Forex Rate:

1 usd = 76.25 inr 1 gbp = 94.16 inr 1 eur = 85.23 inr 1 aed = 20.76 inr 1 sar = 20.32 inr 1 kwd = 247.66 inr
Nov / 202024Tuesday

ഗവർണറും ബിജെപി സംസ്ഥാന അദ്ധ്യക്ഷനുമൊക്കെയായ ആളെ എൽകെജിയിൽ ഇരുത്തിയത് ബുദ്ധിയോ കുബുദ്ധിയോ? ക്ഷേത്ര ഭരണം രാഷ്ട്രീയ വിമുക്തമാക്കണം എന്നതാണ് മുദ്രാവാക്യം; സജീവ രാഷ്ട്രീയത്തിലുള്ളവരെ ക്ഷേത്രത്തിൽ നിയമിക്കുന്നത് പാപ്പരത്തമാകില്ലേ? ശ്രീപത്മനാഭസ്വാമി ക്ഷേത്രഭരണ സമിതി അംഗമാക്കിയത് കുമ്മനത്തെ ഒതുക്കാനുള്ള നീക്കമോ?

ഗവർണറും ബിജെപി  സംസ്ഥാന അദ്ധ്യക്ഷനുമൊക്കെയായ ആളെ എൽകെജിയിൽ  ഇരുത്തിയത് ബുദ്ധിയോ കുബുദ്ധിയോ? ക്ഷേത്ര ഭരണം രാഷ്ട്രീയ വിമുക്തമാക്കണം എന്നതാണ്  മുദ്രാവാക്യം; സജീവ രാഷ്ട്രീയത്തിലുള്ളവരെ ക്ഷേത്രത്തിൽ നിയമിക്കുന്നത് പാപ്പരത്തമാകില്ലേ?  ശ്രീപത്മനാഭസ്വാമി ക്ഷേത്രഭരണ സമിതി അംഗമാക്കിയത് കുമ്മനത്തെ ഒതുക്കാനുള്ള നീക്കമോ?

എം മനോജ് കുമാർ

തിരുവനന്തപുരം: ബിജെപി മുൻ സംസ്ഥാന അധ്യക്ഷൻ കുമ്മനം രാജശേഖരനെ ശ്രീപത്മനാഭസ്വാമി ക്ഷേത്രഭരണ സമിതി അംഗമായി നിയമിച്ച കേന്ദ്രസർക്കാർ നടപടിയിൽ പരിവാറിൽ വിവാദം പുകയുന്നു. കേന്ദ്ര മന്ത്രി പദവിയോ പുനഃസംഘടനയിൽ ദേശീയ ഉപാധ്യക്ഷ സ്ഥാനമോ പ്രതീക്ഷിച്ച് നിന്ന കുമ്മനത്തിനു ഇതൊന്നും നൽകാതെ പദവി നൽകുന്നു എന്ന രീതിയിൽ ശ്രീപത്മനാഭസ്വാമി ക്ഷേത്രഭരണ സമിതി അംഗമായി കേന്ദ്ര സർക്കാർ നിയമിച്ചതിലാണ് പ്രതിഷേധം പുകയുന്നത്. ബിജെപിയുടെ വാട്‌സ് അപ്പ് ഗ്രൂപ്പുകളിൽ എതിരായിട്ടും അനുകൂലമായിട്ടും സന്ദേശങ്ങൾ പ്രവഹിക്കുന്നുണ്ട്. കുമ്മനത്തിനെ ഒതുക്കാനുള്ള നീക്കമെന്നും എന്നാൽ ഹിന്ദു നേതാവെന്ന നിലയിൽ കുമ്മനത്തിനു അർഹമായ സ്ഥാനമാണ് നൽകിയതെന്നും അഭിപ്രായങ്ങൾ ഉയരുന്നുണ്ട്. രൂക്ഷമായ അഭിപ്രായ വ്യത്യാസങ്ങൾ പരിവാറിൽ നിന്നും ഉയരുമ്പോൾ കുമ്മനത്തിനു നൽകിയ ഈ പദവിയും വിവാദത്തിലേക്ക് നീങ്ങുകയാണ്.

