Forex Rate:

1 usd = 76.25 inr 1 gbp = 94.16 inr 1 eur = 85.23 inr 1 aed = 20.76 inr 1 sar = 20.32 inr 1 kwd = 247.66 inr
Mar / 202428Thursday

ഗ്രീൻ സോണിൽ എല്ലാം പഴയതു പോലെ; ഓറഞ്ച് സോണിൽ ടാക്‌സികളും; റെഡ് സോണിൽ അടച്ചിടൽ അതിശക്തം; രാജ്യത്തുട നീളം സ്‌കൂളുകളും കോളേജുകളും 17 വരെ തുറക്കില്ല; റെഡ് സോണിൽ ഒഴികെ കടകൾ തുറക്കാമെങ്കിലും രാത്രി 7 മണിക്ക് മുമ്പ് കച്ചവടം നിർത്തണം; രാത്രി എഴ് മുതൽ ഏഴുവരെ പുറത്തിറങ്ങുന്നത് കുറ്റം; ഗ്രീൻ സോണിൽ ബസ് സർവ്വീസിനും അനുമതി; സംസ്ഥാന അതിർത്തികൾ അടഞ്ഞു കിടക്കും; കൊറോണയെ ലോക് ഡൗണിന്റെ രണ്ടാം ഘട്ടത്തിലും പിടിച്ചു കെട്ടാനായില്ല; മൂന്നാം ഘട്ടം ഇന്ത്യയ്ക്ക് അതിനിർണ്ണായകം

ഗ്രീൻ സോണിൽ എല്ലാം പഴയതു പോലെ; ഓറഞ്ച് സോണിൽ ടാക്‌സികളും; റെഡ് സോണിൽ അടച്ചിടൽ അതിശക്തം; രാജ്യത്തുട നീളം സ്‌കൂളുകളും കോളേജുകളും 17 വരെ തുറക്കില്ല; റെഡ് സോണിൽ ഒഴികെ കടകൾ തുറക്കാമെങ്കിലും രാത്രി 7 മണിക്ക് മുമ്പ് കച്ചവടം നിർത്തണം; രാത്രി എഴ് മുതൽ ഏഴുവരെ പുറത്തിറങ്ങുന്നത് കുറ്റം; ഗ്രീൻ സോണിൽ ബസ് സർവ്വീസിനും അനുമതി; സംസ്ഥാന അതിർത്തികൾ അടഞ്ഞു കിടക്കും; കൊറോണയെ ലോക് ഡൗണിന്റെ രണ്ടാം ഘട്ടത്തിലും പിടിച്ചു കെട്ടാനായില്ല; മൂന്നാം ഘട്ടം ഇന്ത്യയ്ക്ക് അതിനിർണ്ണായകം

മറുനാടൻ മലയാളി ബ്യൂറോ

ന്യൂഡൽഹി: കൊറോണയിൽ ഇന്ത്യ ഭയന്ന് വിറയ്ക്കുകയാണ്. അതിശക്തമായ ലോക് ഡൗൺ നടപ്പാക്കിയിട്ട് പോലും അനുദിനം രോഗികളുടെ എണ്ണം കൂടുന്നു. ഇന്നലെ മാത്രം 2391 പേരിവാണ് രാജ്യത്ത് വൈറസ് ബാധ സ്ഥിരീകരിച്ചത്. ഒരു ദിവസം ഇന്ത്യയിൽ ഏറ്റവും കൂടതൽ കേസ് റിപ്പോർട്ട് ചെയ്തതും ഇന്നലെയാണ്. മുംബൈയും ഡൽഹിയും അഹമ്മദാബാദും ചെന്നൈയുമാണ് ഇന്ത്യയെ കരയിപ്പിക്കുന്ന നഗരങ്ങൾ. ഇന്നലെ മഹാരാഷ്ട്രയിൽ മാത്രം 1008 പേരിൽ വൈറസ് കണ്ടെത്തി. ഇതിൽ 751 പേരും മഹാനഗരമായ മുംബൈയിലായിരുന്നു. ഈ സാഹചര്യത്തിലാണ് ലോക് ഡൗൺ അതിശക്തമായ മൂന്നാം ഘട്ടത്തിലേക്ക് പോകുന്നത്.

