Forex Rate:

1 usd = 76.25 inr 1 gbp = 94.16 inr 1 eur = 85.23 inr 1 aed = 20.76 inr 1 sar = 20.32 inr 1 kwd = 247.66 inr
Jun / 202226Sunday

അരുണാചൽ പ്രദേശിൽ നൂറു വീടുകൾ അടങ്ങുന്ന ഗ്രാമം സ്ഥാപിച്ചത് അതീവ രഹസ്യമായി; പശ്ചിമ ഹിമാലയ മേഖലയിൽ, ചൈനീസ് സൈന്യം ഫൈബർ ഒപ്റ്റിക് ശൃംഖല പണിതീർത്തത് സംഘർഷം കൊടുമ്പിരി കൊണ്ട സമയത്ത്; കൂസലില്ലാത്ത ചൈനയോട് ഇന്ത്യ: അധിനിവേശം വച്ചുപൊറുപ്പിക്കില്ല ഞങ്ങൾ

അരുണാചൽ പ്രദേശിൽ നൂറു വീടുകൾ അടങ്ങുന്ന ഗ്രാമം സ്ഥാപിച്ചത് അതീവ രഹസ്യമായി; പശ്ചിമ ഹിമാലയ മേഖലയിൽ, ചൈനീസ് സൈന്യം ഫൈബർ ഒപ്റ്റിക് ശൃംഖല പണിതീർത്തത് സംഘർഷം കൊടുമ്പിരി കൊണ്ട സമയത്ത്; കൂസലില്ലാത്ത ചൈനയോട് ഇന്ത്യ: അധിനിവേശം വച്ചുപൊറുപ്പിക്കില്ല ഞങ്ങൾ

മറുനാടൻ മലയാളി ബ്യൂറോ

ന്യൂഡൽഹി: അരുണാചൽ പ്രദേശിലെ ചൈനയുടെ അധിനിവേശ ശ്രമങ്ങൾ വച്ചുപൊറുപ്പിക്കില്ലെന്ന് ഇന്ത്യ. 100 വീടുകൾ അടങ്ങിയ ഗ്രാമം ചൈന യഥാർത്ഥ നിയന്ത്രണ രേഖയ്ക്ക് സമീപം സ്ഥാപിച്ചതുമായി ബന്ധപ്പെട്ടാണ് ഇന്ത്യയുടെ പ്രതികരണം. അരുണാചലിലെ അതിർത്തി പ്രദേശത്ത് അനധികൃതമായി ചൈന നടത്തിയ നിർമ്മാണ പ്രവർത്തനങ്ങൾ അംഗീകരിക്കില്ലെന്ന് വിദേശകാര്യ വക്താവ് വ്യക്തമാക്കി. കഴിഞ്ഞ കുറച്ച് വർഷങ്ങളായി യഥാർഥ നിയന്ത്രണ രേഖയ്ക്ക് ചുറ്റും ചൈന നടത്തി വരുന്ന അനധികൃത നിർമ്മാണ പ്രവർത്തനങ്ങൾ അംഗീകരിക്കാൻ സാധിക്കില്ലെന്ന് അറിങ്ധം ബാഗ്ചി അറിയിച്ചു.

ചൈനയുടെ അവകാശ വാദങ്ങൾ ഒന്നും തന്നെ ഇന്ത്യ അംഗീകരിച്ചിട്ടില്ല. ഇക്കാര്യം വീണ്ടും ചൈനീസ് സർക്കാരിനെ ബോധ്യപെടുത്തുമെന്നും അദ്ദേഹം പറഞ്ഞു. ഇന്ത്യൻ അതിർത്തിക്കുള്ളിൽ നിയന്ത്രണ രേഖയ്ക്ക് സമീപം ചൈന നൂറോളം വീടുകൾ നിർമ്മിച്ചതായി പെന്റഗൺ വിവരങ്ങൾ പുറത്തു വിട്ടിരുന്നു. കഴിഞ്ഞ ദിവസം ഇന്ത്യൻ അതിർത്തിക്കുള്ളിൽ ചൈന അനധികൃത നിർമ്മാണങ്ങൾ നടത്തുന്നതായി അരുണാചൽ സർക്കാരിന്റെ പ്രതിനിധികളും അറിയിച്ചു.

