Forex Rate:

1 usd = 76.25 inr 1 gbp = 94.16 inr 1 eur = 85.23 inr 1 aed = 20.76 inr 1 sar = 20.32 inr 1 kwd = 247.66 inr
Jan / 202117Sunday

കാമുകിയെ കാണണമെന്ന് തോന്നിയാൽ ഏതുപൂട്ടിട്ട് പൂട്ടിയാലും തഞ്ചം നോക്കി ചാടിപ്പോവും; പിടിവീണാൽ രക്ഷപ്പെടാൻ പതിനെട്ടടവും പയറ്റും; പൊലീസ് ജീപ്പിന്റെ ചില്ല് തല കൊണ്ട് ഇടിച്ച് പൊട്ടിച്ച ശേഷം കഷണം വിഴുങ്ങി ഒരുവട്ടം; ഒടുവിൽ പിടിവീണത് ബൈക്കിന്റെ പ്ലഗ് ഊരിമാറ്റി പൊലീസ് ഒരുക്കിയ കെണിയിൽ; കറുകുറ്റി കോവിഡ് സെന്ററിൽ നിന്ന് മൂന്നാം വട്ടം ചാടാനും പുതിയ തന്ത്രം; പൊലീസിനെ വട്ടം ചുറ്റിക്കുന്ന ഡ്രാക്കുള സുരേഷിന്റെ കഥ

കാമുകിയെ കാണണമെന്ന് തോന്നിയാൽ ഏതുപൂട്ടിട്ട് പൂട്ടിയാലും തഞ്ചം നോക്കി ചാടിപ്പോവും; പിടിവീണാൽ രക്ഷപ്പെടാൻ പതിനെട്ടടവും പയറ്റും; പൊലീസ് ജീപ്പിന്റെ ചില്ല് തല കൊണ്ട് ഇടിച്ച് പൊട്ടിച്ച ശേഷം കഷണം വിഴുങ്ങി ഒരുവട്ടം; ഒടുവിൽ പിടിവീണത് ബൈക്കിന്റെ പ്ലഗ് ഊരിമാറ്റി പൊലീസ് ഒരുക്കിയ കെണിയിൽ;  കറുകുറ്റി കോവിഡ് സെന്ററിൽ നിന്ന് മൂന്നാം വട്ടം ചാടാനും പുതിയ തന്ത്രം; പൊലീസിനെ വട്ടം ചുറ്റിക്കുന്ന ഡ്രാക്കുള സുരേഷിന്റെ കഥ

പ്രകാശ് ചന്ദ്രശേഖർ

പെരുമ്പാവൂർ: കളമശേരി മെഡിക്കൽ കോളേജിലെ ഐസൊലേഷൻ വാർഡിൽ കോവിഡ് ചികത്സയിൽ കഴിയവെ രക്ഷപെട്ട കുപ്രിസിദ്ധ മോഷ്ടാവ് ഡ്രാക്കുള സുരേഷിനെ കണ്ടെത്താൻ പൊലീസ് നെട്ടോട്ടത്തിൽ.ഇന്ന് ഉച്ചയോടെയാണ് കോവിഡ് ബാധിതനായ സുരേഷ് ഡ്യൂട്ടിയിലുണ്ടായിരുന്ന പൊലീസുകാരുടെ കണ്ണുവെട്ടിച്ച് കടന്നത്. ടോയ്‌ലറ്റിന്റെ ജനൽ വഴിയാണ് ഇയാൾ ഇന്ന് ഉച്ചയോടെ രക്ഷപെട്ടത്. രണ്ടുതവണ ജയിൽ വകുപ്പിന്റെ കറുകുറ്റിയിലെ കോവീഡ് നിരീക്ഷണ കേന്ദ്രത്തിൽ നിന്നും രക്ഷപെട്ട ഇയാളെ താമസിയാതെ പൊലീസ് പിടികൂടിയിരുന്നു. ഇക്കൂറി ഡ്രാക്കുളയുടെ നീക്കം കുറച്ചുകൂടി കരുതലോടെയായിരിക്കുമെന്നാണ് പൊലീസ് അനുമാനം.

