Forex Rate:

1 usd = 76.25 inr 1 gbp = 94.16 inr 1 eur = 85.23 inr 1 aed = 20.76 inr 1 sar = 20.32 inr 1 kwd = 247.66 inr
Mar / 202428Thursday

മെറിനിയാക് വ്യോമത്താവളത്തിൽ നിന്ന് അബുദാബി വരെ അനുഗമിച്ചത് ഫ്രഞ്ച് വ്യോമ സേനാ വിമാനങ്ങൾ; അബുദാബിയിൽ നിന്ന് അംബാലയിലേക്ക് കൂട്ടിന് ഇന്ത്യൻ ടാങ്കർ വിമാനങ്ങൾ; 7000 കിലോമീറ്റർ താണ്ടി റഫാൽ എത്തുന്നത് ചൈനീസ് വെല്ലുവിളികളെ നേരിടാൻ; അഞ്ച് വിമാനത്തിൽ ഒന്നു പറത്തുന്നത് മലയാളി അഭിമാനമായ വിങ് കമാണ്ടറും; റഫാൽ യുദ്ധവിമാനങ്ങൾ കൂടി നാളെ എത്തുന്നതോടെ വ്യോമക്കരുത്തിൽ ഇന്ത്യ ഏഷ്യയിലെ നമ്പർ വണ്ണാകും

മെറിനിയാക് വ്യോമത്താവളത്തിൽ നിന്ന് അബുദാബി വരെ അനുഗമിച്ചത് ഫ്രഞ്ച് വ്യോമ സേനാ വിമാനങ്ങൾ; അബുദാബിയിൽ നിന്ന് അംബാലയിലേക്ക് കൂട്ടിന് ഇന്ത്യൻ ടാങ്കർ വിമാനങ്ങൾ; 7000 കിലോമീറ്റർ താണ്ടി റഫാൽ എത്തുന്നത് ചൈനീസ് വെല്ലുവിളികളെ നേരിടാൻ; അഞ്ച് വിമാനത്തിൽ ഒന്നു പറത്തുന്നത് മലയാളി അഭിമാനമായ വിങ് കമാണ്ടറും; റഫാൽ യുദ്ധവിമാനങ്ങൾ കൂടി നാളെ എത്തുന്നതോടെ വ്യോമക്കരുത്തിൽ ഇന്ത്യ ഏഷ്യയിലെ നമ്പർ വണ്ണാകും

മറുനാടൻ മലയാളി ബ്യൂറോ

ന്യൂഡൽഹി: ഫ്രാൻസിൽ നിന്നുള്ള 5 റഫാൽ യുദ്ധവിമാനങ്ങൾ നാളെ ഇന്ത്യയിലെത്തും. 7000 കിലോമീറ്റർ താണ്ടി അബുദാബി വഴി ഹരിയാനയിലെ അംബാല വ്യോമത്താവളത്തിൽ വിമാനം എത്തും. അഞ്ച് യുദ്ധ വിമാനങ്ങൾക്കും വ്യോമസേന വൻ വരവേൽപ് നൽകും. ഇന്ത്യൻ വ്യോമസേനയ്ക്ക് പുത്തൻ കരുത്താണ് റഫാൽ യുദ്ധ വിമാനങ്ങൾ.

തെക്കൻ ഫ്രാൻസിലെ മെറിനിയാക് വ്യോമത്താവളത്തിൽ നിന്നാണു വിമാനങ്ങൾ ഇന്നലെ ഉച്ചയ്ക്കു പുറപ്പെട്ടത്. ഒറ്റ സീറ്റുള്ള 3 വിമാനങ്ങളും ഇരട്ട സീറ്റുള്ള 2 വിമാനങ്ങളുമാണ് വ്യോമ സേനയുടെ ഭാഗമാകാൻ എത്തുന്നത്. അബുദാബിയിലെ അൽദഫ്ര വ്യോമത്താവളത്തിൽ തങ്ങുന്ന വിമാനങ്ങൾ നാളെ അംബാലയിലേക്കു പറക്കും. റഫാൽ വിമാനങ്ങൾക്ക് സംഘർഷം നിലനിൽക്കുന്ന ഇന്ത്യ ചൈന അതിർത്തിയിലായിരിക്കും ആദ്യ ദൗത്യം. 59,000 കോടി രൂപയ്ക്ക് ആകെ 36 വിമാനങ്ങളാണു ഫ്രാൻസിൽ നിന്ന് വാങ്ങുന്നത്. അടുത്ത വർഷം അവസാനത്തോടെ 36 എണ്ണവും ലഭിക്കുമെന്നു ഫ്രാൻസിലെ ഇന്ത്യൻ എംബസി അറിയിച്ചു.

