Forex Rate:

1 usd = 76.25 inr 1 gbp = 94.16 inr 1 eur = 85.23 inr 1 aed = 20.76 inr 1 sar = 20.32 inr 1 kwd = 247.66 inr
Jan / 202116Saturday

ഷാജന്റെയും ജയശങ്കറിന്റെയും വാദഗതികളെ പരിശോധിക്കുന്നതിനു മുമ്പ് അടിസ്ഥാനപരമായി മുസ്ലിംകളുടെയും ക്രൈസ്തവരുടെയും മതപരവും രാഷ്ട്രീയവുമായ ഉദ്ദേശലക്ഷ്യങ്ങളെ മനസ്സിലാക്കണം; ക്രൈസ്തവ സഭകൾക്ക് ഔദ്യോഗികമായി ഒരു രാഷ്ട്രീയ നിലപാടില്ല എന്നതാണ് യാഥാർത്ഥ്യം; ക്രൈസ്തവർ ആരുടേയും രാഷ്ട്രീയ അടിമകളല്ല; മാത്യൂ ചെമ്പുകണ്ടത്തിൽ എഴുതുന്നു

ഷാജന്റെയും ജയശങ്കറിന്റെയും വാദഗതികളെ പരിശോധിക്കുന്നതിനു മുമ്പ് അടിസ്ഥാനപരമായി മുസ്ലിംകളുടെയും ക്രൈസ്തവരുടെയും മതപരവും രാഷ്ട്രീയവുമായ ഉദ്ദേശലക്ഷ്യങ്ങളെ മനസ്സിലാക്കണം; ക്രൈസ്തവ സഭകൾക്ക് ഔദ്യോഗികമായി ഒരു രാഷ്ട്രീയ നിലപാടില്ല എന്നതാണ് യാഥാർത്ഥ്യം; ക്രൈസ്തവർ ആരുടേയും രാഷ്ട്രീയ അടിമകളല്ല; മാത്യൂ ചെമ്പുകണ്ടത്തിൽ എഴുതുന്നു

മാത്യൂ ചെമ്പുകണ്ടത്തിൽ

കേരളത്തിലെ ഒരു പ്രമുഖ പത്രപ്രവർത്തകനാണ് 'മറുനാടൻ മലയാളി'യുടെ മാനേജിങ് എഡിറ്ററായ ഷാജൻ സ്‌കറിയ. അതുപോലെ, കേരളത്തിൽ ഇന്ന് ഏറെ അറിയപ്പെടുന്ന രാഷ്ട്രീയ നിരീക്ഷകനാണ് അഡ്വക്കറ്റ് ജയശങ്കർ. ഇവർ രണ്ടുപേരും ഏതാനും മണിക്കൂറുകളുടെ മാത്രം വ്യത്യാസത്തിൽ കേരളത്തിലെ മത, രാഷ്ട്രീയ ഇടങ്ങളിലെ പുത്തൻ രാഷ്ട്രീയ നീക്കങ്ങളെപ്പറ്റി തങ്ങളുടെ സ്വതന്ത്രമായ നിരീക്ഷണങ്ങൾ അവതരിപ്പിക്കുകയുണ്ടായി. ശ്രീ ഷാജൻ വ്യക്തമാക്കാൻ ശ്രമിക്കുന്നത് 'കേരളത്തിലെ ക്രിസ്ത്യാനികൾ താമരയോടടുക്കുന്നോ?' എന്ന ചോദ്യം ഉന്നയിച്ചുകൊണ്ട് അതിനുള്ള കുറെ കാരണങ്ങളാണ്. അഡ്വക്കറ്റ് ജയശങ്കർ തെളിയിക്കാൻ ശ്രമിക്കുന്നത് 'കേരളത്തിൽ വലിയ തോതിൽ മുസ്ലിം വിരോധമുണ്ട്; ക്രിസ്ത്യാനികൾക്കാണ് അത് കൂടുതൽ' എന്നാണ്. ഒടുവിൽ, ഷാജനും ജയശങ്കറും ഒരുപോലെ എത്തിച്ചേരുന്നത് 'കേരളത്തിലെ ക്രൈസ്തവർ മുസ്ലിം വിരോധികളാണ്' എന്ന നിഗമനത്തിലാണ്. മലയാളി ക്രൈസ്തവരെ സംബന്ധിച്ച് വളരെ ഗൗരവം നിറഞ്ഞ ഒരു ആരോപണം ഇവർ ഉന്നയിച്ചിരിക്കെ ഈ ആരോപണം വസ്തുനിഷ്ടമായി പരിശോധിക്കേണ്ടിയിരിക്കുന്നു.

വാസ്തവമായി മലയാളി ക്രൈസ്തവർ മുസ്ലിം വിരോധികളാണോ?
ഷാജന്റെയും ജയശങ്കറിന്റെയും വാദഗതികളെ പരിശോധിക്കുന്നതിനു മുമ്പ് അടിസ്ഥാനപരമായി മുസ്ലിംകളുടെയും ക്രൈസ്തവരുടെയും മതപരവും രാഷ്ട്രീയവുമായ ഉദ്ദേശലക്ഷ്യങ്ങളെ മനസ്സിലാക്കേണ്ടിയിരിക്കുന്നു.

