മറുനാടൻ ഡെസ്‌ക്‌

മംഗളൂരു: സയനൈഡ് മോഹൻ വാർത്തകളിൽ നിന്നുമായുന്നില്ല. കാരണം നിരപരധികളായ രണ്ടുഡസൻ സ്ത്രീകളെ സ്വന്തം സ്വാർഥ താൽപര്യത്തിന് വേണ്ടി കൊന്നൊടുക്കിയ ക്രൂരതയുടെ ശേഷിപ്പുകൾ അയാളെ വേട്ടയാടുകയാണ്. ഇരുപതോളം സ്ത്രീകളെ വിവാഹ വാഗ്ദാനം നൽകി പീഡിപ്പിച്ച ശേഷം ഗർഭ നിരോധന ഗുളിക എന്ന വ്യാജേന സയനൈഡ് നൽകി കൊലപ്പെടുത്തി ആഭരണങ്ങൾ കവർന്നാണ് ഇയാൾ കുപ്രസിദ്ധനായത്. 20 കൊലക്കേസുകളുള്ള മോഹനു പതിനേഴാമത്തെ കേസിൽ ജില്ലാ സെഷൻസ് കോടതി ഇന്ന് വധശിക്ഷ വിധിച്ചത്. പല കേസുകളിലായി 13 ജീവപര്യന്തം ശിക്ഷ അനുഭവിക്കുകയാണ് ഇയാൾ. 2005 ഒക്ടോബറിൽ ബണ്ട്വാൾ ബലേപുനിയിലെ അങ്കണവാടി ജീവനക്കാരി ശശികലയെ വശീകരിച്ചു കൊണ്ടുപോയി പീഡിപ്പിച്ചു കൊന്നെന്ന കേസിലാണ് ഇപ്പോഴത്തെ വധശിക്ഷ. മുൻപ്, ബണ്ട്വാൾ സ്വദേശികളായ വാമനപദവിലെ ലീലാവതി, ബരിമാറിലെ അനിത, സുള്ള്യ പെരുവാജെയിലെ സുനന്ദ എന്നീ യുവതികളെ കൊന്ന കേസുകളിലും മോഹനു വധശിക്ഷ വിധിച്ചിരുന്നു.

ഇരകളെ കബളിപ്പിക്കുന്നതിൽ അതിസമർഥൻ

അനിത മൂല്യ അന്ന്പല തവണ കണ്ണാടിയിൽ നോക്കി. താൻ സുന്ദരി തന്നെയല്ലേ എന്ന് ഉറപ്പിക്കാൻ. ഓഫ് വൈറ്റ് സാരിയും മുടിയിൽ മുല്ലപ്പൂവും ചൂടി കാതിൽ പുത്തൻ കമ്മലുകളും, പുതിയ കുപ്പി വളകളും പുതിയ ജോഡി ചെരുപ്പുകളും അണിഞ്ഞ് യാത്ര പുറപ്പെട്ടു. ഏതാനും മണിക്കൂറുകൾക്കകം ക്ഷേത്രത്തിൽ വച്ച് അവളുടെ വിവാഹം നടക്കാൻ പോകുകയാണ്. കാമുകൻ കാത്തിരിക്കുമ്പോൾ അവൾ ഹസൻ ടൗണിലെ ഇന്റർ സിറ്റി ബസ് സ്റ്റാന്റിലേക്ക് പോയി. അവിടെ തലചുറ്റി മരിച്ചുവീണു. കാമുകൻ അനന്ത് കുൽ ടൊയ്ലെറ്റിന് അധികം ദൂരെയല്ലാതെ കാത്തിരിക്കുന്നുണ്ടായരുന്നു. കുഴഞ്ഞുവീണ അനിതയുടെ ചുറ്റും ആളുകൾ കൂടുന്നത് അയാൾ കണ്ടു. അയാൾ പതിയെ നടന്നുനീങ്ങി. അവർ ഇരുവരും താമസിച്ചിരുന്ന ഹോട്ടലിലേക്ക് മടങ്ങി. അവിടെയാണ് അവർ രാത്രിയിൽ ചെലവഴിച്ചത്. സാധനങ്ങളുമെടുത്ത് അനന്ത് കുലാൽ അപ്രത്യക്ഷനായി. കുലാൽ യഥാർഥത്തിൽ ഒരു പ്രൈമറി സ്‌കൂളിലെ സയൻസ് അദ്ധ്യാപകനാണ്. മോഹൻ കുമാർ എന്ന് ശരിക്കുള്ള പേര്. കോടതികളിൽ തന്റെ കേസുകൾ സ്വയം വാദിക്കും. അഞ്ചുവർഷം കൊണ്ട് 20 സ്ത്രീകളെ വകവരുത്തിയ സീരിയൽ കില്ലർ. സയനൈഡ് മോഹൻ എന്ന് പൊലീസുകാർ വിളിക്കുന്ന ചെല്ലപ്പേര്. അനിത അടക്കം തന്റെ എല്ലാ ഇരകളെയും വകവരുത്തിയത് ഗർഭനിരോധന ഗുളികകൾ എന്ന് പറഞ്ഞ് കൊടുത്തത് സയനൈഡ് പുരട്ടിയ ഗുളികയും. എല്ലാ സ്ത്രീകളെയും കൊന്നത് അവരുമായി ലൈംഗിക ബന്ധത്തിൽ ഏർപ്പെട്ടതിന് ശേഷവും.

