എം മാധവദാസ്

ലോകത്തിന്റെ പലഭാഗത്തും നല്ലതിന് മാത്രമല്ല ചീത്തക്കുമുണ്ട് അവാർഡ്. യുഎസിലും യൂറോപ്പിലുമൊക്കെ സിനിമയിലും രാഷ്ട്രീയത്തിലുമെല്ലാം ഇത്തരം നെഗറ്റീവ് അവാർഡുകൾ ഉണ്ട്. നല്ല ജനപ്രതിനിധിക്ക് അവാർഡ് നൽകുന്നതുപോലെതന്നെ മോശം പ്രതിനിധിക്കുമുണ്ട് പുരസ്‌ക്കാരം. ഈ രീതി നമ്മുടെ നാട്ടിൽ ഇനിയും എത്തിയിട്ടില്ല എന്നേയുള്ളൂ. ഹോളിവുഡ്ഡിന് സമാന്തരമായി മോശം അവാർഡ് നൽകുന്ന കൂട്ടായ്മ ഇന്നും പ്രവർത്തിക്കുന്നു. അത് നിങ്ങളുടെ കലാസൃഷ്ടി മെച്ചമെച്ചമല്ലെന്ന് കാണിച്ച് തിരുത്തൽ വരുത്താനാണ്. ഒരുതവണ മോശം അവാർഡ് വാങ്ങിച്ചവർ അടുത്തതവണ ഓസ്‌ക്കാർ വാങ്ങി ഞെട്ടിച്ച സംഭവങ്ങളും ഉണ്ടായിട്ടുണ്ട്. തിരുത്തലിനും കൂടുതൽ മെച്ചപ്പെടുത്തലിനുമുള്ള ഒരു കൾച്ചറൽ ഷോക്ക് ട്രീറ്റ്മെന്റ് തന്നെയാണ് ഇത്. മോശം സിനിമകളെ പരിഹസിക്കുകയും നിശിതമായ ആത്മ പരിശോധനക്ക് വിധേയമാക്കാൻ പ്രേരിപ്പിക്കുകയും ചെയ്യുക എന്നതുതന്നെയാണ് ഈ അവാർഡുകളുടെ ലക്ഷ്യവും.

തല്ലിപ്പൊളി സിനിമകളുടെ ചാകരക്കാലമായിരുന്നു 2019. 194 സിനിമകളിൽ നല്ല സിനിമകൾ എന്ന വിശേഷിപ്പിക്കാവുന്ന വെറും 20ൽ താഴെ. ബാക്കിയുള്ളവ നോക്കി എറ്റവും അറുബോറൻ ചിത്രങ്ങൾക്ക് അവാർഡ് കൊടുക്കുക എന്നു പറയുന്നത് ശരിക്കും ഒരു ടാസ്‌ക്കാണ്. ഏറ്റവും ഞെട്ടിപ്പിക്കുന്നത് നമ്മുടെ സൂപ്പർതാര സംവിധായകരും നടന്മാരുമൊക്കെ കൂതറ സിനിമകൾക്കുള്ള നോമിനേഷനിൽ ഉണ്ടെന്നതാണ്. മലയാള സിനിമയുടെ സാമ്പത്തിക അടിത്തറ വർധിക്കുമ്പോളും നിലവാരം പടവലങ്ങപോലാണെന്ന് വ്യക്തം. ഇതിൽ പ്രരാബ്ധങ്ങളുടെ നടുവിൽ കുറഞ്ഞ ചെലവിൽ സിനിമ നിർമ്മിച്ചവരെ മോശം ഈ വാർഡിൽനിന്ന് ഒഴിവാക്കിയിട്ടും. കാരണം അവരുടെ സാഹചര്യം അങ്ങനെയാണ്. പക്ഷേ കോടികൾ പൊടിച്ചിട്ടും, സൂപ്പർ താരങ്ങളുടെ ഡേറ്റ് കിട്ടിയിട്ടും അറു വെറുപ്പിക്കൽ പടങ്ങൾ എടുക്കുന്നവരോ? പ്രേക്ഷകരുടെ തലച്ചോർ കൊള്ളയടിക്കുന്ന ഇത്തരക്കാർക്കുള്ള താക്കീത് കൂടിയാണ ഈ അവാർഡ്.

