Forex Rate:

1 usd = 76.25 inr 1 gbp = 94.16 inr 1 eur = 85.23 inr 1 aed = 20.76 inr 1 sar = 20.32 inr 1 kwd = 247.66 inr
Jan / 202117Sunday

ജാമ്യം നൽകുന്നത് നിയമലംഘകർക്ക് പ്രചോദനമാകുമെന്ന സർക്കാർ വാദത്തിന് അംഗീകാരം; കൂടുതൽ നിയമ ലംഘകരുണ്ടാകുമെന്ന പ്രോസിക്യൂഷൻ നിലപാട് അംഗീകരിച്ച് ജാമ്യ ഹർജി തള്ളി കോടതി; ഭാഗ്യലക്ഷ്മിയും ദിയാ സനയും ശ്രീലക്ഷ്മി അറയ്ക്കലും കുടുക്കിലേക്ക്; യുട്യൂബറെ താമസ സ്ഥലത്ത് കയറി മർദ്ദിച്ച കേസിൽ സിനിമാ പ്രവർത്തകയ്ക്ക് ജയിലിൽ പോകേണ്ടി വന്നേക്കും; ഭാഗ്യലക്ഷ്മി ഹൈക്കോടതിയെ സമീപിക്കാൻ സാധ്യത; പ്രതികളുടെ ഫോൺ സ്വിച്ച് ഓഫ്

ജാമ്യം നൽകുന്നത് നിയമലംഘകർക്ക് പ്രചോദനമാകുമെന്ന സർക്കാർ വാദത്തിന് അംഗീകാരം; കൂടുതൽ നിയമ ലംഘകരുണ്ടാകുമെന്ന പ്രോസിക്യൂഷൻ നിലപാട് അംഗീകരിച്ച് ജാമ്യ ഹർജി തള്ളി കോടതി; ഭാഗ്യലക്ഷ്മിയും ദിയാ സനയും ശ്രീലക്ഷ്മി അറയ്ക്കലും കുടുക്കിലേക്ക്; യുട്യൂബറെ താമസ സ്ഥലത്ത് കയറി മർദ്ദിച്ച കേസിൽ സിനിമാ പ്രവർത്തകയ്ക്ക് ജയിലിൽ പോകേണ്ടി വന്നേക്കും; ഭാഗ്യലക്ഷ്മി ഹൈക്കോടതിയെ സമീപിക്കാൻ സാധ്യത; പ്രതികളുടെ ഫോൺ സ്വിച്ച് ഓഫ്

മറുനാടൻ മലയാളി ബ്യൂറോ


തിരുവനന്തപുരം: ഭാഗ്യലക്ഷമിക്ക് ജാമ്യമില്ല. യൂട്ഊബർ വിജയ് പി നായരെ താമസ സ്ഥലത്ത് കയറി കൈയേറ്റം ചെയ്ത കേസിൽ ഡബ്ബിങ് ആർട്ടിസ്റ്റ് ഭാഗ്യലക്ഷ്മിയും ദിയാ സനയും ശ്രീലക്ഷ്മി അറയ്ക്കുലം കുടുക്കിലേക്ക്. പ്രോസിക്യൂഷൻ ഇവരുടെ ജാമ്യ ഹർജിയെ എതിർത്തിരുന്നു. ഇത് അംഗീകരിച്ചാണ് കേസ് തള്ളിയത്. ഇതോടെ ഭാഗ്യലക്ഷ്മിയെ പൊലീസിന് അറസ്റ്റ് ചെയ്യേണ്ടി വരും. ഇന്നലെ മൂന്നു പേരും ഒളിവിലാണെന്ന് കോടതിയെ പൊലീസ് അറിയിച്ചിരുന്നു. ഇവർ ജാമ്യ ഹർജിയുമായി ഹൈക്കോടതിയെ സമീപിക്കാനും സാധ്യതയുണ്ട്. ഭാഗ്യലക്ഷ്മിക്കും കൂട്ടർക്കും വലിയ തിരിച്ചടിയാണ് തിരുവനന്തപുരം കോടതിയുടെ ഉത്തരവ്.