തന്റെ ഒപ്പം താമസിക്കുന്ന മുള്ളിരിങ്ങാട് സ്വദേശിയായ യുവതിയുടെ അടുത്തെത്താനാണ് രക്ഷപെടുന്നതെന്നായിരുന്നു പൊലീസിനോട് മുമ്പ് രണ്ടുതവണ പിടിയിലായപ്പോഴും ഡ്രാക്കുള പറഞ്ഞത്. താനില്ലങ്കിൽ അവൾ ഒറ്റയ്ക്കാവുമെന്നും കൂട്ടിന് ആരും ഇല്ലെന്നും ഇതെല്ലാം ആലോചിക്കുമ്പോൾ വല്ലാത്ത വിഷമം തോന്നുമെന്നും പിന്നാലെ രക്ഷപെടാൻ കർമ്മപദ്ധതി ആവിഷ്‌കരിക്കുകയായിരുന്നെന്നും മറ്റുമായിരുന്നു ഇയാളുടെ ന്യായവാദം.

രണ്ടാമത്തെ തവണ പെരുംമ്പാവൂർ കണ്ടന്തറയിൽ നിന്നുമാണ് പൊലീസ് സംഘം സുരേഷിനെ കസ്റ്റഡിയിൽ എടുത്തത്. ഇവിടെ ലോഡ്ജിൽ താമസിക്കുകയായിരുന്ന മുള്ളിരിങ്ങാട് സ്വദേശിനിയായ കാമുകിയെ കാണാനാണ് സുരേഷ് ഇവിടെ എത്തിയതെന്നാണ് പൊലീസ് അനുമാനം. അടുത്തടുത്ത ദിവസങ്ങളിൽ രണ്ട് തവണയാണ് ഡ്രാക്കുള സുരേഷ് എന്നറിയപ്പെടുന്ന കുപ്രസിദ്ധ മോഷ്ടാവ് വടയമ്പാടി അയ്യൻകുഴി ക്ഷേത്രത്തിന് സമീപം ഓലിക്കുഴി കരോട്ടെവീട്ടിൽ സുരേഷ് (42) അങ്കമാലിയിലെ ജയിൽ വകുപ്പിന്റെ കോവിഡ് നീരീക്ഷണ കേന്ദ്രത്തിൽ നിന്നും രക്ഷപെട്ടത്.

നിരീക്ഷണ കേന്ദ്രത്തിലേയ്ക്ക് കയറ്റാൻ വിലങ്ങ് അഴിക്കുന്ന അവസരത്തിലാണ് പെരുമ്പാവൂർ പൊലീസ് ചാർജ്ജ് ചെയ്തിരുന്ന മോഷണക്കേസ്സിലെ പ്രതിയായ സുരേഷ് കഴിഞ്ഞ മാസം 23-ന് പുലർച്ചെ കറുകുറ്റിയിലെ ക്വാറന്റൈൻ സെന്ററിൽ നിന്നും രക്ഷപെട്ടത്. രക്ഷപെട്ട സുരേഷ് കുറച്ചുകാലമായി ഒപ്പംതാമസിക്കുന്ന യുവതി വാടകയ്ക്കെടുത്തിരുന്ന വീട്ടിൽ എത്താൻ സാധ്യതയുണ്ടെന്ന് പൊലീസ് കണക്കുകൂട്ടിയിരുന്നു. ഇതുപ്രകാരം ഉടൻ പൊലീസ് സംഘം വീടിന് സമീപമെത്തി തയ്യാറെടുപ്പുകളോടെ കാത്തു നിന്നു. താമസിയാതെ ഇവിടെ എത്തിയ സുരേഷിനെ കയ്യോടെ പൊക്കുകയും ചെയ്തു. വീണ്ടും ഇയാളെ കറുകുറ്റിയിലെ കേന്ദ്രത്തിലെത്തിച്ച് നിരീക്ഷണത്തിലാക്കുകയും ചെയ്തിരുന്നു.

