Forex Rate:

1 usd = 76.25 inr 1 gbp = 94.16 inr 1 eur = 85.23 inr 1 aed = 20.76 inr 1 sar = 20.32 inr 1 kwd = 247.66 inr
Oct / 202029Thursday

കോവിഡിൽ മുഖ്യമന്ത്രിയുടെ ജനപ്രീതി ഉയർന്നു; എറ്റവും പിന്തുണയുള്ളത് ശൈലജ ടീച്ചർക്ക്; സർവേയിൽ പങ്കെടുത്ത 97 ശതമാനം പേരും ആരോഗ്യമന്ത്രിയുടെ പ്രവർത്തനം അംഗീകരിക്കുന്നു; ചെന്നിത്തലയും മുല്ലപ്പള്ളിയും പിറകോട്ട്; കോൺഗ്രസിന്റെ ഏറ്റവും ജനപ്രിയ നേതാവ് ഇപ്പോഴും ഉമ്മൻ ചാണ്ടി തന്നെ; കെ സുരേന്ദ്രന്റെ ജനപിന്തുണയിലും വർദ്ധന; അഭിപ്രായം തേടിയത് 50 നിയമസഭാ മണ്ഡലങ്ങളിലെ 10,409 വോട്ടർമാരുടെ; ഏഷ്യാനെറ്റ് സീ ഫോർ കോവിഡ്കാല സർവേഫലം ഇങ്ങനെ

കോവിഡിൽ മുഖ്യമന്ത്രിയുടെ ജനപ്രീതി ഉയർന്നു; എറ്റവും പിന്തുണയുള്ളത് ശൈലജ ടീച്ചർക്ക്; സർവേയിൽ പങ്കെടുത്ത 97 ശതമാനം പേരും ആരോഗ്യമന്ത്രിയുടെ പ്രവർത്തനം അംഗീകരിക്കുന്നു; ചെന്നിത്തലയും മുല്ലപ്പള്ളിയും പിറകോട്ട്; കോൺഗ്രസിന്റെ ഏറ്റവും ജനപ്രിയ നേതാവ് ഇപ്പോഴും ഉമ്മൻ ചാണ്ടി തന്നെ; കെ സുരേന്ദ്രന്റെ ജനപിന്തുണയിലും വർദ്ധന; അഭിപ്രായം തേടിയത് 50 നിയമസഭാ മണ്ഡലങ്ങളിലെ 10,409 വോട്ടർമാരുടെ; ഏഷ്യാനെറ്റ് സീ ഫോർ കോവിഡ്കാല സർവേഫലം ഇങ്ങനെ

മറുനാടൻ ഡെസ്‌ക്‌

 തിരുവനന്തപുരം: കോവിഡിൽ മുഖ്യമന്ത്രി പിണറായി വിജയന്റെ ജനപ്രീതി ഉയർന്നതായി ഏഷ്യാനെറ്റ് സർവേ. സീ ഫോറുമായി ചേർന്ന് ഏഷ്യാനെറ്റ് നടത്തിയ സാമ്പിൾ സർവേയിൽ പ്രതിപക്ഷത്തിന്റെ ജനപ്രീതി കോവിഡ് കാലത്ത് ഇടിയുന്നതായിട്ടാണ് കണ്ടത്. ആരോഗ്യമന്ത്രി കെ കെ ശൈലജ കോവിഡ് കാലത്തെ ജനപ്രീതിയിൽ മുന്നിൽ നിൽക്കുമ്പോൾ, കെപിസിസി പ്രസിഡന്റ് മുല്ലപ്പള്ളി രാമചന്ദ്രനും, പ്രതിപക്ഷ നേതാവ് രമേശ് ചെന്നിത്തലയുടെയും ജനപ്രീതി കുറയുന്നതായാണ് സർവേ ഫലങ്ങൾ സൂചിപ്പിക്കുന്നത്. അതേസമയം ബിജെപി സംസ്ഥാന അധ്യക്ഷൻ കെ സുരേന്ദ്രന്റെ ജനപ്രീതി കോവിഡ് കാലത്ത് വർധിച്ചിട്ടുണ്ട്. 50 നിയമസഭാ മണ്ഡലങ്ങളിലെ 10,409 വോട്ടർമാരുടെ അഭിപ്രായങ്ങളാണ് സർവേയ്ക്കായി തേടിയത്. പഞ്ചായത്ത്, നിയമസഭ തെരഞ്ഞെടുപ്പുകൾ അടുത്തുവരുന്ന സാഹചര്യത്തിൽ കോവിഡ് കാലം സംസ്ഥാന രാഷ്ട്രീയത്തിലും നേതാക്കളിലും എന്ത് മാറ്റം കൊണ്ടുവന്നു എന്ന അന്വേഷണം കൂടിയായിരുന്നു സർവേ. ജൂൺ 18 മുതൽ 29 വരെയായിരുന്നു സർവേ നടന്നത്.

