Forex Rate:

1 usd = 76.25 inr 1 gbp = 94.16 inr 1 eur = 85.23 inr 1 aed = 20.76 inr 1 sar = 20.32 inr 1 kwd = 247.66 inr
May / 202113Thursday

മാപ്പ് പറഞ്ഞാൽ ക്ഷമിക്കാൻ മാത്രം ടിക്കാറാം മീണ എന്താ ഇന്ത്യൻ പ്രസിഡന്റാണോ എന്ന് ചോദിച്ച് സോഷ്യൽ മീഡിയ; ശ്രീധരൻ പിള്ള പലപ്പോഴും തന്നോട് മാപ്പു പറഞ്ഞെന്ന മുഖ്യ തിരഞ്ഞെടുപ്പ് ഓഫീസറുടെ വെളിപ്പെടുത്തൽ ഉയർത്തുന്നത് പുതിയ വിവാദങ്ങൾ; പരസ്യ പ്രസ്താവനയിലൂടെ ഐഎഎസുകാരൻ ചട്ടംലംഘനം നടത്തിയോ? പിള്ളയെ തുടക്കത്തിൽ 'വെറുതെ വിട്ട' ഉദ്യോഗസ്ഥനെതിരെ ഉയരുന്ന രൂക്ഷ വിമർശനം; മാപ്പു പറച്ചിൽ നിഷേധിക്കാതെ ഏറ്റുമുട്ടലിനില്ലെന്ന് പറഞ്ഞ് ബിജെപി പ്രസിഡന്റും

മാപ്പ് പറഞ്ഞാൽ ക്ഷമിക്കാൻ മാത്രം ടിക്കാറാം മീണ എന്താ ഇന്ത്യൻ പ്രസിഡന്റാണോ എന്ന് ചോദിച്ച് സോഷ്യൽ മീഡിയ; ശ്രീധരൻ പിള്ള പലപ്പോഴും തന്നോട് മാപ്പു പറഞ്ഞെന്ന മുഖ്യ തിരഞ്ഞെടുപ്പ് ഓഫീസറുടെ വെളിപ്പെടുത്തൽ ഉയർത്തുന്നത് പുതിയ വിവാദങ്ങൾ; പരസ്യ പ്രസ്താവനയിലൂടെ ഐഎഎസുകാരൻ ചട്ടംലംഘനം നടത്തിയോ? പിള്ളയെ തുടക്കത്തിൽ 'വെറുതെ വിട്ട' ഉദ്യോഗസ്ഥനെതിരെ ഉയരുന്ന രൂക്ഷ വിമർശനം; മാപ്പു പറച്ചിൽ നിഷേധിക്കാതെ ഏറ്റുമുട്ടലിനില്ലെന്ന് പറഞ്ഞ് ബിജെപി പ്രസിഡന്റും

മറുനാടൻ മലയാളി ബ്യൂറോ

തിരുവനന്തപുരം: ശബരിമല പ്രചരണ വിഷയമാക്കരുതെന്നായിരുന്നു കേരളത്തിലെ മുഖ്യ തെരഞ്ഞെടുപ്പ് ഓഫീസർ ടിക്കാറാം മീണ തൊടുത്തു വിട്ട ആദ്യ വിവാദം. എന്നാൽ അയോധ്യയെ പറ്റി പറയുന്ന ഇന്ത്യയിൽ ശബരിമല പറഞ്ഞാൽ എന്ത് സംഭവിക്കുമെന്ന ചോദ്യം മീണയെ കുടുക്കി. അതിന് ശേഷം സർക്കാരിനോട് മീണ അടുപ്പം കാട്ടുന്നുവെന്ന പരാതികൾ പലവിധത്തിൽ പ്രതിപക്ഷം ചർച്ചയാക്കി. ഇപ്പോഴിതാ വോട്ടെടുപ്പിന് മണിക്കൂറുകൾ മാത്രം ശേഷിക്കേ നടത്തിയ പുതിയ പ്രസ്താവന. ബിജെപി അധ്യക്ഷൻ പിഎസ് ശ്രീധരൻ പിള്ള പലപ്പോഴും തന്നോട് മാപ്പു പറഞ്ഞിട്ടുണ്ടെന്നും അതുകൊണ്ട് പലതും കണ്ടില്ലെന്ന് നടിച്ചെന്നും സൂചന നൽകുന്ന പ്രസ്താവനയാണ് ടിക്കാറാം മീണയുടേതായി പുറത്തുവന്നത്.