ഇസ്ലാമതത്തിന് രണ്ട് ചിറകുകളുണ്ട് എന്നാണ് പറയപ്പെടുന്നത്. അതിലൊന്ന് മതപരമായ ചിറകും മറ്റത് രാഷ്ട്രീയപരമായ ചിറകും. ഈ രണ്ട് ചിറകുകളിൽ ഒന്നിനു മാത്രമായി ഒന്നും ചെയ്യാൻ കഴിയില്ല. ഫ്രഞ്ച് പ്രസിഡന്റ് ഇമ്മാനുവേൽ മാക്രോൺ ഏതാനും ദിവസം മുമ്പ് ഇതുമായി ബന്ധപ്പെട്ട ഒരു പരാമർശം നടത്തിയിരുന്നു. 'ഇസ്ലാമിന്റെ മതപരമായ വശം മാത്രമേ ഫ്രാൻസിൽ അനുവദിക്കുകയുള്ളൂ, പൊളിറ്റിക്കൽ ഇസ്ലാമിനെ ഇവിടെ അനുവദിക്കില്ല' എന്നായിരുന്നു ആ പരാമർശം. പൊളിറ്റിക്കൽ ഇസ്ലാമിന് പ്രവർത്തിക്കാൻ അവസരമില്ലെങ്കിൽ മതപരമായി മാത്രം പ്രവർത്തിച്ച് ഇസ്ലാമിനു അധികനാൾ പിടിച്ചു നിൽക്കാൻ കഴിയുകയില്ല എന്നതാണ് യാഥാർത്ഥ്യം.

ഇസ്ലാമിന്റെ മതപരമായ വശത്തെക്കുറിച്ച് പുറംലോകം അധികം അറിയാറില്ല. അത് ഏറിയപങ്കും മോസ്‌കിനുള്ളിലെ ആചാരങ്ങളും വിശ്വാസങ്ങളും മതപഠനവുമൊക്കെയായി ബന്ധപ്പെട്ടിരിക്കുന്നു. വല്ലപ്പോഴും ഈദ്ഗാഹുകളിൽ കൂട്ടമായി നമസ്‌കരിക്കുന്നതോ നബിദിനറാലികളോ പൊതുസ്ഥലത്തുള്ള മതപ്രസംഗങ്ങളോ പൊതു നോമ്പുതുറ ചടങ്ങുകളോ ഒഴിച്ച് മതാധിഷ്ഠിത ഇസ്ലാമിൽ എന്തു നടക്കുന്നു എന്ന കാര്യങ്ങൾ മറ്റേതൊരു മതത്തെയും പോലെ അധികമാരും അറിയാറില്ല.

ഇസ്ലാമിന്റെ മതപരമായ ലക്ഷ്യങ്ങൾ സാക്ഷാത്കരിക്കാനുള്ള മാർഗ്ഗമാണ് രാഷ്ട്രീയം. ഏതൊരു രാജ്യത്തും ഇസ്ലാം പ്രവർത്തിക്കുമ്പോൾ ആ രാജ്യത്തിലെ ജനങ്ങളെ മുഴുവൻ ഇസ്ലാമതത്തിനു കീഴിലേക്ക് കൊണ്ടുവരികയും രാഷ്ട്രീയാധികാരം കരസ്ഥമാക്കി, രാജ്യത്തെ സമ്പൂർണ്ണമായി മതത്തിന്റെ നിയമത്തിന് കീഴിലാക്കുകയുമാണ് അതിന്റെ ആത്യന്തികലക്ഷ്യം. ഈ ലക്ഷ്യസാക്ഷാത്കാരത്തിനായി മതം പല മാർഗ്ഗങ്ങൾ ഉപയോഗിക്കുന്നു; അതിൽ ഒരു മാർഗ്ഗമാണ് രാഷ്ട്രീയം.

ഇസ്ലാമിന്റെ രാഷ്ട്രീയമുഖം രാഷ്ട്രീയപാർട്ടികളുടെയും നേതാക്കളുടെയും രൂപത്തിൽ പുറംലോകത്ത് സുവ്യക്തമാണ്. മതം എന്ന നിലയിൽ മോസ്‌കിനുള്ളിൽ ആയിരിക്കുകയും രാഷ്ട്രീയപാർട്ടി എന്ന നിലയിൽ സമൂഹത്തിൽ വേരുകളാഴ്‌ത്തുകയും ചെയ്തുകൊണ്ട് മതത്തിന്റെ ലക്ഷ്യങ്ങളും ആഗ്രഹങ്ങളും സാധിച്ചെടുക്കാനുള്ള ഒരു ശക്തമായ ഉപകരണമായിട്ടാണ് ഇസ്ലാമിന്റെ രാഷ്ട്രീയം പ്രവർത്തിക്കുന്നത്.