കോവിഡ് പിണറായിയുടെ ഇമേജ് ഉയർത്തിയെന്ന് 86 ശതമാനം

കോവിഡ് കാലത്തെ പ്രവർത്തനം മുഖ്യമന്ത്രി പിണറായി വിജയന്റെ മതിപ്പ് ഉയർത്തിയോ എന്ന ചോദ്യത്തിന്, 86ശതമാനവും ഉയർത്തി എന്നാണ് പ്രതികരിച്ചത്. ഇടിഞ്ഞുവെന്ന് പ്രതികരിച്ചവർ 14 ശതമാനം മാത്രമാണ്. കോവിഡ് കാലത്തെ മുഖ്യമന്ത്രിയുടെ പ്രവർത്തനം വളരെ മികച്ചത് എന്ന് 16 ശതമാനം പേർ അഭിപ്രായപ്പെടുമ്പോൾ 51 ശതമാനം പേർ മികച്ചത് എന്ന് അഭിപ്രായപ്പെട്ടു. 17 ശതമാനം പേർ തൃപ്തികരം എന്ന് അഭിപ്രായപ്പെടുമ്പോൾ 16 ശതമാനം പേർ മാത്രമാണ്, മോശം എന്ന് പറയുന്നത്. ആകെയുള്ള പ്രവർത്തനങ്ങളിലും മുഖ്യമന്ത്രിയെന്ന നിലയിൽ പിണറായി വിജയന് ജനങ്ങൾ നൽകുന്നത് നല്ല മാർക്കാണ്. വളരെ മികച്ചത് 9 ശതമാനം പേരും, മികച്ചത് എന്ന് 45 ശതമാനം പേരും തൃപ്തികരം 27 ശതമാനം പേരും അഭിപ്രായപ്പെട്ടു. പിണറായി വിജയൻ മുഖ്യമന്ത്രിയെന്ന നിലയിൽ മോശമെന്ന് സർവേയിൽ പങ്കെടുത്ത 19 ശതമാനം പേർ മാത്രമാണ് അഭിപ്രായപ്പെത്.

എന്നാൽ മുഖ്യമന്ത്രിയെയും കടത്തിവെട്ടുന്ന ജനപ്രീതിയാണ് ആരോഗ്യമന്ത്രി കെ കെ ശൈലജ ടീച്ചർക്കുള്ളത്. വെറും 3 ശതമാനം പേർ മാത്രമാണ് ടീച്ചറുടെ പ്രകടനം വളരെ മോശമാണെന്ന് പറയുന്നത്. 38ശതമാനം പേർ വളരെ മികച്ചത് എന്നും 43 ശതമാനം മികച്ചത് എന്നും പറയുന്നു. 16 ശതമാനം പേർ തൃപ്തികരം എന്നാണ് പറയുന്നത്. അതായത് സർവേയിൽ പങ്കെടുത്ത 97 ശതമാനം പേരും ആരോഗ്യമന്ത്രി ശൈലജ ടീച്ചറുടെ പ്രവർത്തനം അംഗീകരിക്കുയായിരുന്നു.

ചെന്നിത്തലക്കും മുുല്ലപ്പള്ളിക്കും ജന പിന്തുണ കുറവ്

പ്രതിപക്ഷനേതാവെന്ന നിലയിൽ പൊതുവിലും കോവിഡ് കാലത്തെ പ്രവർത്തനത്തിന്റെ പേരിലും ചെന്നിത്തലയ്ക്ക് എത്ര മാർക്ക് എന്ന ചോദ്യത്തിന്, മോശം എന്നാണ് 43 ശതമാനം പേരും പ്രതികരിച്ചത്. തൃപ്തികരം എന്ന് 37 ശതമാനം പേർ പറയുമ്പോൾ 18 ശതമാനം മികച്ചത് എന്ന അഭിപ്രായമുള്ളവർ ആണ്. എന്നാൽ ചെന്നിത്തലയുടെ പ്രവർത്തനം വളരെ മികച്ചതാണെന്ന് പറയുന്നവർ വെറും 2 ശതമാനം മാത്രമാണ്.

