Forex Rate:

1 usd = 76.25 inr 1 gbp = 94.16 inr 1 eur = 85.23 inr 1 aed = 20.76 inr 1 sar = 20.32 inr 1 kwd = 247.66 inr
Mar / 202429Friday

ശശികലയെ ഉപേക്ഷിച്ച് കൂടുതൽ നേതാക്കൾ പനീർശെൽവത്തിനു പിന്തുണ അറിയിച്ചു; ഇന്ന് ഒപിഎസ് ക്യാമ്പിലെത്തിയത് മധുരയിലെ എംപി ശരവണനും എംഎൽഎ ഗോപാലകൃഷ്ണനും; കൂടുതൽ കൊഴിഞ്ഞുപോക്ക് തടയാൻ റിസോർട്ടിൽ തങ്ങി ചിന്നമ്മ

ശശികലയെ ഉപേക്ഷിച്ച് കൂടുതൽ നേതാക്കൾ പനീർശെൽവത്തിനു പിന്തുണ അറിയിച്ചു; ഇന്ന് ഒപിഎസ് ക്യാമ്പിലെത്തിയത് മധുരയിലെ എംപി ശരവണനും എംഎൽഎ ഗോപാലകൃഷ്ണനും; കൂടുതൽ കൊഴിഞ്ഞുപോക്ക് തടയാൻ റിസോർട്ടിൽ തങ്ങി ചിന്നമ്മ

ചെന്നൈ: അനധികൃത സ്വത്തുസമ്പാദനക്കേസിൽ നാളെ സുപ്രീംകോടതി വിധി പ്രസ്താവിക്കാനിരിക്കേ കൂടുതൽ നേതാക്കൾ ശശികലയെ വിട്ട് പനീർശെൽവം ക്യാമ്പിലെത്തുന്നു. ഒരു എംപിയും എംഎൽഎയും കൂടെ കാവൽ മുഖ്യമന്ത്രി ഒ.പനീർസെൽവത്തിനു പിന്തുണയറിയിച്ചു. മധുര സൗത്ത് എംഎൽഎ ശരവണനും മധുര എംപി ഗോപാലകൃഷ്ണനുമാണ് പനീർസെൽവത്തിന്റെ വീട്ടിലെത്തിയത്. ഇതോടെ, പനീർസെൽവത്തെ പിന്തുണയ്ക്കുന്ന എംഎൽഎമാരുടെ എണ്ണം എട്ടായി.

അണ്ണാ ഡിഎംകെയുടെ 50 എംപിമാരിൽ 13 പേരിപ്പോൾ പനീർസെവൽവത്തിനൊപ്പമാണ്. പാർട്ടിയുടെ 37 ലോക്‌സഭാ എംപിമാരിൽ നാലിലൊന്നും മറുപക്ഷത്തായതു ശശികല ക്യാംപിൽ ആശങ്ക സൃഷ്ടിച്ചിട്ടുണ്ട്. ശശികല ഗവർണറെ കണ്ടപ്പോൾ ഒപ്പമുണ്ടായിരുന്ന മന്ത്രി  കെ.പാണ്ഡ്യരാജനും പാർട്ടി വക്താവ് സി.പൊന്നയ്യനും കഴിഞ്ഞ ദിവസം പനീർസെൽവത്തിനു പിന്തുണയറിച്ചിരുന്നു. വിശ്വസ്തരായ ഇവരുടെ കൊഴിഞ്ഞു പോകലിൽ ഭയന്ന ശശികല എംഎൽഎമാരെ താമസിപ്പിച്ചിരിക്കുന്ന കൂവത്തൂരിലെ റിസോർട്ടിൽ സന്ദർശനം നടത്തുകയും ചെയ്തു.

എസ്‌പി. ഷൺമുഖനാഥൻ (ശ്രീവൈകുണ്ഠം), കെ. മാണിക്കം (ഷോളവന്താൻ), വി സി. ആരുക്കുട്ടി (കവുണ്ടംപാളയം), വനിത എംഎൽഎ മനോരഞ്ജിതം (ഉത്തങ്കര), എ. മനോഹരൻ (വസുദേവനല്ലൂർ), കെ. പാണ്ഡ്യരാജൻ (വിരുദുനഗർ), ഡി. ജയകുമാർ (റോയപുരം), ശരവണൻ (മധുര സൗത്ത്) എന്നീ എംഎൽഎമാരാണ് പനീർശെൽവത്തിനു പിന്തുണ അറിയിച്ചിരിക്കുന്നത്.

ലോക്‌സഭാംഗങ്ങളായ പി.ആർ. സുന്ദരം (നാമക്കൽ), അശോക് കുമാർ (കൃഷ്ണഗിരി), സത്യഭാമ (തിരുപ്പൂർ), ജയസിങ് ത്യാഗരാജ് നട്ടർജി (തൂത്തുക്കുടി), സെങ്കുട്ടുവൻ (വേലൂർ), ആർ.പി. മരുതുരാജ (പെരുമ്പള്ളൂർ), ആർ.വനറോജ (തിരുവണ്ണാമലൈ), എസ്. രാജേന്ദ്രൻ (വില്ലുപുരം), ആർ. പാർഥിപൻ (തേനി), ഗോപാലകൃഷ്ണൻ (മധുര) എന്നിവരും രാജ്യസഭാംഗങ്ങളായ വി. മൈത്രേയൻ, ശശികല പുഷ്പ, ആർ.ലക്ഷ്മണൻ എന്നിവരും പനീർശെൽവത്തിനൊപ്പമാണ്.

തമിഴ്‌നാട് നിയമസഭയിൽ അണ്ണാ ഡിഎംകെയ്ക്ക് ആകെ 135 അംഗങ്ങളാണുള്ളത്. അതിൽ പനീർസെൽവമുൾപ്പെടെ 9 പേരാണു വിമത വിഭാഗത്തിലുള്ളത്. സ്പീക്കർ ഉൾപ്പെടെ 128 പേർ ശശികല പക്ഷത്തും. സ്പീക്കറെ ഉൾപ്പെടുത്താത്തതിനാൽ ശശികല പക്ഷം ഇപ്പോൾ 127 പേരുടെ പിന്തുണയാണ് അവകാശപ്പെടുന്നത്. എംഎൽഎമാരെ പാർപ്പിച്ചിരിക്കുന്ന കൂവത്തൂരിലെ റിസോർട്ടിൽ ഇന്ന് ശശികല എത്തി. ഇന്ന് അവിടെ തുടരുമെന്നാണ് അറിയുന്നത്. നാളെ എംഎൽഎമാരുമായി സെക്രട്ടേറിയറ്റിലെത്തുമെന്നും റിപ്പോർട്ടുണ്ട്.

Stories you may Like

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

More News in this category+

MNM Recommends +

Go to TOP