Forex Rate:

1 usd = 76.25 inr 1 gbp = 94.16 inr 1 eur = 85.23 inr 1 aed = 20.76 inr 1 sar = 20.32 inr 1 kwd = 247.66 inr
Sep / 202020Sunday

ആദ്യം ഒരു കോടി നൽകി... പിന്നാലെ 65 ലക്ഷം കൊടുത്തു വിട്ടു..... കഴിഞ്ഞ നോമ്പിന് നൽകിയത് 40 ലക്ഷം... 25 ലക്ഷം വീതം വർഷം തോറും കൊടുക്കുമെന്ന് പറഞ്ഞത് ഒരു കോടി വീതമാക്കി; ഒടുവിൽ ഇതാ നോമ്പ് സമ്മാനവുമായി ചെന്ന യൂസഫലി പറയുന്നു മക്കൾ ഉപേക്ഷിച്ച അമ്മമാരെ നോക്കാൻ അഞ്ച് കോടി മുടക്കി ഞാൻ ഒരു കെട്ടിടം പണിയുമെന്ന്; ഭൂമിയിലെ സ്വർഗ്ഗത്തിൽ വീണ്ടും ആഹ്ലാദത്തിന്റെ നിമിഷങ്ങൾ

ആദ്യം ഒരു കോടി നൽകി... പിന്നാലെ 65 ലക്ഷം കൊടുത്തു വിട്ടു..... കഴിഞ്ഞ നോമ്പിന് നൽകിയത് 40 ലക്ഷം... 25 ലക്ഷം വീതം വർഷം തോറും കൊടുക്കുമെന്ന് പറഞ്ഞത് ഒരു കോടി വീതമാക്കി; ഒടുവിൽ ഇതാ നോമ്പ് സമ്മാനവുമായി ചെന്ന യൂസഫലി പറയുന്നു മക്കൾ ഉപേക്ഷിച്ച അമ്മമാരെ നോക്കാൻ അഞ്ച് കോടി മുടക്കി ഞാൻ ഒരു കെട്ടിടം പണിയുമെന്ന്; ഭൂമിയിലെ സ്വർഗ്ഗത്തിൽ വീണ്ടും ആഹ്ലാദത്തിന്റെ നിമിഷങ്ങൾ

ആവണി ഗോപാൽ

കൊല്ലം : ഭൂമിയിലെ സ്വർഗ്ഗമാണ് പത്തനാപുരത്തെ ഗാന്ധിഭവൻ. ആരുമില്ലാത്തവർക്ക് ആശ്വാസമാകുന്ന അശരണരുടെ കേന്ദ്രം. ഇവിടേക്ക് വീണ്ടും കാരുണ്യവുമായി എത്തുകയാണ് ലുലു ഗ്രൂപ്പ് ചെയർമാൻ എം.എ. യൂസഫലി. പരിശുദ്ധ റംസാൻ വ്രതാനുഷ്ഠാനത്തിന്റെ ആരംഭദിനത്തിൽ പത്തനാപുരം ഗാന്ധിഭവനിലെ അന്തേവാസികൾക്ക് യൂസഫലിയുടെ കാരുണ്യവർഷം എത്തുകയാണ്. മുമ്പും പത്താനാപുരം ഗാന്ധിഭവനെ യൂസഫലി കൈയയച്ച് സഹായിച്ചിരുന്നു. ലോകത്തെ അതിസമ്പന്നതയുടെ കൊടുമുടിയിൽ നിൽക്കുമ്പോൾ പാവങ്ങൾക്ക് താങ്ങാവാൻ യൂസഫലി എന്നും താൽപ്പര്യം കാട്ടുന്നു. ഇതാണ് വീണ്ടും പത്താനാപുരത്തെ അശരണരുടെ കേന്ദ്രത്തിന് തുണയാകുന്നത്.

