Forex Rate:

1 usd = 76.25 inr 1 gbp = 94.16 inr 1 eur = 85.23 inr 1 aed = 20.76 inr 1 sar = 20.32 inr 1 kwd = 247.66 inr
Dec / 202001Tuesday

തലമുടി കൊഴിയുന്ന അലോപീഷ്യ രോഗം മൂലം മാനസിക സമ്മർദ്ദത്തിലായി; സ്വാമിയിലൂടെ മാനസിക ധൈര്യം കണ്ടെത്തിയ സ്വാമിനി യുകെയിലെ വിശ്വസ്ത; കൈലാസ രാജ്യം സ്ഥാപിച്ച വിവാദ സ്വാമി നിത്യാനന്ദയുടെ ബ്രിട്ടീഷ് ടീം ലണ്ടനിൽ ഇപ്പോഴും സജീവം; ഇന്ത്യയിലെ കാര്യങ്ങളൊക്കെ മാധ്യമങ്ങളുടെ കള്ളത്തരമെന്നു സ്വാമിയുടെ ശിഷ്യ മാതാ നിത്യ ആത്മ ദയാനന്ദ; യുകെയിൽ എവിടെയെന്നു വെളിപ്പെടുത്താൻ തയ്യാറാകാതെ സ്വാമിനി; ഉറ്റ ശിഷ്യരുടെ വീടുകൾ കേന്ദ്രമാക്കി 'ആശ്രമ പ്രവർത്തനങ്ങൾ'

തലമുടി കൊഴിയുന്ന അലോപീഷ്യ രോഗം മൂലം മാനസിക സമ്മർദ്ദത്തിലായി; സ്വാമിയിലൂടെ മാനസിക ധൈര്യം കണ്ടെത്തിയ സ്വാമിനി യുകെയിലെ വിശ്വസ്ത; കൈലാസ രാജ്യം സ്ഥാപിച്ച വിവാദ സ്വാമി നിത്യാനന്ദയുടെ ബ്രിട്ടീഷ് ടീം ലണ്ടനിൽ ഇപ്പോഴും സജീവം; ഇന്ത്യയിലെ കാര്യങ്ങളൊക്കെ മാധ്യമങ്ങളുടെ കള്ളത്തരമെന്നു സ്വാമിയുടെ ശിഷ്യ മാതാ നിത്യ ആത്മ ദയാനന്ദ; യുകെയിൽ എവിടെയെന്നു വെളിപ്പെടുത്താൻ തയ്യാറാകാതെ സ്വാമിനി; ഉറ്റ ശിഷ്യരുടെ വീടുകൾ കേന്ദ്രമാക്കി 'ആശ്രമ പ്രവർത്തനങ്ങൾ'

കെ ആർ ഷൈജുമോൻ, ലണ്ടൻ

ലണ്ടൻ: ട്രിനിഡാഡ് ടുബാഗോയ്ക്കടുത്തു ദ്വീപ് വാങ്ങി സ്വന്തം കൈലാസ രാജ്യം സ്ഥാപിച്ച വിവാദ താന്ത്രികൻ സ്വാമി നിത്യാനന്ദയ്ക്കു ബ്രിട്ടനിലും സജീവമായ ആശ്രിത വൃന്ദം. വിവാദ സ്വാമിക്ക് ലോകമൊട്ടാകെ ആരാധകർ ഉണ്ടെന്നത് സാക്ഷ്യപ്പെടുത്തുന്ന വിവരമാണ് സ്വാമിക്കു വേണ്ടി ഫോണിൽ മറുപടി പറയാൻ തയ്യാറാകുന്ന സ്വാമിനി മഹന്ത് മാ നിത്യ ആത്മദയാനന്ദയുടെ വാക്കുകൾ തെളിയിക്കുന്നത്. സ്വാമി നിത്യാന്ദയെ കുറിച്ച് നിറംപിടിച്ച വാർത്തകൾ ഓരോ ദിവസവും എത്തുന്നതിനാൽ ഇദ്ദേഹത്തിന്റെ യുകെയിലെ പ്രവർത്തനം അന്വേഷിക്കുന്നതിനു വേണ്ടിയാണു ബ്രിട്ടീഷ് മലയാളിയിൽ നിന്നും മാതാജിയെ ബന്ധപ്പെട്ടത്.