ബിജെപി സംസ്ഥാന അധ്യക്ഷൻ ശ്രീധരൻപിള്ളയെ രൂക്ഷമായി വിമർശിച്ച് മുഖ്യ തെരഞ്ഞെടുപ്പ് ഓഫീസർ ടിക്കാറാം മീണ രംഗത്ത് വന്നത് പുതിയ ചർച്ചകൾക്കാണ് വഴിവച്ചിരിക്കുന്നത്. തെരഞ്ഞെടുപ്പ് പെരുമാറ്റച്ചട്ടം ലംഘിക്കുന്ന തരത്തിൽ വിവാദ പരാമശങ്ങൾ നടത്തിയ ശേഷം ശ്രീധരൻപിള്ള തന്നോട് രണ്ട് തവണ മാപ്പ് പറഞ്ഞിരുന്നെന്ന് ടിക്കാറാം മീണ പറഞ്ഞു. എന്നാൽ അതിന് ശേഷം പുറത്ത് പോയി വീണ്ടും വിഡ്ഢിത്തം പറയുന്നതാണ് ശ്രീധരൻ പിള്ളയുടെ പതിവെന്നും ടിക്കാറാം മീണ വിമർശിച്ചു. ശ്രീധരൻപിള്ളയുടേത് ഇരട്ടത്താപ്പാണെന്നും ഇത്തരക്കാരെ എങ്ങനെ വിശ്വസിക്കുമെന്നും ടിക്കാറാം മീണ പറഞ്ഞു. 'എന്തെങ്കിലും പറഞ്ഞിട്ട് 'സാർ തെറ്റായിപ്പോയി മാപ്പാക്കണം. കാര്യമാക്കരുത്' എന്ന് എന്നെ വിളിച്ച് മാപ്പ് പറയും. പക്ഷേ പുറത്ത് പോയിട്ട് മറ്റൊന്ന് പറയും. ഇവരെ എങ്ങനെ വിശ്വസിക്കും ഞാനിനി ആവർത്തിക്കില്ലെന്ന് മാപ്പ് പറഞ്ഞിട്ട് വീണ്ടും അത് തന്നെ ചെയ്യുന്നത് ഇരട്ടത്താപ്പാണ്. ' ടിക്കാറാം മീണ പറഞ്ഞു. ഇതാണ് വിവാദങ്ങൾക്ക് പുതിയ തലം നൽകുന്നത്. എങ്ങനെയാണ് ഇത്തരമൊരു പ്രസ്താവന ഭരണഘടനാ പദവയിൽ ഇരിക്കുന്ന ടിക്കാറാം മീണയ്ക്ക് പറയാനാകുന്നതെന്നതാണ് ഉയരുന്ന ചോദ്യം. ആദ്യ ചട്ട ലംഘനങ്ങളിൽ തന്നെ നടപടി എടുത്തിരുന്നുവെങ്കിൽ വർഗ്ഗീയ ആളിക്കത്തിക്കുന്ന പരാമർശം ശ്രീധരൻ പിള്ള നടത്തില്ലായിരുന്നുവെന്നാണ് സോഷ്യൽ മീഡിയയിൽ ഉയരുന്ന പൊതു വികാരം.

തനിക്കെതിരെ വിമർശനം ഉന്നയിച്ച മുഖ്യതെരഞ്ഞെടുപ്പ് ഓഫീസർ ടിക്കാറാം മീണയ്ക്ക് മറുപടിയുമായി ശ്രീധരൻപിള്ളയും രംഗത്ത് വന്നു. മീണയും താനും നിയമത്തിന് അതീതരല്ലെന്നും തെരഞ്ഞെടുപ്പ് കമ്മീഷനുമായി ഒരു ഏറ്റുമുട്ടലിനില്ലെന്നും അദ്ദേഹം പറഞ്ഞു. തന്റെ ഭാഗത്താണ് സത്യം. ടിക്കാറാം മീണ തന്നെ വ്യക്തിപരമായി ഇകഴത്തി കാണിക്കുകയുമാണ്. താൻ ഖേദം പ്രകടിപ്പിച്ചു എന്ന ടിക്കാറാം മീണയുടെ പ്രസ്താവനയോട് പ്രതികരിക്കാനില്ലെന്നും ശ്രീധരൻപിള്ള പറഞ്ഞു. അതായത് മാപ്പു പറഞ്ഞുവെന്നത് പിള്ളയും നിഷേധിക്കുന്നില്ലെന്നതാണ് വസ്തുത. ഇതാണ് ചർച്ചകൾക്ക് പുതുമാനം നൽകുന്നത്. ആരെങ്കിലും ടിക്കാറാം മീണയ്‌ക്കെതിരെ കേന്ദ്ര തെരഞ്ഞെടുപ്പ് കമ്മീഷന് പരാതി കൊടുത്താൽ അദ്ദേഹത്തിനെതിരെ നടപടിയുണ്ടാകാനും സാധ്യതയുണ്ട്.