ചൈനീസ് നിയന്ത്രണത്തിന് കീഴിൽ വരുന്ന ടിബറ്റിനും അരുണാചൽ പ്രദേശിനും ഇടയിൽ യഥാർഥ നിയന്ത്രണ രേഖയ്ക്ക് കിഴക്ക് ഭാഗത്തയാണ് ചൈനയുടെ കടന്നുകയറ്റം. ഇരു രാജ്യങ്ങൾക്കുമിടയിൽ ധാരണയിലുള്ള മക്‌മോഹൻ അതിർത്തി കടന്നാണ് ചൈന നൂറോളം സൈനിക താവളങ്ങൾ നിർമ്മിച്ചിരിക്കുന്നതെന്ന് അമേരിക്ക പുറത്തു വിട്ട സാറ്റലൈറ്റ് ദൃശ്യങ്ങൾ വെളിപെടുത്തുന്നു.

സമാധാനം കെടുത്താൻ കച്ച കെട്ടി ചൈന

യഥാർത്ഥ നിയന്ത്രണ രേഖയ്ക്ക് അടുത്ത് നൂറ് വീടുകൾ അടങ്ങിയ ഗ്രാമം ആരുമറിയാതെ സെറ്റ് അപ്പ് ചെയ്തവരെ ജാഗ്രതയോടെ അല്ലാതെ കാണാൻ വയ്യ. പെന്റഗന്റെ പുതിയ റിപ്പോർട്ടിലും പറയുന്നത് ഇതാണ്. 2020 ൽ, ഇന്ത്യ-ചൈന അതിർത്തി സംഘർഷം മൂർച്ഛിച്ച് നിന്ന് സമയത്ത് പശ്ചിമ ഹിമാലയ മേഖലയിൽ, ചൈനീസ് സൈന്യം ഫൈബർ ഒപ്റ്റിക് ശൃംഖല സ്ഥാപിച്ചു എന്നതാണ് ഏറ്റവും പുതിയ വെളിപ്പെടുത്തൽ.

വിദേശ ശക്തികളുടെ കടന്നുവരവിനെ ചെറുക്കാനാണ് ചൈന ഒപ്ററിക് ഫൈബർ ശൃംഖല സ്ഥാപിച്ചത്. 2021ലെ പീപ്പിൾസ് റിപ്പബ്ലിക് ഓഫ് ചൈനയുടെ സൈനിക-സുരക്ഷാ വികസനങ്ങൾ എന്ന റിപ്പോർട്ടിലാണ് പെന്റഗൺ കാര്യങ്ങൾ വിശദീകരിക്കുന്നത്. വളരെ വേഗത്തിലുള്ള വിവരവിനിമയത്തിനും ശത്രുക്കളുടെ കടന്നുവരവ് നേരത്തെ അറിയാനും ലക്ഷ്യമിട്ടായിരുന്നു ശൃംഖല.

വിവരങ്ങൾ തൽസമയം അറിയാനും സാഹചര്യത്തെ കുറിച്ചുള്ള കാര്യങ്ങൾ മനസ്സിലാക്കാനും സാധിച്ചിരുന്നെന്നും റിപ്പോർട്ട് പറയുന്നു. ഇരു രാജ്യങ്ങളും പങ്കിടുന്ന അന്താരാഷ്ട്ര അതിർത്തിയെ ചൊല്ലി ദീർഘകാലമായി ഇന്ത്യയും ചൈനയും തമ്മിൽ തുടരുന്ന തർക്കം കഴിഞ്ഞവർഷം ജൂണിലാണ് മൂർച്ഛിച്ചത്.

