Forex Rate:

1 usd = 76.25 inr 1 gbp = 94.16 inr 1 eur = 85.23 inr 1 aed = 20.76 inr 1 sar = 20.32 inr 1 kwd = 247.66 inr
Nov / 202027Friday

'ഉണരൂ, ലോകത്തിലെ ഏറ്റവും പ്രധാനപ്പെട്ട പ്രധാനമന്ത്രി വരുന്നൂ'; സന്ദർശനത്തിന് മുന്നോടിയായി ഇന്ത്യൻ പ്രധാനമന്ത്രിയെ പ്രശംസിച്ചു കൊണ്ട് ഇസ്രയേൽ പത്രം; നരേന്ദ്ര മോദിയെ ട്രംപിനേക്കാൾ പ്രാധാന്യത്തോടെ സ്വീകരിക്കണമെന്ന് ലേഖനം

'ഉണരൂ, ലോകത്തിലെ ഏറ്റവും പ്രധാനപ്പെട്ട പ്രധാനമന്ത്രി വരുന്നൂ'; സന്ദർശനത്തിന് മുന്നോടിയായി ഇന്ത്യൻ പ്രധാനമന്ത്രിയെ പ്രശംസിച്ചു കൊണ്ട് ഇസ്രയേൽ പത്രം; നരേന്ദ്ര മോദിയെ ട്രംപിനേക്കാൾ പ്രാധാന്യത്തോടെ സ്വീകരിക്കണമെന്ന് ലേഖനം

ജറുസലേം: പ്രധാനമന്ത്രി നരേന്ദ്ര മോദിയുടെ അമേരിക്കൻ സന്ദർശനം വിജയകരമായി പര്യവസാനിച്ചതിന് പിന്നാലെ ഇസ്രയേൽ സന്ദർശനത്തിന് ഒരുങ്ങുകയാണ് മോദി. മോദിയെ എതിരേൽക്കാൻ വേണ്ടി എല്ലാ ഒരുക്കങ്ങളും പൂർത്തിയാക്കി കഴിഞ്ഞു. ലോകത്തെ ഏറ്റവും ശക്തമായ ജനാധിപത്യ രാജ്യത്തിലെ പ്രധാനമന്ത്രി സന്ദർശിക്കാൻ എത്തുന്നതിനെ വളരെ പ്രാധാന്യത്തോടെയാണ് ഇസ്രയേൽ മാധ്യമങ്ങൾ കാണുന്നത്. ലോകത്തെ ഏറ്റവും പ്രധാനപ്പെട്ട പ്രധാനമന്ത്രി എന്നാണ് ഇസ്രയേൽ മോദിയെ വിശേഷിപ്പിച്ചിരിക്കുന്നത്.

ഇസ്രയേൽ പത്രമാണ് മോദിയെ പ്രശംസിസിച്ച് രംഗത്തെത്തിയത്. മോദിയുടെ ഇസ്രയേൽ സന്ദർശനത്തിന് മുന്നോടിയായി, പ്രമുഖ ബിസിനസ് പത്രമായ ദി മേക്കറിന്റെ ഹീബ്രൂ എഡിഷനിലെ എഡിറ്റ് പേജിലാണ് പ്രശംസ. ഇസ്രയേൽ സന്ദർശിക്കുന്ന ആദ്യ ഇന്ത്യൻ പ്രധാനമന്ത്രിയാണു നരേന്ദ്ര മോദി.

'ഉണരൂ, ലോകത്തിലെ ഏറ്റവും പ്രധാനപ്പെട്ട പ്രധാനമന്ത്രി വരുന്നൂ' എന്നാണു ലേഖനത്തിൽ മോദിയെ വിശേഷിപ്പിക്കുന്നത്. ഇന്ത്യൻ നയതന്ത്ര ബന്ധങ്ങളെക്കുറിച്ചും പ്രതീക്ഷകളെക്കുറിച്ചും ലേഖനത്തിൽ വിശദീകരിക്കുന്നു. യുഎസ് പ്രസിഡന്റ് ഡോണൾഡ് ട്രംപ് രാജ്യത്തെത്തിയത് വൻ പ്രതീക്ഷകളോടെയാണ്. എന്നാൽ അദ്ദേഹത്തിന്റെ സന്ദർശനം നിരാശപ്പെടുത്തി. രാജ്യം രൂപീകരിക്കപ്പെട്ട് ഏഴു പതിറ്റാണ്ടിനുശേഷം ആദ്യമെത്തുന്ന ഇന്ത്യൻ പ്രധാനമന്ത്രിയെ ട്രംപിനേക്കാൾ പ്രാധാന്യത്തോടെ സ്വീകരിക്കണമെന്നും ലേഖനം ആവശ്യപ്പെടുന്നു.

