Forex Rate:

1 usd = 76.25 inr 1 gbp = 94.16 inr 1 eur = 85.23 inr 1 aed = 20.76 inr 1 sar = 20.32 inr 1 kwd = 247.66 inr
Oct / 202023Friday

നിങ്ങൾ സ്‌ട്രോംഗ് ആയി തീരുമാനമെടുക്കൂ.. ഞങ്ങൾ ഉണ്ട് നിങ്ങളുടെ കൂടെ; ആർഎസ്‌പി സംസ്ഥാന സമ്മേളനം കൂടിക്കൊണ്ടിരിക്കുമ്പോൾ പിണറായി ഇതാണ് എന്നോടു പറഞ്ഞത്; ഈ വാക്കിന്റെ ബലത്തിലാണ് യുഡിഎഫ് ബന്ധം ഒഴിവാക്കിയത്; 2006 നിയമസഭാ തിരഞ്ഞെടുപ്പ് വേളയിൽ പറഞ്ഞത് ഒരു പാർട്ടിയെയും മുന്നണിയിൽ എടുക്കരുതെന്ന് പിബി നിർദ്ദേശമുണ്ടെന്നും; നിയമസഭയിൽ ലാവ്‌ലിൻ പ്രശ്‌നം ഉന്നയിച്ചതിന്റെ പേരിൽ പിണറായി രാഷ്ട്രീയജീവിതം തകർത്തു; മറുനാടന് മുന്നിൽ മനസ് തുറന്ന് എ വി താമരാക്ഷൻ

നിങ്ങൾ സ്‌ട്രോംഗ് ആയി തീരുമാനമെടുക്കൂ.. ഞങ്ങൾ ഉണ്ട് നിങ്ങളുടെ കൂടെ; ആർഎസ്‌പി സംസ്ഥാന സമ്മേളനം കൂടിക്കൊണ്ടിരിക്കുമ്പോൾ പിണറായി ഇതാണ് എന്നോടു പറഞ്ഞത്; ഈ വാക്കിന്റെ ബലത്തിലാണ് യുഡിഎഫ് ബന്ധം ഒഴിവാക്കിയത്; 2006 നിയമസഭാ തിരഞ്ഞെടുപ്പ് വേളയിൽ പറഞ്ഞത് ഒരു പാർട്ടിയെയും മുന്നണിയിൽ എടുക്കരുതെന്ന് പിബി നിർദ്ദേശമുണ്ടെന്നും; നിയമസഭയിൽ ലാവ്‌ലിൻ പ്രശ്‌നം ഉന്നയിച്ചതിന്റെ പേരിൽ പിണറായി രാഷ്ട്രീയജീവിതം തകർത്തു; മറുനാടന് മുന്നിൽ മനസ് തുറന്ന് എ വി താമരാക്ഷൻ

എം മനോജ് കുമാർ

തിരുവനന്തപുരം: ലാവ്‌ലിൻ കേസ് വിവാദ വിഷയമാക്കിയതിന്റെ പേരിൽ പിണറായി വിജയന് വന്ന പ്രതികാരബുദ്ധി തന്റെ രാഷ്ട്രീയ ജീവിതം തകർത്തുവെന്ന് ആർഎസ്‌പി നേതാവ് എ.വി.താമരാക്ഷൻ. സിപിഎം എന്ന് പറഞ്ഞാൽ വലിയ ചതിയും വഞ്ചനയുമാണ്. അത്തരമൊരു വഞ്ചനയാണ് പിണറായി എന്നോടും കാണിച്ചത്. പിണറായിയെപ്പോലെ ഇത്രയും പ്രതികാരബുദ്ധിയുള്ള രാഷ്ട്രീയ നേതാവ് കേരളത്തിൽ വേറെയില്ലെന്നും താമരാക്ഷൻ മറുനാടൻ മലയാളിയോട് പറഞ്ഞു. അടുത്ത് പുറത്തിറങ്ങുന്ന തന്റെ ആത്മകഥയെക്കുറിച്ച് മറുനാടൻ മലയാളിയോട് സംസാരിക്കുകയായിരുന്നു താമരാക്ഷൻ. ആദ്യം നിയമസഭയിൽ ലാവ്‌ലിൻ പ്രശ്‌നം ഉന്നയിച്ചത് താനായിരുന്നു. ഇതിന്റെ പേരിൽ പിണറായി വിജയൻ തന്റെ രാഷ്ട്രീയ ജീവിതം അടിമുടി തകർത്തുവെന്ന് താമരാക്ഷൻ പറഞ്ഞു. 1999ലാണ് പ്രശ്‌നം നിയമസഭയിൽ ഞാൻ ഉന്നയിച്ചത്. ഇടപാടിന്റെ സർവവിവരങ്ങളും ശേഖരിച്ച് നിയമസഭയിൽ ലാവ്‌ലിന്റെ പേരിൽ പിണറായിക്കെതിരെ ആഞ്ഞടിച്ചത് ഞാനായിരുന്നു. എന്റെ വാക്കുകളിലൂടെയാണ് ലാവ്‌ലിൻ അഴിമതി കേരളം അറിയുന്നത്.

