• ഹോം
• വാർത്ത
• എക്സ്ക്ലൂസീവ്

കൊച്ചി: അവഗണന, ആട്ടിപ്പായിക്കൽ എന്നായി കൊറോണ കേരളത്തിൽ കൊറോണ മാറുകയാണോ? കൊറോണ ബാധിതരല്ലാത്ത ഒട്ടനവധി കുടുംബങ്ങൾ ഇപ്പോൾ കേരളത്തിൽ ഐസലേഷനിൽ തുടരുകയാണ്. ഹൗസ് ക്വാറന്റൈൻ വിധിക്കപ്പെട്ടവർക്ക് ഈ രീതി ഭീതിപ്പെടുത്തുന്ന അനുഭവമായി മാറുകയാണ്. മനുഷ്യത്വത്തെ ഹനിക്കുന്ന രീതികൾ ഹൗസ് ക്വാറന്റൈനിൽ തുടരുന്നവരോട് കേരളവും അനുവർത്തിച്ചു തുടങ്ങിയതോടെയാണ് ഹൗസ് ക്വാറന്റൈൻ ഭീതിദമായ അനുഭവമാകുന്നത്. ഇവരൊന്നും കൊറോണ ബാധിതരല്ല. രോഗവാഹകരുമല്ല. ജാഗ്രതയുടെ ഭാഗമായി സ്വയം വീട്ടിലെ റൂമുകളിൽ തുടരുന്നവരാണ്. കൊറോണ ബാധിതരോട് എടുക്കുന്ന സമീപനം ഹൗസ് ക്വാറന്റൈനിൽ തുടർന്നവരോട് സ്വീകരിക്കേണ്ടതുണ്ടോ എന്നാണ് ചോദ്യം ഉയരുന്നത്. ഹൗസ് ക്വാറന്റൈൻ ഭീതിദമായ അനുഭവമായി മാറിയതോടെയാണ് ഈ ചോദ്യം ഇപ്പോൾ കേരളത്തിനു മുന്നിൽ മുഴങ്ങുന്നത്.

വിദേശങ്ങളിൽ പോയി അല്ലെങ്കിൽ വിദേശത്ത് നിന്ന് വന്നവരുമായി സംസർഗം വെച്ചു എന്നതുകൊണ്ട് മാത്രം ഹൗസ് ക്വാറന്റൈനിൽ തുടരുന്നവർക്ക് സാമൂഹികമായ ഒരു വിലക്ക് കേരളത്തിൽ നിലവിൽ വന്നിരിക്കുകയാണ്. ഈ സാമൂഹ്യവിലക്ക് പലർക്കും ചുട്ടുപൊള്ളുന്ന അനുഭവവുമായി മാറുകയുമാണ്. കൊച്ചിയിലെ ടീജോ പറയുന്നത് ഇതേ വിലക്കിന്റെ ചുട്ടു പൊള്ളിക്കുന്ന കഥനങ്ങളാണ്. ക്വാറന്റൈൻ ഭീതിപ്പെടുത്തുന്ന അനുഭവമാണ് എന്നാണ് ടീജോ മറുനാടനോട് പറഞ്ഞത്. ചുറ്റുപാട് നിന്നും വരുന്ന സാമൂഹിക വിലക്കാണ് പ്രശ്‌നം. ഒരാൾ പോലും തിരിഞ്ഞു നോക്കാനില്ല. കഴിക്കാൻ ഭക്ഷണം പോലുമില്ല. ഫെയ്‌സ് ബുക്ക് വഴി ലൈവ് വീഡിയോ ഇട്ടതോടെയാണ് പ്രശ്‌നം അറിഞ്ഞു ബന്ധുക്കളും സുഹൃത്തുക്കളും സഹായിക്കാൻ എത്തുന്നത്.

സാമൂഹിക വിലക്കാണ് നേരിടേണ്ടി വരുന്നത് എന്നാണ് ടോജോ പറയുന്നത്. സോഷ്യൽ ഡിസ്റ്റൻസിങ് ആണ് വേണ്ടത്. പക്ഷെ വരുന്നത് സാമൂഹിക ഉപരോധമാണ്. ഒരാളും തങ്ങളുമായി സമ്പർക്കത്തിനു വന്നില്ല. ഫോണിൽ പോലും ബന്ധപ്പെടാൻ എല്ലാവരും മടിച്ചു. സുഹൃത്തുക്കളും ബന്ധുക്കളുമില്ലാത്ത അവസ്ഥയിൽ പെട്ടതുപോലെയായി. കത്ത് ഡെലിവറി ചെയ്യാൻ എത്തിയ പോസ്റ്റ്മാൻ പോലും വീട്ടിൽ വന്നില്ല. തൊട്ടടുത്ത വീട്ടിൽ കത്തുകൊടുത്ത് പോവുകയാണ് ചെയ്തത്. ഫെയ്‌സ് ബുക്കിൽ വീഡിയോ പോസ്റ്റ് ചെയ്തപ്പോഴാണ് കാര്യങ്ങൾ സുഹൃത്തുക്കൾ പോലും അറിയുന്നത്. ഇതോടെയാണ് ഭക്ഷണ സാധനങ്ങൾ വീട്ടിൽ എത്തിയത്. ഞങ്ങൾ എങ്ങനെ കഴിയുന്നു എന്ന് പോലും ആരും അന്വേഷിച്ചില്ല.

