Forex Rate:

1 usd = 76.25 inr 1 gbp = 94.16 inr 1 eur = 85.23 inr 1 aed = 20.76 inr 1 sar = 20.32 inr 1 kwd = 247.66 inr
Oct / 202126Tuesday

''ആം ആദ്മിയെ കുറിച്ച് വാചകമടിക്കുന്ന ചില പാർട്ടികൾ ഉണ്ട്; ഞങ്ങളാണ് ശരിക്കും ആം ആദ്മി സർക്കാർ; ഞാൻ ഒരു സാധാരണക്കാരനാണ്': മുഖ്യമന്ത്രി പദം ഏറ്റ ഉടൻ എഎപിയെ പരിഹസിച്ച് ചരൺജിത്ത് സിങ് ചന്നി; പാവപ്പെട്ടവർക്ക് വെള്ളക്കരം ഒഴിവാക്കുമെന്നും വാഗ്ദാനം; രാഹുൽ ഗാന്ധിക്കും ക്യാപ്റ്റനും അടക്കം നന്ദി പറഞ്ഞ് തുടക്കം

''ആം ആദ്മിയെ കുറിച്ച് വാചകമടിക്കുന്ന ചില പാർട്ടികൾ ഉണ്ട്; ഞങ്ങളാണ് ശരിക്കും ആം ആദ്മി സർക്കാർ; ഞാൻ ഒരു സാധാരണക്കാരനാണ്': മുഖ്യമന്ത്രി പദം ഏറ്റ ഉടൻ എഎപിയെ പരിഹസിച്ച് ചരൺജിത്ത് സിങ് ചന്നി; പാവപ്പെട്ടവർക്ക് വെള്ളക്കരം ഒഴിവാക്കുമെന്നും വാഗ്ദാനം; രാഹുൽ ഗാന്ധിക്കും ക്യാപ്റ്റനും അടക്കം നന്ദി പറഞ്ഞ് തുടക്കം

മറുനാടൻ മലയാളി ബ്യൂറോ

ചണ്ഡീഗഡ്: മുഖ്യമന്ത്രി പദം ഏറ്റയുടൻ ആംആദ്മി പാർട്ടിയെ പരിഹസിച്ച് പഞ്ചാബിന്റെ പുതിയ സാരഥി ചരൺജിത്ത് സിങ് ചന്നി. 'ഞാൻ ആം ആദ്മിയാണ്. മറ്റുപാർട്ടികൾ ആം ആദ്മിയെ കുറിച്ച് സംസാരിച്ചുകൊണ്ടേയിരിക്കുമ്പോൾ ഞങ്ങളുടേത് സാധാരണക്കാരുടെ സർക്കാരാണ്. പഞ്ചാബിന് വേണ്ടി ധാരാളം തീരുമാനങ്ങൾ ഈ സർക്കാരിന് എടുക്കാനുണ്ട്. പഞ്ചാബ് കോൺഗ്രസ് അദ്ധ്യക്ഷൻ നവ്ജ്യോജ് സിങ് സിദ്ദുവും, സംസ്ഥാനത്തിന്റെ ചുമതലയുള്ള ഹരീഷ് റാവത്തും പങ്കെടുത്ത വാർത്താസമ്മേളനത്തിൽ സംസാരിക്കുകയായിരുന്നു ചരൺജിത്ത്.

തന്റെ സ്ഥാനലബ്ധിക്ക് അദ്ദേഹം കോൺഗ്രസ് പാർട്ടിക്ക് നന്ദി പറഞ്ഞു. വിശേഷിച്ച് രാഹുൽ ഗാന്ധിയെ അദ്ദേഹം വിപ്ലവകാരിയായ നേതാവെന്ന് വിശേഷിപ്പിച്ചു. തന്റെ മുൻഗാമി അമരീന്ദർ സിങ്ങിനും അദ്ദേഹം നന്ദി പറഞ്ഞു. പഞ്ചാബിലെ ആദ്യ ദളിത് സിഖ് മുഖ്യമന്ത്രിയാണ് ചന്നി. സുഖ്ജിന്ദർ സിങ് റൺധാവയും, ഓം പ്രകാശ് സോണിയുമാണ് ഉപമുഖ്യമന്ത്രിമാർ. രാഹുൽ ഗാന്ധിയും സത്യപ്രതിജ്ഞാ ചടങ്ങിൽ പങ്കെടുത്തു.

താൻ സാധാരണക്കാരുടെ, കർഷകന്റെയും അടിച്ചമർത്തപ്പെട്ടവന്റെയും പ്രതിനിധി ആണെന്നും, താൻ സമ്പന്നരുടെ പ്രതിനിധി അല്ലെന്നും ചന്നി പറഞ്ഞു. 'അനധികൃത മണൽകൊള്ളക്കാരും മറ്റു അനധികൃത പ്രവർത്തങ്ങളിൽ ഏർപ്പെടുന്നവരും, എന്റെ അടുത്തേക്ക് വരരുത്. ഞാൻ നിങ്ങളുടെ പ്രതിനിധിയല്ല', മുഖ്യമന്ത്രി അർത്ഥശങ്കയില്ലാതെ പറഞ്ഞു.

