Forex Rate:

1 usd = 76.25 inr 1 gbp = 94.16 inr 1 eur = 85.23 inr 1 aed = 20.76 inr 1 sar = 20.32 inr 1 kwd = 247.66 inr
Jan / 202124Sunday

സ്ത്രീകളുടെ സുരക്ഷയും പുരോഗമനവും സർക്കാരിന്റെ ഉത്തരവാദിത്തമാണെന്ന് യോഗിയെ കൊണ്ട് പറയിച്ചത് രാഹുലിന്റേയും പ്രിയങ്കയുടേയും നേതൃത്വത്തിൽ ഉയർന്ന പ്രതിഷേധ ജ്വാല; പെൺകുട്ടികളേയോ അമ്മമാരേയോ ഉപദ്രവിക്കാൻ ആലോചിക്കുന്നുണ്ടെങ്കിൽ അവരുടെ നാശം ആരംഭിച്ചു കഴിഞ്ഞുവെന്ന് യോഗി; വീഴ്ച വരുത്തി എസ് പി ഉൾപ്പെടെയുള്ള അഞ്ച് പൊലീസുകാർക്ക് സസ്‌പെൻഷൻ; ഹത്രസിലെ ക്രൂരതയിൽ രാജ്യം വീണ്ടും ഒരുമിച്ചപ്പോൾ

സ്ത്രീകളുടെ സുരക്ഷയും പുരോഗമനവും സർക്കാരിന്റെ ഉത്തരവാദിത്തമാണെന്ന് യോഗിയെ കൊണ്ട് പറയിച്ചത് രാഹുലിന്റേയും പ്രിയങ്കയുടേയും നേതൃത്വത്തിൽ ഉയർന്ന പ്രതിഷേധ ജ്വാല; പെൺകുട്ടികളേയോ അമ്മമാരേയോ ഉപദ്രവിക്കാൻ ആലോചിക്കുന്നുണ്ടെങ്കിൽ അവരുടെ നാശം ആരംഭിച്ചു കഴിഞ്ഞുവെന്ന് യോഗി; വീഴ്ച വരുത്തി എസ് പി ഉൾപ്പെടെയുള്ള അഞ്ച് പൊലീസുകാർക്ക് സസ്‌പെൻഷൻ; ഹത്രസിലെ ക്രൂരതയിൽ രാജ്യം വീണ്ടും ഒരുമിച്ചപ്പോൾ

മറുനാടൻ മലയാളി ബ്യൂറോ

ലക്‌നൗ: ഹത്രസ് പീഡനത്തിൽ ഒടുവിൽ യുപി സർക്കാർ കുറ്റമേറ്റു. കേസുമായി ബന്ധപ്പെട്ട് എസ്‌പി ഉൾപ്പെടെ 5 പൊലീസ് ഉദ്യോഗസ്ഥരെ സസ്‌പെൻഡ് ചെയ്തത് കുറ്റസമ്മതമാണ്. അങ്ങനെ ജനരോഷത്തിന് മുന്നിൽ യോഗി സർക്കാരും തലകുനിക്കുകയാണ്. സംഭവത്തെക്കുറിച്ച് അന്വേഷിക്കാൻ ചുമതലപ്പെട്ട പ്രത്യേക അന്വേഷണ സംഘത്തിന്റെ പ്രാഥമിക റിപ്പോർട്ടിന്റെ അടിസ്ഥാനത്തിലാണ് നടപടി. കേസ് കൈകാര്യം ചെയ്തതിൽ പൊലീസിനു വീഴ്ച സംഭവിച്ചതായി റിപ്പോർട്ടിൽ പറയുന്നു. കേസിൽ അറസ്റ്റിലായവർക്കും പെൺകുട്ടിയുടെ കുടുംബാംഗങ്ങൾക്കും നുണപരിശോധന നടത്തണമെന്നും റിപ്പോർട്ടിൽ നിർദേശമുണ്ട്.