ഒരു അഡാർ ലൗ, ഇരുപത്തിയൊന്നാം നൂറ്റാണ്ട്, ഇട്ടിമാണി മെയഡ് ഇൻ ചൈന, ജാക്ക് ആൻഡ് ഡാനിയൽ, ഗാനഗന്ധർവൻ, 9, കൽക്കി, തൊട്ടപ്പൻ, പതിനെട്ടാം പടി, ആകാശഗംഗ -2 കുട്ടിമാമ, ചിൽഡ്രൻസ് പാർക്ക്, എവിടെ, ആദ്യരാത്രി, പ്രണയമീനുകളുടെ കടൽ, പടട്ടാഭിരാമൻ, സത്യം പറഞ്ഞാൽ വിശ്വസിക്കുമോ, എടക്കാട് ബറ്റാലിയൻ, ലൂക്ക, മേരാം നാം ഷാജി, വലിയപെരുന്നാൾ, തൃശൂർപൂരം, അള്ള് രാമചന്ദ്രൻ തുടങ്ങിയ ഒരു പാട് ചിത്രങ്ങൾ മോശം ചിത്രങ്ങളുടെ നോമിനേഷനിൽ ഉണ്ട്. മലയാള സിനിമ കലാപരമായി ഒട്ടും മുന്നേറുന്നില്ല എന്നതിന്റെ സൂചകം തന്നെയാണ് ഇത്.

പ്രണവ് പാരമ്പര്യത്തിൽ അഭിരമിക്കരുത്

ഈ വർഷത്തെ മോശം നടനുള്ള പുരസ്‌ക്കാം പോവുന്നത് പ്രണവ് മോഹൻലാലിനാണ്. മോശം നടി പ്രിയവാര്യരും. മുത്തഛന് ആനപ്പുറത്തിരുന്നതിന്റെ തഴമ്പുണ്ടെങ്കിൽ കൊച്ചുമകന് അതുണ്ടാകില്ലെന്ന സാമന്യബോധം വേണ്ടത് പ്രണവ് മോഹൻലാലിന്റെ ആരാധകർക്കാണ്. ലാൽ എന്ന അതുല്യനടനോടുള്ള മലയാളികളുടെ നൊസ്റ്റാൾജിയ മുതലെടുക്കാൻ വേണ്ടിതന്നെയായിരുന്നു 'ഇരുപത്തിയൊന്നാം നൂറ്റാണ്ട്്' എന്നപേരിൽ അരുൺഗോപിയുടെ സംവിധാനത്തിൽ ചിത്രമൊരുക്കിയത്. ലാൽ ആരാധകരുടെ ഏറ്റവും പ്രിയപ്പെട്ട ചിത്രമായ ഇരുപതാം നൂറ്റാണ്ട് എന്ന പേരിനോട് സാമ്യമുള്ള പേരുതന്നെ തന്ത്രപുർവം ഇവർ എടുത്തതുതന്നെ ഈ ലാൽ കരിസ്മ ചൂഷണം ചെയ്യാൻ വേണ്ടിയാണ്. പക്ഷേ ചിത്രത്തിൽ പ്രണവിന്റെ പ്രകടനം നോക്കുക. ഇടിക്കട്ടകൊണ്ട് കുത്തിയാലും ഭാവം വരാത്ത രീതിയിലുള്ള നിർവികാരതയാണ് പലപ്പോളും ഈ നടന്റെ മുഖത്ത് കാണുന്നത്. അറുബോറായ ചിത്രം ബോക്സോഫീസിൽ എട്ടുനിലയിൽ അല്ല 14 നിലയിലാണ് പൊട്ടിയത്. ഒന്നു ചോദിക്കാട്ടെ, താരപുത്രൻ എന്ന പദവി ഒന്നുകൊണ്ട് മാത്രമല്ലേ, പ്രണവ്് പിടച്ചു നിൽക്കുന്നത്. ഓഡിഷനിൽ ഏതെങ്കിലും ഒരു യുവ നടൻ ഇങ്ങനെ പെരുമാറിയിരുന്നെങ്കിൽ, ഇവർ ഓടിച്ച് വിടുമായിരുന്നില്ലേ. ഭാവഭിനയത്തിൽ ഡയലോഗ് ഡെലിവറിയിൽ, എല്ലാം ആവറേജിന് താഴെയാണ് ഈ യുവനടൻ. ആക്ഷൻ രംഗങ്ങളിലെ ചടുലത മാത്രമാണ് ആശ്വാസം. ( നിങ്ങളുടെ ആക്ഷൻ എന്ത് എന്ന് നോക്കിയല്ല, മുഖത്ത് എന്തുവിരിയുന്നു എന്ന് നോക്കിയാണ്, നടനെ വിലയിരുത്തേണ്ടത്)

