Forex Rate:

1 usd = 76.25 inr 1 gbp = 94.16 inr 1 eur = 85.23 inr 1 aed = 20.76 inr 1 sar = 20.32 inr 1 kwd = 247.66 inr
Oct / 202022Thursday

ജമ്മു സംസ്ഥാനവും ലേ-ലഡാക്കും കശ്മീരും കേന്ദ്ര ഭരണ പ്രദേശങ്ങളുമാകും; മോദി സർക്കാർ ലക്ഷ്യമിടുന്നത് പാക്കിസ്ഥാനുമായി അതിർത്തി പങ്കിടുന്ന സംസ്ഥാനങ്ങളുടെ അതിരുകൾ മാറ്റിവരയ്ക്കാനുള്ള ഭരണ ഘടനാ വ്യവസ്ഥകൾ ഉപയോഗിച്ചുള്ള ഇടപെടൽ; 370-ാം അനുച്ഛേദത്തിന്റെ സാധുതയെ മറികടക്കാൻ 368(1) അനുച്ഛേദത്തിന്റെ ഭേദഗതി വന്നേക്കും; കാശ്മീർ വിഭജനത്തിന് തെലുങ്കാനാ മോഡൽ; ഇനിയുള്ള മണിക്കൂറുകൾ നിർണ്ണായകം; എല്ലാം അതിവഗം നടപ്പാക്കാൻ മുന്നിലുള്ളത് അമിത് ഷാ തന്നെ

ജമ്മു സംസ്ഥാനവും ലേ-ലഡാക്കും കശ്മീരും കേന്ദ്ര ഭരണ പ്രദേശങ്ങളുമാകും; മോദി സർക്കാർ ലക്ഷ്യമിടുന്നത് പാക്കിസ്ഥാനുമായി അതിർത്തി പങ്കിടുന്ന സംസ്ഥാനങ്ങളുടെ അതിരുകൾ മാറ്റിവരയ്ക്കാനുള്ള ഭരണ ഘടനാ വ്യവസ്ഥകൾ ഉപയോഗിച്ചുള്ള ഇടപെടൽ;  370-ാം അനുച്ഛേദത്തിന്റെ സാധുതയെ മറികടക്കാൻ 368(1) അനുച്ഛേദത്തിന്റെ ഭേദഗതി വന്നേക്കും; കാശ്മീർ വിഭജനത്തിന് തെലുങ്കാനാ മോഡൽ; ഇനിയുള്ള മണിക്കൂറുകൾ നിർണ്ണായകം; എല്ലാം അതിവഗം നടപ്പാക്കാൻ മുന്നിലുള്ളത് അമിത് ഷാ തന്നെ

മറുനാടൻ മലയാളി ബ്യൂറോ

ന്യൂഡൽഹി: കാശ്മീരിൽ കേന്ദ്ര നീങ്ങുന്നത് ഏറെ കരുതലോടെയെന്ന സൂചനകൾ. ജമ്മുകശ്മീരിനു പ്രത്യേകപദവി ഉറപ്പാക്കുന്ന ഭരണഘടനാവ്യവസ്ഥകൾ റദ്ദാക്കാനോ സംസ്ഥാനത്തെ മൂന്നാക്കാനോ ഉള്ള സാധ്യതകളാണ് പുറത്തു വരുന്നത്. അമർനാഥ് തീർത്ഥാടനദിനങ്ങൾ വെട്ടിച്ചുരുക്കുകയും വിനോദസഞ്ചാരികളോട് ജമ്മുകശ്മീർ വിടാൻ നിർദ്ദേശിക്കുകയും ചെയ്തതോടെ പലവിധ അഭ്യൂഹങ്ങൾ സജീവമായി. ഇതിന് പിന്നാലെയാണ് മുൻ മുഖ്യമന്ത്രിമാർ അടക്കം വീട്ടുതടങ്കലിലായത്. പാക്കിസ്ഥാനെ നേരിട്ടുള്ള നിയന്ത്രണത്തിലാക്കാനാണ് കേന്ദ്ര സർക്കാർ ശ്രമം. പ്രധാനമന്ത്രി നരേന്ദ്ര മോദിയും ആഭ്യന്തര മന്ത്രി അമിത് ഷായും നേരിട്ടാണ് കാര്യങ്ങൾ നീക്കുന്നത്.

