Forex Rate:

1 usd = 76.25 inr 1 gbp = 94.16 inr 1 eur = 85.23 inr 1 aed = 20.76 inr 1 sar = 20.32 inr 1 kwd = 247.66 inr
Mar / 202428Thursday

ജെറുശലേമും ബത്‌ലഹേമിലെ പള്ളിയും- ഇസ്രയേൽ യാത്ര 5

ജെറുശലേമും ബത്‌ലഹേമിലെ പള്ളിയും- ഇസ്രയേൽ യാത്ര 5

വിശ്വപ്രസിദ്ധ സാഹിത്യകാരനും നോവൽ സമ്മാന ജേതാവും മഹാത്മാഗാന്ധിയുടെ ആരാധന പാത്രവും ആയിരുന്ന റഷ്യൻ സാഹിത്യകാരൻ ലിയോ ടോൾസ്റ്റോയിയുടെ യുദ്ധവും സമാധാനവും എന്ന പുസ്തകത്തിൽ അദ്ദേഹം പറയുന്നു. ഓരോ യുദ്ധങ്ങളും അവസാനിക്കുന്നത് സമാധാനത്തിലാണ്, പക്ഷെ ആ സമാധാനം അടുത്ത യുദ്ധത്തിന് വേണ്ടി ഉള്ള തയ്യാറെടുപ്പിനുവേണ്ടിയാണ്. ഇസ്രയേലിന്റെ ചരിത്രത്തിലേയ്ക്ക് തിരിഞ്ഞു നോക്കിയാൽ ഇത് വളരെ ശരിയാണ് എന്നു തോന്നും.

സമാധാനം പ്രസംഗിക്കുന്ന മൂന്ന് മതങ്ങളുടെ ഈറ്റില്ലത്തിലാണ് ഈ യുദ്ധങ്ങൾ നടക്കുന്നത്. മതാധിഷ്ഠിത ഭരണ കൂടങ്ങൾ ലോകത്ത് എവിടെ ഒക്കെ നില നിൽക്കുന്നുവോ അവിടെ സമാധാനം പുലരുക വളരെ അസാദ്ധ്യമാണ്. കാരണം മതത്തിന്റെ അടിസ്ഥാനശില മത മൗലിക വാദത്തിലാണ് ഉറപ്പിച്ചിരിക്കുന്നത്. പരസ്പര സഹകരണം എന്നു പറയുന്നത് ഒന്ന് മറ്റൊന്നിനെ കീഴ്‌പ്പെടുത്തി കഴിയുമ്പോൾ ഉണ്ടാകുന്ന നിസ്സഹായതയിൽ നിന്നും ഉരുത്തിരിയുന്നതാണ്. അല്ലാത്ത സാഹചര്യത്തിൽ എല്ലാം കടന്നു കയറ്റവും കീഴ്‌പ്പെടുത്തലുമാണ് മതത്തിന്റെ മുഖ മുദ്ര ഇതാണ് ഇസ്രയേലിൽ നടക്കുന്നത്.

ജെറുശലേമിൽ കണ്ടു മുട്ടിയ ഒരു ഫ്രാൻസിക്കൻ സഭയുടെ ഫാദർ പറഞ്ഞത് ഇസ്രയേൽ എന്ന രാഷ്ട്രത്തെ നയിക്കുന്നത് ഇവിടുത്തെ യഥാസ്ഥിത യഹൂദന്മാരുടെ അഭിപ്രായമാണ്. അവർ യഹൂദന്മാരെ മാത്രമേ കാണുന്നുള്ളൂ. മറ്റുള്ളവർ അവിടെ ഉള്ളതായി പോലും അവർ ഗൗനിക്കുന്നില്ല. അവരുടെ അഭിപ്രായമാണ് ഇസ്രയേൽ ഗവൺമെന്റ് നടപ്പിലാക്കുന്നത്.