മാപ്പ് കൊടുക്കാൻ ടിക്കാറാം മീണ പ്രസിഡന്റാണോ എന്ന ചോദ്യമാണ് സോഷ്യൽ മീഡിയ ഉയർത്തുന്നത്. പിള്ള ചട്ടം ലംഘിച്ചാൽ നടപടി എടുക്കുകയാണ് വേണ്ടത്. മാപ്പ് കൊടുക്കാനുള്ള നിയമം രാജ്യത്ത് നിലവിൽ ഇല്ല. ഇന്ത്യയിൽ ഏതെങ്കിലും വിഷയത്തിൽ മാപ്പ് കൊടുക്കാനുള്ള അധികാരം പ്രസിഡന്റിന് മാത്രമുള്ള അധികാരമാണ്. അപ്പോൾ ശ്രീധരൻ പിള്ള മാപ്പ് പറഞ്ഞതിന്റെ പേരിൽ പലതും കണ്ടില്ലെന്ന നടിച്ചുവെന്ന വ്യാഖ്യാനത്തിന് ഇടനൽകുന്ന പ്രസ്താവ ടീക്കാറാം മീണ ഏന്തടിസ്ഥാനത്തിൽ നടത്തിയെന്നതാണ് ഉയരുന്ന ചോദ്യം. മുഖ്യ തെരഞ്ഞെടുപ്പ് ഓഫീസർ പറയാൻ പാടില്ലാത്ത കാര്യങ്ങളാണ് പറയുന്നതെന്ന വികാരവും ശക്തമാണ്. തെരഞ്ഞെടുപ്പുമായി ബന്ധപ്പെട്ട നടപടികൾ എടുക്കാനുള്ള അധികാരമുള്ളത് കേന്ദ്ര തെരഞ്ഞെടുപ്പ് കമ്മീഷന് മാത്രമാണ്. അവരുടെ കേരളത്തിലെ പ്രതിനിധിയാണ് ടീക്കാറാം മീണ. കേരളത്തിൽ നടക്കുന്ന ഓരോ വിഷയവും കേന്ദ്ര കമ്മീഷനെ അറിയിക്കേണ്ട ബാധ്യത മീണയ്ക്കാണ്. ശ്രീധരൻ പിള്ള മാപ്പു പറഞ്ഞതിന്റെ അടിസ്ഥാനത്തിൽ ഈ കർത്തവ്യം മീണ ചെയ്യാതിരുന്നിട്ടുണ്ടോ എന്നതും ഉയരുന്ന ചോദ്യമാണ്.

കമ്മീഷന് അധികാരങ്ങൾ ഏറെയാണ്. തെരഞ്ഞെടുപ്പിനെ തെറ്റായി ഉപയോഗിക്കുന്നവർക്കെതിരെ നടപടി എടുക്കാം. പൊലീസുകാരേയും കളക്ടർമാരേയും മാറ്റാം. തെരഞ്ഞെടുപ്പിന്റെ അന്തസത്ത ചോരാതിരിക്കാനാണ് ഇതെല്ലാം. പെരുമാറ്റ ചട്ട ലംഘനം നടത്തുന്നവർക്ക് മാപ്പ് കൊടുക്കാമെന്ന് ചട്ടത്തിൽ ഒരിടത്തും പറയുന്നുമില്ല. അത് ലംഘിച്ചാൽ നടപടി എടുക്കുകയാണ് വേണ്ടത്. വേണ്ടിവന്നാൽ ചട്ടലംഘനം നടത്തുന്ന സ്ഥാനാർത്ഥികളെ അയോഗ്യരാക്കാനും തെരഞ്ഞെടുപ്പ് മാറ്റി വയ്ക്കാനും വരെ കമ്മീഷന് അധികാരമുണ്ട്. ഇത്തരം തീരുമാനങ്ങളെടുക്കാൻ സംസ്ഥാനങ്ങളിലെ മുഖ്യ തെരഞ്ഞെടുപ്പ് ഓഫീസർ കൃത്യമായി ഇടപെടുകയും പ്രവർത്തിക്കുകയും ചെയ്യണം. ഇവരുടെ റിപ്പോർട്ടുകൾ പരിഗണിച്ചാണ് എപ്പോഴും കേന്ദ്ര കമ്മീഷൻ തീരുമാനങ്ങൾ എടുക്കുന്നത്. ചട്ടങ്ങൾക്കുള്ളിൽ നിന്ന് വേണം മുഖ്യ തെരഞ്ഞെടുപ്പ് ഓഫീസറും പ്രവർത്തിക്കാൻ. ഇതെല്ലാമാണ് മീണ പരസ്യ പ്രസ്താവനയിലൂടെ ലംഘിച്ചതെന്ന വാദവും സജീവമാണ്.