കേന്ദ്രസർക്കാരിന്റെ അടുത്തനീക്കം സംസ്ഥാനത്തെ മൂന്നായി വിഭജിക്കുകയാണെന്ന അഭ്യൂഹം ശക്തമാണ്. ജമ്മു സംസ്ഥാനം, ലേ-ലഡാക്ക്, കശ്മീർ എന്നീ കേന്ദ്രഭരണപ്രദേശങ്ങൾ എന്നിങ്ങനെ സംസ്ഥാനത്തെ മുറിക്കുമെന്നാണ് അഭ്യൂഹം. ജമ്മുകശ്മീർ പ്രശ്നം പരിഹരിക്കാനാണ് ഇത്. പാക്കിസ്ഥാനുമായി അതിർത്തി പങ്കിടുന്ന സംസ്ഥാനങ്ങളുടെ അതിരുകൾ മാറ്റിവരയ്ക്കാനുള്ള വ്യവസ്ഥകൾ ഭരണഘടനയിലുണ്ട്. ഇന്നത്തെ മന്ത്രിസഭാ യോഗം ഇതിൽ തീരുമാനം എടുക്കും. ജമ്മുകശ്മീരിനു പ്രത്യേകപദവി നൽകുന്ന ഭരണഘടനയിലെ 370-ാം അനുച്ഛേദത്തിന്റെ സാധുതയെ മറികടക്കാനാണ് ഈ നീക്കങ്ങൾ. അതിനിടെ ജമ്മുകശ്മീരിനു പ്രത്യേകപദവി ഉറപ്പാക്കുന്ന ഭരണഘടനാവ്യവസ്ഥകൾ റദ്ദാക്കാനോ സംസ്ഥാനത്തെ മൂന്നാക്കാനോ ഉള്ള ഏതു ശ്രമത്തിനുംനേരെ ഒന്നിച്ചുപോരാടുമെന്ന് സംസ്ഥാനത്തെ പ്രാദേശികപാർട്ടികൾ വ്യക്തമാക്കിയിട്ടുണ്ട്.

370-ാം അനുച്ഛേദം ഭരണഘടനയിലെ 368(1) അനുച്ഛേദത്തിലൂടെ ഭേദഗതിചെയ്യാം. ഇതിനുള്ള ഉപക്ഷേപം ലോക്സഭയിൽ കൊണ്ടുവരാം. ലോക്സഭയും രാജ്യസഭയും ഇത് അംഗീകരിച്ചാൽ പിന്നെ തീരുമാനമെടുക്കേണ്ടത് സംസ്ഥാനങ്ങളാണ്. പകുതി സംസ്ഥാനങ്ങൾ ഈ തീരുമാനത്തിനു സമ്മതം മൂളണം. ഇതിന് ബിജെപിക്ക് കഴിയും. കാരണം ബഹുഭൂരിഭാഗം സംസ്ഥാനങ്ങളിലും എൻഡിഎ ഭരണമാണ്. 370-ാം അനുച്ഛേദം അസാധുവാകുന്നതോടെ, ജമ്മുകശ്മീരിന്റെ അതിർത്തി മാറ്റിവരയ്ക്കാനുള്ള അധികാരം ഭരണഘടനാപരമായി പാർലമെന്റിനു കൈവരും. ഭരണഘടനയുടെ മൂന്നാം അനുച്ഛേദമാണ് പുതിയസംസ്ഥാനം ഉണ്ടാക്കാനോ നിലവിലുള്ളതിന്റെ അതിർത്തി പുനർനിശ്ചയിക്കാനോ വഴിയൊരുക്കുന്നത്. നിർദിഷ്ട സംസ്ഥാനത്തെ സാമാജികരുമായി ആലോചിച്ചശേഷം രാഷ്ട്രപതിയുടെ ശുപാർശയോടെ പാർലമെന്റിൽ ബിൽ കൊണ്ടുവന്നാണ് ഇതു സാധ്യമാക്കുക. തെലങ്കാന സംസ്ഥാനമുണ്ടാക്കിയത് ഇങ്ങനെയാണ്.

