Forex Rate:

1 usd = 76.25 inr 1 gbp = 94.16 inr 1 eur = 85.23 inr 1 aed = 20.76 inr 1 sar = 20.32 inr 1 kwd = 247.66 inr
Dec / 202002Wednesday

'ഷർജീൽ ഇമാമിന്റെ പ്രസംഗത്തെ ഞാൻ അംഗീകരിക്കുന്നില്ല; അസമിനെയോ വടക്കുകിഴക്കൻ ഭാഗത്തെയോ ഇന്ത്യയിൽ നിന്ന് ഒഴിവാക്കുന്നതിനെ ഞാൻ എതിർക്കുകയും ചെയ്യുന്നു; എന്നിരുന്നാലും, അദ്ദേഹത്തിന്റെ പ്രസംഗം നിയമവിരുദ്ധമാണെന്നോ അക്രമത്തിന് പ്രേരിപ്പിക്കുന്നതാണെന്നോ ഞാൻ കരുതുന്നില്ല എന്നും മാർക്കണ്ഡേയ കട്ജു

'ഷർജീൽ ഇമാമിന്റെ പ്രസംഗത്തെ ഞാൻ അംഗീകരിക്കുന്നില്ല; അസമിനെയോ വടക്കുകിഴക്കൻ ഭാഗത്തെയോ ഇന്ത്യയിൽ നിന്ന് ഒഴിവാക്കുന്നതിനെ ഞാൻ എതിർക്കുകയും ചെയ്യുന്നു; എന്നിരുന്നാലും, അദ്ദേഹത്തിന്റെ പ്രസംഗം നിയമവിരുദ്ധമാണെന്നോ അക്രമത്തിന് പ്രേരിപ്പിക്കുന്നതാണെന്നോ ഞാൻ കരുതുന്നില്ല എന്നും മാർക്കണ്ഡേയ കട്ജു

മറുനാടൻ മലയാളി ബ്യൂറോ

ന്യൂഡൽഹി: പൗരത്വ ഭേദഗതി നിയമത്തിനെതിരായ പ്രതിഷേധത്തിന്റെ സംഘാടകരിലൊരാളായ ജെഎൻയു വിദ്യാർത്ഥി ഷർജീൽ ഇമാമിനെതിരെ രാജ്യദ്രോഹക്കുറ്റം ചുമത്തിയ സർക്കാർ നടപടിയെ വിമർശിച്ച് സുപ്രീം കോടതി മുൻ ജഡ്ജിയും പ്രസ് കൗൺസിൽ ഓഫ് ഇന്ത്യ അധ്യക്ഷനുമായ മാർക്കണ്ഡേയ കട്ജു. ഷർജീൽ ഇമാമിനെതിരെ ചുമത്തിയ രാജ്യദ്രോഹക്കുറ്റംനിലനിൽക്കില്ലെന്നും എഫ്.ഐ.ആർ റദ്ദാക്കണമെന്നും കട്ജു പറഞ്ഞു. 'ദ വീക്കിൽ' എഴുതിയ ലേഖനത്തിലാണ് കട്ജു അഭിപ്രായ സ്വാതന്ത്ര്യത്തിനെ ഹനിക്കുന്ന നടപടികൾ പാടില്ലെന്ന് വ്യക്തമാക്കിയത്.

രാജ്യത്തിന്റെ അഖണ്ഡതക്കെതിരെ പ്രസംഗിച്ചു എന്നതിന്റെ പേരിലാണ് ജെഎൻയു വിദ്യാർത്ഥിക്കെതിരെ രാജ്യദ്രോഹ കുറ്റം ചുമത്തി കേസെടുത്തിരിക്കുന്നത്. പൗരത്വ ഭേദഗതി നിയമത്തിനെതിരെ ഷാഹീൻബാഗിൽ നടക്കുന്ന പ്രതിഷേധത്തിന്റെ സംഘാടകരിൽ ഒരാൾ കൂടിയായ ഷർജീൽ ഇമാമിനെതിരെയാണ് കേസ് രജിസ്റ്റർ ചെയ്തത്. ഇന്ത്യയിൽ നിന്നും അസമിനെ വേർപെടുത്തണം എന്ന തരത്തിൽ പ്രസംഗിച്ചതിനാണ് ഇയാൾക്കെതിരെ കേസെടുത്തിരിക്കുന്നത്. ഷർജീൽ ഇമാമിനെതിരെ അസ്സം പൊലീസ് യുഎപിഎ നിയമപ്രകാരം കേസെടുത്തിട്ടുണ്ട്. ഇതിന് പുറമെയാണ് രാജ്യദ്രോഹക്കുറ്റം ചുമത്തിയ ഡൽഹി പൊലീസിന്റെ നടപടി.