ഗാന്ധിഭവനിലെ അന്തേവാസികളായ 200 അമ്മമാർക്ക് താമസിക്കുവാനായി അഞ്ചുകോടി രൂപ ചെലവിട്ട് അത്യാധുനിക സൗകര്യങ്ങളുള്ള ബഹുനിലകെട്ടിടം നിർമ്മിച്ചുനൽകും. കൂടാതെ റംസാൻ സമ്മാനമായി 50 ലക്ഷം രൂപയും ലുലു ഗ്രൂപ്പ് ഗാന്ധിഭവന് സമ്മാനിച്ചു. രണ്ടുവർഷം മുമ്പ് ഗാന്ധിഭവൻ സന്ദർശിച്ചപ്പോൾ അവിടുത്തെ അമ്മമാരോടൊപ്പം ചെലവഴിച്ച നിമിഷങ്ങൾ തന്റെ മനസ്സിനെ വല്ലാതെ നൊമ്പരപ്പെടുത്തിയെന്നും, മക്കളുപേക്ഷിച്ച അമ്മമാരുടെ വേദനയാണ് ലോകത്തിലെ ഏറ്റവും വലിയ ദുഃഖമെന്നും എം.എ. യൂസഫലി പറഞ്ഞിരുന്നു. ഏത് പ്രാഞ്ചിയേട്ടനും പറയുന്നത് പോലെ വാക്കുകളിലേക്ക് മാത്രം ഈ പ്രസ്താവന ലുലു മുതലാളി ഒതുക്കിയില്ല. പകരം പറഞ്ഞതു പോലെ പ്രവർത്തിച്ചു. സഹായങ്ങൾ ഗാന്ധിഭവനിലേക്ക് ഒഴുക്കി. ഇതിന്റെ തുടർച്ചയാണ് അപ്രതീക്ഷിത റംസാൻ സമ്മാനവും.

ദൈനംദിനം നിരവധി പേർ അഭയം തേടിയെത്തുന്ന ഗാന്ധിഭവനിൽ ആയിരത്തിലേറെ അന്തേവാസികളും ഇരുനൂറിലധികം സേവനപ്രവർത്തകരുമുണ്ട്. സ്ഥലപരിമിതി മൂലം വീർപ്പുമുട്ടുന്ന സാഹചര്യത്തിലാണ് ഈ അപര്യാപ്തത മനസ്സിലാക്കി യൂസഫലിയുടെ സഹായഹസ്തം വീണ്ടും എത്തിയത്. ഇതിനുമുമ്പ് പലപ്പോഴായി മൂന്നുകോടിയിലധികം രൂപയുടെ സഹായങ്ങളും ലുലു ഗ്രൂപ്പ് ഗാന്ധിഭവന് നൽകിയിരുന്നു. പ്രതിവർഷം ഗാന്ധിഭവന് നൽകുന്ന ഒരു കോടി രൂപയുടെ ഗ്രാന്റ് കൂടാതെയാണ് ഇപ്പോഴത്തെ ഈ സഹായപ്രഖ്യാപനം. അങ്ങനെ അശരണരെ സഹായിക്കുന്നതിൽ പുതിയ മാതൃക സൃഷ്ടിക്കുകയാണ് യൂസഫലി.

ആദ്യസന്ദർശനവേളയിൽ ഗാന്ധിഭവനിൽ ഒരു കെട്ടിടം നിർമ്മിക്കാനായി ഒരു കോടി രൂപ യൂസഫലി സമ്മാനിച്ചിരുന്നു. കിടപ്പുരോഗികൾ ഉൾപ്പെടെ അവശതയുള്ള അമ്മമാർക്ക് എല്ലാ സൗകര്യങ്ങളോടും കൂടി താമസിക്കുവാനുള്ള സംവിധാനങ്ങളാണ് 5 കോടി രൂപ ചെലവിൽ നിർമ്മിക്കുന്ന പുതിയ കെട്ടിടത്തിൽ ഏർപ്പെടുത്തുന്നത്. ഉറ്റവർ കൈവിട്ട് തെരുവിൽ കഴിയേണ്ടിവന്ന അമ്മമാർ ജീവിതാവസാനം വരെ സങ്കടപ്പെടാതെ സുഖമായി ജീവിക്കണമെന്നാണ് തന്റെ ആഗ്രഹമെന്ന് എം.എ. യൂസഫലി ഗാന്ധിഭവനെ അറിയിച്ചു. ഇതിന് വേണ്ടിയാണ് സഹായം നൽകുന്നത്.

