Forex Rate:

1 usd = 76.25 inr 1 gbp = 94.16 inr 1 eur = 85.23 inr 1 aed = 20.76 inr 1 sar = 20.32 inr 1 kwd = 247.66 inr
May / 202420Monday

അദാനി കമ്പനികളിലേക്ക് വിദേശ നിക്ഷേപം എത്തിച്ചവർക്ക് അദാനി കുടുംബവുമായി ബന്ധം; കമ്പനിയിലെ ഉദ്യോഗസ്ഥരുമായി രണ്ടു വിദേശികളും നേരിട്ട് ഇടപാടുകൾ നടത്തി; രഹസ്യമായി സ്വന്തം കമ്പനികളിൽ അദാനി തന്നെ നിക്ഷേപം നടത്തിയെന്നും റിപ്പോർട്ടിൽ; കൂടുതൽ തെളിവുകൾ പുറത്ത്

അദാനി കമ്പനികളിലേക്ക് വിദേശ നിക്ഷേപം എത്തിച്ചവർക്ക് അദാനി കുടുംബവുമായി ബന്ധം; കമ്പനിയിലെ ഉദ്യോഗസ്ഥരുമായി രണ്ടു വിദേശികളും നേരിട്ട് ഇടപാടുകൾ നടത്തി; രഹസ്യമായി സ്വന്തം കമ്പനികളിൽ അദാനി തന്നെ നിക്ഷേപം നടത്തിയെന്നും റിപ്പോർട്ടിൽ; കൂടുതൽ തെളിവുകൾ പുറത്ത്

മറുനാടൻ മലയാളി ബ്യൂറോ

ന്യൂഡൽഹി: അദാനി കമ്പനികളിലേക്ക് വിദേശ നിക്ഷേപം എത്തിച്ചവർക്ക് അദാനി കുടുംബവുമായി ബന്ധമെന്നതിന് കൂടുതൽ തെളിവുകൾ പുറത്ത്. അദാനി കമ്പനിയിലെ ഉദ്യോഗസ്ഥരുമായി രണ്ടു വിദേശികളും നേരിട്ട് ഇടപാടുകൾ നടത്തിയിട്ടുണ്ട്. ഇതു സംബന്ധിച്ച് ഇന്റർനാഷണൽ കൺസോർഷ്യം ഓഫ് ജേണലിസ്റ്റ്‌സിനും തെളിവുകൾ കിട്ടി. ഇത് സംബന്ധിച്ച രേഖകൾ കിട്ടാൻ ശ്രമിക്കുന്നു എന്ന് സെബി അന്വേഷണ സംഘം അറിയിച്ചു.

ഗൗതം അദാനിക്കെതിരെ ഗുരുതര കണ്ടെത്തലുകളുമായി പുതിയ റിപ്പോർട്ട് ഇന്നലെ പുറത്ത് വന്നിരുന്നു. രഹസ്യമായി സ്വന്തം കമ്പനികളിൽ അദാനി തന്നെ നിക്ഷേപം നടത്തിയെന്നാണ് ഓർഗനൈസ്ഡ് ക്രൈം ആൻഡ് കറപ്ഷൻ റിപ്പോർട്ടിങ് പ്രൊജക്ട് പ്രസിദ്ധീകരിച്ച റിപ്പോർട്ടിൽ പറയുന്നത്. നിഴൽ കമ്പനികൾ വഴി വിദേശത്തേക്ക് പണമൊഴുക്കിയെന്നും ഇന്ത്യൻ സ്റ്റോക്ക് മാർക്കറ്റിൽ വലിയ തട്ടിപ്പ് നടത്തിയെന്നും റിപ്പോർട്ടിൽ ആരോപിക്കുന്നു.

ഇത്തരത്തിൽ നിക്ഷേപം നടന്നത് 2013 മുതൽ 2018 വരെയുള്ള കാലയളവിലാണ്. അദാനി കമ്പനികളുടെ പണം വ്യാജ ബില്ലുകൾ ഉണ്ടാക്കി ആദ്യം വിദേശത്തെ നിഴൽ കമ്പനികൾക്ക് നൽകും. ഈ പണം ഉപയോഗിച്ച് വിദേശ നിക്ഷേപം എന്ന പേരിൽ സ്വന്തം ഓഹരികൾ തന്നെ അദാനി വാങ്ങും. ഇതു വഴി ഓഹരി വില കൃത്രിമമായി ഉയർത്തി അദാനി പണം തട്ടിയെന്നും റിപ്പോർട്ട് പറയുന്നു. ഡിആർഐ പോലുള്ള ഏജൻസികൾക്ക് ഇത് അറിയാമായിരുന്നെന്നും മോദി സർക്കാർ അധികാരത്തിലെത്തിയതോടെ അന്വേഷണം അട്ടിമറിച്ചെന്നും റിപ്പോർട്ട് പറയുന്നു.