ശ്രീധരൻ പിള്ള നടത്തിയത് കടുത്ത ചട്ടലംഘനമാണ്. ആറ്റിങ്ങലിൽ പിള്ള നടത്തിയ വിവാദ പ്രസംഗത്തിൽ ഏറെ ചർച്ചകളും നടന്നു. ഇതിൽ നടപടിയെടുക്കാനുള്ള ശുപാർശ കേന്ദ്ര തെരഞ്ഞെടുപ്പ് കമ്മീഷന്റെ പരിഗണനയിലുമാണ്. മ്രുസ്‌ലിം സമുദായത്തെക്കുറിച്ച ബിജെപി സംസ്ഥാന പ്രസിഡന്റ് പി.എസ്. ശ്രീധരൻ പിള്ളയുടെ പരാമർശം പ്രഥമദൃഷ്ട്യാ തെരഞ്ഞെടുപ്പ് ചട്ടലംഘനമെന്ന് തെരഞ്ഞെടുപ്പ് കമ്മിഷൻ ഹൈക്കോടതിയെ അറിയിച്ചിട്ടണ്ട്. ഇക്കാര്യം വ്യക്തമാക്കി മുഖ്യതെരഞ്ഞെടുപ്പ് ഓഫിസർ കേന്ദ്ര തെരഞ്ഞെടുപ്പ് കമീഷന് കത്തയച്ചിട്ടുണ്ടെന്നും പിള്ളക്കെതിരെ നടപടിക്ക് ശിപാർശ ചെയ്തിട്ടുണ്ടെന്നും കമ്മിഷൻ അഭിഭാഷകൻ അറിയിച്ചു. വർഗീയപരാമർശത്തിൽ നടപടി ആവശ്യപ്പെട്ട് ആറ്റിങ്ങലിലെ എൽ.ഡി.എഫ് സ്ഥാനാർത്ഥിയുടെ മുഖ്യ തെരഞ്ഞെടുപ്പ് ഏജന്റ് വി. ശിവൻകുട്ടി നൽകിയ ഹരജിയിലാണ് വിശദീകരണം. വിശദീകരണത്തെത്തുടർന്ന് ഹരജി കോടതി തീർപ്പാക്കുകയും ചെയ്തിട്ടുണ്ട്. ഈ വിഷയത്തിലാണ് പിള്ള മാപ്പു പറഞ്ഞ കാര്യം പരസ്യമായി മീണ പുറത്തു പറഞ്ഞത്.

ജനപ്രാതിനിധ്യ നിയമത്തിലെ 123(3എ), 125 വകുപ്പുകൾ ശ്രീധരൻ പിള്ള ലംഘിച്ചതായാണ് തെരഞ്ഞെടുപ്പ് കമീഷന്റെ പ്രഥമദൃഷ്ട്യായുള്ള കണ്ടെത്തൽ. ശ്രീധരൻ പിള്ള പ്രസംഗിച്ച യോഗത്തിന് അനുമതിയുണ്ടായിരുന്നുമില്ല. ഇക്കാര്യങ്ങൾ വ്യക്തമാക്കിയാണ് മുഖ്യ തെരഞ്ഞെടുപ്പ് ഓഫിസർ ടിക്കാറാം മീണ ഡെപ്യൂട്ടി തെരഞ്ഞെടുപ്പ് കമീഷണർ സുദീപ് ജയിനിന് കത്തയച്ചത്. ഉചിത നടപടിക്കും ശിപാർശ ചെയ്തിട്ടുണ്ട്. കത്തിന്റെ പകർപ്പും കമ്മിഷൻ കോടതിയിൽ ഹാജരാക്കി. മതസ്പർധ വളർത്തുന്ന രീതിയിൽ വിദ്വേഷപരാമർശം നടത്തിയ ശ്രീധരൻ പിള്ളയെ പ്രചാരണപരിപാടികളിൽ നിന്ന് വിലക്കണമെന്ന് പ്രതിപക്ഷനേതാവ് രമേശ് ചെന്നിത്തല സംസ്ഥാന തെരഞ്ഞെടുപ്പ് കമീഷനോട് ആവശ്യപ്പെട്ടിട്ടുണ്ട്. അദ്ദേഹത്തിനെതിരെ ഐ.പി.സി 153ാം വകുപ്പനുസരിച്ച് കേസെടുക്കണമെന്നും ചെന്നിത്തല ആവശ്യപ്പെട്ടു.

