Forex Rate:

1 usd = 76.25 inr 1 gbp = 94.16 inr 1 eur = 85.23 inr 1 aed = 20.76 inr 1 sar = 20.32 inr 1 kwd = 247.66 inr
Jul / 202206Wednesday

അധികാര കസേര കൈവിടുമെന്ന അപകടത്തിന് പുറമേ കോവിഡും; പ്രതിസന്ധിയിൽ വലഞ്ഞ് ഉദ്ധവ് താക്കറെ; ശക്തിപരീക്ഷണത്തിന് വൈകിട്ട് മുഖ്യമന്ത്രിയുടെ വസതിയിൽ എംഎൽഎമാരുടെ യോഗം; എത്താത്തവരുടെ പാർട്ടി അംഗത്വം റദ്ദാക്കുമെന്ന് ശിവസേന; മന്ത്രിസഭ പിരിച്ചുവിടുന്ന കാര്യത്തിലും തീരുമാനം വൈകിട്ട്; അണിയറയിൽ കരുക്കൾ നീക്കി ബിജെപിയും

അധികാര കസേര കൈവിടുമെന്ന അപകടത്തിന് പുറമേ കോവിഡും; പ്രതിസന്ധിയിൽ വലഞ്ഞ് ഉദ്ധവ് താക്കറെ; ശക്തിപരീക്ഷണത്തിന് വൈകിട്ട് മുഖ്യമന്ത്രിയുടെ വസതിയിൽ എംഎൽഎമാരുടെ യോഗം; എത്താത്തവരുടെ പാർട്ടി അംഗത്വം റദ്ദാക്കുമെന്ന് ശിവസേന; മന്ത്രിസഭ പിരിച്ചുവിടുന്ന കാര്യത്തിലും തീരുമാനം വൈകിട്ട്; അണിയറയിൽ കരുക്കൾ നീക്കി ബിജെപിയും

മറുനാടൻ മലയാളി ബ്യൂറോ

മുംബൈ: 46 എംഎൽഎമാരുടെ പിന്തുണ അവകാശപ്പെട്ട് വിമത നേതാവ് ഏക്‌നാഥ് ഷിൻഡെയുടെ കലാപം. പ്രതിസന്ധി പരിഹരിക്കാൻ ശ്രമം തുടരുന്നതിനിടെ കോവിഡും. ശിവസേന നേതാവും മുഖ്യമന്ത്രിയുമായ ഉദ്ധവ് താക്കറെയ്ക്ക് ഇത് മോശം കാലമാണ്. മഹാരാഷ്ട്ര നിയമസഭ പിരിച്ചുവിടുമെന്ന് ശിവസേന എംപി സഞ്ജയ് റാവുത്ത് പറഞ്ഞെങ്കിലും, അങ്ങനെയൊരു നിർദ്ദേശമില്ലെന്നാണ് ഉദ്ധവ് താക്കറെയുമായി സംസാരിച്ച ശേഷം കോൺഗ്രസ് നിരീക്ഷകനായ കമൽ നാഥ് അറിയിച്ചത്.

പാർട്ടിയിലെ കലാപത്തിനിടെ, വൈകിട്ട് അഞ്ച് മണിക്ക് എല്ലാ ശിവസേന എംഎൽഎമാരുടെയും യോഗം വിളിച്ചിരിക്കുകയാണ് ഉദ്ധവ് താക്കറെ. കോവിഡ് പോസിറ്റീവായതിനെ തുടർന്ന് ഓൺലൈനിൽ ചേർന്ന മന്ത്രിസഭായോഗത്തിന് ശേഷമാണ് എംഎൽഎമാരെ മുഖ്യമന്ത്രിയുടെ വസതിയിലേക്ക് വിളിച്ചുവരുത്തി ശക്തിപരീക്ഷണത്തിന് തീരുമാനിച്ചത്. പങ്കെടുക്കാതിരിക്കുന്ന എംഎൽഎമാരുടെ അംഗത്വം റദ്ദാക്കുമെന്നാണ് ശിവസേനയുടെ മുന്നറിയിപ്പ്. തങ്ങൾ ശിവസേനയുമായോ, മുഖ്യമന്ത്രിയുമായോ നിലവിൽ ചർച്ച ഒന്നും നടത്തുന്നില്ലെന്നും ഭാവി പരിപാടികൾ തീരുമാനിച്ചിട്ടില്ലെന്നുമാണ് ഏക്‌നാഥ് ഷിൻഡെ പറയുന്നത്.