ഗാന്ധിഭവനിലെ 34 കുടുംബാംഗങ്ങൾ ഈ വർഷം നോമ്പ് അനുഷ്ഠിക്കുന്നുണ്ട്. അവർക്കാവശ്യമായ എല്ലാ സൗകര്യങ്ങളും ഗാന്ധിഭവനിൽ ഒരുക്കിയിട്ടുണ്ട്. വിപുലമായ ഇഫ്താർ സംഗമവും ഈ നോമ്പുകാലത്ത് ഗാന്ധിഭവനിൽ സംഘടിപ്പിച്ചിട്ടുണ്ട്. എം.എ. യൂസഫലിക്കു വേണ്ടി സെക്രട്ടറി ഇ.എ. ഹാരിസ്, മാനേജർ എൻ. പീതാംബരൻ, മീഡിയ കോ-ഓർഡിനേറ്റർ എൻ.ബി. സ്വരാജ്, ബാബു വർഗ്ഗീസ് എന്നിവർ ഗാന്ധിഭവനിലെത്തി പദ്ധതി പ്രഖ്യാപിക്കുകയും റംസാൻ സഹായമായ അമ്പതുലക്ഷം രൂപയുടെ ഡി.ഡി ഗാന്ധിഭവനിലെ അമ്മമാർക്ക് കൈമാറുകയും ചെയ്തു. ഇതിനൊപ്പമാണ് അഞ്ച് കോടിയുടെ സഹായ വാഗ്ദാനവും എത്തുന്നത്.

ഗാന്ധിഭവന്റെ ചിട്ടയായ പ്രവർത്തനങ്ങളും മതേതര സ്വഭാവവുമാണ് തന്നെ ഏറെ ആകർഷിച്ചതെന്നും യൂസഫലി പറയുന്നു. അന്നുമുതൽ പ്രതിസന്ധിഘട്ടങ്ങളിലെല്ലാം ലുലു ഗ്രൂപ്പിന്റെ അപ്രതീക്ഷിത സഹായങ്ങൾ ഗാന്ധിഭവന് ലഭ്യമായതായി ഗാന്ധിഭവൻ സെക്രട്ടറി ഡോ. പുനലൂർ സോമരാജൻ പറഞ്ഞു. അപൂർവമായ ആ ദാനശീലത്തിന്റെ ഏറ്റവും വലിയ അടയാളമാണ് ഭൂമിയിലെ സ്വർഗത്തിലേയ്ക്ക് യൂസഫലി നടത്തുന്ന നിക്ഷേപം. ലോകത്തെ ഏറ്റവും വലിയ മതേതര കുടുംബം എന്നു പേരെടുത്ത പത്തനാപുരത്തെ ഗാന്ധിഭവനിലേക്ക് യൂസഫലി ഒഴുക്കുന്ന പണത്തിന്റെ കണക്കു കേട്ടാൽ ആരും അത്ഭുതപ്പെടും.

ഒരു കൊല്ലം മുമ്പ് ഗാന്ധിഭവൻ സന്ദർശിക്കാൻ ഇടയായ യൂസഫലി അപ്പോൾ തന്നെ കൈമാറിയത് ഒരു കോടി രൂപ ആയിരുന്നു. എല്ലാവർഷവും 25 ലക്ഷം രൂപ വീതം അന്നദാനത്തിനായി നൽകുമെന്നും പ്രഖ്യാപിച്ചാണ് യൂസഫലി അന്ന് മടങ്ങിയത്. യൂസഫലി തിരിച്ചു ഓഫീസിൽ ചെന്നയുടൻ ഒരു കോടിയുടെ ചെക്ക് ഗാന്ധിഭവനിൽ എത്തി. മാസങ്ങൾക്ക് ശേഷം 25 ലക്ഷം കാത്തിരുന്ന ഗാന്ധിഭവൻ അധികൃതരെ ഞെട്ടിച്ചുകൊണ്ട് യൂസഫലി കൊടുത്തയച്ചത് 65 ലക്ഷം രൂപ ആയിരുന്നു. തീർന്നില്ല ഏറെ വൈകാതെ നോമ്പായപ്പോൾ ഒരു 40 ലക്ഷം കൂടി കൊടുത്തയച്ചു. വിശന്നു വലയുന്ന 1500 പേർക്ക് ദിവസവും നൽകുന്ന സദ്യ ഒരിക്കലും മുടങ്ങരുത് എന്ന ഉറച്ച തീരുമാനത്തെ തുടർന്നായിരുന്നു ഈ 40 ലക്ഷം എത്തിയത്.

