Forex Rate:

1 usd = 76.25 inr 1 gbp = 94.16 inr 1 eur = 85.23 inr 1 aed = 20.76 inr 1 sar = 20.32 inr 1 kwd = 247.66 inr
Oct / 202029Thursday

രാജ്യത്ത് കോവിഡ് കേസുകൾ വർധിക്കുന്നത് ആശങ്കയിലേക്ക്; 24 മണിക്കൂറിനുള്ളിൽ രാജ്യത്ത് റിപ്പോർട്ട് ചെയ്തത് 547 മരണങ്ങളും 26,920 പുതിയ കേസുകളും; 9,34.565 രോഗികളുമായി ലോകത്ത് മൂന്നാം സ്ഥാനത്ത് ഇന്ത്യ; ഇതുവരെ രോഗമുക്തി നേടിയത് 5,91,750 പേർ; 24,301 കടന്ന് മരണ സംഖ്യയും; ഏറ്റവും കൂടുതൽ കോവിഡ് മരണവുമായി മഹാരാഷ്ട്ര; തമിഴ്‌നാട്ടിൽ ഇന്നും 60 കടന്ന് മരണം; തമിഴ്‌നാട് അതിർത്തിയിൽ അതി ജാഗ്രത; കേരളത്തിൽ കോവിഡ് വ്യാപനം മൂന്നാം ഘട്ടത്തിലേക്ക്

മറുനാടൻ ഡെസ്‌ക്‌

ന്യുഡൽഹി: രാജ്യത്ത് കോവിഡ് മരണം വർധിക്കുന്നത് ആശങ്കയിലേക്ക്. ഇന്ന് മാത്രം 547 മരണവും 26,920 പുതിയ കോവിഡ് കേസുകളുമാണ് രാജ്യത്ത് റിപ്പോർട്ട് ചെയ്തത്. ഇതോടെ ഇതുവരെ ഇന്ത്യയിൽ കോവിഡ് ബാധിച്ചവരുടെ എണ്ണം 9,34,565 കടന്നു. 24,301 മരണമാണ് രാജ്യത്ത് ഇതുവരെ സംഭവിച്ചത്. 5,91,750 പേർ രോഗമുക്തി നേടി. കോവിഡ് മരണത്തിൽ മുന്നിൽ നിൽക്കുന്നത് മഹാരാഷ്ട്രയാണ്. സംസ്ഥാനത്തെ കോവിഡ് മരണങ്ങൾ ദിനം പ്രതി വർധിക്കുന്നതാണ് ആശങ്കയുളവാക്കുന്നത്.മഹാരാഷ്ട്രയിൽ ഇന്ന് കോവിഡ് സ്ഥിരീകരിച്ചത് 6,741 പേർക്ക്.

ഇതോടെ സംസ്ഥാനത്ത് ഇതുവരെ കോവിഡ് സ്ഥിരീകരിച്ചവരുടെ എണ്ണം 2,67,665 ആയി. 213 പേർ ഇന്ന് മരിച്ചതോടെ ആകെ മരണം 10,695 ആയി. 4500 പേർ ഇന്ന് രോഗമുക്തി നേടി ആശുപത്രിവിട്ടു. ഇതോടെ സംസ്ഥാനത്ത് ഇതുവരെ രോഗമുക്തി നേടിയവരുടെ എണ്ണം 1,49,007 ആയി. 1,07,665 ആണ് നിലവിൽ മഹാരാഷ്ട്രയിലെ ആക്ടീവ് കേസുകൾ. മുംബൈയിൽ ഇന്ന് 969 പേർക്ക് കോവിഡ് സ്ഥിരീകരിക്കുകയും 70 പേർ മരിക്കുകയും ചെയ്തു. ഇതോടെ മുംബൈയിൽ ഇതുവരെ വൈറസ് ബാധ സ്ഥിരീകരിക്കപ്പെട്ടവരുടെ എണ്ണം 94,863 ആയി. 5402 പേരാണ് ഇതുവരെ മരിച്ചത്. 1011 പേർ ഇന്ന് രോഗമുക്തരായി ആശുപത്രിവിട്ടു. 66,633 പേരാണ് മുംബൈയിൽ ഇതുവരെ രോഗമുക്തി നേടിയത്.

