Forex Rate:

1 usd = 76.25 inr 1 gbp = 94.16 inr 1 eur = 85.23 inr 1 aed = 20.76 inr 1 sar = 20.32 inr 1 kwd = 247.66 inr
May / 202229Sunday

തീവ്രവാദത്തിനെതിരെ ഉറച്ച നിലപാട്; ഇന്ത്യ-യുഎഇ സമഗ്ര സാമ്പത്തിക പങ്കാളിത്ത ഉടമ്പടിയിലെ ചാലക ശക്തി; റിപ്പബ്ലിക് ദിനത്തിൽ അതിഥിയായെത്തിയപ്പോൾ മോദി നേരിട്ടെത്തി സ്വീകരിച്ച സുഹൃത്ത്; ദീപാവലി ആശംസകളുമായി ഉയർത്തി പിടിച്ച മതേതരത്വം; പാക്കിസ്ഥാനും ദാവൂദിനും സുഹൃത്തുമല്ല; യുഎഇയുടെ പുതിയ പ്രസിഡന്റ് ഇന്ത്യയുടെ പ്രിയങ്കരൻ

തീവ്രവാദത്തിനെതിരെ ഉറച്ച നിലപാട്; ഇന്ത്യ-യുഎഇ സമഗ്ര സാമ്പത്തിക പങ്കാളിത്ത ഉടമ്പടിയിലെ ചാലക ശക്തി; റിപ്പബ്ലിക് ദിനത്തിൽ അതിഥിയായെത്തിയപ്പോൾ മോദി നേരിട്ടെത്തി സ്വീകരിച്ച സുഹൃത്ത്; ദീപാവലി ആശംസകളുമായി ഉയർത്തി പിടിച്ച മതേതരത്വം; പാക്കിസ്ഥാനും ദാവൂദിനും സുഹൃത്തുമല്ല; യുഎഇയുടെ പുതിയ പ്രസിഡന്റ് ഇന്ത്യയുടെ പ്രിയങ്കരൻ

മറുനാടൻ മലയാളി ബ്യൂറോ

ദുബായ്: ശൈഖ് മുഹമ്മദ് ബിൻ സയിദ് അൽ നഹ്യാൻ യുഎഇയുടെ പുതിയ പ്രസിഡണ്ടാകുമ്പോൾ ഇന്ത്യയും അബുദാബിയും തമ്മിലെ ബന്ധം കൂടുതൽ ശക്തമാകും. ഇന്ത്യ-യുഎഇ സമഗ്ര സാമ്പത്തിക പങ്കാളിത്ത ഉടമ്പടിക്ക് പിന്നിൽ നിന്ന വ്യക്തിയാണ് ശൈഖ് മുഹമ്മദ് ബിൻ സയിദ് അൽ നഹ്യാൻ. ഭീകരവാദത്തെ തുടച്ചു നീക്കാനുള്ള ഇന്ത്യൻ ശ്രമങ്ങൾക്ക് കരുത്ത് നൽകിയ നേതാവ്. ശൈഖ് ഖലീഫ ബിൻ സായിദ് അന്തരിച്ചതിനെ തുടർന്നാണ് ,സഹോദരനായ അദ്ദേഹം പുതിയ പ്രസിഡണ്ടായി ചുമതലേയൽക്കുന്നത്. യുഎഇയുടെ മൂന്നാമത്തെ പ്രസിഡന്റാണ് ശൈഖ് മുഹമ്മദ് ബിൻ സയിദ് അൽ നഹ്യാൻ.

യുഎഇ സുപ്രീം കൗൺസിൽ യോഗമാണ് പുതിയ പ്രസിഡന്റിനെ തീരുമാനിച്ചത്. 61കാരനായ ശൈഖ് മുഹമ്മദ് യുഎഇയുടെ മൂന്നാമത്തെ പ്രസിഡന്റും അബുദബിയുടെ 17ാമത്തെ ഭരണാധികാരിയുമാകും. യുഎഇ പ്രസിഡന്റായിരുന്ന ശൈഖ് ഖലീഫ ബിൻ സായിദ് അൽ നഹ് യാന്റെ നിര്യാണത്തെ തുടർന്നാണ് അദ്ദേഹത്തെ സഹോദരൻ കൂടിയായ ശൈഖ് മുഹമ്മദിനെ പ്രസിഡന്റായി തിരഞ്ഞെടുത്തത്. 2004ലാണ് ശൈഖ് മുഹമ്മദ് ബിൻ സയിദ് അൽ നഹ് യാനെ യുഎഇ കിരീടാവകാശിയായി പ്രഖ്യാപിച്ചത്. യുഎഇയുടെ രാഷ്ട്രപിതാവും പ്രഥമ പ്രസിഡന്റുമായ ിരുന്ന ശൈഖ് സായിദിന്റെ മക്കളാണ് ഇരുവരും.