രാജ്യാതിർത്തികൾക്ക് പുറത്ത് ചൈനയുടെ കരുത്ത് അറിയിക്കാനും, വിദേശനയ ലക്ഷ്യങ്ങൾ കൈവരിക്കാനും സഹായിക്കും വിധം നടപടികൾ സ്വീകരിക്കാൻ പിഎൽഎയ്ക്ക് ചൈനീസ് കമ്യൂണിസ്റ്റ് പാർട്ടി നിർദ്ദേശം നൽകിയിട്ടുണ്ട്. പീപ്പിൾസ് ലിബറേഷൻ ആർമിയുടെ ആഗോള സാന്നിധ്യം, ചൈനയുടെ ദേശീയപുനരുദ്ധാരണത്തിന് അനുകൂലമായ അന്താരാഷ്ട്ര അന്തരീക്ഷം സൃഷ്ടിക്കാൻ അനിവാര്യമെന്നാണ് കമ്യൂണിസ്റ്റ് പാർട്ടി കരുതുന്നത്.

കോവിഡോ, ഇന്ത്യയുമായുള്ള അതിർത്തി തർക്കമോ ഒന്നും ചൈനയെ പിന്തിരിപ്പിക്കാൻ പോന്നതായിരുന്നില്ല. സൈനിക പരിശീലനം 2020 ൽ പൂർവാധികം ശക്തിയോടെയും വേഗത്തിലും നടന്നുവെന്നാണ് പെന്റഗൺ റിപ്പോർട്ടിൽ പറയുന്നത്.

അതിനിടെ അരുണാചൽ പ്രദേശിൽ ചൈന നടത്തുന്ന കടന്നുകയറ്റ ശ്രമങ്ങളുടെ വിശദാംശങ്ങൾ വെളിപ്പെടുത്തി അമേരിക്കൻ വിദേശകാര്യ, പ്രതിരോധ മന്ത്രാലയങ്ങളുടെ റിപ്പോർട്ടും പുറത്തുവന്നു. യഥാർഥ നിയന്ത്രണ രേഖയിൽ നിലനിൽക്കുന്ന സംഘർഷങ്ങളുടെ വിവരവും റിപ്പോർട്ടിലുണ്ട്. ഇന്ത്യൻ അതിർത്തിക്കുള്ളിൽ അരുണാചൽ പ്രദേശിൽ ചൈന 100 വീടുകൾ അടങ്ങുന്ന ഗ്രാമം നിർമ്മിച്ചതായി യുഎസ് കോൺഗ്രസിനു സമർപ്പിച്ച റിപ്പോർട്ടിൽ പറയുന്നു.

ഇന്ത്യയുമായി സൈനിക, നയതന്ത്ര ചർച്ചകൾ നടത്തുന്നതിനിടയിലും ചൈന, അതിർത്തി മേഖലയിൽ കടന്നുകയറ്റ നീക്കങ്ങൾ സജീവമാക്കുകയാണെന്നാണ് റിപ്പോർട്ടിൽ വ്യക്തമാക്കുന്നത്. സംഘർഷ സമയത്ത് സൈനികർക്ക് ഉപയോഗിക്കാൻ പാകത്തിലാണ് ചൈന അതിർത്തിയിൽ ഗ്രാമങ്ങൾ നിർമ്മിക്കുന്നതെന്ന് ഈസ്റ്റേൺ ആർമി കമാൻഡ് ചീഫ് ലഫ്. ജനറൽ മനോജ് പാണ്ഡെ കഴിഞ്ഞ മാസം പറഞ്ഞിരുന്നു. ടിബറ്റൻ മേഖലയിൽ കരുത്തുറപ്പിക്കുകയാണ് ചൈനയുടെ ലക്ഷ്യം.