ഇക്കുറി കുറച്ചുകൂടി സുരക്ഷയൊരുക്കുന്നതിന്റെ ഭാഗമായി സുരേഷിനെയും മറ്റൊരുപ്രതിയെയും മുറിയിലാക്കി പൂട്ടിയിടുകയായിരുന്നു. മുറിയുടെ വാതിലിന്റെ പൂട്ട് കുത്തിത്തുറന്ന് മുന്നാം നിലയിലെത്തി ,കെട്ടിടത്തോട് ചേർന്ന് നിന്നിരുന്ന തേക്ക് മരം വഴി താഴേയ്ക്കിറങ്ങിയാണ് ഇത്തവണ രക്ഷപെട്ടത്.കഴിഞ്ഞമാസം 25-ാം തീയതി പുലർച്ചെയായിരുന്നു രണ്ടാമത്തെ രക്ഷപെടൽ.

പെരുമ്പാവൂർ പൊലീസിന്റെ സഹായത്തോടെ രണ്ടുദിവസത്തിനുള്ളിൽ ഡ്രാക്കുളയെ ജയിൽവകുപ്പ് ഉദ്യോഗസ്ഥർ പിടികൂടി വീണ്ടും നിരീക്ഷണ കേന്ദ്രത്തിലാക്കുകയായിരുന്നു. പരിശോധനയിൽ കോവിഡ് ബാധിതനാണെന്ന് സ്ഥിരീകരിച്ചതോടെ വ്യാഴാഴ്ച കളമശേരി മെഡിക്കൽ കോളേജിലെ ഐസൊലേഷൻ വാർഡിലേക്ക് മാറ്റുകയായിരുന്നു. 25-ന് സുരേഷിനൊപ്പം മോഷണക്കേസ്സിൽ പ്രതിയായ തലശേരി കതിരൂർ നാലാം മൈൽ റോസ് മഹൽ മിഷാലും(22)പുറത്തുചാടിയിരുന്നു. ഇയാളെ ഇനിയും പിടികിട്ടിയിട്ടില്ല.

എളമക്കര പൊലീസ് സ്റ്റേഷൻ പരിധിയിൽ ബൈക്കുമോഷണക്കേസിലാണ് മിഷാൽ പിടിക്കപ്പെട്ടത്. തലശേരിയിൽ പീഡനക്കേസ്സിലും ഇയാൾ പ്രതിയാണെന്ന് പൊലീസ് അറിയിച്ചു. ഇതിനകം തന്നെ 4 തവണ സുരേഷ് കറുകുറ്റിയിലെ കോവിഡ് നിരീക്ഷണ കേന്ദ്രത്തിൽ കഴിഞ്ഞിട്ടുണ്ട്. ഈ പരിചയമാണ് രണ്ടുതവണ ഇവിടെ നിന്നും രക്ഷപെടുന്നതിന് ഇയാൾക്ക് തുണയായതെന്നാണ് പൊലീസിന്റെ വിലയിരുത്തൽ.

എല്ലാകാര്യങ്ങളിലും സുരേഷിനെ സഹായിച്ചിരുന്നത് കൂടെ താമസിച്ചിരുന്ന യുവതിയായിരുന്നു. പൊലീസ് സ്ഥലത്തെത്തുകയും സുരേഷും യുവതിയുമായുള്ള ബന്ധം മനസ്സിലാവുകയും ചെയ്തതിന്റെ അടിസ്ഥാനത്തിൽ വീട്ടുടമ ഇവരെ ഒഴിപ്പിച്ചിരുന്നു. തുടർന്നാണ് ഇവർ കണ്ടന്തറയിലെ ലോഡ്ജിൽ താമസത്തിനെത്തുന്നതെന്നാണ് പൊലീസിന്റെ പ്രാഥമിക അന്വേഷണത്തിൽ ലഭിച്ച വിവരം.

