Forex Rate:

1 usd = 76.25 inr 1 gbp = 94.16 inr 1 eur = 85.23 inr 1 aed = 20.76 inr 1 sar = 20.32 inr 1 kwd = 247.66 inr
Oct / 202029Thursday

ആഡംബര ഹോട്ടലിലേത് പോലെ സുഖമായി ഉറങ്ങാം; കോൺഫറൻസുകൾ നടത്താം; അത്യാധുനിക സൗകര്യങ്ങൾ ഉള്ള ബാറായി ഉപയോഗിക്കാം; 19 പേർക്ക് വരെ യാത്ര ചെയ്യാം; ആകാശത്തിലൂടെ പറക്കുന്ന ആ ആഡംബര ഹോട്ടലിൽ യൂസഫലി എട്ടിന് കണ്ണൂരിലെത്തും; ലോകത്തെ അതിസമ്പന്നരായ 450 പേർ മാത്രം സ്വന്തമാക്കിയ ഗൾഫ് സ്ട്രീമിൽ ഉദ്ഘാടനത്തിന് മുമ്പേ ലുലു മുതലാളി മൂർഖൻ പറമ്പിൽ എത്തുമ്പോൾ

ആഡംബര ഹോട്ടലിലേത് പോലെ സുഖമായി ഉറങ്ങാം; കോൺഫറൻസുകൾ നടത്താം; അത്യാധുനിക സൗകര്യങ്ങൾ ഉള്ള ബാറായി ഉപയോഗിക്കാം; 19 പേർക്ക് വരെ യാത്ര ചെയ്യാം; ആകാശത്തിലൂടെ പറക്കുന്ന ആ ആഡംബര ഹോട്ടലിൽ യൂസഫലി എട്ടിന് കണ്ണൂരിലെത്തും; ലോകത്തെ അതിസമ്പന്നരായ 450 പേർ മാത്രം സ്വന്തമാക്കിയ ഗൾഫ് സ്ട്രീമിൽ ഉദ്ഘാടനത്തിന് മുമ്പേ ലുലു മുതലാളി മൂർഖൻ പറമ്പിൽ എത്തുമ്പോൾ

മറുനാടൻ മലയാളി ബ്യൂറോ

കണ്ണൂർ: കണ്ണൂർ വിമാനത്താവളത്തിന്റെ ഉദ്ഘാടനം ഡിസംബർ ഒൻപതിനാണെങ്കിലും എട്ടിന് സ്വകാര്യ ആഡംബരവിമാനം ഇവിടെ ഇറങ്ങും. 360 കോടി വിലയുള്ള വിമാനം. ആകാശത്തെ പഞ്ച നക്ഷത്ര ഹോട്ടലെന്ന് വിളിപ്പേരുള്ള ഗൾഫ് സ്ട്രീം. മൂർഖൻ പറമ്പിലെ വിമാനത്താവളത്തിന്റെ ഉദ്ഘാടനത്തിന് ലുലു ഗ്രൂപ്പ് ചെയർമാനും കിയാൽ ഡയറക്ടറുമായ എം.എ. യൂസഫലി എത്തുക തന്റെ സ്വന്തം വിമാനത്തിൽ ആണ്.

രണ്ടുവർഷം മുൻപ് സ്വന്തമാക്കിയ ഗൾഫ് സ്ട്രീം 550 വിമാനത്തിലാണ് കണ്ണൂരിൽ ലുലു മുതലാളി വരിക. 360 കോടി രൂപ വിലയുള്ള ആഡംബരവിമാനമാണിത്. അമേരിക്കയിലെ ജനറൽ ഡൈനാമിക്സിന്റെ ഉടമസ്ഥതയിലുള്ള ഗൾഫ് സ്ട്രീം എയ്റോസ്പേസാണ് വിമാനത്തിന്റെ നിർമ്മാതാക്കൾ. ഇതിൽ പൈലറ്റിനു പുറമെ 19 പേർക്കുവരെ സഞ്ചരിക്കാം. ആഡംബര ഹോട്ടലിലെ എല്ലാ സൗകര്യങ്ങളും ഉള്ള വിമാനമാണ് ഇത്. ലോകത്ത് അതിസമ്പന്നരായ 450 പേർക്ക് മാത്രമേ ഈ വിമാനം സ്വന്തായി ഉള്ളൂ. നേരത്തെ കൊച്ചി ട്രാവൽ മാർട്ടിനും ഈ വിമാനത്തിലാണ് യൂസഫലി എത്തിയത്. അന്ന് ഈ വിമാനത്തിൽ മുഖ്യമന്ത്രി പിണറായി വിജയനൊപ്പം തിരുവനന്തപുരത്തേക്കും യൂസഫലി യാത്ര ചെയ്തിരുന്നു.