വിമാനം പറപ്പിക്കുന്ന ഇന്ത്യൻ വ്യോമസേനാ പൈലറ്റുമാരെ ഫ്രാൻസിലെ ഇന്ത്യയുടെ അംബാസഡർ ജാവേദ് അഷ്‌റഫ് വ്യോമത്താവളത്തിൽ സന്ദർശിച്ചു. ഫ്രാൻസിൽനിന്ന് ഇന്ത്യയിലേക്കുള്ള യാത്രയിൽ റഫാൽ പറത്താൻ മലയാളിയും ഉണ്ട്. ഫ്രാൻസിൽ പരിശീലനം പൂർത്തിയാക്കി വിമാനങ്ങളുമായി പുറപ്പെട്ട വ്യോമസേന പൈലറ്റുമാരുടെ ആറംഗസംഘത്തിലാണ് മലയാളി ഇടം നേടിയിരിക്കുന്നത്. ഒമ്പതുമാസമായി ഇവർ ഫ്രാൻസിൽ വിമാനം പറത്താനുള്ള പരിശീലനത്തിലായിരുന്നു. വിങ് കമാൻഡറാണ് ഈ മലയാളി. വ്യോമസേനയുടെ ട്വിറ്റർ അക്കൗണ്ടിൽ ഇവരുടെ ചിത്രം പങ്കുവെച്ചതോടെ നിരവധി സുഹൃത്തുക്കൾ ഇദ്ദേഹത്തെ തിരിച്ചറിഞ്ഞു. പൈലറ്റുമാരുടെ പേരുവിവരം ഔദ്യോഗികമായി പുറത്തു വിടാത്തതിനാൽ ഇദ്ദേഹത്തെക്കുറിച്ചുള്ള വിവരങ്ങൾ വെളിപ്പെടുത്തുന്നുമില്ല.

വിമാനങ്ങൾക്ക് ആകാശത്തു വച്ച് ഇന്ധനം നിറയ്ക്കാൻ അബുദാബി വരെ ഫ്രഞ്ച് വ്യോമസേനാ ടാങ്കർ വിമാനങ്ങൾ ഒപ്പം പറന്നിരുന്നു. അബുദാബിയിൽ നിന്ന് അംബാലയിലേക്കുള്ള യാത്രയിൽ ഇന്ത്യയുടെ വ്യോമസേനാ ടാങ്കർ വിമാനങ്ങൾ അനുഗമിക്കും. വ്യോമസേനയുടെ 17ാം നമ്പർ സ്‌ക്വാഡ്രൻ (ഗോൾഡൻ ആരോസ്) ആണു റഫാലിനായി അംബാലയിൽ സജ്ജമാക്കുക. മിസൈലുകൾ അടക്കം ഘടിപ്പിച്ച റഫാലുകളുടെ സ്‌ക്വാഡ്രൻ ഓഗസ്റ്റ് രണ്ടാം പകുതിയോടെ പ്രവർത്തനക്ഷമമാകും. 9.3 ടൺ ആയുധങ്ങൾ വഹിക്കാവുന്ന റഫാലിൽ മീറ്റിയോർ ബിയോണ്ട് വിഷ്വൽ റേഞ്ച് എയർ ടു എയർ മിസൈലും സ്‌കാൽപ് എയർ ടു ഗ്രൗണ്ട് ക്രൂസ് മിസൈലും സജ്ജമാക്കും. ആകാശത്തും കരയിലുമുള്ള ലക്ഷ്യങ്ങളെ തകർക്കാൻ ഈ മിസൈലുകൾക്ക് കഴിയും.