ജമ്മുകശ്മീരിന് പ്രത്യേകപദവിയുള്ളതിനാൽ മൂന്നാം അനുച്ഛേദത്തിന്റെ പ്രയോഗം സാധ്യമല്ല. അതിനാൽ, 370-ാം അനുച്ഛേദം റദ്ദാക്കുക എന്നതുമാത്രമാണ് സർക്കാരിനു മുന്നിലുള്ള സാധ്യമായ ഏകവഴി. 'ഭരണഘടനയിലെ താത്കാലിക വ്യവസ്ഥയായിട്ടാണ് 370-ാം അനുച്ഛേദം എഴുതിച്ചേർത്തിരിക്കുന്നത്. പ്രത്യേകവ്യവസ്ഥയായല്ല. താത്കാലികം, പരിവർത്തിതം, പ്രത്യേകം എന്നിങ്ങനെയുള്ള വ്യവസ്ഥകളാണ് ഭരണഘടനയിലുള്ളത്. '370-ാം അനുച്ഛേദം റദ്ദാക്കി എന്നു വിജ്ഞാപനം ചെയ്യാൻ അതിലെതന്നെ മൂന്നാം ഉപവകുപ്പ് രാഷ്ട്രപതിയെ അനുവദിക്കുന്നുണ്ട്. ഇതുകഴിഞ്ഞാൽ മൂന്നാം അനുച്ഛേദം നടപ്പാക്കാം. നിയമസഭ ഇല്ലാത്ത സാഹചര്യത്തിൽ രാഷ്ട്രപതിക്ക് ഗവർണറുമായി കൂടിയാലോചിക്കാം. ഇതിനുള്ള സാധ്യതയാണ് കേന്ദ്രം തേടുന്നത്. ഏതായാലും കാശ്മീരിനെ വിഭജിച്ചുള്ള പ്രശ്‌ന പരിഹാരമാണ് കേന്ദ്രം ലക്ഷ്യമിടുന്നത്. കേന്ദ്ര ആഭ്യന്തര മന്ത്രി അമിത് ഷായാണ് ഈ നീക്കങ്ങൾക്ക് ചുക്കാൻ പിടിക്കുന്നത്. അതിവേഗ തീരുമാനമാണ് ലക്ഷ്യമിടുന്നത്.