സയനൈഡ് മോഹൻ വീണ്ടും വാർത്തകളിൽ നിറഞ്ഞത് കഴിഞ്ഞ മാസം

സെപ്റ്റംബറിൽ സയനൈഡ് മോഹൻ വീണ്ടും മാധ്യമങ്ങളിൽ നിറഞ്ഞു. കേരളത്തിൽ നിന്നുള്ള 33 കാരിയായ സംഗീതാദ്ധ്യാപികയെ കൊലപ്പെടുത്തിയ കേസിലാണ് മംഗലൂരു കോടതി ശിക്ഷ വിധിച്ചത്. മോഹനെ കുറ്റക്കാരനായി പ്രഖ്യാപിക്കുന്ന 16 ാമത്തെ കേസ്. 2007 ലാണ് മോഹൻ ഈ സ്ത്രീയെ പരിചയപ്പെടുന്നത്. വനം വകുപ്പിലെ ഉദ്യോഗസ്ഥൻ എന്നാണ് പരിചയപ്പെടുത്തിയത്. ബെംഗളരുവിലെ ഒരു റെക്കോഡിങ് കമ്പനിയിൽ പാടാൻ അവസരം വാങ്ങിക്കൊടുക്കാമെന്ന് വാഗ്ദാനം നൽകിയാണ് ഇവരെ വീഴ്‌ത്തിയത്.

ബെംഗളൂരുവിൽ എത്തി കോട്ടൻപേട് റോഡിലെ സിറ്റി ഹോട്ടലിൽ താമസമായി. ഇരുവരും അന്ന് രാത്രി ഒന്നിച്ചുറങ്ങി. ലൈംഗിക ബന്ധതത്തിലും ഏർപ്പെട്ടു. അടുത്ത ദിവസം പൂജയ്ക്ക് പോകാനായി ആഭരണങ്ങൾ ഹോട്ടൽ മുറിയിൽ അഴിച്ചുവയ്ക്കാൻ പറഞ്ഞു. കെഎസ്ആർടിസി ബസിൽ എത്തിയപ്പോഴാണ് പതിവ് പോലെ ഗർഭനിരോധന ഗുളിക സംഗീതാദ്ധ്യാപികയ്ക്ക് കൊടുത്തത്. ഉപ്പർപേട്ടിലെ ബസ് സ്റ്റാന്റിലെ ടൊയ്ലറ്റിൽ ആ സ്ത്രീയും മരിച്ചുവീണു. രാവിലെ 9 മണിക്ക് മൃതദേഹം കണ്ടെടുത്തു. അസ്വാഭാവിക മരണത്തിന് പൊലീസ് കേസെടുത്തു. മോഹൻ പതിവ് പോലെ ഹോട്ടലിലേക്ക് പോയി. ആഭരണങ്ങളും കൈക്കലാക്കി മുങ്ങി.