ഇസ്ലാമിന്റെ മതപുരോഹിതന്മാരിൽ പലരും രാഷ്ട്രീയ നേതാക്കന്മാരുമാണ്. പാണക്കാട് തങ്ങന്മാരുടെ കുടുംബത്തിൽനിന്നുമുള്ള വ്യക്തിയായിരിക്കും ഇന്ത്യൻ യൂണിയൻ മുസ്ലിം ലീഗിന്റെ പരമോന്നത നേതാവ്. പാണക്കാട് കുടുംബാംഗങ്ങളെപ്പോലെ രാഷ്ട്രീയത്തിൽ ശക്തമായ സ്വാധീനമുള്ള കാന്തപുരം എ.പി. അബൂബക്കർ മുസ്ലിയാരേപ്പോലുള്ള നിരവധി പുരോഹിതന്മാർ അഖിലേന്ത്യാതലത്തിൽ തന്നെ ഇസ്ലാമിലുണ്ട്. മതം രാഷ്ട്രീയവുമായി ബന്ധപ്പെടുന്നത് ഈ നേതാക്കന്മാരിലൂടെ ആയിരിക്കും. അതിനാൽ, രാഷ്ട്രീയമായി മുസ്ലിം ലീഗിനെ വിമർശിക്കുന്നതും പരാമർശിക്കുന്നതും ഇസ്ലാം മതത്തോടുള്ള വിമർശനമായി ചിത്രീകരിക്കാൻ സാധ്യത വളരെയേറെയാണ്. ഇന്ത്യൻ യൂണിയൻ മുസ്ലിംലീഗിന്റെ നിലപാടിനെ മറ്റൊരു മതത്തിലെ പുരോഹിതൻ വിമർശിച്ചാൽ അത് ഇസ്ലാമതത്തോടുള്ള വിമർശനമായും ഒരു രാഷ്ട്രീയനേതാവ് വിമർശനം ഉന്നയിച്ചാൽ അത് മുസ്ലിം ലീഗ് എന്ന രാഷ്ട്രീയ പാർട്ടിയോടുള്ള വിമർശനവുമായി അവസരത്തിനൊത്ത് വ്യാഖ്യാനിക്കപ്പെടുന്നു. ഇസ്ലാമതവും ഇസ്ലാം രാഷ്ട്രീയവും തമ്മിലുള്ള അഭേദ്യമായ ബന്ധം പലപ്പോഴും ഇത്തരം പ്രശ്‌നങ്ങൾ സൃഷ്ടിക്കാറുമുണ്ട്.

ഇന്ത്യൻ മുസ്ലിം മതവിഭാഗത്തിന്റെ ബാഹ്യരൂപമാണ് ഇന്ത്യൻ യൂണിയൻ മുസ്ലിംലീഗ് എന്ന രാഷ്ട്രീയപാർട്ടി. മുസ്ലിം ലീഗിനോടൊപ്പം, ഐ.എൻ.എൽ, പി.ഡി.പി., വെൽഫയർപാർട്ടി, എസ്ഡിപിഐ എന്നിങ്ങനെ മറ്റേതാനും രാഷ്ട്രീയപാർട്ടികളും ഇന്ന് കേരളത്തിൽ സജീവമാണ്. കേരളത്തിലെ പ്രബല രാഷ്ട്രീയ സഖ്യങ്ങളായ എൽ.ഡി.എഫും യു.ഡി.എഫും ഒരുപോലെ മുസ്ലിം സമുദായത്തിലെ രാഷ്ട്രീയ പാർട്ടികളെ ഒപ്പംനിർത്തി അധികാരത്തിലേറാൻ എക്കാലത്തും ശ്രമിക്കുന്നുണ്ട്. കേരളത്തിലെ മുസ്ലിംകളെല്ലാം ഈ രണ്ട് രാഷ്ട്രീയ പാനലുകളുടെയും കൂടെയാണ് നിലകൊള്ളുന്നത്.

ക്രൈസ്തവ സഭകൾക്ക് ഔദ്യോഗികമായി ഒരു രാഷ്ട്രീയ നിലപാടില്ല എന്നതാണ് യാഥാർത്ഥ്യം. രാഷ്ട്രീയമായി വളർന്ന് വലുതായി രാജ്യത്തെ ക്രിസ്തുമതത്തിന്റെ കൈപ്പിടിയിൽ ഒതുക്കണമെന്ന ഒരു പൊളിറ്റിക്കൽ അജണ്ട ക്രൈസ്തവസഭകൾ ഒരു രാജ്യത്തും ഉയർത്തിയിട്ടുമില്ല. സഭാനേതാക്കന്മാർ പൊതുവേ രാഷ്ട്രീയത്തിൽ ഇടപെടുകയോ അഭിപ്രായം പറയുകയോ ചെയ്യാറില്ല. വിശ്വാസികൾക്ക് ഇടതുപക്ഷമോ വലതുപക്ഷമോ നിഷ്പക്ഷമോ ആയിരിക്കാനും ഇലക്ഷനുകളിൽ സ്വതന്ത്രമായ തീരുമാനങ്ങളെടുക്കാനുമുള്ള പൂർണ്ണസ്വാതന്ത്ര്യം സഭകൾ നൽകിയിട്ടുണ്ട്. ഏത് രാജ്യത്ത് ആയിരുന്നാലും ആ രാജ്യത്തെയും അവിടുത്തെ ഭരണാധികാരിയെയും അംഗീകരിക്കുകയും അവർക്ക് കീഴടങ്ങി രാജ്യത്തിന്റെ സമഗ്രമായ വികസനത്തിനും പുരോഗതിക്കും സമാധാനത്തിനും വേണ്ടി പ്രവർത്തിക്കുകയും ചെയ്യുക എന്നതാണ് ക്രൈസ്തവസഭകളുടെ രാഷ്ട്രീയം.