പ്രത്യേക അധികാരങ്ങൾ എടുത്തു മാറ്റിയേക്കും

ജമ്മു കാശ്മീരിലെ സ്ഥിര താമസക്കാരെ നിർണ്ണയിക്കാനും അവകാശങ്ങളും പദവികളും നിർണ്ണയിക്കാനുമുള്ള സംസ്ഥാന സർക്കാരിന്റെ അധികാരമാണ് ആർട്ടിക്കിൾ 35 നിർവ്വചിക്കുന്നത്. 1954 ൽ അന്നത്തെ രാഷ്ട്രപതിയുടെ ഉത്തരവ് പ്രകാരം ജമ്മു കാശ്മീർ സർക്കാരിന്റെ അനുവാദത്തോടെയാണ് ഈ വകുപ്പ് ഭരണഘടനയുടെ ഭാഗമായത്. ജമ്മു കാശ്മീർ നാട്ടുരാജ്യത്തിലെ ദോഗ്ര ഭരണാധികാരിയായ ഹരി സിങ് മഹാരാജാവ് സംസ്ഥാന വിഷയങ്ങളെയും അവയുടെ അവകാശത്തെയും നിർവ്വചിക്കുന്ന ഒരു നിയമം നിർമ്മിച്ചു. ഇതുപ്രകാരം സംസ്ഥാനത്തേക്കുള്ള കുടിയേറ്റത്തെ നിയന്ത്രിച്ചു. 1947 ഒക്ടോബറിൽ ഹരി സിങ് മഹാരാജാവ് സമ്മത പത്രത്തിൽ ഒപ്പിടതോടെ ജമ്മു കാശ്മീർ ഇന്ത്യയുടെ ഭാഗമായി. ജമ്മു കാശ്മീർ ഇന്ത്യയുടെ ഭാഗമായതിനു ശേഷം 1949ൽ ദോഗ്ര ഭരണാധികാരിയിൽനിന്നും ഷെയ്ഖ് അബ്ദുള്ള ജമ്മു കാശ്മീരിന്റെ ഭരണസാരഥ്യം ഏറ്റെടുത്തു. ഡൽഹിയുമായുള്ള രാഷ്ട്രീയ ബന്ധം രൂപീകരിക്കുന്നതിന്റെ ഭാഗമായ വിലപേശലിൽനിന്നാണ് ആർട്ടിക്കിൾ 370 ഉണ്ടായത്.

ആർട്ടിക്കിൾ 370 ജമ്മു കാശ്മീരിന് പ്രത്യേക പദവി നൽകുന്നുണ്ട്. പ്രതിരോധം, വിദേശകാര്യം, ആശയവിനിമയം എന്നിവയിൽ കേന്ദ്രസർക്കാരിനായിരിക്കും അധികാരമെന്നും ഇതോടൊപ്പം പറയുന്നുണ്ട്. അബ്ദുള്ളയും നെഹ്‌റുവും തമ്മിലുള്ള കരാർ പ്രകാരം ജമ്മുകാശ്മീരിന് പിന്നീടും പ്രത്യേ പരിഗണനകൾ നിയമം വഴി ലഭിച്ചുപോന്നു. അങ്ങനെയാണ് 1954ൽ ആർട്ടിക്കിൾ 35എ ഭരണഘടനയുടെ ഭാഗമാകുന്നത്. ജമ്മു കാശ്മീരിനുവേണ്ടി പ്രത്യേക ഭരണഘടന 1956ൽ രൂപീകരിച്ചു. സംസ്ഥാനത്തെ സ്ഥിരവാസികളെ സംബന്ധിച്ചുള്ള നിർവ്വചനം ഇത് സംരക്ഷിച്ചു. 1911ന് മുമ്പ് ജമ്മുകാശ്മീരിൽ ജനിച്ചവരും സ്ഥിര താമസമാക്കിയവരും പത്ത് വർഷ കാലയളവിനുള്ളിൽ സംസ്ഥാനത്ത് സ്ഥാവര ജംഗമ വസ്തുക്കൾ സ്വന്തമാക്കിയവരും ജമ്മുകാശ്മീരിന്റെ ഭാഗമാണെന്ന് കണക്കാക്കി. ജമ്മു കാശ്മീരിൽനിന്നും പാക്കിസ്ഥാനിലേക്ക് കുടിയേറിയവരും ജമ്മു കാശ്മീരിൽനിന്നുള്ള കുടിയേറ്റക്കാരെയും സംസ്ഥാന ആഭ്യന്തര വിഷയമായി നിർണ്ണയിച്ചു.