ബീഹാർ സമ്പൂർണ  ലോക്ഡൗണിലേക്ക്

കോവിഡ് വ്യാപനം രൂക്ഷമായതിനെ തുടർന്ന് ബിഹാറിൽ ബുധനാഴ്ച മുതൽ ജൂലൈ 31വരെ സമ്പൂർണ ലോക്ഡൗൺ പ്രഖ്യാപിച്ചു. മാർഗനിർദേശങ്ങൾ തയാറാക്കി വരുന്നതായി ഉപമുഖ്യമന്ത്രി സുശീൽ കുമാർ മോദി അറിയിച്ചു. പട്‌നയിൽ ഒരാഴ്ചത്തെ ലോക്ഡൗൺ നിലവിലിരിക്കെയാണ് 16 മുതൽ 31 വരേക്കു സംസ്ഥാന വ്യാപക ലോക്ഡൗൺ പ്രഖ്യാപനം.

പട്‌ന, ഭാഗൽപുർ, ബേഗുസരായി എന്നിവിടങ്ങളിൽ അതിവേഗത്തിലാണ് കോവിഡ് വ്യാപനം. ബിഹാറിൽ 17,959 പേർക്കാണ് കോവിഡ് സ്ഥിരീകരിച്ചിട്ടുള്ളത്. ഇന്നലെ മാത്രം 1317 പേർക്കു കോവിഡ് സ്ഥിരീകരിച്ചു. 160 പേർ കോവിഡ് ബാധിച്ചു മരിച്ചു. സംസ്ഥാനത്തെ മന്ത്രിമാരായ ശൈലേഷ് കുമാർ, വിനോദ് കുമാർ സിങ് എന്നിവർ കോവിഡ് സ്ഥിരീകരിച്ചതിനെ തുടർന്നു ചികിൽസയിലാണ്.

തമിഴ്‌നാട്ടിൽ ഇന്നും 67 മരണം

തമിഴ്‌നാട്ടിൽ ഇന്ന് 4526 പേർക്കാണ് കോവിഡ് സ്ഥിരീകരിച്ചത്. 67 പേർ ഇന്ന് മരിച്ചു. ഇതോടെ തമിഴ്‌നാട്ടിൽ ഇതുവരെ രോഗം സ്ഥിരീകരിച്ചവരുടെ എണ്ണം 1,47,324 ഉം ആകെ മരണം 2099 ഉം ആയി. തമിഴ്‌നാട്ടിൽ 97,310 പേർ ഇതുവരെ രോഗമുക്തി നേടിയിട്ടുണ്ട്.

സംസ്ഥാനത്ത് ഇന്ന് വൈറസ് ബാധ സ്ഥിരീകരിച്ചവരിൽ ഏഴുപേർ കേരളത്തിൽനിന്ന് എത്തിയവരാണ്. വിദേശത്തുനിന്ന് അന്താരാഷ്ട്ര വിമാനങ്ങളിൽ എത്തിയ 19 പേർക്കും മറ്റുസംസ്ഥാനങ്ങളിൽനിന്ന് ആഭ്യന്തര വിമാനങ്ങളിൽ എത്തിയ ആറുപേർക്കും റോഡുമാർഗം എത്തിയ 34 പേർക്കും തമിഴ്‌നാട്ടിൽ ഇന്ന് കോവിഡ് സ്ഥിരീകരിച്ചിട്ടുണ്ട്.

കർണാടകയിൽ ഇന്ന് 2496 പേർക്കാണ് കോവിഡ് സ്ഥിരീകരിച്ചത്. 87 പേർ മരിച്ചു. 25,839 ആണ് നിലവിൽ കർണാടകയിലെ ആക്ടീവ് കേസുകൾ. ആകെ മരണം 842. സംസ്ഥാനത്ത് ഏറ്റവുമധികം കോവിഡ് കേസുകൾ (1267) ഇന്ന് റിപ്പോർട്ടു ചെയ്തത് ബെംഗളൂരുവിലാണ്. 125 പേർക്ക് ഇന്ന് വൈറസ് ബാധ സ്ഥിരീകരിച്ച മൈസൂരുവാണ് തൊട്ടുപിന്നിൽ