യുട്യൂബ് വീഡിയോയിലൂടെ സാമൂഹിക-സാംസ്‌കാരിക-സിനിമ മേഖലകളിലെ സ്ത്രീകൾക്കെതിരെ അശ്ലീലപരാമർശം നടത്തിയ വിജയ് നായരെ കൈയേറ്റം ചെയ്യുകയും മാപ്പു പറയിക്കുകയും ചെയ്ത സംഭവത്തിൽ ഭാഗ്യലക്ഷ്മിക്ക് മുൻകൂർ ജാമ്യം നൽകുന്നത് എതിർത്ത് സർക്കാർ നിലപാട് എടുത്തിരുന്നു. ജാമ്യം നൽകിയാൽ നിയമം കൈയിലെടുക്കാൻ അത് മറ്റുള്ളവർക്കും പ്രചോദനമാകുമെന്ന് പ്രോസിക്യൂഷൻ വാദിച്ചു. ഭാഗ്യലക്ഷ്മി, ആക്ടിവിസ്റ്റായ ദിയ സന, ശ്രീലക്ഷ്മി അറയ്ക്കൽ എന്നിവരുടെ മുൻകൂർ ജാമ്യാപേക്ഷയാണ് സർക്കാർ എതിർത്തത്.

രണ്ടാം അഡീഷണൽ സെഷൻസ് കോടതിയാണ് ഇവരുടെ ജാമ്യേപേക്ഷ പരിഗണിച്ചത്. മുൻകൂർ ജാമ്യം അനുവദിക്കുകയാണെങ്കിൽ അത് നിയമം കൈയിലെടുക്കുന്നവർക്ക് പ്രചോദനമുണ്ടാകും, കൂടുതൽ നിയമലംഘകരുണ്ടാകും എന്ന് പ്രോസിക്യൂഷൻ വാദിച്ചു. ഇത് കോടതി അംഗീകരിച്ചു. ഭാഗ്യലക്ഷ്മിക്കൊപ്പം ദിയ സന, ശ്രീല്ഷ്മി അറയ്ക്കൽ എന്നിവരാണ് കേസിലെ പ്രതികൾ. മോഷണം, മുറിയിൽ അതിക്രമിച്ചു കടന്നു തുടങ്ങിയ കുറ്റങ്ങളാണ് ഇവർക്കെതിരെ ചുമത്തിയിരിക്കുന്നത്. ഇവരുടെ ഫോൺ സ്വിച്ച് ഓഫാണ്. അതുകൊണ്ട് തന്നെ ഇവരെല്ലാം ഒളിവിലാണെന്ന വാദത്തിൽ പൊലീസിന് തുടരാനാകും.

ഭാഗ്യലക്ഷ്മി അടക്കമുള്ളവരെ കൈയേറ്റം ചെയ്ത കേസിൽ വിവാദ യൂട്ഊബർ വിജയ് പി നായർക്ക് കോടതി മുൻകൂർ ജാമ്യം അനുവദിച്ചിരുന്നു. സംഭവവുമായി ബന്ധപ്പെട്ട് തമ്ബാനൂർ സ്റ്റേഷനിൽ രജിസ്റ്റർ ചെയ്ത കേസിലാണ് ജാമ്യം. എന്നാൽ ഐ.ടി. ആക്ട് പ്രകാരം മ്യൂസിയം പൊലീസ് സ്റ്റേഷനിൽ രജിസ്റ്റർ ചെയ്ത കേസിൽ വിജയ് പി.നായർ റിമാൻഡിലാണ്. വിഷയത്തിൽ പൊലീസ് എതിർത്തെങ്കിലും ഉപാധികളോടെയാണ് ജാമ്യം അനുവദിച്ചത്. അശ്ലീല വിഡിയോ യൂടൂബിലൂടെ പ്രചരിപ്പിച്ചതിന് ജാമ്യമില്ലാ വകുപ്പുകൾ പ്രകാരം എടുത്ത കേസിൽ റിമാൻഡിലാണ് വിജയ് പി നായർ. മുൻകൂർ ജാമ്യം ലഭിച്ചെങ്കിലും ഇയാൾക്ക് പുറത്തിറങ്ങാനാവില്ല.