ലുലു ഗ്രൂപ്പിന്റെ ഡൽഹി യൂണിറ്റിലെ ലാഭവിഹിതത്തിൽ നിന്നും ഒരു വിഹിതമാണ് എം എ യൂസഫലി പത്തനാപുരത്തിലെ ഗാന്ധി ഭവന് നൽകുന്നത്. ജാതിക്കും മതത്തിനും അതീതമായി പ്രവർത്തിക്കുന്ന മികച്ച സ്ഥാപനമെന്ന നിലയിലാണ് അദ്ദേഹം കൂടുതൽ പണം ഗാന്ധിഭവനായി നൽകുന്നതും. 2016 - ൽ ആദ്യം ഇവിടം സന്ദർശിച്ചത് മുതൽ എം.എ യൂസഫലി ഇവിടുത്തെ ആവശ്യങ്ങൾക്കായി സാമ്പത്തിക സഹായങ്ങൾ നൽകുന്നുണ്ട്. ഒരു വർഷം മുൻപ് അവാർഡ് സ്വീകരിക്കാനായി പത്തനാപുരം ഗാന്ധി ഭവനിൽ എത്തിയപ്പോൾ അവിടുത്തെ കാഴ്ചകൾ കണ്ട് മനം തകർന്ന അദ്ദേഹം ഒരു കോടി രൂപ സംഭാവന നൽകുകയായിരുന്നു. മടങ്ങി പോയി മൂന്നാം നാൾ തന്നെ സംഭാവനനയായി വാഗ്ദാനം ചെയ്ത തുക ജീവനക്കാരൻ മുഖേന എത്തിക്കുകയും ചെയ്തിരുന്നു. ലോകമെമ്പാടും തന്റെ സ്ഥാപനങ്ങൾ മികച്ച രീതിയിൽ മുന്നേറുമ്പോഴും സഹജീവികളെ മറക്കാൻ യൂസഫലി തയ്യാറായില്ല.

തിരുവനന്തപുരത്ത് ലുലു മാളിന്റെ നിർമ്മാണ ഉദ്ഘാടനം കഴിഞ്ഞ ശേഷമാണ് യൂസഫലി ആദ്യമായി പത്തനാപുരത്തെ ഗാന്ധി ഭവനിൽ എത്തിയത്. അശരണർക്ക് ആശ്രയമാകുന്ന സ്ഥാപനം കണ്ട വ്യവസായിക്ക് അവിടുത്തെ കാഴ്ചകൾ അന്ന് ഒരു പുതിയ അനുഭവമായിരുന്നു. മക്കളാൽ ഉപേക്ഷിക്കപ്പെട്ട മാതാപിതാക്കളും നല്ലനിലയിൽ മക്കൾ കഴിയുമ്പോഴും മാതാപിതാക്കളെ വേണ്ടെന്ന് പറഞ്ഞ് തള്ളിക്കളഞ്ഞ വയോധികരുമൊക്കെ അദ്ദേഹത്തിന്റെ കണ്ണു നനച്ചിരുന്നു. തുടർന്നാണ് അശരണരായ നിരവധിപേർക്ക് താങ്ങാകുന്ന സ്ഥാപനത്തിന് സഹായമായി യൂസഫലി രംഗത്തെത്തിയത്.

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

More News in this category+

MNM Recommends +

Loading...
Go to TOP