ഇതര സംസ്ഥാനങ്ങളിൽനിന്നുള്ളവർക്ക് ജമ്മു കാശ്മീരിൽ സ്ഥിരതാമസമാക്കാനോ ഭൂമിയോ സ്വത്ത് വകകളോ വാങ്ങുന്നതിനോ സർക്കാർ ജോലിയിൽ പ്രവേശിക്കുന്നതിനോ സ്‌കോളർഷിപ്പ് നേടുന്നതിനോ നിയമം മൂലമുള്ള വിലക്കുണ്ട്. അതേസമയം ഈ നിയമം ജമ്മു കാശ്മീരിലെ സ്ത്രീകളോട് വിവേചനപരമായിട്ടാണ് പെരുമാറുന്നത്. ഇതര സംസ്ഥാനങ്ങളിൽനിന്നുള്ളയാളെ വിവാഹം കഴിക്കുന്നതുവഴി ജമ്മു കാശ്മീരിലെ വനിതകൾ സംസ്ഥാനത്തിന്റെ ഭാഗമല്ലാതായി മാറും. എന്നാൽ 2002ലെ ജമ്മു കാശ്മീർ ഹൈക്കോടതി സ്ഥിര താമസക്കാരല്ലാത്തവരുമായി സ്ത്രീകൾ വിവാഹിതരായാൽ അവർക്ക് തങ്ങളുടെ അവകാശം നഷ്ടമാകില്ലെന്ന് വിധിച്ചു. എന്നാൽ അത്തരം സ്ത്രീകളുടെ കുട്ടികൾക്ക് പിന്തുടർച്ചാ അവകാശം ലഭിക്കില്ലെന്നും കോടതി വിലയിരുത്തി.

'വി ദ സിറ്റിസൺ' എന്നു പേരുള്ള എൻജിഒ 2014ൽ ഈ വകുപ്പിനെതിരെ സുപ്രീംകോടതിയെ സമീപിച്ചു. ആർട്ടിക്കിൾ 368 പ്രകാരം ഭരണഘടനാ ഭേതഗതിയിലൂടെയല്ല ആർട്ടിക്കിൾ 35എ ഭരണഘടനയുടെ ഭാഗമായതെന്ന് വാദിച്ചു. ഈ വിഷയം പാർലമെന്റിന്റെ മുന്നിൽ വന്നിട്ടില്ലെന്നും ഇത് ആലോചനയില്ലാതെ ഉടനടി നടപ്പാക്കുകയായിരുന്നുവെന്നും വാദിച്ചു. ഇതോടെയാണ് ഈ വകുപ്പ് ചർച്ചകളിൽ ഇടം നേടിയത്. തങ്ങളുടെ കുട്ടികളുടെ അവകാശങ്ങൾ റദ്ദ് ചെയ്യപ്പെട്ടുവെന്ന് വ്യക്തമാക്കിക്കൊണ്ട് രണ്ട് കാശ്മീരി സ്ത്രീകൾ സുപ്രീംകോടതിയെ സമീപിച്ചിരുന്നു. ഇതും ആർട്ടിക്കിൾ 35എ ചർച്ചയാകുന്നതിന് വഴിതെളിച്ചു. ഇതെല്ലാമാണ് ബിജെപിയേയും ഈ വ്യവസ്ഥയ്‌ക്കെതിരെ നീങ്ങാൻ പ്രേരിപ്പിക്കുന്നത്.

നുഴഞ്ഞു കയറ്റത്തിൽ നയതന്ത്രം

ഈ പ്രശ്‌ന പരിഹാരത്തിന് ജമ്മു കാശ്മീരിനെ വിഭജിച്ച് കാശ്മീരിനെ ഒരു കേന്ദ്ര ഭരണ പ്രദേശമാക്കി മാറ്റാനാണ് ബിജെപി സർക്കാരിന്റെ ശ്രമം ഏറെ വിവാദങ്ങൾക്ക് വഴി വക്കും. എന്തായാലും കാശ്മീരിന് പ്രത്യേക അവകാശങ്ങൾ നൽകിയതാണ് സംസ്ഥാനത്തെ പ്രശ്നങ്ങൾക്ക് കാരണമെന്ന നിലപാടാണ് നേരത്തെ ജനസംഘവും ഇപ്പോൾ ബിജെപിയും സ്വീകരിച്ചിരിക്കുന്നത്. ഇന്ത്യാ വിഭജനത്തിന് ശേഷം പാക്കിസ്ഥാൻ നിലവിൽ വന്നതിനുശേഷമുള്ള സംഭവങ്ങളാണ് കാശ്മീരിനെ ഇന്ത്യയുടെ ഭാഗമാക്കിയതെന്ന് കരുതുന്ന ചരിത്രകാരന്മാർ ഏറെയാണ്.