ഗവർണറും ബിജെപിയുടെ സംസ്ഥാന അദ്ധ്യക്ഷനും ഒക്കെ ആയിരുന്ന ആളെ എൽകെജിയിൽ ഇരുത്തിയത് ബുദ്ധിയോ കുബുദ്ധിയോ? ക്ഷേത്ര ഭരണം രാഷ്ട്രീയ വിമുക്തമാക്കണം എന്നതാണ് നമ്മുടെ മുദ്രാവാക്യം. സജീവ രാഷ്ട്രീയത്തിലുള്ളവരെ നിയമിക്കുന്നത് നമ്മുടെ പാപ്പരത്തമായി വ്യാഖ്യാനിക്കപ്പെടും. കുമ്മനത്തെ പോലെ ഉന്നത ഭരണഘടനാ പദവിയിവിരുന്നയാളെ അബല കമ്മിറ്റിയിൽ അംഗമാക്കിയത് വലിയ കഷ്ടമായിപ്പോയി തുടങ്ങിയ കമന്റുകൾ ആണ് സോഷ്യൽ മീഡിയാ ഗ്രൂപ്പുകളിൽ പ്രത്യക്ഷപ്പെട്ടു തുടങ്ങിയിരിക്കുന്നത്. ശ്രീപത്മനാഭസ്വാമി ക്ഷേത്ര ഭരണസമിതി അംഗമായി കേന്ദ്ര സർക്കാർ നിയമിച്ച കേന്ദ്ര ഉത്തരവ് വന്നതിനൊപ്പം തന്നെയാണ് ആറന്മുള പൊലീസ് സാമ്പത്തിക തട്ടിപ്പ് കേസിൽ കുമ്മനത്തെ പ്രതിയാക്കി എഫ്‌ഐആർ രജിസ്റ്റർ ചെയ്ത വിവരവും പുറത്ത് വരുന്നത്. ആറന്മുള സ്വദേശിയിൽ നിന്ന് 28.75 ലക്ഷം തട്ടിച്ചെന്ന പരാതിയിലാണ് കുമ്മനത്തെ അഞ്ചാം പ്രതിയാക്കി ജാമ്യമില്ലാ വകുപ്പ് പൊലീസ് എഫ്‌ഐആർ രജിസ്റ്റർ ചെയ്തത്. ഇതോടെ വിവാദത്തിനു എരിവും പുളിയും വരുകയും ചെയ്തു.

നിലവിൽ ഒരു പദവിയിലും ഇല്ലാത്ത അവസ്ഥയിൽ നിൽക്കുമ്പോഴാണ് കുമ്മനത്തിനെ ശ്രീപത്മനാഭസ്വാമി ക്ഷേത്രഭരണ സമിതി അംഗമായി കേന്ദ്ര സർക്കാർ നോമിനേറ്റ് ചെയ്യുന്നത്. മുൻപ് നാമനിർദ്ദേശം ചെയ്ത ഹരികുമാരൻ നായരെ മാറ്റി പുതിയ ഉത്തരവ് ഇറക്കിയാണ് കുമ്മനത്തിനെ സമിതി അംഗമാക്കിയത്. മിസോറാം ഗവർണർ പദവി രാജിവെച്ച് കേരളത്തിൽ എത്തിയ ശേഷം കുമ്മനത്തിനു മറ്റു പദവികൾ ഒന്നും ദേശീയ നേതൃത്വം നൽകിയിരുന്നില്ല. മോദി സർക്കാർ രണ്ടാമതും അധികാരത്തിൽ വന്നപ്പോൾ ഗവർണർ പദവി ഒഴിഞ്ഞു കാത്തു നിന്നിരുന്ന കുമ്മനം കേന്ദ്രസഹമന്ത്രി പദവി പ്രതീക്ഷിച്ചിരുന്നു. സത്യപ്രതിജ്ഞ ചടങ്ങിലേക്ക് ക്ഷണം കിട്ടിയതിനാൽ കുമ്മനം സത്യപ്രതിജ്ഞ ചടങ്ങിനു ഡൽഹിയിലും എത്തിയിരുന്നു. പക്ഷെ വി.മുരളീധരനെ കേന്ദ്രമന്ത്രിയാക്കുകയാണ് ദേശീയ നേതൃത്വം ചെയ്തത്. അതിനു ശേഷം വരുന്ന ദേശീയ പുന സംഘടനയിൽ കുമ്മനത്തിനു ദേശീയ ഉപാധ്യക്ഷ പദവി ലഭിക്കുമെന്ന് കരുതപ്പെട്ടിരുന്നു. എന്നാൽ എ.പി.അബ്ദുള്ളകുട്ടിയെ ദേശീയ ഉപാധ്യക്ഷനാക്കുകയും ടോം വടക്കനെയും രാജീവ് ചന്ദ്രശേഖറിനെയും വക്താക്കൾ ആക്കി മാറ്റുകയുമാണ് ദേശീയ നേതൃത്വം ചെയ്തത്.

