Forex Rate:

1 usd = 76.25 inr 1 gbp = 94.16 inr 1 eur = 85.23 inr 1 aed = 20.76 inr 1 sar = 20.32 inr 1 kwd = 247.66 inr
Jun / 202226Sunday

കായംകുളത്ത് നാഫ്ത എത്തിയാൽ യൂണിറ്റിന് 14 രൂപയ്ക്ക് വൈദ്യുതി കിട്ടും; കൽക്കരി പ്രതിസന്ധി കാലത്ത് പുറത്തു നിന്ന് വാങ്ങുന്നത് യൂണിറ്റിനി് 18 രൂപയ്ക്കും; എൻടിപിസിക്ക് വെറുതെ കൊടുക്കുന്നത് 100 കോടി രൂപയും; 'കായംകുളത്തെ' പ്രതിസന്ധിയിലും മറന്ന് കെ എസ് ഇ ബി

കായംകുളത്ത് നാഫ്ത എത്തിയാൽ യൂണിറ്റിന് 14 രൂപയ്ക്ക് വൈദ്യുതി കിട്ടും; കൽക്കരി പ്രതിസന്ധി കാലത്ത് പുറത്തു നിന്ന് വാങ്ങുന്നത് യൂണിറ്റിനി് 18 രൂപയ്ക്കും; എൻടിപിസിക്ക് വെറുതെ കൊടുക്കുന്നത് 100 കോടി രൂപയും; 'കായംകുളത്തെ' പ്രതിസന്ധിയിലും മറന്ന് കെ എസ് ഇ ബി

മറുനാടൻ മലയാളി ബ്യൂറോ

ആലപ്പുഴ: മറ്റൊരു വൈദ്യുതി വാങ്ങൽ വിസ്മയ കഥ ഇതാ... കായംകുളം താപനിലയം ഉപയോഗപ്പെടുത്താതെ കെഎസ്ഇബി അധിക നിരക്കിൽ പുറത്തുനിന്നു വൈദ്യുതി വാങ്ങുന്നുവെന്നതാണ് പുതിയ വിവാദത്തിന് കാരണം. വൈദ്യുതി വാങ്ങുന്നില്ലെങ്കിലും വാർഷിക സ്ഥിര നിരക്കായി 100 കോടി രൂപ എൻടിപിസിക്കു നൽകുന്നതു തുടരുന്നുമുണ്ട്. എന്നിട്ടും ഈ താപനിലയം ഉപയോഗിക്കുന്നില്ല.

കൽക്കരിക്ഷാമം മൂലമുണ്ടായ വൈദ്യുതി പ്രതിസന്ധി മറികടക്കാൻ കേരളത്തിന് ആശ്രയിക്കാവുന്നത് കായംകുളം, കോഴിക്കോട് നല്ലളം താപനിലയങ്ങളെയാണ്. പൂർണതോതിൽ പ്രവർത്തിപ്പിച്ചാൽ രണ്ടു നിലയങ്ങളിൽനിന്നായി 446 മെഗാവാട്ട് വൈദ്യുതി ലഭിക്കും. നല്ലളം നിലയം ഉടൻ പ്രവർത്തന സജ്ജമാക്കാനുള്ള നീക്കങ്ങൾ തുടങ്ങി. അടുത്ത ആഴ്ചയോടെ മൂലമറ്റത്തും മൂഴിയാറിലും അറ്റകുറ്റപ്പണിക്കായി നിർത്തിയിട്ടിരുന്ന ജനറേറ്ററുകൾ പ്രവർത്തന സജ്ജമാകും. ഇതോടെ, 190 മെഗാവാട്ട് വൈദ്യുതി ഇപ്പോഴുള്ളതിനെക്കാൾ അധികമായി ലഭിക്കും. അപ്പോഴും കായംകുളത്ത് മൗനം തുടരുന്നു.

കായംകുളം നിലയത്തിൽനിന്നു ലഭിക്കുമായിരുന്നതിനെക്കാൾ യൂണിറ്റിന് 6 രൂപ വരെ അധികം നൽകിയാണ് കെഎസ്ഇബി വൈദ്യുതി വാങ്ങുന്നത്. രാജ്യം കടുത്ത വൈദ്യുതി ക്ഷാമത്തിലേക്ക് നീങ്ങുകയാണ്. ഈ സാഹചര്യത്തിൽ കൂടിയാണ് കായംകുളം യൂണിറ്റിന്റെ പൂട്ടിയിടൽ ചർച്ചയാകുന്നത്. നാഫ്തയുടെ വിലയനുസരിച്ച് കായംകുളത്തെ വൈദ്യുതി യൂണിറ്റിന് 12-14 രൂപ നിരക്കിൽ സംസ്ഥാനത്തിനു കിട്ടും. കൽക്കരി ക്ഷാമത്തെത്തുടർന്ന് ഉത്തരേന്ത്യൻ നിലയങ്ങളിൽ നിന്നുള്ള വൈദ്യുതിയിൽ കുറവുണ്ടായതു നേരിടാൻ 16-18 രൂപ നിരക്കിലാണ് പുറത്തുനിന്ന് വാങ്ങുന്നത്.

