Forex Rate:

1 usd = 76.25 inr 1 gbp = 94.16 inr 1 eur = 85.23 inr 1 aed = 20.76 inr 1 sar = 20.32 inr 1 kwd = 247.66 inr
Apr / 202425Thursday

ഭർത്താവിനെ കൊല്ലാൻ കൊലയാളിയെ പുതപ്പിച്ച് പിൻസീറ്റിൽ കിടത്തി ഭാര്യ കാറോടിച്ചു കൊണ്ട് പോയി; തെളിവുകൾ നശിപ്പിക്കും മുമ്പ് പൊലീസ് പൊക്കി; ജ്യോതിയെ കടുംകൈയ്ക്ക് പ്രേരിപ്പിച്ചത് വിനോദിന്റെ കാമുകി വീണ്ടും ഗർഭിണിയായപ്പോൾ

ഭർത്താവിനെ കൊല്ലാൻ കൊലയാളിയെ പുതപ്പിച്ച് പിൻസീറ്റിൽ കിടത്തി ഭാര്യ കാറോടിച്ചു കൊണ്ട് പോയി; തെളിവുകൾ നശിപ്പിക്കും മുമ്പ് പൊലീസ് പൊക്കി; ജ്യോതിയെ കടുംകൈയ്ക്ക് പ്രേരിപ്പിച്ചത് വിനോദിന്റെ കാമുകി വീണ്ടും ഗർഭിണിയായപ്പോൾ

മറുനാടൻ മലയാളി ബ്യൂറോ

മലപ്പുറം: പ്രതികാരത്തിന്റെ പ്രതിഫലനമായിരുന്നു വളാഞ്ചേരിയിലെ ഗ്യാസ് ഏജൻസി ഉടമ വിനോദ് കുമാറിന്റെ (53) കൊലപ്പെപാതകം. കുടുംബസുഹൃത്തായ എറണാകുളം എളമക്കര സ്വദേശി നമ്പ്രത്ത് മുഹമ്മദ് യൂസഫ് എന്ന സാജിദ് (51) പൊലീസിനോട് പറഞ്ഞത് ഞെട്ടിക്കുന്ന വിവരങ്ങളാണ്. കൊല ആസൂത്രണം ചെയ്ത വിനോദ്കുമാറിന്റെ ഭാര്യ ജ്യോതി എന്ന ജസീന്ത ജോർജ് (56) ആശുപത്രിയിൽ ചികിത്സയിലാണ്. ഇവരെ ഡിസ്ചാർജ് ചെയ്താലുടൻ അറസ്റ്റുചെയ്യുമെന്ന് പൊലീസ് പറഞ്ഞു.

വിനോദ്കുമാറിന്റെ ഭാര്യ ജ്യോതിയുടെ നിർദ്ദേശപ്രകാരമാണ് യൂസഫ് കൊലപാതകം നടത്തിയതെന്നു പൊലീസ് പറഞ്ഞു. പരുക്കേറ്റു ചികിൽസയിൽ കഴിയുന്ന ജ്യോതിയാണു രണ്ടാം പ്രതി. വിനോദിന്റെ പരസ്ത്രീ ബന്ധമാണ് കൊലപാതകത്തിലേക്ക് നയിച്ചതെന്നാണ് പൊലീസ് നിഗമനം. വെള്ളിയാഴ്ച രാവിലെയാണ് ഇടപ്പള്ളി സ്വദേശി വിനോദ് കുമാറിനെ വെണ്ടല്ലൂരിലെ വീട്ടിൽ വെട്ടേറ്റ് മരിച്ച നിലയിൽ കണ്ടത്. ജ്യോതിയും വെട്ടേറ്റ നിലയിലായിരുന്നു. മോഷണത്തിനിടെയുള്ള കൊലപാതകമാക്കാനുള്ള ബോധപൂർവ്വമായ ശ്രമം. വിനോദ് കുമാറിന് ഗുരുവായൂരിൽ താമസിക്കുന്ന കൊല്ലം കുണ്ടറ സ്വദേശിയായ സ്ത്രീയുമായുള്ള ബന്ധവും ഇവർ രണ്ടാമതും ഗർഭിണിയായെന്ന വിവരവും ജ്യോതി അറിഞ്ഞതാണ് കൊലയിലേക്ക് നയിച്ചത്.

