Forex Rate:

1 usd = 76.25 inr 1 gbp = 94.16 inr 1 eur = 85.23 inr 1 aed = 20.76 inr 1 sar = 20.32 inr 1 kwd = 247.66 inr
Mar / 202405Tuesday

കമ്പ്യൂട്ടർ സംവിധാനം ഹാക്ക് ചെയ്‌തെന്നോ, വയർലസ് സന്ദേശം ചോർത്തിയെന്നോ പൊലീസിന് പരാതിയില്ല; കേസുകൾ എടുത്തത് മൂന്നാം കക്ഷിയായ പി വി അൻവറിന്റെ പരാതിയിൽ എന്ന് നിരീക്ഷിച്ച് സെഷൻസ് കോടതി; ഷാജൻ സ്‌കറിയയുടെ അറസ്റ്റ് തടഞ്ഞ വിധിയുടെ വിശദാംശങ്ങൾ

കമ്പ്യൂട്ടർ സംവിധാനം ഹാക്ക് ചെയ്‌തെന്നോ, വയർലസ് സന്ദേശം ചോർത്തിയെന്നോ പൊലീസിന് പരാതിയില്ല; കേസുകൾ എടുത്തത് മൂന്നാം കക്ഷിയായ പി വി അൻവറിന്റെ പരാതിയിൽ എന്ന് നിരീക്ഷിച്ച് സെഷൻസ് കോടതി; ഷാജൻ സ്‌കറിയയുടെ അറസ്റ്റ് തടഞ്ഞ വിധിയുടെ വിശദാംശങ്ങൾ

മറുനാടൻ മലയാളി ബ്യൂറോ

കൊച്ചി: മറുനാടൻ മലയാളി എഡിറ്റർ ഷാജൻ സ്‌കറിയയ്‌ക്കെതിരെ ആലുവ ഈസ്റ്റ് പൊലീസ് പുതിയ കേസെടുത്തത് പി വി അൻവർ എംഎൽഎയുടെ പരാതിയിൽ. പൊലീസിന്റെ വയർലസ് സന്ദേശം ചോർത്തിയെന്ന പേരിൽ, ഷാജനെതിരെ, തിരുവനന്തപുരം സൈബർ ക്രൈം പൊലീസ് സ്റ്റേഷൻ സമാന കേസെടുത്തിരുന്നതും അൻവറിന്റെ പരാതിയിലാണ്. ആലുവ ഈസ്റ്റ് പൊലീസിന്റെ കേസും പൊലീസിന്റെ വയർലസ് സന്ദേശം ചോർത്തി യുട്യൂബ് ചാനലിൽ പ്രസിദ്ധീകരിച്ചുവെന്നാണ്. എന്നാൽ, തങ്ങളുടെ കമ്പ്യൂട്ടർ സംവിധാനം ഹാക്ക് ചെയ്‌തെന്നോ, വയർലസ് സന്ദേശം അനധികൃതമായി ടേപ്പ് ചെയ്‌തെന്നോ, പകർത്തിയെന്നോ കേരള പൊലീസ് ഒരു പരാതിയും നൽകിയിട്ടില്ലെന്ന് കോടതി ഉത്തരവിൽ പരാമർശിച്ചു. മൂന്നാം കക്ഷി നൽകിയ പരാതിയുടെ അടിസ്ഥാനത്തിലാണ് കേസെടുത്തതെന്നും കോടതി ഉത്തരവിൽ പറയുന്നു.