സ്വന്തമായി രണ്ട് വിമാനങ്ങൾ ഉള്ള ഏക മലയാളിയാണ് ലുലു ഗ്രൂപ്പ് തലവൻ എംഎ.യൂസഫലി. മലയാളികളിൽ വച്ചേറ്റവും സമ്പന്നനും യൂസഫലിയുമാണ്. സ്വന്തമായൊരു ജെറ്റുവിമാനമുള്ള യൂസഫലി പുതുതായി ഗൾഫ് സ്ട്രീം 550 വിമാനം കൂടി വാങ്ങിയത് ഏറെ വാർത്തയായിരുന്നു. 360 കോടി രൂപ ചെലവിട്ടാണ് രണ്ടാമത്തെ വിമാനം സ്വന്തമാക്കിയത്. അമേരിക്കയിലെ വെർജീനിയ ആസ്ഥാനമാക്കി പ്രവർത്തിക്കുന്ന ജനറൽ ഡൈനാമികസിന്റെ ഉടമസ്ഥതയിലുള്ള ഗൾഫ് സ്ട്രീം എയ്റോസ്പെയ്സാണ് വിമാനം നിർമ്മിച്ചിരിക്കുന്നത്. 12,501 കിലോമീറ്ററോളം സഞ്ചരിക്കാൻ കഴിയുന്ന യൂസഫലിയുടെ വിമാനത്തിന് മണിക്കൂറിൽ 900 കിലോമീറ്ററാണ് പരമാവധി വേഗത. 12 മണിക്കൂർ വരെ തുടർച്ചയായി പറക്കാൻ കഴിയുമെന്നതാണ് ഗൾഫ് സ്ട്രീം ജെറ്റുകളുടെ സവിശേഷത.

ആകാശയാത്രയിൽ സുഖമായി കിടന്നുറങ്ങാനുള്ള സംവിധാനം ഈ വിമാനത്തിലുണ്ട്. ബിസിനസ്സ് മീറ്റിംഗുകൾ നടത്താം. അതിവേഗ ഇന്റർനെറ്റ് സംവിധാനും ലഭ്യമാകും. അടിച്ചു പൊളി ആഘോഷം നടത്താനുള്ള ബാറായും മാറാൻ ഈ ആഡംബര വിമാനത്തിന് കഴിയും. യാത്രാ സൗകര്യങ്ങൾക്കൊപ്പം ഉടമസ്ഥന്റെ അഭിരുചിക്ക് അനുസരിച്ചുള്ള ഇന്റീരിയറും ഇതിന്റെ ഏറ്റവും വലിയ പ്രത്യേകതയാണ്.

150 കോടി ചെലവിട്ട് രണ്ട് വർഷങ്ങൾക്ക് മുൻപായിരുന്നു ലെഗസി 650 എന്ന വിമാനം യൂസഫലി വാങ്ങിയത്. പതിമൂന്ന് യാത്രക്കാരെ ഉൾക്കൊള്ളുന്ന ഈ വിമാനത്തെ കൂടാതെയാണ് ഗൾഫ് സ്ട്രീം 550 വിമാനവും സ്വന്തമാക്കിയത്. കേരളത്തിൽ ഇതിനു മുൻപ് ജോയ് ആലുക്കാസും മറ്റും ചെറുയാത്രാ വിമാനങ്ങൾ വാങ്ങിയിരുന്നു. എന്നാൽ ഇത്ര വിലയേറിയ വിമാനം വാങ്ങുന്ന ആദ്യ മലയാളി യൂസഫലി തന്നെയായിരുന്നു. 12,501 കിലോമീറ്റർ വരെ പരമാവധി റേഞ്ചുള്ള ഗൾഫ് സ്ട്രീം 550 വിമാന പരമാവധി വേഗത മണിക്കൂറിൽ 488 നോട്ടാണ് (ഏകദേശം 900 കീമി). 12 മണിക്കൂർ വരെ വിമാനത്തിന് നിർത്താതെ സഞ്ചരിക്കാനാവുമെന്നാണ് കമ്പനി അവകാശപ്പെടുന്നത്. കണ്ണൂരിലിറങ്ങുന്ന ആദ്യ ആഡംബര വിമാനമായി യൂസഫലിയുടെ ആഡംബര വിമാനം മാറും.

