മാധ്യമം ദിനപ്പത്രം അടച്ചുപൂട്ടുന്നുവെന്നത് കുപ്രചാരണമെന്ന് മാനേജ്മെന്റ്; ഇല്ലാക്കഥകളു...

മാധ്യമം ദിനപ്പത്രം അടച്ചുപൂട്ടുന്നുവെന്നത് കുപ്രചാരണമെന്ന് മാനേജ്മെന്റ്; ഇല്ലാക്കഥകളുമായി രംഗത്തു വന്നിരുക്കുന്നത് ഒരു ജനപക്ഷ മാധ്യമത്തിന്റെ വളർച്ചയിൽ അലോസരവും അസൂയയുമുള്ള തൽപരകക്ഷികൾ; വ്യാജപ്രചാരണം നടത്തുന്ന ഓൺലൈൻ മാധ്യമങ്ങൾക്കെതിരെ നിയമ നടപടി സ്വീകരിക്കും; പത്രത്തിൽ പ്രതിസന്ധിയില്ലെന്നും പുരോഗതിയുടെ പാതയിലാണെന്നും മാധ്യമം മാനേജ്മെന്റ്

November 07, 201802:37 PM IST Permalink

മറുനാടൻ ഡെസ്‌ക്‌

കോഴിക്കോട്: പോപ്പുലർ ഫ്രണ്ടിന്റെ മുഖപത്രമായ തേജസ് അടച്ചുപൂട്ടാൻ തീരുമാനിച്ചെന്നതിന് പിന്നാലെ സോഷ്യൽ മീഡിയയിൽ അടക്കം പ്രചരിച്ച വാർത്തകളിൽ ഒന്നാണ് ജമാഅത്തെ ഇസ്ലാമിയുടെ നിയന്ത്രണത്തിലുള്ള മാധ്യമം പത്രവും സാമ്പത്തിക പ്രതിസന്ധിമൂലം അടച്ചുപൂട്ടുന്നുവെന്നത്. എന്നാൽ ഇത് കല്ലൂവെച്ച നുണയാണെന്നും മാധ്യമം പത്രത്തിന്റെ ജനപക്ഷ ഇടപെടലുകളിൽ എതിർപ്പുള്ളവർ നടത്തുന്ന കുപ്രാചാരണമാണെന്നും മാധ്യമം മാനേജ്മെന്റ് വ്യക്തമാക്കി. വ്യാജ വാർത്തകൾക്ക് നേതൃത്വം നൽകുന്ന ഓൺലൈൻ മാധ്യമങ്ങൾക്കെതിരെയും സോഷ്യൽ മീഡിയ പ്ലാറ്റ്ഫോമുകളിൽ അതിന്റെ പ്രചാരണം ഏറ്റെടുക്കുന്നവർക്കെതിരെയും അപകീർത്തിക്കേസ് അടക്കമുള്ള നിയമ നടപടികളുമായി മുന്നോട്ടു പോകുമെന്ന് മാധ്യമം മാനേജ്മന്റെ് വ്യക്തമാക്കി.

മാധ്യമം ഓൺലൈനിൽ ഇതുസംബന്ധിച്ച് വന്ന വാർത്ത ഇങ്ങനെയാണ്.

സോഷ്യൽ മീഡിയയിലെ വ്യാജ പ്രചാരണം: മാധ്യമം നിയമനടപടിക്ക്
കോഴിക്കോട്: മൂല്യാധിഷ്ഠിത പത്രപ്രവർത്തനത്തിലൂടെയും ജനോപകാരപ്രദമായ സാമൂഹിക പങ്കാളിത്ത സംരംഭങ്ങളിലൂടെയും മലയാളി മനസ്സിൽ മുൻ നിര സ്ഥാനം നേടിയ 'മാധ്യമ'ത്തിനെതിരെ സാമൂഹിക മാധ്യമങ്ങളിലൂടെ ചിലർ നടത്തിവരുന്ന വ്യാജ പ്രചാരണങ്ങളെ ശക്തമായി നേരിടുമെന്ന് മാനേജ്മന്റെ് വ്യക്തമാക്കി. കേരളത്തിന്റെ രാഷ്ട്രീയ സാമൂഹിക മണ്ഡലങ്ങളിൽ സജീവ ഇടപെടലുമായി മുന്നേറുന്ന പത്രത്തിനെതിരെ നിക്ഷിപ്ത താൽപര്യക്കാർ പടച്ചുണ്ടാക്കുന്ന വ്യാജ കഥകൾ പ്രബുദ്ധരായ മാധ്യമ സ്നേഹികൾ തള്ളിക്കളയും.