തിരുവനന്തപുരം സൈബർ ക്രൈം പൊലീസ് സ്റ്റേഷനിൽ, ക്രൈം നം: 37/2023 ആയി ഷാജൻ സ്‌കറിയയ്ക്ക് എതിരെ രജിസ്റ്റർ ചെയ്ത കേസിൽ, പൊലീസിന്റെ കംപ്യൂട്ടർ സംവിധാനത്തിൽ അനധികൃതമായി കടന്നുവെന്നും വയർലസ് സന്ദേശങ്ങൾ മോഷ്ടിച്ചുവെന്നും തന്റെ ഫേസ്‌ബുക്ക് പേജിൽ 18-04-2021 ൽ പ്രസിദ്ധീകരിച്ചുവെന്നും ആരോപിക്കുന്നു. ആ കേസ് പി വി അൻവറിന്റെ പരാതിയിലാണ് എടുത്തത്. ആലുവ ഈസ്റ്റ് പൊലീസ് സ്‌റ്റേഷനിലെ ഇൻസ്പക്ടർ നൽകിയ റിപ്പോർട്ട് പ്രകാരം, പൊലീസിന്റെ വയർലസ് സന്ദേശം ചോർത്തി പരാതിക്കാരന്റെ യുടൂബ് ചാനലിൽ 17.04-2021 ന് പ്രസിദ്ധീകരിച്ചുവെന്നണ് കേസ്. രണ്ടുകേസിലെയും ആരോപണങ്ങൾ സമാനമാണെന്ന് കോടതി ഉത്തരവിൽ നിരീക്ഷിച്ചു. പി വി അൻവറിന്റെ രണ്ടാമത്തെ പരാതി ജൂലൈ 30 നാണ് സമർപ്പിച്ചത്. പരാതി ഓഗസ്റ്റ് 28 ന് ആലുവ ഈസ്റ്റ് പൊലീസ് സ്റ്റേഷനിലേക്ക് അയയ്ക്കുകയും, ഓഗസ്റ്റ് 30 ന് കേസെടുക്കുകയും ചെയ്തു. പരാതിക്കാരനെ പീഡിപ്പിക്കാൻ വേണ്ടി മാത്രമാണ് പുതിയ കേസെന്നാണ് ഷാജൻ സ്‌കറിയയുടെ അഭിഭാഷകൻ വാദിച്ചത്. ജാമ്യമില്ലാ കേസുകൾ എടുക്കുമ്പോൾ പരാതിക്കാരനെ നോട്ടീസ് മുഖാന്തിരം അറിയിക്കണമെന്ന ഹൈക്കോടതി ഉത്തരവ് ഈ കേസിൽ പാലിച്ചില്ലെന്നും ഷാജൻ സ്‌കറിയയുടെ അഭിഭാഷകൻ വാദിച്ചു. പരാതിക്കാരന് നോട്ടീസ് നൽകേണ്ടത് ആവശ്യമാണെന്ന വാദം പ്രോസിക്യൂഷനും ശരി വച്ചു. എന്നാൽ, ഹൈക്കോടതി ഉത്തരവ് 19-07.2023 വരെ രജിസ്റ്റർ ചെയ്ത കേസുകൾക്ക് മാത്രമാണ് ബാധകമെന്നും, 30-08-2023 ൽ എടുത്ത പുതിയ കേസിന് ഇതുബാധകമല്ലെന്നും പ്രോസിക്യൂഷൻ വാദിച്ചു.

ഷാജന് എതിരെ പുതിയ കേസ് എടുത്തതിൽ പൊലീസിന് എതിരെ കോടതി വാക്കാൽ വിമർശനം ഉന്നയിച്ചിരുന്നു. ഒരേ കുറ്റത്തിന് ഒന്നിലധികം കേസുകൾ എന്തിന് എന്ന് കോടതി ചോദിച്ചു. പ്രോസിക്യൂഷന് പോലും വ്യക്തത ഇല്ലാത്തത് അതിശയപ്പെടുത്തുന്നു. പ്രോസിക്യൂഷൻ പൊലീസുകാരന്റെ ഏറാന്മൂളിയാവരുത്. ഉത്തരവാദിത്തപ്പെട്ട പൊലീസ് ഉദ്യോഗസ്ഥൻ എവിടെ എന്നും കോടതി ചോദിച്ചു.