ലഡാക്ക് അതിർത്തിയിലെ ചൈനീസ് പ്രകോപനം ഇനിയും അവസാനിച്ചിട്ടില്ല. ഈ സാഹചര്യത്തിൽ ഇന്ത്യ അതിർത്തിയിൽ ആയുധവിന്യാസം നടത്തുകയും ചെയ്യുന്നുണ്ട്. ചൈനീസ് പ്രകോപനം തുടരുന്ന സാഹചര്യത്തിൽ സജ്ജമായിരിക്കാനുള്ള നിർദ്ദേശമാണ് വ്യോമ-കര-നാവിക സേനകൾക്ക് നൽകിയിരിക്കുന്നത്. വ്യോമക്കരുത്തിൽ ഇന്ത്യയെ മുന്നിലെത്തിക്കാൻ പോന്ന യുദ്ധവിമാനമാണ് റഫാൽ. ഇത് എത്തുന്നതോടെ വ്യോമസേനയുടെ ആക്രമണശേഷി വൻതോതിൽ വർധിക്കുമെന്ന് വിദഗ്ദ്ധർ വാർത്താ ഏജൻസിയോട് പറഞ്ഞു. ഇന്ത്യയ്ക്കും ചൈനയ്ക്കുമിടെ സംഘർഷാവസ്ഥ നിലനിൽക്കുകയും വ്യോമസേന കടുത്ത ജാഗ്രത പാലിക്കുകയും ചെയ്യുന്നതിനിടെയാണ് അത്യന്താധുനിക യുദ്ധവിമാനങ്ങൾ ഇന്ത്യയ്ക്ക് ലഭിക്കുന്നത്. എതിരാളികൾക്ക് ശക്തമായ മുന്നറിയിപ്പ് നൽകുന്നതാവും നീക്കമെന്ന് പേര് വെളിപ്പെടുത്താത്ത സൈനിക വൃത്തങ്ങൾ പറഞ്ഞു.

58,000 കോടിക്ക് 36 റഫാൽ വിമാനങ്ങൾ വാങ്ങുന്നതിനുള്ള കരാറിൽ 2016 സെപ്റ്റംബറിലാണ് ഇന്ത്യയും ഫ്രാൻസും ഏർപ്പെട്ടത്. യൂറോപ്യൻ മിസൈൽ നിർമ്മാതാക്കളായ എംബിഡിഎയുടെ മീറ്റിയോർ എയർ ടു എയർ മിസൈൽ, സ്‌കാൾപ് ക്രൂസ് മിസൈൽ എന്നിവ അടക്കമുള്ളവയുമായാണ് റഫാൽ യുദ്ധവിമാനങ്ങൾ എത്തുന്നത്. യു.കെ, ജർമനി, ഇറ്റലി, ഫ്രാൻസ്, സ്‌പെയിൻ, സ്വീഡൻ എന്നീ രാജ്യങ്ങൾ നേരിടുന്ന പൊതുവായ വെല്ലുവിളികൾ മുന്നിൽക്കണ്ട് രൂപകൽപ്പന ചെയ്ത മിസൈലാണ് മീറ്റിയോർ. ഇന്ത്യയ്ക്കുവേണ്ടി മാത്രം നടത്തിയ പരിഷ്‌കാരങ്ങളും റഫാൽ യുദ്ധവിമാനങ്ങളിൽ ഉണ്ടാവും. ഇസ്രയേൽ നിർമ്മിത ഹെൽമെറ്റ് മൗണ്ടഡ് ഡിസ്‌പ്ലേ, റഡാർ വാണിങ് റിസീവറുകൾ, ലോ ബാൻഡ് ജാമറുകൾ, പത്ത് മണിക്കൂർ ഫ്‌ളൈറ്റ് ഡേറ്റാ റെക്കോർഡിങ്, ഇൻഫ്രാറെഡ് സെർച്ച് ആൻഡ് ട്രാക്കിങ് സംവിധാനം തുടങ്ങിയവയാണ് ഇവ.