ആദ്യ ചിത്രമായ ജീത്തുജോസഫിന്റെ 'ആദി'യിലും ആരാധകർ തള്ളിമറിക്കുന്നപോലുള്ള ഒരു പ്രകടനം പ്രണവിന്റെ ഭാഗത്തുനിന്ന് ഉണ്ടായിരുന്നില്ല. പാരമ്പര്യത്തിൽ അള്ളിപ്പിടിച്ചിരിക്കാതെ സ്വന്തമായി ഒരു വ്യക്തിത്വം കണ്ടത്താനാണ് ഈ യുവ നടൻ ശ്രമിക്കേണ്ടത്. രാജഭരണക്കാലത്ത് മക്കൾക്ക് കിരീടവും ചെങ്കോലും കൈമാറുന്നപോലെ, താര പുത്രന്മാരുടെ മക്കൾക്കും ആരാധകക്കൂട്ടങ്ങളെ കൈമാറിക്കിട്ടുന്നത് ഇപ്പോഴും നടന്നുവരികയാണ്. ഫാൻസുകാരുടെ തള്ളലുകളെ അർഹിക്കുന്ന അവഞ്ജയോടെ തള്ളിക്കളണഞ്ഞ് സ്വന്തമായി ഒരു സ്റ്റെൽ ഉണ്ടാക്കാനാണ് പ്രണവ് ശ്രമിക്കേണ്ടത്. ഇതുകൊണ്ട് പ്രണവിനെ എഴുതി തള്ളേണ്ട കാര്യവുമില്ല. പണ്ട് ഫഹദിന്റെ കൈയെത്തും ദൂരത്ത് എന്ന ചിത്രത്തിൽ ഒരു അമൂൽബേബിയായി വന്ന ഫഹദ്ഫാസിലിനെ ഓർമ്മയില്ലേ. ആ അർബൻ കാമുകൻ, അങ്ങേയറ്റം പ്രഹരശേഷിയുള്ള ഒരു നടനെ മനസ്സിൽ ഒളിപ്പിച്ച അഗ്നി പർവതമായിരുന്നെന്നും, ഭാവിയിൽ മലയാള സിനിമ അടയാളപ്പെടുത്തുന്ന നടൻ ആവുമെന്ന് നമ്മളിൽ എത്രപേർക്ക് അറിയാമായിരുന്നു. അതായത് ഒന്നോ രണ്ടോ ചിത്രങ്ങൾകൊണ്ട് ഒരു നടനെയും വിലയിരുത്താൻ കഴിയില്ലെന്ന് ചരുക്കം. വിമർശനങ്ങളിൽ്നിന്ന് പാഠം പഠിച്ച് മുന്നേറാൻ പ്രണവിന് ആവട്ടെ.

കണ്ണിറക്കി കാട്ടി പറ്റിക്കുന്നപോലുള്ള ഒരു നടപടിയായിപ്പോയി, അഡാർ പബ്ലിസിറ്റിയുമായി ഇറങ്ങിയ അഡാർ ലൗവിലെ നായിക പ്രിയാവാര്യരുടെ പ്രകടനം. 'മാണിക്യ മലരായ പൂവി' എന്ന ഗാനത്തിലെ പുരികവളക്കൽ രംഗം ലോകവ്യാപകമായാണ് വൈറൽ ആയത്. പക്ഷേ ചിത്രം ഇറങ്ങിയപ്പോൾ, പ്രിയാവാര്യരുടെ പ്രകടനം അതി ദയനീയമായിരുന്നു. സ്ഥിരമായി ഒരു വളിപ്പ് ചിരി മുഖത്ത് ഒട്ടിച്ചുവെച്ചപോലെയാണ് ഈ നടിയുടെ മിക്ക രംഗങ്ങളും ഒമർലുലു ചിത്രീകരിച്ചത്. പുതുമുഖ നടിയേക്കാൾ ഈ വിഷയത്തിൽ വിമർശിക്കപ്പെടേണ്ടത്, മോശം രംഗങ്ങൾ ഒരുക്കിയ സംവധായകൻ തന്നെയാണ്. പക്ഷേ ഒരു നടി എന്ന നിലയിൽ തന്നെ സ്റ്റാമ്പ് പതിപ്പിക്കാൻ പ്രിയാ വാര്യർക്കും ആയില്ല. യുവ നടിയല്ലേ. ഇനിയും സമയമുണ്ട്്. വളർന്നുവരുമെന്ന് പ്രതീക്ഷിക്കാം.