ഇന്ത്യയിലെ 100 അതിസമ്പന്നരുടെ പട്ടികയിൽ ഏറ്റവും സമ്പന്നനായ മലയാളിയായി യൂസഫലി തുടരുന്നതായും മരുമകൻ ഷംസീർ വയലിൽ 98-ാം സ്ഥാനത്ത് ആദ്യമായി പട്ടികയിൽ ഇടംപിടിക്കുകയും ചെയ്ത വാർത്ത വന്നതിന് പിന്നാലെയാണ് പുതിയൊരു വിമാനംകൂടി അദ്ദേഹം സ്വന്തമാക്കിയ വിവരം പുറത്തുവരുന്നത്. 2016ലായിരുന്നു ഇ് വാങ്ങിയത്. അബുദാബി കേന്ദ്രീകരിച്ച് പ്രവർത്തിക്കുന്ന വിപിഎസ് ഹെൽത്ത് കെയറിന്റെ മാനേജിങ് ഡയറക്ടറായ ഷംസീർ ഇക്കഴിഞ്ഞ ജൂണിൽ ഒരു സ്വകാര്യ വിമാനം സ്വന്തമാക്കിയിരുന്നു. ഇതോടെ യൂസഫലി കുടുംബത്തിന്റെ പക്കൽ മൂന്ന് സ്വകാര്യ വിമാനങ്ങളായി. ജോയ് ആലൂക്കാസ് ഗ്രൂപ്പ് ചെയർമാൻ ജോയ് ആലൂക്കാസ്, കല്യാൺ ജൂവലേഴ്സ് ചെയർമാനും എംഡിയുമായ ടിഎസ് കല്യാണരാമൻ എന്നിവരാണ് നിലവിൽ സ്വന്തമായി വിമാനമുള്ള മറ്റു മലയാളികൾ.

2016 സെപ്റ്റംബറിൽ 25 ദശലക്ഷം ഡോളർ (150 കോടിയോളം രൂപ) ചെലവിട്ട് ആദ്യവിമാനം സ്വന്തമാക്കിയ യൂസഫലി ബ്രസീലിയൻ വിമാനക്കമ്പനിയായ എബ്രയാറിൽ നിന്ന് ലെഗസി 650 വിഭാഗത്തിൽപ്പെട്ട വിമാനമാണ് വാങ്ങിയത്. 14 പേർക്ക് യാത്രചെയ്യാവുന്ന വിമാനമാണിത്. ഗൾഫ് സ്ട്രീം ജി550 ആഡംബര സൗകര്യങ്ങൾ ഏറെയുള്ള വിമാനമാണ്. പ്രമുഖ ഇന്ത്യൻ വ്യവസായി ലക്ഷ്മി മിത്തലിന് ഈ ലക്ഷ്വറി ജെറ്റ് സ്വന്തമായുണ്ട്. റോൾസ് റോയ്സ് എൻജിനുകളുള്ള വിമാനത്തിന് 51,000 അടിവരെ ഉയരത്തിൽ പറക്കാനാകും. രണ്ട് വിമാന ജീവനക്കാരെ ഉൾപ്പെടെ 19 യാത്രക്കാർക്ക് സഞ്ചരിക്കാം. രാജ്യത്തെ ഏറ്റവും വിലകൂടിയ ആഡംബര വിമാനം സ്വന്തമായുള്ളത് മുകേഷ് അംബാനിക്കാണ്. 73 ദശലക്ഷം ഡോളർ വിലമതിക്കുന്ന ബോയിങ് ബിസിനസ് ജെറ്റാണ് അദ്ദേഹത്തിനുള്ളത്. അതുൽ പുഞ്ച്, (ഗൾഫ് സ്ട്രീം - 4), അനിൽ അംബാനി (ബൊംബാർഡിയർ ഗ്ളോബൽ എക്സ്‌പ്രസ്), രത്തൻ ടാറ്റ (ഫാൽകൺ 2000), വിജയ് മല്യ (എയർബസ് എസിജെ 319), ഗൗതം സിംഘാനിയ (ബൊംബാർഡിയർ ചലഞ്ചർ), കെപി സിങ് (ഗൾഫ് സ്ട്രീം 4), എന്നിവരാണ് ഇന്ത്യൻ സമ്പന്നരിൽ സ്വന്തം വിമാനം ഉപയോഗിക്കുന്ന പ്രമുഖർ.

