Forex Rate:

1 usd = 76.25 inr 1 gbp = 94.16 inr 1 eur = 85.23 inr 1 aed = 20.76 inr 1 sar = 20.32 inr 1 kwd = 247.66 inr
Apr / 202425Thursday

കേരളത്തിന് സർക്കാർ ഗാരന്റിയിൽ ഇനി പ്രതിവർഷം എടുക്കാൻ കഴിയുക 5000 കോടിയുടെ വായ്പ മാത്രം; ക്ഷേമ പെൻഷനും വികസനവും കെ എസ് ആർ ടി സിയും കെ എസ് ഇ ബിയും പ്രതിസന്ധിയിലാകും; തീരുമാനത്തിലേക്ക് കൊണ്ടെത്തിച്ചത് കെടിഡിഎഫ്‌സിയുടെ കെടുകാര്യസ്ഥത; കിഫ്ബി ഇനി തളരും

കേരളത്തിന് സർക്കാർ ഗാരന്റിയിൽ ഇനി പ്രതിവർഷം എടുക്കാൻ കഴിയുക 5000 കോടിയുടെ വായ്പ മാത്രം; ക്ഷേമ പെൻഷനും വികസനവും കെ എസ് ആർ ടി സിയും കെ എസ് ഇ ബിയും പ്രതിസന്ധിയിലാകും; തീരുമാനത്തിലേക്ക് കൊണ്ടെത്തിച്ചത് കെടിഡിഎഫ്‌സിയുടെ കെടുകാര്യസ്ഥത; കിഫ്ബി ഇനി തളരും

മറുനാടൻ മലയാളി ബ്യൂറോ

തിരുവനന്തപുരം: സർക്കാർ ഗ്യാരന്റിക്ക് റിസർവ് ബാങ്ക് കൊണ്ടുവന്ന നിയന്ത്രണം സംസ്ഥാനത്തിന്റെ വികസന പ്രവർത്തനങ്ങളെ തകർക്കും. സാമ്പത്തിക പ്രതിസന്ധിയിൽ തളരുന്ന കേരളത്തിന് ഇത് ഇരട്ട തിരിച്ചടിയാണ്. കിഫ്ബി അടക്കമുള്ള സ്ഥാപനങ്ങൾ എടുക്കുന്ന വായ്പകൾക്ക് അതിശക്തമായ നിയന്ത്രണം വരും. വായ്പ കുറയുമ്പോൾ കേരളം തളരുമെന്നാണ് വിലയിരുത്തൽ. വായ്പകൾ കണക്കില്ലാതെ പെരുകുന്നതു സംബന്ധിച്ച് ജൂലായ് 7ന് സംസ്ഥാനങ്ങളിലെ ധനവകുപ്പ് സെക്രട്ടറിമാരുടെ യോഗം ചേർന്നിരുന്നു. ഇതിന്റെ അടിസ്ഥാനത്തിലാണ് ഈ തീരുമാനങ്ങൾ.

വികസനത്തിന് മാത്രമല്ല ക്ഷേമ പെൻഷൻ കൊടുക്കാൻ പോലും വായ്പയെ ആണ് കേരളം ആശ്രയിക്കുന്നത്. ഇതെല്ലാം പുതിയ തീരുമാനത്തോടെ തകിടം മറിയും. കിഫ്ബിയെ പൂർണ്ണമായും തകർക്കുന്നതാകും തീരുമാനം. സാമൂഹ്യക്ഷേമ പെൻഷൻ കമ്പനിയുടെ വായ്പയെയും ബാധിക്കും. ഇതുമൂലം പെൻഷൻ വിതരണം പ്രതിസന്ധിയിലാകും2 കെ.എസ്.ഇ.ബി, കെ.എസ്.ആർ.ടി.സി അടക്കം പൊതുമേഖലാ സ്ഥാപനങ്ങളുടെ പ്രവർത്തനത്തെയും ബാധിക്കും. അങ്ങനെ കേരളത്തെ വെട്ടിലാക്കുന്നതാണ് പുതിയ തീരുമാനം. കേരളത്തിന്റെ പൊതുകടം 3.57ലക്ഷം കോടിയാണ്. ഇതിൽ 46, 391 കോടിയും സർക്കാർ ഗാരന്റിയിൽ മറ്റ് സ്ഥാപനങ്ങൾ എടുത്ത വായ്പയാണ്.

ഓരോ സംസ്ഥാനത്തിന് പ്രതിവർഷം നേരിട്ട് എടുക്കാവുന്ന വായ്പയ്ക്ക് പരിധിയുണ്ട്. ഇത് മറികടക്കാനായിരുന്നു ഗാരന്റി തന്ത്രത്തിലൂടെ സംസ്ഥാനങ്ങൾ വായ്പ എടുത്തത്. ഇത്തരം വായ്പകൾ സർക്കാരിന്റെ വായ്പാ പരിധിയിൽ കേന്ദ്രം കൊണ്ടു വരുമെന്ന് മുന്നറിയിപ്പ് നൽകിയിരുന്നു. ഇത് പല വിവാദത്തിനും കാരണമായി. ഈ സാഹചര്യത്തിലാണ് ഗാരന്റി വായ്പകൾക്ക് തന്നെ നിയന്ത്രണം കൊണ്ടു വരുന്നത്. ഇത് കേരളത്തെ ഏറെ പ്രതികൂലമായി ബാധിക്കുമെന്ന് ഉറപ്പാണ്.

