Forex Rate:

1 usd = 76.25 inr 1 gbp = 94.16 inr 1 eur = 85.23 inr 1 aed = 20.76 inr 1 sar = 20.32 inr 1 kwd = 247.66 inr
Apr / 202425Thursday

സർവകലാശാല വൈസ് ചാൻസലർ നിയമനം നടത്തേണ്ടത് ചാൻസലർ എന്ന നിലയിൽ ഗവർണറുടെ ഉത്തരവാദിത്വം; നിയമനം ഗവർണ്ണറുടെ വിവേചനാധികാരമെന്ന് ഒടുവിൽ മന്ത്രി ബിന്ദുവും സമ്മതിച്ചു; വിനയായത് ആ ശുപാർശ കത്ത്; മന്ത്രിയുടെ രാജി ആവശ്യം അതിശക്തം

സർവകലാശാല വൈസ് ചാൻസലർ നിയമനം നടത്തേണ്ടത് ചാൻസലർ എന്ന നിലയിൽ ഗവർണറുടെ ഉത്തരവാദിത്വം; നിയമനം ഗവർണ്ണറുടെ വിവേചനാധികാരമെന്ന് ഒടുവിൽ മന്ത്രി ബിന്ദുവും സമ്മതിച്ചു; വിനയായത് ആ ശുപാർശ കത്ത്; മന്ത്രിയുടെ രാജി ആവശ്യം അതിശക്തം

മറുനാടൻ മലയാളി ബ്യൂറോ

തിരുവനന്തപുരം: സർവകലാശാലയിലെ വൈസ് ചാൻസലർ നിയമനം നടത്തേണ്ടത് ചാൻസലർ എന്ന നിലയിൽ ഗവർണറുടെ ഉത്തരവാദിത്വമെന്ന് സംസ്ഥാന സർക്കാരും ഒടുവിൽ അംഗീകരിച്ചു. മുമ്പ് പല വാദങ്ങൾ സർക്കാർ ഉയർത്തിയിരുന്നു. എന്നാൽ കണ്ണൂർ സർവ്വകലാശാലയിലെ വിസി നിയമനം സുപ്രീംകോടതി റദ്ദാക്കിയതിന് പിന്നാലെയാണ് സർക്കാർ ഇക്കാര്യം സമ്മതിച്ചത്. വിസി നിയമനം ഗവർണ്ണറുടെ വിവേചനാധികാരം ഉപയോഗിച്ചാണ് ചെയ്യേണ്ടതെന്ന് ഉന്നത വിദ്യാഭ്യാസ മന്ത്രി ആർ ബിന്ദുവാണ് ഇന്ന് വിശദീകരിച്ചത്. സർക്കാർ എജിയുടെ നിയമോപദേശത്തിന്റെ കൂടി അടിസ്ഥാനത്തിൽ ഒരു പ്രൊപ്പോസൽ മുന്നോട്ടുവയ്ക്കുക മാത്രമാണ് ചെയ്തതെന്നും മന്ത്രി പറഞ്ഞു.

കണ്ണൂർ സർവകലാശാലാ വിസിയായി ഡോ. ഗോപിനാഥ് രവീന്ദ്രനെ പുനർ നിയമിച്ചത് സുപ്രീം കോടതി റദ്ദാക്കിയ പശ്ചാത്തലത്തിലാണ് മന്ത്രിയുടെ പ്രതികരണം. കോടതിയുടെ വിധിയുടെ വിശദാംശങ്ങൾ ലഭ്യമായിട്ടില്ല. എന്തു തന്നെയായായാലും പരമോന്നത നീതിപീഠമായ സുപ്രീം കോടതി പറയുന്നത് അംഗീകരിക്കും. വിധി കിട്ടിയ ശേഷം വിശദ പ്രതികരണം നടത്താമെന്ന് മന്ത്രി പറഞ്ഞു. കണ്ണൂർ സർവകലാശാല വൈസ് ചാൻസിലർ ഡോ. ഗോപിനാഥ് രവീന്ദ്രന്റെ പുനർ നിയമനത്തിനായി മന്ത്രി ഉപയോഗിച്ചത് ഇല്ലാത്ത അവകാശമായിരുന്നുവെന്നാണ് സുപ്രീംകോടതി വിധി വ്യക്തമാക്കുന്നത്. ഈ സാഹചര്യത്തിൽ പ്രതിപക്ഷം മന്ത്രിയുടെ രാജി ആവശ്യപ്പെട്ട് രംഗത്തു വന്നിട്ടുണ്ട്.