ഹത്രസിൽ കൊടുംപീഡനത്തിനിരയായി മരിച്ച ദലിത് പെൺകുട്ടിയുടെ സംസ്‌കാരം യുപി പൊലീസ് ബലംപ്രയോഗിച്ചു നടത്തിയതായി പരാതി ഉയർന്നിരുന്നു. കുടുംബത്തിന്റെ അനുമതി പോലുമില്ലാതെ മൃതദേഹം സംസ്‌കരിച്ചതിൽ രാജ്യവ്യാപക പ്രതിഷേധമുയർന്നു. ദലിത് സംഘടനകൾ ഉൾപ്പെടെയുള്ളവരുടെ പ്രതിഷേധം ഭയന്നാണ് നേരം പുലരും മുൻപ് പൊലീസ് ധൃതിപിടിച്ച് സംസ്‌കാരം നടത്തിയതെന്നാണ് ആരോപണം. ആദ്യമെല്ലാം ഇത് സർക്കാർ നിഷേധിച്ചു. എന്നാൽ വീഡിയോ തെളിവിനൊപ്പം ഉയർന്ന ജനരോഷം കണ്ടില്ലെന്ന് നടിക്കാൻ യോഗി സർക്കാരിനുമായില്ല. അങ്ങനെ പൊലീസിലെ കുറ്റക്കാർക്കെതിരേയും നടപടി വരികയാണ്.

സെപ്റ്റംബർ 14ന് പ്രദേശവാസികളായ നാലംഗ സംഘത്തിന്റെ ക്രൂരപീഡനത്തിന് ഇരയായി ചികിത്സയിലിരിക്കെ ഡൽഹി സഫ്ദർജങ് ആശുപത്രിയിൽവച്ച് ചൊവ്വാഴ്ചാണ് 19കാരിയായ ദലിത് പെൺകുട്ടി മരണത്തിന് കീഴടങ്ങിയത്. സ്ത്രീകളുടെ സുരക്ഷയും പുരോഗമനവും സർക്കാരിന്റെ ഉത്തരവാദിത്തമാണെന്ന് ഉത്തർപ്രദേശ് മുഖ്യമന്ത്രി യോഗി ആദിത്യനാഥ് പ്രഖ്യാപിക്കുകയും ചെയ്തു. ഹത്രസിൽ പെൺകുട്ടി പീഡനത്തിനിരയായി കൊല്ലപ്പെട്ടതിനെത്തുടർന്ന് യുപി സർക്കാരിനെതിരെ ശക്തമായ പ്രതിഷേധം ഉയർന്നതിനിടെയാണ് യോഗിയുടെ പ്രസ്താവന. ഇതിന് മുമ്പോരിക്കലും പൊലീസിനെ കുറ്റപ്പെടുത്താനോ നടപടി എടുക്കാനോ മുതിരാത്ത യോഗിയാണ് അതിശക്തമായി പ്രതികരിക്കുന്നത്.

പെൺകുട്ടികളേയോ അമ്മമാരേയോ ഉപദ്രവിക്കാൻ ആലോചിക്കുന്നുണ്ടെങ്കിൽ അവരുടെ നാശം ആരംഭിച്ചുകഴിഞ്ഞു. ഭാവിയിലേക്ക് മാതൃകയാകുന്ന രീതിയിലുള്ള ശിക്ഷയായിരിക്കും അവർക്ക് ലഭിക്കുക. ഇത് സർക്കാരിന്റെ പ്രതിജ്ഞയും ഉത്തരവാദിത്തവുമായിരിക്കുമെന്നും യോഗി ആദിത്യനാഥ് പറഞ്ഞു. കൊല്ലപ്പെട്ട പെൺകുട്ടിയുടെ കുടുംബവുമായി മുഖ്യമന്ത്രി വിഡിയോ കോൺഫറൻസ് വഴി സംസാരിച്ചു. കുറ്റവാളികൾക്ക് കടുത്ത ശിക്ഷ നൽകുമെന്നും കുടുംബത്തിന് പുതിയ വീടും 25 ലക്ഷം രൂപ സാമ്പത്തിക സഹായവും കുടുംബത്തിലെ ഒരാൾക്ക് സർക്കാർ ജോലിയും അദ്ദേഹം ഉറപ്പു നൽകി. സ്ത്രീകൾക്കും കുട്ടികൾക്കുമെതിരെ ആക്രമണം രൂക്ഷമായതിനുപിന്നാലെയാണ് പ്രസ്താവനയുമായി യോഗി രംഗത്തെത്തിയത്.