യുവതി കണ്ടന്തറയിൽ താമസമാരംഭിച്ച സാഹചര്യത്തിൽ സുരേഷ് എന്തായാലും ഇവിടെ എത്താൻ സാധ്യതയുണ്ടെന്ന് പൊലീസ് കണക്കുകൂട്ടിയിരുന്നെന്നും ആൾ സ്ഥലത്തെത്തിയാൽ വിവരം കിട്ടുന്നതിന് എല്ലാക്രമീകരണങ്ങളും ഇവിടം കേന്ദ്രീകരിച്ച് ഒരുക്കിയിരുന്നെന്നും ഇതുമൂലമാണ് ഡ്രാക്കുളയെ കൂടുക്കാനായതെന്നും പെകുമ്പാവൂർ സി ഐ ജയകുമാർ അറിയിച്ചു. നേരത്തെ ഹോംനേഴ്സായി പ്രവർത്തിച്ചിരുന്ന യുവതി ഇടക്കാലത്ത് താനുമായി സൗഹൃദത്തിലാവുകയായിരുന്നെന്നും തുടർന്ന് ഇവർക്കൊപ്പം താമസിക്കുകയായിരുന്നെന്നുമാണ് സുരേഷ് പൊലീസിനോട് വിവരിച്ചത്.

മോഷണം തുടങ്ങിയത് മാതാപിതാക്കൾ വഴിപിരിഞ്ഞപ്പോൾ

കുഞ്ഞായിരിക്കുമ്പോൾ മാതാപിതാക്കൾ രണ്ട് വഴിക്ക് പിരിഞ്ഞപ്പോൾ അച്ഛന്റെ അമ്മയായിരുന്നു സുരേഷിന്റെ രക്ഷക. ആക്രി പെറുക്കിയായിരുന്നു ഇവരുടെജീവിതം. ഇവർക്കൊപ്പം കഴിയുമ്പോൾ ,കുട്ടിക്കാലത്തുതന്നെ അല്ലറ ചില്ലറ മോഷണങ്ങൾ നടത്തി സുരേഷ് കുട്ടിക്കള്ളനെന്ന് പേരെടുത്തിരുന്നു.16 വയസെത്തിയപ്പോഴേയ്ക്കും പയറ്റിത്തെളിഞ്ഞ മോഷ്ടാവായിയിരുന്നു.

കോവിഡ് കാലത്തെ കോടതി ഉത്തരവിന്റെ ആനൂകൂല്യത്തിലാണ് അടുത്തിടെ ജയിലിൽ നിന്നും പുറത്തിറങ്ങിയത്. പിന്നീട് താമസം ഏതുകേസ്സിലും രക്ഷിച്ചെടുക്കാൻ അരയും തലയും മുറുക്കി രംഗത്തിറങ്ങുന്ന ഇടുക്കികാരിയായ സുന്ദരിയ്‌ക്കൊപ്പമായിരുന്നു. മാസങ്ങൾക്ക് മുമ്പ് പെരുംവുംമുഴിയിൽ മോഷണം നടത്തിയപ്പോൾ നാട്ടുകാർ പിടികൂടി മൂവാറ്റുപുഴ പൊലീസിന് കൈമാറിയിരുന്നു. ഇതിന് മുമ്പ് 2019 സെപ്റ്റംബറിൽ മൂവാറ്റുപുഴ പൊലീസ് ചാർജ്ജുചെയ്ത കേസ്സിലാണ് ഇയാൾ ജയിലിലായത്.ഈ കേസ്സിന്റെ നടപടിക്രമങ്ങളുമായി മുന്നോട്ടുപോയ പൊലീസ് സംഘത്തെ ഡ്രാക്കുള ശരിക്കും വട്ടംകറക്കി.പൊലീസ് ജീപ്പിന്റെ ചില്ല് തലകൊണ്ട് ഇടിച്ച് പൊട്ടിച്ച ശേഷം ഒരു കഷണം വിഴുങ്ങുകയായിരുന്നു.ഉടൻ പൊലീസ് സംഘം കോട്ടയം മെഡിക്കൽ കോളേജിൽ എത്തിച്ച് ചികത്സ ലഭ്യമാക്കിയതിനാലാണ് അന്ന് ജീവൻ രക്ഷപെട്ടത്. ഈ കേസ്സിൽ 10000 രൂപ കോടതിയിൽ കെട്ടിവച്ചത് ഇപ്പോൾ ഇയാളുടെ കൂടെ താമസിക്കുന്ന ഇടുക്കിക്കാരിയായ യുവതിയായിരുന്നെന്നാണ് പൊലീസ് പുറത്തുവിട്ട വിവരം.