കുട്ടിക്ക് നൽകാനുള്ള വാക്‌സിനേഷൻ പോലും എടുക്കാൻ കഴിഞ്ഞില്ല. ആശുപത്രിയിലേക്ക് പോകുന്നത് റിസ്‌ക് ആണ് എന്നാണ് എല്ലാവരും പറഞ്ഞത്. ഇതോടെ വാക്‌സിനും തത്ക്കാലം നീട്ടിവെച്ചു. കൊറോണ പോസിറ്റീവ് ആണെങ്കിൽ ഈ വിലക്ക് അനുഭവിക്കാം എന്നാണ് ടോജോ പറയുന്നത്. തങ്ങൾക്ക് കൊറോണ ലക്ഷണങ്ങൾ ഇല്ല. ഭാര്യ ഇറ്റലിയിൽ നിന്നും വന്നത് കാരണം തങ്ങൾ സോഷ്യൽ ഡിസ്റ്റൻസിങ് പാലിക്കുകയാണ് ചെയ്യുന്നത്. പക്ഷെ ക്വാറന്റൈൻ എന്നത് വലിയ പ്രശ്‌നമായി അയൽക്കാർ എടുത്തു. തങ്ങൾ സർക്കാരിനെ അറിയിക്കാതെ ഒളിച്ചു താമസിക്കുകയാണ് എന്ന രീതിയിൽ ഏതോ ഓൺലൈൻ പത്രം റിപ്പോർട്ട് ചെയ്യുകയും ചെയ്തു. ഇതോടെ അയൽക്കാർക്ക് കൂടി ഭീതി കൂടി.

ഞങ്ങൾ ആരോഗ്യവകുപ്പിൽ റിപ്പോർട്ട് ചെയ്തിരുന്നു. കൊറോണ ലക്ഷങ്ങൾ ഇല്ലാതിരുന്നതിനാൽ ഹൗസ് ക്വാറന്റൈനിൽ തുടരാനാണ് ആവശ്യപ്പെട്ടത്. ഈ ഹൗസ് ക്വാറന്റൈൻ കാലാവധിയിലാണ് ഇപ്പോൾ തുടരുന്നത്. പക്ഷെ ഞങ്ങൾ കൊറോണ ബാധിതർ എന്ന രീതിയിലാണ് സമൂഹം വീക്ഷിച്ചത്. ഇപ്പോൾ പതിനാലു ദിവസമായി. അതായത് ക്വാറന്റൈൻ കാലാവധിയായ ഇരുപത്തിയെട്ട് ദിവസങ്ങളിൽ പതിനാലു ദിവസം കഴിഞ്ഞു. ഈ പതിനാലു ദിവസങ്ങളിൽ കൊറോണയുണ്ടെങ്കിൽ ലക്ഷണങ്ങൾ കാണിക്കണമായിരുന്നു. ഞങ്ങൾക്ക് കൊറോണ ലക്ഷണങ്ങൾ ഇല്ല. പക്ഷെ ഇറ്റലിയിൽ നിന്നുമാണ് ഭാര്യയും കുട്ടിയും എത്തിയതിനാൽ ഇരുപത്തിയെട്ട് ദിവസം തന്നെ ക്വാറന്റൈനിൽ തുടരാൻ ആവശ്യപ്പെട്ടിട്ടുണ്ട്.

