• ഹോം
• വാർത്ത
• എക്സ്ക്ലൂസീവ്

തിരുവനന്തപുരം: സാങ്കേതിക സർവകലാശാലയിൽ അധികാരം ദുർവിനിയോഗം ചെയ്ത് മന്ത്രി കെടി ജലീൽ ഇടപെട്ടെന്ന് ഗവർണ്ണറുടെ ഓഫീസ്. സാങ്കേതിക സർവകലാശാലയിൽ ബിടെക് വിദ്യാർത്ഥിയെ ജയിപ്പിക്കാനുള്ള മന്ത്രിയുടെ ഇടപെടൽ നിമയവിരുദ്ധമാണെന്ന് ചൂണ്ടിക്കാട്ടി ഗവർണ്ണറുടെ സെക്രട്ടറി റിപ്പോർട്ട് നൽകി. മന്ത്രിക്കെതിരായ റിപ്പോർട്ട് ഗവർണ്ണറുടെ പരിഗണനയിലാണ്. ഈ റിപ്പോർട്ടിന്റെ പകർപ്പ് മറുനാടൻ മലയാളിക്ക് ലഭിച്ചു. മന്ത്രിയുടേത് ഗുരുതരമായ ചട്ടലംഘനവും അധികാര പരിധി വിട്ടുള്ള ഇടപടലുമാണെന്ന് ഈ റിപ്പോർട്ട് വിശദീകരിക്കുന്നു.

കൊല്ലം ടികെഎം എഞ്ചിനീയറിങ് കോളേജിലെ മെക്കാനിക്കൽ എഞ്ചിനീയറിംഗിന് തോറ്റ വിദ്യാർത്ഥിയെ ജയിപ്പിക്കാനാണ് മന്ത്രി കൂട്ട് നിന്നതെന്നായിരുന്നു ആരോപണം.അഞ്ചാംസെമസ്റ്ററിൽ ഒരു വിഷയത്തിന് തോറ്റ വിദ്യാർത്ഥിക്ക് പുനർമൂല്യ നിർണ്ണയം നടത്തിയതിന് ശേഷവും ജയിക്കാനുള്ള മാർക്ക് ലഭിച്ചില്ല.വീണ്ടും മൂല്യ നിർണ്ണയത്തിന് അപേക്ഷിച്ചെങ്കിലും ചട്ടവിരുദ്ധമായതിനാൽ സാങ്കേതിക സർവകലാശാല അപേക്ഷ തള്ളി.തുടർന്ന് മന്ത്രിയെ വിദ്യാർത്ഥി സമീപിച്ചു. 2018 ഫെബ്രുവരി 28 ന് മന്ത്രി കെടി ജലീൽ പങ്കെടുത്ത സാങ്കേതിക സർവകലാശാലയുടെ അദാലത്തിൽ ഈ വിഷയം പ്രത്യേക കേസായി എടുത്തു.ചട്ടങ്ങൾക്ക് വിരുദ്ധമായി വീണ്ടും മൂല്യ നിർണ്ണയം നടത്താൻ മന്ത്രി അദാലത്തിൽ നിർദ്ദേശിച്ചു.പുനർമൂല്യ നിര്ണ്ണയത്തിൽ വിദ്യാർത്ഥി ബിടെക് പാസായി. മാനുഷിക പരിഗണനയിലാണ് മന്ത്രി ഇടപെട്ടതെന്ന സർവകലാശാല വിശദീകരണമാണ് ഗവർണ്ണറുടെ സെക്രട്ടറി തള്ളിയത്.

മന്ത്രി ഈ വിഷയത്തിൽ അധികാരം ദുർവിനിയോഗം നടത്തിയെന്ന് പറയുന്ന റിപ്പോർട്ടിൽ ചാൻസിലറെ അറിയാക്കാതെ അദാലത്തിൽ പങ്കെടുത്തതിനും വിമർശനമുണ്ട്. സാങ്കേതിക സർവകലാശാല വൈസ്ചാൻസിലർക്കും ഇക്കാര്യത്തിൽ ഗുരുതര വീഴ്ച പറ്റി. മന്ത്രി വെറും പ്രോ ചാനൻസലർ മാത്രമാണ്. ചാൻസലറായ ഗവർണ്ണറുടെ അനുമതിയോടെ മാത്രമേ സർവ്വകലാശാല വിഷയങ്ങളിൽ ഇടപെടാവൂ. ഇവിടെ മന്ത്രി അതു ലംഘിച്ചുവെന്നാണ് ഗവർണ്ണറുടെ ഓഫീസ് വിലയിരുത്തുന്നത്. പുനർമൂല്യ നിർണ്ണയത്തിന് ശുപാർശ ചെയ്യാനുള്ള മന്ത്രിയുടെ ശുപാർശയെ ചോദ്യം ചെയ്യുകായണ് ഗവർണ്ണർ. ഇതിനൊപ്പം മാർക്ക് ദാനത്തിനാകരുത് അദാലത്തുകൾ എന്ന സൂചനയും റിപ്പോർട്ടിലുണ്ട്. ഇതോടെ മന്ത്രി വെട്ടിലാകുകയാണ്. ഈ വിവാദങ്ങൾ ചർച്ചയാക്കിയത് പ്രതിപക്ഷ നേതാവ് രമേശ് ചെന്നിത്തലയാണ്. ചെന്നിത്തലയുടെ പരാതിയിലാണ് ഗവർണ്ണർ നടപടി എടുത്തത്.