ഹത്രസ് സംഭവത്തിനു ശേഷം സംസ്ഥാനത്ത് 14ഉം 11ഉം വയസുള്ള പെൺകുട്ടികൾ പീഡിപ്പിക്കപ്പെട്ടു. ഇതിനിടെ ഹത്രസ് സന്ദർശിക്കാൻ എത്തിയ രാഹുൽ ഗാന്ധിയെ പൊലീസ് തടഞ്ഞുവച്ച് കയ്യേറ്റം ചെയ്തത് രാജ്യവ്യാപകമായി പ്രതിഷേധത്തിന് ഇടയാക്കി. സമാനമായ രീതിയിൽ തൃണമൂൽ കോൺഗ്രസ് എംപിമാരേയും പൊലീസ് തടഞ്ഞു. തൃണമൂൽ കോൺഗ്രസ് എംപി ഡെറിക് ഒബ്രയനെ കയ്യേറ്റം ചെയ്യുകയും ചെയ്തു. പ്രിയങ്ക ഗാന്ധിയുടെ നേതൃത്വത്തിൽ പ്രക്ഷോഭം തുടങ്ങി. ഇതോടെയാണ് വിഷയം രാജ്യാന്തരമായി പുതിയ തലത്തിലേക്ക് ചർച്ചയായത്. ഡൽഹി മുഖ്യന്ത്രി അരവിന്ദ് കെജ്രിവാളും പ്രതിഷേധത്തിന്റെ ഭാഗമായി.

ഹത്രസിൽ നാലംഗ സംഘത്തിന്റെ അതിക്രൂര പീഡനത്തെത്തുടർന്ന് കൊല്ലപ്പെട്ട ദലിത് പെൺകുട്ടി രാജ്യത്തിനുമുന്നിൽ ഉയർത്തുന്ന ചോദ്യങ്ങൾക്കു ജീവന്റെയും ആത്മാഭിമാനത്തിന്റെയും വിലയുണ്ട്. ഇതിനുശേഷവും യുപിയിലടക്കം സമാനസംഭവങ്ങൾ ആവർത്തിക്കപ്പെടുന്നു എന്ന യാഥാർഥ്യം രാജ്യത്തിന് തന്നെ നാണക്കേടാണ്. വീട്ടിൽനിന്നു കഴിഞ്ഞ 14ന് അമ്മയോടൊപ്പം സമീപത്തെ വയലിലേക്കു പോയ പെൺകുട്ടിയെ കാണാതാവുകയായിരുന്നു. ഗുരുതര പരുക്കുകളോടെയാണു പിന്നീടു കണ്ടെത്തിയത്. അതീവഗുരുതരാവസ്ഥയിൽ ഡൽഹി സഫ്ദർജങ് ആശുപത്രിയിൽ പ്രവേശിപ്പിച്ച 19 വയസ്സുകാരി ചൊവ്വാഴ്ച പുലർച്ചെ മരിച്ചതോടെ ഈ ക്രൂരമരണം രാജ്യത്തു പ്രതിഷേധത്തിന്റെ കൊടുങ്കാറ്റിനു കെട്ടഴിച്ചുവിട്ടു.

പെൺകുട്ടിയുടെ സംസ്‌കാരം കുടുംബത്തെ പങ്കെടുപ്പിക്കാതെയും അവരുടെ അനുമതിയില്ലാതെയും യുപി പൊലീസ് ബലംപ്രയോഗിച്ചു നടത്തിയതിൽ രാജ്യവ്യാപക പ്രതിഷേധമാണുണ്ടായത്. അന്ത്യകർമങ്ങൾക്കു സാവകാശം അനുവദിക്കണമെന്ന മാതാപിതാക്കളുടെയും സഹോദരങ്ങളുടെയും അപേക്ഷ വകവയ്ക്കാതെ, പിറ്റേന്നു പുലർച്ചെ രണ്ടരയോടെയാണു പൊലീസ് സംസ്‌കാരം നടത്തിയത്. പെൺകുട്ടിയുടെ മൃതദേഹം അവസാനമായി വീട്ടിലെത്തിച്ച ശേഷം വേണം സംസ്‌കാരമെന്ന അപേക്ഷ നിഷ്‌കരുണം നിരാകരിക്കപ്പെട്ടു.