നമ്മളൊരുമിച്ചാൽ വടക്കുകിഴക്കൻ സംസ്ഥാനങ്ങളെ ഇന്ത്യയിൽനിന്ന് വേർപ്പെടുത്താനാകുമെന്നും അസമിനെ ഇന്ത്യയിൽ നിന്ന് വേർപ്പെടുത്തുക എന്നത് തങ്ങളുടെ ഉത്തരവാദിത്വമാണെന്നുമാണ് ഷർജീൽ പ്രസംഗത്തിൽ പറയുന്നത്. ഷർജീലിന്റെ പ്രസംഗത്തെ തുടർന്ന് ഇയാൾക്കെതിരെ അലിഘഡ് പൊലീസ് യുഎപിഎ ചുമത്തി കേസെടുത്തിട്ടുണ്ട്. ക്രിമിനൽ ഗൂഢാലോചന, രാജ്യദ്രോഹം തുടങ്ങിയ വകുപ്പുകൾ ചുമത്തിയാണ് ഷർജിൽ ഇമാമിനെതിരെ പൊലീസ് കേസെടുത്തത്. സിഎഎയ്ക്കും എൻആർസിക്കുമെതിരെ വിവാദപ്രസ്താവനകൾ നടത്തിയതിനെതിരേയും പൊലീസ് കേസെടുത്തിട്ടുണ്ട്. ഈ സാഹചര്യത്തിലാണ് വിമർശനവുമായി കട്ജു രംഗത്തെത്തിയത്.

യഥാർത്ഥത്തിൽ ഷർജീൽ ഇമാം കുറ്റം ഒ്ന്നും ചെയ്തിട്ടില്ലെന്നാണ് കട്ജു പറയുന്നത്. 'ബ്രാൻഡൻബർഗ് /ഒഹിയോ 395 യു.എസ് 444 (1969) ഭേദഗതിയിൽ, (നിയമലംഘനത്തെയോ അക്രമത്തെയോ പൊതുവായി പിന്തുണയ്ക്കുന്ന തരത്തിൽ സംസാരിക്കുകയും എന്നാൽ നിയമവിരുദ്ധമായ പ്രവർത്തനം നടത്താൻ ആളുകളെ നേരിട്ട് പ്രോത്സാഹിപ്പിക്കുകയോ ചെയ്യുന്നില്ലയെങ്കിൽ അവർക്ക് പരിരക്ഷ നൽകുന്ന ഭേദഗതി) യു.എസ് സുപ്രീം കോടതിയുടെ പരാമർശം ''അഭിപ്രായ സ്വാതന്ത്ര്യത്തിന് ഭരണഘടന അനുമതി നൽകുന്നുണ്ടെന്നും അത്തരം അഭിപ്രായപ്രകടനം നടത്തുന്നവരെ ബലപ്രയോഗത്തിലൂടെ തടയാനോ നിയമലംഘനകുറ്റം ചുമത്തി വിലക്കാനോ നിരോധിക്കാനോ സംസ്ഥാനത്തിന് അധികാരമില്ലെന്നുമാണ്.

ഈ തീരുമാനം യഥാർത്ഥത്തിൽ കാലത്തിന്റെ ഒരു പരീക്ഷണമാണ്, അന്നുമുതൽ യു.എസിലെ നിയമമാണിത്. മാത്രമല്ല 2011 ൽ ഇന്ത്യൻ സുപ്രീം കോടതിയും സമാനമായ പരാമർശം നടത്തിയിട്ടുണ്ട്. ഇന്ത്യൻ ഭരണഘടനയുടെ ആർട്ടിക്കിൾ 19 (1) (എ) ആളുകൾക്ക് അഭിപ്രായ സ്വാതന്ത്ര്യം ഉറപ്പു നൽകുന്നുണ്ട്. അത് ആസന്നമായ, നിയമവിരുദ്ധമായ പ്രവർത്തനത്തെ പ്രേരിപ്പിക്കുകയോ സൃഷ്ടിക്കുകയോ ചെയ്യുന്നതാവരുതെന്ന് മാത്രം.