പാലസ്റ്റയിനിൽ താമസിക്കുന്ന പലരുടെയും കൈയിൽ ജെറുശലേമിലെ അവരുടെ വീടിന്റെ താക്കോലുണ്ട് പക്ഷെ അവർക്ക് അങ്ങോട്ട് തിരിച്ച് ചെല്ലാൻ കഴിയില്ല. 1967 ൽ നടന്ന യുദ്ധത്തിൽ ഇസ്രയേൽ പഴയ ജറുശലേം പിടിച്ചെടുത്തപ്പോൾ അവിടെ ഉണ്ടായിരുന്ന പലസ്റ്റീൻകാരെ പട്ടാളത്തെ ഉപയോഗിച്ച് ബലമായി ഒഴിപ്പിച്ചു. ഇതിന്റെ മറ്റൊരു വശം എന്നു പറയുന്നത് 1948ൽ നടന്ന അറബ് ഇസ്രയേൽ യുദ്ധത്തിൽ അന്ന് പഴയ ജറുശലേം ജോർദ്ദാന്റെ നിയന്ത്രണത്തിൽ എത്തി. അന്ന് അവിടെ താമസിച്ചിരുന്ന ഇസ്രയേലിയരേ മിലിട്ടറിയെ ഉപയോഗിച്ച് പുറത്താക്കി. അങ്ങനെ ഈ പിടിച്ചെടുക്കലും കടന്നു കയറ്റവും അനുസൃതം തുടർന്നു കൊണ്ടിരുന്നു. ഗോലിയത്തും ദാവീദും തമ്മിൽ നടന്ന യുദ്ധം ഇന്നും തുടരുന്നു.

ആരെങ്കിലും സമാധാനത്തിന് ശ്രമിച്ചാൽ അവർക്ക് നഷ്ടമാകുന്നത് അവരുടെ ജീവനായിരുന്നു. പലസ്റ്റീനുമായി സമാധാനത്തിന് ശ്രമിച്ച ഇസ്രയേൽ പ്രധാന മന്ത്രി ഇസക്ക് റബിൻ 1995 ൽ ടെൽ അവിവിൽ വച്ച് യഹൂദ തീവ്രവാദി യിഗാൽ അമീറിന്റെ വെടിയേറ്റ് മരിച്ചു. ഇസ്രയേലും ആയി സമാധാനക്കരാർ ഒപ്പിട്ട ഈജിപ്റ്റിന്റെ പ്രസിഡന്റ് ആയിരുന്ന അൻവർ സതതിന അദ്ദേഹത്തിന്റെ സൈന്യം തന്നെ 1981ൽ വെടി വച്ചു കൊന്നു.

ഇസ്രയേലിൽ എന്നെങ്കിലും സമാധാനം രൂപപ്പെട്ടാൽ അത് ചെന്ന് നിൽക്കുന്നത് ലോക സമാധാനത്തിലായിരിക്കും. കാരണം ലോകത്ത് ഇന്നു വരെ നടന്ന എല്ലാ കലാപത്തിന്റെയും വിപ്ലവങ്ങളുടെയും ഒരു വശത്ത് യഹൂദ താല്പര്യങ്ങളായിരുന്നു എന്നു ശ്രദ്ധിച്ചു നോക്കിയാൽ കാണാൻ കഴിയും.

ഇന്നത്തെ ഞങ്ങളുടെ യാത്രയുടെ ഭാഗമായി 8 മണിക്ക് തന്നെ റെഡിയായി വണ്ടിയിൽ കയറി ആദ്യമായി പോയത് ക്രിസ്റ്റ്യൻ രൂപങ്ങളും കൊന്തകളും ഒക്കെ വിൽക്കുന്ന ഒരു വലിയ കടയിലേയ്ക്കാണ് അവിടെ നിന്നും എല്ലാവരും കുറെ രൂപങ്ങളും, കൊന്തകളും ഒക്കെ വാങ്ങി. അതിന് ശേഷം ജറുശലേമിലുള്ള മ്യൂസിയം കാണുന്നതിന് വേണ്ടി പോയി. മ്യൂസിയത്തോട് ചേർന്ന് ക്രിസ്തുവിന്റെ കാലത്തെ ജറുശലേമിന്റെ മോഡൽ ഉണ്ടാക്കി വച്ചിട്ടുണ്ട്. ഇന്നത്തെ ജറുശലേമിനേക്കാൾ വലുതായിരുന്നു അന്നത്തെ ജറുശലേം നഗരം. ജറുശലേം ദേവാലയം തന്നെ ഒന്നര ഏക്കർ സ്ഥലം നിറയെ ആയിരുന്നു. ദേവാലയത്തിലേയ്ക്ക് ബലി അർപ്പിക്കാൻ കൊണ്ടു വരുന്ന മൃഗങ്ങളെ കുളുപ്പിക്കുന്ന കുളവും പട്ടണത്തിന്റെ വിവിധ ഭാഗങ്ങളെപ്പറ്റിയും എല്ലാം ഗൈഡ് വിശദീകരിച്ച് പറഞ്ഞു തന്നു. ജറുശലേം ദേവാലയത്തിന്റെ മുറ്റത്തു വരെ മറ്റുള്ള ജാതിയില്പെട്ടവർക്ക് പ്രവേശിക്കാമായിരുന്നു. എന്നാൽ അതിന്റെ അകത്തെ തൂണിന് അപ്പുറത്തേയ്ക്ക് യഹൂദൻ അല്ലാത്ത ആരെങ്കിലും പ്രവേശിച്ചാൽ അവന് കിട്ടുന്ന ശിക്ഷ മരണമായിരുന്നു. ഇത്തരം അപരിഷ്‌കൃതമായ നിയമങ്ങൾ പിൻതുടരുന്ന മതങ്ങൾ ഇപ്പോഴും ലോകത്തുണ്ട്. അവിടെ നിന്നും ഞങ്ങൾ മ്യൂസിയത്തിൽ എത്തി. മ്യൂസിയത്തിലെ ഏറ്റവും വലിയ കാഴ്ച പഴയ കാലത്തെ ബൈബിളിന്റെ കൈഎഴുത്തു പ്രതികളും ഡെഡ് സീ സ്‌ക്രോളും ഒക്കെ ആയിരുന്നു. അവ കേടു കൂടാതെ സൂക്ഷിക്കുന്നതിന് വേണ്ടി പ്രത്യേക അന്തരീക്ഷം കൃത്രിമമായി ഉണ്ടാക്കി എടുത്തിരിക്കുകയാണ്.

