്ഷി ശിവസേന തങ്ങളുടെ എംഎൽഎമാരെ റിസോർട്ടിലേക്ക് മാറ്റിയിരുന്നു. എന്നാൽ ഹിന്ദി ഹൃദയഭൂമിയായ മഹാരാഷ്ട്രയിൽ ബിജെപി തങ്ങളുടെ ഭരണം നിലനിർത്താൻ എന്തും ചെയ്യുമെന്നാണ് കരുതപ്പെടുന്നത്. ശിവസേന അമ്പിനും വില്ലിനും അടുക്കാത്ത സാഹചര്യത്തിൽ അമിത്ഷാ രംഗത്തിറങ്ങി കളിക്കുമെന്ന പ്രതീക്ഷയും ബിജെപി മുന്നിൽ കാണുന്നു.

കുതിരക്കച്ചവടത്തിന് വേദിയായി മഹാരാഷ്ട്ര

ബിജെപി തങ്ങളുടെ എംഎഎൽഎമാരെ ചാക്കിലാക്കാൻ ശ്രമിക്കുകയാണ് എന്ന് ആരോപിച്ചിയായിരുന്നു ശിവസേന രംഗത്തെത്തിയത്. ഇനിയൊരു അറിയിപ്പുണ്ടാകുന്നതുവരെ ബാന്ദ്രയിലെ റിസോർട്ടിൽ നിന്നും പുറത്തുവരരുത് എന്നാണ് ശിവസേന എംഎൽഎമാർക്ക് പാർട്ടി മേധാവി ഉദ്ദവ് താക്കറെ നൽകിയിരിക്കുന്ന നിർദ്ദേശം. കാവൽ മുഖ്യമന്ത്രി പദം ദുരുപയോഗം ചെയ്യരുതെന്നും ദേവേന്ദ്ര ഫഡ്‌നാവിസ് രാജിവയ്ക്കണമെന്നും ശിവസേന ആവശ്യപ്പെടുകയും ചെയ്തത് ബിജെപിയെ ചൊടിപ്പിക്കുകയും ചെയ്തിരുന്നു.

ഇതിന് പിന്നാലെയാണ് ബിജെപി കർണാടക മോഡലിൽ തങ്ങളുടെ എംഎൽഎനമാരെ വലിക്കുമോ എന്ന ആശങ്കയിൽ കോൺഗ്രസും എംഎൽഎമാരെ സേഫ് സോണിലേക്ക് എത്തിച്ചത്. സർക്കാർ രൂപീകരണത്തിൽ അനിശ്ചിതത്വം തുടരുന്ന ഘട്ടത്തിൽ കോൺഗ്രസ് എൻ.സി.പി കക്ഷികളുമായി ധാരണ നടത്താൻ നീക്കവും സജീവമാണ്.പാർട്ടി നേതാവ് വിജയ് വദേത്തിവാറിന്റെ വീട്ടിലെത്തിയ എംഎൽഎമാരെ ജയ്പൂരിലേക്ക് കൊണ്ടുപോകാനാണ് കോൺഗ്രസ് കഴിഞ്ഞ ദിവസം കോൺഗ്സ തീരുമാനമെടുത്തത്്. ബിജെപി ചാക്കിട്ടുപിടിത്തം ഒഴിവാക്കാനാണ് എംഎൽഎമാരെ മാറ്റുന്നതെന്നാണ് കോൺഗ്രസ് പ്രതികരണവും.

അമ്പിനും വില്ലിനും അടുക്കാതെ ശിവസേന

കോൺഗ്രസ്്-44,എൻ.സി.പി 54, ശിവസേന-56, ബിജ.പെി 105 എന്നിങ്ങനെയാണ് മഹാരാഷ്ട്ര നിയമസഭയിലേക്കുള്ള കക്ഷി നില. മുഖ്യമന്ത്രി സ്ഥാനത്തെച്ചൊല്ലി ശിവസേന കടുംപിടത്തും വിടാത്ത സാഹചര്യത്തിലാണ് ബിജെപി എംഎൽഎമാരെ കൂടെക്കൂട്ടാൻ ശ്രമം നടത്തുന്നതായി വിവരങ്ങൾ പുറത്തുവന്നത്. ശിവസേനയുടെ 25എംഎൽഎമാരുമായി ബിജെപി ചർച്ച നടത്തി എന്നാണ് റിപ്പോർട്ട്.മുഖ്യമന്ത്രി സ്ഥാനത്തിന് തങ്ങൾക്കും അവകാശമുണ്ടെന്ന നിലപാടിൽ നിന്ന് പിന്നോട്ടില്ലെന്നാണ് ശിവനസേന വ്യക്തമാക്കുന്നത്. തങ്ങളുടെ നിലപാട് അംഗീകരിക്കുന്നെങ്കിൽ മാത്രം വിളിച്ചാൽ മതിയെന്നാണ് ബിജെപി നേതൃത്വത്തോട് കഴിഞ്ഞ ദിവസം ഉദ്ദവ് താക്കറെ പറഞ്ഞത്. എന്നാൽ ഫട്‌നാവിസിന്റെ നേതൃത്വത്തിൽ ബിജെപി-സേന സർക്കാർ അധികാരത്തിലേറുമെന്ന നിലപാടിൽ മാറ്റമില്ലെന്ന് ബിജെപിയും വ്യക്തമാക്കി.

കേന്ദ്രമന്ത്രി നിതൻ ഗഡ്കരിയെ മുഖ്യമന്ത്രിയാക്കിയാൽ ഒത്തുതീർപ്പിലെത്താമെന്ന ശിവസേനയുടെ നിലപാടും ബിജെപി അംഗീകരിച്ചില്ല. ഒത്തുതീർപ്പ് മുഖ്യമന്ത്രിയാകാനില്ലെന്നും ഫട്‌നാവിസ് തന്നെ മഹാരാഷ്ട്ര ഭരിക്കും എന്നുമായിരുന്നു ഗഡ്കരിയുടെ കഴിഞ്ഞ ദിവസത്തെ പ്രതികരണം.നിയമസഭ തെരഞ്ഞെടുപ്പിൽ ബിജെപി 105ഉം ശിവസേന 56സീറ്റുമാണ് നേടിയത്. ബിജെപിക്ക് പ്രതീക്ഷിച്ച ഭൂപക്ഷം ലഭിക്കാതെ വന്നതോടെ ശിവസേന മുഖ്യമന്ത്രി പദത്തിന് വേണ്ടി രംഗത്തെത്തുകയായിരുന്നു.

ആകെയുള്ള 288 സീറ്റുകളിൽ 145 സീറ്റുകളാണ് കേവല ഭൂരിപക്ഷത്തിന് വേണ്ടത്. കഴിഞ്ഞ തവണ ബിജെപി 122 സീറ്റുകൾ നേടിയിരുന്നു. 63 സീറ്റ് നേടിയ ശിവസേനയുടെ പിന്തുണയോടെയാണ് സർക്കാർ രൂപീകരിച്ചത്. എന്നാൽ ഇത്തവണ ഇരു കക്ഷികൾക്കും സീറ്റുകളുടെ എണ്ണത്തിൽ കാര്യമായ കുറവുണ്ടായതോടെ മുഖ്യമന്ത്രി പദത്തിനായി ശിവസേന രംഗത്തെത്തിയത്.

Stories you may Like

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

More News in this category+

MNM Recommends +

Go to TOP