അതിനിടെ, സേന എംഎൽഎ നിതിൻ ഷിൻഡെ ശിവസേന ഔദ്യോഗിക നേതൃത്വത്തോട് കൂറ് പ്രഖ്യാപിച്ചു. ഏക്‌നാഥ് ഷിൻഡെ തങ്ങളുടെ ഗ്രൂപ്പ് നേതാവ് ആയതുകൊണ്ടാണ് അദ്ദേഹത്തിനൊപ്പം കാറിൽ കയറിയതെന്നും, എന്നാൽ, സൂറത്തിലേക്കാണ് തങ്ങളെ കൊണ്ടുപോയതെന്നും നിതിൻ ഷിൻഡെ പറഞ്ഞു. അവിടെ നിന്ന് രക്ഷപ്പെടാൻ ശ്രമിച്ചെങ്കിലും, പൊലീസ് വലയത്തിൽ, ഭീകരവാദിയോട് എന്ന പോലെയായിരുന്നു തന്നോടുള്ള പെരുമാറ്റം. ഒടുവിൽ പുലർച്ചെ മൂന്നുമണിയോടെ ഹോട്ടലിൽ നിന്ന് പുറത്തിറങ്ങി. ഉടൻ പൊലീസ് ബലമായി കാറിൽ പിടിച്ചുകയറ്റി ആശുപത്രിയിൽ കൊണ്ടുപോയി ബലമായി ഇഞ്ചക്ഷൻ നൽകി, നിതിൻ ഷിൻഡെ പറഞ്ഞു.

മഹാവികാസ് അഘാഡി സർക്കാർ രാജി വച്ചേക്കും

അതേസമയം,, മഹാവികാസ് അഘാഡി സർക്കാർ രാജിവെച്ചേക്കുമെന്ന സൂചന നൽകി ടൂറിസം മന്ത്രി എന്നത് ട്വിറ്ററിൽ നിന്നും ആദിത്യ താക്കറെ നീക്കി. അധികാരം നഷ്ടപ്പെട്ടാലും പോരാട്ടം തുടരുമെന്നാണ് ശിവസേനയുടെ പ്രഖ്യാപനം. 55 പേരാണ് മന്ത്രിസഭയിൽ ശിവസേനയ്ക്കുള്ളത്. ഇതിൽ ഭൂരിഭാഗം പേരും നിലവിൽ ഏക് നാഥ് ഷിൻഡെയ്ക്ക് പിന്തുണയറിയിച്ചതോടെയാണ് സർക്കാരിൽ പ്രതിസന്ധികൾ രൂക്ഷമാകുന്നത്. വിട്ടുവീഴ്ചയ്ക്ക് തയ്യാറല്ലെന്ന് എംഎൽഎമാരും നേരത്തെ വ്യക്തമാക്കിയിരുന്നു.

മന്ത്രിസഭ പിരിച്ചുവിടുന്ന സാഹചര്യത്തിലേക്ക് നീങ്ങുന്നതായി ശിവസേന നേതാവ് സഞ്ജയ് റാവുത്ത് ട്വീറ്റ് ചെയ്തു. 'വിധാൻസഭ പിരിച്ചുവിടലിലേക്ക് മഹാരാഷ്ട്രയിലെ രാഷ്ട്രീയ സംഭവവികാസങ്ങളുടെ യാത്ര' എന്നാണ് സഞ്ജയ് റാവുത്ത് ട്വീറ്റ്. ഏക്‌നാഥ് ഷിൻഡെയെ അനുനയിപ്പിക്കാനുള്ള ശ്രമങ്ങൾ നടത്തിയെങ്കിലും, അതൊന്നും വിജയിച്ചിരുന്നില്ല. ഈ സാഹചര്യത്തിലാണ് സർക്കാർ രാജിവെക്കുന്ന അവസ്ഥയിലേക്ക് കാര്യങ്ങൾ എത്തുന്നത്.

വിമതനീക്കവുമായി ശിവസേനാ മന്ത്രി ഏക്‌നാഥ് ഷിൻഡെയും എംഎൽഎമാരും ഗുജറാത്തിലെ സൂറത്തിലേക്കു പോയതോടെയാണ് മഹാരാഷ്ട്രയിൽ ശിവസേന-എൻസിപി-കോൺഗ്രസ് (മഹാവികാസ് അഘാഡി) സർക്കാർ ഗുരുതര പ്രതിസന്ധിയിലായത്. ഷിൻഡെയും കൂട്ടരും പിന്നീട് ഗുവാഹത്തിയിലേക്കു മാറിയിരുന്നു. കൂടുതൽ എംഎൽഎമാർ ഷിൻഡെയ്‌ക്കൊപ്പം സേന വിടുമെന്നാണു സൂചന. സ്വതന്ത്രയായി ജയിച്ച ശേഷം 2020ൽ ശിവസേനയിലെത്തിയ ഗീത ജയിൻ ഇന്നു രാവിലെ മുന്മുഖ്യമന്ത്രി ദേവേന്ദ്ര ഫഡ്‌നാവിസുമായി കൂടിക്കാഴ്ച നടത്തിയിരുന്നു. സേനാ എംഎൽഎമാരായ സഞ്ജയ് റാത്തോഡ്, യോഗേഷ് കദം എന്നിവരും വിമതർക്കൊപ്പം ചേരുമെന്നും റിപ്പോർട്ടുണ്ട്.