ആശ്രമത്തെ കുറിച്ച് അറിയാനും കാണാനും ആഗ്രഹം ഉണ്ടെന്നു വ്യക്തമാക്കിയപ്പോൾ ലണ്ടനിലെ ലൊക്കേഷൻ അടക്കമുള്ള വിവരങ്ങളാണ് മാതാജി നൽകാൻ തയ്യാറാകുന്നത്. എന്നാൽ ഫോണിലൂടെ വിവരങ്ങൾ നൽകാൻ മടിക്കുന്ന മാതാജി ലണ്ടനിൽ എത്തിയിട്ട് വിളിക്കൂ, ആൾ എത്തി വഴി കാട്ടും എന്നാണ് പറയുന്നത്. അതേ സമയം ലണ്ടനിൽ ഹിന്ദുക്കളുടെ ശക്തികേന്ദ്രം എന്ന് വിശേഷിപ്പിക്കാവുന്ന ഹാരോ കേന്ദ്രമാക്കിയാണ് മാതാ ആത്മ ദയാനന്ദയും കൂട്ടരും പരിപാടികൾ സംഘടിപ്പിക്കുന്നതെന്നു മറുനാടൻ മലയാളിക്ക് വിവരം ലഭിച്ചു.

ആശ്രമത്തെ കുറിച്ചുള്ള ചോദ്യങ്ങൾക്കു മാതാജി പറയുന്നത് നിത്യാനന്ദയ്ക്കു വേണ്ടി യുകെയിൽ പ്രത്യേക ആശ്രമം ഇല്ലെന്നതാണ്. വീടുകൾ കേന്ദ്രീകരിച്ചാണ് പ്രവർത്തനം. യോഗയും വേദ മന്ത്രോച്ചാരണ പഠനവും ഒക്കെയാണ് പ്രധാന പ്രവർത്തനം. യുകെയിലെ പ്രവർത്തനങ്ങളുടെ ചുക്കാൻ മാതാ നിത്യ ആത്മ ദയാനന്ദ തന്നെയാണ് നിയന്ത്രിക്കുന്നതും. വർഷങ്ങൾക്കു മുൻപ് തലമുടി കൊഴിയുന്നതിന് പറയുന്ന അലോപീഷ്യ രോഗം മൂലം മാനസിക സമ്മർദ്ദത്തിലായ നിത്യ ആത്മ ദയാനന്ദ മാനസിക സമ്മർദ്ദത്തിന് പരിഹാരം തേടി സ്വാമി നിത്യാനന്ദയെ കാണുന്നത് മുതലാണ് പരിചയം വളരുന്നത്. തലയിൽ ചെറു വട്ടങ്ങളായി മുടി കൊഴിഞ്ഞു പോകുന്ന അസുഖമാണ് അലോപീഷ്യ എന്നറിയപ്പെടുന്നത്. നിത്യാനന്ദയെ കണ്ടത് മുതൽ മാനസികമായി ധൈര്യം കണ്ടെത്തിയ നിത്യ ആത്മ ദയാനന്ദ പിന്നീടു സ്വാമിയുടെ യുകെയിലെ വിശ്വസ്ത ആയി മാറുക ആയിരുന്നു.

ലണ്ടനിൽ പലയിടത്തും നിത്യാനന്ദയ്ക്ക് ശിഷ്യഗണങ്ങളുണ്ട്. ഇവരെ കോ ഓഡിനേറ്റ് ചെയ്യുന്ന ചുമതലയും മാതാജിക്ക് തന്നെയാണ്. സ്ഥിരമായി ലണ്ടനിൽ സത്സംഗം സംഘടിപ്പിക്കുന്ന ഇവർ നിത്യാന്ദയുടെ അത്ഭുത പ്രവർത്തികൾ സോഷ്യൽ മീഡിയ മുഖേനെ ഭക്തരിൽ എത്തിക്കുന്നുണ്ട്. സംസാരത്തിൽ ഇന്ത്യൻ വംശജയാണ് എന്ന് തോന്നിപ്പിക്കും വിധമാണ് ഇവരുടെ ഉച്ചാരണം. എന്നാൽ സത്സംഗം പ്രവർത്തനത്തെ കുറിച്ച് കാര്യമായി ഒന്നും വിട്ടുപറയാനും മാതാജി തയ്യാറായില്ല. യുകെയിൽ ആശ്രമ വേദികൾക്കു പകരം ശിഷ്യരായി മാറുന്നവരുടെ സഹായത്തോടെ വീടുകളിലാണ് പ്രധാനമായും സത്സംഗം നടത്തുന്നത്. ചിലപ്പോഴൊക്കെ ഹാളുകളിലും ഭജൻ സത്സംഗം സംഘടിപ്പിക്കാറുണ്ട്. നിത്യാനന്ദയെ ഈശ്വരനായി പൂജിക്കുന്നതിനാൽ ക്ഷേത്രങ്ങളിൽ ഇവർക്ക് ഇടം ലഭിക്കാറില്ല എന്നതാണ് വസ്തുത.

