Forex Rate:

1 usd = 76.25 inr 1 gbp = 94.16 inr 1 eur = 85.23 inr 1 aed = 20.76 inr 1 sar = 20.32 inr 1 kwd = 247.66 inr
Nov / 202026Thursday

മൂന്ന് വർഷത്തിനിടെ ഡൽഹിയിൽ നിന്ന് ദുബായിലേക്ക് പറന്നത് അമ്പതിൽ അധികം തവണ; എല്ലാം വിദേശകാര്യ വകുപ്പിന്റെ അനുമതിയില്ലാത്ത സ്‌പോൺസേർഡ് യാത്രകൾ; ഇദ്ദേഹത്തിന് സ്ത്രീ ദുർബലയെന്ന് ഐബി റിപ്പോർട്ട് ചെയ്തത് അന്വേഷണത്തിന് വഴിയൊരുക്കി; അസ്വാഭാവികത തിരിച്ചറിഞ്ഞ് സിപിഎം ഉന്നതനെതിരെ അന്വേഷണത്തിന് നിർദ്ദേശം കൊടുത്തത് ഡോവൽ; സ്വർണ്ണ കടത്തിൽ പിണറായി സർക്കാരിനെ പ്രതിസന്ധിയിലാക്കാൻ വിദേശയാത്രാ വിവാദവും

മൂന്ന് വർഷത്തിനിടെ ഡൽഹിയിൽ നിന്ന് ദുബായിലേക്ക് പറന്നത് അമ്പതിൽ അധികം തവണ; എല്ലാം വിദേശകാര്യ വകുപ്പിന്റെ അനുമതിയില്ലാത്ത സ്‌പോൺസേർഡ് യാത്രകൾ; ഇദ്ദേഹത്തിന് സ്ത്രീ ദുർബലയെന്ന് ഐബി റിപ്പോർട്ട് ചെയ്തത് അന്വേഷണത്തിന് വഴിയൊരുക്കി; അസ്വാഭാവികത തിരിച്ചറിഞ്ഞ് സിപിഎം ഉന്നതനെതിരെ അന്വേഷണത്തിന് നിർദ്ദേശം കൊടുത്തത് ഡോവൽ; സ്വർണ്ണ കടത്തിൽ പിണറായി സർക്കാരിനെ പ്രതിസന്ധിയിലാക്കാൻ വിദേശയാത്രാ വിവാദവും

എം മനോജ് കുമാർ

തിരുവനന്തപുരം: പിണറായി സർക്കാർ പ്രതിക്കൂട്ടിലായ സ്വർണ്ണക്കടത്തിന്റെ മുഖ്യ ആസൂത്രക സ്വപ്ന സുരേഷുമായി ബന്ധമുള്ള ഒരു പ്രമുഖ സിപിഎം നേതാവിന്റെ വിദേശയാത്രകളെക്കുറിച്ച് വിദേശകാര്യമന്ത്രാലയം അന്വേഷിക്കുന്നു. കേന്ദ്ര സർക്കാരിന്റെ അനുമതിയോടെ മാത്രം വിദേശ യാത്രകൾ നടത്തേണ്ട വ്യക്തിയാണ് വിവാദത്തിൽ കടുങ്ങുന്നത്. ഇദ്ദേഹത്തെ ചോദ്യം ചെയ്യുന്നതിൽ എൻ ഐ എയ്ക്ക് ഭരണഘടനാ പരമായ പ്രശ്‌നങ്ങളുമുണ്ട്. സ്വർണ്ണ കടത്തിൽ ഇതിനോടകം തന്നെ ചർച്ചയായ പേരാണ് ഈ നേതാവിന്റെയും.

മന്ത്രിയല്ലാത്ത ഈ നേതാവ് കഴിഞ്ഞ മൂന്നു വർഷംകൊണ്ട് ഡൽഹി വഴി ദുബായിലേക്ക് നടത്തിയ അൻപതിലധികം വിദേശയാത്രകളെക്കുറിച്ചാണ് അന്വേഷണം നടക്കുന്നത്. വിദേശകാര്യമന്ത്രാലയം അറിഞ്ഞുള്ള യാത്രകളല്ല ഇവ. തൊണ്ണൂറു ശതമാനവും സ്‌പോൺസേഡ് ആണ് എന്നതാണ് ഈ യാത്രകളെ വിവാദ വിഷയമാക്കുന്നത്. എന്തുകൊണ്ട് ദുബായിലേക്ക് ഇത്രയധികം യാത്രകൾ ഈ നേതാവ് നടത്തിയെന്ന കാര്യത്തിലാണ് അന്വേഷണം നടക്കുന്നത്. യാത്രകളിൽ പലതിലും അസ്വാഭാവികത മണക്കുന്നതായി വിദേശകാര്യമന്ത്രാലയം മനസിലാക്കിയിട്ടുണ്ട്.

