Forex Rate:

1 usd = 76.25 inr 1 gbp = 94.16 inr 1 eur = 85.23 inr 1 aed = 20.76 inr 1 sar = 20.32 inr 1 kwd = 247.66 inr
May / 202420Monday

ഇ.ഡി എത്തിയപ്പോൾ 'കാണാതായ' ഹേമന്ത് സോറൻ റാഞ്ചിയിൽ; ജെഎംഎം എംഎൽഎമാരും മന്ത്രിമാരുമായി കൂടിക്കാഴ്ച; ഒപ്പം ഭാര്യ കൽപനയും; സോറൻ രാജിവച്ചാൽ ഭാര്യ മുഖ്യമന്ത്രിയായേക്കും; ഝാർഖണ്ഡിൽ നാടകീയ നീക്കങ്ങൾ

ഇ.ഡി എത്തിയപ്പോൾ 'കാണാതായ' ഹേമന്ത് സോറൻ റാഞ്ചിയിൽ; ജെഎംഎം എംഎൽഎമാരും മന്ത്രിമാരുമായി കൂടിക്കാഴ്ച; ഒപ്പം ഭാര്യ കൽപനയും; സോറൻ രാജിവച്ചാൽ ഭാര്യ മുഖ്യമന്ത്രിയായേക്കും; ഝാർഖണ്ഡിൽ നാടകീയ നീക്കങ്ങൾ

മറുനാടൻ മലയാളി ബ്യൂറോ

ന്യൂഡൽഹി: എൻഫോഴ്സ്മെന്റ് ഡയറക്ട്രേറ്റ് നടപടിക്ക് പിന്നാലെ 'കാണാതായ' ജാർഖണ്ഡ് മുഖ്യമന്ത്രി ഹേമന്ത് സോറൻ നിർണായക രാഷ്ട്രീയ നീക്കത്തിന് ഒരുങ്ങുന്നതായി റിപ്പോർട്ട്. ഭൂമി കുംഭകോണവുമായി ബന്ധപ്പെട്ടു ചോദ്യം ചെയ്യുന്നതിനായി ഇ.ഡി തിരയുന്നതിനിടെ ഹേമന്ത് സോറൻ തന്റെ പാർട്ടിയായ ജാർഖണ്ഡ് മുക്തി മോർച്ചയിലെ (ജെഎംഎം) എംഎൽഎമാരുമായും മന്ത്രിമാരുമായും കൂടിക്കാഴ്ചയും നടത്തി.

കഴിഞ്ഞ ദിവസം ഇ.ഡി ഉദ്യോഗസ്ഥർ ചോദ്യം ചെയ്യലിനായി സോറന്റെ ഡൽഹിയിലെ വസതിയിലെത്തിയെങ്കിലും കണ്ടെത്താൻ സാധിച്ചിരുന്നില്ല. 24 മണിക്കൂറായി യാതൊരു വിവരവുമില്ലെന്ന് ഇ.ഡി അറിയിച്ചതോടെ സോറനെ കാണാതായതായി ബിജെപി പരിഹസിച്ചിരുന്നു. എന്നാൽ മുഖ്യമന്ത്രി സ്ഥാനം ഒഴിയേണ്ടി വന്നാൽ നേതൃസ്ഥാനം ഭാര്യ കൽപനയെ ഏൽപ്പിച്ചേക്കുമെന്നാണ് സൂചന.

ചൊവ്വാഴ്ച റാഞ്ചിയിലെ വസതിയിൽനിന്നു ഗവർണർ സി.പി.രാധാകൃഷ്ണന്റെ ഔദ്യോഗിക വസതിയിലേക്കാണ് സോറനെത്തിയത്. ജെഎംഎം എംഎൽഎമാരുമായും മന്ത്രിമാരുമായും സോറൻ കൂടിക്കാഴ്ചയും നടത്തുമ്പോൾ സോറന്റെ ഭാര്യ കൽപനയും കൂടെയുണ്ടായിരുന്നു. സോറൻ രാജിവച്ചാൽ ഭാര്യയെ മുഖ്യമന്ത്രിയാക്കിയേക്കുമെന്നാണ് റിപ്പോർട്ടുകൾ. സോറനെ അധിക്ഷേപിച്ചു സംസാരിച്ച ബിജെപി നേതാക്കൾക്കെതിരെ മാനനഷ്ട കേസ് നൽകുമെന്നു ജെഎംഎം സെക്രട്ടറി സുപ്രിയോ ഭട്ടാചാര്യ പറഞ്ഞു.

കള്ളപ്പണം വെളുപ്പിക്കൽ കേസുമായി ബന്ധപ്പെട്ടു സോറനെ ചോദ്യം ചെയ്യാനുള്ള ഇ.ഡി നീക്കത്തെ തുടർന്നു നാടകീയ സംഭവങ്ങൾക്കാണു ഡൽഹിയും ജാർഖണ്ഡ് തലസ്ഥാനമായ റാഞ്ചിയും സാക്ഷ്യം വഹിച്ചത്. ഞായറാഴ്ച രാത്രിയോടെ സോറൻ ഡൽഹിയിലെ വസതി വിട്ടിരുന്നു. സോറനുമായി ബന്ധപ്പെട്ട അടുത്തയാളുകളുടെയെല്ലാം ഫോൺ സ്വിച്ച് ഓഫ് ചെയ്തു. റാഞ്ചിയിൽനിന്ന് ഡൽഹിയിലേക്ക് സോറൻ യാത്ര ചെയ്ത ചാർട്ടേഡ് വിമാനം ഡൽഹി വിമാനത്താവളത്തിലുള്ളതായി അധികൃതർ കണ്ടെത്തി. സോറന്റെ കാർ പിടിച്ചെടുത്ത ഇ.ഡി, ഡ്രൈവറെ ചോദ്യം ചെയ്തു. ചില രേഖകളും പണവും കണ്ടെത്തിയതായും സൂചനയുണ്ട്.