വിനോദിന്റെ കുടുംബ സുഹൃത്താണ് പ്രതി യൂസഫ്. ഇരുവരും ചേർന്ന് ഏതാനും മാസം മുൻപാണ് വിനോദിനെ വകവരുത്താൻ പദ്ധതിയിട്ടത്. രണ്ടുമാസം മുൻപ് വിനോദിനെ സയനൈഡ് നൽകി കൊല്ലാൻ യൂസഫിനെ നിയോഗിച്ചെങ്കിലും സയനൈഡ് ലഭിക്കാത്തതിനാൽ ആ ശ്രമം പാളി. ജ്യോതിയുടെ ഫോൺകോളുകൾ കേന്ദ്രീകരിച്ചാണ് പൊലീസ് കേസ് തെളിയിച്ചത്. അറസ്റ്റിലായ മുഹമ്മദ് യൂസഫിനെ കോടതി റിമാൻഡ് ചെയ്തു. ഇയാളെ പൊലീസ് കസ്റ്റഡിയിൽ വാങ്ങി തെളിവെടുപ്പു നടത്തും. കൊല്ലപ്പെട്ട വിനോദ് കൊച്ചി ജോമർ ഫ്‌ലാറ്റ് തട്ടിപ്പുക്കേസിലെ പ്രതിയുമാണ്. കൊലപാതകം നടത്തുകയാണെങ്കിൽ യൂസഫിന് കൊച്ചിയിലെ ഫ്‌ളാറ്റ് നൽകാമെന്ന് ജ്യോതി വാഗ്ദാനം ചെയ്തിരുന്നുവെന്നും പൊലീസ് പറഞ്ഞു.

കൊലപാതകം നടന്നതറിഞ്ഞ് വീട്ടിലെത്തിയ പൊലീസിന് ആദ്യഘട്ടത്തിൽ തന്നെ ജ്യോതിയെ സംശയമുണ്ടായിരുന്നു. സാരമായി പരുക്കേൽക്കാത്ത ജ്യോതി രാവിലെ ഒൻപതരവരെ പുറത്തിറങ്ങി ബഹളം വച്ചില്ലെന്നതു പൊലീസിന്റെ സംശയം വർധിപ്പിച്ചു. യൂസഫിനെക്കുറിച്ച് പൊലീസിന് വിവരം ലഭിച്ചത് ജ്യോതിയുടെ ഫോണിൽനിന്നാണ്. വിനോദ്കുമാറിനെ കൊല്ലണം എന്ന് തീരുമാനിച്ചശേഷം യൂസഫിനെ വിളിക്കാനായി ജ്യോതി പ്രത്യേകമായി ഒരു ഫോണാണ് ഉപയോഗിച്ചിരുന്നത്. ഈ ഫോൺ നമ്പർ ജ്യോതിയുടെ മറ്റൊരു ഫോണിൽനിന്നു പൊലീസ് കണ്ടെത്തുകയായിരുന്നു. ഇരുവരും ഉപയോഗിച്ചിരുന്ന സ്വകാര്യ ഫോണുകൾ കൃത്യത്തിനു ശേഷം നശിപ്പിച്ചുകളയണം എന്ന ജ്യോതിയുടെ നിർദ്ദേശത്തെ തുടർന്നാണ് യൂസഫ് കാറിലുണ്ടായിരുന്ന ഫോൺ എറണാകുളത്തേക്ക് കൊണ്ടുപോയത്.