ഇന്നലെ തിരുവനന്തപുരം ഒന്നാം അഡീഷണൽ സെഷൻസ് കോടതിയാണ് വിജയ് പി നായർക്ക് ജാമ്യം നൽകിയത്. വിജയ് പി നായർ മുറിയിൽ വച്ച് ഭാഗ്യലക്ഷ്മിയെയും സംഘത്തെയും മർദ്ദിച്ചെന്നും കൈയേറ്റം ചെയ്യാൻ ശ്രമിച്ചെന്നായിരുന്നു പരാതി. ഈ കേസ് പരിഗണിച്ച കോടതി പക്ഷേ മർദ്ദന വാദങ്ങൾ തള്ളിക്കളഞ്ഞു. വിജയിന്റെ മുറിക്കുള്ളിൽ അതിക്രമിച്ചു കടന്ന് അതിക്രമം കാട്ടിയിട്ട് 12 മിനിറ്റ് ദൈർഘ്യമുള്ള പ്രതികളെ സ്വയം കുറ്റപ്പെടുത്തുന്ന രംഗം ലൈവായി ഷൂട്ട് ചെയ്തവർ എന്തുകൊണ്ട് വിജയ് കൈയിൽ പിടിച്ചെങ്കിൽ അത് റെക്കോർഡ് ചെയ്യാത്തതെന്ന വിജയിന്റെ വാദത്തിൽ കഴമ്പുണ്ടെന്ന് കോടതി ജാമ്യ ഉത്തരവിൽ ചൂണ്ടിക്കാട്ടി. ഇത്തരം സാഹചര്യത്തിൽ വിജയിന് ജാമ്യം നൽകാത്ത പക്ഷം അത് നീതി നിഷേധമാകുമെന്നും കോടതി വ്യക്തമാക്കി.

വിജയിന് ജാമ്യം നൽകാത്ത പക്ഷം അത് നീതി നിഷേധമാകമെന്നാണ് പ്രതിഭാഗം അഭിഭാഷകൻ ചൂണ്ടിക്കാട്ടിയത്. നിയമവാഴ്ചയെ വെല്ലുവിളിച്ച് ഇവർ ചെയ്തതായ പ്രവൃത്തികൾ ഒരു തരത്തിലും ന്യായീകരിക്കാനാവില്ല. പൊലീസ് സ്റ്റേഷനിൽ നിന്ന് നീതി ലഭിച്ചില്ലായെങ്കിൽ നീതിന്യായ കോടതികളെ സമീപിക്കണം. സ്വയം കോടതി ചമഞ്ഞ് വിധി നടപ്പാക്കലല്ല ചെയ്യേണ്ടത്. ഒരു പരാതി വെള്ള പേപ്പറിൽ എഴുതിക്കൊടുത്തത് വച്ചാണ് എഫ് ഐ ആർ രജിസ്റ്റർ ചെയ്തത്. മൊഴി കൊടുക്കാൻ പോലും കൂട്ടാക്കാതെ പോയതായും അഭിഭാഷകൻ ബോധിപ്പിച്ചു.

നിയമം കൈയിലെടുത്ത പ്രതികൾക്ക് ജാമ്യം നൽകി സ്വതന്ത്രരാക്കിയാൽ സമൂഹത്തിനത് തെറ്റായ സന്ദേശം നൽകുമെന്നും മറ്റുള്ളവർക്കുമത് പ്രചോദനമാകുമെന്നും പ്രോസിക്യൂട്ടർ എൻ.സി. പ്രിയനും മെൻസ് റൈറ്റ്‌സ് അസോസിയേഷനും അറിയിച്ചിരുന്നു. യൂ ട്യൂബ് ചാനലിൽ സ്ത്രീകൾക്കെതിരെ അശ്ലീല പരാമർശങ്ങളുമായി വീഡിയോ പോസ്റ്റ് ചെയ്ത സംഭവത്തിലാണ് ബിഗ് ബോസ് മത്സരാർത്ഥി ദിയ സന , സിനിമ ഡബ്ബിങ് ആർട്ടിസ്റ്റ് ഭാഗ്യലക്ഷ്മി , ശ്രീലക്ഷ്മി അറയ്ക്കൽ എന്നിവർ സംഘം ചേർന്ന് യൂട്ഊബർ നേമം തെന്നൂർ സ്വദേശി വിജയ്.പി.നായരെ മർദിക്കുകയും കറുത്ത മഷി ദേഹത്തൊഴിക്കുകയും ചെയ്തിരുന്നുവെന്നാണ് കേസ്. സംഭവ വീഡിയോയിൽ പകർത്തുകയും ഇതിന്റെ ഫെയ്സ് ബുക്ക് ലൈവ് ദിയസന തന്റെ അക്കൗണ്ടിലൂടെ പങ്ക് വക്കുകയും ചെയ്തിരുന്നു.