ടീജോ ഇറ്റലിയിൽ പോയിട്ടില്ല. ഗർഭിണിയായപ്പോഴാണ് ഭാര്യ ഇറ്റലിയിലേക്ക് പോയത്.  നവജാത ശിശുവുമായാണ് ഭാര്യ ഇറ്റലിയിൽ നിന്നും വന്നത്. ഇക്കണോമിക്‌സ് പഠിക്കാൻ ഭാര്യ തിരഞ്ഞെടുത്തത് ഇറ്റലിയായിരുന്നു. പ്രസവത്തിനു കേരളത്തിൽ നിന്നും ആർക്കും പോകാൻ കഴിഞ്ഞില്ല. ഭാര്യ മാത്രമാണ് പ്രസവ സമയത്ത് ഇറ്റലിയിൽ ഉണ്ടായത്. പ്രസവം കഴിഞ്ഞു രണ്ടാം ദിവസം തന്നെ കാർ വിളിച്ച് ഭാര്യയ്ക്ക് കുട്ടിയുടെ ജനന സർട്ടിഫിക്കറ്റിനായി ഒറ്റയ്ക്ക് പോകേണ്ടി വന്നു. ഇത്തരം ഒട്ടനവധി അഗ്‌നിപരീക്ഷകൾ കഴിഞ്ഞാണ് ഭാര്യ മാർച്ച് എട്ടിന് ഒറ്റയ്ക്ക് കുഞ്ഞുമായി നെടുമ്പാശ്ശേരി വിമാനത്താവളത്തിൽ വന്നിറങ്ങിയതാണ് ടീജോവിന്റെ ഭാര്യ. കൊറോണ സമയമായതിനാൽ തിരുവനന്തപുരത്ത് വിളിച്ചു, പക്ഷെ കൊച്ചിയിൽ തന്നെ വിളിക്കാനാണ് പറഞ്ഞത്. അതിനാൽ കൊച്ചിയിലെ ആരോഗ്യവിഭാഗത്തെ അറിയിച്ചു. അവരുടെ നിർദ്ദേശം അനുസരിച്ചാണ് ക്വാറന്റൈനിൽ തുടരുന്നത്. ഞാനും ഭാര്യയും കുട്ടിയും എന്റെ അച്ഛനും അമ്മയുമാണ് കൊച്ചിയിലെ വീട്ടിലുള്ളത്. ആർക്കും കൊറോണയില്ല.

പക്ഷെ ഹൗസ് ക്വാറന്റൈൻ മാത്രം. അധികൃതരുടെ അനുവാദത്തോടെയാണ് ഹൗസ് ക്വാറന്റൈൻ നടത്തിയത്. പക്ഷെ ഒളിച്ചു താമസിക്കുന്നു എന്ന മട്ടിൽ ഒരു ഓൺലൈൻ വാർത്ത വന്നതോടെ അയൽക്കാർ ഉൾപ്പെടെയുള്ളവർ പരിഭ്രാന്തിയിലായി. നിരവധി കോളുകൾ ഞങ്ങളെ തേടിയെത്തി. ഞങ്ങൾക്ക് ഒളിച്ചു കഴിയേണ്ട ആവശ്യമെന്ത്? പൊലീസ് സ്റ്റേഷൻ, പഞ്ചായത്ത് മെമ്പർ, പഞ്ചായത്തിലെ വിവിധ വിഭാഗങ്ങൾ എല്ലാം വിളിച്ചു. എല്ലാവരെയും ഞങ്ങൾക്ക് ബോധ്യപ്പെടുത്തെണ്ടി വന്നു. ഞങ്ങൾ ആരോഗ്യവകുപ്പിൽ നിന്നുള്ള നിർദ്ദേശം അനുസരിച്ചാണ് ക്വാറന്റൈനിൽ തുടരുന്നതെന്ന്. വാർത്തയിൽ പറഞ്ഞത് ഞങ്ങൾ മൂന്നംഗ കുടുംബം എന്നാണ്. എന്നാൽ ഞാൻ ഇറ്റലിയിൽ പോയിട്ടില്ല. എനിക്ക് വിസ കിട്ടിയിരുന്നില്ല. പക്ഷെ ഇതൊന്നും അന്വേഷിക്കാതെയാണ് ഞാനും ഇറ്റലിയിൽ നിന്നും വന്നു എന്ന പ്രചാരണം വന്നത്.

കൊച്ചിയിൽ ഇൻഫോ പാർക്കിലാണ് എനിക്ക് ജോലി. എനിക്ക് വർക്ക് ഫ്രം ഹോം അനുവദിക്കപ്പെട്ടിട്ടുണ്ട്. അതിനാൽ വീട്ടിൽ നിന്നും ഞാൻ ജോലി ചെയ്യുകയാണ്. പക്ഷെ എന്റെ ഓഫീസിലെ പലർക്കും ജോലി ചെയ്യാൻ പറ്റാത്ത അവസ്ഥയാണ്. ഇൻഫോ പാർക്ക് അടച്ചിടാൻ സാധ്യതയും വന്നിട്ടുണ്ട്. എല്ലാവരും വർക്ക് ഫ്രം ഹോം ആയി മാറുകയാണ്. പക്ഷെ ജോലി നിർത്തിവയ്ക്കപ്പെട്ടാൽ ശമ്പളവും മുടങ്ങാൻ സാധ്യതയുണ്ട്. എല്ലാം കൊണ്ടും കൊറോണ ജീവിതം തകർത്ത അവസ്ഥയാണ്. ഇതേ സമയത്ത് തന്നെയാണ് ഞങ്ങൾക്ക് സാമൂഹികമായ ഉപരോധവും വന്നുപെട്ടത്-ടീജോ പറയുന്നു.