പൊലീസിന്റെ വയർലെസ് സംവിധാനം ചോർത്തി എന്ന പരാതിയിലാണ് ആലുവ പൊലീസ് ഷാജനെതിരെ കേസെടുത്തത്. ഷാജനെ അറസ്റ്റ് ചെയ്യാൻ വേണ്ടി ആലുവ പൊലീസ് തിരുവനന്തപുരത്തേക്ക് തിരിച്ചിരുന്നു. ഷാജനെ ഇപ്പോൾ അറസ്റ്റ് ചെയ്യേണ്ട, കേസ് ഇനി പരിഗണിക്കുമ്പോൾ മാത്രം മുന്നോട്ട് നടപടികൾ നോക്കാം എന്നാണ് കോടതി പറഞ്ഞിരിക്കുന്നത്.

വയർലെസ് സന്ദേശം ചോർന്നു എന്ന പേരിൽ ഷാജൻ സ്‌കറിയക്കെതിരെ സൈബർ പൊലീസ് തിരുവനന്തപുരത്ത് നിന്നും കേസെടുത്തിരുന്നു. കേസിൽ കോടതി അറസ്റ്റ് തടഞ്ഞതാണ്. അതേ കേസിൽ എന്തിനാണ് ആലുവ പൊലീസ് എഫ്‌ഐആർ ഇടുകയും കേസെടുക്കുകയും ചെയ്തത് എന്ന് പ്രോസിക്യൂഷനോട് ചോദിച്ചപ്പോൾ പ്രോസിക്യൂഷന് ഉത്തരമില്ലായിരുന്നു. ഉത്തരവാദിത്തപ്പെട്ട പൊലീസ് ഉദ്യോഗസ്ഥർ എവിടെ എന്ന് കോടതി ചോദിച്ചു. പ്രോസിക്യൂഷൻ പൊലീസുകാരന്റെ ഏറാന്മൂളിയാവരുത് എന്ന് കോടതി വിമർശിച്ചു.

അന്വേഷണ ഉദ്യോഗസ്ഥന്റെ പക്കൽ നിന്നും വിശദമായ നിർദ്ദേശങ്ങൾ ആവശ്യമാണെന്നും, തന്റെ പക്കൽ കേസ് റെക്കോഡുകൾ ഇല്ലെന്നും കാട്ടി പബ്ലിക് പ്രോസിക്യൂട്ടർ കൂടുതൽ സമയം തേടിയിരുന്നു. സൈബർ ക്രൈം പൊലീസ് എടുത്ത സമാന കേസിൽ, അന്വേഷണം തുടരുകയായതുകൊണ്ട് ഹർജി തീർപ്പാക്കും വരെ പരാതിക്കാരന് ഇടക്കാല സംരക്ഷണം നൽകാമെന്ന് കോടതി ഉത്തരവിൽ പറഞ്ഞു. സെഷൻസ് കോടതിയിലെ കേസ് തീർപ്പാകും വരെ ഷാജൻ സ്‌കറിയയെ അറസ്റ്റ് ചെയ്യരുതെന്ന് ആലുവ ഈസ്റ്റ് സിഐക്ക് ജഡ്ജി പി കെ മോഹൻദാസ് നിർദ്ദേശം നൽകി. കേസ് ഇനി സെപ്റ്റംബർ അഞ്ചിന് പരിഗണിക്കും.