ഏഷ്യയിലെ വൻ പ്രതിരോധ ശക്തിയായി ഇന്ത്യ മുന്നേറുകയാണ്. ഇന്ത്യൻ പ്രതിരോധ മേഖലയിലെ കുതിപ്പ് അയൽ രാജ്യങ്ങൾക്ക് ഭീഷണിയാണെന്ന് പാക്ക്, ചൈന റിപ്പോർട്ടുകൾ നേരത്തെ തന്നെ വന്നതാണ്. പാക്കിസ്ഥാൻ നേരിടുന്നതു പോലെ ചൈനയ്ക്കും ഇന്ത്യയിൽ നിന്നു ഭീഷണിയുണ്ട്. ഇന്ത്യ വാങ്ങിയ, വാങ്ങുന്ന ആയുധങ്ങളും പോർവിമാനങ്ങളും വൻ ഭീഷണി തന്നെയാണെന്നാണ് ചൈനീസ് മാധ്യമങ്ങൾ നിരവധി തവണം റിപ്പോർട്ട് ചെയ്തിട്ടുണ്ട്. റഫേൽ കൂടി എത്തുന്നതോടെ ഏഷ്യയിലെ ഏറ്റവും മികച്ച അത്യാധുനിക പോർവിമാനങ്ങളാണ് ഇന്ത്യയിലേക്ക് എത്തുന്നത്. ജൂലൈയിൽ എത്തുന്ന റഫാൽ പോർവിമാനങ്ങൾ ചൈനയുടെയും പാക്കിസ്ഥാന്റെയും അതിർത്തിയിലെ തർക്ക പ്രദേശങ്ങളിൽ വിന്യസിച്ചേക്കും. ഏഷ്യൻ രാജ്യങ്ങൾക്കിടയിൽ ഏറ്റവും കൂടുതൽ ആയുധങ്ങൾ ഇറക്കുമതി ചെയ്യുന്നത് ഇന്ത്യയാണ്. ഇപ്പോൾ വ്യോമക്കരുത്തിലും മുന്നിൽ നിൽക്കുന്നത് ഏഷ്യയിൽ ഇന്ത്യയാണ്.

ഫ്രാൻസിനെയും വെല്ലുന്ന ടെക്നോളജി

ഫ്രാൻസിന്റെ കയ്യിൽ നിന്നാണ് ഇന്ത്യ റഫാൽ വിമാനം വാങ്ങുന്നതെങ്കിലും ടെക്നോളജിയുടെ കാര്യത്തിൽ ഈ വിമാനം മറ്റെല്ലാവരെയും കടത്തിവെട്ടും. ഇന്ത്യയുടെയും ഇസ്രയേലിന്റെയും പ്രതിരോധ സാങ്കേതിക സംവിധാനങ്ങളും ആയുധങ്ങളും ഘടിപ്പിച്ചതോടെ ലോകത്തെ ഏറ്റവും മികച്ച റഫാൽ പോർവിമാനം ഇന്ത്യയുടേതാകും. ഫ്രഞ്ച് സാങ്കേതിക വിദഗ്ധരുടെ സഹായത്തോടെയാണ് റഫാലിന്റെ ഇന്ത്യൻ പതിപ്പ് നിർമ്മിച്ചത്. അസ്ട്ര, സുദർശൻ ബോംബുകൾ, എഇഎസ്എ റഡാർ, പൈത്തൺ 5, ഇസ്രയേലിന്റെ ഡെർബി മിസൈൽ എന്നിവ ഘടിപ്പിക്കാനുള്ള സംവിധാനങ്ങളോടെയാണ് ഇന്ത്യയുടെ റഫാൽ എത്തുന്നത്.

പലപ്പോഴും പോർവിമാനത്തിന്റെ മികവു മാത്രമല്ല പ്രധാന ഘടകം. സാങ്കേതികവിദ്യ കൈമാറാൻ വിൽക്കുന്ന രാജ്യത്തിനും കമ്പനിക്കുമുള്ള 'സന്മനസ്സ്', വിമാനത്തിന്റെ സർവീസ് കാലഘട്ടം തീരുന്നതു വരെ സ്‌പെയർ പാർട്സുകൾ നൽകാനുള്ള 'സന്മനസ്സ്', വിൽക്കുന്ന രാജ്യത്തെ രാഷ്ട്രീയ അന്തരീക്ഷം, മൊത്തമുള്ള ചെലവ് ഇവയെല്ലാം പ്രധാന ഘടകങ്ങളാണ്. ഡാസാൾട്ട് നിർമ്മിച്ച നാൽപതിലധികം മിറാജ്-2000 വിമാനം ഇന്ത്യൻ വ്യോമസേനയുടെ സർവീസിൽ ഇന്നുണ്ട്. ഡാസാൾട്ടിന്റെ നിർമ്മാണമികവിന് ഒരു സർട്ടിഫിക്കറ്റാണ് മിറാജ് എന്നു പറയാം. സ്‌പെയർ പാർട്ടുകൾ നൽകുന്നതിലോ, എൻജിൻ സർവീസിങ് ഉൾപ്പെടെയുള്ള വിൽപനാനന്തര സേവനങ്ങളിലോ ഇന്നുവരെ മിറാജിന്റെ കാര്യത്തിൽ പ്രശ്‌നമുണ്ടായിട്ടില്ല.