മുള്ളിരിങ്ങാടാണ് ഇവർ അന്ന് താമസിച്ചിരുന്നതെന്നാണ് പൊലീസിന്റെ പ്രാഥമാക അന്വേഷണത്തിൽ ലഭ്യമായ വിവരം.അടുത്തകാലത്ത് ഈ യുവതിയ്‌ക്കൊപ്പം സുരേഷ് പലസ്ഥലത്തും ചുറ്റിക്കറങ്ങിയതായും പൊലീസിന് വിവരം ലഭിച്ചിരുന്നു.യുവതിയുടെ സാമ്പത്തിക സ്രോതസ്സിനെക്കുറിച്ച് നിരവധി ഉൗേഹാപേഹങ്ങൾ പ്രചരിച്ചിട്ടുണ്ടെന്നും ഇതൊന്നും കേസ്സുമായി ബന്ധപ്പെട്ടകാര്യങ്ങളിൽ ഉൾപ്പെടാത്തതിനാൽ അന്വേഷണം നടത്തിയിട്ടില്ലന്നുമാണ് പൊലീസ് വ്യക്തമാക്കുന്നത്.

രക്ഷപ്പെടാൻ പതിനെട്ടടവും പയറ്റും

പിടിവീണെന്ന് ഉറപ്പായാൽ രക്ഷപെടാൻ കഴിയാവുന്നതെല്ലാം ചെയ്യുന്ന പ്രകൃതക്കാരനാണ് ഇയാൾ.മൂവാറ്റുപുഴിയിൽ പൊലീസ് ജീപ്പിന്റ ഗ്ലാസ്സ് ഇടിച്ചുപൊട്ടിക്കുകയും ഒരു കഷണം വിഴുങ്ങുകയും ചെയ്തത് ഇത്തരത്തിലുള്ള നീക്കത്തിന്റെ ഭാഗമായിരുന്നു.ഗ്ലാസ്സ് വിഴുങ്ങി,അപകടസ്ഥിതിയിലാണെന്ന് വരുത്തിതീർത്താൽ ഇതുകണ്ട് പൊലീസ് സ്ഥലം വിടുമെന്നുമായിരുന്നു സുരേഷിന്റെ കണക്കുകൂട്ടൽ.ഈ നീക്കം പൊലീസ് ഇടപെടലിൽ പൊളിഞ്ഞിരുന്നു.

കോലഞ്ചേരി പെരുംവുംമുഴിയിൽ മോഷണം നടത്തിയ ശേഷം ഓടി രക്ഷപെടുന്നതിനുള്ള ശ്രമത്തിനിടെ പിൻതുടർന്നെത്തിയവർ സമീപത്തെ കപ്പത്തോട്ടത്തിൽ സുരേഷിനെ കണ്ടെത്തുകയായിരുന്നു.ബോധംകെട്ടുവീണ രീതിയിലായിരുന്നു ഈ അവരത്തിൽ ഇയാളുടെ കിടപ്പ്. നിമിഷനേരംകൊണ്ട് ഇയാൾ ചാടിയെഴുന്നേറ്റ് തന്റെ കൈയിൽ പിടിച്ചിരുന്ന സ്ത്രീയുടെ കൈകടിച്ച് മുറിച്ച ശേഷം ഇരുളിലൂടെ കുതിച്ചുപാഞ്ഞു.നാട്ടുകാർ പിൻതുടരുന്നുണ്ടെന്ന് വ്യക്തമായപ്പോൾ പെരുവുംമുഴി പാലത്തിൽ നിന്നും താഴേയ്‌ക്കെടുത്തുചാടി.ചതുപ്പിൽ വീണതിനാൽ ജീവൻ രക്ഷപെട്ടു.തുടർന്ന് പൊലീസ് പിടികൂടി സ്റ്റേഷനിലേയ്ക്ക് കൊണ്ടുവരികയായിരുന്നു.