പുതിയ വ്യവസ്ഥ പ്രകാരം കേരള സർക്കാരിന് വർഷം 5000 കോടിയുടെ വായ്പകൾക്കു മാത്രമേ ഗ്യാരന്റി നൽകാനാവൂ. പുതിയ ബഡ്ജറ്റിലും ഇതനുസരിച്ച് വികസന പദ്ധതികൾക്കടക്കമുള്ള തുക ചുരുക്കേണ്ടിവരും. കിഫ്ബി പോലുള്ള സംവിധാനങ്ങളിലൂടെ പരമാവധി വായ്പകൾ എടുക്കുകയും അതിന് സർക്കാർ ഗാരന്റി നിൽക്കുകയുമാണ് കേരളത്തിന്റെ രീതി. വികസനത്തിന് മാത്രമല്ല. ഏത് സ്ഥാപനം പ്രതിസന്ധിയിലായാലും സർക്കാർ ഗാരന്റി നിന്ന് അവരെ കൊണ്ട് വായ്പ എടുപ്പിക്കും. അതും ഇനി നടക്കില്ല. കെടിഡിഎഫ് സിക്ക് ഗാരന്റി നിന്നെങ്കിലും വാഗ്ദാനം പാലിക്കാൻ കേരളത്തിനായില്ല. ഈ സാഹചര്യത്തിലാണ് റിസർവ്വ് ബാങ്ക് കടുത്ത തീരുമാനം എടുത്തത്.

കേന്ദ്രസർക്കാർ നിയോഗിച്ച വർക്കിങ് ഗ്രൂപ്പിന്റെ റിപ്പോർട്ട് അംഗീകരിച്ചാണ് സംസ്ഥാന സർക്കാരുകൾക്കാകെ ബാധകമാകുന്ന റിസർവ് ബാങ്ക് തീരുമാനം. പദ്ധതിക്കായി വായ്പയെടുക്കുമ്പോൾ സംസ്ഥാന സർക്കാരുകൾ മൊത്തം തുകയുടെ 80ശതമാനത്തിൽ കൂടുതൽ തുകയ്ക്ക് ഗ്യാരന്റി നൽകരുത്. സ്വകാര്യ പങ്കാളിത്തമുള്ള പദ്ധതികളുടെ വായ്പകൾക്ക് ഗ്യാരന്റി നിൽക്കരുത്. ഒരുവർഷം പരമാവധി നൽകാവുന്ന ഗ്യാരന്റി മൊത്ത റവന്യു വരുമാനത്തിന്റെ 5 ശതമാനം അല്ലെങ്കിൽ മൊത്ത ആഭ്യന്തര ഉത്പാദനത്തിന്റെ 0.5 ശതമാനം ഇതിൽ ഏതാണോ കുറവ് അതായിരിക്കണം വാർഷിക ഗ്യാരന്റി പരിധി എന്നാണ് വ്യവസ്ഥ.

കെ.ടി.ഡി.എഫ്.സിയിൽ നിന്നുള്ള കെ.എസ്.ആർ.ടി.സി വായ്പയ്ക്ക് സർക്കാർ ഗ്യാരന്റി നൽകിയിരുന്നു. എന്നാൽ കെ.എസ്.ആർ.ടി.സി തുക തിരിച്ചടയ്ക്കാത്ത സാഹചര്യത്തിൽ ഗ്യാരന്റി പ്രകാരം പണം നൽകാൻ കഴിയില്ലെന്ന് സംസ്ഥാനം ഹൈക്കോടതിയെ അറിയിച്ചു. ഇതുമൂലം കെ.ടി.ഡി.എഫ്.സിയിൽ പണം നിക്ഷേപിച്ചവർക്ക് തിരിച്ചുകൊടുക്കാനായില്ല. ഇത്തരം സംഭവങ്ങൾ പരിഗണിച്ചാണ് റിസർവ് ബാങ്ക് തീരുമാനം.

വിവിധ സംസ്ഥാനങ്ങൾ ഗ്യാരന്റി നിന്നെങ്കിലും തിരിച്ചടയ്ക്കാൻ കഴിയാത്ത തുക 7.40 ലക്ഷം കോടിയാണ്. 11സംസ്ഥാനങ്ങൾ ഒരു കരുതലുമില്ലാതെയാണ് ഗ്യാരന്റി നൽകുന്നത്. ഇത് കേന്ദ്രസർക്കാരിന് വൻ ബാദ്ധ്യതയാകും. പരിധിയില്ലാത്ത വായ്പയും ഗ്യാരന്റിയും നിയന്ത്രിക്കാൻ ഈവർഷം സംസ്ഥാനങ്ങളുടെ വായ്പാപരിധിയിൽ 41,000 കോടിയാണ് കേന്ദ്രം വെട്ടിക്കുറച്ചത്.

Stories you may Like

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

More News in this category+

MNM Recommends +

Go to TOP