യാദൃശ്ചികമെന്നോണം ഇന്ത്യയിലെ സംഭവ വികാസങ്ങൾ ചോദിച്ചപ്പോൾ അതൊക്കെ കള്ളക്കഥകൾ എന്ന മട്ടിൽ മാതാജി പറഞ്ഞൊഴിയുക ആയിരുന്നു. സ്വാമി നിത്യാനന്ദയുടെ പുത്തൻ വിശേഷങ്ങൾ ഒന്നും പങ്കു വയ്ക്കാതിരിക്കാനും മാതാ പ്രത്യേകം ശ്രദ്ധിച്ചു. കൂടുതൽ അറിയാൻ നേരിട്ടു വന്നാൽ മതിയെന്നു വ്യക്തമാക്കി അവർ ഫോൺ സംഭാഷണം അവസാനിപ്പിക്കുക ആയിരുന്നു. സോഷ്യൽ മീഡിയ പേജിൽ നിത്യാനന്ദയോടുള്ള പരമമായ പ്രേമം വാക്കുകളിൽ പ്രകടിപ്പിക്കാനും മാതാ മറക്കുന്നില്ല. പരമശിവനോട് എന്ന വിധം പ്രേമം തോന്നുന്നു എന്നാണ് മാതാ വിശേഷിപ്പിക്കുന്നത്. താൻ പരമശിവൻ തന്നെയാണ് എന്നാണ് ഈ ദിവസങ്ങളിൽ ഒക്കെ നിത്യാനന്ദ പറയുന്നതും.

മാതായുടെ സോഷ്യൽ മീഡിയ പോസ്റ്റുകളിൽ നിന്നും വർഷങ്ങൾ ഇവർക്ക് നിത്യാന്ദയുമായി ബന്ധമുണ്ടന്നതിന്റെ തെളിവുകൾ ലഭ്യമാണ്. കഴിഞ്ഞ ദിവസം നിത്യാനന്ദ പുറത്തു വിട്ട കൈലാസ രാജ്യം സംബന്ധിച്ച യുട്യൂബ് വീഡിയോ അടക്കമുള്ള വിവരങ്ങളും മാതാ അൽമാനന്ദയുടെ ഫേസ്‌ബുക്ക് പേജിലുണ്ട്. നിത്യാനന്ദ യൂ ട്യുബ് സഹായത്തോടെ തുടങ്ങിയ ലൈവ് ടിവി പ്രോഗ്രാമുകളും മാതായുടെ പേജിൽ നൽകിയിട്ടുണ്ട്. കുംഭമേള സമയത്തു സ്വാമിയുടെ തൊട്ടരികെ ഇരിക്കാൻ കഴിഞ്ഞ ഭാഗ്യമൊക്കെ ആത്മനിർവൃതിയോടെയാണ് മാതാ നിത്യ ആത്മ ദയാനന്ദ പങ്കുവയ്ക്കുന്നത്.

നിത്യാന്ദയുടെ മുഴുവൻ ശിഷ്യ ഗണങ്ങളും ഇപ്പോൾ സോഷ്യൽ മീഡിയയിൽ കവർ ഇമേജായി നൽകിയിരിക്കുന്നത് പുതിയ കൈലാസ രാജ്യത്തിന്റെ പ്രഖ്യാപനമാണ്, യുകെയിൽ സ്‌കോട്ട്‌ലന്റിൽ അടക്കമുള്ള സ്ഥലങ്ങളിൽ നിത്യാനന്ദയ്ക്ക് വേണ്ടി കൈലാസ കേന്ദ്രങ്ങൾ സ്ഥാപിച്ചിരിക്കുകയാണ് ശിഷ്യഗണം. യൂറോപ്പിൽ എല്ലായിടത്തും തന്നെ നിത്യാനന്ദയ്ക്കു പിടിപാടുള്ള സ്ഥലങ്ങളും ആളുകളും ഉണ്ടെന്നതാണ് സത്യം.

കഴിഞ്ഞ പത്തുവർഷമായി നിത്യാനന്ദയുടെ ഉത്തമയായ ശിഷ്യയാണ് മാതാ ആത്മ ദയാനന്ദ. തന്റെ മുടികൊഴിച്ചിൽ മൂലം അപകർഷതാ ബോധത്തിൽ തലകുനിച്ചു നടന്നിരുന്ന താൻ ഇപ്പോൾ തല ഉയർത്തി നിൽക്കാൻ കാരണം സ്വാമി നിത്യാനന്ദ മാത്രമാണ് എന്ന് മാതാ ആരോടും പറയും. ഒരു മൈക്ക് ലഭിച്ചാൽ ഏറ്റവും ആദ്യം ഉച്ചത്തിൽ പറയുന്നതും ഐ ലവ് യു സ്വാമിജി എന്നുതന്നെയാണ്. ഇക്കാര്യങ്ങൾ ഒക്കെ സോഷ്യൽ മീഡിയയിൽ അഭിമാനത്തോടെയാണ് മാതാ ആത്മ ദയാനന്ദ പങ്കു വയ്ക്കുന്നതും.

Stories you may Like

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

More News in this category+

MNM Recommends +

Go to TOP