ലോക്ക് ഡൗൺ മൂന്നാം ഘട്ടത്തിൽ റെഡ്, ഓറഞ്ച്, ഗ്രീൻ സോണുകളിൽ ഏർപ്പെടുത്തിയ നിയന്ത്രണങ്ങളിൽ കേന്ദ്രസർക്കാർ ഇളവ് പ്രഖ്യാപിച്ചു. പുതിയ മാർഗനിർദ്ദേശങ്ങൾ പ്രകാരം ഗ്രീൻ, ഓറഞ്ച് സോണുകളിൽ ടാക്‌സി സർവീസുകൾ നടത്താൻ അനുമതി നൽകിയിട്ടുണ്ട് എന്നാൽ ഡ്രൈവറെക്കൂടാതെ രണ്ട് പേർക്ക് മാത്രമേ ടാക്‌സി കാറിൽ യാത്ര ചെയ്യാൻ അനുമതി ഉള്ളൂ. ഇതോടെ ഓല, ഊബർ തുടങ്ങിയ സ്വകാര്യ ടാക്‌സി വാഹനങ്ങൾക്ക് സർവീസ് പുനരാംരഭിക്കാം.

സ്വകാര്യ വാഹനങ്ങൾക്കും അനുമതി നൽകിയിട്ടുണ്ട്. നാലുചക്ര വാഹനത്തിൽ ഡ്രൈവറെ കൂടാതെ രണ്ട് പേർ, ബൈക്കിൽ രണ്ട് പേർ എന്ന നിലയ്ക്കാണ് അനുമതി. അതേസമയം റെഡ് സോണുകളിൽ പ്രത്യേക അനുവാദമില്ലാതെ അത്യാവശ്യകാര്യങ്ങൾക്കല്ലാതെ വാഹനങ്ങൾ പുറത്തിറക്കാൻ അനുമതി ഇല്ല. റെഡ് സോണിൽ നേരത്തെയുണ്ടായിരുന്ന നിരോധനം തുടരും. ചെന്നൈ, മുംബൈ, അഹമ്മദാബാദ്, ഡൽഹി തുടങ്ങിയ വമ്പൻ നഗരങ്ങൾ റെഡ് സോണിൽ തുടരും. മൂന്നാം ഘട്ട ലോക്ക് ഡൗൺ ആരംഭിക്കുന്ന മെയ് നാല് മുതൽ പുതിയ ഇളവുകൾ പ്രാബല്യത്തിൽ വരുമങ്കിലും റെഡ് സോണുകളിൽ അതിശക്തമായ നിയന്ത്രണം തുടരും,

രാജ്യത്തൊരിടത്തും അത്യാവശ്യകാര്യങ്ങൾക്കല്ലാതെ വൈകുന്നേരം ഏഴുമണി മുതൽ രാവിലെ ഏഴുമണി വരെ പുറത്തിറങ്ങരുത് എന്ന നിർദ്ദേശമുണ്ട്. 65 വയസ്സിന് മുകളിൽ പ്രായമുള്ളവർ, ഗർഭിണികൾ, ഗുരുതരരോഗങ്ങളുള്ളവർ,10 വയസ്സിന് താഴെയുള്ളവർ എന്നീ വിഭാഗക്കാർ ആശുപത്രി ആവശ്യങ്ങൾ പോലെയുള്ള അടിയന്തരകാര്യങ്ങൾക്കല്ലാതെ പുറത്തിറങ്ങരുത്. നിർദ്ദേശം എല്ലാ സോണുകൾക്കും ബാധകം. എല്ലാ സോണുകളിലും ആശുപത്രികൾ, ക്ലിനിക്കുകൾ എന്നിവിടങ്ങളിൽ ഒ.പി പ്രവർത്തിക്കാം. സാമൂഹിക അകലം, മാസ്‌ക് തുടങ്ങിയ സുരക്ഷാമുൻകരുതലുകൾ സ്വീകരിക്കണം. എല്ലാ ആഭ്യന്തര-അന്താരാഷ്ട്ര വിമാന സർവീസുകളും നിരോധിച്ചിട്ടുണ്ട്. കേന്ദ്ര ആഭ്യന്തര മന്ത്രാലയത്തിന്റെ അനുമതിയോട് കൂടി എയർ ആംബുലൻസ്, മറ്റു മെഡിക്കൽ ആവശ്യങ്ങൾക്കുള്ള വിമാനസർവീസുകൾ എന്നിവക്ക് ഇളവുണ്ട്.