ഫോബ്സ് മാസികയുടെ പുതിയ കണക്കനുസരിച്ചു സമ്പന്നരുടെ ആഗോള റാങ്കിങ്ങിൽ 388ാം സ്ഥാനത്തുള്ള യൂസഫലി ഇന്ത്യക്കാരിൽ പത്തൊമ്പതാമതാണ്. തൃശൂർ ജില്ലയിലെ നാട്ടിക സ്വദേശിയാണ്. 26000 ത്തിനടുത്ത് ഇന്ത്യാക്കാരടക്കം 31,000-ത്തോളം പേർ ജോലി ചെയ്യുന്ന ഗൾഫിലെ പ്രമുഖ വ്യാപാര സ്ഥാപനമായ എം.കെ. ഗ്രൂപ്പിന്റെയും ലുലു ഹൈപ്പർ മാർക്കറ്റ് ഗ്രൂപ്പിന്റെയും മാനേജിങ് ഡയറക്ടറാണ് യൂസഫലി. കൊച്ചി ലേക്ക് ഷോർ ആശുപത്രി ചെയർമാൻ,ധ സാമൂഹ്യരംഗത്തെ സംഭാവനകൾ കണക്കിലെടുത്ത് 2008 ൽ രാജ്യം ഇദ്ദേഹത്തിന് പത്മശ്രീ പുരസ്‌കാരം നൽകി ആദരിച്ചിരുന്നു. പത്തനാപുരം ഗാന്ധി ഭവൻ അടക്കം നിരവധി കേന്ദ്രങ്ങൾക്ക് ആശ്വാസമാണ് യൂസഫലിയുടെ ഇടപെടലുകൾ. കൊച്ചിയിൽ സ്മാർട്സിറ്റി പദ്ധതി കൊണ്ടുവരുന്നതിലും പ്രമുഖ പങ്കുവഹിച്ചു. പ്രവാസി വ്യവസായികളെല്ലാം പ്രാഞ്ചിയേട്ടൻ ചമഞ്ഞ് വാർത്താ പ്രാധാന്യത്തിന് ശ്രമിക്കുന്ന കാലത്താണ് യൂസഫലി ഗാന്ധി ഭവനേയും മറ്റും കൈയയച്ച് സഹായിച്ച് ശ്രദ്ധേയനാകുന്നത്.