നിയമസഭയിൽ ആഞ്ഞടിച്ചതിന് പിന്നാലെ നിയമസഭാ തിരഞ്ഞെടുപ്പിൽ ലാവ്‌ലിൻ പ്രശ്‌നത്തിൽ യുഡിഎഫ് ഭാഗത്ത് നിന്ന് മുഖ്യ പ്രാസംഗികൻ ഞാനായിരുന്നു. 2001 നിയമസഭാ തിരഞ്ഞെടുപ്പിൽ ലാവ്‌ലിൻ അഴിമതിയെക്കുറിച്ച് എ.കെ.ആന്റണിക്ക് ഒപ്പം 140 നിയമസഭാ മണ്ഡലങ്ങളിലും ചെന്ന് പ്രസംഗിച്ചത് ഞാനായിരുന്നു. ഇതൊന്നും പിണറായി വിജയൻ മറന്നില്ല. ചതിയിൽപ്പെടുത്തിയുള്ള കരുനീക്കങ്ങളിലൂടെ പിണറായി വിജയൻ എന്റെ രാഷ്ടീയെ ജീവിതം പിന്നീട് തകർക്കുന്നത് ഞാൻ പോലും അറിഞ്ഞില്ലാ എന്നായിരുന്നു വാസ്തവം. കോടിയേരി ബാലകൃഷ്ണൻ വരെ പിണറായിക്ക് വേണ്ടിയുള്ള കരുനീക്കങ്ങളിൽ വലിയ പങ്കു വഹിച്ചു. പിണറായി നടത്തിയ കരുനീക്കങ്ങളിൽ കുടുങ്ങി എന്റെ രാഷ്ട്രീയ ജീവിതം തന്നെ പിന്നീട് തകർന്നടിഞ്ഞു. യുഡിഎഫിൽ നിൽക്കുമ്പോൾ ഇടത് പിന്തുണയുള്ള മന്ത്രിസഭയ്ക്ക് വേണ്ടി പിണറായിയുടെ വാക്ക് വിശ്വസിച്ച് കരുനീക്കങ്ങൾ നടത്തി. കെ.കരുണാകരനെ മുഖ്യമന്ത്രിയാക്കി, ഗൗരിയമ്മയെ ഡെപ്യൂട്ടി മുഖ്യമന്ത്രിയാക്കി ആന്റണി മന്ത്രിസഭയെ താഴെയിറക്കാൻ നീക്കം നടത്തിയത് പിണറായിയുടെ വാക്ക് വിശ്വസിച്ചാണ്.

അന്ന് കരുനീക്കം പൊളിഞ്ഞു. എല്ലാം ആർഎസ്‌പി(ബി)യെ ഇടതുമുന്നണിയിൽ അംഗമാക്കാം എന്ന് പറഞ്ഞ പിണറായിയുടെ വാക്ക് വിശ്വസിച്ചാണ്. ആർഎസ്‌പി (ബി) സംസ്ഥാന സമ്മേളനത്തിൽ യുഡിഎഫ് വിടാനുള്ള സുപ്രധാന തീരുമാനം കൈക്കൊള്ളുമ്പോൾ അതിനു ആധാരമാക്കിയത് ഞങ്ങൾ സ്‌ട്രോംഗ് ആയി തീരുമാനമെടുക്കൂ.. ഞങ്ങൾ ഉണ്ട് നിങ്ങളുടെ കൂടെ എന്ന പിണറായി വിജയന്റെ വാക്ക് വിശ്വസിച്ചാണ്. ആർഎസ്‌പി യുഡിഎഫ് വിട്ടപ്പോൾ ആർഎസ്‌പിയെ സിപിഎം ഇടതുമുന്നണിയിൽ അംഗമാക്കിയില്ല. പിണറായി വിരോധം തീർക്കുകയായിരുന്നു. യുഡിഎഫിലും എൽഡിഎഫിലും ഇല്ലാത്ത പാർട്ടിയായി ഞങ്ങളെ മാറ്റിയതിനു പിന്നിൽ പിണറായി വിജയൻ മാത്രമാണ്. അതുവഴി എന്റെ രാഷ്ട്രീയ ജീവിതവും പിണറായി തകർത്തു. എല്ലാം ലാവ്‌ലിൻ കേസിന്റെ പേരിൽ-താമരാക്ഷൻ പറയുന്നു.