മുല്ലപ്പള്ളിലെ എങ്ങനെ പ്രവർത്തനം എങ്ങനെ വിലയിരുത്തുന്നുവെന്ന ചോദ്യത്തിന് 47 ശതമാനം പേർ മോശം എന്നാണ് അഭിപ്രായപ്പെട്ടത്. 34 ശതമാനം പേർ തൃപ്തികരമെന്ന് പറയുമ്പോൾ, 13 ശതമാനം പേർ മികച്ചത് എന്നും പറയുന്നു. വളരെ മികച്ചത് എന്ന അഭിപ്രായമുള്ളവർ വെറും 6 ശതമാനം മാത്രമാണ്.

കോവിഡ് കാലത്ത് കെ സുരേന്ദ്രന്റെ പിന്തുണ വർധിച്ചു

.ബിജെപി സംസ്ഥാന അധ്യക്ഷനെന്ന നിലയിൽ കെ സുരേന്ദ്രനെ എങ്ങനെ വിലയിരുത്തുന്നുവെന്ന എഷ്യാനെറ്റ് ന്യൂസ് സി ഫോർ സർവേയിലെ ഫലം ഇങ്ങനെയാണ്. സുരേന്ദ്രന്റെ പ്രവർത്തനം വളരെ മികച്ചതാണെന്ന് അഭിപ്രായപ്പെട്ടത് 5 ശതമാനം പേരാണ്. മികച്ച പ്രവർത്തനമെന്ന് 18 ശതമാനവും തൃപ്തികരമെന്ന് 40 ശതമാനമാളുകളും സർവേയിൽ അഭിപ്രായം രേഖപ്പെടുത്തി. അതേസമയം 37 ശതമാനം പേർ സുരേന്ദ്രന്റെ പ്രവർത്തനം മോശമാണെന്ന് അഭിപ്രായപ്പെട്ടു.

എന്നാൽ കോവിഡ് കാലത്ത് കെ സുരേന്ദ്രന്റെ മതിപ്പ് ഉയർന്നുവെന്നാണ് 56 ശതമാനം പേർ അഭിപ്രായപ്പെട്ടത്. കോവിഡ് കാലത്ത് സുരേന്ദ്രന്റെ മതിപ്പ് കുറഞ്ഞെന്ന് 44 പേരാണ് അഭിപ്രായപ്പെട്ടത്.

കോൺഗ്രസിന്റെ ജനപ്രിയ നേതാവ് ഇപ്പോഴും ഉമ്മൻ ചാണ്ടി

കോൺഗ്രസിന്റെ ഏറ്റവും ജനപ്രിയ നേതാവ് ഇപ്പോഴും ഉമ്മൻ ചാണ്ടി തന്നെയെന്ന് സർവേ വ്യക്തമാക്കുന്നു. കോൺഗ്രസിന്റെ മുഖ്യമന്ത്രി സ്ഥാനാർത്ഥിയായി 47 ശതമാനം പേരും ഉമ്മൻ ചാണ്ടിയെ കാണുമ്പോൾ രമേശ് ചെന്നിത്തലയെ അതേ സ്ഥാനത്ത് കാണുന്നവർ 13 ശതമാനം പേരെയുള്ളു. 12 ശതമാനം പേരുടെ മുഖ്യമന്ത്രി സ്ഥാനാർത്ഥിയായി മുല്ലപ്പള്ളി രാമചന്ദ്രൻ തൊട്ടുപിന്നിലുണ്ട്.

വി എസ് അച്യുതാനന്ദൻ സജീവമല്ലാത്തത് ഇടതുമുന്നണിയെ ബാധിക്കില്ലെന്ന് 30 ശതമാനം പേരും, പ്രതികൂലമായി ബാധിക്കുമെന്ന് 33 ശതമാനം പേരും, ഗുണം ചെയ്യുമെന്ന് ആറ് ശതമാനം പേരും അഭിപ്രായപ്പെട്ടു. കേരള കോൺഗ്രസിലെ പിളർപ്പ് യുഡിഎഫിനെ ക്ഷീണിപ്പിച്ചുവെന്നും കേരള കോൺഗ്രസും ലീഗും യുഡിഎഫിൽ തന്നെ തുടരുമെന്നും കരുതുന്നവരാണ് 49 ശതമാനം പേരും.

Stories you may Like

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

More News in this category+

MNM Recommends +

Go to TOP