സംഭവത്തെക്കുറിച്ച് പൊലീസ് പറയുന്നതിങ്ങനെ: വർഷങ്ങൾക്ക് മുമ്പ് ഇറ്റലിയിൽ വച്ച് പരിചയപ്പെട്ട ജ്യോതിയും വിനോദും നാട്ടിലെത്തി ഒരുമിച്ച് താമസമാരംഭിച്ചെങ്കിലും വിവാഹം രജിസ്റ്റർ ചെയ്തിരുന്നില്ല. ഇറ്റാലിയൻ പൗരത്വമുള്ള നഴ്‌സായ ജ്യോതി അവിടേക്ക് പോകുമ്പോൾ എറണാകുളത്തെ ഫ്‌ളാറ്റിൽ വിനോദ്കുമാർ കുണ്ടറ സ്വദേശിനിയുമായി എത്തിയിരുന്നു. വിനോദ്കുമാറിന് കുണ്ടറ സ്വദേശിനിയുമായുള്ള ബന്ധവും ഇവരിൽ ഒരു കുഞ്ഞുള്ളതും രണ്ടു വർഷം മുമ്പ് ജ്യോതി അറിഞ്ഞു. ഇവരെ ഒഴിവാക്കാൻ നിരവധി തവണ ജ്യോതി ആവശ്യപ്പെട്ടെങ്കിലും വിനോദ് തയ്യാറായില്ല.

കുണ്ടറ സ്വദേശിനിയുമായുള്ള ബന്ധം ജ്യോതിയോട് പറഞ്ഞത് ഫ്‌ളാറ്റിലെ തന്നെ താമസക്കാരനായ മുഹമ്മദ് യൂസഫ് ആണെന്ന് വിനോദ് മനസിലാക്കി. യൂസഫിനെ കുടുംബവുമായി അകറ്റാൻ ജ്യോതിയുടെ ലോക്കറിലുണ്ടായിരുന്ന 30 പവന്റെ ആഭരണങ്ങൾ വിനോദ് എടുത്തുമാറ്റിയ ശേഷം ഇത് യൂസഫ് എടുത്തതാണെന്ന് ജ്യോതിയെ വിശ്വസിപ്പിച്ചു. യൂസഫിന്റെ മകന്റെ വിവാഹം പെൺകുട്ടിയുടെ വീട്ടിൽ ചെന്ന് മുടക്കി. ഇത് യൂസഫിന് വിനോദിനോട് വൈരാഗ്യത്തിന് കാരണമായി. ഏതാനും മാസങ്ങൾക്ക് മുമ്പ്, ലോക്കറിൽ നിന്നു നഷ്ടപ്പെട്ട 30 പവൻ ആഭരണങ്ങൾ വിറ്റ് വിനോദ് ഇരിമ്പിളിയത്ത് സ്ഥലം വാങ്ങിയത് ജ്യോതി അറിഞ്ഞു. ഇത് കാര്യങ്ങൾ കൂടുതൽ വഷളാക്കി.

ഏതാനും മാസം മുമ്പ് തന്നെ മുഹമ്മദ് യൂസഫിന്റെ സഹായത്തോടെ വിനോദിനെ കൊല്ലാൻ ജ്യോതി തീരുമാനിച്ചിരുന്നു. കോടിക്കണക്കിന് രൂപയുടെ സ്വത്തുള്ള ജ്യോതി പലപ്പോഴായി യൂസഫിനെ സാമ്പത്തികമായി സഹായിച്ചിരുന്നു. കൊന്നാൽ നല്ലൊരു തുക തരാമെന്ന് വാഗ്&്വംിഷ;ദാനവും ചെയ്തു. മുഹമ്മദ് യൂസഫ് എറണാകുളത്തുനിന്നു ബസിൽ വ്യാഴാഴ്ച രാത്രി ഏഴേകാലോടെ വളാഞ്ചേരിയിലെത്തി ജ്യോതിയെ വിളിച്ചു. മീമ്പാറയിലെ ഹൈപ്പർ മാർക്കറ്റിന് സമീപം നിൽക്കാൻ യൂസഫിനോട് ജ്യോതി ആവശ്യപ്പെട്ടു. യൂസഫ് ഇവിടേക്ക് ഓട്ടോറിക്ഷയിലെത്തി. കാറുമായി വന്ന ജ്യോതി യൂസഫിനെ പിൻസീറ്റിൽ കിടത്തി പുതപ്പിട്ട് മൂടി വീട്ടിലെത്തിച്ച് ഒന്നാം നിലയിലെ മുറിയിലാക്കി.