ഇട്ടിമാണിയും കൽക്കിയും : കോപ്രായ ചിത്രങ്ങളിൽ നമ്പർവൺ

2019ലെ നൂറോളം മോശം ചിത്രങ്ങളിൽ നിന്ന് മോസ്റ്റ് ബോറായി തെരഞ്ഞെടുത്ത് മോഹൻലാലിന്റെ ഇട്ടിമാണി, ടൊവീനോയുടെ കൽക്കി എന്നീ ചിത്രങ്ങളാണ്.മോഹൻലാൽ എന്ന അതുല്യ നടനെവെച്ചുള്ള ഒന്നാന്തരം കോപ്രായമായിരുന്നു ഇട്ടിമാണി മെയിഡ് ഇൻ ചൈന. ലാലിനെപ്പോലൊരു നടനെ എങ്ങനെയെല്ലാം ഉപയോഗിക്കാം. പക്ഷേ ഒരു കഥയുമില്ലാതെ സമാന്യബുദ്ധിയെ വക്രീകരിച്ചുകൊണ്ടിറക്കി ഇട്ടിമാണി ബോക്സോഫീസിലും വൻ ദുരന്തമായി. അയൽവാസിയായ വയോധികയെ വിവാഹം കഴിക്കുന്ന ലാൽ കഥാപാത്രത്തിന്റെ ആദ്യരാത്രിയും ഒക്കെ കണ്ടാൽ ഓക്കാനം വരും.മോഹൻലാലിന്റെ കൂടെ തിന്ന് കൊഴുത്തിരിക്കുന്ന വലിയയൊരു വിഭാഗം ഉണ്ടല്ലോ. തിരക്കഥ പരിശോധിക്കാനും കഥ തിരുത്താനും ഒക്കെയായി. ഈ ടീമുകളൊക്കെ ഈ പടത്തിന്റെ കഥ ഒന്ന് ശ്രദ്ധിച്ചിരുന്നെങ്കിൽ എത്ര നന്നായിരുന്നു. പുതുമുഖങ്ങളായ ജിബിയും ജോജുവും കഥയും തിരക്കഥയും എഴുതി സംവിധാനം ചെയ്ത ഈ ആന്റണി പെരുമ്പാവൂർ ചിത്രം നിങ്ങൾക്ക് ആസ്വദിക്കണമെങ്കിൽ മസ്തിഷ്‌കത്തിൽ യുക്തിയുടെയും സാമാന്യബോധത്തിന്റെയും ഫാക്കൽട്ടികളെ നിയന്ത്രിക്കുന്ന ഫ്രണ്ടൽ കോർട്ടക്‌സിന്റെ ഒരു ഭാഗം എടുത്തുകളയേണ്ടി വരും. തലച്ചോറെടുത്ത് തുരന്ന് മുത്തൂറ്റ് ബാങ്കിൽ പണയം വെച്ചവർക്കേ ഈ പടം കണ്ടുതീർക്കാൻ കഴിയൂ.

ഈ ചിത്രത്തിലെ ചില ഉദാഹരണങ്ങൾ നോക്കുക. കാർ ഒന്നും ഉപയോഗിക്കാതെ ഈ പടത്തിലെ നായകൻ ആംബുലൻസിലാണ് യാത്രചെയ്യുക എന്ന് മാത്രമല്ല അയാൾ പെണ്ണുകാണാൻ പോകുന്നതുപോലും ആംബുലൻസിലാണ്.സ്വന്തം അമ്മയുടെ ഓപ്പറേഷന് കെട്ടിയ പണത്തിൽ നിന്ന് ആശുപത്രിക്കാരിൽ നിന്ന് കമ്മീഷൻ വാങ്ങുന്ന നായകൻ, സ്വന്തം വിവാഹത്തിന് കിട്ടുന്ന ബ്രോക്കറേജിൽനിന്നും കമ്മീഷൻ ആവശ്യപ്പെടുന്നു! മരണവീട്ടിൽ ഉച്ചത്തിൽ ടിവിവെക്കുക, കോഴിയെ കെട്ടിത്തൂക്കി വെടിവെച്ചുകൊല്ലുക തുടങ്ങിയ കലാപരിപാടികൾ ചിത്രത്തിൽ വേറെയുമുണ്ട്. ബാക്കിയുള്ളവ പറയുന്നില്ല. എല്ലാം വെറെററ്റി കോമഡികൾ തന്നെ. ഒരു കോമഡി ഫലിക്കുക അത് സന്ദർഭത്തിന് യോജിക്കുമ്പോഴാണെന്ന പ്രാഥമിക പാഠം ഈ പടത്തിന്റെ സംവിധായകർ മറന്നുപോയി. ഇത്തരം അസംബന്ധ രംഗങ്ങളാണ് ചിത്രത്തിൽ ഏറെയും. വേണെങ്കിൽ ഒരു അസംബന്ധ കോമഡിക്കഥ എന്ന് ടൈറ്റിലും കൊടുക്കാമായിരുന്നു. കഷ്ടം തന്നെയാണ് മലയാള സിനിമയുടെ പ്രതിഭാ ദാരിദ്ര്യം. നെഞ്ചുവിരിച്ച് ലാലേട്ടൻ എന്ന് ആർത്തുവിളിച്ച് തീ്യേറ്റിറിൽ കയറിയ പാവങ്ങൾ ഇറങ്ങിപ്പോവുന്നത് ഒന്ന് കാണേണ്ടതാണ്.

