Forex Rate:

1 usd = 76.25 inr 1 gbp = 94.16 inr 1 eur = 85.23 inr 1 aed = 20.76 inr 1 sar = 20.32 inr 1 kwd = 247.66 inr
Mar / 202429Friday

അപ്രതീക്ഷിതമായ നീക്കങ്ങൾക്കൊടുവിൽ ആദ്യ വോട്ടെടുപ്പിൽ വിജയിച്ച് ബോറിസ് ജോൺസൻ; മൂന്ന് ദിവസത്തിനകം ബിൽ പാസാക്കണമെന്ന നിർദ്ദേശം ഹൗസ് ഓഫ് കോമൺസ് തള്ളി; കാലാവധി നീട്ടി നൽകാൻ പച്ചക്കൊടി കാട്ടി യൂറോപ്യൻ യൂണിയനും; ഒടുവിൽ ബ്രിട്ടനും ഇയുവും കരാറോടെ പിരിയുമെന്നുറപ്പായി; ബോറിസ് തെരഞ്ഞെടുപ്പിനൊരുങ്ങുന്നുവെന്നും സൂചന

അപ്രതീക്ഷിതമായ നീക്കങ്ങൾക്കൊടുവിൽ ആദ്യ വോട്ടെടുപ്പിൽ വിജയിച്ച് ബോറിസ് ജോൺസൻ; മൂന്ന് ദിവസത്തിനകം ബിൽ പാസാക്കണമെന്ന നിർദ്ദേശം ഹൗസ് ഓഫ് കോമൺസ് തള്ളി; കാലാവധി നീട്ടി നൽകാൻ പച്ചക്കൊടി കാട്ടി യൂറോപ്യൻ യൂണിയനും; ഒടുവിൽ ബ്രിട്ടനും ഇയുവും കരാറോടെ പിരിയുമെന്നുറപ്പായി; ബോറിസ് തെരഞ്ഞെടുപ്പിനൊരുങ്ങുന്നുവെന്നും സൂചന

മറുനാടൻ ഡെസ്‌ക്‌

ലണ്ടൻ: ബ്രെക്സിറ്റിനായി ബ്രിട്ടീഷ് പ്രധാനമന്ത്രി ബോറിസ് ജോൺസൻ തയ്യാറാക്കി സമർപ്പിച്ച പുതിയ ബ്രെക്സിറ്റ് ഡീലിന് അവസാനം ഹൗസ് ഓഫ് കോമൺസ് അംഗീകാരം നൽകി. ഇന്നലെ നടന്ന ആദ്യ വോട്ടെടുപ്പിലാണ് ബോറിസിന് അത്ഭുതകരമായ വിജയം ലഭിച്ചിരിക്കുന്നത്. എന്നാൽ മൂന്ന് ദിവസത്തിനകം ബിൽ പാസാക്കണമെന്ന ബോറിസിന്റെ നിർദ്ദേശം ഹൗസ് ഓഫ് കോമൺസ് തള്ളുകയും ചെയ്തിട്ടുണ്ട്. ബ്രെക്സിറ്റ് കാലാവധി നീട്ടാൻ പച്ചക്കൊടി കാട്ടി യൂറോപ്യൻ യൂണിയനും രംഗത്തെത്തിയിട്ടുണ്ട്. ചുരുക്കിപ്പറഞ്ഞാൽ ഒടുവിൽ ആശങ്കകൾക്ക് വിരാമമിട്ട് കൊണ്ട് യുകെയും യൂറോപ്യൻ യൂണിയനും കരാറോടെ പിരിയുമെന്നുറപ്പായിരിക്കുകയാണ്.അതിനിടെ ബോറിസ് പാർലിമെന്റ് പിരിച്ച് വിട്ട് തെരഞ്ഞെടുപ്പിനൊരുങ്ങുന്നുവെന്ന സൂചനയും ശക്തമാണ്.

299ന് എതിരെ 329 വോട്ടുകൾ ചെയ്താണ് ഹൗസ് ഓഫ് കോമൺസ് തത്വത്തിൽ ബോറിസിന്റെ ഡീൽ അംഗീകരിച്ചിരിക്കുന്നത്. അതിന് മുമ്പ് മണിക്കൂറുകളോളം നീണ്ട സമ്മർദം നിറഞ്ഞ ചർച്ചകൾ ഈ ഡീലിനെ മുൻനിർത്തി നടന്നിരുന്നു. എന്നാൽ എന്ത് തന്നെ സംഭവിച്ചാലും തന്റെ ഈ ഡീലിലൂടെ ഒക്ടോബർ 31നകം ബ്രെക്സിറ്റ് നടപ്പിലാക്കണമെന്ന ബോറിസിന്റെ കടുംപിടിത്തത്തിന് കൂട്ട് നിൽക്കാൻ ഹൗസ് ഓഫ് കോമൺസിലെ ഭൂരിഭാഗം പേരും തയ്യാറായതുമില്ല.അതായത് ഈ മാസം ഒടുവിൽ തന്നെ യൂണിയനോട് വിട പറയണമെന്ന ബോറിസിന്റെ രണ്ടും കൽപ്പിച്ചുള്ള നിലപാട് 308ന് എതിരെ 322 വോട്ടുകൾക്കാണ് പരാജയപ്പെട്ടിരിക്കുന്നത്.