ബി ടെക്കിന് സംസ്ഥാനത്ത് അഞ്ചാം റാങ്ക് ലഭിച്ച വിദ്യാർത്ഥി, ബി ടെക് ഹോണേഴ്‌സ് ലഭിച്ച വിദ്യാർത്ഥി, കെഇഎഎം എൻട്രൻസിൽ 5428 റാങ്ക് നേടിയാണ് കൊല്ലം ടി.കെ.എം. എൻഞ്ചിനീയറിങ് കോളേജിൽ ഈ വിദ്യാർത്ഥി പ്രവേശനം നേടിയത്, എല്ലാ വിഷയങ്ങളിലും ശരാശരി 90 ശതമാനത്തിൽ കൂടുതൽ മാർക്കുള്ള വിദ്യാർത്ഥി, പക്ഷേ ആറാം സെമെസ്റ്ററിൽ ഒരു വിഷയത്തിനു മാത്രം കുറഞ്ഞ മാർക്ക് ലഭിച്ചു. പരീക്ഷാപേപ്പറിലെ മൂല്യനിർണയത്തിൽ അവന് പിഴവ് തോന്നി, പ്രഥമ മൂല്യനിർണയത്തിലും പുനർ മൂല്യനിർണയത്തിലും യഥാക്രമം 29, 32 മാർക്കുകളാണ് ശ്രീഹരിക്ക് ലഭിച്ചത്. പക്ഷേ ജയിക്കാനുള്ള മാർക്ക് തനിക്ക് ലഭിക്കുമെന്ന വിശ്വാസത്തിലാണ് ശ്രീഹരി മന്ത്രി കെ.ടി ജലീലിന് മുന്നിൽ എത്തിയത്. ഇവിടെ നിന്നാണ് കേരളം ഇന്ന് ചർച്ചചെയ്യുന്ന വിവാദത്തിന് തുടക്കമാകുന്നത്. ഇതിൽ ജലീൽ വിശദീകരണം നടത്തുകയും ചെയ്തു.

സർവകലാശാല വൈസ് ചാൻസലർ ഉൾപ്പെടെയുള്ള അക്കാഡമിക് വിദഗ്ധരുടെ വിശകലനത്തിന്റെയും അഭിപ്രായത്തിന്റെയും അടിസ്ഥാനത്തിൽ ഇതൊരു പ്രത്യേക കേസായി പരിഗണിച്ചത്. വിദ്യാർത്ഥിയുടെ ആവശ്യം ശരിവയ്ക്കുന്ന തരത്തിലാണ് പിന്നീട് പുറത്തുവന്ന ഫലം. അദാലത്തിലെ തീരുമാനത്തിന്റെ അടിസ്ഥാനത്തിൽ സർവകലാശാല വിദഗ്ധരായ അദ്ധ്യാപകരുടെ ഒരു കമ്മിറ്റി രൂപീകരിക്കുകയും മൂന്നാം മൂല്യനിർണയത്തിൽ ബന്ധപ്പെട്ട വിദ്യാർത്ഥിക്ക് നേരത്തെ രണ്ടു മൂല്യനിർണ്ണയങ്ങളിൽ പരാജയപ്പെട്ടുവെന്ന് പറഞ്ഞ പേപ്പറിൽ 48 മാർക്ക് ലഭിച്ചു. വിദ്യാർത്ഥികളുടെ ഭാവികൊണ്ട് പന്താടുന്ന അദ്ധ്യാപകർക്കെതിരെ കർശനനടപടികൾ സ്വീകരിക്കാനും കനത്ത പിഴ ചുമത്താനും സർക്കാർ ഉത്തരവ് പുറപ്പെടുവിച്ചതോടെയാണ് ഇതൊരു വിവാദമായി ഉയരുന്നതെന്നും മന്ത്രി ഫേസ്‌ബുക്ക് കുറിപ്പിൽ ആരോപിച്ചിരുന്നു. എന്നാൽ മന്ത്രിയുടേത് അധികാര ലംഘനമാണെന്ന് തന്നെയാണ് ഗവർണ്ണറുടെ ഓഫീസ് പറയുന്നത്.