ക്രൈസ്തവസഭകളുടെ രാഷ്ട്രബോധം രൂപപ്പെട്ടത് മാനുഷികമായ ചില തിയറികളുടെ പിൻബലത്തിലല്ല. ദൈവവചനമായ വിശുദ്ധ ബൈബിൾ ക്രൈസ്തവ രാഷ്ട്രധർമ്മത്തെക്കുറിച്ച് പറയുന്നത് എന്തെന്ന് നോക്കുക:

'ഓരോരുത്തനും മേലധികാരികൾക്കു വിധേയനായിരിക്കട്ടെ. എന്തെന്നാൽ, ദൈവത്തിൽ നിന്നല്ലാതെ അധികാരമില്ല. നിലവിലിരിക്കുന്ന അധികാരങ്ങൾ ദൈവത്താൽ സ്ഥാപിതമാണ്. തന്മിത്തം, അധികാരത്തെ ധിക്കരിക്കുന്നവൻ ദൈവിക സംവിധാനത്തെയാണ് ധിക്കരിക്കുന്നത്. ധിക്കരിക്കുന്നവൻ തങ്ങൾക്കുതന്നെ ശിക്ഷാവിധി വരുത്തിവയ്ക്കും. സത്പ്രവൃത്തികൾ ചെയ്യുന്നവർക്കല്ല, ദുഷ്പ്രവൃത്തികൾ ചെയ്യുന്നവർക്കാണ് അധികാരികൾ ഭീഷണിയായിരിക്കുന്നത്. നിനക്ക് അധികാരിയെ ഭയപ്പെടാതെ കഴിയണമെന്നുണ്ടോ? എങ്കിൽ നന്മ ചെയ്യുക; നിനക്ക് അവനിൽനിന്നു ബഹുമതിയുണ്ടാകും. എന്തെന്നാൽ, അവൻ നിന്റെ നന്മയ്ക്കുവേണ്ടി ദൈവത്തിന്റെ ശുശ്രൂഷകനാണ്. എന്നാൽ, നീ തിന്മ പ്രവർത്തിക്കുന്നുവെങ്കിൽ പേടിക്കണം. അവൻ വാൾ ധരിച്ചിരിക്കുന്നതു വെറുതേയല്ല. തിന്മ ചെയ്യുന്നവനെതിരായി ദൈവത്തിന്റെ ക്രോധം നടപ്പാക്കുന്ന ദൈവശുശ്രൂഷകനാണവൻ. ആകയാൽ, ദൈവത്തിന്റെ ക്രോധം ഒഴിവാക്കാൻവേണ്ടി മാത്രമല്ല, മനഃസാക്ഷിയെ മാനിച്ചും നിങ്ങൾ വിധേയത്വം പാലിക്കുവിൻ. നിങ്ങൾ നികുതികൊടുക്കുന്നതും ഇതേ കാരണത്താൽത്തന്നെ. എന്തെന്നാൽ, അധികാരികൾ ഇക്കാര്യങ്ങളിൽ നിരന്തരം ശ്രദ്ധവയ്ക്കുന്ന ദൈവശുശ്രൂഷകരാണ്. ഓരോരുത്തർക്കും അവകാശപ്പെട്ടിരിക്കുന്നതു കൊടുക്കുവിൻ. നികുതി അവകാശപ്പെട്ടവനു നികുതി; ചുങ്കം അവകാശപ്പെട്ടവനു ചുങ്കം; ആദരം അർഹിക്കുന്നവന് ആദരം; ബഹുമാനം നൽകേണ്ടവനു ബഹുമാനം' (റോമ ലേഖനം 13:1-7)

ലോകത്തിൽ ഏതൊരു രാജ്യത്തും അവിടുത്തെ സർക്കാരും ഭരണാധികാരികളും ദൈവത്താൽ നിയോഗിതരാണ് എന്ന അടിസ്ഥാന വിശ്വാസമാണ് ക്രൈസ്തവസഭ ഉയർത്തിപ്പിടിക്കുന്നത്. ലോകചരിത്രത്തിൽ ഏറെ ക്രൂരമായ രീതിയിൽ ക്രൈസ്തവരോട് പെരുമാറിയിട്ടുള്ള നീറോ ക്ലോഡിയസ് ചക്രവർത്തി റോമിൽ ഭരണാധികാരിയായിരിക്കുമ്പോഴാണ് പൗലോസ് അപ്പൊസ്‌തൊലൻ പരിശുദ്ധാത്മ പ്രചോദിതനായി റോമാ സഭയ്ക്കള്ള കത്തിൽ ഇപ്രകാരം എഴുതിയത്. ഭരണാധികാരിയെയും രാഷ്ട്രത്തെയും ധിക്കരിക്കുന്നവൻ ദൈവികവ്യവസ്ഥിതിയോടാണ് മത്സരിക്കുന്നത് എന്ന തത്വമായിരുന്നു എക്കാലത്തും രാഷ്ട്രത്തോടും രാഷ്ട്രീയത്തോടുമുള്ള ബന്ധത്തിൽ ക്രൈസ്തവ സമൂഹം പിൻപറ്റിയത്.