1998-ൽ ആർഎസ്‌പി രണ്ടായി പിളർന്നിരുന്നു. ഞങ്ങൾ അന്ന് ഇടതുപക്ഷത്തിനൊപ്പം നിൽക്കണമെന്നു ആഗ്രഹിച്ചിരുന്നു. പക്ഷെ ഞങ്ങളെ ഉൾക്കൊള്ളാൻ അന്ന് സിപിഎം സെക്രട്ടറി ആയിരുന്ന പിണറായി വിജയൻ തയ്യാറായില്ല. ഞങ്ങൾ പല തവണ സിപിഎമ്മിന്റെ വാതിലിൽ മുട്ടിയിരുന്നു. അതൊരിക്കലും തുറക്കപ്പെട്ടിട്ടുമില്ല. ഈ സമയത്ത് തന്നെയാണ് ലാവ്‌ലിൻ വിവാദം കൂടം തുറന്നു പുറത്തുവരുന്നത്. ഞാനും ബാബു ദിവാകരനും ആയിരുന്നു പാർട്ടി എംഎൽഎമാർ. ആർഎസ്‌പി (ബി)യായാണ് ഞങ്ങൾ നിലകൊണ്ടത്. ഞാനാണു യുഡിഎഫ് ഭാഗമായിരുന്നുകൊണ്ട് ലാവ്‌ലിൻ വിവാദം നിയമസഭയിൽ ഉന്നയിക്കുന്നത്. അതിശക്തമായി കാര്യകാരണ സഹിതമാണ് പ്രശ്‌നം ഞാൻ ഉന്നയിക്കുന്നത്. ശക്തമായ വാദമുഖങ്ങൾ നടത്തിയുള്ള പ്രസംഗമാണ് ഞാൻ നടത്തിയത്. ഇത് നിയമസഭയെ പിടിച്ചുകുലുക്കുക തന്നെ ചെയ്തു. അതിനു ശേഷം വന്ന 2001-ലെ നിയമസഭാ തിരഞ്ഞെടുപ്പിലും ലാവ്‌ലിൻ കാര്യത്തിൽ യുഡിഎഫിന്റെ കുന്തമുന ഞാനായിരുന്നു.

ലാവലിനിൽ പങ്കുണ്ടായിരുന്നത് സുർജിത് സിംഗിന്റെ മകന്

ലാവ്‌ലിൻ ആ നിയമസഭാ തിരഞ്ഞെടുപ്പിൽ സജീവ ചർച്ചാവിഷയമായി. തിരഞ്ഞെടുപ്പിൽ യുഡിഎഫ് തന്നെ അധികാരത്തിൽ വരുകയും ചെയ്തു. എ.കെ.ആന്റണി മുഖ്യമന്ത്രിയായപ്പോൾ ലാവ്‌ലിൻ കേസിൽ തുടർ നടപടികൾ സ്വീകരിക്കാൻ മുൻപന്തിയിൽ നിന്നതും ഞാനായിരുന്നു. അന്ന് ലാവ്‌ലിൻ പ്രശ്‌നത്തിൽ എപ്പോഴും ഇടങ്കോലിട്ടു പിണറായിക്കെതിരെയുള്ള നീക്കങ്ങളുടെ മുനയോടിച്ചത് കുഞ്ഞാലിക്കുട്ടിയായിരുന്നു. ലാവ്‌ലിൻ പ്രശ്‌നം വരുമ്പോൾ എപ്പോഴും യുഡിഎഫ് യോഗങ്ങളിൽ കുഞ്ഞാലിക്കുട്ടി ഉണർന്നിരുന്നു. എല്ലാ യുഡിഎഫ് നീക്കങ്ങളുടെയും മുനയൊടിച്ചു. കുഞ്ഞാലിക്കുട്ടി പറഞ്ഞാൽ ആന്റണി അനങ്ങില്ല. ഈ ദുർബലവശം എപ്പോഴും കുഞ്ഞാലിക്കുട്ടി മുതലെടുത്തു. അന്ന് ലാവ്‌ലിൻ പ്രശ്‌നത്തിൽ യുഡിഎഫ് യോഗത്തിൽ എന്നെ പിന്തുണയ്ക്കാൻ ഉണ്ടായിരുന്നത് വെറും മൂന്നു യുഡിഎഫ് നേതാക്കൾ മാത്രമാണ്. എം വിരാഘവൻ, ആർ.ബാലകൃഷണപിള്ള, ടി.എം.ജേക്കബ് എന്നിവർ മാത്രം. ഇവർ എല്ലാ നീക്കങ്ങൾക്കും എന്നെ പിന്തുണച്ചു. പക്ഷെ മുസ്ലിംലീഗ് ഉടന്തടിച്ചു നിന്നു. ഇതോടെയാണ് ലാവ്‌ലിൻ പ്രശ്‌നത്തിൽ 2001-ലെ യുഡിഎഫ് സർക്കാരിനു കൂടുതൽ ആയി ഒന്നും ചെയ്യാൻ കഴിയാതിരുന്നത്. ലാവ്‌ലിൻ അഴിമതിക്കേസിൽ അറുപത്തിയഞ്ചു എംഎൽഎമാരൊക്കൊണ്ട് ഒപ്പിടുവിച്ചു ഞാൻ മുഖ്യമന്ത്രിക്ക് ആവശ്യം എഴുതി നൽകി. എന്നിട്ടും ആന്റണി അനങ്ങിയില്ല.