2019 ഫെബ്രുവരി 27 നാണ് എ.പി.ജെ അബ്ദുൾകലാം സാങ്കേതികശാസ്ത്ര സർവകലാശാലയിൽ ഫയൽ തീർപ്പാക്കലിന്റെ ഭാഗമായുള്ള അദാലത്ത് നടന്നത്. അന്ന് ശ്രീഹരി എസ് എന്ന വിദ്യാർത്ഥി മൂല്യനിർണയത്തിൽ അപാകതകൾ സംമ്പന്ധിച്ച് അനുബന്ധ രേഖകൾ സഹിതം ഒരു പരാതി ഉന്നയിച്ചു. എല്ലാ വിഷയങ്ങളിലും ശരാശരി 90% ത്തിൽ കൂടുതൽ മാർക്കുള്ള തനിക്ക് ആറാം സെമെസ്റ്ററിൽ ഒരു വിഷയത്തിനു മാത്രം കുറഞ്ഞ മാർക്കാണ് ലഭിച്ചതെന്നും മൂല്യനിർണ്ണയത്തിലെ അപാകതയാണ് അതിനു കാരണമെന്നും അദ്ദേഹം തെളിവു സഹിതം ചൂണ്ടിക്കാണിച്ചു. പ്രഥമ മൂല്യനിർണയത്തിലും പുനർ മൂല്യനിർണയത്തിലും യഥാക്രമം 29, 32 മാർക്കുകളാണ് ശ്രീഹരിക്ക് ലഭിച്ചിരുന്നത്. അദാലത്തിൽ പരീക്ഷാപേപ്പറിന്റെ കോപ്പി ഹാജരാക്കിയത് പ്രാഥമികമായി നോക്കിയപ്പോൾ പരാതിയിൽ കഴമ്പുണ്ടെന്ന് പൊതുവെ അഭിപ്രായമുയർന്നു. ശ്രീഹരിയുടെ മെറിറ്റ് പരിശോധിച്ചപ്പോൾ ഗഋഅങ എൻട്രൻസിൽ 5428 റാങ്ക് നേടിയാണ് ടി.കെ.എം. എൻഞ്ചിനീയറിങ് കോളേജിൽ പ്രവേശനം നേടിയതെന്നും ബോധ്യപ്പെട്ടുവെന്നം ജലീൽ വിശദീകരിച്ചിരുന്നു.

തുടർന്ന് അദാലത്തിൽ സന്നിഹിതരായിരുന്ന സർവകലാശാല വൈസ് ചാൻസലർ ഉൾപ്പെടെയുള്ള അക്കാഡമിക് വിദഗ്ധരുടെ വിശകലനത്തിന്റെയും അഭിപ്രായത്തിന്റെയും അടിസ്ഥാനത്തിൽ ഇതൊരു സ്‌പെഷ്യൽ കേസായി പരിഗണിക്കണമെന്ന അഭിപ്രായം ഉയർന്നുവരികയും അതടിസ്ഥാനത്തിൽ മൂന്നാമതൊരു മൂല്യനിർണ്ണയം ആവശ്യമെങ്കിൽ നടത്താമെന്നും തീരുമാനിക്കുകയായിരുന്നു. വിദഗ്ധരായ അദ്ധ്യാപകരെ കൊണ്ട് ഒരാഴ്ചയ്ക്കകം പുനർമൂല്യനിർണയം നടത്താനും പരാതിയിൽ സത്യാവസ്ഥ ഉള്ളതായി കണ്ടെത്തിയാൽ മൂല്യനിർണയവും ആദ്യ പുനർമൂല്യനിർണയവും നടത്തിയവർക്കെതിരെ അച്ചടക്കനടപടികൾ സ്വീകരിക്കാനും നിർദ്ദേശിച്ചു. ഇത് അദാലത്തിന്റെ തീരുമാനമായി രേഖപ്പെടുത്തപ്പെടുകയും ചെയ്തിരുന്നു. എന്നാൽ ഇതൊന്നും അദാലത്ത് പരിഗണിക്കേണ്ട വിഷയമല്ലെന്നാണ് ഗവർണ്ണറുടെ ഓഫീസ് വിലയിരുത്തുന്നത്. ഇതിന്റെ അടിസ്ഥാനത്തിലാണ് എല്ലാം പിൻവലിക്കാൻ ഗവർണ്ണർ നിർദ്ദേശം നൽകിയത്.