2005 ജനുവരി മുതൽ യു എ ഇ സായുധ സേനയുടെ ഡെപ്യൂട്ടി സുപ്രീം കമാൻഡറായും ശൈഖ് മുഹമ്മദ് സേവനമനുഷ്ഠിച്ചിട്ടുണ്ട്. തന്ത്രപ്രധാനമായ ആസൂത്രണം, പരിശീലനം, സംഘടനാ ഘടന, പ്രതിരോധ ശേഷികൾ പ്രോത്സാഹിപ്പിക്കൽ എന്നിവയിൽ യു എ ഇ സായുധ സേനയെ വികസിപ്പിക്കുന്നതിൽ അദ്ദേഹം പ്രധാന പങ്ക് വഹിച്ചിട്ടുണ്ട്. അദ്ദേഹത്തിന്റെ നേതൃത്വത്തിൽ, അന്താരാഷ്ട്ര സൈനിക സംഘടനകൾ വ്യാപകമായി അംഗീകരിക്കുന്ന ഒരു പ്രമുഖ സ്ഥാപനമായി യു എ ഇ സായുധ സേന ഉയർന്നുവന്നു. യുഎഇ സേനയെ നവീകരിച്ചത് ഇദ്ദേഹത്തിന്റെ നേതൃത്വത്തിലാണ്.

ഇന്ത്യയുമായി അടുത്ത ബന്ധമാണ് ശൈഖ് മുഹമ്മദ് ബിൻ സയിദ് അൽ നഹ്യാനുള്ളത്. 2017ൽ ഇന്ത്യയുടെ റിപ്പബ്ലിക് ദിനത്തിൽ മുഖ്യാതിഥിയായിരുന്നു. അന്ന് ഡൽഹി വിമാനത്താവളത്തിൽ നേരിട്ടെത്തിയാണ് പ്രധാനമന്ത്രി മോദി അദ്ദേഹത്തെ സ്വീകരിച്ചത്. നഹ്യാന്റെ ഈ സന്ദർശനത്തിന് ശേഷം ഇന്ത്യയും യുഎഇയുമായുള്ള അടുപ്പം കൂടി. സൈനിക സഹകരണത്തിൽ അടക്കം പങ്കാളികളുമായി. തുടർഭരണത്തിൽ മോദിയെ അഭിനന്ദിച്ച് ഇംഗ്ലീഷിലും ഹിന്ദിയിലും ട്വീറ്റും ചെയ്തു. മോദിയെ ഫോണിലും അഭിനന്ദിച്ചു. 2020ൽ ദീപാവലിക്കും ആശംസകളുമായി നഹ്യാൻ എത്തിയിരുന്നു. അതുകൊണ്ട് തന്നെ ഇന്ത്യയുടെ ഉറ്റ സുഹൃത്തായി നഹ്യാനെ വിലയിരുത്തപ്പെടുന്നു.

ഭീകരവാദത്തിനെതിരേയും അതിശക്തമായ നിലപാടാണ് നഹ്യാനുള്ളത്. പാക്കിസ്ഥാനെ അകറ്റി നിർത്തിയതും അതിന്റെ ഭാഗമാണ്. തീവ്രവാദത്തിനെതിരെ യുഎഇ മണ്ണുപയോഗിക്കാൻ ആരേയും അനുവദിക്കില്ലെന്ന അദ്ദേഹത്തിന്റെ നിലപാടും തുണച്ചത് ഇന്ത്യയെയാണ്. ദാവൂദ് ഇബ്രാഹിമിനെ പോലുള്ളവർക്ക് യുഎഇയിൽ സുരക്ഷിത താവളം ഇല്ലാതെയുമായി. എല്ലാ തീവ്രവാദ വിഷയത്തിലും ഇന്ത്യയോട് ചേർന്ന് പ്രവർത്തിച്ച വ്യക്തിയാണ് നഹ്യാൻ.