സംഗീതാദ്ധ്യാപികയെ കൊന്ന കേസിലും ജീവപര്യന്തം

ഒരുകേസിൽക്കൂടി ജീവപര്യന്തം തടവും 25,000 രൂപ പിഴയും. മംഗളൂരു ആറാം അഡീഷണൽ ജില്ലാ സെഷൻസ് ജഡ്ജി സയ്യീദ്ദുനീസ്സയാണ് ശിക്ഷ വിധിച്ചത്.കാസർകോട് ഉപ്പള ബേക്കൂരിലെ സംഗീതാധ്യാപികയായ പൂർണിമ(38)യെ കൊലപ്പെടുത്തിയ കേസിലാണ് ദക്ഷിണ കന്നഡയിലെ ബണ്ട്വാൾ കന്യാനയ സ്വദേശി മോഹൻകുമാർ എന്ന സയനൈഡ് മോഹനെ (56) ശിക്ഷിച്ചത്. പിഴ അടച്ചില്ലെങ്കിൽ ഒരു വർഷംകൂടി തടവനുഭവിക്കണം. കർണാടക പൊതുവിദ്യാഭ്യാസവകുപ്പിലെ അദ്ധ്യാപകനായിരുന്നു മോഹൻകുമാർ.

വശീകരണം വിവാഹ വാഗ്ദാനം നൽകി

വിവാഹവാഗ്ദാനം നൽകി യുവതികളെ വശീകരിച്ച് ഹോട്ടലുകളിൽ കൊണ്ടുപോയി താമസിപ്പിച്ച് ലൈംഗികബന്ധത്തിനുശേഷം സയനൈഡ് നൽകി കൊന്ന് ആഭരണങ്ങൾ കവരുകയായിരുന്നു ഇയാളുടെ രീതി. ഗർഭനിരോധന ഗുളിക എന്ന വ്യാജേനയാണ് യുവതികൾക്ക് സയനൈഡ് നൽകിയിരുന്നത്. കേരള, കർണാടക സ്വദേശികളായ 20 യുവതികളെയാണ് ഇയാൾ ഇത്തരത്തിൽ കൊലപ്പെടുത്തിയത്.

പൈവളിഗെ സ്വദേശിനിയായ വിജയലക്ഷ്മി(26)യെ മടിക്കേരിയിലെത്തിച്ച് സമാനമായി കൊലപ്പെടുത്തിയ കേസിൽ കഴിഞ്ഞ ജൂലായിൽ ഇയാളെ ജീവപര്യന്തം തടവിനുശിക്ഷിച്ചിരുന്നു. ഇയാൾ പ്രതിയായ അഞ്ച് കേസ് ഇപ്പോഴും മംഗളൂരു അതിവേഗകോടതിയിൽ വിചാരണയിലാണ്. സ്വകാര്യഇൻഷുറൻസ് കമ്പനി ജീവനക്കാരനായ സുധാകർ എന്ന് പരിചയപ്പെടുത്തിയാണ് മോഹൻകുമാർ യുവതിയുമായി ചങ്ങാത്തത്തിലായത്. ഇവിടെ ഒരു വീട്ടിൽ വേലക്കാരിയായി ജോലി ചെയ്യുകയായിരുന്നു യുവതി. കർണാടകയിലെ മടിക്കേരിയിൽ ജോലി തരപ്പെടുത്തിക്കൊടുക്കാമെന്നു പറഞ്ഞ് 2006 മാർച്ച് 20-ന് യുവതിയെ മംഗളൂരുവിലേക്കു വിളിച്ചുവരുത്തി. അവിടേക്ക് യുവതിക്കൊപ്പം വന്ന ബന്ധുവായ സ്ത്രീയെ മടക്കി അയച്ച ശേഷം ആ രാത്രി ഇരുവരും ഹോട്ടൽ മുറിയിൽ ഒരുമിച്ച് താമസിച്ചുവെന്നാണ് പൊലീസ് കണ്ടെത്തൽ.

