Forex Rate:

1 usd = 76.25 inr 1 gbp = 94.16 inr 1 eur = 85.23 inr 1 aed = 20.76 inr 1 sar = 20.32 inr 1 kwd = 247.66 inr
Oct / 202031Saturday

കണ്ണിൽ ചോരയില്ലാത്ത വിധിയെന്ന് കോടിയേരി ബാലകൃഷ്ണൻ! ഫ്‌ളാറ്റുടമകൾ വഴിയാധാരമാകരുതെന്ന് രമേശ് ചെന്നിത്തല! സൗജന്യ നിയമ സഹായവുമായി ജസ്റ്റിസ് കമാൽ പാഷ! ഇടതു വലതു എംപിമാർ ഒന്നിച്ചു പ്രധാനമന്ത്രിക്ക് നിവേദനവും! കിടപ്പാടം പോകുന്നവരെ സർക്കാർ സംരക്ഷിക്കുമെങ്കിൽ മൂലമ്പള്ളിയിൽ അടക്കം വഴിയാധാരമായ പാവങ്ങളെയാണ് ആദ്യം സംരക്ഷിക്കേണ്ടത്; അതിനു ശേഷമുള്ള ദയ മാത്രമേ മരട് സമരം അർഹിക്കുന്നുള്ളൂ: അബ്ദുൾ റഷീദിന്റെ കുറിപ്പ് ചർച്ചയാകുമ്പോൾ

കണ്ണിൽ ചോരയില്ലാത്ത വിധിയെന്ന് കോടിയേരി ബാലകൃഷ്ണൻ! ഫ്‌ളാറ്റുടമകൾ വഴിയാധാരമാകരുതെന്ന് രമേശ് ചെന്നിത്തല! സൗജന്യ നിയമ സഹായവുമായി ജസ്റ്റിസ് കമാൽ പാഷ! ഇടതു വലതു എംപിമാർ ഒന്നിച്ചു പ്രധാനമന്ത്രിക്ക് നിവേദനവും! കിടപ്പാടം പോകുന്നവരെ സർക്കാർ സംരക്ഷിക്കുമെങ്കിൽ മൂലമ്പള്ളിയിൽ അടക്കം വഴിയാധാരമായ പാവങ്ങളെയാണ് ആദ്യം സംരക്ഷിക്കേണ്ടത്; അതിനു ശേഷമുള്ള ദയ മാത്രമേ മരട് സമരം അർഹിക്കുന്നുള്ളൂ: അബ്ദുൾ റഷീദിന്റെ കുറിപ്പ് ചർച്ചയാകുമ്പോൾ

മറുനാടൻ മലയാളി ബ്യൂറോ

കൊച്ചി: എന്താണ് മരടിൽ സംഭവിക്കുന്നത്?ഓർക്കേണ്ടത് മൂലമ്പള്ളിയെ കുറിച്ചാണ്. മരടിന് വേണ്ടി എല്ലാവരും ഒരുമിക്കുമ്പോൾ മൂലമ്പള്ളിയിലെ ഓർമ്മകൾ വീണ്ടും ചർച്ചയാക്കുകയാണ് മറ്റൊരു കൂട്ടർ. അബ്ദുൾ റഷീദിന്റെ കുറിപ്പും ഇത്തരത്തിൽ വൈറലാകുകയാണ്. നീതി നിഷേധിക്കപ്പെട്ട സമൂഹത്തെയാണ് കൂടുതൽ ഒന്നും പറയാനില്ലെന്ന തലവാചകത്തോടെ അബ്ദുൾ റഷീദ് ചർച്ചയാക്കുന്നത്.

അബ്ദുൾ റഷീദിന്റെ കുറിപ്പ് ചുവടെ

2008 ഫെബ്രുവരി ആറിനാണ് ഒറ്റ രാത്രികൊണ്ട് മൂലമ്പിള്ളിക്കാർക്ക് എല്ലാം നഷ്ടമായത്. ബലം പ്രയോഗിച്ചു കുടിയൊഴിപ്പിക്കില്ലെന്ന് ഭരണകൂടം പറഞ്ഞു മണിക്കൂറുകൾക്കകം അവരുടെ വീടുകൾ ഇടിച്ചു നിരത്തപ്പെട്ടു. ചെറുത്തുനിന്നവരെ പൊലീസ് നേരിട്ടു.