അന്ന് സിപിഎം ജനറൽ സെക്രട്ടറി ആയിരുന്ന ഹർകിഷൻ സിങ് സുർജിത് സിംഗിന്റെ മകന് ലാവ്‌ലിൻ കേസിൽ പങ്കുണ്ടായിരുന്നു. ലാവ്‌ലിൻ കമ്പനിയുടെ എജന്റ്‌റ് സുർജിത്തിന്റെ മകൻ ആയിരുന്നു. സുർജിത്തും യെച്ചൂരിയും കൂടി പോയി സോണിയാ ഗാന്ധിയെ കണ്ടിരുന്നു. അതിന്റെ ഒരു സമ്മർദ്ദവും ആന്റണിക്കുണ്ടായിരുന്നു. അതിനാൽ ആന്റണി ഒന്നും ചെയ്തില്ല. ആന്റണി ഒഴിഞ്ഞതിനെ തുടർന്ന് ഉമ്മൻ ചാണ്ടി സർക്കാർ വന്നപ്പോൾ അവസാന കാബിനെറ്റ് യോഗത്തിലാണ് ലാവ്‌ലിൻ കേസ് സിബിഐയ്ക്ക് വിട്ടത്. ആന്റണി സർക്കാരിന്റെ കാലത്ത് കുഞ്ഞാലിക്കുട്ടി ആയിരുന്നു വ്യവസായ മന്ത്രി. അന്ന് 14 പൊതുമേഖലാ സ്ഥാപനങ്ങൾ സ്വകാര്യ വ്യക്തികൾക്ക് വിറ്റഴിക്കാൻ പദ്ധതി തയ്യാറാക്കിയിരുന്നു. വ്യവസായ വകുപ്പിന്റെ നേതൃത്വത്തിലായിരുന്നു ഇതിന്റെ ശ്രമങ്ങൾ നടന്നത്. ഈ കാര്യത്തിൽ ശക്തമായ എതിർപ്പുമായി ഞാൻ യുഡിഎഫിൽ നിലകൊണ്ടു. നയപരമായ കാര്യം യുഡിഎഫിൽ ചർച്ചയ്ക്ക് വെയ്ക്കാതെ കാബിനെറ്റ് യോഗത്തിൽ വെച്ച് കുഞ്ഞാലിക്കുട്ടി അനുമതി നേടിയെടുക്കുകയായിരുന്നു.

ഇത് ഓർഡർ ആയപ്പോഴാണ് ഞാൻ അടക്കമുള്ള യുഡിഎഫ് നേതാക്കൾ വിവരമറിയുന്നത്. എത്രയോ തൊഴിലാളികൾ ജോലി ചെയ്യുന്ന സ്ഥാപനങ്ങളാണിത്. ഇങ്ങിനെ ഏകപക്ഷീയമായി ഒരു തീരുമാനം എടുക്കാൻ കാബിനെറ്റിന് സാധിക്കില്ല. അതിനാൽ ഈ കാര്യത്തിൽ ഞാൻ ശക്തമായി രംഗത്ത് വന്നു. മുഖ്യമന്ത്രി ആന്റണിയുടെ കാബിനിൽ കയറി ഞാൻ കാര്യം പറഞ്ഞു. ഇത് കാബിനെറ്റ് തീരുമാനം എന്നാണ് മറുപടിയായി ആന്റണി പറഞ്ഞത്. ഇത് നയപരമായ തീരുമാനം അല്ലേ, അതെങ്ങിനെ കാബിനെറ്റ് തീരുമാനിക്കും എന്ന് ഞാൻ തിരിച്ചു ചോദിച്ചു. ഇത് യുഡിഎഫിൽ ചർച്ച ചെയ്യേണ്ട വിഷയമാണ്. ഇത് സംസ്ഥാനത്തിന്റെ പൊതു സമ്പത്താണ്. ഈ കാര്യത്തിൽ പ്രതിപക്ഷത്തിന്റെ കൂടി അഭിപ്രായം തേടണം. ഇത് നടപ്പിലായാൽ മുഖ്യമന്ത്രി എന്ന നിലയിൽ നിങ്ങളുടെ സ്ഥാനം ചവറ്റുകുട്ടയിൽ ആയിരിക്കുമെന്ന് അന്ന് ഞാൻ ആന്റണിയോട് പറഞ്ഞു. ഇതോടെയാണ് ആന്റണിയുടെ ചിന്ത ഈ കാര്യത്തിൽ പറഞ്ഞു. ആലപ്പുഴ കെഎസ്ഡിപി, ഓട്ടോ കാസ്റ്റ്, കേരള സോപ്‌സ്, ചെങ്ങന്നൂർ, കോട്ടയം ടെക്‌സ്‌റ്റൈൽ മിൽ തുടങ്ങി എല്ലാം ലാൻഡഡ് പ്രോപ്പർട്ടീസ് ആയിരുന്നു. താങ്കൾ യുഡിഎഫ് കൺവീനർ ആയി ഇരിക്കുമ്പോഴാണ് അച്യുതമേനോനും ടി.വി.തോമസും പൊതുമേഖലയിൽ ഒരു മരുന്ന് കമ്പനി എന്ന നിലയിൽ കെഎസ്ഡിപി സ്ഥാപിച്ചത്. അതാണ് ഇപ്പോൾ നിങ്ങൾ തൂക്കി വിൽക്കാൻ പോകുന്നത് എന്ന് പറഞ്ഞു.