പക്ഷെ ഗവർണർ പദവിയിൽ കുമ്മനത്തെ പ്രതിഷ്ടിച്ചത് ദേശീയ നേതൃത്വമായിരുന്നു. അതിനു ശേഷം സമ്മർദ്ദം മുറുകിയപ്പോൾ സ്വന്തം തീരുമാനം പ്രകാരം രാജിവെച്ച് വന്നു ലോക്‌സഭാ തിരഞ്ഞെടുപ്പിൽ തിരുവനന്തപുരത്ത് സ്ഥാനാർത്ഥിയാവുകയായിരുന്നു കുമ്മനം. ഇതിൽ ദേശീയ നേതൃത്വത്തിനു അതൃപ്തിയുണ്ടായിരുന്നു. എന്നാൽ ഇതൊന്നും കുമ്മനം കാര്യമാക്കിയില്ല. എന്നാൽ കുമ്മനത്തെ പിന്നീട് ദേശീയ നേതൃത്വം പരിഗണിക്കുകയും ചെയ്തില്ല. എന്നാൽ കുമ്മനം കുമ്മനം പദവിക്ക് വേണ്ടി നിൽക്കുന്ന നേതാവ് അല്ലെന്നും അങ്ങനെ ഒരു പ്രത്യേക പദവി ആവശ്യമില്ലെന്നുമാണ് നേതാക്കൾ മറുപടിയായി പറഞ്ഞത്. ഈ ഘട്ടത്തിൽ തന്നെയാണ് കുമ്മനത്തെ ശ്രീപത്മനാഭസ്വാമി ക്ഷേത്രഭരണ സമിതി അംഗമായി നിയമിച്ച കേന്ദ്രസർക്കാരിന്റെ ഉത്തരവും വരുന്നത്. ഇതോടെയാണ് സംഘപരിവാർ ഗ്രൂപുകളിൽ എതിരായും അനുകൂലമായും കമന്റുകൾ പ്രത്യക്ഷപ്പെട്ടു തുടങ്ങിയത്.

ചെങ്ങന്നൂർ ഉപതിരഞ്ഞെടുപ്പ് നടക്കുന്നതിനു തൊട്ടു മുൻപാണ് അന്ന് ബിജെപി അധ്യക്ഷനായിരുന്ന കുമ്മനത്തെ മിസോറാം ഗവർണർ ആക്കി മാറ്റിയത്. കേരള ബിജെപി നേതൃത്വത്തിലെ ആരും തന്നെ ഈ കാര്യം അറിഞ്ഞിരുന്നില്ല. ഗവർണർ ആയ കുമ്മനം തന്നെ വാർത്ത വരുമ്പോഴാണ് കാര്യങ്ങൾ അറിയുന്നത്. ഇതോടെ കുമ്മനം ഡൽഹി വഴി മിസോറാമിലേക്ക് തിരിക്കുകയായിരുന്നു. കുമ്മനത്തെ ഗവർണറാക്കിയതിനെതിരെ ആർഎസ്എസും പാർട്ടി അണികളും രംഗത്തെത്തിയിരുന്നു. ലോക്‌സഭ തെരഞ്ഞെടുപ്പ് പ്രഖ്യാപിച്ചതിനു പിന്നാലെ ഗവർണർ സ്ഥാനം ഉപേക്ഷിച്ച കുമ്മനം തിരുവനന്തപുരം മണ്ഡലത്തിൽ ബിജെപി സ്ഥാനാർത്ഥിയാകുകയും ചെയ്തു.

പക്ഷെ കുമ്മനത്തിന്റെ നടപടിയിൽ ഉള്ള രസക്കേടുകളുടെ പ്രതിഫലനമോ ഗ്രൂപ്പ് വഴക്കുകൾ കാരണമോ കുമ്മനത്തിനു പദവികൾ നൽകുന്നതിൽ ഒരു വൈമനസ്യം കേന്ദ്ര നേതൃത്വം പുലർത്തിയിരുന്നു. ഈ വൈമനസ്യം കേന്ദ്ര നേതൃത്വം ഒഴിവാക്കുകയാണോ അതോ മറ്റു പദവികൾ ഒന്നും നൽകാതെ ഈ പദവിയിൽ തന്നെ കുമ്മനത്തെ കുടിയിരുത്തുകയാണോ എന്ന കാര്യത്തിൽ കേരളത്തിലെ നേതാക്കൾക്കിടയിൽ ചിന്താകുഴപ്പം രൂക്ഷമാണ്. കേരളത്തിലെ നേതാക്കളിൽ വലിയ പ്രതീക്ഷ വെച്ചു പുലർത്താതെ എല്ലാം സ്വന്തം രീതിയിൽ ആലോചിച്ച് ചെയ്യുന്ന രീതിയാണ് കേന്ദ്ര നേതൃത്വം ഏറെ കാലമായി ചെയ്യുന്നത്. അതുകൊണ്ട് തന്നെ എന്താണ് സംഭവിക്കുന്നത് എന്ന കാര്യത്തിൽ കേരള നേതാക്കൾക്ക് വലിയ പിടിപാടുമില്ല. എല്ലാം കാത്തിരുന്നു കാണുക എന്ന രീതിയാണ് കേരള നേതാക്കൾ വെച്ചു പുലർത്തുന്നത്. അതുകൊണ്ട് തന്നെയാണ് പ്രതികരണങ്ങൾ കുമ്മനത്തിന്റെ നിയമനവുമായി ബന്ധപ്പെട്ടുള്ള പ്രതികരണങ്ങൾ അനുസ്യൂതം വാട്‌സ് അപ്പ് ഗ്രൂപ്പുകളിൽ പ്രചരിക്കുന്നത്.

 

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

More News in this category+

MNM Recommends +

Go to TOP