എന്നാൽ ഈ ആരോപണങ്ങൾ അദാനി ഗ്രൂപ്പ് നിഷേധിച്ചിട്ടുണ്ട്. ഇന്ത്യക്കെതിരായ കരുതിക്കൂട്ടിയുള്ള ആക്രമണമാണ് തങ്ങൾക്കെതിരായ ആരോപണമെന്നും ഗ്രൂപ്പ് പ്രതികരിച്ചു. ഇന്ത്യയിലെ സ്ഥാപനങ്ങളുടെ വിശ്വാസ്യത തകർക്കാനാണ് ശ്രമമെന്നും ഇതിൽ വ്യക്തമാക്കിയിട്ടുണ്ട്. ഗാർഡിയൻ അടക്കമുള്ള അന്താരാഷ്ട്ര മാധ്യമങ്ങൾ റിപ്പോർട്ട് ഉദ്ധരിച്ച് വാർത്ത പ്രസിദ്ധീകരിച്ചിട്ടുണ്ട്.

ഹിൻഡൻബർഗ് റിപ്പോർട്ടിന് പിന്നാലെയാണ് അദാനിക്ക് കുരുക്കായി പുതിയ കണ്ടെത്തലുകൾ പുറത്തുവന്നിരിക്കുന്നത്. വിവിധ രാജ്യങ്ങളിൽ ശാഖകളുള്ള ഓർഗനൈസ്ഡ് ക്രൈം ആൻഡ് കറപ്ഷൻ റിപ്പോർട്ടിങ് പ്രൊജക്ട് എന്ന കൂട്ടായ്മയാണ് പുതിയ തെളിവുകൾ പുറത്തുവിട്ടത്. അദാനിയുടെ കുടുംബവുമായി ബന്ധമുള്ള രണ്ടുപേർ വഴി വിദേശത്തെ നിഴൽ കമ്പനികളിലൂടെ അദാനിയുടെ കമ്പനികളിൽ തന്നെ തിരിച്ച് നിക്ഷേപം നടത്തിയെന്നാണ് റിപ്പോർട്ടിലെ പ്രധാന കണ്ടെത്തൽ.

'എമേർജിങ് ഇന്ത്യ ഫോക്കസ് ഫണ്ട്', ഇ.എം റീസർജന്റ് ഫണ്ട് എന്നിവയിൽ വിനോദ് അദാനിയുടെ യു.എ.ഇയിലെ പങ്കാളി നാസിർ അലി ഷാബാൻ അലിയും തായ്‌വാനിലെ പങ്കാളി ചാങ്ചുങ് ലിങ്ങും പണമിറക്കിയതിന്റെ തെളിവുകളാണ് ഇന്നലെ ഒ.സി.സി.ആർ.പി പുറത്തുവിട്ടത്. ഇക്കാര്യം സ്ഥിരീകരിക്കുന്ന ഐ.സി.ജെ, ആദാനി ഗ്രൂപ്പുമായി വിദേശികൾ നേരിട്ട് ഇടപാടുകൾ നടത്തിയെന്നും അദാനി കമ്പനിയുമായി ബന്ധപ്പെട്ട ഉദ്യോഗസ്ഥന് വിദേശികൾ അധികാരപത്രം നൽകിയിരുന്നുവെന്നും പറയുന്നു.

അദാനി ഗ്രൂപ് തലവൻ ഗൗതം അദാനിയുടെ ജ്യേഷ്ഠൻ വിനോദ് അദാനിയുടെ വ്യവസായ പങ്കാളികളും സുഹൃത്തുക്കളുമൊത്തു ചേർന്ന് അദാനി ഗ്രൂപ്പിന്റെ ഓഹരി മൂല്യത്തിൽ തട്ടിപ്പിലൂടെ വർധനവുണ്ടാക്കിയതെങ്ങനെയെന്ന് വ്യക്തമാക്കുന്നതാണ് ഒ.സി.സി.ആർ.പി കണ്ടെത്തൽ. ഓഹരി വിപണിയെ പിടിച്ചുലച്ച ഹിൻഡൻബർഗ് റിപ്പോർട്ടിലെ കണ്ടെത്തലുകൾ ശരിയെന്ന് തെളിയിക്കുന്നതു കൂടിയാണ് ദി ഗാർഡിയൻ, ഫിനാൻഷ്യൽ ടൈംസ് തുടങ്ങിയ അന്തർദേശീയ പത്രങ്ങൾ അടങ്ങുന്ന ഈ അന്വേഷണ കൂട്ടായ്മയുടെ പുതിയ റിപ്പോർട്ട്.