പിറ്റേ ദിവസം ക്ഷേത്രത്തിൽ പോകാമെന്ന് പറഞ്ഞ് യുവതിയുമായി മടിക്കേരി ബസ് സ്റ്റാന്റിലെത്തിയ മോഹൻ കുമാർ, ഗർഭനിരോധന ഗുളികയെന്ന് തെറ്റിദ്ധരിപ്പിച്ച് സയനൈഡ് നൽകുകയായിരുന്നു. ഗുളികയുമായി ബസ് സ്റ്റാന്റിലെ ശുചിമുറിയിൽ പോയി ആരും കാണാതെ കഴിക്കാനായിരുന്നു മോഹൻ ആവശ്യപ്പെട്ടത്. ഇയാളെ അനുസരിച്ച യുവതി ശുചിമുറിയിൽ രക്തം ഛർദ്ദിച്ച് മരിച്ചുവീണു.

ഇതിന് പിന്നാലെ ഹോട്ടൽ മുറിയിലെത്തിയ മോഹൻ, യുവതിയുടെ സ്വർണ്ണാഭരണങ്ങളും പണവും അപഹരിച്ച് കടന്നുകളഞ്ഞു. ബാക്കിയുള്ള 19 കേസുകളിലും സമാനമായ രീതിയിലാണ് പ്രതി കൊലപാതകം നടത്തിയതെന്നാണ് അന്വേഷണ സംഘത്തിന്റെ കണ്ടെത്തൽ. ആദ്യം പിടിക്കപ്പെട്ടപ്പോൾ തന്നെ മോഹൻ, അയാൾ കൊലപ്പെടുത്തിയ 18 കേസുകളെ കുറിച്ചുള്ള വിവരങ്ങൾ പൊലീസിനോട് പറഞ്ഞിരുന്നു. തുടർന്നുള്ള പൊലീസ് അന്വേഷണത്തിൽ മറ്റ് രണ്ട് കേസുകൾ കൂടി തെളിഞ്ഞു. 

പ്രൈമറി സ്‌കൂൾ അദ്ധ്യാപകൻ; പല പേരിൽ പല നാടുകളിൽ പല ജോലി

ദക്ഷിണകന്നഡയിൽ ഉൾപ്പെട്ട ജില്ലയിലെ ബന്ത്വൽ സ്വദേശിയാണ് മോഹൻ കുമാർ. ഇവിടെയുള്ള ഒരു പ്രൈമറി സ്‌കൂളിൽ ഫിസിക്കൽ എഡുക്കേഷൻ അദ്ധ്യപകനുമായിരുന്നു. അതിന് ശേഷമാണ് പല പേരുകളിൽ പല നാടുകളിൽ പല ജോലിക്കാരനായി കൊലപാതകങ്ങൾ നടപ്പിലാക്കിയത്. ബരിമാരു ഗ്രാമവാസിയായിരുന്ന 22കാരിയായ അനിതയെ കാണാതായ കേസിലെ അന്വേഷണമാണ് ഇയാളിലേക്ക് എത്തിയത്. അനിതയുടെ ഫോണിനെ കേന്ദ്രീകരിച്ച് നടത്തിയ അന്വേഷണത്തിലാണ് ഇത് മുൻപ് ഉപയോഗിച്ചിരുന്നത് മോഹനാണെന്ന് കണ്ടെത്തുന്നത്. ഇരുവരും തമ്മിൽ നിരവധി തവണ ഫോണിൽ സംസാരിച്ചിട്ടുണ്ടെന്നും വ്യക്തമായതോടെ മോഹനെ പൊലീസ് കസ്റ്റഡിയിലെടുത്ത് ചോദ്യം ചെയ്തു.