തമിഴ്‌നാട് അതിർത്തികൾ ആശങ്കയിൽ

കേരളത്തിൽ കുതിച്ചുകയറുന്ന കോവിഡ് രോഗികളുടെ കണക്കിനൊപ്പം ആശങ്കയുണർത്തി തമിഴ്‌നാടുമായി അതിർത്തി പങ്കിടുന്ന ജില്ലകളിലെ കണക്കുകളും. ഒൻപത് അതിർത്തി ജില്ലകളിൽ മാത്രം 5700 ലേറെപ്പേർക്കാണ് കോവിഡ് രോഗം സ്ഥിരീകരിച്ചത്. കന്യാകുമാരി, തിരുനെൽവേലി, തെങ്കാശി, വിരുതനഗർ, തേനി, ദിണ്ടിഗൽ, തിരുപ്പൂർ, കോയമ്പത്തൂർ, നീലഗിരി എന്നീ ജില്ലകളുമായാണ് കേരളം അതിർത്തി പങ്കിടുന്നത്. ചൊവ്വാഴ്ച രാവിലെ വരെയുള്ള ഏകദേശ കണക്കുകൾ പ്രകാരം ഈ ജില്ലകളിൽ മാത്രം ഇതിനകം 72 പേരാണ് കോവിഡ് ബാധിച്ചു മരിച്ചത്. (വിശദമായ കണക്ക് ഇതോടൊപ്പമുള്ള പട്ടികയിൽ). ഈ ഒൻപതു ജില്ലകളിലെ കോവിഡ് രോഗബാധിതരുടെ എണ്ണം നിലവിൽ 5,714 ആണ്.

കേരളത്തിന്റെ അതിർത്തി ജില്ലയല്ലെങ്കിലും തൊട്ടുതൊട്ടില്ലെന്ന നിലയിൽ നിലകൊള്ളുന്ന മധുര ജില്ലയിലെ കണക്കുകൾ അൽപം കൂടി ഉയർന്നതാണ്. മധുര ജില്ലയിൽ മാത്രം കോവിഡ് രോഗബാധിതരായ 116 പേരുടെ മരണമാണ് ഇതിനകം രേഖപ്പെടുത്തിയത്. മധുരയിൽ 3372 കോവിഡ് രോഗികളാണുള്ളത്. ഇവിടെ ഇതുവരെ 6978 പേർക്കാണ് രോഗം ബാധിച്ചത്. ഇവരിൽ 2,590 പേർക്ക് രോഗം ഭേദമായെന്നതാണ് ആശ്വാസവാർത്ത.

കേരളത്തിനു ചുറ്റുമുള്ള തമിഴ്‌നാട് ജില്ലകളിൽ അൽപമെങ്കിലും മെച്ചപ്പെട്ട സ്ഥിതിയുള്ളത് നീലഗിരിയിൽ മാത്രമാണ്. എന്നാൽ അവിടെയും നിലവിൽ 89 രോഗബാധിതരുണ്ട്. കേരളത്തിലെ കോവിഡ് കണക്കുകൾക്കൊപ്പം അതിർത്തികളിൽ കൂടുതൽ ജാഗ്രത പാലിക്കേണ്ട ആവശ്യകത കൂടിയാണ് ഈ കണക്കുകൾ വെളിപ്പെടുത്തുന്നു.

കേരളത്തിൽ രോഗവ്യാപനം ഏറുന്ന തിരുവനന്തപുരം ജില്ലയുമായി അതിർത്തി പങ്കിടുന്ന കന്യാകുമാരി ജില്ലയിൽ ദിവസവും നൂറിലേറെപ്പേർക്കാണ് ഇപ്പോൾ കോവിഡ് രോഗം സ്ഥിരീകരിക്കുന്നത്. കമ്പോളങ്ങൾ കേന്ദ്രീകരിച്ചും തീരദേശ മേഖലയിലുമാണ് കൂടുതൽ പേർക്കു കോവിഡ് ബാധിച്ചതെന്നത് ആശങ്ക ഇരട്ടിയാക്കുന്നു. മാർച്ച് അവസാനത്തോടെയാണ് കന്യാകുമാരി ജില്ലയിൽ ആദ്യ കോവിഡ് രോഗി ചികിൽസയ്ക്കായി എത്തിയത്. മെയ്‌ തുടക്കത്തിൽ രോഗികളുടെ എണ്ണം 16 ആയിരുന്നു.