കോടിയേരി എന്നെ വന്നു കണ്ടു, ആന്റണിയെ താഴെയിറക്കാൻ കരുനീക്കം നടത്തി

യുഡിഎഫ് യോഗത്തിലും ഇത് ചർച്ചാവിഷയമായി. കുഞ്ഞാലിക്കുട്ടി പറഞ്ഞത് തീരുമാനം എടുത്തത് താമരാക്ഷന്റെ പാർട്ടി മന്ത്രിയായിരുന്ന ബാബു ദിവാകരൻ കൂടി ഇരുന്ന മന്ത്രിസഭാ യോഗമാണ്. പക്ഷെ ഞാൻ പറഞ്ഞു. ഇത് ബാബു ദിവാകരൻ അല്ല പാർട്ടിയാണ് തീരുമാനിക്കേണ്ടത്. നയപരമായ തീരുമാനമാണ് എടുക്കേണ്ടത്. പൊതുമേഖലാ കമ്പനികൾ വിൽക്കാനായി തീരുമാനം വന്നാൽ ഈ നിമിഷം ഞങ്ങൾ ആർഎസ്‌പി യുഡിഎഫ് വിടും എന്ന് ഞാൻ പറഞ്ഞു. ഇതോടെ കടുംകൈ ഒന്നും വേണ്ട എന്നോടു ഇരിക്കാൻ ആന്റണി ആവശ്യപ്പെട്ടു. ഇതോടെ തീരുമാനം താത്ക്കാലത്തേക്ക് നിർത്തി. ഒരു കമ്മറ്റിയെവെച്ചു. ആ കമ്മറ്റിയുടെ ചെയർമാനും എന്നെയാക്കി. ഈ സമയത്ത് പ്രതിപക്ഷത്തിന്റെ ശ്രദ്ധ എന്നിലേക്ക് പതിഞ്ഞു. ഇതോടെയാണ് ഇടത് നേതാക്കൾ എന്നെ ബന്ധപ്പെടുന്നത്. കോടിയേരിയാണ് എന്നെ വന്നു കാണുന്നത്. ഇതിനു പിന്നിൽ പിണറായിയായിരുന്നു. ആന്റണി മന്ത്രിസഭയെ താഴെയിറക്കാനുള്ള രാഷ്ട്രീയ നീക്കങ്ങൾക്ക് പിണറായി എന്നെ ഉപയോഗിക്കുകയായിരുന്നു. ഇടത് മുന്നണിയിൽ ചേർക്കാം എന്ന പിണറായിയുടെ വാക്ക് വിശ്വസിച്ചാണ് ആന്റണി മന്ത്രിസഭയെ താഴെയിറക്കാനുള്ള രാഷ്ട്രീയ നീക്കങ്ങൾക്ക് ഞാൻ കാർമ്മികത്വം വഹിച്ചത്. നീക്കം പൊളിഞ്ഞെങ്കിലും എല്ലാം പിണറായി വിജയൻ എന്ന ഒരൊറ്റ നേതാവിനെ വിശ്വസിച്ചായിരുന്നു.