അരുണാചൽ പ്രദേശിൽ ചൈന 101 ഓളം വീടുകളടങ്ങിയ 'പുതിയ ഗ്രാമം' നിർമ്മിച്ച വിവരം ഉപഗ്രഹ ചിത്രങ്ങളുടെ സഹായത്തോടെ ജനുവരിയിൽ തന്നെ ഒരു ദേശീയ മാധ്യമം റിപ്പോർട്ട് ചെയ്തിരുന്നു. അരുണാചൽ ജനതയുടെ മനസ്സിളക്കുക എന്ന തന്ത്രവും ഇതോടൊപ്പമുണ്ട്. അടിസ്ഥാന സൗകര്യ വികസനങ്ങളിലൂടെ അവർ ഉദ്ദേശിക്കുന്നത് ഇതു തന്നെയാണ്. ഇന്ത്യൻ അതിർത്തിയിൽ 4.5 കിലോമീറ്റർ ഉള്ളിലായാണ് ചൈനയുടെ നിർമ്മാണമെന്നാണു റിപ്പോർട്ട്. അപ്പർ സുബാൻസിരി ജില്ലയിൽ സാരി ചു നദീതീരത്താണ് ചൈന ഗ്രാമമുണ്ടാക്കിയതെന്നാണു സാറ്റലൈറ്റ് ചിത്രങ്ങളിൽനിന്നു വ്യക്തമാകുന്നത്.

2020ൽ ആകാം ചൈന യഥാർഥ നിയന്ത്രണരേഖയുടെ കിഴക്കു വശത്ത് 100 വീടുകൾ നിർമ്മിച്ചതെന്ന് യുഎസ് റിപ്പോർട്ടിൽ പറയുന്നു. വർഷങ്ങളായി ഇന്ത്യയും ചൈനയും അവകാശമുന്നയിക്കുന്ന മേഖലയാണിത്. 2019 ഓഗസ്റ്റ് 26ന് പകർത്തിയ ഇതേ മേഖലയുടെ ഉപഗ്രഹ ചിത്രത്തിൽ യാതൊരു നിർമ്മാണ പ്രവൃത്തികളും ഉണ്ടായിരുന്നില്ല. എന്നാൽ പുതിയ ചിത്രത്തിൽ കെട്ടിടങ്ങളും മറ്റും വ്യക്തമായി കാണാൻ സാധിക്കും. മേഖലയിൽ വർഷങ്ങളായി ചൈനയ്ക്ക് ചെറിയ സൈനിക ഔട്ട്പോസ്റ്റ് ഉണ്ടായിരുന്നെങ്കിലും 2020ലാണ് കടന്നുകയറ്റം രൂക്ഷമായത്.

ലഡാക്ക് സംഭവത്തിന് ശേഷം ഇടക്കിടെ അരുണാചൽ പ്രദേശിൽ സംഘർഷങ്ങൾ പതിവാണ്. ഇന്ത്യൻ വിദേശകാര്യമന്ത്രാലയവും ഇക്കാര്യം തള്ളിക്കളഞ്ഞിട്ടില്ല. ഇന്ത്യയുമായി അതിർത്തി പങ്കിടുന്ന പ്രദേശങ്ങളിൽ ചൈന നിർമ്മാണ പ്രവർത്തനങ്ങൾ നടത്തുന്നതായി റിപ്പോർട്ടുണ്ട്. കുറച്ചു വർഷങ്ങളായി ചൈന ഇതു തുടരുന്നുണ്ടെന്നും വിദേശകാര്യ മന്ത്രാലയ വൃത്തങ്ങൾ പ്രതികരിച്ചു. അതിർത്തികളിൽ റോഡുകളും പാലങ്ങളും നിർമ്മിക്കുന്നത് കേന്ദ്രസർക്കാർ തുടരുകയാണെന്നും മന്ത്രാലയം വ്യക്തമാക്കി. അതിർത്തിയിലെ ഇന്ത്യയുടെ നിർമ്മാണങ്ങളും സൈനിക വിന്യാസവുമാണ് ഇരു രാജ്യങ്ങളും തമ്മിലുള്ള പ്രശ്നങ്ങൾക്കു കാരണമെന്ന് ചൈനീസ് വിദേശകാര്യ മന്ത്രാലയ വക്താവ് നേരത്തേ അറിയിച്ചിരുന്നു.