മെയ്‌ അവസാനത്തോടെ ജില്ലയിൽ എണ്ണായിരത്തോളം പേരുടെ സാംപിൾ പരിശോധിച്ചപ്പോൾ 35 പേർക്കു കോവിഡ് സ്ഥിരീകരിച്ചു. ജൂൺ പകുതിയോടെ ഇത് 150 കടന്നു. ജൂൺ അവസാനമായപ്പോൾ രോഗികളുടെ എണ്ണം 500 ആയി. ജൂലൈ പകുതിയാകുമ്പോൾ ആകെ രോഗബാധിതരുടെ എണ്ണം 1306 ആണ്. ഇതിൽ 457 പേർക്കു മാത്രമാണ് രോഗം ഭേദമായത്. മരിച്ചവരുടെ എണ്ണം ആറായി. രോഗവ്യാപനം കണക്കിലെടുത്ത് ജില്ലാ ഭരണകൂടം ജൂൺ 30ന് ബസ് സർവീസ് നിർത്തിവച്ചു.കേരള അതിർത്തിയായ കളിയിക്കാവിളയ്ക്കു ചേർന്നു കിടക്കുന്ന മാർത്താണ്ഡത്തിനൊപ്പം നാഗർകോവിൽ, കരുങ്കൽ ചന്തകളും കോട്ടാർ കമ്പോളവുമാണ് കോവിഡ് വ്യാപനകേന്ദ്രങ്ങളായി വിലയിരുത്തപ്പെട്ടത്. പാറശാലയിലെ സ്വകാര്യ ആശുപത്രിയിലെ 41 കാരിയായ റിസപ്ഷനിസ്റ്റിന് കഴിഞ്ഞ ദിവസം കോവിഡ് സ്ഥിരീകരിച്ചിരുന്നു.

തമിഴ്‌നാട്ടുകാരായ നിരവധിപേർ ചികിൽസ തേടിയെത്തുന്ന ആശുപത്രിയായതിനാൽ അതിർത്തി കടന്നെത്തിയ കോവിഡ് രോഗബാധയാകാം ഇതെന്നാണ് ആരോഗ്യവകുപ്പിന്റെ നിഗമനം. കേരള അതിർത്തിക്കു സമീപം കോഴിവിളയിലെ ശ്രീലങ്കൻ തമിഴരുടെ അഭയാർഥി ക്യാംപിൽ തിങ്കളാഴ്ച നാലു പേർക്കു കൂടി കോവിഡ് സ്ഥിരീകരിച്ചു. ഇതോടെ ക്യാംപിലെ കോവിഡ് രോഗബാധിതരുടെ എണ്ണം 74 ആയി.

കേരളത്തിൽ 600 കടന്ന് കോവിഡ് കേസുകൾ

സംസ്ഥാനത്ത് ഇന്ന് 608 പേർക്ക് കോവിഡ്-19 സ്ഥിരീകരിച്ചതായി മുഖ്യമന്ത്രി പിണറായി വിജയൻ വാർത്താസമ്മേളനത്തിൽ അറിയിച്ചു. തിരുവനന്തപുരത്ത് മാത്രം 201 പേർക്കാണ് രോഗം സ്ഥിരീകരിച്ചത്. ഇതുവരെയുള്ള ഏറ്റവും കൂടിയ കണക്കുകളാണ് ഇത്. 181 പേരാണ് രോഗമുക്തി നേടിയത്.

ഇന്ന് രോഗം ബാധിച്ചവരിൽ 130 പേർ വിദേശത്ത് നിന്നും എത്തിയവരാണ്.68 പേർ മറ്റ് സംസ്ഥാനങ്ങളിൽ നിന്നും എത്തിയവരാണ്. 396 പേർക്കാണ് സമ്പർക്കത്തിലൂടെ രോഗം ബാധിച്ചത്. 8 ആരോഗ്യപ്രവർത്തകർ, ബിഎസ്എഫ് 2, ഐടിബിപി 2, സിഐഎസ്എഫ് 2 എന്നിവർക്കും രോഗം ബാധിച്ചു. സമ്പർക്കരോഗബാധയുണ്ടായവരിൽ 26 പേരുടെ ഉറവിടം തിരിച്ചറിഞ്ഞിട്ടില്ല.

 

Stories you may Like

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

More News in this category+

MNM Recommends +

Go to TOP