സാധന സാമഗ്രികൾ വലിച്ചെറിയപ്പെട്ടു. ചോറു കലങ്ങൾ ലാത്തിയടിയേറ്റു പൊട്ടി. ജനിച്ചു വളർന്ന വീടുകൾ ഇടിഞ്ഞു വീഴുമ്പോൾ പലരും ബോധംകെട്ടു. മൺകൂനകളായി മാറിയ വീടുകളുടെ മേൽ കുഞ്ഞുങ്ങൾ വെറും മണ്ണിൽ കിടന്നുറങ്ങി.

വലിയ മാധ്യമ പിന്തുണയൊന്നും മൂലമ്പള്ളിക്കാർക്ക് കിട്ടിയില്ല. മുഖ്യധാരാ രാഷ്ട്രീയക്കാർ അവിടെ തമ്പടിച്ചില്ല. സൗജന്യ നിയമ സഹായവുമായി ആരും വന്നില്ല. മൂലമ്പള്ളിക്കാർക്കായി സുപ്രീംകോടതിയിൽ അപ്പീൽ പോകാൻ ആരും ഉണ്ടായില്ല. കൊച്ചിയിലെ അംബരചുംബികളായ ഫ്‌ളാറ്റുകളിൽ നിന്ന് മൂലമ്പള്ളിക്കാർക്കായി ആരും ശബ്ദമുയർത്തിയില്ല. 'വികസനവിരുദ്ധരായ' മൂലമ്പള്ളിക്കാരെ പലരും പരിഹസിച്ചു. മൂലമ്പള്ളി സമരത്തിന് പിന്നിൽ നക്‌സലുകളാണെന്ന് അന്നത്തെ മുഖ്യമന്ത്രി വി എസ് അച്യുതാനന്ദൻ ആരോപിച്ചു.

മൂലമ്പള്ളിയിൽ പേരിനൊരു പുനരധിവാസ പാക്കേജ് സർക്കാർ പ്രഖ്യാപിച്ചു. അത് വലുതായൊന്നും ഫലവത്തായില്ല. അന്ന് കിടപ്പാടം നഷ്ടമായ പലരും ഇത്ര വർഷങ്ങൾക്കു ശേഷവും വാടക വീടുകളിലാണ്. കുറേക്കാലം അവർ സമരമൊക്കെ നടത്തിയിരുന്നു. ഇപ്പോൾ എവിടെയൊക്കെയോ ചിതറി....

പതിനൊന്നു വർഷങ്ങൾക്കിപ്പുറം മരട്...
തീരദേശ പരിപാലന നിയമം നഗ്‌നമായി ലംഘിച്ചു കെട്ടിപ്പൊക്കിയ അഞ്ചു ഫ്‌ളാറ്റ് സമുച്ഛയങ്ങൾ പൊളിച്ചു നീക്കാൻ സുപ്രീംകോടതി ഉത്തരവ്.

കണ്ണിൽ ചോരയില്ലാത്ത വിധിയെന്ന് കോടിയേരി ബാലകൃഷ്ണൻ. ഫ്‌ളാറ്റുടമകൾ വഴിയാധാരമാകരുതെന്ന് രമേശ് ചെന്നിത്തല. സൗജന്യ നിയമ സഹായവുമായി ജസ്റ്റിസ് കമാൽ പാഷ. ഇടതു വലതു എംപിമാർ ഒന്നിച്ചു പ്രധാനമന്ത്രിക്ക് നിവേദനം. ഫ്‌ളാറ്റുടമകൾക്കായി സിപിഎം ധർണ. ഹൈബി ഈഡൻ ഒരാഴ്ചയായി അവിടെത്തന്നെയാണ്, സമരമുഖത്ത്.

ഒന്നരക്കോടിവരെ മുടക്കി ഫ്ളാറ്റ് വാങ്ങിയവർ ഇതാദ്യമായി പ്ലെക്കാർഡുകൾ പിടിച്ചു മുദ്രാവാക്യം മുഴക്കുന്നു. തിരുവോണത്തിന് പട്ടിണി സമരം നടത്തുന്നു. കിടപ്പാടം, സമരം, പോരാട്ടം എന്നൊക്കെ അവർ പറഞ്ഞു പഠിക്കുന്നു. ഇതു കേട്ട്, ഭരണകൂടം മനസലിഞ്ഞു നിൽക്കുന്നു. ഫ്‌ളാറ്റുടമകൾക്ക് അനുകൂലമായ വാദങ്ങൾ കോടതിയിൽ ഉന്നയിക്കാൻ കേരളത്തിനായി സോളിസിറ്റർ ജനറൽ തന്നെ സുപ്രീം കോടതിയിൽ ഹാജരാകും. കരുണ കാട്ടണമെന്ന് അപേക്ഷിച്ചു ഫ്ളാറ്റ് ഉടമകൾക്കായി സർക്കാർ കോടതിയുടെ കാൽക്കൽ വീഴും.