മോഹൻ കൊലപ്പെടുത്തിയ 18 യുവതികളിൽ നാല് പേർ പ്രതിയുടെ നാടായ ബന്ത്വൽ താലൂക്കിലെയും രണ്ട് പേർ സുള്ള്യയിലെയും മൂന്ന് പേർ പുത്തൂറിലെയും ഒരാൾ മൂഡബിദ്രിയിലെയും രണ്ട് പേർ ബൽത്തങ്ങാടിയിലെയും ഒരാൾ മംഗലുരുവിലെയും നിവാസികളായിരുന്നു. ഇതിൽ പത്തുകൊലപാതകങ്ങൾ നടന്നത് മൈസുരു ബസ് സ്റ്റാന്റിലാണ്. മൂന്ന് പേരെ മടിക്കേരി ബസ് സ്റ്റാന്റിലും രണ്ട് പേരെ ഹാസ്സൻ ബസ് സ്റ്റാന്റിലും രണ്ട് പേരെ ബെംഗലുരുവിലെ ബസ് സ്റ്റാന്റിലും മറ്റൊരാളെ കൊല്ലൂർ മൂകാംബിക ക്ഷേത്രത്തിലും കൊലപ്പെടുത്തി.

സൂക്ഷ്മ നിരീക്ഷണം; മാർഗ്ഗം ലളിതം

മധ്യവർഗത്തിൽ പെട്ട താഴ്ന്ന വരുമാനക്കാരായ കുടുംബങ്ങളിൽ നിന്നുള്ള യുവതികളെയാണ് നോട്ടമിടുക. ബസ്സ്റ്റോപ്പുകളിലും മറ്റും അവരുമായി ചങ്ങാത്തത്തിലാകും, പതിയെ അടുത്ത് വിവാഹ വാഗ്ദാനം നടത്തും. സ്ത്രീധനം വേണ്ടെന്ന് ആദ്യമേ പറയും. ദൂരെ എവിടെയെങ്കിലും പോയി ജീവിക്കാമെന്ന് പറയും. 12 ഓളം പേരുകൾ ഇയാൾ ഉപയോഗിച്ചിരുന്നു. ഇരയുടെ അതേ ജാതിയിൽ പെട്ടതാണെന്ന് കാട്ടാൻ ഇതേ സർനെയിം ഉപയോഗിക്കും, ഏതെങ്കിലും ഒരു ചെറിയ ലോഡ്ജിൽ എത്തിച്ച ശേഷം യുവതിയുമായി ലൈംഗിക ബന്ധത്തിൽ ഏർപ്പെടും. കല്യാണത്തലേന്നായിരിക്കും അത. ഈ പ്രദേശങ്ങളിൽ സ്ത്രീധനം ചോദിക്കാതിരിക്കുക വലിയ കാര്യമാണ്. അതുകൊണ്ട് തന്നെ മോഹനനെ പോലുള്ളവർ വന്ന വിളിച്ചാൽ, യുവതികൾ ഇറങ്ങിപ്പോരുന്ന സാഹചര്യമാണ്. തങ്ങൾക്കുള്ള നല്ല വസ്ത്രങ്ങളും ആഭരണങ്ങളും എല്ലാം എടുത്ത് അവർ പുറത്തിറങ്ങും. മോഹന്റെ ഇരകളിൽ ഒരാളായ സുനന്ദ പൂജാരി ഒളിച്ചോടും മുമ്പ് 25,000 രൂപയുടെ ബാങ്ക് വായ്പയും എടുത്തിരുന്നു.