മറ്റ് ഇസ്രയേൽ മാധ്യമങ്ങളും മോദിയുടെ സന്ദർശനത്തെ പ്രാധാന്യത്തോടെയാണു കാണുന്നത്. ഇന്ത്യയുമായും മോദിയുമായും ബന്ധപ്പെട്ട വാർത്തകൾക്കു പ്രത്യേക പരിഗണനയും മാധ്യമങ്ങൾ നൽകുന്നുണ്ട്. ലോകത്തിലെ ഏറ്റവും വലിയ ജനാധിപത്യ രാജ്യത്തിന്റെ പ്രധാനമന്ത്രി ഇസ്രയേൽ സന്ദർശനത്തിന് എത്തുമ്പോൾ ഫലസ്തീൻ സന്ദർശിക്കുകയോ പ്രസിഡന്റ് മഹമൂദ് അബ്ബാസുമായി കൂടിക്കാഴ്ച നടത്തുകയോ ചെയ്യുന്നില്ലെന്നതു അഭിനന്ദനാർഹമാണെന്നും മാധ്യമങ്ങൾ അഭിപ്രായപ്പെട്ടു.

പ്രധാന മാധ്യമമായ ജറുസലേം പോസ്റ്റാകട്ടെ മോദിയുടെ സന്ദർശനം പ്രമാണിച്ച് പ്രത്യേക പേജ് തന്നെ ആരംഭിച്ചു. നേരത്തെ അന്താരാഷ്ട്ര യോഗദിനത്തിന് വൻ പ്രാധാന്യമാണ് ഇസ്രയേൽ മാധ്യമങ്ങൾ നൽകിയത്. രാഷ്ട്രം ഉണ്ടായി എഴുപത് വർഷങ്ങൾക്ക് ശേഷം ആദ്യമായാണ് ഒരു ഇന്ത്യൻ പ്രധാനമന്ത്രി ഇസ്രയേൽ സന്ദർശിക്കുന്നതെന്ന് ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു ചൂണ്ടിക്കാട്ടിയിരുന്നു. അടുത്തയാഴ്ച തന്റെ അടുത്ത സുഹൃത്ത് നരേന്ദ്ര മോദി എത്തുന്നുണ്ടെന്നും അത് ഇസ്രയേലിന് ചരിത്ര നിമിഷമാണെന്നും നെതന്യാഹു ട്വീറ്റ് ചെയ്തു.

ജൂലൈ നാലിനാണ് മോദി ഇസ്രയേൽ സന്ദർശിക്കുന്നത്. ജൂലൈ 5 ന് ടെൽ അവീവിൽ നടക്കുന്ന ചടങ്ങിൽ ഇന്ത്യൻ വംശജരായ ഇസ്രയേൽ പൗരന്മാരെ നരേന്ദ്ര മോദി അഭിസംബോധന ചെയ്യും. ഇരുരാജ്യങ്ങളും തമ്മിൽ കാൽ നൂറ്റാണ്ടായുള്ള ബന്ധം മോദി അനുസ്മരിക്കും. ഇസ്രയേലുമായി 40 മില്യൺ ഡോളറിന്റേതടക്കം വിവിധ കരാറുകളിലും മോദി ഒപ്പിടും. ഇസ്രയേൽ പ്രധാനമന്ത്രി നെതന്യാഹു ഒരുക്കുന്ന അത്താഴവിരുന്നിലും മോദി പങ്കെടുക്കും.

ഇന്ത്യാ ഇസ്രയേൽ നയതന്ത്രബന്ധം ആരംഭിച്ചതിന്റെ ഇരുപത്തിയഞ്ചാം വാർഷികത്തിന്റെ ഭാഗമായാണ് മോദിയുടെ ഇസ്രയേൽ സന്ദർശനം. നെതന്യാഹുവും മോദിയും തമ്മിൽ വിദേശത്ത് യുഎൻ വേദികളിൽ ഇതിനകം രണ്ടുതവണ കൂടിക്കാഴ്ച നടത്തിയിട്ടുണ്ട്. മാത്രമല്ല, ഫോണിൽ നിരന്തരം ചർച്ചകളും നടത്താറുള്ള കാര്യം നെതന്യാഹു അനുസ്മരിച്ചു. പ്രതിരോധ രംഗത്തെ ഇന്ത്യ- ഇസ്രയേൽ സഹകരണം അന്താരാഷ്ട്രരംഗത്ത് തന്നെ ഏറെ ചർച്ചചെയ്യപ്പെടുന്നതാണ്. മോദിയുടെ സന്ദർശനത്തിന്റെ ഭാഗമായി ഇരുരാജ്യങ്ങളും തമ്മിൽ കൂടുതൽ പ്രതിരോധ കരാറുകളിൽ ഒപ്പിടുമെന്ന് പ്രതീക്ഷിക്കപ്പെടുന്നു.

മോദിയുടെ സന്ദർശനത്തിന് മുന്നോടിയായി ഇതിനകം വിവിധ ഇന്ത്യൻ സംഘങ്ങൾ ഇസ്രയേലിൽ സന്ദർശനം നടത്തി ഇസ്രയേലി അധികൃതരുമായി ചർച്ചകൾ പൂർത്തിയാക്കിയിരുന്നു. ദേശീയ സുരക്ഷാ ഉപദേഷ്ടാവ് അജിത് ഡോവൽ, മുതിർന്ന സെക്രട്ടറിമാർ, കൃഷിവകുപ്പ് സഹമന്ത്രി എസ്എസ് അലുവാലിയ നേതൃത്വം നൽകിയ 11 അംഗ സംഘം എന്നിവരുടെ സന്ദർശനം ഇതിനകം പൂർത്തിയായിരുന്നു.

 

Stories you may Like

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

More News in this category+

MNM Recommends +

Go to TOP