അബുദാബി കിരീടാവകാശി ശൈഖ് മുഹമ്മദ് ബിൻ സായിദ് അൽ നഹ്യാൻ രാജകുമാരനും തമ്മിൽ ഈ വർഷം വെർച്വൽ കൂടിക്കാഴ്‌ച്ചയും നടത്തി. സമസ്ത മേഖലകളിലും ഉഭയകക്ഷിബന്ധങ്ങളിലുണ്ടായ തുടർച്ചയായ വളർച്ചയിൽ ഇരുനേതാക്കളും സംതൃപ്തി രേഖപ്പെടുത്തിയിരുന്നു. ഇരുരാജ്യങ്ങളും ലക്ഷ്യമിടുന്നത് സമ്പദ് വ്യവസ്ഥ, ഊർജ്ജം , കാലാവസ്ഥാ പ്രവർത്തനം, വളർന്നുവരുന്ന സാങ്കേതികവിദ്യകൾ, നൈപുണ്യവും വിദ്യാഭ്യാസവും, ഭക്ഷ്യസുരക്ഷ, ആരോഗ്യം, പ്രതിരോധം, സുരക്ഷ എന്നിവയുൾപ്പെടെ വിവിധ മേഖലകളിൽ വ്യാപാര-നിക്ഷേപ-നവീകരണ പ്രവർത്തനങ്ങൾ പ്രോത്സാഹിപ്പിക്കാനാണ്. കൂടാതെ വെർച്വൽ സമ്മേളനത്തിന്റെ ഭാഗമായി ഇന്ത്യ-യുഎഇ സമഗ്ര സാമ്പത്തിക പങ്കാളിത്ത ഉടമ്പടി ഒപ്പുവച്ചു. ഇരുനേതാക്കളുടെയും വെർച്വൽ സാന്നിധ്യത്തിൽ കേന്ദ്ര വാണിജ്യവ്യവസായമന്ത്രി പിയൂഷ് ഗോയലും യുഎഇ സാമ്പത്തികമന്ത്രി അബ്ദുള്ള ബിൻ തൗഖ് അൽ മാരിയും ചേർന്നാണ് കരാറിൽ ഒപ്പിട്ടത്.

മെച്ചപ്പെട്ട വിപണി പ്രവേശനവും കുറഞ്ഞ ഇറക്കുമതിത്തീരുവകളും ഉൾപ്പെടെ ഇന്ത്യയുടെയും യുഎഇയുടെയും വ്യവസായ മേഖലയ്ക്ക് ഈ കരാർ വലിയ നേട്ടങ്ങൾ സൃഷ്ടിക്കും. അടുത്ത അഞ്ചുവർഷത്തിനുള്ളിൽ ഉഭയകക്ഷിവ്യാപാരം നിലവിലെ 60 ബില്യൺ ഡോളറിൽ നിന്ന് 100 ബില്യൺ ഡോളറായി ഉയർത്താനും സിഇപിഎ സഹായിക്കുമെന്നാണ് പ്രതീക്ഷിക്കുന്നത്. ഇന്ത്യയുടെ സ്വാതന്ത്ര്യത്തിന്റെ 75-ാം വാർഷികവും യുഎഇ സ്ഥാപിതമായതിന്റെ 50-ാം വാർഷികവും കണക്കിലെടുത്ത് ഇരുനേതാക്കളും സംയുക്ത സ്മരണികസ്റ്റാമ്പും പുറത്തിറക്കി. മാത്രമല്ല ഇന്ത്യയും യുഎഇയും ഒപ്പുവച്ച രണ്ടു ധാരണാപത്രങ്ങളും ഉച്ചകോടിയിൽ പ്രഖ്യാപിച്ചു. ഭക്ഷ്യസുരക്ഷ ഇടനാഴിയെക്കുറിച്ച് എപിഇഡിഎയും ഡിപി വേൾഡ് & അൽ ദഹ്‌റയും തമ്മിലുള്ള ധാരണപത്രം, സാമ്പത്തിക പദ്ധതികളിലും സേവനങ്ങളിലുമുള്ള സഹകരണം സംബന്ധിച്ച് ഇന്ത്യയുടെ ഗിഫ്റ്റ് സിറ്റിയും അബുദാബി ഗ്ലോബൽ മാർക്കറ്റും തമ്മിലുള്ള ധാരണാപത്രം എന്നിവയിലാണ് ഒപ്പുവെച്ചത്. കൂടാതെ കാലാവസ്ഥാപ്രവർത്തനത്തിലെ സഹകരണത്തിനും വിദ്യാഭ്യാസത്തിനുമായുള്ള മറ്റു രണ്ടു കരാറുകൾക്കും ഇരുരാജ്യങ്ങളും തമ്മിൽ ധാരണയായി. അങ്ങനെ ഇന്ത്യയ്‌ക്കൊപ്പം ചേർന്ന് നിൽക്കാൻ ആഗ്രഹിക്കുന്ന ഭരണാധിപനാണ് ഇനി യുഎഇയെ നയിക്കുന്നത്.