ഇത്രയും തിരക്ക് പിടിച്ച് ഒക്ടോബർ 31ന് തന്നെ ബ്രെക്സിറ്റ് നടപ്പിലാക്കുന്നതിനെതിരെ മുൻ കൺസർവേറ്റീവ് റിബലുകൾ ലേബർ, ലിബറൽ ഡെമോക്രാറ്റുകൾ, എസ്എൻപി എന്നിവർക്കൊപ്പം നിലകൊണ്ടതോടെ ഈ വിഷയത്തിൽ ബോറിസിന്റെ പിടിവാശി എട്ട് നിലയിൽ പൊട്ടുകയായിരുന്നു.തന്റെ ഡീലിനെ കോമൺസ് അംഗീകരിച്ചതിൽ കടുത്ത സന്തോഷമാണ് ബോറിസ് രേഖപ്പെടുത്തിയിരിക്കുന്നത്. എന്നാൽ ബ്രെക്സിറ്റുമായി ബന്ധപ്പെട്ട നിയമം സ്തംഭിച്ചിരിക്കുന്നുവെന്ന് അദ്ദേഹം ഓർമിപ്പിക്കുകയും ചെയ്യുന്നു. ചുരുക്കിപ്പറഞ്ഞാൽ ബ്രെക്സിറ്റുമായി ബന്ധപ്പെട്ട് ഇനിയുള്ള തീരുമാനമെടുക്കേണ്ടത് യൂറോപ്യൻ യൂണിയനാണെന്ന നില വീണ്ടും സംജാതമായിരിക്കുകയാണ്.

ബ്രെക്സിറ്റ് വിഷയത്തിൽ യുകെയിൽ നിന്നുമെത്തിയിരിക്കുന്ന ഈ സമ്മിശ്രപ്രതികരണത്തെ ബ്രസൽസ് ഏത് വിധത്തിലാണ് കൈകാര്യം ചെയ്യുക എന്നാണ് ഇപ്പോൾ ഏവരും ആകാംക്ഷയോടെ കാത്തിരിക്കുന്നത്. എന്നാൽ ബ്രെക്സിറ്റ് വൈകിപ്പിക്കണമെന്ന യാതൊരു നിർദേശവും താൻ യൂണിയന് മുന്നിൽ വയ്ക്കില്ലെന്നും ബ്രെക്സിറ്റ് ഒക്ടോബർ 31ന് തന്നെ നടക്കണമെന്നുമാണ് ബോറിസ് ഇപ്പോഴും പറയുന്നത്.പക്ഷേ ബ്രെക്സിറ്റ് വൈകിപ്പിക്കണമെന്ന നിർദ്ദേശം ബ്രിട്ടീഷ് എംപിമാരിൽ നിന്നുണ്ടായതോടെ യൂറോപ്യൻ യൂണിയൻ ഇതിന് അനുവാദമേകുമെന്നും അത് അനുസരിക്കാൻ ബോറിസ് ബാധ്യസ്ഥനാവുകയും ചെയ്യും.

അതിനാൽ ബ്രെക്സിറ്റ് എത്ര കാലത്തേക്ക് വൈകിപ്പിക്കുന്നതിനാണ് യൂണിയൻ അനുവാദം നൽകുകയെന്ന കാര്യമറിയാനാണ് ബോറിസ് ആശങ്കയോടെ കാത്തിരിക്കുന്നത്. ഈ കാലവിളംബം കഴിയുന്നതും വളരെ ചുരുക്കണമെന്ന അഭ്യർത്ഥന ബോറിസ് ബ്രസൽസിന് മുന്നിൽ വച്ചിട്ടുമുണ്ടെന്നാണ് സൂചന.ബോറിസിന്റെ ബ്രെക്സിറ്റ് ഡീൽ രണ്ടാം വായനയിലാണ് കോമൺസിൽ വിജയം നേടിയിരിക്കുന്നത്. അതായത് ഇത് നിയമമാകുന്നതിനുള്ള തുടക്കത്തിലെ തടസങ്ങൾ മാറി എന്നാണീ വിജയത്തിലൂടെ ഉറപ്പായിരിക്കുന്നത്.ഇതാദ്യമായിട്ടാണ് ഒരു അഗ്രിമെന്റിന് വോട്ടിംഗിലൂടെ എംപിമാർ പിന്തുണയേകിയിരിക്കുന്നത്. പ്രതീക്ഷിച്ചതിനേക്കാൾ വലിയ ഭൂരിപക്ഷത്തിലാണ് ഈ ഡീൽ വിജയിച്ചിരിക്കുന്നത്.