മ്യൂസിയം കണ്ടതിന് ശേഷം ഞങ്ങൾ ഇസ്രയേൽ പാർലമെന്റ് കാണാൻ പോയി. ക്‌നെസറ്റ് എന്നാണ് പാർലനെ്റിനെ വിളിക്കുന്നത്. ഇതിന്റെ അർഥം അസംബ്ലി എന്നാണ്. 1966ൽ ആണ് ഇതിന്റെ ഉദ്ഘാടനം നടന്നത്. 70 ലക്ഷം യുഎസ് ഡോളർ ആണ് ഇതിന്റെ ചെലവ്. ഇതു മുഴുവൻ ചിലവഴിച്ചത് ഇംഗ്ലണ്ടിലെ യഹൂദ കുടുംബമായ ജോയിംസ് ഡി റോത്ത്‌സ്‌ചൈൽഡ് ആണ്. 120 മെമ്പേഴ്‌സ് ആണ് ഇസ്രയേൽ പാർലമെന്റിലേക്ക് തെരഞ്ഞെടുക്കുന്നത് 4 വർഷമാണ് കാലാവധി. പാർലമെന്റിന് പുറത്ത് സ്ഥാപിച്ചിരിക്കുന്ന 7 ശിഖരങ്ങൾ ഉള്ള കാൻഡിൽ ഇസ്രയേലിന്റെ സിംബൽ കൂടിയാണ്. ഇത് ബ്രിട്ടീഷ് പാർലമെന്റാണ് സമ്മാനമായി നൽകിയത്. ഇവിടെ നിന്നും ഞങ്ങൾ 5 കിലോമീറ്റർ അകലെയുള്ള ക്രിസ്തുവിന്റെ ജന്മ സ്ഥലമായ ബേത്‌ലഹേമിലെ പള്ളിയും ജന്മസ്ഥലവും കാണാൻ പോയി.

ബേത്‌ലഹേം പലസ്റ്റീൻ അഥോറിറ്റി ഭരിക്കുന്ന വെസ്റ്റ് ബാങ്കിന്റെ ഭാഗമാണ്. ഇവിടുത്തെ ഭരണത്തെ എ. ബി. സി. എന്ന് മൂന്നായി തിരിച്ചിട്ടുണ്ട്. എ എന്നു പറഞ്ഞാൽ ഭരണവും സെക്യൂരിറ്റയും പലസ്റ്റീൻ അഥോറിറ്റിയുടെ കീഴിൽ ബി എന്നു പറഞ്ഞാൽ ഭരണം പലസ്റ്റീന്റെ നേതൃത്വത്തിൽ സെക്യൂരിറ്റി ഇസ്രയേലിന്റെ കൈയിലാണ് സി എന്നു പറഞ്ഞാൽ ഭരണവും സെക്യൂരിറ്റിയും ഇസ്രയേലിന്റെ കൈയിൽ സ്ഥലം പലസ്റ്റീനിന്റെയും മറ്റൊരു പലസ്റ്റീൻ ഭൂരിപക്ഷ പ്രദേശമാണ്. ഗസ്സ മുനമ്പ് അവിടെ ഇസ്ലാമിക തീവ്രവാദികളായ ഹമാസ് ആണ് ഭരിക്കുന്നത്.