ലീഗ് നേതാക്കളെപ്പോലും കടത്തിവെട്ടുന്ന യാത്രയാണ് ഈ നേതാവിന്റെത് എന്നാണ് അന്വേഷണത്തിൽ തെളിയുന്നത്. നേതാവിന്റെ പാസ്‌പോർട്ടിന്റെ വിശദാംശങ്ങളും യാത്രയുടെ വിശദാംശങ്ങളും പരിശോധിച്ചുകൊണ്ടിരിക്കുകയാണ്. ആരാണ് നേതാവിന്റെ യാത്രകൾക്ക് ആതിഥ്യം വഹിച്ചത് എന്നാണ് ഇപ്പോൾ അന്വേഷിക്കുന്നത്. നേതാവ് വിദേശത്ത് പോയി ആരെയൊക്കെ കണ്ടു എന്തൊക്കെ ക്രയവിക്രയങ്ങളിൽ ഏർപ്പെട്ടു എന്നൊക്കെ അന്വേഷണ പരിധിയിലുണ്ട്.

കേരളത്തിലേക്കുള്ള മുഴുവൻ സ്വർണ്ണക്കടത്തും അന്വേഷണ വിഷയമാക്കാൻ എൻഐഎയ്ക്ക് കേന്ദ്ര സർക്കാർ നിർദ്ദേശം നൽകിയതോടെയാണ് കേരളത്തിലെ നേതാക്കളുടെ അടിക്കടിയുള്ള ദുബായ് യാത്രയിലേക്കും അന്വേഷണം നീളുന്നത്. സ്വർണ്ണക്കടത്തിന്റെ മുഖ്യ ആസൂത്രക സ്വപ്ന സുരേഷുമായി നേതാവിന് ബന്ധമുണ്ടെന്നു മനസിലാക്കിയതോടെയാണ് ഈ അന്വേഷണം. സിപിഎം നേതാക്കളിൽ ഏറ്റവും അടുപ്പം നേതാവിനോട് എന്നാണ് വിദേശകാര്യമന്ത്രാലയത്തിന്റെ അന്വേഷണത്തിൽ തെളിഞ്ഞത്. ഐബി ഈ നേതാവിനെക്കുറിച്ച് രഹസ്യമായി അന്വേഷണം നടത്തിയപ്പോൾ ഇദ്ദേഹത്തിനു സ്ത്രീ ഒരു ദുർബലതയാണ് എന്ന വിവരവും ലഭിച്ചിട്ടുണ്ട്.

ഇപ്പോൾ ഈ നേതാവിന്റെ യാത്രകളെക്കുറിച്ചാണ് വെരിഫിക്കേഷൻ നടക്കുന്നത്. ഐബിയും എൻഐഎയും ഡിആർഐയും കസ്റ്റംസും കൈകോർത്ത് സ്വർണ്ണക്കടത്തിൽ അന്വേഷണം തുടരുമ്പോഴാണ് ഈ നേതാവിനെക്കുറിച്ചുള്ള വ്യക്തിപരമായ അന്വേഷണം കൂടി നടക്കുന്നത്. ഇതുമായി ബന്ധപ്പെട്ട് പ്രധാനമന്ത്രിയുടെ ഓഫീസ് റിപ്പോർട്ട് ആവശ്യപ്പെടുകയും, കേന്ദ്ര ധനമന്ത്രി നിർമ്മല സീതാരാമൻ, കേന്ദ്ര വിദേശകാര്യ സഹമന്ത്രി വി. മുരളീധരൻ എന്നിവർ കൂടിക്കാഴ്ച നടത്തുകയും ചെയ്തിരുന്നു. ഇതിനു തൊട്ടു പിന്നാലെയാണ് അജിത്ത് ഡോവലിന്റെ ഇടപെടൽ കൂടി വന്നത്.