തുടർച്ചയായ വിജയങ്ങളിലൂടെ കത്തിക്കയറി വരികയായിരുന്ന യുവതാരം ടൊവീനോ തോമസ് 2019ൽ ഏറ്റവും പ്രതീക്ഷ അർപ്പിച്ചിരുന്ന ചിത്രമായിരുന്നു കൽക്കി. തമിഴിലെ സൂര്യ മൂവികളിലൂടെ ആക്ഷൻ ഹീറോ ആകാനുള്ള ടൊവീനോയുടെ ശ്രമം പക്ഷേ അടപടലം പാളി. അത്തരം കത്തികൾ തമിഴിലും തെലുങ്കിലുമായാൽ കാണും. മലയാളത്തിലയാൽ ട്രോളും. ഈ ടിപ്പിക്കൽ മല്ലു സൈക്കോളജി പക്ഷേ ടൊവീനോക്ക് പിടികിട്ടിയില്ല. പ്രവീൺ പ്രഭരം, സുജിൻ സുജാതൻ എന്നിവർ രചന ഒരുക്കി. പ്രവീൺ പ്രഭരം സംവിധാനം ചെയ്യുന്ന ചിത്രം ആക്ഷൻ ത്രില്ലർ എന്നപേരിൽ പ്രേക്ഷകന് നൽകിയത് പെരും കത്തിയാണ്. സൂര്യ' പ്രധാനവേഷത്തിലെത്തിയ 'സിങ്കം' സിനിമ പോലെ ശുദ്ധികലശവുമായി എത്തുന്ന ഇൻസ്‌പെക്ടർ റോളിലാണ് ടൊവീനോ. മറ്റൊർഥത്തിൽ സിങ്കത്തിന്റെ കോപ്പിയാണ് ഈ ചിത്രം. ആരാധകന് കൈയടിക്കാൻ വകയുള്ള പൊലീസ് കഥാപാത്രം. കോരിത്തരിപ്പിക്കുന്ന മാസ് ഡയലോഗ്-അങ്ങനെയാണ് നായകന്റെ കടന്നുവരവ്. ഇത്തരം കത്തികളൊന്നും മലയാളികൾ അംഗീകരിച്ചു തരില്ല എന്ന സമാന്യബോധംപോലും ടൊവീനോക്ക് ഇല്ലാതെ പോയി. മലയാള സിനിമയെ തമിഴ് പാണ്ടിപ്പടം പോലാക്കാനുള്ള ഒരു ട്രൻഡ് ഈ പടം വിജയിച്ചാൽ ഉണ്ടാകുമായിരുന്നു. അതുകൂടിവച്ചാണ് ഈ അവാർഡ് നൽകുന്നത്.

എന്തുകൊണ്ട് വിനയനും ജെനീസും മോശം സംവിധായകരാവുന്നു?

ലോകത്തിൽ ആദ്യമായിട്ടാണ് ഒരു ഹൊറർ മൂവി കണ്ട് ചിരിച്ചുപോകുന്നതത്. അതായിരുന്നു വിനയൻ സംവിധാനം ചെയ്ത ആകാശഗംഗ-2. അതുകൊണ്ടുതന്നെയാണ് വിനയൻ ഈ വർഷത്തെ മോശം സംവിധായകരിൽ ഒരാൾ ആകുന്നത്. മലയാളത്തിൽ നാളിതുവരെ ഇല്ലാത്ത ഒരു അവസവരം ആയിരുന്നു ജെനീസ് മുഹമ്മദ് എന്ന സംവിധായകൻ കിട്ടയത്. അതായിരുന്നു 9 എന്ന സയൻസ് ഫിക്ഷൻ. പക്ഷേ അത് ഒരു അഴുകിയ പടമാക്കി നശിപ്പിച്ചു കളഞ്ഞു.