ഗസ്സയിൽ നിന്നും ഇസ്രയേലിയേയ്ക്ക് നിരന്തരം റോക്കറ്റ് ആക്രമണം നടത്തി കൊണ്ടിരിക്കുന്നു. ഇസ്രയേൽ തിരിച്ച് എയർ അറ്റാക്കും നടത്തി കൊണ്ടിരിക്കുന്നു. ഇത് നൂറ്റാണ്ടുകളായി തുടരുന്ന അറബ് ഇസ്രയേൽ യുദ്ധത്തിന്റെ ഭാഗമാണ്.

ബേത്‌ലഹേം എന്ന വാക്കിന്റെ ഹീബ്രൂവിൽ ഉള്ള അർത്ഥം ബ്രോഡ് എന്നാണ് അറബിയിൽ ഉള്ള അർത്ഥം മീറ്റ് എന്നും ആണ് ദാവീദ് രാജാവിന്റെ ജന്മദേശം കൂടിയാണ് ഇത്. ജോസഫും മേരിയും ദാവീദ് രാജാവിന്റെ കുടുംബത്തിന്റെ വംശ പരമ്പരയിൽ പെടുന്നവർ ആയിരുന്നത് കൊണ്ട് അവർക്ക് നസ്രത്തിൽ നിന്നും 150 കിലോ മീറ്റർ അകലെയുള്ള ബേത്‌ലേഹേമിൽ വന്ന് ഹെറോദ് രാജാവിന്റെ ഉത്തരവ് പ്രകാരമാണ് പേര് രജിസ്റ്റർ ചെയ്യേണ്ടി വന്നത്.

ക്രിസ്തു ജനിച്ച കാലിത്തൊഴുത്ത് ഇന്ന് ഒരു വലിയ പള്ളിയാണ്. ചർച്ച് ഓഫ് നെറ്റിവിറ്റി എന്നാണ് ഇത് അറിയപ്പെടുന്നത്. എ. ഡി. 345 കോൺസ്റ്റയിൻ രാജാവിന്റെ അമ്മ ഹെലനെയാണ് ഈ പള്ളി പണിതത്. പേർഷ്യൻ കാലഘട്ടത്തിലും മുസ്ലിം കാലഘട്ടത്തിലും വിശുദ്ധ നാട്ടിലെ ഒട്ടു മിക്ക പള്ളികളും തകർക്കുകയോ മോസ്‌ക് ആക്കി മാറ്റുകയോ ചെയ്‌തെങ്കിലും ഈ പള്ളി മാത്രം തകർത്തില്ല പള്ളിയിലേയ്ക്ക് കയറണമെങ്കിൽ കുനിഞ്ഞ് വേണം കയറാൻ ഇതിന് കാരണം അക്കാലത്ത് കുതിരപ്പുറത്ത് വരുന്ന കള്ളന്മാർ കുതിരകളും ആയി പള്ളിക്കകത്ത് പ്രവേശിക്കാതിരിക്കാൻ വേണ്ടി ആയിരുന്നു. മറ്റൊരു കാരണം പറയുന്നത് ലോക സമാധാനത്തിന് വേണ്ടി ജനിച്ച യേശു ദേവന്റെ ജന്മ സ്ഥലം കാണാൻ വരുന്നവർ കുനിഞ്ഞ് വിനീതരായി കയറുന്നതിനുവേണ്ടിയാണ് എന്നും ഒരു വിവക്ഷയുണ്ട് ഈ വാതിലിന്.