ഇന്ത്യയിലോ പാക്കിസ്ഥാനിലോ, അതോ സ്വതന്ത്രമായി നിലനിൽക്കുകയാണോ കാശ്മീർ ചെയ്യുക എന്ന സംശയം നിലനിന്ന സമയത്താണ് പാക്കിസ്ഥാനിൽനിന്നുള്ള സായുധരായ സംഘം കാശ്മീരിലേക്ക് നുഴഞ്ഞുകയറുന്നത്. അന്ന് ഹരി സിംഗായിരുന്നു കാശ്മീർ ഭരിച്ചിരുന്നത്. ഭൂരിപക്ഷവും മുസ്ലീങ്ങളായ ദേശത്തെ ഹിന്ദു ഭരണാധികാരി. അദ്ദേഹത്തിന് നുഴഞ്ഞുകയറ്റക്കാരെ നേരിടാൻ സ്വന്തം നിലയിൽ സാധിക്കുമായിരുന്നില്ല. അങ്ങനെ ഇന്ത്യയുടെ സഹായം അഭ്യർത്ഥിക്കാൻ തീരുമാനിച്ചു. 1947 ഒക്ടോബർ 24-ന് കാശ്മീർ നുഴഞ്ഞു കയറ്റക്കാരെ നേരിടാൻ കാശ്മീർ ഇന്ത്യയോട് സഹായം തേടി.

സഹായാഭ്യർത്ഥന ലഭിച്ചതിനെ തുടർന്ന് ഗവർണർ ജനറൽ മൗണ്ട് ബാറ്റന്റെ അധ്യക്ഷതയിൽ ചേർന്ന പ്രതിരോധ കമ്മിറ്റി അന്നത്തെ ആഭ്യന്തര സെക്രട്ടറി വി.പി മേനോനോട് ഉടൻ ശ്രീനഗറിലേക്ക് പോകാൻ നിർദ്ദേശം നൽകി. ജമ്മുവിലെത്തിയ വി.പി മേനോൻ രാജാവിനെ കാണുകയും പ്രതിരോധ കമ്മിറ്റിയുടെ തീരുമാനം അറിയിക്കുകയുമായിരുന്നു. കാശ്മീർ ഒരു സ്വതന്ത്ര്യ ദേശമായി തുടരുന്നതിനാൽ ഇന്ത്യയ്ക്ക് സൈന്യത്തെ അയയ്ക്കുന്നതിന് ബുദ്ധിമുട്ടുണ്ടെന്ന കാര്യമാണ് വി.പി മേനോൻ അറിയിച്ചത്. അന്നത്തെ സാഹചര്യത്തിൽ കാശ്മീർ രാജാവിന് മുന്നിൽ മറ്റ് മാർഗങ്ങളില്ലായിരുന്നു. ഇന്ത്യയുടെ തീരുമാനം അറിയിച്ച ഉടൻ ഇന്ത്യയിൽ ചേരാനുള്ള താൽപര്യം ഹരിസിങ് അറിയിക്കുകയായിരുന്നുവെന്ന് വി.പി മേനോൻ പിന്നീട് എഴുതി. ഇന്ത്യയിൽ ചേരാനുള്ള കരാറും ഹരിസിംഗിന്റെ കത്തുമായാണ് വി.പി മേനോൻ ഡൽഹിയിലേക്ക് തിരിച്ചത്.