റിപ്പോർട്ടിലെ സുപ്രധാന കണ്ടെത്തൽ:
2010-2013 കാലയളവിൽ അദാനി ഗ്രൂപ്പിന്റെ മഹാരാഷ്ട്രയിലെയും രാജസ്ഥാനിലെയും രണ്ട് ഊർജ നിലയങ്ങൾക്കായി ചൈനയിൽ നിന്നും കൊറിയയിൽ നിന്നും ഉപകരണങ്ങൾ ഇറക്കുമതി ചെയ്തിരുന്നു. ഇവ മിക്കതും അദാനിയുടെ തുറമുഖങ്ങളിലുമായിരുന്നു. എന്നാൽ, ഇറക്കുമതി ചെയ്ത ഉപകരണങ്ങളുടെ ഒറിജിനൽ ഇൻവോയ്‌സ് ഇന്ത്യയിൽ നൽകാതെ ഷാർജയിൽ വിനോദ് അദാനിയുടെ പേരിലുള്ള 'ഇലക്ട്രിജൻ ഇൻഫ്ര എഫ്.ഇസെഡ്.ഇ' എന്ന കമ്പനിയിലേക്കാണ് പോയത്.

തുക ഇരട്ടിവരെ കൂട്ടിയിട്ട് 'ഇലക്ട്രിജൻ ഇൻഫ്ര എഫ്.ഇസെഡ്.ഇ'യുടെ പേരിലുള്ള മറ്റൊരു ഇൻവോയ്‌സ് ഇന്ത്യയിലെ ഗൗതം അദാനിയുടെ കമ്പനിക്ക് നൽകി. കൂട്ടിനൽകിയ തുക ഇന്ത്യയിലെ അദാനി കമ്പനി ഷാർജയിലെ അദാനി കമ്പനിക്ക് നൽകിയശേഷം യഥാർഥ തുക ബിൽ തുക മാത്രം ചൈനയിലേക്കും കൊറിയയിലേക്കുമൊക്കെ അയച്ച് ബാക്കി തുക യു.എ.ഇ കമ്പനി കൈവശം വെച്ചു. ഏകദേശം 6300ഓളം കോടി ഇന്ത്യൻ രൂപ ഇത്തരത്തിൽ കടത്തിയത് 2013ൽ ഡയറക്ടറേറ്റ് ഓഫ് റവന്യൂ ഇന്റലിജന്റ് (ഡി.ആർ.ഐ) കണ്ടെത്തിയിരുന്നു. നടപടികൾ ഒന്നും ഉണ്ടായില്ല.

യു.എ.ഇയിൽ നിന്ന് ഈ തുക വിനോദ് അദാനിയുടെ മൊറീഷ്യസിലെ കമ്പനിയിലേക്ക് മാറ്റി. ഈ കമ്പനി വിനോദ് അദാനി പുതുതായി തുടങ്ങിയ മറ്റൊരു കമ്പനിക്ക് 100 ദശലക്ഷം ഡോളർ വായ്പ നൽകി. ആ തുക ബർമുഡയിലെ 'ഗ്ലോബൽ ഓപർചുനിറ്റീസ് ഫണ്ടി'ലേക്ക് മാറ്റി. അതേ തുക തിരിച്ച് മൊറീഷ്യസിലേക്കുതന്നെ കൊണ്ടുവന്ന് 'എമേർജിങ് ഇന്ത്യ ഫോക്കസ് ഫണ്ട്', ഇ.എം റീസർജന്റ് ഫണ്ട് എന്നിവയിൽ നിക്ഷേപിച്ചു. ഓഹരിത്തട്ടിപ്പിന് അദാനി ഉപയോഗിച്ചുവെന്ന് ഹിൻഡൻബർഗ് റിപ്പോർട്ടിൽ ചൂണ്ടിക്കാട്ടിയ രണ്ടു ഫണ്ടുകളാണിവ.

വിനോദ് അദാനിയുടെ യു.എ.ഇയിലെ പങ്കാളി നാസിർ അലി ഷാബാൻ അലിയും തായ്‌വാനിലെ പങ്കാളി ചാങ്ചുങ് ലിങ്ങുമായിരുന്നു ഈ രണ്ട് ഫണ്ടിലും കൂടുതൽ പണമിറക്കിയത്. രണ്ട് ഫണ്ടുകളും 2013-18 കാലയളവിൽ നാല് അദാനി കമ്പനികളിലെ ഓഹരികൾ വാങ്ങിക്കൂട്ടി. യു.എ.ഇ, മൊറീഷ്യസ്, സിംഗപ്പൂർ, സൈപ്രസ്, ബഹാമസ്, കീമെൻ ദ്വീപുകൾ, ബ്രിട്ടീഷ് വിർജിൻ ദ്വീപുകൾ തുടങ്ങിയ രാജ്യങ്ങളിൽ ദുരൂഹമായ നിരവധി കമ്പനികൾ വിനോദ് അദാനിക്കുണ്ടെന്നാണ് റിപ്പോർട്ടർമാർ പറയുന്നത്.

Stories you may Like

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

More News in this category+

MNM Recommends +

Go to TOP