സുരക്ഷാ ആവശ്യങ്ങൾക്കും ആഭ്യന്തര മന്ത്രാലയത്തിന്റെ അനുമതിയോടെയുമല്ലാത്ത എല്ലാ ട്രെയിൻ യാത്രകൾക്കും വിലക്കായിരിക്കും. അന്തർസംസ്ഥാന ബസ് സർവീസുകൾക്ക് വിലക്കുണ്ടെങ്കിലും ആഭ്യന്തര മന്ത്രാലയത്തിന്റെ അനുമതിയുണ്ടെങ്കിൽ ആവാം. മെട്രോ റെയിൽ സർവീസുകളും പാടില്ല. മെഡിക്കൽ ആവശ്യങ്ങൾക്കോ ആഭ്യന്തര മന്ത്രാലയത്തിന്റെ പ്രത്യേക അനുമതിയോടെ അല്ലാതെയുള്ള വ്യക്തികളുടെ അന്തർസംസ്ഥാന യാത്രക്ക് നിരോധനം. സ്‌കൂളുകൾ, കോളേജുകൾ, വിദ്യാഭ്യാസ സ്ഥാപനങ്ങൾ, ട്രെയിനിങ്-കോച്ചിങ് സെന്ററുകൾ തുടങ്ങിയവയെല്ലാം അടച്ചിടണം. ഓൺലൈൻ ക്ലാസുകൾക്ക് അനുമതി. സിനിമാ തിയേറ്ററുകൾ, ഷോപ്പിങ് മാളുകൾ, ജിംനേഷ്യം, സ്പോർട്സ് കോംപ്ലക്‌സ്‌കുകൾ, സ്വിമ്മിങ്പൂൾ, വിനോദ പാർക്കുകൾ, തിയേറ്റർ, ബാർ, ഓഡിറ്റോറിയം, അസംബ്ലി ഹാൾ, തുടങ്ങിയ സ്ഥലങ്ങൾ അടച്ചിടണം. എല്ലാ സാമൂഹിക/കായിക/ വിനോദ/ പഠന/ സാംസ്‌കാരിക/ മത ചടങ്ങുകൾക്കും നിരോധനം തുടരും, പൊതുജനം കൂടുന്ന എല്ല മതസ്ഥാപനങ്ങളും സ്ഥലങ്ങളും അടച്ചിടണം.

റെഡ് സോണുകൾക്കുള്ള നിയന്ത്രണങ്ങൾ/ ഇളവുകൾ

  • റെഡ് സോണുകളിൽ സൈക്കിൾ റിക്ഷ, ഓട്ടോറിക്ഷ, ടാക്സി, കാബ്, അന്തർ ജില്ലാ ബസ് സർവീസ്, ബാർബർ ഷോപ്പുകൾ, സ്പാ സലൂൺ എന്നിവയ്ക്കുള്ള നിരോധനം തുടരും.
  • റെഡ് സോണുകളിൽ അത്യാവശ്യകാര്യങ്ങൾക്ക് വാഹനഗതാഗതത്തിന് അനുമതി. നാല് ചക്രവാഹനങ്ങളിൽ ഡ്രൈവറെക്കൂടാതെ രണ്ട് പേർക്ക് യാത്ര ചെയ്യാം,
  • ഇരുചക്രവാഹനങ്ങളിൽ ഒരാൾക്ക് മാത്രമേ അനുമതി ഉള്ളൂ.
  • റെഡ് സോണുകളിലുൾപ്പെടുന്ന നഗരപ്രദേശങ്ങളിൽ പ്രത്യേക സാമ്പത്തിക മേഖലകൾ, കയറ്റുമതി കേന്ദ്രങ്ങൾ, ഇൻഡസ്ട്രിയൽ ടൗൺഷിപ്പ് എന്നിവ്ക്ക് അനുമതി. മരുന്നുകൾ, ഫാർമ ഉത്പന്നങ്ങൾ, മെഡിക്കൽ ഉപകരണങ്ങൾ എന്നിവയുടെ നിർമ്മാണ യൂണിറ്റുകൾക്ക് പ്രവർത്തിക്കാം. ഐ.ടി ഹാർഡ് വെയർ നിർമ്മാണ യൂണിറ്റ്, ജൂട്ട് വ്യവസായ യൂണിറ്റ്, പാക്കേജിങ് മെറ്റീരിയിലുകളുടെ നിർമ്മാണം എന്നിവയ്ക്ക് അനുമതി ഉണ്ട്.
    റെഡ് സോണുകളിലുൾപ്പെട്ട ഗ്രാമപ്രദേശങ്ങളിൽ എല്ലാ വ്യവസായ പ്രവർത്തനങ്ങളും ആരംഭിക്കാം.
  • നഗരപ്രദേശങ്ങളിൽ പ്രാദേശിക തൊഴിലാളികളെ ഉപയോഗിച്ചുള്ള നിർമ്മാണ പ്രവർത്തനത്തിന് അനുമതി. തൊഴിലാളികളെ പുറത്തുനിന്നും കൊണ്ടുവരാൻ അനുമതി ഇല്ല.
  • ഗ്രാമപ്രദേശങ്ങളിൽ എല്ലാ നിർമ്മാണ പ്രവർത്തനങ്ങളും പുനരാരംഭിക്കാം.
  • റെഡ് സോണിൽ ഉൾപ്പെട്ട നഗരപ്രദേശങ്ങളിൽ അവശ്യസാധനങ്ങൾ വിൽക്കുന്ന കടകൾ തുറന്നുപ്രവർത്തിക്കാം. മാളുകൾ, ഷോപ്പിങ് കോംപ്ലക്സ്, അവശ്യസാധനങ്ങൾ അല്ലാത്തവ വിൽക്കുന്ന കടകൾ എന്നിവയ്ക്ക് അനുമതി ഇല്ല.
  • ഗ്രാമപ്രദേശങ്ങളിൽ ഷോപ്പിങ് മാളുകൾക്കൊഴികെ എല്ലാ കടകൾക്കും തുറന്നുപ്രവർത്തിക്കാം. എല്ലാ സ്ഥലത്തും സാമൂഹിക അകലം ഉറപ്പുവരുത്തണം.
  • അവശ്യസാധനങ്ങൾക്ക് മാത്രം ഈ-കൊമേഴ്സ് സർവീസ്
  • സ്വകാര്യസ്ഥാപനങ്ങൾ 33% ജീവനക്കാരോടെ തുറന്നുപ്രവർത്തിക്കാം. ബാക്കിയുള്ളവർക്ക് വർക്കിങ് ഫ്രം ഹോം.
  • ഡെപ്യൂട്ടി സെക്രട്ടറി തലം മുതൽ മുകളിലോട്ട് തസ്തികകളിലുള്ള സർക്കാർ ജീവനക്കാർ ഓഫീസിലെത്തണം. മറ്റുള്ള ജീവനക്കാരുടെ എണ്ണം 33% ക്രമീകരിക്കുക.
  • പ്രതിരോധം, സുരക്ഷാസർവീസുകൾ, ആരോഗ്യം-ക്ഷേമകാര്യം, പൊലീസ്, ജയിൽ, ഹോം ഗാർഡ്സ്, സിവിൽ ഡിഫൻസ്, അഗ്‌നിസുരക്ഷ, ദുരന്തനിവാരണം, എൻഐസി, കസ്റ്റംസ്, എഫ്‌സിഐ, എൻസിസി, എൻവൈകെ, മുൻസിപ്പൽ സർവീസ് എന്നിവ യാതൊരു തടസ്സവും കൂടാതെ തുടരും.
  • റെഡ് സോണിൽ ഉൾപ്പെടുന്ന കോവിഡ് ബാധിത മേഖലകളല്ലാത്ത ഗ്രാമപ്രദേശങ്ങളിൽ വ്യാവസായിക പ്രവർത്തനങ്ങൾ, തൊഴിലുറപ്പ് പദ്ധതി, ഭക്ഷ്യസംസ്‌കരണ യൂണിറ്റുകൾ, കാർഷിക പ്രവർത്തനങ്ങൾ, മൃഗസംരക്ഷണം, തോട്ടകൃഷി, ധനകാര്യസ്ഥാപനങ്ങളുടെ പ്രവർത്തനം, അംഗനവാടി തുടങ്ങിയവയ്ക്ക് പ്രവർത്തനാനുമതി.