വെള്ള സാരിയുടുത്ത് പാട്ട് പാടി നടക്കുന്ന പ്രേതം, ഹോളിവുഡ് സിനിമയിൽ നിന്ന് കടമെടുത്ത പോലുള്ള മറ്റ് പ്രേതങ്ങൾ! പഴകി മടുത്ത കഥയെ വീണ്ടും വിനയൻ ആവർത്തിക്കുമ്പോൾ ഇത് മലയാളം കണ്ട മോശം ഹൊറർ ചിത്രങ്ങളിൽ ഒന്നാവുകയായിരുന്നു.20 വർഷങ്ങൾക്ക് ശേഷം മാണിക്കശേരി കോവിലകത്തേയ്ക്ക് ഗംഗയെന്ന ദുരാത്മാവിനെ തിരികെ കൊണ്ടുവന്ന് പ്രേക്ഷകരെ ഭയത്തിന്റെയും ആകാംക്ഷയുടെയും മുൾമുനയിൽ നിർത്തും എന്നായിരുന്നു സംവിധായൻ അവകാശപ്പെട്ടത്. എന്നാൽ സിനിമ കണ്ട പ്രേക്ഷകർ ഗംഗയെ കണ്ട് പേടിച്ചോ എന്ന് ചോദിച്ചാൽ സംശമാണ്. സിനിമ തുടങ്ങുന്നത് തന്നെ പുതുമഴയായ് വന്നു നീ എന്ന ഗാനത്തോടെയാണ്. ഗാനത്തോടൊപ്പം തന്നെ ഒന്നാം ഭാഗത്തിലെ ഏറെ കുറെ പ്രധാന ഭാഗങ്ങൾ ഗ്രാഫിക്‌സിലൂടെ കാണിക്കുന്നുണ്ട്.

ഇതെല്ലാം രണ്ടാം ഭാഗം കാണാൻ പ്രേക്ഷകനിൽ താൽപര്യം ജനിപ്പിക്കുന്നു. എന്നാൽ സിനിമ ആരംഭിച്ച് ഇന്റെർവൽ ആവുന്നതിന് മുമ്പ് തന്നെ പ്രേക്ഷകനിൽ നിരാശ ഉണ്ടാക്കുകയാണ് ചിത്രം. ഇരുപത് വർഷങ്ങൾക്ക് മുമ്പുള്ള സിനിമയുടെ ഒന്നാം ഭാഗത്തിന്റെ അതേ പാറ്റേൺ അല്ലെങ്കിൽ ഏറെ കുറെ അതിനോട് അടുത്ത് നിൽക്കുന്ന രീതിയിൽ രണ്ടാം ഭാഗവും ചെയ്യാൻ ശ്രമിച്ചതിലെ പൊരുത്തക്കേടുകൾ സിനിമ മുന്നോട്ട് പോകുന്തോറും പല ഭാഗങ്ങളിലും കാണാം. വെള്ള സാരിയുടുത്ത് പാട്ട് പാടി നടക്കുന്ന പ്രേതം. ഹോളിവുഡ് സിനിമയിൽ നിന്ന് കടമെടുത്ത പോലുള്ള മറ്റ് പ്രേതങ്ങൾ... ഇതെല്ലാം ഈ കാലത്ത് എത്രത്തോളം സക്‌സസ് ആവുമെന്ന് ചിന്തിക്കാവുന്നതേയുള്ളു. എന്നാൽ ഗ്രാഫിക്‌സിന്റെ സഹായത്തോടെ മൺമറഞ്ഞ് പോയ മയൂരിയെ അതായത് ആകാശഗംഗയിലെ യഥാർത്ഥ ദുരാത്മാവിനെ വീണ്ടും വെള്ളിത്തിരയിൽ കൊണ്ടുവന്നത് മികച്ച് നിൽക്കുന്നു. എങ്കിൽ പോലും മറ്റ് പേടിപ്പെടുത്തുന്ന രംഗങ്ങൾ ഒന്നും പ്രേക്ഷകനിൽ ഭയം സൃഷ്ടിച്ചില്ല.