അതിനിടെ വിവാദത്തിൽ ഗവർണറുടെ സെക്രട്ടറിയുടെ റിപ്പോർട്ടിനെക്കുറിച്ച് പ്രതികരിക്കാനില്ലെന്ന് മന്ത്രി കെടി ജലീൽ. ഏതോ ഒരു ഡെപ്യൂട്ടി സെക്രട്ടറി എഴുതിയ റിപ്പോർട്ടിന് എന്തിന് മറുപടി പറയണമെന്നും ജലീൽ പ്രതികരിച്ചു. ഗവർണർ തന്നെ ഈ റിപ്പോർട്ട് കണ്ടിട്ടില്ലെന്നാണ് പറഞ്ഞത്. ഗവർണറുടെ ഓഫീസിൽ നിന്ന് എന്തെങ്കിലും അറിയിപ്പ് ലഭിച്ചാൽ പ്രതികരിക്കാമെന്നും ജലീൽ പറഞ്ഞു. ഉന്നത വിദ്യാഭ്യാസത്തിന്റെ മഹനീയത നഷ്ടപ്പെടുത്തരുതെന്ന് ഗവർണർ പറഞ്ഞത് വിദ്യാഭ്യാസ രംഗത്തെ തകർക്കാനുള്ള ദുഷ്പ്രചാരണങ്ങൾക്കെതിരാണെന്നും മന്ത്രി കൂട്ടിച്ചേർത്തു. കേരളത്തിലെ സർവകലാശാലകളുടെ സൽപ്പേരിന് കളങ്കമുണ്ടാക്കരുതെന്ന് ഗവർണർ ആരിഫ് മുഹമ്മദ് ഖാൻ നേരത്തെ പറഞ്ഞിരുന്നു. അതിൽ വെള്ളം ചേർക്കരുത്. അത്തരം നടപടികൾ ആരുടെ ഭാഗത്ത് നിന്നുമുണ്ടാകരുതെന്നും ഗവർണർ മാധ്യമങ്ങളോട് പറഞ്ഞിരുന്നു.

മാർക്ക്ദാന വിവാദത്തിൽ എംജി സർവകലാശാല തെറ്റ് തിരിച്ചറിഞ്ഞ് തിരുത്തിയിട്ടുണ്ടെന്ന് ഗവർണർ പറഞ്ഞു. സംഭവത്തിൽ കൂടുതൽ നടപടികളിലേക്ക് ഇപ്പോൾ കടക്കുന്നില്ലെന്നും ഗവർണർ വ്യക്തമാക്കിയിരുന്നു. അധികാരപരിധിക്ക് പുറത്തുള്ള നടപടിയാണ് സർവകലാശാല കൈക്കൊണ്ടത്. ഈ മാസം 16-ന് വൈസ്. ചാൻസലർമാരുടെ യോഗം വളിച്ചിട്ടുണ്ട്. പ്രശ്നങ്ങളെല്ലാം അതിൽ ചർച്ച ചെയ്യുമെന്നും ഗവർണർ മാധ്യമങ്ങളോട് പ്രതികരിച്ചു. മന്ത്രി കെടി ജലീൽ അധികാര ദുർവിനിയോഗം നടത്തിയെന്ന സെക്രട്ടറിയുടെ റിപ്പോർട്ട് താൻ കൈപ്പറ്റിയിട്ടില്ലെന്നും അദ്ദേഹം അറിയിക്കുകയായിരുന്നു.

ഗവർണറുടെ അനുമതിയില്ലാതെ സാങ്കേതിക സർവകലാശാല അദാലത്തിൽ മന്ത്രി പങ്കെടുത്തത് തെറ്റാണെന്നും. തോറ്റ വിദ്യാർത്ഥിയുടെ ഉത്തരക്കടലാസ് മൂന്നാമതും മൂല്യനിർണ്ണയം നടത്താനുള്ള തീരുമാനം വിസി അംഗീകരിക്കാൻ പാടില്ലായിരുന്നുവെന്നും ഗവർണറുടെ സെക്രട്ടറി തയ്യാറാക്കിയ റിപ്പോർട്ടിലുണ്ടായിരുന്നു. ഇതുമായി ബന്ധപ്പെട്ടാണ് മാധ്യമങ്ങൾ ഗവർണറിൽ നിന്ന് പ്രതികരണം തേടിയത്.