മരടിലെ ഫ്‌ളാറ്റുടമകളിൽ ഒരു ചെറു വിഭാഗം തീർച്ചയായും പോകാൻ മറ്റൊരിടം ഇല്ലാത്തവരാണ്. ജീവിതത്തിലെ എല്ലാ സമ്പാദ്യവും നിക്ഷേപിച്ചു ഫ്‌ളാറ്റ് വാങ്ങിയവർ. എന്നാൽ, ഒരു ലാഭനിക്ഷേപമെന്ന നിലയിൽ വാങ്ങി താമസക്കാരില്ലാതെ അടഞ്ഞു കിടക്കുന്ന ഫ്‌ളാറ്റുകളുണ്ട്. തീരദേശ നിയമം ലംഘിച്ചതിന് കേസ് ഉണ്ടെന്നു അറിഞ്ഞുകൊണ്ട് തന്നെ ഫ്‌ളാറ്റുകൾ വാങ്ങിയ അനേകം പേർ ഉണ്ട്. കോടതിയിലെത്തുന്ന എല്ലാ പരിസ്ഥിതി കേസുകളുംപോലെ ഇതും പണം നൽകി വക്കീലിനെ വച്ചാൽ അലിഞ്ഞു ഇല്ലാതാകുമെന്ന് കരുതി ഫ്‌ളാറ്റ് വാങ്ങിയവർ. ആ ധാരണകളാണ് കോടതി പൊളിച്ചത്. ഇടയ്ക്ക് ഒരടി നല്ലതാണ്.

ഈ അനധികൃത ആകാശ മന്ദിരങ്ങൾക്ക് അനുമതി നൽകിയ ഉദ്യോഗസ്ഥരും ഭരണാധികാരികളും ഇപ്പോൾ ചിത്രത്തിൽ ഇല്ല. കാരണം, നിരപരാധികളായ ഫ്‌ളാറ്റുടമകൾ ഃ കണ്ണിൽ ചോരയില്ലാത്ത കോടതി എന്ന ദ്വന്ദ്വത്തിൽ ഇത് നിൽക്കുന്നതാണ് എല്ലാവർക്കും നല്ലത്.

അല്ലെങ്കിൽ ആരാണ് ഈ നിർമ്മാണങ്ങൾക്ക് അനുമതി നൽകിയതെന്ന ചോദ്യം വരും. ഏതു തദ്ദേശ സ്ഥാപനങ്ങൾ? ഏതു ഉദ്യോഗസ്ഥർ? ഏതു ഭരണാധികാരികൾ? ഒപ്പം, അപ്പം ചുടുമ്പോലെ അതിവേഗം അനുമതികൾ ഓരോന്നായി വാങ്ങിയെടുത്ത് ഇതൊക്കെ കെട്ടിപ്പൊക്കിയ നിർമ്മാതാക്കൾ ആരെന്ന ചോദ്യം വരും. അതൊക്കെ എല്ലാവർക്കും തലവേദനയാകും. ഇടതിനും വലതിനും.

ശ്രദ്ധിച്ചാൽ മനസിലാകും, ' സർക്കാർ രക്ഷിക്കണം' എന്നാണു ഫ്‌ളാറ്റുടമകൾ പറയുന്നത്. നഷ്ടം സർക്കാർ വഹിക്കണമെന്ന്. ഒഴിപ്പിക്കാൻ നോക്കിയാൽ ആത്മഹത്യ ചെയ്യുമെന്നും. ഈ അനധികൃത നിർമ്മാണങ്ങൾ നടത്തി അത് വിറ്റഴിച്ച ഫ്‌ളാറ്റ് നിർമ്മാതാക്കളെക്കുറിച്ചു അവർക്ക് പരാതിയൊന്നും ഇല്ല. ആ ഫ്‌ളാറ്റ് നിർമ്മാതാക്കളുടെ പേര് പോലും പറയാൻ സമരക്കാർ മടിക്കുന്നു. അനധികൃത ഫ്‌ളാറ്റുകൾ നിർമ്മിച്ചു വിറ്റ് തങ്ങളെ വഞ്ചിച്ച ഫ്‌ളാറ്റ് നിർമ്മാതാക്കൾക്ക് എതിരെ കേസിനു പോകുമെന്ന് ഏതെങ്കിലും ഫ്‌ളാറ്റുടമ പറഞ്ഞോ? ഇല്ല. പറയില്ല.