ഈ വ്യവസ്ഥിതിക്ക് ഇന്ത്യയിലോ കേരളത്തിലോ മാറ്റം വന്നിട്ടില്ല എന്ന യാഥാർത്ഥ്യമാണ് പത്രപ്രവർത്തകരും രാഷ്ട്രീയനിരീക്ഷകരും ആദ്യമേ മനസ്സിലാക്കേണ്ടത്. കോൺസ്റ്റന്റൈൻ ഒന്നാമന്റെ ഉപദേശകനായിരുന്ന ക്രിസ്ത്യൻ അപ്പോളജിസ്റ്റ് ലാക്റ്റാന്റിയസ് (എഡി 250-325) മുതൽ ചരിത്രത്തിൽ അറിയപ്പെടുന്ന പ്രമുഖ ക്രൈസ്തവ നേതാക്കന്മാരെല്ലാം ഈ ബോധ്യത്തോടെ പ്രവർത്തിച്ചവരായിരുന്നു എന്നാണ് സഭാ ചരിത്രം സാക്ഷ്യപ്പെടുത്തുന്നത്. രാജാക്കന്മാരേയും രാജകുടുംബാംഗങ്ങളെയും ഉയർന്ന ഉദ്യോഗത്തിലേക്ക് പരിശീലിപ്പിക്കുവാനായി ലാക്റ്റാന്റിയസിന് അവസരം ലഭിച്ചപ്പോൾ എങ്ങനെ ജനങ്ങളെ ഭരിക്കണം എന്നല്ല അദ്ദേഹം പഠിപ്പിച്ചത്, എപ്രകാരം ദൈവത്തോടും സഹജീവികളോടുമുള്ള ഉത്തരവാദിത്വം നിറവേറ്റി രാജ്യധർമ്മത്തിൽ പങ്കാളികളാകാം എന്നായിരുന്നു അദ്ദേഹം ഉത്‌ബോധിപ്പിച്ചത്. ദൈവത്തോടും മനുഷ്യരോടുമുള്ള ബന്ധത്തെ സംയോജിപ്പിച്ചുകൊണ്ട് ലോകത്തിന് പ്രകാശമാവുക എന്ന രാഷ്ട്രീയമാണ് ക്രൈസ്തവസഭയുടെ രാഷ്ട്രീയത്തിന്റെ നിസ്തുല്യത.

രാജകൊട്ടാരത്തിനുള്ളിലുള്ള വിദ്യാഭ്യാസമ്പന്നരായ രാജകുടുംബാംഗങ്ങളിലൂടെ മാത്രമേ ഏകാധിപത്യ പ്രവണതകളിൽ നിന്നും അധികാരവികേന്ദ്രീകരണ സമ്പ്രദായത്തിലേക്ക് രാഷ്ട്രം നീങ്ങുകയുള്ളൂ എന്നായിരുന്നു ആദിമക്രൈസ്തവസഭാ നേതൃത്വങ്ങൾ മനസ്സിലാക്കിയത്. ജനങ്ങളെ സ്വാതന്ത്ര്യം, വിപ്ലവം, മനുഷ്യാവകാശം എന്നീ വിഷയങ്ങളിൽ, ബോധവാന്മാരാക്കുകയും പിന്നീട് അവരെ സംഘടിപ്പിച്ച് സ്റ്റേറ്റിനെതിരേ പടനയിച്ച് വ്യവസ്ഥിതികളെ തകിടംമറിച്ച് അധികാരം കൈക്കലാക്കി ക്രൈസ്തവരാജ്യം സ്ഥാപിക്കുക എന്ന ലക്ഷ്യത്തോടെ പ്രവർത്തിക്കുന്ന ശൈലി ഒരുകാലത്തും ക്രൈസ്തവ സഭകൾ പിൻപറ്റിയിരുന്നില്ല. സകല മനുഷ്യനും ദൈവസൃഷ്ടിയാണെന്ന യാഥാർത്ഥ്യം പകർന്നു നൽകി മനുഷ്യനെ അടിസ്ഥാനപരമായ രൂപാന്തരത്തിലേക്ക് നയിക്കുക എന്നതായിരുന്നു ക്രൈസ്തവസഭയുടെ രാഷ്ട്രീയ അജണ്ട. ആയതിനാൽ, ഏതെങ്കിലും ഒരു പ്രത്യേക രാഷ്ട്രീയ പാർട്ടിയോടോ നേതാവിനോടോ പ്രത്യയശാസ്ത്രത്തോടെ കൂറോ കൂറില്ലായമയോ പ്രകടിപ്പിച്ചുകൊണ്ട് സ്റ്റേറ്റിൽ കലാപമുണ്ടാക്കി അധികാരം പിടിച്ചെടുക്കുന്ന 'പൊളിറ്റിക്കൽ ക്രിസ്റ്റ്യാനിറ്റി' എന്ന അജണ്ട ക്രൈസ്തവപ്രബോധനങ്ങളുടെ ഭാഗമല്ല.

വിശുദ്ധ ബൈബിൾ പ്രതിപാദ്യങ്ങളോടു വിധേയപ്പെട്ടുനിൽക്കുമ്പോൾ തന്നെ ഓരോ വിശ്വാസിക്കും വ്യക്തിപരമായ രാഷ്ട്രീയനിലപാടുകൾ സ്വീകരിക്കുവാനുള്ള സ്വതന്ത്ര്യമുണ്ട്. മനുഷ്യവംശത്തിന് ദൈവം നൽകിയ മഹത്തായ ഒരു പദവിയാണ് സ്വതന്ത്രമായി ചിന്തിക്കാനും തീരുമാനമെടുക്കുവാനുള്ള കഴിവ്. സഭ അതിനെ മാനിക്കുകുയും പ്രോത്സാഹിപ്പിക്കുകയും ചെയ്യുന്ന നിലപാടാണ് എക്കാലത്തും സ്വീകരിച്ചിരിക്കുന്നത്. ക്രൈസ്തവരെല്ലാവരും സംഘടിതമായി ഒരേ രാഷ്ട്രീയനിലപാട് സ്വീകരിക്കണമെന്ന വിദൂരമായ ചിന്താഗതിപോലും ക്രൈസ്തവസഭകൾക്കില്ല. അതിനാൽ അതത് കാലത്തെ രാഷ്ട്രീയ സാഹചര്യങ്ങളെ അപഗ്രഥിച്ച് ക്രൈസ്തവൻ, കോൺഗ്രസോ മാർക്‌സിസ്റ്റോ ബിജെപിയോ ആയി മാറുകയോ അവരെ പിന്തുണയ്ക്കുകയോ ചെയ്‌തേക്കാം. എല്ലാ സന്ദർഭങ്ങളിലും അടിസ്ഥാനപരമായി ക്രൈസ്തവൻ രാജ്യത്തിന്റെ വികസനത്തിനും ഐശ്യര്യത്തിനും സമാധാനത്തിനും ആയിരിക്കും പ്രാധാന്യം നൽകുക. ഇവിടെ ജാതിയോ മതമോ ഒരു ഘടകമേ ആയിക്കില്ല.