കോലഞ്ചേരിക്കടുത്ത് പെരുവുംമുഴിയിലെ പണിസ്ഥലത്ത് ജോലിയ്‌ക്കെത്തിയവർ മാറിയിട്ടിരുന്ന വസ്ത്രത്തിനൊപ്പം സൂക്ഷിച്ചിരുന്ന പേഴ്‌സുകളിൽ നിന്നും പണം എടുത്ത് ഇയാൾ ഓടിമറയുകയായിരുന്നു.3 പുരുഷന്മാരും ഒരു സ്ത്രീയുമായിരുന്നു ഇവിടെ ജോലി ചെയ്തിരുന്നത്. ഇവരിൽ ഒരാൾ ഇയാൾ വസ്ത്രങ്ങൾ സൂക്ഷിച്ചിരുന്ന ഭാഗത്തുനിന്നും ഓടിമറയുന്നത് കണ്ടിരുന്നു. തുടർന്ന് നടന്ന പരിശോധനയിൽ 5000 രൂപ നഷ്ടപ്പെട്ടതായി ഇവർക്ക് ബോദ്ധ്യമായി.തുടർന്നാണ് ഇവർ നാട്ടുകാരെ വിവരമറിയിച്ച് സുരേഷിനെ പിടികൂടാൻ ശ്രമം തുടങ്ങിയത്. ഉച്ചയ്ക്ക് 1 മണിയോടെ നാട്ടുകാരും പിന്നാലെ വിവരമറിഞ്ഞെത്തിയ പൊലീസ് സംഘവും സുരേഷിനെ കുടുക്കാൻ നടത്തിയ നീക്കം വിജയിക്കുന്നത് രാത്രി 9 മണിയോടുത്താണ്.

പൊലീസിന്റെ തന്ത്രപരമായ നീക്കമാണ് സുരേഷിന് വിനയായത്.സുരേഷിനെ തേടി നടക്കുമ്പോൾ തന്നെ പാതയോരത്ത് ബൈക്ക് പൊലീസിന്റെ ശ്രദ്ധയിൽപ്പെട്ടിരുന്നു. നമ്പർ പ്രകാരം അഡ്രസ്സ് തപ്പിയപ്പോൾ ബൈക്ക് സുരേഷിന്റെതാണെന്ന് ഏറെക്കുറെ പൊലീസിന് ഉറപ്പായി.പിന്നാലെ പ്ലഗ്ഗ് ഊരിയെടുത്തു. ഇതൊന്നുമറിയാതെ, അടിവസ്ത്രം മാത്രമിട്ട് സ്ഥലത്തെത്തിയ സുരേഷ് ബൈക്ക് എടുത്ത് രക്ഷപെടാൻ ശ്രമിക്കുകയായിരുന്നു.

രാത്രി വൈകിയതിനാൽ തിരച്ചിൽ അവസാനിപ്പിച്ച് മടങ്ങാൻ കാത്തിരുന്ന നാട്ടുകാർക്കിടയിലേയ്ക്കാണ് സുരേഷ് ഈ സാഹസവുമായി എത്തിയത്.സുരേഷിന്റെ ഈ നീക്കം പരാജയം സമ്മതിച്ച് പിൻവാങ്ങാനിരുന്ന പൊലീസിനും നാട്ടുകാർക്കും പിടിവള്ളിയായി. ഉടൻ സുരേഷിനെ കൈപ്പിടിയിലൊതുക്കാൻ ഇവർ കുതിച്ചെത്തിയപ്പോൾ പാലത്തിൽ നിന്നും താഴേയ്ക്കുചാടി രക്ഷപെടുന്നതിനായി സുരേഷിന്റെ നീക്കം. എന്നാൽ താഴെ ചതുപ്പിൽ പതിച്ചതിനാൽ ഈ നീക്കം വിജയിച്ചില്ല.ചെളിയിൽ കാൽപൂണ്ടുപോയതിനാൽ അനങ്ങാൻ പറ്റാത്ത അവസ്ഥയിൽ നിലയുറപ്പിച്ചിരുന്ന സുരേഷിനെ നാട്ടുകാരും പൊലീസും ചേർന്ന് കരയ്‌ക്കെത്തിച്ച് കസ്റ്റഡിയിൽ എടുക്കുകയായിരുന്നു.

Stories you may Like

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

More News in this category+

MNM Recommends +

Go to TOP