ക്രമസമാധാന നില ഭദ്രമായതിന് ശേഷം ജനഹിത പരിശോധന നടത്തി മാത്രമേ ഇക്കാര്യത്തിൽ അന്തിമമായ തീരുമാനം എടുക്കേണ്ടതുള്ളൂവെന്ന കാര്യത്തിലും തീരുമാനമായി. എന്നാൽ ജനഹിത പരിശോധന നടന്നില്ല. കാശ്മീരിനുള്ള പ്രത്യേക അധികാരം നിലനിന്നത് അങ്ങനെയാണ്. ഇതാണ് ബിജെപി എടുത്തു മാറ്റാൻ ശ്രമിക്കുന്നത്. ഇത് വലിയ പ്രതിഷേധങ്ങൾ ഉണ്ടാക്കുമെന്ന് ഉറപ്പാണ്.

കരുതലോടെ പ്രാദേശിക പാർട്ടികൾ

അതുകൊണ്ടാണ് കാശ്മീരിൽ സൈന്യം സുരക്ഷ ശക്തമാക്കുന്നത്. ഈ നീക്കത്തെ ചെറുത്ത് തോൽപ്പിക്കാൻ പ്രാദേശിക പാർട്ടികൾ തീരുമാനിച്ചിരുന്നു. പി.ഡി.പി. നേതാവ് മെഹ്ബൂബ മുഫ്തി ഞായറാഴ്ച വിളിച്ചുചേർത്ത യോഗമാണ് ഈ തീരുമാനമെടുത്തത്. ജമ്മുകശ്മീരിനു പ്രത്യേകപദവി നൽകുന്ന ഭരണഘടനാ അനുച്ഛേദങ്ങളായ 370-ഉം 35 എ-യും റദ്ദാക്കുകയോ സംസ്ഥാനത്തെ മൂന്നായി ഭാഗിക്കുകയോ ചെയ്താലുണ്ടാകുന്ന പ്രത്യാഘാതങ്ങളെക്കുറിച്ചു പറയാൻ രാഷ്ട്രപതി രാംനാഥ് കോവിന്ദ്, പ്രധാനമന്ത്രി നരേന്ദ്ര മോദി, വിവിധ രാഷ്ട്രീയപാർട്ടി നേതാക്കൾ എന്നിവരെ കാണാൻ പ്രതിനിധികളെ അയക്കാൻ യോഗം തീരുമാനിച്ചു. കശ്മീരിലെ സംഘർഷം തീവ്രമാക്കുന്ന നടപടികളെടുക്കരുതെന്ന് ഇന്ത്യയോടും പാക്കിസ്ഥാനോടും യോഗം അഭ്യർത്ഥിച്ചു. സംസ്ഥാനത്തെ ജനങ്ങളോടും സമാധാനം പുലർത്താൻ നിർദ്ദേശിച്ചു. നാഷണൽ കോൺഫറൻസ് (എൻ.സി.) നേതാവ് ഫാറൂഖ് അബ്ദുള്ളയുടെ വീട്ടിൽ ചേർന്ന യോഗത്തിൽ മെഹ്ബൂബ മുഫ്തി, ഒമർ അബ്ദുള്ള (എൻ.സി.) താജ് മൊഹിയുദ്ദിൻ (കോൺഗ്രസ്), മുസാഫർ ബെയ്ഗ് (പി.ഡി.പി.), സജാദ് ലോൺ, ഇമ്രാൻ അൻസാരി (പീപ്പിൾസ് കോൺഫറൻസ്), ഷാ ഫൈസൽ (ജമ്മുകശ്മീർ പീപ്പിൾസ് മൂവ്‌മെന്റ്), എം.വൈ. തരിഗാമി (സിപിഎം.) എന്നിവരും പങ്കെടുത്തു. ഇതിന് പിന്നാലെയാണ് നേതാക്കളെ കേന്ദ്ര സർക്കാർ വീട്ടു തടങ്കലിലാക്കിയത്.