ക്രൈസ്തവർക്ക് മുസ്ലിം വിരോധമുണ്ടെന്നു പറയുകവഴി വളരെ തെറ്റിദ്ധാരണ പരത്തുന്ന ഒരു പ്രസ്താവനയാണ് ശ്രീ ഷാജൻ സ്‌കറിയായും അഡ്വക്കറ്റ് ജയശങ്കറും നടത്തിയിരിക്കുന്നത്. കേരളത്തിലെ ക്രൈസ്തവസമൂഹത്തിന് ഒരു പ്രത്യേക മതത്തോടും ശത്രുത ഇല്ല എന്ന യാഥാർത്ഥ്യം നിങ്ങൾ തിരിച്ചറിയണം. കേരളത്തിലെ ക്രൈസ്തവർ മുസ്ലിം വിരോധികളാണ് എന്ന വസ്തുത ആദ്യമായി തള്ളിക്കളയാൻ പോകുന്നത് കേരളത്തിലെ സാധാരണക്കാരായ മുസ്ലിം സമൂഹം തന്നെയായിരിക്കും. ജാതിയും മതവും വേർതിരിവുകളും ഒട്ടുമേൽക്കാതെ, ഹിന്ദുവും ക്രൈസ്തവനും മുസ്ലീമും ഏകോദരസഹോദരങ്ങളെപ്പോലെ കഴിയുന്ന നൂറുകണക്കിന് ഗ്രാമങ്ങൾ മലബാറിലുണ്ട്. ഇവരിലെല്ലാം വിഭാഗീയത സൃഷ്ടിക്കാനേ നിങ്ങളുടെ പരാമർശങ്ങൾ ഉപകരിക്കൂവെന്ന് നിങ്ങൾ തിരിച്ചറിയണം.

സകലമനുഷ്യനും ദൈവത്തിന്റെ സൃഷ്ടിയാണെന്ന തിരിച്ചറിവാണ് അടിസ്ഥാന ക്രൈസ്തവ വിശ്വാസത്തിന് ആധാരം. കേരളത്തിൽ അക്രൈസ്തവനോട് ജാതീയമായി വേർതിരിവ് കാണിക്കുന്ന ഒരു ക്രൈസ്തവസഭയുമില്ല. എന്നാൽ ആനുകാലിക രാഷ്ട്രീയ സംഭവങ്ങളെ അപഗ്രഥിക്കുമ്പോൾ ക്രൈസ്തവരെ സമൂഹത്തിൽ ഒറ്റപ്പെടുത്തുവാൻ ചില സംഘടിത നീക്കങ്ങൾ നടക്കുന്നു എന്ന് ക്രൈസ്തവപക്ഷത്തിന് ആശങ്കയുണ്ട് എന്നത് ഇവിടെ വിസ്മരിക്കുന്നില്ല. ഈ ധാരണ എല്ലാ നിലയിലും ശരിയെന്ന് വരുത്തിത്തീർക്കുന്ന സംഭവ ആളാണ് കഴിഞ്ഞ നാളുകളിൽ ഉണ്ടായിക്കൊണ്ടിരിക്കുന്നത്.
ഹാഗിയാ സോഫിയാ ദേവാലയം മുസ്ലിം മോസ്‌ക് ആക്കുവാനുള്ള തുർക്കിയുടെ നീക്കത്തിൽ മലയാളി ക്രൈസ്തവർ തങ്ങളുടെ ആകുലതയും ആ ദേവാലയത്തിന്റെ ചരിത്രപരതയുമായി ബന്ധപ്പെട്ട വിവരങ്ങളും സോഷ്യൽമീഡിയയിൽ ശക്തമായി അവതരിപ്പിച്ചു. ഇതിനോട് സഹതാപം പ്രകടിപ്പിക്കുന്നതിന് പകരം ഇന്ത്യയിലെ ഏറ്റവും വലിയ ഇസ്ലാമിക രാഷ്ട്രീയ പാർട്ടിയായ ഇന്ത്യൻ യൂണിയൻ മുസ്ലിം ലീഗും അതിന്റെ പുരോഹിത, രാഷ്ട്രീയ നേതൃത്വവും അവരുടെ സ്വന്തം ദിനപത്രവും ക്രൈസ്തവരുടെ വേദന ഇരട്ടിപ്പിക്കുന്ന നിലപാടാണ് സ്വീകരിച്ചത്. പിന്നീടുള്ള ദിവസങ്ങളിൽ ആ നിലപാടുകളെ കൂടുതൽ ന്യായീകരിക്കാനാണ് ലീഗ് നേതൃത്വം ശ്രമിച്ചത്. ഇത് ക്രൈസ്തവസമൂഹത്തെ ഏറെ ആശങ്കാകുലരാക്കി എന്നത് ഒരു യാഥാർത്ഥ്യമാണ്. അതിന്റെ പ്രതിഫലനങ്ങൾ കമന്റുകളായും ലേഖനങ്ങളായും സോഷ്യൽ മീഡിയയിൽ നിറഞ്ഞുനിന്നു. കേരള മതേതര സമൂഹത്തിൽ പുലർത്തിപ്പോരുന്ന സാഹോദര്യബോധ്യം ഉൾക്കൊള്ളാതെ ഹാഗിയാ സോഫിയാ വിഷയത്തിൽ മുസ്ലിം ലീഗ് നേതൃത്വം സ്വീകരിച്ച നിലപാട് തികച്ചും വർഗീയമായിരുന്നു എന്നാണ് ക്രൈസ്തവർ മനസിലാക്കുന്നത്.