തൃശ്ശൂർ നാട്ടിക മുസലിയാം വീട്ടിൽ അബ്ദുൾ ഖാദറിന്റെയും സഫിയയുടെയും മകനായി 1955 നവംബർ 15ന് ജനനം. അബുദാബി ചേംബർ ഓഫ് കൊമേഴ്‌സ് ആൻഡ് ഇൻഡസ്ട്രിയുടെ ഡയറക്ടർ ബോർഡ് അംഗമാകുന്ന ആദ്യ വിദേശി. നോർക റൂട്ട്‌സ് വൈസ് ചെയർമാൻ, കൊച്ചി, കണ്ണൂർ വിമാനത്താവള കമ്പനികളുടെ ഡയറക്ടർ ബോർഡ് അംഗം എന്നീ പദവികൾ വഹിക്കുന്നു. നാട്ടിക മാപ്പിള ലോവർ പ്രൈമറി സ്‌കൂൾ, ഗവ. ഫിഷറീസ് സ്‌കൂൾ, കരാഞ്ചിറ സെന്റ് സേവ്യേഴ്‌സ് ഇംഗ്ലീഷ് മീഡിയം സ്‌കൂൾ എന്നിവിടങ്ങളിൽ നിന്ന് വിദ്യാഭ്യാസം പൂർത്തിയാക്കിയ ശേഷം ചെറിയ പ്രായത്തിൽ തന്നെ യൂസഫലിയും അഹമ്മദാബാദിലേക്ക് വണ്ടികയറി. അവിടെ, പിതാവും കൊച്ചാപ്പമാരും നടത്തിയിരുന്ന എം.കെ. ബ്രദേഴ്‌സ് ജനറൽ സ്റ്റോറിൽ നിന്ന് തുടക്കം. പിന്നീട് കപ്പലിൽ ദുബായിലേക്ക്. പിന്നെ ലോകത്തെ ഏറ്റവും വലിയ വിതരണ കമ്പനിയുണ്ടാക്കി. 1989-ൽ ചെറിയ നിലയിൽ ഒരു സൂപ്പർമാർക്കറ്റ് തുറന്നുകൊണ്ട് ഈ രംഗത്ത് പരീക്ഷണം നടത്തി. അതിന്റെ വിജയത്തെ തുടർന്ന് അബുദാബിയിൽ എയർപോർട്ട് റോഡിൽ വിശാലമായ ഡിപ്പാർട്ട്‌മെന്റ് സ്റ്റോർ തുടങ്ങാനുള്ള ജോലികൾ ആരംഭിച്ചു. അബുദാബി അന്നുവരെ കണ്ടതിൽ വച്ച് ഏറ്റവും വലിയ ഷോപ്പിങ് അനുഭവം ഒരുക്കുകയായിരുന്നു ലക്ഷ്യം.

അവസാന മിനുക്കുപണികളിലേക്ക് കടക്കുമ്പോഴാണ് 1990-ൽ ഗൾഫിൽ യുദ്ധം പൊട്ടിപ്പുറപ്പെട്ടത്. യൂസഫലി ശരിക്കും തളർന്നു. താൻ അതുവരെ സ്വരുക്കൂട്ടിയതെല്ലാം സ്റ്റോറിനായി മുതൽമുടക്കിയിരിക്കുകയാണ്. സകലരും ഉള്ളതും കൊണ്ട് നാടുവിടുന്ന സമയമായിരുന്നു അത്. എന്നാൽ, തന്നെ വളർത്തിയ നാടുവിട്ടു പോകാൻ യൂസഫലി ഒരുക്കമായിരുന്നില്ല. സൂപ്പർമാർക്കറ്റ് തുറക്കാമെന്നു തന്നെ അദ്ദേഹം ഉറപ്പിച്ചു. 'ഈ രാജ്യത്തോട് എനിക്ക് വിശ്വാസമുണ്ട്' എന്ന തലക്കെട്ടോടു കൂടിയ പരസ്യം നൽകിക്കൊണ്ട് ലുലു ഡിപ്പാർട്ട്‌മെന്റ് സ്റ്റോറിന് തുടക്കമിട്ടു. 2013 മാർച്ചിൽ കൊച്ചി ഇടപ്പള്ളിയിൽ ലുലു മാളിന് തുടക്കമിട്ടുകൊണ്ട് ഇന്ത്യൻ റീട്ടെയിൽ രംഗത്തേക്കും ചുവടുവച്ചു. അങ്ങനെ വ്യവസായം കേരളത്തിലേക്കും വളർത്തി. നാലു പതിറ്റാണ്ടിലേറെ നീളുന്ന സംരംഭക ജീവിതത്തിൽ എം.എ. യൂസഫലി പഠിച്ച പാഠങ്ങൾ അനവധിയാണ്. എപ്പോഴും നല്ല മൂല്യങ്ങൾ മുറുകെ പ്പിടിക്കാൻ പ്രത്യേകം ശ്രദ്ധിക്കുന്നു. ''നീ ഉയരങ്ങളിലെത്തുമ്പോൾ മറ്റുള്ളവർ താഴ്ന്നവരാണെന്ന് കരുതരുത്. അതു നിന്റെ പതനത്തിന്റെ തുടക്കമായിരിക്കും'' -കുഞ്ഞുന്നാളിൽ വല്യുപ്പ പകർന്നുനൽകിയ മൂല്യങ്ങളാണ് യൂസഫലിയുടെ കൈമുതൽ.

Stories you may Like

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

More News in this category+

MNM Recommends +

Go to TOP