വൻ പ്രതീക്ഷകളോടെ വന്ന ചിത്രമായിരുന്നു പ്രഥ്വീരാജ് നായകനായ 9. മലയാളത്തിൽ ഹോളിവുഡ്ഡ് നിലവാരത്തിലുള്ള സയൻസ് ഫിക്ഷൻ എന്നൊക്കെ പറഞ്ഞിട്ട് വെറും കിളിപോയ ചിത്രമാണ് എടുത്തൂവെച്ചത്. ഹൊറർ, സൈക്കോളജിക്കൽ, സയൻസ് ഫിക്ഷൻ, ത്രില്ലർ എന്നിവയെല്ലാം കൂടിക്കൂഴഞ്ഞത് ചിത്രത്തിന്റെ അസാധാരണമായ പ്രമേയത്തിന് തിരിച്ചടിയായി. .ഒരു സുപ്രഭാതത്തിൽ ലോകത്തിൽ വൈദ്യുതി ഇല്ലാതായാൽ, മൊബൈലും ഇന്റർനെറ്റും വാട്സാപ്പും ഒന്നും പ്രവർത്തിക്കാതായാൽ, മോട്ടോർ വാഹനങ്ങൾ അടക്കം സ്റ്റാർട്ട് ചെയ്യാൻപോലും കഴിയാതിരുന്നാൽ..... ശരിക്കും ഒരു ഹോളിവുഡ്ഡ് സയൻസ് ഫിക്ഷനുള്ള എല്ലാ ചേരുവയുമായിട്ടാണ്, നമ്മുടെ പ്രിയതാരം പ്രഥ്വീരാജിന്റെ പുതിയ ചിത്രമായ '9' തുടങ്ങുന്നത്. 'ഈ ലോകത്തിനുമപ്പുറം' എന്ന ടാഗും സൂപ്പർ പെർഫക്ഷനുള്ള ട്രയിലറും ടീസറും ഉയർത്തിയ വമ്പൻ പ്രതീക്ഷകൾ സാധൂകരിക്കുന്ന രീതിയിലാണ്, പ്രശസ്ത സംവിധായകൻ കമലിന്റെ മകൻ ജെനീസ് മുഹമ്മദ് തിരക്കഥയെഴുതി സംവിധാനം ചെയ്ത 9തിന്റെ ആദ്യത്തെ ഇരുപതുമിനുട്ട്.

അസാധാരണമാംവിധം വലിപ്പമുള്ള ഒരു ഉൽക്ക ഭൂമിയെ തൊട്ടുകൊണ്ട് കടന്നുപോവുന്ന ദിവസത്തിലേക്ക് എത്തുകയാണ് ലോകം. അതിന്റെ കാന്തികവലയത്തിൽപെട്ട് ഭൂമിയിലെ എല്ലാ വൈദ്യുത കാന്തിക ഉപകരങ്ങളും നിശ്ചലമാവും. ഉൽക്ക കടന്നുപോവാൻ 9 ദിവസം നീണ്ടു നിൽക്കും. ഈ ദിനങ്ങൾ ലോകം കഴിച്ചുകൂട്ടേണ്ടത് ശരിക്കും പത്തൊമ്പതാം നൂറ്റാണ്ടിന്റെ തുടക്കത്തിലെ മനുഷ്യനെപ്പോലെ ആയിരിക്കണം. അതായത് വൈദ്യുതിയില്ല, കാറില്ല, ബസ്സില്ല, നെറ്റില്ല അങ്ങനെ. ഈ വിചിത്രമായ ഒമ്പത് ദിവസത്തെ കഥയാണ് ചിത്രം പറയുന്നത്. പക്ഷേ ആ പ്രമേയം കഥയുടെ കാമ്പില്ലായ്മയാൽ മൊത്തം കുളം ആവുകയാണ്. ഇതിൽ ഒരു കുടുംബ കഥയൊകെ കേറ്റിയതോടെ കഥ ആകെ ട്രാക്കുമാറി. നല്ല പ്രമേയമായിരുന്നു പക്ഷേ സിനിമ മോശം. അതാണ് 9 ന്റെ അവസ്ഥ. ഓപ്പറേഷൻ സക്സ്സ് പക്ഷേ രോഗി മരിച്ചു എന്ന് പറഞ്ഞപോലെ.

മറ്റ് പുരസ്‌ക്കാരങ്ങൾ ഇങ്ങനെ:

മോശം കഥക്ക് ഒരു അവാർഡ് കൊടുക്കയാണെങ്കിൽ അത് പോവുക, ഇരുപത്തിയൊന്നാം നൂറ്റാണ്ടിന്റെ കഥ എഴുതിയ അരുൺ ഗോപിക്ക് തന്നെയായിരിക്കും. ഒരു പുതുമയും ഇല്ലാത്ത 19ാം നൂറ്റാണ്ടിലെ കഥയാണിത്. മോശം തിരക്കഥക്കുള്ള അവാർഡ് കഥ കുളമാക്കിയ തൊട്ടപ്പൻ എന്ന വിനായകൻ ചിത്രത്തിനാണ്. കാരണം ഫ്രാൻസിസ് നൊറോണയുടെ ഒന്നാം തരം കഥയായിരുന്നു 'തൊട്ടപ്പന്' ആധാരമാക്കിയത്. എന്നാൽ സംവിധായകൻ ഷാനവാസ് ബാവക്കുട്ടിയും തിരക്കഥാകൃത്ത് പി എസ് റഫീക്കും അത് കുളമാക്കി. അതുകൊണ്ട് തന്നെ മോശം തിരക്കഥക്കുള്ള അവാർഡ് പി എസ് റഫീക്കിന് ഇരിക്കട്ടെ.