കോടിയേരി എന്ന വന്നു കണ്ടത് മന്ത്രിസഭയെ താഴെ തള്ളിയിടാൻ ലക്ഷ്യമിട്ടായിരുന്നു. കോടിയേരി പറഞ്ഞത് താമരാക്ഷൻ ഞങ്ങൾക്ക് തെറ്റുപറ്റിപ്പോയി. നിങ്ങൾ ഞങ്ങളുടെ കൂടെ വേണ്ടതായിരുന്നു. ഞാൻ ഇടത്പക്ഷത്തോടൊപ്പം നിൽക്കാനാണ് ആഗ്രഹിക്കുന്നത്. ഞങ്ങൾ ചർച്ച ചെയ്തു. പിണറായി സമ്മതിച്ചോ എന്ന് ഞാൻ ചോദിച്ചു. പിണറായിയാണ് അന്ന് സംസ്ഥാന സെക്രട്ടറി. പിണറായി അറിഞ്ഞുള്ള നീക്കം എന്നാണ് കോടിയേരി പറഞ്ഞത്. കോടിയേരി നമ്പർ തന്നത് പ്രകാരം ഞാൻ പിണറായിയെ വിളിച്ചു. താമരാക്ഷൻ എനിക്ക് നിന്നെ ഒന്ന് കാണണം എന്നാണ് പിണറായി പറഞ്ഞത്. എനിക്ക് അങ്ങിനെ പരസ്യമായി കാണാൻ കഴിയില്ല. രഹസ്യമായി എങ്ങിനെ കാണാം എന്നാണ് പിണറായി ചോദിച്ചത്. അത് പറയാം എന്ന് ഞാൻ പറഞ്ഞു. കോലിയക്കോട് കൃഷ്ണൻ നായരുടെ വീട്ടിൽ ലോ അക്കാദമി കൊമ്പൗണ്ടിൽ തന്നെയുള്ള വീട്ടിൽ വെച്ച് കാണാം എന്നാണ് ഞാൻ പറഞ്ഞത്. അങ്ങിനെയാണ് കോലിയക്കൊടിന്റെ വീട്ടിൽ വെച്ച് ഞാനും പിണറായിയും കാണുന്നത്.

ഞങ്ങൾക്ക് ഇടതുമുന്നണിയിൽ സ്ഥാനം. കരുണാകരന് ഒപ്പമുള്ള എംഎൽഎമാരെ വെച്ച് ബാലകൃഷ്ണപിള്ള, ജേക്കബ് എന്നിവരെ ചേർത്ത് ബദൽ മന്ത്രിസഭാ എന്നാണ് തീരുമാനിച്ചത്. അന്ന് മന്ത്രിയായിരുന്ന ടി.എം.ജേക്കബും കോലിയക്കോടിന്റെ വീട്ടിൽ ചെന്നു. ഈ ഘട്ടത്തിൽ വി.ജെ.പൗലോസ്, ജോയി എന്നിവർ നീക്കത്തിൽ നിന്നും മാറി. ഇതോടെ ഗൗരിയമ്മയെ കൂടി കൂട്ടാൻ തീരുമാനിച്ചു. എം.എസ്.മണിയെയാണ് അന്ന് ഗൗരിയമ്മയുടെ അടുത്തേക്ക് വിട്ടത്. കരുണാകരൻ മുഖ്യമന്ത്രി, ഗൗരിയമ്മ ഡെപ്യൂട്ടി മുഖ്യമന്ത്രി എന്ന ഫോർമുലയാണ് വെച്ചത്. മണിയുടെ ദൗത്യം പരാജയപ്പെട്ടപ്പോൾ കെ.പി.പി.നമ്പ്യാരെ വീണ്ടും ഗൗരിയമ്മയുടെ അടുത്തേക്ക് വിട്ടു. സ്‌ട്രെച്ചറിൽ ആണ് അന്ന് തളർന്നു കിടക്കുകയായിരുന്ന നമ്പ്യാർ ഗൗരിയമ്മയെ കാണാൻ പോകുന്നത്. ഞാനും ഗൗരിയമ്മയെ കണ്ടു. രണ്ടു മണിക്കൂറോളം സംസാരിച്ചു. പിന്നെ വിഎസും ഗൗരിയമ്മയെ കണ്ടു. വിഎസും ഗൗരിയമ്മയും തമ്മിലുള്ള പിണക്കം തീർത്താണ് ഇവർ തമ്മിലുള്ള കൂടിക്കാഴ്ച നടക്കുന്നത്. വിഎസും ഗൗരിയമ്മയും കൂടി കണ്ടു. ഓപ്പറേഷൻ സക്‌സസ് എന്നാണ് ഒരൊറ്റ വാക്കിൽ ഈ കൂടിക്കാഴ്ചയെക്കുറിച്ച് വി എസ് എന്നോടു പറഞ്ഞത്. ഈ കൂടിക്കാഴ്ചയിലാണ് ഗൗരിയമ്മ മന്ത്രിസഭാ രൂപീകരണത്തിനു സമ്മതം മൂളുന്നത്.