ഷാർജീൽ ഇമാമിന്റെ പ്രസംഗത്തെ ഞാൻ അംഗീകരിക്കുന്നില്ല, അസമിനെയോ വടക്കുകിഴക്കൻ ഭാഗത്തെയോ ഇന്ത്യയിൽ നിന്ന് ഒഴിവാക്കുന്നതിനെ ഞാൻ എതിർക്കുകയും ചെയ്യുന്നു. എന്നിരുന്നാലും, അദ്ദേഹത്തിന്റെ പ്രസംഗം നിയമവിരുദ്ധമാണെന്നോ അല്ലെങ്കിൽ അത് അക്രമത്തിന് പ്രേരിപ്പിക്കുന്നതാണെന്നോ ഞാൻ കരുതുന്നില്ല.

ബ്രാൻഡൻബർഗിൽ കോടതി ഉപയോഗിച്ച 'ആസന്നം' എന്ന വാക്ക് വളരെ പ്രധാനമാണ്. ഇത് സമയത്തെ കൃത്യമായി സൂചിപ്പിക്കുന്നുണ്ട്. സാഹചര്യത്തെയും. അതിനാൽ, ഷാർജൽ ഇമാം ഒരു കുറ്റവും ചെയ്തിട്ടില്ലെന്ന് തന്നെയാണ് ഞാൻ വിശ്വസിക്കുന്നത്.

അദ്ദേഹത്തിനെതിരെ രജിസ്റ്റർ ചെയ്ത എഫ്.ഐ.ആർ ഭരണഘടനയുടെ ആർട്ടിക്കിൾ 226 പ്രകാരമോ അല്ലെങ്കിൽ ക്രിമിനൽ പ്രൊസീജ്യർ കോഡിലെ സെക്ഷൻ 482 പ്രകാരമോ ഹൈക്കോടതിക്ക് തന്നെ റദ്ദാക്കാൻ അർഹതയുണ്ടെന്നാണ് എന്റെ അഭിപ്രായം.

എന്റെ അഭിപ്രായത്തിൽ, ഭീമ-കൊറെഗാവ് പ്രതികൾ, ഡൽഹി സർവകലാശാലയിലെ പ്രൊഫസർ സായിബാബ, ജമ്മുകശ്മീരിലെ നേതാക്കളായ ഡോ. ഫാറൂഖ് അബ്ദുല്ല, ഒമർ അബ്ദുല്ല, മെഹ്ബൂബ മുഫ്തി, തുടങ്ങിയവരും സഞ്ജാദ് ലോൺ, സയ്യിദ് അഹമ്മദ് ഷാ ഗിലാനി, ഷാ ഫൈസൽ തുടങ്ങിയവർക്കെതിരെയും ചുമത്തിയ എഫ്.ഐ.ആറുകൾ റദ്ദാക്കണമെന്ന് തന്നെയാണ്. നിയമപരമായി ഇത് നിലനിൽക്കില്ല.' - കട്ജു പറയുന്നു. തടങ്കലിൽ കഴിയുന്ന ഈ വ്യക്തികളൊന്നും നിയമവിരുദ്ധമായ പ്രവർത്തനം നടത്താൻ ആളുകളെ നേരിട്ട് പ്രോത്സാഹിപ്പിക്കുകയോ നിയമലംഘനത്തെയോ അക്രമത്തെയോ പൊതുവായി പിന്തുണയ്ക്കുന്ന തരത്തിൽ സംസാരിക്കുകയോ ചെയ്തിട്ടില്ലെന്നും കട്ജു പറഞ്ഞു.