വെള്ളക്കരം കെട്ടുന്നതിൽ നിന്ന് പാവങ്ങളെ ഒഴിവാക്കുമെന്ന് മുഖ്യമന്ത്രി വാഗ്ദാനം ചെയ്തു. ക്യാപ്റ്റൻ അമരീന്ദർ സിങ്ങിന്റെ പൂർത്തിയാകാത്ത ജോലികൾ മുഴുമിക്കും. പാർട്ടിയാണ് പരമോന്നതം. പാർട്ടി എടുക്കുന്ന തീരുമാനങ്ങൾ, സർക്കാർ നടപ്പാക്കും, ചന്നി പറഞ്ഞു.

അടുത്ത വർഷം ആദ്യം സംസ്ഥാനത്ത് തിരഞ്ഞെടുപ്പ് നടക്കാനിരിക്കെ, വെറും നാല് മാസമാണ്, ചരൺജിത്ത് സിങ് ചന്നിക്ക് കിട്ടുക. അമരീന്ദർ സിങ്ങിന് പരിഹരിക്കാൻ കഴിയാതെ പോയ പ്രശ്‌നങ്ങളുടെ 18 ഇന ചെക്്‌ലിസ്റ്റ് പാർട്ടി തയ്യാറാക്കിയിട്ടുണ്ട്. അത് പരിഹരിക്കുകയായിരിക്കും മുഖ്യമന്ത്രിയുടെ മുന്നിലെ മുഖ്യ അജണ്ട. അങ്ങേനെ, തിരഞ്ഞെടുപ്പിനെ നേരിടാൻ പാർട്ടിയെ സജ്ജമാക്കുകയാണ് ചരൺജിത്ത് സിങ് ചന്നിയുടെ മുഖ്യദൗത്യം.

അതേസമയം, വരാൻ പോകുന്ന നിയസഭ തെരഞ്ഞെടുപ്പിനെ നേരിടാൻ പോകുന്നത് നവ്‌ജ്യോത് സിങ് സിദ്ദുവിന്റെ നേതൃത്വത്തിൽ ആയിരിക്കുമെന്നുള്ള ഹരീഷ് റാവത്തിന്റെ പ്രതികരണത്തിന് എതിരെ അമരീന്ദർ സിങ്ങിനെ പിന്തുണയ്ക്കുന്നവർ രംഗത്തെത്തി.

സിദ്ദുവിന്റെ നേതൃത്വത്തിലാണ് തെരഞ്ഞെടുപ്പിനെ നേരിടുക എന്ന പ്രതികരണം തന്നെ അമ്പരിപ്പിച്ചതായി മുൻ പിസിസി അധ്യക്ഷൻ സുനിൽ ഝക്കർ പറഞ്ഞു. എന്ത് അടിസ്ഥാനത്തിലാണ് റാവത്ത് ഇങ്ങനെയൊരു പ്രസ്താവന നടത്തിയത് എന്ന് അറിയില്ലെന്ന് ഝക്കർ പറഞ്ഞു. നിലവിലെ സാഹചര്യങ്ങൾ വച്ചു നോക്കിയാൽ സിദ്ദു ജനപ്രിയ നേതാവാണെന്നും അദ്ദേഹം തന്നെ പാർട്ടിയെ തെരഞ്ഞെടുപ്പിൽ നയിക്കുമെന്നും പഞ്ചാബിന്റെ ചുമതലയുള്ള റാവത്ത് പറഞ്ഞിരുന്നു.

തിരഞ്ഞെടുപ്പിനെ സിദ്ദുവിന്റെ കീഴിൽ നേരിടുമെന്നു സത്യപ്രതിജ്ഞാ ദിനത്തിൽ റാവത്ത് നടത്തിയ പ്രസ്താവന മുഖ്യമന്ത്രിയുടെ അധികാരങ്ങൾ അട്ടിമറിക്കുന്നതാണെന്ന് ഝക്കർ കുറ്റപ്പെടുത്തി. മുൻ പിപിസിസി അധ്യക്ഷനായ സുനിൽ ഝക്കറിന്റെ പേരും മുഖ്യമന്ത്രിസ്ഥാനത്തേക്കു പരിഗണിച്ചിരുന്നു. മൂന്നാംതവണ എംഎൽഎയായി നിയമസഭയിലെത്തിയ 58കാരനായ ചന്നി, അമരീന്ദർ സിങ് മന്ത്രിസഭയിലെ അംഗമായിരുന്നു. സിദ്ദുവിന്റെ വിശ്വസ്തനുമാണ്. ചന്നിയെ മുഖ്യമന്ത്രിയാക്കിയതിലൂടെ സംസ്ഥാനത്തെ 32 ശതമാനത്തോളം വരുന്ന ദലിത് വിഭാഗങ്ങളെ കൂടെനിർത്താൻ സാധിക്കുമെന്നാണ് കോൺഗ്രസ് കണക്കുകൂട്ടുന്നത്.

Stories you may Like

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

More News in this category+

MNM Recommends +

Go to TOP