പക്ഷെ അവസാനഘട്ടത്തിൽ എ.കെ.ആന്റണി നീക്കങ്ങൾ മണത്തറിഞ്ഞു. അസ്വസ്ഥനായ ആന്റണി കുളിക്കാൻ പോലും മിനക്കെടാതെ അതിരാവിലെ തന്നെ ഗൗരിയമ്മയെ കാണാൻ ആലപ്പുഴയ്ക്ക് തിരിച്ചു. എന്താണ് ഗൗരിയമ്മേ ഈ കേൾക്കുന്നത് എന്നാണ് ആൻഡ്ണി ചോദിച്ചത്. ഇതോടെ ഗൗരിയമ്മ കളംമാറി. എല്ലാം ആ താമരാക്ഷന്റെ പണി എന്നാണ് ഗൗരിയമ്മ ആന്റണിയോട് പറഞ്ഞത്. ഇതോടെ ബദൽ മന്ത്രിസഭാ നീക്കം പൊളിഞ്ഞു പാളീസായി. കുറ്റം മുഴുവൻ എന്റെ ചുമലിൽ ആയി. ആർഎസ്‌പിക്ക് യുഡിഎഫിൽ ഉള്ള സ്ഥാനത്തിനും ഇളക്കം തട്ടി. എന്റെ രാഷ്ട്രീയ ഭാവിക്കും ഗൗരിയമ്മയുടെ വാക്കുകൾ തിരിച്ചടിയായി. ഐയുമായി ഒത്തുള്ള നീക്കം ആയതിനാൽ എ ഗ്രൂപ്പുകാർ എന്നോടു കടുത്ത വിരോധത്തിലായി. എല്ലാം സിപിഎം മുൻപ് തന്നെ കണക്കുകൂട്ടിയിരിക്കണം. ഇത് ഹൈക്കമാൻഡും അറിഞ്ഞു. ഘടകകക്ഷി നേതാക്കളെ എല്ലാം സോണിയ വിളിപ്പിച്ചു. ഞാനും ഡൽഹിയിലെത്തി. പ്രണാബ് മുഖർജിയുടെ നിർദ്ദേശ പ്രകാരം ഞാൻ ലീഡർ കെ.കരുണാകരനെ വിളിച്ചു.

കോൺഗ്രസ് ഒറ്റക്കെട്ടായി നിൽക്കാൻ വേണ്ടിയായിരുന്നു ഈ ഫോൺ കോൾ. കെ.മുരളീധരനെ ഉപമുഖ്യമന്ത്രി സ്ഥാനം നൽകിയുള്ള ഒരു ഫോർമുലയാണ് അപ്പോൾ ഉരുത്തിരിഞ്ഞത്. ഇതിന്റെയും കാർമ്മികത്വം വഹിച്ചത് ഞാൻ തന്നെയായിരുന്നു. ലീഡറെയും ഇ.അഹമ്മദിനെയും അന്ന് കെപിസിസി അധ്യക്ഷൻ ആയിരുന്ന കെ. മുരളീധരനെയും ബന്ധപ്പെടുന്നത് ഞാൻ തന്നെയായിരുന്നു. എന്റെ നീക്കങ്ങളിൽ കുഞ്ഞാലിക്കുട്ടി ക്ഷുഭിതനും ആയിരുന്നു. ചെറിയ പാർട്ടിയായ ആർഎസ്‌പിയാണോ ഇത്തരം കാര്യങ്ങൾ തീരുമാനിക്കുന്നത് എന്നാണ് കുഞ്ഞാലിക്കുട്ടി അന്ന് ചോദിച്ചത്. പക്ഷെ ആ നീക്കങ്ങളും ഫലം കണ്ടില്ല. ലോക്‌സഭാ തിരഞ്ഞെടുപ്പിൽ കനത്ത തോൽവിയാണ് യുഡിഎഫിനെ ബാധിച്ചത്. ആന്റണിയുടെ പൊലീസ് നയവും ന്യൂനപക്ഷ വിരുദ്ധ പ്രസ്താവനയുമാണ് കാരണം എന്നാണ് മുസ്ലിം ലീഗ് അന്ന് പറഞ്ഞത്. ഇത് അറിഞ്ഞു സ്തബ്ദനായി മാറിയത് അന്നത്തെ മുഖ്യമന്ത്രിയായിരുന്ന ആന്റണിയായിരുന്നു. യുഡിഎഫ് യോഗത്തിൽ തോൽവിയുടെ കാര്യകാരണ സഹിതം വാക്കൗട്ട് നടത്തിയത് കുഞ്ഞാലിക്കുട്ടിയാണ്. മാണിയാണ് കുഞ്ഞാലിക്കുട്ടിയെ തിരികെ കൂട്ടിക്കൊണ്ടു വന്നത്. ജനവിധി അംഗീകരിക്കുന്നു എന്ന് തുടങ്ങി രണ്ടു വരി പ്രമേയമാണ് അന്ന് യുഡിഎഫ് യോഗം പാസാക്കിയത്. തോൽവിയെക്കുറിച്ച് ചർച്ച നടത്തിയില്ല.