2020 നവംബറിൽ അരുണാചലിൽ നിന്നുള്ള ബിജെപി എംപി താപിർ ഗാവോ അപ്പർ സുബാൻസിരിയിലെ ചൈനീസ് നിർമ്മാണങ്ങളെക്കുറിച്ച് ലോക്സഭയിൽ ഉന്നയിച്ചിരുന്നു. ജില്ലയിൽ 60-70 കിലോമീറ്റർ വരെ ഉള്ളിലേക്ക് ചൈന കയറി വന്നിട്ടുണ്ടെന്നും വിശാലമായ റോഡ് നിർമ്മിച്ചിട്ടുണ്ടെന്നും അദ്ദേഹം ദേശീയ മാധ്യമത്തോടു പ്രതികരിച്ചു.

അതേസമയം ചൈനീസ് നീക്കത്തെ അതേ നാണയത്തിൽ പ്രതിരോധിക്കുകയാണ് ഇന്ത്യയും. തവാങ് സെക്ടറിൽ ഇന്ത്യ പ്രതിരോധം ശക്തിപ്പെടുത്തുകയും സൈനിക കേന്ദ്രങ്ങളിലേക്ക് കൂടുതൽ ആക്രമണ ഘടകങ്ങൾ ഉൾപ്പെടുത്തുകയും ചെയ്തിട്ടുണ്ട്. ആർഎഎൽപിയിൽ അടിസ്ഥാന സൗകര്യങ്ങളുടെ വൻ വികസനത്തോടൊപ്പം ചൈനീസ് പട്രോളിംഗിലും അടുത്തിടെ വലിയ വർദ്ധനവുണ്ടായിട്ടുണ്ട്. പ്രത്യേകിച്ച് അസഫില പ്രദേശത്താണ് പട്രോളിങ് കാര്യമായി നടക്കുന്നത്.

കിഴക്കും പടിഞ്ഞാറും കമെങ് ജില്ലകൾ ഉൾപ്പെടുന്ന കമെങ് പ്രദേശം ഒഴികെയുള്ള സംസ്ഥാനത്തിന്റെ ബാക്കി ഭാഗങ്ങളെയാണ് സൈന്യം ആർഎഎൽപി എന്ന് വിളിക്കുന്നത്. മേഖലയിൽ ഇന്ത്യയും അടിസ്ഥാന സൗകര്യങ്ങൾ മെച്ചപ്പെടുത്താനുള്ള തീവ്ര ശ്രമത്തിലാണ്. ചൈന ഇപ്പോൾ മേഖലയിലെ നിയന്ത്രണ രേഖയുടെ അടുത്തേക്ക് സൈനികരെ നീക്കുകയാണ്. ഇത് യഥാർത്ഥ നിയന്ത്രണ രേഖയിലേക്ക് മുഴുവൻ വ്യാപിക്കാൻ സാധ്യതയുണ്ടെന്നും ഉദ്യോഗസ്ഥർ അഭിപ്രായപ്പെടുന്നു.

റോഡുകൾക്ക് പുറമേ, തുരങ്കങ്ങളുടെ നിർമ്മാണം, താമസസ്ഥലങ്ങൾ, സൈനികർക്ക് പിന്തുണ നൽകാൻ മറ്റ് അനുബന്ധ സൗകര്യങ്ങൾളും വികസിപ്പിക്കുന്നത്. കഴിഞ്ഞ മാസങ്ങളിൽ സുബൻസിരി പ്രദേശത്തിന് എതിർവശത്ത് തുരങ്കങ്ങളുടെ നിർമ്മാണം റിപ്പോർട്ട് ചെയ്യപ്പെട്ടിട്ടുണ്ടെന്നാണ്, ഇന്റലിജൻസ് വിവരങ്ങൾ ഉദ്ധരിച്ച് ഉദ്യോഗസ്ഥർ പറയുന്നത്.

Stories you may Like

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

More News in this category+

MNM Recommends +

Go to TOP