പ്രോ ചാൻസിലർ എന്ന പദവി ഉപയോഗിച്ചായിരുന്നു മന്ത്രി, ഡോ. ഗോപിനാഥ് രവീന്ദ്രന്റെ പുനർ നിയമനത്തിനായി ഗവർണർക്ക് കത്തയച്ചത്. എന്നാൽ 1996-ലെ കണ്ണൂർ സർവകലാശാല നിയമത്തിലും സർവകലാശാല സ്റ്റാറ്റിയൂട്ടിലും പ്രോ ചാൻസിലർക്ക് ഇങ്ങനൊരു അവകാശം നൽകുന്നില്ല എന്നത് അന്നു തന്നെ ചർച്ചയായിരുന്നു. കണ്ണൂർ സർവകലാശാല വിസി ഡോ. ഗോപിനാഥ് രവീന്ദ്രന് പുനർ നിയമനം നൽകണമെന്നാവശ്യപ്പെട്ടാണ് ഉന്നത വിദ്യാഭ്യാസ മന്ത്രി ആർ. ബിന്ദു ഗവർണർ ആരിഫ് മുഹമ്മദ് ഖാന് കത്തെഴുതിയത്. അക്കാദമിക് മികവ് കണക്കിലെടുത്ത് ഗോപിനാഥ് രവീന്ദ്രന് പുനർനിയമം നൽകണമെന്നാണ് കത്തിൽ ആവശ്യപ്പെട്ടിരിക്കുന്നത്. ഗോപിനാഥ് രവീന്ദ്രന്റെ കാലാവധി അവസാനിക്കുന്നതിന്റെ തൊട്ടുതലേദിവസമാണ് മന്ത്രി ഗവർണർക്ക് കത്ത് നൽകിയത്.

പുതിയ വൈസ് ചാൻസലറെ കണ്ടെത്താൻ വിജ്ഞാപന പ്രകാരം നടക്കുന്ന നടപടികൾ നിർത്തിവെക്കണമെന്ന് ആവശ്യപ്പെടുന്ന കത്തിലാണ് ഗോപിനാഥ് രവീന്ദ്രന് പുനർനിയമനം നൽകണമെന്ന നിർദ്ദേശംകൂടി മന്ത്രി വെക്കുന്നത്. ഗോപിനാഥ് രവീന്ദ്രന് കാലാവധി നീട്ടിനൽകണമെന്ന് പ്രോ വൈസ് ചാൻസലർ എന്ന രീതിയിൽ നിർദ്ദേശിക്കുകയാണെന്ന് കത്തിൽ പറയുന്നു. എന്നാൽ ഇതിനായി മന്ത്രി ഉപയോഗിച്ചിരിക്കുന്നത് ഇല്ലാത്ത അവകാശമാണെന്നാണ് ഇപ്പോൾ വ്യക്തമായിരിക്കുന്നത്. അത് മന്ത്രി തന്നെ സമ്മതിക്കുന്നു.

പ്രോ ചാൻസിലർ എന്ന രീതിയിൽ ഉന്നത വിദ്യാഭ്യാസ മന്ത്രിക്ക് ഇത്തരത്തിൽ യാതൊരു അവകാശവും നൽകുന്നില്ലെന്ന് മാത്രമല്ല ചാൻസലറുടെ അഭാവത്തിൽ ചുമതലകൾ നിർവഹിക്കാൻ പ്രോ ചാൻസലറായ ഉന്നത വിദ്യാഭ്യാസ മന്ത്രിക്ക് പദവി ഉപയോഗിക്കാമെന്ന് മാത്രമാണ് കണ്ണൂർ സർവകലാശാല നിയമത്തിൽ പറയുന്നത്. എന്നാൽ വിവാദം തുടങ്ങിയപ്പോൾ ഇതൊന്നും മന്ത്രി ബിന്ദു സമ്മതിച്ചിരുന്നില്ല. എന്നാൽ വിധി വരുമ്പോൾ ചാൻസലറുടെ അധികാരം അംഗീകരിക്കുകയും ചെയ്യുന്നു. പ്രോ ചാൻസലറായ വകുപ്പ് മന്ത്രിക്ക് സർവകലാശാലകളുടെ ഭരണത്തിൽ ഇടപെടാൻ നിയമപരമായി അധികാരമില്ല. അതു വെറും അലങ്കാര പദവിയാണ്.

കണ്ണൂർ വി സി നിയമനത്തെ ചോദ്യം ചെയ്ത് ഹൈക്കോടതിയിലുള്ള കേസിൽ ഈ കത്തുകൾ നിർണായകമാവും എന്നായിരുന്നു വിലയിരുത്തൽ. എന്നാൽ അതുണ്ടായില്ല. പക്ഷേ സുപ്രീംകോടതിയിൽ കത്ത് വിനയായി.

Stories you may Like

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

More News in this category+

MNM Recommends +

Go to TOP