എല്ലാ മരണങ്ങളും സയനൈഡ് ഉള്ളിൽ ചെന്ന്

എല്ലാ മരണങ്ങളും സയനൈഡ് ഉള്ളിൽ ചെന്നായിട്ടും ആറു വർഷത്തോളം പൊലീസുകാർ അതേപ്പറ്റി അന്വേഷിച്ചില്ല. സയനൈഡ് എന്നത് ആത്മഹത്യക്ക് അങ്ങനെ പതിവായി ഉപയോഗിക്കാത്ത, അത്ര എളുപ്പം സ്ത്രീകൾക്ക് കിട്ടാത്ത ഒരു വിഷമായിരുന്നിട്ടുകൂടി അന്വേഷണങ്ങളുണ്ടായില്ല. പത്തൊമ്പതാമത്തെ ഇര, അനിത ബാരിമാർ കൊല്ലപ്പെട്ടതോടെയാണ് അന്വേഷണം ചൂടുപിടിക്കുന്നത്. അതിനു കാരണമാകുന്നത് ഒരു വർഗീയ കലാപത്തിന്റെ പടപ്പുറപ്പാടും. ബാംഗെറാ സമുദായാംഗമായിരുന്നു അനിത. ഒരു സുപ്രഭാതത്തിൽ കാണാതായ അനിത ഒളിച്ചോടിയത് പ്രദേശത്തെ ഒരു മുസ്ലിം യുവാവുമായാണ് എന്നാരോപിച്ച് സംഗതി ഒരു ലഹളയുടെ വക്കുവരെ എത്തി. ബാംഗെറകൾ സംഘടിച്ച് പൊലീസ് സ്റ്റേഷൻ വളയുകയും, സ്റ്റേഷന് തീയിടും എന്ന് ഭീഷണിപ്പെടുത്തുകയും ചെയ്തു. തല്ക്കാലം ഒരു മാസത്തെ സാവകാശം ആവശ്യപ്പെട്ട് പൊലീസുകാർ അവരെ മടക്കിയയച്ചു. എന്തായാലും, അന്വേഷണം അതോടെ ചൂടുപിടിച്ചു.

പൊലീസ് അനിതയുടെ കാൾ റെക്കോർഡുകൾ പരിശോധിച്ചപ്പോൾ ഒരു കാര്യം മനസ്സിലായി. കാണാതാവുന്നതിന് മുമ്പുള്ള ദിവസങ്ങളിൽ അനിത രാത്രി ഏറെ വൈകിയും ഒരു അജ്ഞാത നമ്പറിലേക്ക് വിളിച്ച് മണിക്കൂറുകളോളം സംസാരിക്കുമായിരുന്നു. ഈ നമ്പർ ട്രേസ് ചെയ്തു വന്നതോടെ പൊലീസ് വീണ്ടും കുഴങ്ങി. അത് കാവേരി മങ്കു എന്ന മടിക്കേരി സ്വദേശിയായ ഒരു യുവതിയുടേതായിരുന്നു. ആ യുവതിയെയും മാസങ്ങളായി കാണ്മാനില്ല എന്നതായിരുന്നു പൊലീസിനെ കൂടുതൽ സംശയത്തിലാക്കിയത്. പൊലീസ് അടുത്തതായി പരിശോധിച്ചത് ആ നമ്പറിന്റെ കോൾ റെക്കോർഡുകളാണ്. അതിൽ, കാവേരിയുടെ കുടുംബക്കാർക്ക് അറിയാത്ത ഒരു നമ്പറിൽ നിന്ന് നിരവധി കോളുകൾ വന്നതായി കണ്ടു. ഈ നമ്പറാകട്ടെ കാസർകോട് സ്വദേശി പുഷ്പ വാസുകോടയുടേതായിരുന്നു. അതും മാസങ്ങളായി കാണ്മാനില്ലാത്ത ഒരു യുവതി. അതിലെ കോൾ റെക്കോർഡുകൾ പൊലീസിനെ കാണാതായ മറ്റൊരു യുവതി, വിനുത പിജിന എന്ന പുത്തൂർ സ്വദേശിയിലേക്കെത്തിച്ചു. അങ്ങനെ ആ ലീഡുകൾ ഒന്നിന് പിറകെ ഒന്നായി കാണ്മാനില്ലാത്ത പല യുവതികളിലേക്കും നീണ്ടു.