ഏതാണ്ട് രണ്ടു പതിറ്റാണ്ടുകളായി ലൗജിഹാദ് വിഷയം കേരളക്രൈസ്തവ സമൂഹത്തെ നിരന്തരം അസ്വസ്ഥമാക്കിക്കൊണ്ടിരിക്കുന്നു. ആയിരക്കണക്കിന് പെൺകുട്ടികളെ മതംമാറ്റുക എന്ന ബോധപൂർവ്വമായ ലക്ഷ്യത്തോടെ പ്രണയിക്കുകയും വിവാഹം കഴിക്കുകയും സിറിയ, അഫ്ഗാനിസ്ഥാൻ എന്നിവിടങ്ങളിൽ തീവ്രവാദികളായി അയയ്ക്കുകയും ചെയ്തു എന്നത് പകൽപോലെ വെളിവായ വിഷയമാണ്. എന്നാൽ, മുസ്ലിം സമുദായവും മാറിമാറിവരുന്ന കേരള സർക്കാരുകളും ഇത് കണ്ടില്ലെന്നു നടിക്കുകയും ഈ വിഷയം തികച്ചും അവഗണിക്കുകയും ചെയ്യുന്നു. ഇന്ത്യയിലെ മറ്റ് സംസ്ഥാനങ്ങൾ ഇതിനെതിരേ ശക്തമായ നിയമങ്ങൾ നിർമ്മിക്കുമ്പോൾ കേരളസർക്കാർ ഈ വിഷയത്തോട് മുഖംതിരിച്ചു നിൽക്കുകയും 'കേരളത്തിൽ ലൗ ജിഹാദ് ഇല്ല' എന്ന് സ്ഥാപിക്കാൻ ശ്രമിക്കുകയും ചെയ്യുന്നു. കൂടാതെ, ചില തീവ്രസ്വഭാവമുള്ള മുസ്ലിം സംഘടനകൾ ക്രൈസ്തവ വിശ്വാസത്തെയും യേശുക്രിസ്തുവിനെയും വിശുദ്ധ ബൈബിളിനെയും പരസ്യമായി കവലകൾ തോറും ആക്ഷേപിക്കുകയും വെല്ലുവിളിക്കുകയും ചെയ്യുന്നു. ക്രൈസ്തവ സഭയുടെ ആഭ്യന്തര വിഷയങ്ങളെ മുസ്‌ളിം സംഘടനകൾ ഏറ്റെടുക്കുകയും ക്രൈസ്തവ സഭകളെയും പുരോഹിതരെയും കന്യാസ്ത്രീകളെയും അപകീർത്തിപ്പെടുത്തുവാൻ ശ്രമിക്കുകയും ചെയ്യുന്നു.
സംവരണവിഷയത്തിൽ ക്രൈസ്തവർക്ക് എതിരേ നിൽക്കുക എന്നതായിരുന്നു മുസ്ലിംലീഗ് സ്വീകരിച്ച നിലപാട്. തങ്ങൾക്ക് യാതൊന്നും നഷ്ടപ്പെടുന്നില്ലെങ്കിൽകൂടി ക്രൈസ്തവർക്ക് ആനുകൂല്യങ്ങൾ ലഭ്യമാകരുത് എന്ന മുസ്ലിംലീഗ് നിലപാടിൽ അസ്വസ്ഥരാകാത്ത ക്രൈസ്തവർ കേരളത്തിൽ ഇല്ല. വാസ്തവത്തിൽ ഈ വിഷയങ്ങളെല്ലാം ഒരുമിച്ചുവച്ച് രാഷ്ട്രീയമായി മാറിച്ചിന്തിക്കാൻ ക്രൈസ്തവസമൂഹം നിർബന്ധിതരാകുന്നു എങ്കിൽ അത് അടിസ്ഥാനരഹിതമായ മുസ്‌ളിം വിദ്വേഷംകൊണ്ടല്ല എന്ന യാഥാർത്ഥും ശ്രീ ഷാജനും ജയശങ്കറും മനസ്സിലാക്കണം.