റ്റലിയിൽ കൊറോണ പടരുന്ന സമയത്ത് മാർച്ച് എട്ടിനാണ് ഖത്തർ എയർവെയ്‌സ് വിമാനത്തിൽ ഭാര്യ കുഞ്ഞുമായി എത്തുന്നത്. ആരോഗ്യവകുപ്പിന്റെ നിർദ്ദേശപ്രകാരം ക്വാറന്റൈൻ തുടരുകയും ചെയ്തു. ഇതിനു ശേഷം വന്ന സാമൂഹിക ഉപരോധത്തെക്കുറിച്ചാണ് ടീജോ പറയുന്നത്. കൊറോണ ബാധിതരല്ലെങ്കിലും ഹൗസ് ക്വാറന്റൈനിൽ തുടരുന്ന പലരുടെയും അനുഭവമാണ് ടീജോ പറയുന്നത്. ഇതായിരുന്നില്ല കേരളം. പക്ഷെ കൊറോണ കേരളത്തെ എങ്ങനെ മാറ്റിമറിച്ചു എന്നാണ് ടീജോവിന്റെ അനുഭവസാക്ഷ്യം പറയുന്നത്. ഒറ്റയടിക്ക് സമൂഹം അപ്പാടെ തള്ളിക്കളയുകയാണ്. വീട്ടിൽ ആരുമായും സമ്പർക്കമില്ലാതെ തുടരുമ്പോൾ ക്വാറന്റൈനിലുള്ളവർ എങ്ങനെ കഴിയുന്നു എന്ന് പോലും സമൂഹം ചിന്തിക്കുന്നില്ല. എല്ലാ മാനുഷിക മൂല്യങ്ങളും കൊറോണ ഭീതി കാരണം കടൽ കടന്ന അവസ്ഥയാണെന്നാണ് ടീജോ ചൂണ്ടിക്കാണിക്കുന്നത്.

ടൂറിസമാണ് കേരളത്തിന്റെ പ്രധാന വരുമാനമാർഗങ്ങളിൽ ഒന്ന്. ദൈവത്തിന്റെ സ്വന്തം നാട് തേടിയെത്തിയ വിദേശ ടൂറിസ്റ്റുകളോടും കൊറോണയുടെ പേരിൽ കരുണയില്ലാത്ത സമീപനമാണ് കേരളം കൈക്കൊള്ളുന്നത്. കൊറോണയ്ക്ക് മുൻപ് തന്നെ കേരളത്തിൽ എത്തിയവരാണ് വിദേശ വിനോദ സഞ്ചാരികളിൽ പലരും. എല്ലാവർക്കും കയ്‌പ്പ് നിറഞ്ഞ അനുഭവമാണ് ലഭിക്കുന്നത്. കൊറോണ ബാധിതരല്ലാത്ത ടൂറിസ്റ്റുകൾക്കും താമസസൗകര്യം ലഭിക്കുന്നില്ല. ആട്ടിയോടിക്കുന്ന അനുഭവമാണ് എല്ലാവർക്കും ലഭിക്കുന്നത്. ഇറ്റലി, യൂറോപ്പ് എന്നീ പേരുകൾ കേട്ടാൽ രക്ഷയിലാത്ത അവസ്ഥയാണ്. സെമിത്തേരിയിലും നെൽപ്പാടങ്ങളിലും രാത്രി തങ്ങേണ്ടുന്ന അവസ്ഥയാണ് വിദേശ ടൂറിസ്റ്റുകൾക്ക് നേരിടേണ്ടി വരുന്നത്.

ടൂറിസ്റ്റുകൾ ഈ അവസ്ഥ നേരിടുമ്പോൾ ഹൗസ് ക്വാറന്റൈനിൽ തുടരുന്ന കേരളീയർക്കും സമാന അവസ്ഥ തന്നെയാണ് വന്നുപെട്ടിരിക്കുന്നത്. ഹൗസ് ക്വാറന്റൈനിൽ തുടരുന്നവരോട് ഇതേ രീതിയിൽ പെരുമാറേണ്ടതുണ്ടോ എന്നാണ് ടീജോവിനെ പോലുള്ളവരുടെ അനുഭവങ്ങൾ കേരളത്തോടു ചോദിക്കുന്നത്