റഫാൽകൂടി എത്തുമ്പോൾ വ്യോമക്കരുത്തു കൂടും

റഫാൽ വിമാനം കൂടി എത്തുന്നതോടെ ഇന്ത്യയുടെ വ്യോമക്കരുത്ത് വർദ്ധിക്കും. എവിടെയും ഏതിനും ഉപയോഗിക്കാവുന്ന മിഗ്-21, മിഗ്-29 എയർ സുപ്പീരിയോറിറ്റി ഫൈറ്റർ, ശത്രു റഡാറുകളെ വെട്ടിച്ചു വളരെ ദൂരം താഴ്ന്നുപറന്നു ബോംബിടാൻ ശേഷിയുള്ള ജഗ്വാർ, ഇന്ത്യയിൽ നിന്നു പറന്നുപൊങ്ങിയാൽ ഏതു ഭാഗത്തുമെത്തി ബോംബിടാൻ കഴിവുള്ള ആധുനികോത്തരമായ സുഖോയ്-30 എംകെഐ എന്നിവയെല്ലാം കൈവശമുള്ളപ്പോൾ എന്തിന് ഇത്രയും വില നൽകി റഫാൽ വാങ്ങിയതെന്ന് ചോദ്യം വരാം. കൂടാതെ തേജസ് എന്ന പേരിൽ ഒരു അത്യാധുനിക പോർവിമാനം ഇന്ത്യ തന്നെ വികസിപ്പിച്ചിട്ടുമുണ്ട്. കഴിഞ്ഞ ഓരോ വിമാനത്തിനും ഒരോ തരം റോളാണുള്ളത്. ശത്രുരാജ്യത്തേക്കു കുതിച്ചുകയറി ബോംബിടുന്നവയെ പണ്ടു ബോംബർ എന്നും ഇന്നു സ്‌ട്രൈക്ക് വിമാനമെന്നും വിളിക്കുന്നു. ശത്രുവിമാനങ്ങളുമായി ആകാശയുദ്ധത്തിൽ ഇടപെടുന്നവയെയാണു ഫൈറ്റർ വിമാനങ്ങൾ എന്നു വിളിക്കുന്നത്.

ഇവയ്ക്കിടയിൽ തന്നെ പല വകഭേദങ്ങളുണ്ട്. ശത്രുഭൂമിയുടെ ഉള്ളിലേക്ക് ആഴത്തിൽ പറന്നെത്തി, ശത്രുവിന്റെ സൈനികനീക്കങ്ങളെ തകർക്കാനായി റോഡ്, റയിൽ പാതകൾ, പാലങ്ങൾ ശത്രുവിന്റെ കമാൻഡ് സെന്ററുകൾ തുടങ്ങിയവ തകർക്കുന്നവയാണു ഡീപ് പെനിട്രേഷൻ സ്‌ട്രൈക്ക് വിമാനങ്ങൾ. ജഗ്വാർ ഈ വിഭാഗത്തിൽ പെട്ടവയാണ്. പറക്കൽ ശേഷിയും പ്രഹരശേഷിയും കൂടുതലാണെങ്കിലും ഇവയ്ക്ക് ഒരു പോരായ്മയുണ്ട് - ശത്രുവിമാനങ്ങളിൽ നിന്നു സ്വയം സംരക്ഷിക്കാനുള്ള കഴിവു പരിമിതമാണ്. അതിനാൽ ഇവയ്ക്കു കൂട്ടുപോകാൻ ഫൈറ്റർ വിമാനങ്ങൾ വേണം. ഇത് റഫാൽ പരിഹരിക്കും.

Stories you may Like

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

More News in this category+

MNM Recommends +

Go to TOP