വെള്ളിയാഴ്ച വൈകീട്ടാണ് യുഎഇ പ്രസിഡന്റും അബുദബി ഭരണാധികാരിയുമായിരുന്ന ശൈഖ് ഖലീഫ ബിൻ സായിദ് അല നഹ്‌യാൻ വിടവാങ്ങിയത്. രാഷ്ട്രത്തലവന്റെ മരണത്തെ തുടർന്ന് യുഎഇയിൽ 40 ദിവസത്തെ ഔദ്യോഗിക ദുഃഖാചരണം പ്രഖ്യാപിച്ചിട്ടുണ്ട്. 2004 നവംബർ മൂന്നിനാണ് ശൈഖ് ഖലീഫ ബിൻ സായിദ് അൽ നഹ്‌യാൻ യുഎഇയുടെ ഭരണാധികാരിയായി സ്ഥാനമേറ്റെടുത്തത്. യുഎഇ സ്ഥാപകനും ആദ്യ ഭരണാധികാരിയുമായിരുന്ന ശൈഖ് സായിദ് ബിൻ സുൽത്താൻ അൽ നഹ്‌യാന്റെ നിര്യാണത്തെ തുടർന്നായിരുന്നു അദ്ദേഹം ഭരണം ഏറ്റെടുത്തത്. 2004 നവംബർ രണ്ടിനായിരുന്നു ശൈഖ് സായിദ് വിടപറഞ്ഞത്.

യുഎഇ രാഷ്ട്ര സ്ഥാപകൻ ശൈഖ് സായിദിന്റെ മൂത്ത മകനായിരുന്നു ശൈഖ് ഖലീഫ. ഭരണമേറ്റെടുത്ത ശേഷം യുഎഇ ഫെഡറൽ ഭരണകൂടത്തിലും അബുദാബി എമിറേറ്റിലും ഒട്ടേറെ ഭരണപരമായ മാറ്റങ്ങൾക്ക് ശൈഖ് ഖലീഫ നേതൃത്വം നൽകി. വൻ വികസന കുതിപ്പിലേക്ക് രാജ്യത്തെ നയിക്കുകയും ലോകമെമ്പാടുമുള്ള ലക്ഷക്കണക്കിന് ജനങ്ങൾക്ക് തങ്ങളുടെ സ്വന്തം വീടുപോലെ ആ രാജ്യത്തെ പ്രിയങ്കരമാക്കുകയും ചെയ്ത ഭരണാധികാരിയാണ് വിടപറഞ്ഞത്. ഈ മുന്നേറ്റത്തിനെല്ലാം പിന്തുണയുമായി ഒപ്പം നിന്ന വ്യക്തിയാണ് ഇപ്പോൾ പ്രസിഡന്റാകുന്ന ശൈഖ് മുഹമ്മദ് ബിൻ സയിദ് അൽ നഹ്യാൻ.

Stories you may Like

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

More News in this category+

MNM Recommends +

Go to TOP