തിങ്കളാഴ്ച രാവിലെ 2.30 ഓടെ സുരക്ഷാ ഉദ്യോഗസ്ഥനുമായി ഇദ്ദേഹം തന്റെ വസതിയിൽ നിന്നും ഇറങ്ങിയതായാണ് റിപ്പോർട്ട്. സോറന്റെയും സുരക്ഷാ ഉദ്യോഗസ്ഥന്റെയും ഫോണുകൾ സ്വിച്ച് ഓഫ് ചെയ്ത നിലയിലാണ്. സോറൻ എവിടെയാണെന്ന കാര്യം അറിയില്ലെന്നാണ് കുടുംബാംഗങ്ങളും ക്യാബിനറ്റ് അംഗങ്ങളും ഇഡിയെ അറിയിച്ചിരുന്നത്. അതേസമയം സോറന്റെ ഡൽഹിയിലെ വസതിയിൽ നിന്നും ബിഎംഡബ്ള്യൂ കാർ ഇഡി പിടിച്ചെടുത്തിരുന്നു.

ജനുവരി 31ന് ഉച്ചയ്ക്ക് ഒരു മണിയോടെ ചോദ്യം ചെയ്യാൻ ഹാജരാകുമെന്നു കാണിച്ച് സോറന്റെ ഓഫിസിൽനിന്ന് ഇ.ഡിക്ക് ഔദ്യോഗിക കത്ത് ലഭിച്ചിരുന്നു. സോറന്റെ തിരോധാനം അവസരമായി കണ്ട് രംഗത്തെത്തിയ ബിജെപി, മുഖ്യമന്ത്രി ഒളിവിലാണെന്നും ഗവർണർ ഇക്കാര്യം ഗൗരവത്തിലെടുക്കണമെന്നും ആവശ്യപ്പെട്ടു. അന്വേഷണം ഭയന്ന് ഞായറാഴ്ച രാത്രിയോടെ സോറൻ ഡൽഹിയിലെ വസതിയിൽനിന്ന് രക്ഷപ്പെടുകയായിരുന്നുവെന്ന് ജാർഖണ്ഡ് ബിജെപി പ്രസിഡന്റ് ബാബുലാൽ പരിഹസിച്ചു.

മുഖ്യമന്ത്രി ഉടൻ റാഞ്ചിയിലക്ക് മടങ്ങിയെത്തുമെന്നും അദ്ദേഹത്തിനെതിരെയുള്ള ഇ.ഡി അന്വേഷണം രാഷ്ട്രീയപ്രേരിതമാണെന്നും ആരോപിച്ച് ജെഎംഎമ്മും സഖ്യകക്ഷിയായ കോൺഗ്രസും രംഗത്തെത്തി. സോറന്റെ തിരോധാനം സംബന്ധിച്ചുടലെടുക്കുന്ന ആശങ്കകൾ കൃത്യമായ ഗൂഢാലോചനയുടെ ഭാഗമായിട്ടാണെന്നും സംസ്ഥാനത്തു രാഷ്ട്രപതി ഭരണം ഏർപ്പെടുത്താൻ നീക്കമുണ്ടെന്നും കോൺഗ്രസ് നേതാവ് രാജേഷ് താക്കൂർ ആരോപിച്ചു.

ഭൂമിയുടെ ഉടമസ്ഥാവകാശം അനധികൃതമായി മാറ്റിയെന്ന ആരോപണവുമായി ബന്ധപ്പെട്ടാണു സോറനെതിരെ ഇ.ഡി അന്വേഷണം. കേസിൽ ഇതുവരെ 14 പേർ അറസ്റ്റിലായി. ജനുവരി 20ന് സോറന്റെ മൊഴി രേഖപ്പെടുത്തിയിരുന്നു. ബുധനാഴ്ച ചോദ്യം ചെയ്യലിനു ഹാജരാകുമെന്നു പറഞ്ഞ ശേഷവും സായുധ സേനയുടെ അകമ്പടിയോടെ മുഖ്യമന്ത്രിയുടെ ഡൽഹി വസതിയിലേക്ക് ഇ.ഡി എത്തിയത് ജെഎംഎമ്മിനെ ചൊടിപ്പിച്ചു. ഇ.ഡി ബിജെപിയുടെ കയ്യിലെ കളിപ്പാവയെപ്പോലെ പെരുമാറുകയാണെന്നും മുഖ്യമന്ത്രിയെ അപമാനിക്കുക വഴി സംസ്ഥാനത്തെ 3.5 കോടി ജനങ്ങളെയാണ് അപമാനിച്ചതെന്നും ജെഎംഎം കുറ്റപ്പെടുത്തി.

Stories you may Like

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

More News in this category+

MNM Recommends +

Go to TOP