പ്രധാനമന്ത്രിയുടെ സുരക്ഷാ ഉപദേഷ്ടാവ് അജിത്ത് ഡോവൽ ഈ കേസിൽ നേരിട്ട് ഇടപെട്ടു എന്നതും സ്വർണ്ണക്കടത്ത് കേസിനെ ശ്രദ്ധേയമാക്കി നിർത്തുന്നുണ്ട്. ഇൻഡോ-ചൈന അതിർത്തിയിലെ സേനാവിന്യാസത്തിന്റെ ഒരുക്കങ്ങൾ നിരീക്ഷിക്കുകയും ചൈനയുമായി തർക്കപ്രശ്‌നങ്ങളിൽ ചർച്ച നടത്തിക്കൊണ്ടിരിക്കുമ്പോഴും തന്നെയാണ് സ്വർണ്ണക്കടത്ത് കേസിൽ അജിത്ത് ഡോവൽ നേരിട്ട് ഇടപെട്ടുകൊണ്ടിരിക്കുന്നത്. പിണറായി സർക്കാരിനും സിപിഎമ്മിനും തലവേദനയാണ് ഡോവലിന്റെ നേരിട്ടുള്ള ഈ ഇടപെടൽ. ഡോവൽ മാത്രമല്ല പ്രതിരോധമന്ത്രി രാജ്‌നാഥ്‌സിംഗും ആഭ്യന്തരമന്ത്രി അമിത് ഷായും യുഎഇ കോൺസുലേറ്റ് കേന്ദ്രീകരിച്ച് നടന്ന സ്വർണ്ണക്കടത്തിനു പിന്നിലുണ്ട്.

കേസിലെ അന്താരാഷ്ട്ര ബന്ധങ്ങൾ, ഉന്നതതല ഇടപെടലുകൾ എന്നിവയുമായി ബന്ധപ്പെട്ട വിവരങ്ങൾ ഐബി അന്വേഷിക്കുമ്പോൾ കേസുമായി ബന്ധപ്പെട്ട നിഗൂഢതകളും സ്വർണ്ണത്തിന്റെ ഉറവിടവും ആർക്ക് വേണ്ടി കടത്തി എന്നതും ഇന്ത്യൻ ചാര ഏജൻസിയായ റോയും പരിശോധിച്ചു വരുന്നുണ്ട്. കേരളത്തിലെ രാഷ്ട്രീയ രംഗത്തെ പിടിച്ചു കുലുക്കിയ സ്വർണ്ണക്കടത്ത് കേസിൽ കേന്ദ്രസർക്കാരിന്റെ സവിശേഷ ശ്രദ്ധ പതിയുന്നത് സിപിഎമ്മും മുസ്ലിം ലീഗും അടക്കമുള്ള രാഷ്ട്രീയ പാർട്ടികളിൽ അസ്വസ്ഥത വിതച്ചിട്ടുണ്ട്.

അതേസമയം സ്വർണക്കടത്തിൽ സ്വപ്ന സുരേഷ്, സന്ദീപ് നായർ, സരിത്ത് എന്നിവർക്ക് പങ്കുണ്ടെന്നു വ്യക്തമാണെന്ന് എൻഐഎ ഹൈക്കോടതിയിൽ ബോധിപ്പിച്ചിട്ടുണ്ട്. എഫ്‌ഐആർ രജിസ്റ്റർ ചെയ്തതായും അറിയിച്ചിട്ടുണ്ട്. കേസിന്റെ പ്രാരംഭ അന്വേഷണം മാത്രമാണ് ഇപ്പോൾ നടന്നിട്ടുള്ളതെന്നും ഈ ഘട്ടത്തിൽ പ്രതികൾക്ക് ജാമ്യം അനുവദിക്കരുതെന്നുമാണ് എൻഐഎ അഭിഭാഷകൻ കോടതിയോട് ആവശ്യപ്പെട്ടത്.

അതേസമയം സ്വപ്നയ്ക്ക് മുൻകൂർ ജാമ്യം ലഭിക്കില്ലെന്ന് ഏകദേശം ഉറപ്പായിട്ടുണ്ട്. സ്വർണക്കടത്ത് കേസിൽ എൻഐഎ അന്വേഷണം ആരംഭിച്ചതോടെ സ്വപ്നയുടെ മുൻകൂർ ജാമ്യാപേക്ഷ അപ്രസക്തമായിട്ടുണ്ട്. എൻ.ഐ.എ അന്വേഷിക്കുന്ന കേസുകളിൽ എൻ.ഐ.എ കോടതികളിലാണ് ജാമ്യാപേക്ഷ നൽകേണ്ടത്. എൻ.ഐ.എ പ്രത്യേക കോടതിയുടെ ഉത്തരവുകൾക്കെതിരായ അപ്പീലുകൾ മാത്രമാണ് ഹൈക്കോടതി പരിഗണിക്കുന്നത്.

കസ്റ്റംസ് അറസ്റ്റ് ചെയ്ത സരിതിനും വേണ്ടി സിജെഎം കോടതിയിൽ ജാമ്യാപേക്ഷ നൽകിയിരുന്നുവെങ്കിലും എൻഐഎ കേസ് വന്നതോടെ ഈ ജാമ്യാപേക്ഷയ്ക്കും സ്വപ്നയുടെ ജാമ്യാപേക്ഷയുടെ ഗതി തന്നെയായിട്ടുണ്ട്.

Stories you may Like

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

More News in this category+

MNM Recommends +

Go to TOP