പത്തരയോടെ വിനോദെത്തി കുളികഴിഞ്ഞ് കിടന്നയുടനെ ഉറങ്ങി. പന്ത്രണ്ടരയോടെ താഴത്തെ കിടപ്പുമുറിയിലേക്ക് കയറിച്ചെന്ന യൂസഫ് വിനോദിനെ വെട്ടിപരിക്കേൽപ്പിച്ചു. വിനോദ് മരിച്ചെന്ന് കരുതി ജ്യോതിയും യൂസഫും ഡൈനിങ് ഹാളിലിരുന്ന് സംസാരിച്ചു. ഒരു മണിയോടെ കിടപ്പുമുറിയിൽ നിന്നു സംസാരംകേട്ട് നോക്കുമ്പോൾ വിനോദ് ആർക്കോ ഫോൺ ചെയ്യുന്നതാണ് കണ്ടത്. തുടർന്ന് യൂസഫ് വെട്ടുകത്തിയെടുത്ത് വിനോദിനെ തുരുതുരാ വെട്ടി മരണം ഉറപ്പാക്കി. വിനോദ് ഫോണിൽ വിളിച്ചത് ഗ്യാസ് ഏജൻസിയിലെ സ്റ്റാഫിനെ ആയിരുന്നു.

തുടർന്ന് ജ്യോതി യൂസഫിന് അന്നത്തെ ഗ്യാസ് ഏജൻസി കളക്ഷനായ 3,40,000 രൂപയും രക്ഷപ്പെടാൻ ഇന്നോവ കാറും നൽകി. തെളിവുകൾ നശിപ്പിക്കാനായി, തന്റെ മൂന്ന് മൊബൈൽ ഫോണുകൾ വഴിയിൽ ഉപേക്ഷിക്കാൻ കൊടുത്തു. പോകുംമുമ്പ് തന്റെ കൈകൾ കെട്ടിയിട്ട് വായിൽ തുണി തിരുകി പരിക്കേൽപ്പിക്കാൻ ജ്യോതി ആവശ്യപ്പെട്ടു. യൂസഫ് ജ്യോതിയുടെ കഴുത്തിൽ ചെറിയ കത്തി ഉപയോഗിച്ച് മുറിവേൽപ്പിച്ചു. മുറിവേറ്റ ജ്യോതി ബോധംകെട്ടു കാറിൽ രക്ഷപ്പെട്ട യൂസഫ് കുറ്റിപ്പുറം മാണൂർ പള്ളിക്ക് സമീപം ദേശീയപാതയിൽ കാർ നിറുത്തി കെ.എസ്.ആർ.ടി.സി ബസിൽ എറണാകുളത്തേക്ക് പോയി. പോകുംവഴി ജ്യോതി നൽകിയ മൊബൈൽ ഫോണുകൾ പലയിടത്തായി ഉപേക്ഷിച്ചു.

ഈ മൊബൈൽ നമ്പരുകൾ കേന്ദ്രീകരിച്ച് നടത്തിയ അന്വേഷണത്തിലാണ് പ്രതി പിടിയിലായത്. കൊലപാതകം ആസൂത്രണം ചെയ്യാൻ മാത്രമായി ഇരുവരും സിം കാർഡുകൾ എടുത്തിരുന്നു. ഇവ നശിപ്പിച്ചെങ്കിലും നമ്പർ പൊലീസിന് ലഭിച്ചത് അന്വേഷണം വേഗത്തിലാക്കി.

Stories you may Like

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

More News in this category+

MNM Recommends +

Go to TOP