മരട് ഒരു പാഠമാണ്. ചട്ടങ്ങൾ കാറ്റിൽ പറത്തി അനുമതികൾ ചുട്ടെടുത്ത് ആകാശ മന്ദിരങ്ങൾ പണിയുന്നവർ ഇനിയും അത് തുടരും. എന്നാൽ, അധ്വാനിച്ചുണ്ടാക്കിയ പണം മുടക്കി അത് വാങ്ങാൻ ഇറങ്ങുന്നവർ ഇനി രണ്ടുവട്ടം ആലോചിക്കും. ചുരുങ്ങിയപക്ഷം കേസുണ്ടോ എന്നെങ്കിലും അന്വേഷിക്കും. ഹോളിഡേ ഹെറിറ്റേജ്, ഹോളി ഫെയ്ത്ത്, ജയിൻ ഹൗസിങ്, കായലോരം അപ്പാർട്ടുമെന്റ്, ആൽഫ വെഞ്ചേഴ്‌സ് എന്നൊക്കെയുള്ള പേരുകൾ കണ്ട് ലക്ഷങ്ങൾ മുടക്കുമ്പോൾ ഒരു മിനിമം പരിശോധനയെങ്കിലും നടത്തും. അതാണ് ഈ സുപ്രീംകോടതി ഇടപെടലിന്റെ ഗുണവും പാഠവും.

ഇതൊക്കെയാണെങ്കിലും മരടിലെ ആ ഫ്‌ളാറ്റുകൾ ഇടിച്ചു നിരത്താതിരിക്കാൻ സർക്കാരിന് മുന്നിൽ വഴിയുണ്ടെങ്കിൽ അത് പരിഗണിക്കപ്പെടണം. അഞ്ചു കൂറ്റൻ മന്ദിരങ്ങൾ ഇടിച്ചു നിരത്തുന്നതിന്റെ പാരിസ്ഥിതിക ആഘാതം ഭീകരമായിരിക്കും. ഒപ്പം ഫ്‌ളാറ്റുടമകളിൽ ഒരു ചെറിയ വിഭാഗം, ജീവിതത്തിലെ എല്ലാ സമ്പാദ്യവും ആ ഫ്‌ളാറ്റുകളിൽ മുടക്കിയവരാണ്. ആ മാനുഷിക വശം പരിഗണിക്കപ്പെടണം.

ആ അനധികൃത നിർമ്മാണങ്ങൾക്ക് അനുമതി കൊടുത്തവർ ചിത്രത്തിൽ വരണം. അവർ വിചാരണ ചെയ്യപ്പെടണം. ആ മന്ദിരങ്ങൾ കെട്ടിപ്പൊക്കിയ നിർമ്മാതാക്കളിൽനിന്ന് നഷ്ടപരിഹാരം ഈടാക്കണം. മേലിൽ ഇത്തരം നിർമ്മാണങ്ങൾ ഉണ്ടാകാത്ത വിധം നിയമം കർശനമാക്കാൻ ഈ അവസരം സർക്കാർ ഉപയോഗിക്കണം. ഒരു തിരുത്തലിനുള്ള അവസരമാണിത്.

ഒന്നുകൂടി. ഫ്ളാറ്റുടമകളുടെ നഷ്ടം സർക്കാർ നികത്തണം എന്നുള്ള വാദങ്ങൾ ഉയർന്നു തുടങ്ങി. പൊതു ഖജനാവിൽ നിന്ന് ഒറ്റ പൈസ മരടിലെ ഫ്‌ളാറ്റ് നിവാസികൾക്കായി ഉപയോഗിക്കരുത്. നഷ്ടം, ഈ അനധികൃത കെട്ടിടങ്ങൾ കെട്ടിപ്പൊക്കിയ നിർമ്മാതാക്കളിൽ നിന്നും അതിന് അനുമതി നൽകിയവരിൽ നിന്നും ഈടാക്കണം.

കിടപ്പാടം പോകുന്നവരെ സർക്കാർ സംരക്ഷിക്കുമെങ്കിൽ, മൂലമ്പള്ളിയിൽ അടക്കം വഴിയാധാരമായ പാവങ്ങളെയാണ് ആദ്യം സംരക്ഷിക്കേണ്ടത്. അതിനു ശേഷമുള്ള ദയ മാത്രമേ മരട് സമരം അർഹിക്കുന്നുള്ളൂ.

Stories you may Like

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

More News in this category+

MNM Recommends +

Go to TOP