പിണറായിയുടെ വാക്കു വിശ്വസിച്ചത് ചതിവായി

പിന്നീട് തിരുവനന്തപുരത്ത് ചേർന്ന ആർഎസ്‌പി സംസ്ഥാന സമ്മേളനത്തിലാണ് യുഡിഎഫ് ബന്ധം ഞങ്ങൾ ഉപേക്ഷിക്കുന്നത്. സംസ്ഥാന സമ്മേളനം കൂടിക്കൊണ്ടിരിക്കുമ്പോഴാണ് അന്ന് സിപിഎം പാർട്ടി സെക്രട്ടറിയായ പിണറായി വിജയനെ ഞാൻ ഫോണിൽ വിളിക്കുന്നത്. നിങ്ങൾ സ്‌ട്രോംഗ് ആയി തീരുമാനമെടുക്കൂ.. ഞങ്ങൾ ഉണ്ട് നിങ്ങളുടെ കൂടെ എന്നാണു പിണറായി പറഞ്ഞത്. ഈ വാക്ക് വിശ്വസിച്ചാണ് യുഡിഎഫ് ബന്ധം ആർഎസ്‌പി ഉപേക്ഷിക്കുന്നത്. എന്നാൽ ഞങ്ങളെ ഞങ്ങൾ കരുതിയത് അന്ന് നടത്തിയ ബദൽ മന്ത്രിസഭാ രൂപീകരണം അടക്കമുള്ള കാര്യങ്ങളിൽ ഞങ്ങൾ സിപിഎമ്മിന് ഒപ്പം നിന്നതാണ്. പിണറായി വിജയന്റെ വാക്ക് വിശ്വസിച്ചാണ് ആന്റണി മന്ത്രിസഭയെ താഴെയിറക്കാൻ ഞാൻ ശ്രമം നടത്തിയത്. എന്നാൽ മുന്നണിയിൽ എടുക്കും എന്ന് ഉറപ്പ് പറഞ്ഞ പിണറായി വിജയൻ ഈ വാക്ക് പാലിച്ചില്ല.

2006 നിയമസഭാ തിരഞ്ഞെടുപ്പിൽ പിണറായി വിജയൻ പറഞ്ഞത് ഒരു പാർട്ടിയെയും മുന്നണിയിൽ എടുക്കരുതെന്ന് പോളിറ്റ് ബ്യൂറോ നിർദ്ദേശിച്ചിട്ടുണ്ട് എന്നാണ്. അപ്പോഴാണ് എല്ലാം ചതിയായിരുന്നുവെന്ന് ഞാൻ മനസിലാക്കുന്നത്. എന്നെ യുഡിഎഫിൽ നിന്നും കുടിയിറക്കാനുള്ള പ്രതികാരബുദ്ധിയോടെയുള്ള നീക്കത്തിലാണ് പിണറായി ഏർപ്പെട്ടത്. അപ്പോഴാണ് എല്ലാം ചതിയായിരുന്നുവെന്നു ഞാൻ തിരിച്ചറിയുന്നത്. നിയമസഭാ തിരഞ്ഞെടുപ്പ് സമയത്ത് തലശ്ശേരി കോടിയേരിയുടെ നിർദ്ദേശപ്രകാരം സിപിഎമ്മിന് വേണ്ടി ഞങ്ങൾ പ്രചാരണവും നടത്തിയിരുന്നു. എന്നോടു കോടിയേരി നേരിട്ട് നിർദ്ദേശിച്ചത് പ്രകാരമാണ് ഞാൻ തലശ്ശേരിപോയി അന്ന് ഇടതുമുന്നണിക്ക് വേണ്ടി പ്രചാരണം നടത്തിയത്. വലിയ ചതിയിലാണ് അന്ന് ആർഎസ്‌പി കുടുങ്ങിയത്. 2014 പാർലമെന്റ് തിരഞ്ഞെടുപ്പിലും ഞങ്ങൾ സിപിഎമ്മുമായി ബന്ധപ്പെട്ടിരുന്നു. പക്ഷെ പിണറായി ഗൗനിച്ചതേയില്ല. അതിന്നിടയിൽ ആർഎസ്‌പി(ബി)യും പിളർന്നിരുന്നു. എന്നോടൊപ്പം നിന്ന ഷിബു ബേബി ജോണും ബാബു ദിവാകരന്റെ വഴി തന്നെ സ്വീകരിച്ചു. യുഡിഎഫിൽ നിന്നു. എന്റെ ഒപ്പമുള്ള ആർഎസ്‌പിക്ക് പിന്നെ ഒരു മുന്നണിയിലും കയറാൻ കഴിഞ്ഞില്ല. 2014-ൽ ആലപ്പുഴ പാർലമെന്റ് സീറ്റിൽ ഞാൻ മത്സരിച്ചിരുന്നു. അന്ന് ബിജെപി പിന്തുണ സ്വീകരിച്ചാണ് ഞാൻ ആലപ്പുഴ മത്സരിച്ചത്. ഇപ്പോൾ ഒരു മുന്നണിയിലുമില്ല-താമരാക്ഷൻ പറയുന്നു.

Stories you may Like

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

More News in this category+

MNM Recommends +

Go to TOP