അതോടെ പൊലീസിന് ഒരു കാര്യം ബോധ്യമായി. ഇത് ഒരു 'സീരിയൽ കില്ലിങ്ങ്' ആണ്. അതോടെ സൈബർ അനലിറ്റിക്‌സ് വിങ്ങിന്റെ സഹായം പൊലീസ് തേടി. അതുവരെ ലഭ്യമായ സകല കോൾ റെക്കോർഡുകളും ഒന്നിച്ചു ചേർത്ത് ശാസ്ത്രീയമായ വിശകലനങ്ങൾ നടത്താൻ പൊലീസ് തയ്യാറായി. അതിൽ നിന്നാണ് നിർണായകമായ മറ്റൊരു വിവരം പൊലീസിന് കിട്ടുന്നത്. ഈ സിമ്മുകൾ എല്ലാം തന്നെ എന്നെങ്കിലും ഒരിക്കൽ മംഗളൂരുവിന് അടുത്തുള്ള ദേരളകട്ട എന്ന പട്ടണത്തിൽ വെച്ച് ആക്റ്റീവ് ആയിരുന്നു. അതോടെ പൊലീസ് പല സംഘങ്ങളായി പിരിഞ്ഞ് ദേരളകട്ടയിലെ സകല ലോഡ്ജുകളും കേറിയിറങ്ങി പരിശോധിച്ചു.

ആ ഘട്ടത്തിൽ പൊലീസ് കരുതിയത് അത് ഏതോ ഒരു 'പ്രോസ്റ്റിട്യൂഷൻ റാക്കറ്റ്' ആണെന്നായിരുന്നു. അതായിരുന്നു അവരുടെ ഹോട്ടൽ റെയ്ഡുകൾക്ക് പിന്നിലെ പ്രേരണ. ആ റെയ്ഡുകൾ പുരോഗമിക്കെ പൊലീസിന് സൈബർ സെല്ലിൽ നിന്ന് ഏറെ നിർണായകമായ ഒരു വിവരം കിട്ടുന്നു. മേൽപ്പറഞ്ഞ സിമ്മുകളിൽ ഒന്ന്, കാവേരിയുടെ ഫോൺ, ഏതാനും നിമിഷങ്ങൾക്ക് മുമ്പ്, ദേരളകട്ടയിൽ വെച്ച് ആക്റ്റീവ് ആയിട്ടുണ്ട്. ആ വിവരത്തെ പിന്തുടർന്ന് ചെന്ന പൊലീസ് പിടികൂടിയത്, ധനുഷ് എന്ന ഒരു ചെറുപ്പക്കാരനെയാണ്.

പൊലീസിന്റെ ചോദ്യങ്ങൾക്കു മുന്നിൽ വിരണ്ടുപോയ ആ പയ്യൻ, തനിക്ക് കാണാതായ യുവതികളെപ്പറ്റി യാതൊന്നുമറിയില്ല എന്ന് വ്യക്തമാക്കി. ആ ഫോണും സിമ്മും തനിക്ക് തന്റെ അമ്മാവനായ മോഹൻ കുമാർ എന്ന മോഹൻ മാസ്റ്റർ തന്നതാണ് എന്നും അവൻ പൊലീസിനോട് പറഞ്ഞു. അതോടെ, ഒന്നുകിൽ ഒരു മാംസക്കച്ചവടറാക്കറ്റ്, അല്ലെങ്കിൽ ഒരു സീരിയൽ കില്ലർ. രണ്ടിലൊന്നിന്റെ തൊട്ടടുത്ത് തങ്ങളെത്തി എന്ന് പൊലീസിന് ഉറപ്പായി. അത് രണ്ടാമത്തേതായിരുന്നു. ഒരു സീരിയൽ കില്ലർ. മോഹൻ മാസ്റ്റർ എന്ന സീരിയൽ കില്ലർ. ആ സമയത്ത് പുതുതായി പരിചയപ്പെട്ട യുവതിയുമായുള്ള പ്രണയഭാഷണങ്ങളിൽ മുഴുകിയിരിക്കുകയായിരുന്ന മോഹൻ കുമാറിനെ പൊലീസ് സ്റ്റേഷനിലേക്ക് മറ്റൊരു കേസുമായി ബന്ധപ്പെട്ട അന്വേഷണത്തിന് എന്ന ഭാവേന വിളിച്ചു വരുത്തി, അറസ്റ്റുചെയ്തു.