ജാമിയ മിലിയ ഇസ്ലാമിയ സർവകലാശാലയിലെ പൗരത്വ ഭേദഗതി നിയമത്തിനെതിരായ പ്രതിഷേധത്തിനിടെയിലും സമാനമായ പ്രസംഗങ്ങൾ ഷർജീൽ ഇമാം നടത്തിയെന്നാണ് ഡൽഹി പൊലീസ് ആരോപിക്കുന്നത്. ഇന്ത്യൻ ശിക്ഷാ നിയമത്തിലെ 124 എ ( രാജ്യദ്രോഹം), 153 എ ( മതവിഭാഗങ്ങൾക്കിടയിൽ വിദ്വേഷം ഉണ്ടാക്കൽ) 505 ( സമൂഹത്തിൽ പ്രശ്‌നങ്ങളുണ്ടാക്കുന്ന പരാമർശങ്ങൾ നടത്തൽ ) തുടങ്ങിയ കുറ്റങ്ങളാണ് ചുമത്തിയിരിക്കുന്നത്. ഷർജീൽ ഇമാമിന്റെ പ്രസംഗം സോഷ്യൽ മീഡിയകളിൽ കൂടി വ്യാപകമായി പ്രചരിച്ചതിനെ തുടർന്നാണ് പൊലീസ് കേസ് രജിസ്റ്റർ ചെയ്തത്.

അതേസമയം ഷഹീൻബാഗിലെ പ്രതിഷേധ സ്ഥലത്താണ് ഷർജീൽ ഇമാം വിവാദ പ്രസംഗം നടത്തിയതെന്ന് പ്രചരിക്കുന്ന ഭാഗങ്ങളിൽ നിന്ന് വ്യക്തമല്ലെന്നാണ് പ്രതിഷേധക്കാർ പറയുന്നത്. ഷഹീൻബാഗ് സമരത്തെ അപകീർത്തിപ്പെടുത്തുന്നതിന്റെ ഭാഗമായാണ് കേസെടുത്തിരിക്കുന്നതെന്ന് ഡൽഹി ഉപമുഖ്യമന്ത്രി മനീഷ് സിസോദിയ ആരോപിച്ചു. ഷർജീൽ ഇമാം തെറ്റ് ചെയ്തിട്ടില്ലെന്ന് തെളിയിക്കാൻ 24 മണിക്കൂറിനുള്ളിൽ അറസ്റ്റ് ചെയ്യാനും പൊലീസിനെ മനീഷ് സിസോദിയ വെല്ലുവിളിച്ചു. അസ്സമിനെ മുറിച്ചുമാറ്റണമെന്ന് ഒരാൾ പറയുന്നു. അത് ചെയ്ത ആളെ അറസ്റ്റ് ചെയ്യുന്നതിന് പകരം ബിജെപി വാർത്താ സമ്മേളനം നടത്തുകയാണ് ചെയ്യുന്നതെന്നും സിസോദിയ ആരോപിച്ചു.

അലിഗഢ് മുസ്ലിം യൂനിവേഴ്സിറ്റിയിൽ ജനുവരി 16ന് നടത്തിയ പ്രസംഗത്തിന്റെ പേരിലാണ് ഗവേഷക വിദ്യാർത്ഥി ഷർജീൽ ഇമാമിനെതിരെ കേസെടുത്തത്. യു. എ. പി. എ നിയമപ്രകാരം ഷർജിൽ ഇമാമിനെതിരെ കേസെടുത്തതായി അസമിലെ അഡീഷണൽ ഡി. ജി. പി ജി. പി സിങ് പറഞ്ഞു. നേരത്തെ ഷർജീൽ ഇമാമിന്റെ പ്രസ്താവനയിൽ കേസെടുക്കുമെന്ന് ധനമന്ത്രി ഹിമന്ത ബിശ്വ ശർമ്മ അറിയിച്ചിരുന്നു. അസമിനെ ഇന്ത്യയിൽ നിന്ന് വേർപ്പെടുത്തണമെന്ന് ഷർജീൽ ഇമാം ആവശ്യപ്പെട്ടുവെന്നാണ് ഹിമന്ത ബിശ്വ ശർമ്മയുടെ ആരോപണം.

ഷജീലിനെതിരെ കേസെടുത്തതായി അലിഗഢ് എസ്. എസ്. പി ആകാശ് കുൽഹറിയും അറിയിച്ചു. അദ്ദേഹത്തെ അറസ്റ്റ് ചെയ്യാൻ പ്രത്യേക സംഘത്തെ നിയോഗിച്ചിട്ടുണ്ടെന്നും അദ്ദേഹം പറഞ്ഞു. അതേസമയം, തന്റെ വിഡിയോ ക്ലിപ്പുകൾ എഡിറ്റ് ചെയ്ത് പ്രചരിപ്പിക്കുകയായിരുന്നു എന്ന് ഷർജീൽ ഇമാം പറഞ്ഞു.

Stories you may Like

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

More News in this category+

MNM Recommends +

Go to TOP