ക്രൈസ്തവർ ബിജെപിയിലേക്ക് ഒഴുകുന്നു എന്നു വരുത്തിത്തീർക്കേണ്ടത് കേരളത്തിൽ മുസ്ലിം ലീഗിനും ഇതര മുസ്ലിം സംഘടനകൾക്കും തങ്ങളുടെ വളർച്ചയ്ക്ക് വളരെ ആവശ്യമാണ്. ക്രൈസ്തവർ ബിജെപിയോടു ചേർന്ന് ഭരണം പിടിച്ചടക്കും എന്ന പ്രചാരണം വാസ്തവത്തിൽ ലക്ഷ്യം വയ്ക്കുന്നത് മുസ്ലിംകളുടെ രാഷ്ട്രീയ ഏകീകരണമാണ്. ഇപ്രകാരമുള്ള മതാധിഷ്ഠിത ഏകീകരണം കേരളത്തിന്റെ മതേതരസ്വഭാവത്തെ തകർക്കും എന്നതിന് രണ്ടുപക്ഷമില്ല. ഈ ദുരന്തത്തിനാണ് ഇടതനും വലതനും മുസ്‌ളിം പ്രീണനത്തിലൂടെ ഒരുപോലെ ചുക്കാൻ പിടിക്കുന്നത്.
ഏതൊരു രാഷ്ട്രീയപാർട്ടിയെയും പോലെ ബിജെപിയും ഇന്ത്യയിൽ നിയമപരമായി പ്രവർത്തിക്കുന്ന ഒരു രാഷ്ട്രീയ പാർട്ടിയാണ്. ക്രൈസ്തവ സഭയ്‌ക്കെതിരേ പരസ്യമായി അങ്കംകുറിച്ചു പോരാടിയ കമ്യൂണിസ്റ്റുകളോടു സഹകരിക്കാമെങ്കിൽ ബിജെപി എന്ന രാഷ്ട്രീയ പാർട്ടിയോടു സഹകരിക്കുന്നതിൽ ക്രൈസ്തവർ
യാതൊരുവിധ ദൈവശാസ്ത്ര പ്രതിസന്ധിയും നേരിടുന്നില്ല.

തങ്ങൾക്ക് ഇഷ്ടമുള്ള രാഷ്ട്രീയ നിലപാടുകൾ സാഹചര്യങ്ങൾക്കനുസരിച്ച് കൈക്കൊള്ളുന്നതിന് ഇന്ത്യയിലെ ഏതൊരു പൗരനെയും പോലെ ക്രൈസ്തവനും അവകാശമുണ്ട്. ഈ അവകാശത്തിന്റെ അടിസ്ഥാനത്തിൽ നിലവിലെ രാഷ്ട്രീയ സാമൂഹിക സാഹചര്യങ്ങളുടെ അടിസ്ഥാനത്തിൽ ക്രൈസ്തവർ ബി.ജെപിയിലേക്ക് പോകുന്നത് അവരുടെ സ്വാതന്ത്ര്യമാണ്. ഇത് മുസ്ലിം വിരോധത്തിന്റെ അടിസ്ഥാനത്തിലല്ല. ഇന്നത്തെ രാഷ്ട്രീയ സാഹചര്യം അവരെ അതിനു പ്രേരിപ്പിക്കുന്നുവെങ്കിൽ അതിൽ ആരും ആശങ്കപ്പെടേണ്ട കാര്യവുമില്ല. ക്രൈസ്തവർ ഒരു രാഷ്ട്രീയ പാർട്ടിയുടെയും അടിമയല്ല. ആരുടെയും തിട്ടൂരം ഇവിടെ ആവശ്യവുമില്ല. ഈ യാഥാർത്ഥ്യം കേരളത്തിലെ എല്ലാ രാഷ്ട്രീയനേതാക്കന്മാരും പ്രവർത്തകരും മാധ്യമപ്രവർത്തകരും ബുദ്ധിജീവികളും എല്ലാം മനസ്സിലാക്കുന്നത് നല്ലതാണ്.
കേരളത്തിൽ ക്രൈസ്തവ വിശ്വാസികൾക്ക് ഉണ്ടായിരിക്കുന്ന ആശങ്കകൾ ദുരീകരിക്കാനുള്ള ഉത്തരവാദിത്വം മുസ്ലിം സമുദായത്തിനും ഒരു രാഷ്ട്രീയപാർട്ടി എന്ന നിലയിൽ ഇന്ത്യൻ യൂണിയൻ മുസ്ലിം ലീഗിനുമുണ്ട്. പരിഷ്‌കൃതസമൂഹങ്ങളുടെ മുഖമുദ്രയായ സത്യത്തിനും നീതിക്കും സമാധാനത്തിനും സമത്വത്തനും സാഹോദര്യത്തിനും വേണ്ടി എക്കാലത്തും എവിടെയും പ്രതിജ്ഞാബദ്ധരായി നിൽക്കുന്ന ക്രൈസ്തവസമൂഹം, അതിന് വിഘാതമായി സംഭവിക്കുന്ന ഒന്നിനോടും കൈയുംകെട്ടി നോക്കിനിൽക്കില്ല എന്ന സന്ദേശമാണ് ഇന്ന് കേരള ക്രൈസ്തവ സമൂഹം ഉയർത്തുന്നത്. അതിന്റെ ഭാഗമായി ശക്തമായ തീരുമാനങ്ങളിലേക്ക് ക്രൈസ്തവസമൂഹം സംയുക്തമായി നീങ്ങുന്നുവെങ്കിൽ അതിന് നിദാനമായി ക്രൈസ്തവർ ഉയർത്തുന്ന വിഷയങ്ങളെ സുബോധത്തോടെയും മതേതരമൂല്യങ്ങൾ ഉൾക്കൊണ്ടും നിഷ്പക്ഷമായും കൈകാര്യം ചെയ്യുവാൻ ഇടത്, വലത് രാഷ്ട്രീയനേതൃത്വത്തിനും ഇന്ത്യൻ യൂണിയൻ മുസ്ലിം ലീഗിനും ഉത്തരവാദിത്വമുണ്ട്.

(ലേഖകൻ ഫേസ്‌ബുക്കിൽ കുറിച്ചതാണ് ഇത്)

Stories you may Like

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

More News in this category+

MNM Recommends +

Go to TOP