'ജീവിച്ചിരുന്നപ്പോൾ സംരക്ഷിച്ചില്ല, ആക്രമിക്കപ്പെട്ടപ്പോൾ മതിയായ ചികിത്സ നൽകിയില്ല, മരിച്ചപ്പോൾ അന്ത്യകർമങ്ങൾക്കു പോലും അവസരം നൽകിയില്ല' എന്നിങ്ങനെയുള്ള പ്രതിഷേധസ്വരങ്ങൾ ഉയർന്നു. കോൺഗ്രസ് നേതാക്കളായ രാഹുൽ ഗാന്ധിയുടെയും പ്രിയങ്ക ഗാന്ധിയുടെയും ഹത്രസ് സന്ദർശനത്തെ ലാത്തിച്ചാർജും അറസ്റ്റുമായാണ് പൊലീസ് നേരിട്ടത്. ഫൊറൻസിക് റിപ്പോർട്ടിന്റെ പശ്ചാത്തലത്തിൽ, ഹത്രസിലെ പെൺകുട്ടി ബലാത്സംഗത്തിന് ഇരയായിട്ടില്ലെന്നാണ് പൊലീസ് ഇന്നലെ പറഞ്ഞത്. കണ്ണില്ലാത്ത ക്രൂരതകൊണ്ട് പെൺകുട്ടിയുടെ നട്ടെല്ലിനും ആന്തരികാവയവങ്ങൾക്കുമൊക്കെ ഗുരുതര പരുക്കുണ്ടാക്കി മരണത്തിലേക്കു വലിച്ചെറിഞ്ഞവർക്ക് ഇത്തരം സാങ്കേതികവാദങ്ങൾ കൊണ്ടുകൂടി സംരക്ഷണം നൽകേണ്ട ആവശ്യമെന്താണ്? ശ്വാസംമുട്ടിച്ചു കൊലപ്പെടുത്താൻ ശ്രമിച്ചതു ചെറുത്തതിനിടെ പെൺകുട്ടിയുടെ നാവ് അറ്റുപോകാറായ നിലയിലായിരുന്നുവെന്നു കൂടി കളിയാക്കാൻ ശ്രമിച്ചു.

ഡൽഹി നഗരമധ്യത്തിൽ, ഓടുന്ന ബസിൽ 2012 ഡിസംബറിൽ കൂട്ടമാനഭംഗത്തിനിരയായി പിന്നീടു മരണമടഞ്ഞ പെൺകുട്ടിയെ നിർഭയ എന്നു വിളിച്ചു. ഇനിയാർക്കും ഈ ഗതിവരില്ലെന്ന് രാജ്യം ശപഥവും എടുത്തു. ഇതൊന്നും ഇന്നും യഥാർത്ഥ്യമായില്ലെന്ന വസ്തുതയാണ് യുപി ചർച്ചയാക്കുന്നതും. ഉത്തർപ്രദേശിലെ ഹത്രസിൽ കൊല്ലപ്പെട്ട പെൺകുട്ടിക്ക് വേണ്ടി എല്ലാവരുടെയും ശബ്ദം ഉയരണമെന്ന് എഐസിസി ജനറൽ സെക്രട്ടറി പ്രിയങ്ക ഗാന്ധി ആവശ്യപ്പെട്ടിരുന്നു കുടുംബത്തിനു നീതി ലഭിക്കും വരെ പോരാട്ടം തുടരും. പെൺകുട്ടിക്ക് ആദരം അർപ്പിച്ച് വാൽമീകി മന്ദിറിൽ നടന്ന പ്രാർത്ഥനാ സംഗമത്തിനും പ്രിയങ്ക നേതൃത്വം നൽകി.

നേരത്തെ ഇവിടെ ധർണ ഇരിക്കാനായിരുന്നു തീരുമാനിച്ചിരുന്നതെങ്കിലും പൊലീസ് അനുമതി നിഷേധിക്കുകയായിരുന്നു. കൊല്ലപ്പെട്ട ഹത്രസിലെ പെൺകുട്ടിയുടെ വീട് സന്ദർശിക്കാൻ ഉത്തർപ്രദേശിലേക്ക് പോയ പ്രിയങ്കയേയും രാഹുൽ ഗാന്ധിയേയും വ്യാഴാഴ്ച പൊലീസ് യമുന എക്‌സപ്രസ് വേയിൽ തടഞ്ഞിരുന്നു. തുടർന്ന് നടന്നു പോകാൻ തുനിഞ്ഞ ഇവരെ പൊലീസ് അറസ്റ്റ് ചെയ്ത് മടക്കി അയയ്ക്കുകയായിരുന്നു. ഇതിനിടെ പൊലീസ് രാഹുൽ ഗാന്ധിയെ കയ്യേറ്റം ചെയ്യുകയും ചെയ്തു.

Stories you may Like

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

More News in this category+

MNM Recommends +

Go to TOP