കുടുക്കിയതും യുവതി തന്നെ

മോഹൻ കുമാറിന്റെ മരണ വലയിൽ നിന്നും കഷ്ടിച്ചു രക്ഷപെട്ട ഒരു യുവതിയാണ് ഇയാളെ കുടുക്കാൻ പൊലീസിനെ സഹായിച്ചത്. വിവാഹം വാഗ്ദാനം ചെയ്ത്, പ്രലോഭിപ്പിച്ച് മടിക്കേരിയിലെ ഒരു ലോഡ്ജിലെത്തിച്ച ആ യുവതിയെ മോഹൻ കുമാർ ഉപയോഗിച്ചു. പതിവു പോലെ ബസ്റ്റാൻഡിൽ എത്തിച്ച ശേഷം ഗുളിക നൽകി, സ്റ്റാൻഡിലെ മൂത്രപ്പുരയിലേക്ക് പറഞ്ഞു വിട്ടു. എന്നാൽ ഗുളിക വിഴുങ്ങുന്നതിനു പകരം അവൾ അതിലൊന്നു നക്കുക മാത്രമേ ചെയ്തുള്ളു. ഉടൻ നിലത്തു വീണു. എന്നാൽ ഭാഗ്യവശാൽ ആശുപത്രിയിൽ പ്രവേശിപ്പിക്കപ്പെട്ട അവൾ രക്ഷപെട്ടു. ആത്മഹത്യാ ശ്രമം എന്നായിരുന്നു ആശുപത്രിയിൽ യുവതി പറഞ്ഞിരുന്നത്. തുടർന്ന് ആശുപത്രി ജീവനക്കാരുടെ സഹായത്തോടെ നാട്ടിൽ തിരികെയെത്തി. മൂന്നു മാസങ്ങൾക്കു ശേഷം അവളുടെ വിവാഹവും നടന്നു. കേസിന്റെ പ്രധാന്യം ബോധ്യപ്പെടുത്തിയതോടെ മോഹൻ കുമാറിനെതിരെ മൊഴി നൽകാൻ യുവതി തയാറതോടെ സീരിയൽ കില്ലർ അഴിക്കുള്ളിലായി.

009 ൽ ദേരലകട്ട ഗ്രാമത്തിൽ നിന്ന് മൂന്നാം ഭാര്യ ശ്രീദേവി റായിയുടെ വീട്ടിൽ നിന്നാണ് ഇയാളെ പിടികൂടിയത്. സയനൈഡിന്റെ വയലുകൾ അവിടെ നിന്ന് കണ്ടെടുത്ത്. വ്യാജ ഐഡി കാർഡുകൾ, വിസിറ്റിങ് കാർഡുകൾ വ്യാജ സർക്കാർ സീലുകൾ, റബർ സ്റ്റാമ്പുകൾ, സ്വർണാഭരണങ്ങൾ, മൊബൈലുകൾ എന്നിവയെല്ലാം കണ്ടെടുത്തു. താൻ സമീപിച്ച സ്തീകളുടെയും പേരുകൾ അടങ്ങിയ ഡയറിയും ഇയാൾ സൂക്ഷിച്ചിരുന്നു. താൻ സമീപിച്ചിട്ട് വിജയിക്കാത്ത സ്ത്രീകളുടെ പേരുകൾ ഇയാൾ ചുവന്ന മഷിയിൽ രേഖപ്പെടുത്തി. 10 സ്ത്രീകളെ പരിചയപ്പെട്ടതിൽ രണ്ടെണ്ണത്തിലെങ്കിലും ഇയാൾ വിജയിച്ചു.

അതീവ ബുദ്ധിമാൻ; പക്ഷേ പിഴവുകൾ പറ്റി

അതീവ ബുദ്ധിമാനെങ്കിലും സയനൈഡ് മോഹനും ചില പിഴവുകൾ പറ്റി. പല തെളിവുകളും ഇയാൾ അവശേഷിപ്പിച്ചു. ലോഡ്ജുകളിൽ ചെക്ക് ഇൻ ചെയ്യാൻ പല പേരുകൾ നൽകിയെങ്കിലും മേൽവിലാസം ഒന്നുതന്നെയായിരുന്നു.