അധിക നിരക്കാകുമെന്ന കാരണത്താൽ കായംകുളം നിലയത്തിൽ നിന്ന് കേരളം വൈദ്യുതി വാങ്ങുന്നില്ലായിരുന്നു. ഇതുമൂലം നിലയത്തിന്റെ പ്രവർത്തനം നിർത്തിവച്ചിരിക്കുകയാണ്. എൻടിപിസിയുമായുള്ള ധാരണ പ്രകാരം ഇനി വൈദ്യുതി വേണ്ടിവന്നാൽ 45 ദിവസം മുൻപ് അറിയിക്കണം. ഇന്ധനമായ നാഫ്ത എത്തിക്കുന്നതുൾപ്പെടെയുള്ള തയ്യാറെടുപ്പുകൾക്കാണിത്. ഇപ്പോഴത്തെ പ്രതിസന്ധി ഏറെ നാൾ നീണ്ടു നിൽക്കാനാണ് സാധ്യത. അതുകൊണ്ട് തന്നെ കായംകുളത്തെ നിലയത്തെ കൂടി കേരളം സമർത്ഥമായി ഉപയോഗിക്കണമെന്നാണ് ഉയരുന്ന ആവശ്യം.

കൽക്കരിക്ഷാമം രൂക്ഷമായതോടെ പവർ എക്‌സ്ചേഞ്ചിൽനിന്നുള്ള വൈദ്യുതിക്ക് വൻ വില നൽകേണ്ടതായുണ്ട്. രാത്രിയിൽ യൂണിറ്റിന് 19.32 രൂപവരെയും പകൽ 14.69 രൂപയും. കേരളത്തിനുള്ളിലെ താപനിലയങ്ങൾ പ്രവർത്തിപ്പിച്ചാൽ ഇതിനെക്കാൾ കുറഞ്ഞവിലയ്ക്ക് വൈദ്യുതി ഉത്പാദിപ്പിക്കാൻ സാധിച്ചേക്കും. നല്ലളം നിലയം പ്രവർത്തിപ്പിക്കാൻ ക്രൂഡ് ഓയിൽ സംസ്‌കരിക്കുന്‌പോൾ ലഭിക്കുന്ന ലോ സൾഫർ ഹെവി സ്റ്റോക്ക് (എൽ.എസ്.എച്ച്.എസ്.) എന്ന ഇന്ധനമാണ് ആവശ്യം. അതു ലഭിച്ചില്ലെങ്കിൽ പകരം ഉപയോഗിക്കാവുന്ന ഇന്ധനം കണ്ടെത്താൻ എണ്ണക്കമ്പനികളുമായി ചർച്ച നടത്തും. നല്ലളം പ്ലാന്റ് പ്രവർത്തനം തുടങ്ങുന്നതോടെ 96 മെഗാവാട്ട് വൈദ്യുതി ലഭിക്കും.

എൻ.ടി.പി.സി.യുടെ കായംകുളം താപവൈദ്യുത നിലയംകൂടി പ്രവർത്തന സജ്ജമാക്കിയാൽ 350 മെഗാവാട്ട് വൈദ്യുതി ലഭിക്കും. പക്ഷേ, ഏഴുവർഷമായി കെ.എസ്.ഇ.ബി. ഇവിടെനിന്നു വൈദ്യുതി വാങ്ങുന്നില്ല. വില കൂടുതലാണെന്നതാണു കാരണം. മൂലമറ്റം, മൂഴിയാർ പവർഹൗസുകളിൽ അറ്റകുറ്റപ്പണിക്കു നിർത്തിയിട്ടിരുന്ന ജനറേറ്ററുകൾ 20, 24 തീയതികളിൽ പ്രവർത്തനസജ്ജമാകും. ഇതോടെ, മൂലമറ്റത്ത് 130 മെഗാവാട്ടും മൂഴിയാറിൽ 60 മെഗാവാട്ടും അധികമായി ലഭിക്കും. ഇതിനൊപ്പം കായംകുളം കൂടി പ്രവർത്തിച്ചാൽ വൈദ്യുതിയിലെ പ്രതിസന്ധിയെ കേരളത്തിന് മറികടക്കാനാകും.

കായംകുളം താപവൈദ്യുത നിലയം അനിശ്ചിതമായി അടച്ചത് ഏപ്രിലോടെയാണ്. അവശേഷിച്ച നാഫ്ത ഇന്ധനം ഉപയോഗിച്ചുള്ള വൈദ്യുതി ഉത്പാദനം പൂർത്തിയാക്കിയാണ് നിലയം അടച്ചത്. പദ്ധതി പ്രദേശത്ത് നാഫ്ത ശേഖരിക്കുന്നുമില്ല. കായംകുളം താപനിലയത്തിൽനിന്ന് ഏഴു വർഷമായി കെ.എസ്.ഇ.ബി. വൈദ്യുതി വാങ്ങുന്നില്ല. നാഫ്തയുടെ വില കൂടുതലായതിനാൽ കായംകുളത്തുനിന്ന് ഉത്പാദിപ്പിക്കുന്ന വൈദ്യുതിയുടെ വിലയും കൂടുതലാണ്. അതിനാലാണ് കായംകുളത്തുനിന്ന് വൈദ്യുതി കെ.എസ്.ഇ.ബി. വാങ്ങാതിരുന്നത്.

എന്നാൽ നിലയത്തിൽ ശേഖരിച്ച നാഫ്ത അവശേഷിക്കുന്നുണ്ടായിരുന്നു. അവശേഷിക്കുന്ന ഈ നാഫ്ത പ്രവർത്തിപ്പിച്ച് തീർക്കുന്നതിനു വേണ്ടി മാർച്ച് ഒന്നു മുതൽ വൈദ്യുതി വാങ്ങാമെന്ന് വൈദ്യുതി ബോർഡ് കരാർ ഉണ്ടാക്കുകയും പത്തുലക്ഷം യൂണിറ്റ് വൈദ്യുതി വാങ്ങുകയും ചെയ്തു. ഏപ്രിലോടു കൂടി അവശേഷിക്കുന്ന നാഫ്ത ഉപയോഗിച്ച് തീർത്തു.

Stories you may Like

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

More News in this category+

MNM Recommends +

Go to TOP