ബ്രെക്സിറ്റ് വൈകിപ്പിക്കുന്നതിന് അനുമതിയേകാനൊരുങ്ങി യൂറോപ്യൻ യൂണിയൻ; ബോറിസ് തെരഞ്ഞെടുപ്പ് പ്രഖ്യാപിച്ചേക്കുമെന്ന് സൂചന

ബോറിസിന്റെ തിരക്ക് പിടിച്ചുള്ള ബ്രെക്സിറ്റ് നടപ്പിലാക്കലിനെതിരെ ബ്രിട്ടീഷ് എംപിമാരിൽ ഭൂരിഭാഗം പേരും രംഗത്തെത്തിയ സാഹചര്യത്തിൽ ബ്രെക്സിറ്റ് വൈകിപ്പിക്കാൻ അനുവാദം നൽകാൻ മറ്റ് യൂറോപ്യൻ യൂണിയൻ നേതാക്കന്മാരോട് നിർദേശിക്കുമെന്ന് വെളിപ്പെടുത്തി യൂറോപ്യൻ കൗൺസിൽ പ്രസിഡന്റായ ഡൊണാൾഡ് ടസ്‌ക് രംഗത്തെത്തി. എന്നാൽ ഇത്തരത്തിൽ ബ്രെക്സിറ്റ് വൈകിപ്പിച്ചാൽ അതിനെ നേരിടുന്നതിനായി പൊതുതെരഞ്ഞെടുപ്പ് പ്രഖ്യാപിച്ച് അതിലൂടെ ശക്തമായ ഭൂരിപക്ഷത്തിൽ തിരിച്ചെത്തി തന്റെ ഇംഗിതത്തിന് അനുസരിച്ചുള്ള ബ്രെക്സിറ്റ് നടപ്പിലാക്കാൻ ബോറിസ് മറുനീക്കം നടത്തിയേക്കുമെന്നുള്ള സൂചനകളും ഇതിനിടെ ശക്തമായിട്ടുണ്ട്. തെരഞ്ഞെടുപ്പെന്ന വഴിയും ബോറിസിന്റെ മനസിലുണ്ടെന്ന് വെളിപ്പെടുത്തിയിരിക്കുന്നത് നമ്പർ 10 ഉറവിടമാണ്.

ടസ്‌കിന്റെ നിർദേശമനുസരിച്ച് 2020ജനുവരി 31 വര ബ്രെക്സിറ്റ് നീട്ടുന്നതിനായിരിക്കും യൂറോപ്യൻ യൂണിയൻ നേതാക്കന്മാർ അനുവാദമേകുകയെന്ന സൂചനയും ഉയർന്ന് വന്നിട്ടുണ്ട്. ബ്രെക്സിറ്റ് വൈകിപ്പിക്കണമെന്നാണ് ലേബർ നേതാവ് കോർബിനും ബ്രിട്ടീഷ് പാർലിമെന്റും തുടർച്ചയായി ആവശ്യപ്പെടുന്നതെന്നാണ് നമ്പർ 10 ഉറവിടം എടുത്ത് കാട്ടുന്നത്. ശനിയാഴ്ച ചേർന്ന പാർലിമെന്റ് ബ്രെക്സിറ്റ് ജനുവരി 31 വരെയെങ്കിലും നീട്ടണമെന്നാണ് ആവശ്യപ്പെട്ടിരുന്നത്. ഇന്നലത്തെ പാർലിമെന്റും അത് തന്നെയാണ് ആവശ്യപ്പെട്ടിരിക്കുന്നതെന്നും ഇത് അംഗീകരിക്കാൻ ബ്രസൽസ് തയ്യാറായാൽ ബോറിസ് ഈ പാർലിമെന്റ് പിരിച്ച് വിട്ട് തെരഞ്ഞെടുപ്പ് പ്രഖ്യാപിക്കുമെന്നും അതിലൂടെ മാത്രമേ യഥോചിതം ബ്രെക്സിറ്റ് നടപ്പിലാക്കാനാവുകയുള്ളുവെന്നും ഈ പാർലിമെന്റ് തകർന്നിരിക്കുന്നുവെന്നുമാണ് നമ്പർ 10 ഉറവിടം ആരോപിക്കുന്നത്.

Stories you may Like

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

More News in this category+

MNM Recommends +

Go to TOP