ജമ്മു കാശ്മീരിൽ തിങ്കളാഴ്ച പുലർച്ചെ ആറുമണിതൊട്ട് നിരോധനാജ്ഞ പ്രഖ്യാപിച്ചിട്ടുണ്ട്. ശ്രീനഗറിലും കാശ്മീർ താഴ്‌വരയിലും നിരോധനാജ്ഞ പ്രഖ്യാപിച്ചിട്ടുണ്ട്. വിദ്യാഭ്യാസ സ്ഥാപനങ്ങൾക്ക് തിങ്കളാഴ്ച അവധി നൽകിയിരിക്കുകയാണ്. മൊബൈൽ ഇന്റർനെറ്റ് സേവനങ്ങൾ ഭാഗികമായി റദ്ദാക്കിയിട്ടുണ്ട്. ഇതര സംസ്ഥാനത്തുനിന്നുള്ളവരെ പൂർണ്ണമായും ഒഴിപ്പിച്ചതിനു ശേഷമാണ് നേതാക്കളെ വീട്ടുതടങ്കലിലാക്കിയത്. ജമ്മു കാശ്മീരിനു പുറത്തുനിന്നുള്ള വാഹനങ്ങൾക്ക് സംസ്ഥാനത്ത് നിരോധനം ഏർപ്പെടുത്തിയിട്ടുണ്ട്. സർക്കാരിന്റെ കണക്കുപ്രകാരം വിനോദ സഞ്ചാരികളും തീർത്ഥാടകരും അടക്കം 11,000 പേരും വിദേശികളായ 200 പേരും കാശ്മീരിലുണ്ട്. ഇവരെ സംസ്ഥാനത്തുനിന്നും പുറത്തെത്തിക്കാനുള്ള ശ്രമം നടന്നുവരികയാണ്.

കാശ്മീരിൽ പൊടുന്നനെയുണ്ടായ സൈനിക വിന്യാസം ജനങ്ങളിൽ ഭീതിവിതച്ചിട്ടുണ്ടെന്നാണ് സൂചന. എന്താണ് കാശ്മീരിൽ സംഭവിക്കുന്നതെന്ന് അറിയില്ലെന്ന് ഒമർ അബ്ദുള്ള പറഞ്ഞു. തന്നെ എടിഎമ്മിലോ പെട്രോൾ പമ്പിലോ പോകാൻ അനുവദിക്കുന്നില്ലെന്നും അദ്ദേഹം വ്യക്തമാക്കി. അപ്രതീക്ഷിതമായ തീരുമാനം ഉണ്ടാകുമെന്നുള്ള ഭീതിയിലാണ് കാശ്മീരിലെ ജനങ്ങൾ. സ്വാതന്ത്ര്യ ദിനം പ്രഖ്യാപിച്ചുള്ള സാധാരണ സുരക്ഷാ ക്രമീകരണങ്ങളാണ് കാശ്മീരിൽ ഒരുക്കിയിരിക്കുന്നതെന്നാണ് ഒരു കൂട്ടർ പറയുന്നത്.

പാക്കിസ്ഥാൻ വലിയ ഭീകരാക്രമണം നടത്താൻ പദ്ധതിയിട്ടിട്ടുണ്ടെന്നാണ് കേന്ദ്രം നൽകുന്ന വിശദീകരണം. ജമ്മു കാശ്മീരിലെ സ്ഥിതിഗതികൾ വിലയിരുത്താൻ അമിത് ഷായുടെ നേതൃത്വത്തിലുള്ള യോഗം ചേർന്നിരുന്നു. ദേശീയ സുരക്ഷാ ഉപേദേഷ്ടാവ് അജിത് ഡോവൽ, കേന്ദ്ര ആഭ്യന്തര സെക്രട്ടറി രാജിവ് ഗോബെ എന്നിവരുടെ നേതൃത്വത്തിലായിരുന്നു കൂടിക്കാഴ്ച.

Stories you may Like

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

More News in this category+

MNM Recommends +

Go to TOP