തുടർന്ന് തമ്പാനൂർ പൊലീസിൽ വിജയ് തങ്ങളെ മാനഭംഗപ്പെടുത്തണമെന്നുള്ള ഉദ്ദേശ്യത്തോടു കൂടി കൈയേറ്റവും ബലപ്രയോഗവും ചെയ്തെന്ന് കാട്ടി പരാതി നൽകിയിരുന്നു. പരാതിയിൽ തമ്പാനൂർ പൊലീസ് ഇന്ത്യൻ ശിക്ഷാ നിയമത്തിലെ ജാമ്യമില്ലാ വകുപ്പായ 354 ചുമത്തി തമ്പാനൂർ ക്രൈം 1764/2020 നമ്പരായി കേസ് എടുക്കുകയായിരുന്നു. അന്ന് തന്നെ വിജയ്.പി. നായരുടെ പരാതിയിൽ ഭാഗ്യലക്ഷ്മിയടക്കം 3 ആക്ടിവിസ്റ്റുകളുടെ പേരിൽ തമ്പാനൂർ പൊലീസ് ക്രൈം 1765/2020 നമ്പരായി ജാമ്യമില്ലാ വകുപ്പുപുകൾ ചുമത്തി കേസ് രജിസ്റ്റർ ചെയ്തു. ഇന്ത്യൻ ശിക്ഷാ നിയമത്തിലെ 452 ( ദേഹോപദ്രവം ഏൽപ്പിക്കണമെന്ന ഉദ്ദേശ്യത്തോടെ ഒരുക്കം കൂട്ടിയുള്ള ഭവനഭേദനം) , 294 (ബി) (അശ്ലീല പദപ്രയോഗം നടത്തൽ) , 323 (ദേഹോപദ്രവം ഏൽപ്പിക്കൽ) , 506 ( ഭീഷണിപ്പെടുത്തൽ) , 392 ( പിടിച്ചുപറിക്കൽ) , 34 (കൃത്യത്തിന് പരസ്പരം ഉത്സാഹികളും സഹായികളുമായി നിന്ന് പ്രവർത്തിക്കൽ) എന്നീ വകുപ്പുകൾ ചുമത്തിയാണ് കേസെടുത്തിരിക്കുന്നത്.

തങ്ങൾ നിരപരാധികളാണെന്നും കേസിനാസ്പദമായ യാതൊരു കുറ്റവും ചെയ്തിട്ടില്ലായെന്ന് യുവതികൾ വെവ്വേറെ സമർപ്പിച്ച തങ്ങളുടെ ജാമ്യ ഹർജിയിൽ പറഞ്ഞിരുന്നു. ജാമ്യമില്ലാ കേസിൽ തങ്ങളെ അറസ്റ്റ് ചെയ്യാൻ സാധ്യതയുണ്ട്. തങ്ങളെ അറസ്റ്റ് ചെയ്യുന്ന പക്ഷം ഉടൻ തന്നെ തങ്ങളെ ജാമ്യത്തിൽ വിട്ടയക്കാൻ തമ്പാനൂർ പൊലീസിന് നിർദ്ദേശം കൊടുത്ത് ഉത്തരവുണ്ടാകണമെന്നാണ് ഫെമിനിസ്റ്റുകളുടെ ജാമ്യഹർജിയിലെ ആവശ്യം. തങ്ങൾ സംഘടിച്ചല്ല കൃത്യസ്ഥലത്ത് ചെന്നതെന്ന് കാട്ടാനായാണ് വെവ്വേറെ ജാമ്യഹർജികൾ സമർപ്പിച്ചത്.

കൃത്യത്തിൽ കൂടുതൽ പങ്കാളിത്തമുള്ള പ്രതിയുടെ ജാമ്യ ഹർജി തള്ളുന്ന പക്ഷം ആ പ്രതിക്ക് മാത്രമായി മേൽക്കോടതിയെ സമീപിക്കാമെന്ന കരുതലോടെയാണ് അപ്രകാരം ചെയ്യുന്നത്. അതുകൊണ്ട് തന്നെ ഭാഗ്യലക്ഷ്മിയുടെ കൂട്ടരും സുപ്രീംകോടതി വരെ ജാമ്യത്തിന് ശ്രമിക്കാൻ സാധ്യത ഏറെയാണ്.

Stories you may Like

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

More News in this category+

MNM Recommends +

Go to TOP