ചവറുകളുടെ ബാഹുല്യം കാരണം ഗാനരചന, സംഗീത സംവിധാനം എന്നീ മേഖലകളിൽ ആർക്കും അവാർഡ് കൊടുക്കുന്നില്ല. കാരണം എല്ലാം ഒന്നിനൊന്ന് മോശം. പ്രശസ്ത ഗാന നിരൂപകൻ ടി പി ശാസ്തമംഗലം ചൂണ്ടിക്കാട്ടുന്നത് നോക്കുക.- ജാക്ക് ആൻഡ് ഡാനിയേൽ എന്ന സിനിമയലെ ഒരു പാട്ടുനോക്കുക.

'ഈ വഴിയൊഴുകിവരും

തണുതണുത്ത കാറ്റിലെ മലർമണമോ

പാതിര കടന്നുവരും

പുലരിയുടെ ചോലെഴുമരുണിമയോ

അറിയാതെന്നിൽ ചേക്കേറുമാരാണു നീ'-

ഷാൻ റഹ്മാന്റെ കുത്തിക്കുറിക്കലിനുസരിച്ച് ഗോപീസുന്ദർ ചിട്ടപ്പെടുത്തിയ ഈ ഗാനമൊക്കെ ഭൂലോക ദുരന്തമാണെന്ന് ടി പി ശാസ്ത മംഗലം ചൂണ്ടിക്കാട്ടുന്നു. എന്താണ് ഈ പാട്ടിന്റെ വരികളുടെ അർഥം. ഒരേ അച്ചിൽ വാർത്ത സംഗീതം.

വെറുപ്പിക്കലിനുള്ള സമഗ്രപുരസ്‌ക്കാരം ജയറാമിന്

ഒരുകാലത്ത് മലയാളത്തിലെ ഹിറ്റ്മേക്കറായിരുന്ന ജയറാമിന് മോസ്റ്റ് വെറുപ്പിക്കൽ അവാർഡ് കൊടുക്കന്നതിന് ഈ ലേഖകനും വിഷമമുണ്ട്. പക്ഷേ കാര്യങ്ങൾ അങ്ങനെയാണ്. ലോനപ്പന്റെ മാമോദീസ, ദ ഗ്രേറ്റ് ഗ്രാൻഡ്ഫാദർ, മാർക്കോണി മത്തായി, പട്ടാഭിരാമൻ. 2019ൽ ജയറാം നായകനായ ചിത്രങ്ങളാണിത്. എല്ലാം ഒന്നിനൊന്ന് ബോർ. ഇതിൽ കണ്ണൻ താമരക്കുളം സംവിധാനം ചെയ്ത പട്ടാഭിരാമനാണ് അൽപ്പം പിടിച്ചു നിന്നത്. അതും അവസാനം ആകുമ്പോഴേക്കും വെറുപ്പിച്ച് കൈയിൽ തരും. എന്തിനാണ് യാതൊരു കഥയും കഴമ്പുമില്ലാത്ത ചിത്രങ്ങളിൽ, ജയറാം തലവെച്ചുകൊടുക്കുന്നതെന്ന് എന്ന് മനസ്സിലാവുന്നില്ല.

കഴിഞ്ഞ കുറേക്കാലമായി ജയറാം സിനിമകളുടെ അവസ്ഥ ഇതുതന്നെയാണ്. ഒരു ഹിറ്റ് ചിത്രം നാം കണ്ടിട്ട് എത്രകാലമായി. കുഞ്ചാക്കോ ബോബൻ, ജയസുര്യ തുടങ്ങിയ നടന്മാരെല്ലാം തിരിച്ചടികൾ വന്നുതുടങ്ങുമ്പോൾ സെലക്റ്റീവ് ആയി മാറി നിൽക്കാറുണ്ട്്. എന്നാൽ ജയാറം മാത്രം തുടർച്ചയായി ചിത്രം കമ്മിറ്റ് ചെയ്ത് പ്രേക്ഷകരെ വെറുപ്പിച്ചുകൊല്ലുന്നു. വിനാശകാലേ വിപരീത ബുദ്ധി അല്ലാതെന്ത് പറയാൻ?