 ഷാജൻ സ്‌കറിയയ്ക്ക് എതിരായ പുതിയ കേസിൽ വിശദാംശങ്ങൾ അറിയിക്കാൻ പൊലീസിന് രാവിലെ കോടതി നിർദ്ദേശം നൽകിയിരുന്നു. ആലുവ പൊലീസ് എടുത്ത കേസിന്റെ വിശദാംശങ്ങളാണ് അറിയിക്കേണ്ടിയിരുന്നത്. വീണ്ടും അറസ്റ്റ് ചെയ്യാനാണ് പൊലീസ് നീക്കം എന്ന് ഷാജൻ സ്‌കറിയുടെ അഭിഭാഷകൻ കോടതിയെ ബോധിപ്പിച്ചു. എഫ് ഐ ആർ പോലും രഹസ്യമാക്കിയെന്നും വിശദീകരിച്ചു. ഇതോടെയാണ് കോടതി പൊലീസിന് നിർദ്ദേശം നൽകിയത്. ഇതേ തുടർന്നാണ് കേസ് വൈകിട്ട് 3 മണിക്ക് എറണാകുളം ജില്ലാ കോടതി വീണ്ടും പരിഗണിച്ചത്. അതിനിടെ മെഡിക്കൽ കോളേജ് സ്റ്റേഷനിൽ ഹാജരായ ഷാജൻ സ്‌കറിയയെ അറസ്റ്റ് ചെയ്തു വിട്ടയച്ചു.

മറുനാടൻ മലയാളി എഡിറ്റർ ഷാജൻ സ്‌കറിയയെ വീണ്ടും അറസ്റ്റു ചെയ്യാൻ കേരളാ പൊലീസ് നാടകീയ നീക്കം നടത്തുകയാണ്. കോടതി ഉത്തരവ് പ്രകാരം മെഡിക്കൽ കോളേജ് പൊലീസ് സ്റ്റേഷനിൽ ഷാജൻ സ്‌കറിയ ചോദ്യം ചെയ്യലിന് ഹാജരായി. എന്നാൽ മെഡിക്കൽ കോളേജ് പൊലീസ് സ്റ്റേഷൻ പരിസരത്താകെ ആലുവാ പൊലീസാണുള്ളത്. വയർലസ് സന്ദേശം ചോർത്തിയെന്ന കള്ളക്കേസ് തിരുവനന്തപുരത്ത് ഷാജൻ സ്‌കറിയയ്‌ക്കെതിരെ ചുമത്തിയിരുന്നു. സമാന ആരോപണത്തിൽ മറ്റൊരു പരാതി ആലുവയിൽ രജിസ്റ്റർ ചെയ്തുവെന്നാണ് സൂചന. ഈ കേസിലെ എഫ് ഐ ആർ പൊലീസ് പുറത്തു വിട്ടിട്ടില്ല. ഷാജൻ സ്‌കറിയയോട് വിശദീകരണം ചോദിക്കാതെ കേസുകൾ രജിസ്റ്റർ ചെയ്യരുതെന്ന് ഹൈക്കോടതി നിർദ്ദേശമുണ്ട്. ഇത് അട്ടിമറിച്ചാണ് പുതിയ നീക്കങ്ങൾ. ഈ സാഹചര്യത്തിലാണ് എറണാകുളം കോടതിയെ മറുനാടൻ സമീപിച്ചത്. കോടതി ഇടപെടൽ ഉറപ്പായതോടെ മെഡിക്കൽ കോളേജ് പൊലീസ് സ്റ്റേഷനിൽ നിന്നും ഷാജൻ സ്‌കറിയയെ വിട്ടയച്ചു.

പൊലീസ് എഫ് ഐ ആറുകൾ എല്ലാം വെബ് സൈറ്റിൽ പരസ്യപ്പെടുത്തേണ്ടതുണ്ട്. ഇരയുടെ പരിധിയിൽ പരാതിക്കാർ വരുന്ന കേസുകൾ ഒഴികെ എല്ലാ എഫ് ഐ ആറും പരസ്യപ്പെടുത്തണം. എന്നാൽ ഷാജൻ സ്‌കറിയയ്ക്കെതിരായ ആലുവ പൊലീസ് എടുത്ത കേസിലെ എഫ് ഐ ആർ വെബ് സൈറ്റിൽ അപ്ലോഡ് ചെയ്തില്ല. തിരുവോണ ദിനത്തിൽ രണ്ട് എഫ് ഐ ആർ ആലുവ പൊലീസ് രജിസ്റ്റർ ചെയ്തുവെന്ന് വെബ് സൈറ്റ് പരിശോധനയിൽ വ്യക്തമാണ്. എന്നാൽ ഒരെണ്ണം സൈറ്റിൽ അപ്ലോഡ് ചെയ്തിട്ടുമില്ല. ഇതെല്ലാം പൊലീസിലെ ചില കേന്ദ്രങ്ങളുടെ നിർദ്ദേശ പ്രകാരമാണ്. ഇതെല്ലാം കോടതികളിൽ ബോധിപ്പിക്കാനായിരുന്നു മറുനാടന്റെ തീരുമാനം. ഇത് മനസ്സിലാക്കിയാണ് മെഡിക്കൽ കോളേജ് പൊലീസ് ഷാജൻ സ്‌കറിയയെ വിട്ടയച്ചത്. കോടതിയിൽ നിന്ന് തിരിച്ചടിയുണ്ടാകാതിരിക്കാൻ കൂടിയാണ് പൊലീസിന്റെ ഈ നീക്കം.