അതിനിടെ പെരുമാറ്റച്ചട്ടലംഘന പരാതികളിൽ സ്ഥാനാർത്ഥികൾക്കും നേതാക്കൾക്കുമെതിരെ നടപടികൾ ടികാറാം മീണ ശക്തിപ്പെടുത്തുകയും ചെയ്തു. ബിജെപി ദേശീയ അധ്യക്ഷൻ അമിത് ഷാ, കണ്ണൂരിലെ യു.ഡി.എഫ് സ്ഥാനാർത്ഥി കെ. സുധാകരൻ, ആറ്റിങ്ങലിലെ ബിജെപി സ്ഥാനാർത്ഥി ശോഭാ സുരേന്ദ്രൻ എന്നിവർക്കെതിരായ പരാതികളിലാണ് തുടർനടപടി. അമിത് ഷായുടെ പ്രസംഗത്തിനെതിരെ മുസ്‌ലിംലീഗ് നൽകിയ പരാതി കേന്ദ്ര തെരഞ്ഞെടുപ്പ് കമീഷന് അയച്ചു. വയനാടിനെ പാക്കിസ്ഥാനോട് ഉപമിച്ചതിനെതിരെയായിരുന്നു ലീഗിന്റെ പരാതി. രാഹുൽ ഗാന്ധിയുടെ വയനാട് റോഡ് ഷോയിൽ ലീഗ് പതാകകൾ കണ്ടതുമായി ബന്ധപ്പെട്ടായിരുന്നു അമിത് ഷായുടെ പരാമർശം. കണ്ണൂരിലെ ഇടത് സ്ഥാനാർത്ഥി ശ്രീമതിക്കെതിരായ വിഡിയോയുമായി ബന്ധപ്പെട്ട് നടപടി സ്വീകരിക്കാൻ കണ്ണൂർ കലക്ടർക്ക് നിർദ്ദേശം നൽകി.

വിഡിയോ സ്ത്രീത്വത്തെ അപമാനിക്കുന്നതാണെന്ന നിഗമനത്തെ തുടർന്നാണിത്. 'ഓളെ പഠിപ്പിച്ച് ടീച്ചറാക്കിയത് വെറുതെയായി' എന്ന പരാമർശവും വിവാദമായിരുന്നു. കെ. സുധാകരനാണ് വിഡിയോ പോസ്റ്റ് ചെയ്തത്. ഈ വിഷയത്തിൽ വനിതാ കമീഷനും കേസെടുത്തു. ആറ്റിങ്ങലിൽ എൻ.ഡി.എ സ്ഥാനാർത്ഥി ശോഭാ സുരേന്ദ്രൻ മുഖ്യതെരഞ്ഞെടുപ്പ് ഓഫിസർക്കെതിരെ പ്രസംഗിച്ച സംഭവത്തിൽ പൊലീസ് മേധാവിയോടും കലക്ടറോടും റിപ്പോർട്ട് തേടി. ശോഭാ സുരേന്ദ്രന്റെ പ്രസംഗത്തിന്റെ വിഡിയോ 16ന് ബിജെപി തിരുവനന്തപുരം ജില്ലാ കമ്മിറ്റിയുടെ ഫേസ്‌ബുക്ക് പേജിൽ പോസ്റ്റ് ചെയ്തിരുന്നു. ഇതേക്കുറിച്ച് അന്വേഷിച്ച് റിപ്പോർട്ട് നൽകണം എന്നാണ് മുഖ്യ തെരഞ്ഞെടുപ്പ് ഓഫിസർ ആവശ്യപ്പെട്ടിരിക്കുന്നത്. മുഖ്യതെരഞ്ഞെടുപ്പ് ഓഫിസർ സർക്കാറിന്റെ ചട്ടുകമായി പ്രവർത്തിക്കുന്നെന്നും ശബരിമലയെക്കുറിച്ച് മിണ്ടരുതെന്നാണ് പറയുന്നതെന്നും പറഞ്ഞാൽ തൂക്കിക്കൊല്ലുമോ എന്നുമായിരുന്നു ശോഭ സുരേന്ദ്രന്റെ പരാമർശം.

Stories you may Like

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

More News in this category+

MNM Recommends +

Go to TOP