മൂന്നു പതിറ്റാണ്ടു കൊണ്ട് കേരളത്തിൽ ഏഴും ഗൾഫിൽ എട്ടും എഡിഷനുകളിലായി 'മാധ്യമം' പടർന്നു പന്തലിച്ചത് വാർത്തയിലും വീക്ഷണത്തിലും പുലർത്തിയ വേറിട്ട മാനവിക നിലപാടിലൂടെയാണ്. വർഗീയതക്കും തീവ്രവാദത്തിനുമെതിരെ ജനാധിപത്യ മതനിരപേക്ഷ മൂല്യങ്ങളുയർത്തിപ്പിടിച്ച് ശബ്ദമില്ലാത്തവർക്ക് ശബ്ദം പകരാൻ നടത്തിയ അക്ഷീണയത്നത്തിലൂടെയാണ് 'മാധ്യമ'ത്തെ ലോകമെമ്പാടുമുള്ള മലയാളികൾ നെഞ്ചേറ്റിയത്. പ്രവാസ ലോകത്തെ പ്രചാരത്തിൽ 'മാധ്യമം' ഒന്നാമത്തെ പത്രമായതും മലയാളി പ്രബുദ്ധതയുടെ അജണ്ട നിശ്ചയിക്കുന്ന സ്വാധീനം നേടിയതും അങ്ങനെയാണ്.

പത്രത്തിന്റെ സാമൂഹിക സുരക്ഷാ പദ്ധതികളും 'അക്ഷര വീട്' അടക്കമുള്ള ജനകീയ പരിപാടികളും കേരളം ഏറ്റെടുത്തു. കേരളത്തിന്റെ പ്രവാസ ലോകത്തെ അംബാസഡറായ 'മാധ്യമ'ത്തിന് ഷാർജ ഭരണകൂടം അംഗീകാരം നൽകിയത് ഈയിടെയാണ്. കേരളത്തിലെ വിവിധ എഡിഷനുകളിൽ വായനക്കാരുടെ വർധനക്ക് അനുസരിച്ച് അച്ചടി രംഗത്തെ അടിസ്ഥാന സൗകര്യങ്ങൾ വിപുലപ്പെടുത്തി വരികയാണ്. മലപ്പുറത്തും തിരുവനന്തപുരത്തും മികച്ച പ്രിന്റിങ്ങ് സംവിധാനത്തിന് തുടക്കം കുറിച്ചു. കൊച്ചിയിൽ കൂടുതൽ മികച്ച പ്രിന്റിങ് പ്രസ് ഉടൻ കമ്മിഷൻ ചെയ്യും. കണ്ണൂരിലും കോഴിക്കോട്ടും വിപുലമായ അച്ചടി സമുച്ചയത്തിന്റെ പരിപാടികളുമായി മുന്നോട്ടു പോകുന്നു.

ഈ സന്ദർഭത്തിൽ നിലവിലെ വഷളായ രാഷ്ട്രീയ സാമൂഹിക ചുറ്റുപാടിൽ ജനപക്ഷ മാധ്യമത്തിന്റെ സാന്നിധ്യത്തിൽ അലോസരവും അസൂയയുമുള്ള തൽപരകക്ഷികൾ ഇല്ലാക്കഥകളുമായി രംഗത്തു വന്നിരിക്കുകയാണ്. വിവിധ വിഷയങ്ങളിൽ മാധ്യമം സ്വീകരിച്ചു വരുന്ന ജനാധിപത്യ സമീപനത്തോട് വിരോധമുള്ള വിരുദ്ധ കേന്ദ്രങ്ങൾ ഒരു പോലെ ഈ വ്യാജ പ്രചാരണത്തിൽ കണ്ണി ചേർന്നത് കൗതുകകരമാണ്. മാധ്യമത്തിനെതിരായ വ്യാജ വാർത്തകൾക്ക് നേതൃത്വം നൽകുന്ന ഓൺലൈൻ മാധ്യമങ്ങൾക്കെതിരെയും സോഷ്യൽ മീഡിയ പ്ലാറ്റ്ഫോമുകളിൽ അതിന്റെ പ്രചാരണം ഏറ്റെടുക്കുന്നവർക്കെതിരെയും അപകീർത്തിക്കേസ് അടക്കമുള്ള നിയമ നടപടികളുമായി മുന്നോട്ടു പോകുമെന്ന് മാനേജ്മെന്റ് വ്യക്തമാക്കി.

Stories you may Like

Readers Comments+

മലയാളത്തിൽ ടൈപ്പ്‌ ചെയ്യാൻ ഇവിടെ ക്ലിക്ക്‍ ചെയ്യുക

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

Forex Rate:

മറുനാടൻ ഡെസ്‌ക്‌

Stories you may Like

Readers Comments+

More News in this category+

MNM Recommends +