മോദിയുടെ കേരള സന്ദർശനവുമായി ബന്ധപ്പെട്ട് ചെയ്ത വീഡിയോയിൽ പൊലീസ് സ്വമേധയാ കേസെടുത്തിരുന്നു. ഈ കേസിൽ തിരുവനന്തപുരം കോടതി ജാമ്യം അനുവദിച്ചു. ഇതനുസരിച്ചാണ് മെഡിക്കൽ കോളേജ് പൊലീസ് സ്റ്റേഷനിൽ ഷാജൻ സ്‌കറിയ ഹാജരായത്. ഇതിനിടെയാണ് മെഡിക്കൽ കോളേജ് പരിസരത്താകെ കൊച്ചി പൊലീസിന്റെ സാന്നിധ്യം മനസ്സിലാകുന്നത്. ചോദ്യം ചെയ്യൽ കഴിഞ്ഞിറങ്ങുന്ന ഷാജനെ ആലുവാ പൊലീസ് അറസ്റ്റു ചെയ്യുമെന്നായിരുന്നു അഭ്യൂഹം. കോടതിയുടെ ഉത്തരവുമായി എത്തിയ ഷാജനെ നിലമ്പൂരിൽ അറസ്റ്റു ചെയ്തത് നീതി പീഠത്തിന്റെ വിമർശനത്തിന് ഇടയാക്കിയിരുന്നു. ഇതെല്ലാം പരിഗണിച്ച് അവസാന നിമിഷം അറസ്റ്റിൽ നിന്നും ആലുവാ പൊലീസ് ഇന്ന് പിന്മാറുകയായിരുന്നു.

മോദി വീഡിയോ കേസിൽ ഷാജൻ സ്‌കറിയയ്ക്ക് ആറാം അഡിഷണൽ ജില്ല സെഷൻസ് കോടതി മുൻകൂർ ജാമ്യം നൽകിയിരുന്നു. പ്രധാനമന്ത്രി നരേന്ദ്ര മോദിയുടെ കേരള സന്ദർശനത്തിനിടെ അദ്ദേഹത്തെ വധിക്കാൻ കേരളത്തിൽ ശ്രമം നടക്കുന്നുവെന്നും സുരക്ഷാനീക്കം ചോർന്നത് ഇതിന്റെ ഭാഗമെന്നുമായിരുന്നു മെയ് ആറിനുള്ള വാർത്ത. ഇത് സംസ്ഥാനത്ത് ആഭ്യന്തര ലഹള ഉണ്ടാക്കാനെന്നാണ് പൊലീസ് കേസ്. ഈ കേസിൽ ചോദ്യം ചെയ്യാൻ ഹാജരായപ്പോഴാണ് ആലുവ പൊലീസിന്റെ നീക്കങ്ങൾ വ്യക്തമാകുന്നത്. ഇതോടെയാണ് കോടതിയെ സമീപിച്ചത്. കോടതിയും ഗൗരവത്തോടെ വിഷയം എടുത്തു.