പള്ളിയിൽ കയറിയ ഞങ്ങൾ ക്രിസ്തു ജനിച്ച സ്ഥലം കാണുന്നതിന് കുറച്ച് സമയം ക്യൂ നിൽക്കേണ്ടി വന്നു. ക്യൂവിൽ ലോകത്തിന്റെ വിവിധ തുറകളിൽ നിന്നും ഉള്ളവരെ കാണാമായിരുന്നു. ഈ പള്ളിയുടെ നിയന്ത്രണം ഗ്രീക്ക് ഓർത്തഡോക്‌സ് സഭയ്ക്കാണ്. ഒരു ഭാഗം അർമേനിയൻ സഭയുടെ നിയന്ത്രണത്തിലാണ്. കത്തോലിക്ക സഭയ്ക്ക് ഒരു ചെറിയ ചാപ്പൽ ഇവിടെ ഉണ്ട്. ഞങ്ങളുടെ അന്നത്തെ കുർബാന ഈ ചാപ്പലിൽ വച്ചായിരുന്നു. ഞങ്ങളുടെ കുർബാനയിൽ വിശുദ്ധനാടു കാണാൻ വന്ന രണ്ട് അമേരിക്കക്കാരും പങ്കെടുത്തു. ഫാ: എബ്രഹാമാണ് കുർബാന അർപ്പിച്ചത്. ഈ പള്ളിയോട് ചേർന്നിരിക്കുന്ന ബസിലിക്കയിൽ എല്ലാ വർഷവും ക്രിസ്തുമസ്സ് ദിനങ്ങളിൽ നടക്കുന്ന കുർബാനയിൽ പാലസ്റ്റയിൻ ആതോറിറ്റി ചെയർമാനും ബേത്‌ലഹേം മേയറും പങ്കെടുത്തു.

ലോകത്തിലെ ഏറ്റവും പഴക്കം ചെന്ന ക്രിസ്ത്യൻ സമൂഹം ആയിരുന്നു ഇവിടെ ഉണ്ടായിരുന്നത് 80% ക്രിസ്ത്യൻസും 20% മുസ്ലിംങ്ങളും ആയിരുന്നു ഇവിടെ ഉണ്ടായിരുന്നത്. പിന്നീട് ഉണ്ടായ രാഷ്ട്രീയ സ്ഥിരത ഇല്ലായ്മ കൊണ്ട് ക്രിസ്ത്യൻസ് ഇവിടെ നിന്നും ലോകത്തിന്റെ ഇതര ഭാഗങ്ങളിലേക്ക് കുടിയേറി ഇന്ന് 80% മുസ്ലിംങ്ങളും 20% ക്രിസ്ത്യൻസുമാണ് ഇവിടെ ജീവിക്കുന്നത്.

പള്ളിയും പരിസരവും എല്ലാം കണ്ടതിന് ശേഷം ഞങ്ങൾ ഉച്ച ഭക്ഷണത്തിനായി ഒരു ഹോട്ടലിൽ കയറി. ഞങ്ങളുടെ സംഘത്തിലെ ഷാരോണിന്റെ ബേർത്ത് ഡേ കൂടിയായിരുന്നു അന്ന് അപ്രതീക്ഷിതമായി ഒരുക്കിയ ബർത്ത ഡേ ആഘോഷം വളരെ മനോഹരമായിരുന്നു. കേക്ക് മുറിച്ച് ഞങ്ങൾ ഹാപ്പി ബർത്ത് ഡേ ഗാനം പാടി കഴിഞ്ഞപ്പോൾ ഞങ്ങളുടെ അടുത്തിരുന്ന പോളണ്ടിൽ നിന്നു വന്ന ഗ്രൂപ്പുകാർ അവരുടെ ഭാഷയിൽ ബർത്ത് ഡേ ഗാനം ആലപിച്ച് ഷാരോണിന് ഭാവുകങ്ങൾ നേർന്നു. ഇത് എല്ലാവർക്കും ഒരു നല്ല അനുഭവമായി തോന്നി.

ഭക്ഷണത്തിനു ശേഷം ക്രിസ്തു ജനിച്ച വിവരം മാലാഖമാർ ആട്ടിടയന്മാരെ അറിയിച്ച ഷെപ്പേർഡ് ചർച്ച് കാണാൻ പോയി അവിടെ ആട്ടിടയന്മാർ താമസിച്ചിരുന്ന ഗുഹയും അതിനോട് ചേർന്നുള്ള പള്ളിയും ഒക്കെ കണ്ട് ഞങ്ങൾ തിരിച്ച് ഹോട്ടലിലേയ്ക്ക് പോയി.
തുടരും..

കരിങ്കുന്നത്ത് നിന്നും ജറുസലേമിലേക്കുള്ള ദൂരം- ഇസ്രയേൽ യാത്ര 1
പൂക്കളുടെ നഗരം അഥവാ സീസേറിയ- ഇസ്രയേൽ യാത്ര 2
നസ്രത്തും മാതാവിന്റെ കിണറും- ഇസ്രയേൽ യാത്ര 3
ഇടുക്കിയിൽ കണ്ട യഹൂദനും ഇസ്രയേലിൽ കണ്ട യഹൂദനും- ഇസ്രയേൽ യാത്ര 4

 

Stories you may Like

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

More News in this category+

MNM Recommends +

Go to TOP