ഓറഞ്ച് സോണിലെ നിയന്ത്രണങ്ങൾ/ ഇളവുകൾ

  • റെഡ് സോണിൽ പ്രഖ്യാപിച്ച ഇളവുകൾക്ക് പുറമേ ഓറഞ്ച് സോണുകളിൽ ഉൾപ്പെട്ട ജില്ലകളിലേക്ക് പ്രത്യേക അനുമതിയോടെ യാത്ര ചെയ്യാം.
  • നാല് ചക്രവാഹനങ്ങളിൽ ഡ്രൈവർക്ക് പുറമേ പരമാവധി രണ്ട് യാത്രക്കാരെ മാത്രമേ അനുവദിക്കുകയുള്ളൂ. ബൈക്കിൽ രണ്ട് പേർക്ക് യാത്ര ചെയ്യാം.
  • ഡ്രൈവർക്ക് പുറമേ ഒരു യാത്രക്കാരനെ മാത്രം ഉൾക്കൊള്ളിച്ചുള്ള ടാക്സി, കാബ് സർവീസുകൾക്ക് അനുമതി.

ഗ്രീൻ സോൺ നിയന്ത്രണങ്ങൾ/ ഇളവുകൾ

  • രാജ്യവ്യാപകമായി പ്രഖ്യാപിച്ച നിയന്ത്രണങ്ങൾ അല്ലാത്ത എല്ലാ കാര്യങ്ങൾക്കും സേവനങ്ങൾക്കും പ്രവർത്തനാനുമതി
  • 50 ശതമാനം ആളുകളെ ഉൾക്കൊള്ളിച്ച് ജില്ലയ്ക്കുള്ളിൽ ബസ് സർവീസുകൾ നടത്താം.

Stories you may Like

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

More News in this category+

MNM Recommends +

Go to TOP