മോദിയുമായി ബന്ധപ്പെട്ട വീഡിയോ കേസിൽ പ്രതിയെ കസ്റ്റഡിയിൽ ചോദ്യം ചെയ്താലേ വ്യാജ വാർത്തയുടെ ഉറവിടം കണ്ടെത്താനാവൂ എന്ന് അഡിഷണൽ പബ്ലിക് പ്രോസിക്യൂട്ടർ എം. സലാഹുദ്ദീൻ വാദിച്ചിരുന്നു. ഇത് പരിഗണിച്ച കോടതി ആവശ്യമെങ്കിൽ പ്രതിയെ അറസ്റ്റ് ചെയ്ത് ജാമ്യത്തിൽ വിടാനും നിർദ്ദേശിച്ചിരുന്നു. അന്വേഷണ ഉദ്യോഗസ്ഥനായ മെഡിക്കൽ കോളേജ് സിഐക്കു മുന്നിൽ സെപ്റ്റംബർ ഒന്നിനും രണ്ടിനും ഹാജരാകണം എന്നായിരുന്നു നിർദ്ദേശം. തെളിവ് ശേഖരണത്തിന്റെ ഭാഗമായി അറസ്റ്റ് ചെയ്യാമെങ്കിലും 50,000 രൂപയുടെ ജാമ്യത്തിൽ വിട്ടയയ്ക്കണമെന്നും സെഷൻസ് ജഡ്ജി കെ. വിഷ്ണു ഉത്തരവിട്ടിരുന്നു. ഈ ഉത്തരവുമായി മെഡിക്കൽ പൊലീസ് സ്റ്റേഷനിൽ ഇന്ന് രാവിലെ എത്തിയതാണ് ഷാജൻ സ്‌കറിയ.

നേരത്തെ ഷാജൻ സ്‌കറിയയുടെ അറസ്റ്റിൽ പൊലീസിനെതിരെ രൂക്ഷ വിമർശനവുമായി കോടതി രംഗത്തു വന്നിരുന്നു. എറണാകുളം ജില്ലാ സെഷൻസ് കോടതിയാണ് പൊലീസിനെതിരെ വിമർശനം ഉന്നയിച്ചത്. മുൻകൂർ ജാമ്യാപേക്ഷ പരിഗണനയിലുള്ള ഘട്ടത്തിലാണ് അറസ്റ്റ് നടന്നതെന്നും പൊലീസ് സമയം ചോദിച്ചതിനാലാണ് ഹർജി പരിഗണിക്കുന്നതിൽ കാലതാമസമുണ്ടായതെന്നും കോടതി ചൂണ്ടിക്കാട്ടി. നിയമനടപടികളെ ദുരുപയോഗം ചെയ്താണ് പൊലീസ് തിരക്കിട്ട് അറസ്റ്റ് രേഖപ്പെടുത്തിയതെന്നും കോടതി വിമർശിച്ചിരുന്നു.

മതവിദ്വേഷം വളർത്താൻ ശ്രമിച്ചുവെന്ന കേസിൽ നിലമ്പൂർ പൊലീസ് സ്റ്റേഷനിൽ ഹാജരായ ഷാജൻ സ്‌കറിയ ചോദ്യം ചെയ്യലിന് വിധേയമായ ഘട്ടത്തിലാണ് മറ്റൊരു കേസിൽ അറസ്റ്റ് ചെയ്യുന്നത്. തൃക്കാക്കരയിൽ രജിസ്റ്റർ ചെയ്ത വ്യാജരേഖ ചമച്ച കേസിലായിരുന്നു അറസ്റ്റ്. സംഭവത്തിൽ കോടതി മുൻകൂർ ജാമ്യം അനുവദിക്കുകയും ചെയ്തു. ഇതോടെയാണ് ഓണക്കാലത്ത് ഷാജനെ ജയിലിൽ ഇടാനുള്ള നീക്കം പൊളിഞ്ഞത്.

Stories you may Like

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

More News in this category+

MNM Recommends +

Go to TOP