പുലർച്ചെ ഷിൻഡെയുടെ നേതൃത്വത്തിൽ വിമത എംഎൽഎമാർ ഗുജറാത്തിലെ സൂറത്തിൽനിന്ന് അസമിലെ ഗുവാഹത്തിയിൽ എത്തി. ശിവസേനയിലെ 46 എംഎൽഎമാരുടെയും ആറ് സ്വതന്ത്രന്മാരുടെയും പിന്തുണ തനിക്കുണ്ടെന്നു ഷിൻഡെ അവകാശപ്പെട്ടു. വിമത ക്യാംപിൽ നിന്ന് തിരിച്ചെത്തിയ മൂന്ന് പേരടക്കം എല്ലാ എംഎൽഎമാരെയും ശിവസേന മുംബൈയിലെ റിസോർട്ടിലേക്ക് മാറ്റി.

കഴിഞ്ഞദിവസത്തെ നിയമനിർമ്മാണ കൗൺസിൽ തിരഞ്ഞെടുപ്പിൽ ഒരുവിഭാഗം ശിവസേനാ എംഎൽഎമാരുടെ പിന്തുണയോടെ ബിജെപിക്ക് ഒരു സീറ്റിൽ അപ്രതീക്ഷിത വിജയം ലഭിച്ചതിനു പിന്നാലെയാണു പുതിയ നീക്കം ഉണ്ടായിരിക്കുന്നത്. കോൺഗ്രസും എൻസിപിയുമായുള്ള ബന്ധം അവസാനിപ്പിക്കുകയും ഹിന്ദുത്വ അജൻഡയിൽ ഉറച്ച് ബിജെപിയുമായി സഖ്യം പുനഃസ്ഥാപിക്കുകയും ചെയ്താൽ തിരിച്ചെത്താമെന്നാണ് ഷിൻഡെ ഫോണിൽ മുഖ്യമന്ത്രി ഉദ്ധവ് താക്കറെയെ അറിയിച്ചത്. ശിവസേനയുടെ നിയമസഭാ കക്ഷി നേതൃസ്ഥാനത്തുനിന്നു ഷിൻഡെയെ നീക്കിയെങ്കിലും അനുനയശ്രമം തുടരുകയാണ്. ഇതിനിടെ ഡൽഹിയിലെത്തിയ മുൻ മുഖ്യമന്ത്രി ദേവേന്ദ്ര ഫഡ്‌നാവിസ് കേന്ദ്ര ആഭ്യന്തര മന്ത്രി അമിത് ഷായും പാർട്ടി പ്രസിഡന്റ് ജെ.പി.നഡ്ഡയുമായി ചർച്ച നടത്തി. ഫഡ്‌നാവിസിന്റെ നേതൃത്വത്തിലുള്ള 'ഓപ്പറേഷൻ താമര' പദ്ധതിയാണു നടപ്പാക്കുന്നതെന്ന് ആരോപണമുണ്ട്.

ഉദ്ധവ് ഇന്നലെ വിളിച്ച അടിയന്തര പാർട്ടി യോഗത്തിൽ 55 എംഎൽഎമാരിൽ 17 പേർ മാത്രമാണു പങ്കെടുത്തതെന്ന് അറിയുന്നു. എന്നാൽ 33 പേർ എത്തിയെന്നു ശിവസേന അവകാശപ്പെടുന്നു. 46 പേർ ഒപ്പമുണ്ടെന്നാണു ഷിൻഡെയുടെ അവകാശവാദം. 37 പേരുണ്ടെങ്കിൽ കൂറുമാറ്റ നിരോധന നിയമത്തെ മറികടക്കാം. ഇത്രയും പേരില്ലെങ്കിൽ രാഷ്ട്രപതി ഭരണത്തിനാണ് ബിജെപിയുടെ നീക്കമെന്നും സൂചനയുണ്ട്. സ്വതന്ത്രരും ചെറുകക്ഷികളും ഒപ്പമെത്തുമെന്നും കണക്കുകൂട്ടുന്നു.

Stories you may Like

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

More News in this category+

MNM Recommends +

Go to TOP